1. It-​taħdita li ngħatat fil-​konvenzjoni tal-​1935, kif effettwat lil żagħżugħ?

ŻAGĦŻUGĦ taʼ 18-​il sena tgħammed fl-​1926. Il-​ġenituri tiegħu kienu Studenti tal-​Bibbja, kif kienu jissejħu x-​Xhieda taʼ Ġeħova qabel. Huma kellhom tliet subien u żewġt ibniet, li għallmuhom jaqdu lil Alla Ġeħova u jimitaw lil Ġesù Kristu. Bħall-​Istudenti tal-​Bibbja kollha f’dak iż-​żmien, dan iż-​żagħżugħ leali kien jieħu mill-​ħobż u l-​inbid kull sena fl-​Ikla taʼ Filgħaxija tal-​Mulej. Però, it-​tama tiegħu għal futur inbidlet meta semaʼ t-​taħdita importanti bit-​tema, “Il-​Kotra Kbira.” Din it-​taħdita ngħatat fl-​1935 minn Ħuna J.  F.  Rutherford f’konvenzjoni f’Washington, D.C., l-​Istati Uniti. L-​Istudenti tal-​Bibbja x’tgħallmu f’dik il-​konvenzjoni?

2. Fit-​taħdita tiegħu, Ħuna Rutherford liema verità eċċitanti spjega?

² Fit-​taħdita tiegħu, Ħuna Rutherford spjega min huma dawk li jagħmlu parti mill-​“folla l-​kbira” li tissemma f’​Rivelazzjoni 7:9. Sa dakinhar, l-​Istudenti tal-​Bibbja kienu jaħsbu li l-​folla l-​kbira kien grupp ieħor taʼ aħwa inqas leali mill-​midlukin li kienu se jmorru fis-​sema. Ħuna Rutherford uża l-​Iskrittura biex jispjega li l-​folla l-​kbira mhix magħżula biex tgħix fis-​sema, imma huma n-​nagħaġ oħrajn * taʼ Kristu li se jgħaddu ħajjin “mit-​tribulazzjoni  l-​kbira” u se jgħixu għal dejjem fuq l-​art. (Riv. 7:14) Ġesù wiegħed: “Għandi nagħaġ oħrajn, li m’humiex minn dan il-​maqjel; lil dawn ukoll irrid inġibhom, u jisimgħu leħni, u jsiru merħla waħda, ragħaj wieħed.” (Ġw. 10:16) Dawn “in-​nagħaġ oħrajn” huma Xhieda leali taʼ Ġeħova li għandhom it-​tama li jgħixu għal dejjem f’Ġenna fuq l-​art. (Mt. 25:31-​33, 46) Ejja naraw kif dan id-​dawl ġdid biddel il-​ħajja taʼ ħafna min-​nies taʼ Ġeħova, inkluż taʼ dak iż-​żagħżugħ.—Salm 97:11; Prov. 4:18.

3-4. Fil-​konvenzjoni tal-​1935, eluf taʼ wħud x’fehmu dwar it-​tama tagħhom, u għala?

³ Mument eċċitanti waqt din il-​konvenzjoni kien xħin il-​kelliemi staqsa lill-​udjenza: “Jistgħu dawk kollha li għandhom it-​tama li jgħixu għal dejjem fuq l-​art iqumu bilwieqfa, jekk jogħġobhom?” Ħu li kien preżenti fil-​konvenzjoni qal li ra iktar min-​nofs in-​nies fl-​udjenza jqumu bilwieqfa. Imbagħad, Ħuna Rutherford qal: “Ara! Din il-​folla l-​kbira!” Wara dan, kulħadd beda jifraħ u jċapċap. Dawk li qamu bilwieqfa fehmu li Ġeħova m’għażilhomx biex jgħixu fis-​sema. Huma kienu jafu li ma ġewx midlukin bl-​ispirtu t’Alla. Fil-​ġurnata taʼ wara tgħammdu 840 Xhud, li ħafna minnhom kienu min-​nagħaġ oħrajn.

