1. Uzye ilyasi lyalanzilwe pa ukongano umu 1935 lyavwile uli uwacance?

UWACANCE wali ni myaka 18 lino wabatiziwe umu 1926. Avyazi yakwe yali Asambi yakwe Baibo vino yamanga ya Nte Yakwe Yeova pa nsita iya. Yakweti ana aonsi yatatu na anaci yaili, yano yasambilizye ukuombela Yeova Leza nu kukolanya Yesu Klistu. Wakwe vino cali uku Asambi yakwe Baibo yonsi mpiti, uwacance wii umulumendo walyanga mukate nu kumwa waini cila mwaka pa Cakulya Ca Manguzi Ica Mwene. Nomba upaalilo wakwe wizile iusenuka lino uvwile ilyasi ilyali licindame ilyakweti umutwe wakuti “Iumba Likalamba.” Ilyasi lii lyalanzilwe umu 1935 nu mwina J. F. Rutherford apa ukongano uwayelile umu Washington, D.C., uku U.S.A. I vyani vino Asambi yakwe Baibo yasambilile pa ukongano uwa?

2. I cumi ci cino umwina Rutherford walondolwile umwi lyasi lyakwe?

² Umwi lyasi lii, Mwina Rutherford walondolwile yayo aali nu kupanga “iumba likulu cuze” ilyalondololwa pali Umbwilo 7:9. Pa nsita iya, asambi yakwe Baibo yelenganyanga ukuti aali umwi umba likalamba ilyali nu kuya ukwi yulu yatakweti sana utailo wa apakwe. Umwina Rutherford waomvizye Amalembelo pa kulondolola ukuti iumba likalamba litasoololwa ukuya ukwi yulu, lelo amu mfwele na zyuze * zyakwe Klistu aalapusuka ‘ucuzi ukulu cuze’ yalikala  amanda pe pano nsi. (Umbw. 7:14) Yesu walanzile ukuti: “Nkweti mfwele na zyuze zino zisi zyamu citata cii. Nazyo kwene namala nde nzilete. Ziluvwa izwi lyane nga zilaya ufyo onga nu mucemi wenga.” (Yoa. 10:16) Amu mfwele na zyuze yakaimililako ya Nte Yakwe Yeova aya na ucisinka nupya aakwata upaalilo wa kwikala umu Paladaise pano nsi. (Mate. 25:31-33, 46) Lekini tulole vino ukuvwikisya icumi ca muli Baibo kwasenwile ama umi ya antu yakwe Yeova aingi ukwikako sile nu mwina wino itulandapo uwali ni myaka 18.—Masa. 97:11; Mapi. 4:18.

3-4. Pa ukongano uwaliko umu 1935, i vyani vino antu aingi ilwike pali vino yamanyile pa upaalilo wao, nupya u mulandu ci?

³ Pali sana insansa pa ukongano uu lino kalanda wizile anena aali mwi umba ukuti: “Yayo yonsi aakwata upaalilo wa kwikala pano nsi amanda pe yimilile!” Umwina umwi uwazanyilwe ku ukongano uu walanzile ukuti waweni antu ukucila pali 20,000 aali umwi umba yimilila. Lyene umwina Rutherford walanzile ukuti: “Lolini! Iumba likulu cuze!” Pa cisila yonsi aali umwi umba yatandike ukupunda nu luzango. Yayo yonsi aimilile yamanyile ukuti Yeova ataayasoolwile ukuya ikala ukwi yulu. Yamanyile ukuti yataapasilwe nu mupasi wakwe Leza. Pa wanda walondelilepo pa ukongano uu, ya Nte apya 840 yabatiziwe nupya aingi pali yayo yali amu mfwele na zyuze.

⁴ Lyene pa cisila ci lyasi lii, umwina uwacance wino itulandapo mpiti alino na antu yauze aingi yatiile ukulya mukate nu kumwa waini pa wanda wa Cakulya ca Manguzi Ica Mwene. Aingi yayuvwile wakwe vino umwina umwi wayuvwile, walanzile ukuti: “Umu 1935 ali mwaka uno nasyalikizye ukulya mukate nu kumwa waini. Nizile imanya ukuti Yeova ataaomvizye umupasi wakwe uwa muzilo ukumpeela upaalilo wa kuya ukwi yulu, lelo nakweti upaalilo wa kwikala pano nsi nu kwazwilizya umu mulimo wa kulenga insi ukuya paladaise.” (Loma 8:16, 17; 2 Kol. 1:21, 22) Kufuma pa nsita iya, iumba likulu cuze likakulilako sile nupya lyatwalilila ukuombela pamwi na pakwe acili pano nsi.

