1. Chuma muka chasolokele kuli mukweze umwe hanyima yakwivwilila kuchihande chahakukunguluka changalila mu 1935?

KWAPWILE mukweze umwe uze vambapachishile mu 1926 omu apwile namyaka yakusemuka 18. Visemi jenyi vapwilenga vaka-kulinangula Mbimbiliya. Omu mukiko vavulukilenga Vinjiho jaYehova halwola kana. Ou mukweze asemukile mutanga yavana vatanu, malunga vatatu, mapwevo vavali. Kaha vavanangwile kuli visemi javo vazachilenga Yehova Kalunga nakulondezeza Yesu Kulishitu. Ngana muze valingilenga Vaka-Kulinangula Mbimbiliya vosena halwola kana, ou mukweze nayikiye alilenga mbolo nakunwa vinyo mwaka himwaka haKulya chaMwata chaChingoloshi. Oloze lutalililo lwenyi lwalumukile omu evwililile kuchihande chachilemu chakwamba ngwavo “Lizavu Lyalinene.” Chihande kana vachihanjikile mu 1935 kuli ndumbwetu J. F. Rutherford, hakukunguluka changalila chize chapwile munganda yaWashington D.C., U.S.A. Vyuma muka valinangwile vaka-kulinangula Mbimbiliya hakukunguluka kana?

2. Muchano muka wakwivwisa kuwaha alumbunwine ndumbu Rutherford muchihande chenyi?

² Muchihande ahanjikile ndumbu Rutherford, alumbunwine vatu vaze vatwama ‘muliyongomena lyalinene’ lize vavuluka hali Kusoloka 7:9. Hakavanga, Vaka-Kulinangula Mbimbiliya vashinganyekelenga ngwavo, liyongomena lyalinene lyapwa lizavu lyavatu vaze navakaya mwilu oloze kavapwa vakushishika chikumako. Ndumbu Rutherford azachishile Visoneka mangana alumbunune ngwenyi liyongomena lyalinene kavalisakula  mangana likaye mwiluko, oloze lyapwa mikoko veka * vaKulishitu vaze navakayovoka ‘haluyando lwalunene,’ nakukayoyela hano hamavu haya myaka yosena. (Kuso. 7:14) Yesu ambile ngwenyi: “Nguli namikoko veka nawa, vaze kaveshi vakulimba linoko. Navakiko nawa ngwatela kuvaneha, kaha navevwililanga kulizu lyami, ngocho navapwanga utanga umwe, nakafunga umwe.” (Yowa. 10:16) Ava mikoko vapwa Vinjiho jaYehova vakushishika, vaze vatalilila kukayoyela mupalachise hano hamavu haya myaka yosena. (Mateu 25:31-33, 46) Tushimutwilenu omu muchano kana walumwine kuyoya chavatu jaYehova vavavulu, kuhakilako nandumbwetu uze twavulukanga mupalangalafu yinafumuho.—Samu 97:11; Vishi. 4:18.

3-4. Kwalumuka muka vatachikijile vatu vaze vapwile kukukunguluka changalila chamu 1935, kaha mwomwo ika?

³ Vatu vosena vawahililile chikuma hakukunguluka kana, omu ndumbwetu Rutherford ahanjikile ngwenyi: “Vosena vaze vatwama nalutalililo lwakukatwama hano hamavu haya myaka yosena vakatuke.” Ndumbwetu umwe uze apwile kukukunguluka kana ambile ngwenyi, havatu kafwe 20,000 vapwile mulizavu, vavavulu vakatukile. Kaha ndumbwetu Rutherford ambile ngwenyi: “Talenu! Ava vakiko vanapu liyongomena lyalinene.” Kaha vatu mulizavu vasakwililile chikuma. Vaze vakatukile vejivile ngwavo kavavasakwile vayenga nakuyoyela mwiluko. Vatachikijile ngwavo Kalunga kavawavishileko. Likumbi lyakavangijileho, vambapachishile vatu vakuheta ku 840. Kaha havatu kana vavavulu vapwile mikoko veka.