⁴ Wara dik it-​taħdita, iż-​żagħżugħ li semmejna qabel u eluf oħra ma baqgħux jieħdu mill-​ħobż u l-​inbid fl-​Ikla taʼ Filgħaxija tal-​Mulej. Ħafna ħassewhom bħal dan il-​ħu umli li qal: “It-​Tifkira tal-​1935 kienet l-​aħħar darba li ħadt mill-​ħobż u l-​inbid. Għax kont naf li Ġeħova ma użax l-​ispirtu qaddis tiegħu biex jagħtini t-​tama li ngħix fis-​sema. Minflok, jien kelli t-​tama li ngħix fuq l-​art u ngħin biex din issir ġenna.” (Rum. 8:16, 17; 2 Kor. 1:21, 22) Minn dak iż-​żmien ’l hawn, ħafna nies ingħaqdu mal-​folla l-​kbira u qed jaħdmu flimkien mal-​midlukin li fadal fuq l-​art.

5. Ġeħova kif iħossu dwar dawk li waqfu jieħdu mill-​emblemi fit-​Tifkira?

⁵ Ġeħova kif iħossu dwar dawk li waqfu jieħdu mill-​emblemi wara t-​Tifkira tal-​1935? U Ġeħova x’jaħseb jekk xi ħadd mgħammed illum jaħseb li għandu jieħu mill-​ħobż u l-​inbid fl-​Ikla taʼ Filgħaxija tal-​Mulej, imma wara jinduna li mhux midluk bl-​ispirtu qaddis? (1 Kor. 11:28) Minħabba li ma fehmux sew it-​tama tagħhom xi wħud ħadu mill-​emblemi. Imma jekk jammettu li żbaljaw, jieqfu jieħdu mill-​emblemi, u jibqgħu jaqdu lealment lil Ġeħova, żgur li se jaċċettahom fost in-​nagħaġ oħrajn. Minkejja li ma jiħdux mill-​ħobż u l-​inbid, huma xorta jattendu għat-​Tifkira għax japprezzaw ħafna dak li għamlu Ġeħova u Ġesù.

6. Ġesù xi kmandahom jagħmlu lill-​anġli?

⁶ Minħabba li t-​tribulazzjoni l-​kbira qiegħda fil-​qrib, huwa inkuraġġanti għalina li niddiskutu dak li jgħid Rivelazzjoni kapitlu 7 dwar il-​Kristjani midlukin u l-​folla l-​kbira min-​nagħaġ oħrajn. Ġesù jikkmanda lill-​anġli biex ikomplu jżommu l-​erbat irjieħ qerrieda tal-​art. Huma m’għandhomx jitilqu l-​irjieħ fuq l-​art sakemm il-​Kristjani  midlukin kollha jkunu ssiġillati, jiġifieri, Ġeħova jkun iddeċieda li huma leali. (Riv. 7:1-​4) Bħala premju tal-​lealtà tagħhom, ħut Kristu se jsiru slaten u qassisin miegħu fis-​sema. (Riv. 20:6) Ġeħova, Ġesù, u l-​anġli se jkunu ferħanin ħafna meta jaraw lill-​144,000 jirċievu l-​premju tagħhom fis-​sema.

7. F’​Rivelazzjoni 7:9, 10, Ġwanni x’ra fil-​viżjoni, u x’kienu qed jagħmlu? (Ara l-​istampa tal-​qoxra.)

⁷ Wara li semma lill-​144,000 bħala slaten u qassisin, Ġwanni ra xi ħaġa tal-​għaġeb, “folla kbira” li tibqaʼ ħajja wara Armageddon. Dawn iż-​żewġ gruppi huma differenti minn xulxin għax il-​“folla l-​kbira” se tkun iktar minn 144,000, u ma nafux eżatt kemm se tkun. (Aqra Rivelazzjoni 7:9, 10.) Huma kienu “lebsin ilbiesi bojod.” Dan juri li huma baqgħu “mingħajr tebgħa” mid-​dinja taʼ Satana, u baqgħu leali lejn Alla u Kristu. (Ġak. 1:27) Huma għajtu bil-​ferħ għax ġew salvati minħabba dak li għamlu Ġeħova u Ġesù, il-​Ħaruf t’Alla. Ukoll, huma kienu qed iżommu friegħi tal-​palm, li juri li huma b’ferħ aċċettaw lil Ġesù bħala s-​Sultan li Ġeħova għażel.—Qabbel Ġwanni 12:12, 13.