5. Uzye Yeova akalola uli yayo aata ukulya vinkolanya pa Ciusyo?

⁵ Uzye Yeova akalola uli yayo aatile ukulya vinkolanya pa Ciusyo pa cisila ca mwaka wa 1935? Nga ndi cakuti Nte umubatiziwe akalya mukate nu kumwa waini pa Cakulya ca Manguzi Ica Mwene nomba lino papita insita wiluka ukuti atapakwa nu mupasi wa muzilo? (1 Kol. 11:28) Yamwi yakalya vinkolanya pa mulandu wakuti yatamanya upaalilo uno yakwata. Nomba ndi cakuti iluka ukuti yaluvwanyizye nupya yata nu kulya yatwalilila ukuya acisinka lino ya kuombela Yeova, alayapokeleela ukuya amu mfwele na zyuze. Nanti icakuti yasilya mukate nu kumwa waini, yacili yakazanwa uku Ciusyo pa mulandu wakuti yakataizya pali vino Yeova na Yesu yayacitila.

6. I vyani vino Yesu wanena angeli ukucita?

⁶ Pa mulandu wakuti ucuzi ukulu cuze watiupalama, icicindama ukusambilila pa cipande 7 muli Umbwilo icikalanda pa Ina Klistu apakwe na pi umba likulu cuze ilya mfwele na zyuze. Yesu wanenyile angeli ukutwalilila ukulemelela imiza  ini iyaononyi. Yali nu kutwalilila ukulemelela imiza iyo ukufikila lino Aina Klistu ikilwa ivimanyililo apa mausyu yao, kuli kuti kufikila lino Yeova alayapingula ukuti yaya ni cisinka. (Umbw. 7:1-4) Aina yakwe Klistu apakwe, yalalambulwa pali ucisinka wao lino yalaya aene nupya ya simapepo na Klistu ukwi yulu. (Umbw. 20:6) Yeova, Yesu, alino na angeli yalaya sana ni nsansa ukulola ya 144,000 apakwe yapokelela icilamba ica kuya ukwi yulu.

7. Wakwe vino calondololwa pali Umbwilo 7:9, 10, aaweni yano Yoane waweni umu cilolwa, nupya i vyani vino yacitanga? (Lolini icikope icili pa nkupo.)

⁷ Pa cisila ca kulanda pali ya 144,000 aene nupya yasimapepo, Yoane waweni icintu na cuze icakuzungusya, “iumba likulu cuze” ilyapuswike pa Alamagedoni. Ukupusanako ni umba lya kutandikilapo, iumba lyakwe ciili i likalamba nupya litange lipendwe. (Belengini Umbwilo 7:9, 10.) Yazwala “mingila itiswe,” ukulangilila ukuti yaisunga uku viipe ivya mu nsi ii yakwe Satana nupya yatwalilila ukuya acisinka kuli Leza na kuli Klistu. (Yako. 1:27) Yakalanda ukuti yapusuka pa mulandu na vino Yeova na Yesu, Umwana wa Mfwele wakwe Leza, yayacitila. Nupya yalema ni misambo ya tuncindu ukulangilila ukuti yaya nu luzango ukuzumila Yesu Umwene wino Yeova wasonta.—Loliniko na Yoane 12:12, 13.

8. I vyani vino ilembelo lya umbwilo 7:11, 12 likatunena pali Yeova, Yesu, angeli na apakwe atutuululwa?

⁸ Belengini Umbwilo 7:11, 12. I vyani ivyacitike lino akwi yulu yaweni iumba ilikulu cuze? Yoane waweni ukuti yonsi ukwi yulu yali nu luzango nupya yalumbanyizye Leza lino yaweni iumba ilikulu cuze. Akwi yulu yalaya sana ni nsansa lino icilolwa cakwe Yoane cilafikiliziwa, lino amwi umba ilikulu cuze yalapusa umu ucuzi ukalamba.

9. Ukulingana na Umbwilo 7:13-15, i vyani vino amwi umba likulu ya kucita ndakai?

⁹ Belengini Umbwilo 7:13-15. Yoane walemvile ukuti amwi umba likalamba “yene yafula mingila yao nu kuiswefya mu wazi wa Mwana wa mfwele.” Cii cikalangilila ukuti yaya na kampingu umusanguluke nupya Yeova wayatemwa. (Eza. 1:18) A Ina Klistu aipeela nu kubatiziwa, aakwata utailo ukome umwi lambo lyakwe Yesu nupya yakwata ucuza usuma na Yeova. (Yoa. 3:36; 1 Pet. 3:21) Ali mulandu uno Leza wayatemelwa pano yakaipeelesya “kutumikila Leza” musanya nu usiku pano nsi mu ng’anda yakwe Leza iya unkolanya. Ndakai, yacincila nupya yakaombesya ukusimikila pa Wene nu mu mulimo wa kupanga asambi pano Uwene wakwe Leza ali cintu cicindame kuli aliyo.—Mate. 6:33; 24:14; 28:19, 20.