⁴ Hanyima yachihande kana, uze ndumbwetu wamukweze navandumbwetu veka vavavulu, vechele kulya mbolo nakunwa vinyo hachilika chaKulya chaMwata chaChingoloshi. Vatu vavavulu vevwile nganomu evwile ndumbwetu umwe uze ambile ngwenyi: “Chilika chaKwanuka Kufwa chaMwata chize chapwile mu 1935, chikiko chapwile chamakumishilo kuli ami kulya vifwanyisa. Ngwatachikijile ngwami Kalunga kanguwavishileko, oloze ngukwechi lutalililo lwakukatwama hano hamavu, nakukalingisa mavu kupwa palachise.” (Loma 8:16, 17; Koli. 2, 1:21, 22) Kufuma vene haze, liyongomena lyalinene linatohwelangako lika, kaha lili nakuzachila hamwe navawavisa vasalaho. *

5. Uno Yehova amona ngachilihi vaze vecha kulya kuvifwanyisa?

⁵ Uno Yehova amona ngachilihi vatu vaze vechele kulya vifwanyisa hachilika chaKwanuka Kufwa chaMwata hanyima ya 1935? Kaha eji kumonanga ngachilihi vaze veji kulyanga mbolo nakunwa vinyo hachilika chaKulya chaMwata chaChingoloshi, kaha kutwala muze hinavamona jino ngwavo Yehova kavawavishileko? (Koli. 1, 11:28) Vamwe vanalinga kuvifwanyisa mwomwo yakushinganyeka ngwavo pamo navakaya mwilu. Oloze nge navetavila ngwavo valimbenjele nakwecha kulya vifwanyisa nakutwalaho lika kuzachila Yehova nakashishi, kaha Yehova mwavalavila hamikoko veka. Numba tuhu vecha kulya mbolo nakunwa vinyo, oloze veji kupwanga lika kuchilika chaKwanuka Kufwa chaMwata, mangana  vasolole kusakwilila chavo havyuma avalingila Yehova naYesu.

6. Uno Yesu alwezele vangelo valinge ika?

⁶ Hakuwana nge luyando lwalunene luli hakamwihi, ngocho nachiwaha kukekesa vyuma wahanjika mukanda waKusoloka kapetulu 7, hali vaka-Kulishitu vawavisa naliyongomena lyalinene lyamikoko veka. Yesu alwezele vangelo vatwaleho lika kukwachilila jipeho jiwana jakunongesa, palanga nomu vaka-Kulishitu vawavisa vosena navakavalamika tutachikijilo, kulumbununa kuvamona kuli Yehova ngwenyi vanapunga lika vakushishika. (Kuso. 7:1-4) Ava vandumbu jaKulishitu vawavisa navakatambula fweto yakupwa vamyangana, kaha nawa vapilishitu mwilu mwomwo yakushishika chavo. (Kuso. 20:6) Yehova, naYesu, navangelo navakawahilila chikuma hakumona vawavisa vosena navatambula fweto yavo mwilu.

7. Kweseka naKusoloka 7:9, 10, veya amwene Yowano, kaha vapwile nakulinga ika? (Talenu muvwimbimbi wahalipapilo lyahelu.)

⁷ Omu Yowano akumishile kuhanjika hali vaze 144, 000, vaze navakapwa vamyangana navapilishitu mwilu, ahanjikile nawa ‘haliyongomena lyalinene,’ lize nalikayovoka haAlamangetone. Muliyongomena kana mwatwama vatu vavavulu chikuma. Kaha katwatachikiza nakuvula chavoko. (Tangenu Kusoloka 7:9, 10.) Yowano ambile ngwenyi ‘vanavwale vikuto vitoma,’ kulumbununa nge vanapunga lika ‘vakuzeneka lipenga’ mukaye kaSatana, nakupwanga lika vakushishika kuli Kalunga naKulishitu. (Yako. 1:27) Kaha vatambakanyine nalizu lyakukangwoka ngwavo, ulwilo wavo wafumine kuli Yehova naYesu uze apwa Mwanamukoko waKalunga. Kaha nawa vakwachile mitango yamavale nakusolola nge vetavilile Yesu uze vatongola kuli Yehova kupwa Mwangana.—Esekesenuko Yowano 12:12, 13.

8. Vyuma muka wahanjika mukanda waKusoloka 7:11, 12, kutalisa kutanga yaYehova yamwilu?

⁸ Tangenu Kusoloka 7:11, 12. Uno vaze vatwama mwilu valingile ika omu vamwene liyongomena lyalinene? Yowano avamwene vanawahilila. Ngocho vaputukile kwalisa Kalunga. Tanga yaYehova yamwilu nayikawahilila omu nayikamona kutesamo chavyuma vize amwene Yowano, omu liyongomena lyalinene nalikayovoka haluyando lwalunene.

9. Kweseka naKusoloka 7:13-15, vyuma muka linakulinga liyongomena lyalinene oholyapwa?

⁹ Tangenu Kusoloka 7:13-15. Yowano ambile ngwenyi vatu vamuliyongomena lyalinene ‘vakosele vikuto vyavo nakuvitomesa mumanyinga aMwanamukoko.’ Echi chasolola nge vatwama navivezu vitoma nakuvevwila nawa uselewa kuli Yehova. (Isa. 1:18) Vapwa vaka-Kulishitu valihana nakuvambapachisa, vaze vafwelela mundando yaYesu, kaha nawa vatwama nausoko wamwaza naYehova. (Yowa. 3:36; Petu. 1, 3:21) Ngocho vatamo kwimana kulitanda lyaKalunga, nakumuzachilanga “mulimo wajila musana naufuku” muchipango chatembele yenyi yakushipilitu yahano hamavu. Namakumbi ano vali nakuzata mulimo wakuvilika Wangana, nakunangula vatu vapwenga tumbaji, mwomwo vamona Wangana waKalunga kupwa waulemu chikuma.—Mateu 6:33; 24:14; 28:19, 20.