8. Rivelazzjoni 7:11 u 12, x’jgħidulna dwar Ġeħova, Ġesù, l-​anġli, u l-​midlukin irxoxtati?

⁸ Aqra Rivelazzjoni 7:11, 12. X’ġara meta Ġeħova, Ġesù, l-​anġli, u l-​midlukin irxoxtati raw il-​folla l-​kbira? Ġwanni ra li dawk fis-​sema kienu ferħanin u bdew ifaħħru lil Alla. Ġeħova, Ġesù, l-​anġli, u l-​midlukin irxoxtati se jkunu ferħanin ħafna meta jaraw it-​twettiq taʼ din il-​viżjoni, meta l-​folla l-​kbira se tgħaddi ħajja mit-​tribulazzjoni l-​kbira.

9. Skont Rivelazzjoni 7:13-​15, dawk tal-​folla l-​kbira x’qed jagħmlu bħalissa?

⁹ Aqra Rivelazzjoni 7:13-​15. Ġwanni kiteb li dawk tal-​folla l-​kbira “ħaslu l-​ilbiesi tagħhom u għamluhom bojod fid-​demm tal-​Ħaruf.” Dan ifisser li huma għandhom kuxjenza nadifa u li Ġeħova hu kuntent bihom. (Is. 1:18) Huma Kristjani dedikati u mgħammdin li għandhom fidi soda fis-​sagrifiċċju taʼ Ġesù u li għandhom ħbiberija maʼ Ġeħova. (Ġw. 3:36; 1 Pt. 3:21) Għalhekk, Alla hu kuntent bihom u jistgħu jagħtu “servizz sagru lejl u nhar fit-​tempju tiegħu” hawn fuq l-​art. Bħalissa, huma b’żelu jagħmlu l-​biċċa l-​kbira mix-​xogħol tal-​ippritkar u jagħmlu dixxipli, għax is-​Saltna t’Alla hi l-​iktar ħaġa importanti għalihom.—Mt. 6:33; 24:14; 28:19, 20.

10. Il-​folla l-​kbira minn xiex hi ċerta, u liema wegħda se tara titwettaq?

¹⁰ Il-​folla l-​kbira li tgħaddi ħajja mit-​tribulazzjoni l-​kbira hija ċerta li Alla se jkompli jieħu ħsiebha, għax “Dak li qiegħed bil-​qiegħda fuq it-​tron jifrex it-​tinda tiegħu fuqhom.” Il-​wegħda li n-​nagħaġ oħrajn ilhom jistennew biex titwettaq fl-​aħħar se ssir realtà: “[Alla] jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ.”—Riv. 21:3, 4.

11-12. (a) Skont Rivelazzjoni 7:16, 17, il-​folla l-​kbira liema barkiet se jkollha fil-​futur? (b) In-​nagħaġ oħrajn x’jagħmlu meta jattendu t-​Tifkira, u għala?

¹¹ Aqra Rivelazzjoni 7:16, 17. Bħalissa xi wħud min-​nies taʼ Ġeħova qed ibatu l-​ġuħ minħabba li m’għandhomx flus biżżejjed biex jixtru l-​ikel jew minħabba l-​problemi kkaġunati mill-​gwerer.  Oħrajn qegħdin fil-​ħabs minħabba l-​fidi tagħhom. Però, minkejja dan, dawk tal-​folla l-​kbira huma ferħanin ħafna għax jafu li wara li jgħaddu ħajjin mill-​qerda taʼ din id-​dinja ħażina, huma se jkollhom ħafna ikel materjali u spiritwali. Meta Ġeħova se jeqred din is-​sistema ħażina, hu se jagħmel ċert li l-​folla l-​kbira tkun protetta mir-​rabja “tikwi” tiegħu. Wara li tispiċċa t-​tribulazzjoni l-​kbira, Ġesù se jiggwida lil dawk li jibqgħu ħajjin fuq l-​art għall-​“ilmijiet tal-​ħajja.” Aħseb dwar it-​tama mill-​isbaħ li għandha l-​folla l-​kbira. Mill-​biljuni taʼ nies li qatt għexu, huma jistgħu ma jmutu qatt!—Ġw. 11:26.