10. I vyani vino amwi umba likalamba yamanya, nupya ulayo ci uno yakalolela uce ufikiliziwe?

¹⁰ Aaya umwi umba ilikulu cuze alapusuka ukufuma umu ucuzi ukalamba yamanya ukuti Leza alatwalilila ukuyasakamala pano “Wino atenzi pa cilimba ca wene alayacingilila pa kuya nao.” Ulayo uno amu mfwele na zyuze yakalolela ukuti uce ufikiliziwe, ulafikiliziwa lino: “[Leza] wene alayakumbula minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vyampiti vyati vipita.”—Umbw. 21:3, 4.

11-12. (a) Ukulingana na Umbwilo 7:16, 17, a mapaalo ci yano aya umwi umba likulu cuze yalapokelela? (b) I vyani vino amu mfwele na zyuze yangacita pa Ciusyo, nupya u mulandu ci?

¹¹ Belengini Umbwilo 7:16, 17. Ndakai,  antu yali ni nzala pano yatakweti impiya izingi izyakukalila ivyakulya vino yakulondekwa nanti pa mulandu ni ntazi izili wa nkondo alino nu unkalwe. Yamwi yakayanyepa pa mulandu nu utailo wao. Amwi umba likulu cuze yaya ni nsansa pano yamanya ukuti pa cisila ca kupusuka ukononwa kwa nsi ii ipe, lyonsi yalakwata ivyakulya ivingi nupya yalasambiliziwa na Yeova. Lino Yeova alonona insi ii yakwe Satana alasininkizya ukuti amwi umba likulu cuze yacingililwa uku ukali wakwe ulaya wa “cipuki.” Lino ucuzi ukulu cuze ulasila, Yesu alatungulula yonsi aalapusuka “ku tufukoka twa manzi yano akapeela umi.” Tale elenganyini: Amwi umba likulu cuze yakwata upaalilo ucindame. Antu aingi sana alipo yatalatala yafwe!—Yoa. 11:26.

¹² Amu mfwele na zyuze yakataizya Yeova na Yesu pa upaalilo usuma uno yakwata! Nanti i cakuti Yeova atayasoolwile ukuya ikala ukwi yulu, nomba wayatemwa wakwe vivi kwene vino watemwa apakwe. Yonsi kwene apakwe na amu mfwele na zyuze yangalumbanya Leza na Klistu. I nzila yonga ino yakacitilamo vivyo ukuzanwa uku Cakulya ca Manguzi Ica Mwene.

13-14. U mulandu ci uno apakwe na mu mfwele na zyuze yalinzile ukulazanwa uku Ciusyo ca mfwa yakwe Klistu?

¹³ Mu myaka ya likwene, umuntu wenga pa antu 1,000 aakazanwa ku Ciusyo aakalya umukate nu kumwa waini. Cii cikupiliula ukuti umu vilongano ivingi umu nsi yonsi mutaya aakalya mukate nu kumwa waini pa Ciusyo. Cii cikalangilila ukuti antu aingi aakazanwa uku Ciusyo yakwata upaalilo wa kwikala pano nsi. Nomba, u mulandu ci uno yakazanilwa uku Cakulya ca Manguzi Ica Mwene? Yakazanwa wakwe vivi kwene vino antu yakazanwa uku winga wakwe cuza wao. Yakazanwa uku winga pa kulanga ukuti yatemwa nupya yakulonda ukutungilila akutwalana. Vikwene avino caya nu ku amu mfwele na zyuze, yakazanwa uku Ciusyo pano yakalonda ukulanga ukutemwa nu kutungilila Klistu na apakwe. Nupya amu mfwele na zyuze yakazanwa uku Ciusyo pakuti yalanga ukuti yakataizya  pali vino impolelwa yakwe Yesu yalenga ukuti yakikale amanda pe pano nsi.

¹⁴ Umulandu na uze ucindame uno amu mfwele na zyuzye yakazanilwa uku Ciusyo u kulanga ukuti yakauvwila isunde lyakwe Yesu. Lino Yesu watandike ukuzevya Cakulya ca Manguzi Ica Mwene na atumwa yakwe acisinka, wayanenyile ukuti: “Mwacita cii pa kunjiusya.” (1 Kol. 11:23-26) Fwandi amu mfwele na zyuze yatwalilila ukuzanwa uku Ciusyo pa mulandu wakuti apakwe yamwi yacili pano nsi. Nupya amu mfwele na zyuze yakaamako na yauze pakuti yazanweko uku Ciusyo.