10. Uno liyongomena lyalinene lyafwelela chuma muka, kaha navakamona kutesamo chalushiko muka?

¹⁰ Vatu vamuliyongomena lyalinene vaze navakayovoka haluyando lwalunene vafwelela ngwavo Kalunga mwakatwalaho lika kuvazakama mwomwo “uze atwama halitanda mwakatanduwila mbalaka yenyi hali vakiko.” Mikoko veka navakamona kutesamo chalushiko lwaKalunga luze vanatalililanga lwakwamba  ngwavo: “[Kalunga] mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kuso. 21:3, 4.

11-12. (a) Kweseka naKusoloka 7:16, 17, vyuma muka vyamwaza lyatalilila liyongomena lyalinene? (b) Chuma muka vanahase kulinga mikoko veka haKwanuka Kufwa chaMwata, kaha mwomwo ika?

¹¹ Tangenu Kusoloka 7:16, 17. Vatu jaYehova vamwe kaveshi navyakulyako, mwomwo yakuhona kupwa najimbongo, chipwe mwomwo yavikokojola yamulifuchi najijita. Veka vanavakase mutumenga mwomwo yavyuma vafwelela. Vatu vamuliyongomena lyalinene vawahilila mwomwo vatachikiza ngwavo nge Kalunga nanongesa lyehi kaye kakuhuka, kaha navapwa nakulya chachivulu chakumujimba nachakushipilitu. Omu Yehova mwakanongesa kaye kaSatana nautenu wenyi, uze wapwa nge “musana,” keshi kukanongesela kumwe naliyongomena lyalineneko. Omu nalukakuma luyando lwalunene, Yesu mwakatwaminyina vaze navakayovoka, ‘kumeya akuyoya chahaya myaka yosena.’ Kuli chuma chakulipwila lyatalilila liyongomena lyalinene. Havatu vosena vaze vayoyaho lyehi, vakiko kaha pamo kaveshi kukafwako.—Yowa. 11:26.

¹² Mikoko veka vatwama nalutalililo luze lweji kuvalingisanga vasakwilile Yehova naYesu. Numba tuhu kavavasakula vayenga nakuyoyela mwiluko, oloze navakiko Yehova avamona kupwa vavalemu. Vawavisa namikoko veka veji kwalisanga Kalunga naKulishitu. Jila yimwe veji kulingilangamo ngocho shina kupwanga kuchilika chaKulya chaMwata chaChingoloshi.

13-14. Mwomwo ika vatu vosena vatela kupwa kuchilika chaKwanuka Kufwa chaKulishitu?

¹³ Mumyaka yakalinwomu, havatu vaze vanapunga kuchilika chaKwanuka Kufwa chaMwata, vavandende kaha vakiko vanalinga mbolo nakunwa vinyo. Echi chili nakulumbununa nge muvikungulwilo vyavivulu, nou eji kulyanga kuvifwanyisa vene wauchi. Kaha nawa chasolola nge havatu vaze veji kupwanga kuchilika chaKwanuka Kufwa chaMwata, vavavulu vatalilila kukayoyela hano hamavu. Jino mwomwo ika veji kupwilanga kuchilika kana? Shinganyekenu hachakutalilaho  chino. Mwomwo ika vatu veji kuyilanga kuchifupawenga chasepa lyavo? Veji kupwangako mangana vakundwize sepa lyavo, nakusolola ngwavo vamuzanga. Chochimwe nawa, namikoko veka veji kupwanga kuchilika chaKwanuka Kufwa chaMwata, mangana vakundwize Kulishitu navaze vawavisa, nakusolola ngwavo vavazanga. Mikoko veka veji kupwanga nawa kuchilika kana mangana vasolole ngwavo vasakwilila wana waYesu, uze naukavalingisa vakayoye haya myaka yosena hano hamavu.

¹⁴ Chuma chikwavo chachilemu cheji kulingisanga mikoko veka vapwenga kuchilika chaKwanuka Kufwa chaMwata, shina kwononoka lushimbi lwaYesu. Omu Yesu aputukile chilika chaKulya chaMwata chaChingoloshi, alwezele vaposetolo jenyi vakushishika ngwenyi: “Lingenunga lika ngocho mungwanukilengaho ami.” (Koli. 1, 11:23-26) Shikaho mikoko veka navatwalangaho lika kupwanga kuchilika kana swi nomu vawavisa vosena navakaya mwilu. Mikoko veka veji kulanyanga vatu vosena vapwenga navo kuchilika chaKwanuka Kufwa chaMwata.