¹² In-​nagħaġ oħrajn jirringrazzjaw lil Ġeħova u lil Ġesù għal din it-​tama meraviljuża! Minkejja li Ġeħova m’għażilhomx biex jgħixu fis-​sema, hu jħobbhom daqs kemm iħobb lill-​midlukin. Kemm il-​midlukin kif ukoll in-​nagħaġ oħrajn jistgħu jfaħħru lil Alla u lil Kristu. Mod wieħed kif jagħmlu dan hu billi jattendu għall-​Ikla taʼ Filgħaxija tal-​Mulej.

13-14. Għala l-​midlukin li fadal fuq l-​art u n-​nagħaġ oħrajn għandhom jattendu għat-​Tifkira tal-​mewt taʼ Kristu?

¹³ Fi snin riċenti, madwar wieħed minn kull elf li jattendi t-​Tifkira jieħu mill-​ħobż u l-​inbid. Dan ifisser li l-​maġġoranza tal-​kongregazzjonijiet madwar id-​dinja m’għandhom lil ħadd li jieħu mill-​emblemi. Għalhekk, il-​maġġorparti li jattendu għandhom it-​tama li jgħixu fuq l-​art. Allura, għala jattendu għall-​Ikla taʼ Filgħaxija tal-​Mulej? Huma jattendu għall-​istess raġuni li l-​mistidnin jattendu għal tieġ. Il-​mistidnin imorru t-​tieġ biex juru li jħobbu u jappoġġjaw lill-​koppja. Bl-​istess mod, in-​nagħaġ oħrajn jattendu għat-​Tifkira biex juru li jħobbu u jappoġġjaw lil Kristu u lill-​midlukin. Ukoll, in-​nagħaġ oħrajn jattendu biex juru l-​apprezzament tagħhom għas-​sagrifiċċju taʼ Ġesù, sagrifiċċju li jagħmilha possibbli li jgħixu għal dejjem fuq l-​art.

¹⁴ Raġuni importanti oħra għala  n-​nagħaġ oħrajn jattendu għat-​Tifkira hija biex jobdu l-​kmand taʼ Ġesù. Meta Ġesù għamel dik l-​ikla speċjali mal-​appostli leali tiegħu, hu qalilhom: “Ibqgħu agħmlu dan b’tifkira tiegħi.” (1 Kor. 11:23-​26) Għalhekk, in-​nagħaġ oħrajn jibqgħu jattendu l-​Ikla taʼ Filgħaxija tal-​Mulej sakemm uħud mill-​midlukin ikunu għadhom ħajjin fuq l-​art. Fil-​fatt, in-​nagħaġ oħrajn jistiednu lil kulħadd biex jattendi t-​Tifkira magħhom.

15. X’nistgħu nagħmlu biex infaħħru lil Ġeħova u lil Kristu fit-​Tifkira?

¹⁵ Fit-​Tifkira għandna l-​opportunità li nfaħħru lil Alla u lil Kristu hekk kif inkantaw u nitolbu flimkien. It-​tema tat-​taħdita li se tingħata din is-​sena hi: “Apprezza Dak li Alla u Kristu Għamlu Għalik!” Din se tgħinna napprezzaw iżjed dak li għamlu għalina. Waqt li ngħaddu l-​ħobż u l-​inbid, inkunu nistgħu naħsbu x’jirrappreżentaw—il-​ġisem u d-​demm taʼ Ġesù. U nkunu nistgħu naħsbu dwar l-​imħabba li wriena Ġeħova meta bagħat lil Ibnu biex imut għalina ħalli nkunu nistgħu ngħixu għal dejjem. (Mt. 20:28) Kull min iħobb lil Missierna tas-​sema u lil Ibnu se jkun irid jattendi t-​Tifkira.