15. I vyani vino tungacita pakuti tulumbanye Leza na Klistu pa Ciusyo?

¹⁵ Lino tuli pa Ciusyo, tukalanga ukuti tukataizya Leza na Klistu lino tukwimba inyimbo nu kupepa. Ilyasi ililayako umwaka uu likuti: “Mwataizya Pali vino Leza na Klistu Yamucitila!” Lilatwazwa ukulataizya Yeova na Klistu. Lino yalaapisyamo ivinkolanya, tulaenganya pali vino vikaimililako kuli kuti umwili wakwe Yesu nu wazi wakwe. Nupya tulaenganya na pali vino Yeova watulanzile ukutemwa lino watumile umwana wakwe ukwizatufwila pakuti tukaye nu umi. (Mate. 20:28) Wensi uwatemwa Tata witu uwa kwi yulu nu Mwanakwe alalonda ukuzanwa uku Ciusyo.

16. A muli vyani muno apakwe na amu mfwele na zyuze yakolana?

¹⁶ Apakwe na amu mfwele na zyuze yatapusana. Yeova atatemwa iumba limwi ukuluta ilyuze. Apakwe na amu mfwele na zyuze yonsi yacindama kuli Leza nupya watemwa maumba yonsi kwene. Twamanya vivyo pano umutengo uno wakaliile apakwe na amu mfwele na zyuze uli umwi, kuli kuti umi wa mwana wakwe. Upusano uwaya pa maumba yaa yaili uwakuti yakwata upaalilo upusane. Yonsi kwene aya umu maumba yaa yaili yalinzile ukutwalilila ukuya acumi kuli Leza na kuli Klistu. (Masa. 31:23) Nupya iusyini ukuti umupasi wakwe Leza ungaomba icilicimwi kuli swensi kwene. Cii cikupiliula ukuti Yeova akapeela umupasi wakwe uwa muzilo kuli cila muntu ukulingana na vino akulondekwa.

17. I vyani vino apakwe acili pano nsi yakalolela?

¹⁷ Aina Klistu apakwe yasivyalwa nu upaalilo wakwikala ukwi yulu. Leza aakayapeela upaalilo uwo. Yakaelenganya pa upaalilo wao nu kupepelapo nupya yakalondesya ukupokelela icilambu cao ica kwi yulu. Yatamanya vino imili yao ilaya nga yaya ukwi yulu. (Filipi 3:20, 21; 1 Yoa. 3:2) Nanti ciye vivyo, yakalondesya  ukulola Yeova, Yesu, angeli na apakwe yauze nu kuya nayo umu Wene wa kwi yulu.

18. I vyani vino amu mfwele na zyuze yakalolela?

¹⁸ Amu mfwele na zyuze yakalondesya ukwizaikala amanda pe pano nsi, nupya vikwene avino antu yonsi yakalondesya. (Kasa. 3:11) Yakalolela insita ino yalazwilizyako umu kulenga insi ukuya paladaise. Yakalondesya insita iyo ikafike lino yalakuula amang’anda, ukulima ivyakulya, nu kukuuzya ana amalilike. (Eza. 65:21-23) Nupya yakalonda ukwiza tandandala umu ncende izingi pano nsi, umu myamba, umu mpanga, nu mu zyanguzi, alino nu kwizalola ivintu ivingi vino Yeova wapanga. Nomba icikalenga yaya sana ni nsansa u kumanya ukuti ucuza wao na Yeova ulatwalilila ukukomelako sile.

19. Uzye insita ya Ciusyo ikaya insita yakuti swensi tucite cani, nupya u wanda ci uno Ciusyo cilayako mwaka uu?

¹⁹ Yeova wapeela aomvi yakwe cila muntu upaalilo ucindame uwa ku nkoleelo. (Yele. 29:11) Wanda wa Ciusyo ca mfwa yakwe Klistu i kaya insita icindame kuli swensi iyakutaizya Leza na Klistu pali vino yatucitila pakuti tukaipakizye umi wa manda pe uku nkoleelo. Ciusyo ali kukomaana ukucindame kuno Aina Klistu ya cumi yakakwata cila mwaka. Cilayako lino ilanzi lyawa pa Cibelusi, pa 27 Maaci, 2021. Mwaka uu antu aingi yalaipakizya ukulongana kuu ukucindame. Yamwi yalazanwako asi mulandu nu kuzunyiwa. Yamwi nayo yalazevya Ciusyo ala yali umu cifungo. Lino Yeova, Yesu, angeli na apakwe atutuululwa yakulolela, lekini cila cilongano, iumba, nanti cila muntu tuce tuzevye ningo Ciusyo cii cicindame.