15. Jijila muka tunahase kwalishilamo Kalunga naKulishitu nge tuli kuchilika chaKwanuka Kufwa chaMwata?

¹⁵ Hachilika chaKwanuka Kufwa chaMwata, tweji kwalisanga Kalunga naKulishitu hakwimba myaso nakulomba. Chihande chauno mwaka chili namutwe wakwamba ngwavo, “Sakwililenunga Kalunga naKulishitu haVyuma Vamilingila.” Chihande kana nachikatukafwa tusakwililenga chikuma Yehova naKulishitu. Mbolo navinyo vize navakahichisamo, navikatwanukisa mujimba waYesu namanyinga enyi. Natukanuka nawa ngwetu Yehova atumine Mwanenyi kwiza nakutufwila mangana tukayoye. (Mateu 20:28) Shikaho, vosena vaze vazanga Setu wamwilu naMwanenyi, navakapwa kuchilika chaKwanuka Kufwa chaMwata.

16. Uno vaka-Kulishitu vawavisa namikoko veka valifwanyina halihi?

¹⁶ Yehova amona vawavisa namikoko veka kupwa vavalemu. Kakweshi lizavu lyalilemu kuhambakana likwavoko. Vosena avalanjile nandando yoyimwe, kuyoya chaMwanenyi azanga. Oloze valihandunwina kaha havyuma vatalilila. Mazavu osena avali, atela kupwa akushishika kuli Kalunga naKulishitu. (Samu 31:23) Anukenu ngwenu Yehova eji kuhananga shipilitu yenyi yajila kuli kala mutu kweseka navyuma anakusaka, numba apwa wakuwavisa chipwe mukoko weka.

17. Vyuma muka vatalilila vawavisa vasalaho?

¹⁷ Vaka-Kulishitu vawavisa kavasemuka nalutalililo lwakukayoyela mwiluko, oloze Kalunga ikiye eji kuvahananga lutalililo kana. Ngocho veji kulombanga nakushinganyeka  halutalililo lwavo, nakuvandamina kukatambula fweto mwilu. Kavatachikiza omwo mijimba yavo nayikapwa mwiluko. (Fwili. 3:20, 21; Yowa. 1, 3:2) Oloze vatalilila kukapwa hamwe naYehova, naYesu, navangelo, navawavisa vosena, nakukatwama nawa hamatanda muWangana wamwilu.

18. Vyuma muka vatalilila mikoko veka?

¹⁸ Mikoko veka vatalilila kukatwama hano hamavu haya myaka yosena, chuma chize vafwila vatu vosena. (Kwambu. 3:11) Vatalilila kulwola luze navakalingisa hamavu hosena kupwa Palachise. Navakalivwisa nawa kuwaha kutunga jizuvo javo, nakukalima mande avo, nakukapwa vakulikangula hamwe navana vavo. (Isa. 65:21-23) Navakayanga nawa nakumona jipili, namisenge, natulwiji, nakukalinangula nawa vyuma vize atenga Yehova. Chuma chachilemunyi shina vawahilila hakutachikiza ngwavo usoko wavo naYehova naukayanga nakukolelako lika.

19. Chuma muka tweji kulinganga tuvosena hachilika chaKwanuka Kufwa chaMwata, kaha uno mwaka nachipwako halikumbi muka?

¹⁹ Yehova afwelelesa vangamba jenyi vosena vyuma vyamwaza. (Yele. 29:11) Hachilika chaKwanuka Kufwa chaKulishitu, tuvosena tweji kwalisanga Kalunga naKulishitu havyuma vatulingila, mangana tukayoye haya myaka yosena. Chilika chaKwanuka Kufwa chaMwata chapwa hikukunguluka chachilemu chikuma, chize veji kupwanga nacho vaka-Kulishitu vamuchano mwaka himwaka. Uno mwaka nachipwako lyaSateli, March 27, 2021. Vandumbwetu vavavulu vatwama kuvihela kuze kavakanyisa kukunguluka kanako. Veka nawa navakapwa kukunguluka kana chamokomoko nakuvafumbukila. Kaha vakwavo navakalingila chilika kana mutumenga. Yehova, naYesu, navangelo, navawavisa vaze vaya lyehi mwilu veji kutumonanga. Shikaho tunakulomba ngwetu kalivwisenu kuwaha chilika chaKwanuka Kufwa chaMwata mwachikungulwilo, chipwe mwalizavu, chipwe hauka.