16. B’liema modi l-​midlukin u n-​nagħaġ oħrajn huma l-​istess?

¹⁶ Sa ċertu punt, in-​nagħaġ oħrajn u l-​midlukin huma l-​istess. Ġeħova ma jħobbx lil grupp iktar minn ieħor. Iż-​żewġ gruppi huma importanti għal Alla, u l-​imħabba tiegħu għalihom hi ndaqs. Aħna nafu dan għax il-​prezz biex jixtri lill-​midlukin u lin-​nagħaġ oħrajn kien l-​istess, il-​ħajja taʼ Ibnu l-​għażiż. Id-​differenza bejn iż-​żewġ gruppi hi t-​tama differenti tagħhom. It-​tnejn iridu jibqgħu leali lejn Alla u Kristu. (Salm 31:23) U ftakar li Alla jagħti l-​ispirtu qaddis lil kull persuna skont dak li jkollha bżonn, sew jekk tkun mill-​midlukin u sew jekk min-​nagħaġ oħrajn.

17. Il-​Kristjani midlukin li fadal fuq l-​art għal xiex qed iħarsu ’l quddiem?

¹⁷ Il-​Kristjani midlukin ma jitwildux bit-​tama għas-​sema. Alla jagħtihom din it-​tama. Huma jaħsbu dwar it-​tama tagħhom, jitolbu dwarha, u ħerqanin li jirċievu l-​premju tagħhom fis-​sema. Huma ma jafux kif se jkun ġisimhom fis-​sema. (Flp. 3:20, 21; 1 Ġw. 3:2) Imma l-​Kristjani midlukin li fadal fuq l-​art iħarsu ’l quddiem biex jiltaqgħu maʼ  Ġeħova, Ġesù, l-​anġli, u l-​midlukin li hemm fis-​sema u jkunu magħhom fis-​Saltna.

18. In-​nagħaġ oħrajn għal xiex qed iħarsu ’l quddiem?

¹⁸ In-​nagħaġ oħrajn iħarsu ’l quddiem biex jgħixu għal dejjem fuq l-​art. Din hija xewqa li n-​nies kollha għandhom. (Ekk. 3:11) Huma jħarsu ’l quddiem għal dak iż-​żmien meta se jbiddlu d-​dinja kollha f’ġenna tal-​art. Huma jixxennqu għal dak iż-​żmien meta se jibnu d-​djar tagħhom, iħawlu fil-​ġonna tagħhom, u jrabbu t-​tfal tagħhom mingħajr inkwiet. (Is. 65:21-​23) Huma jħarsu ’l quddiem biex iżuru ħafna postijiet fid-​dinja, jaraw il-​muntanji, il-​foresti, u l-​oċeani, u jistudjaw dwar l-​affarijiet kollha li ħalaq Ġeħova. Imma l-​iktar ħaġa li tagħmilhom ferħanin hi li jafu li l-​ħbiberija tagħhom maʼ Ġeħova se tkompli tikber.

19. Liema opportunità tagħtina t-​Tifkira, u din is-​sena meta se ssir?

¹⁹ Lill-​qaddejja dedikati kollha tiegħu, Ġeħova tahom tama mill-​isbaħ għall-​futur. (Ġer. 29:11) It-​Tifkira tal-​mewt taʼ Kristu hija ġurnata speċjali għal kull wieħed u waħda minna biex infaħħru lil Alla u lil Kristu għal dak li għamlu għalina biex inkunu nistgħu ngawdu ħajja taʼ dejjem. It-​Tifkira hija l-​iktar laqgħa importanti li jkollhom il-​Kristjani veri kull sena. Din se ssir is-​Sibt, 27 taʼ Marzu 2021, wara nżul ix-​xemx. Din is-​sena ħafna se jkunu jistgħu jattendu din l-​okkażjoni importanti bil-​libertà. Oħrajn se jattendu minkejja l-​oppożizzjoni. Xi wħud se jagħmluha fil-​ħabs. Tkun xi tkun is-​sitwazzjoni, Ġeħova, Ġesù, l-​anġli, u l-​midlukin irxoxtati qegħdin jarawna. Jalla kulħadd ikollu Tifkira sabiħa!