1. ¿Ndáaña ke̱ʼé iin ta̱ hermano tá xi̱niso̱ʼora discurso ña̱ ta̱xina ti̱xin iin asamblea tá ku̱i̱ya̱ 1935?

TÁ KU̱I̱YA̱ 1926 nda̱kuchi iin ta̱ loʼo ta̱ xi̱kuumií 18 ku̱i̱ya̱. Na̱ yivára xi̱kuuna na̱ xi̱kaʼvi Biblia, chi saá xi̱ka̱ʼa̱nna xíʼin na̱ testigo Jehová tiempo saá. Ni̱xi̱yo u̱ni̱ ta̱a se̱ʼena ta u̱vi̱ ná ñaʼá, ta na̱yóʼo sa̱náʼa̱nana ña̱ kachíñuna nu̱ú Jehová ta saátu ña̱ kundiku̱nna yi̱chi̱ ta̱ Jesucristo. Ta̱ loʼo kán ku̱i̱ya̱ tá ku̱i̱ya̱ xi̱xixira si̱táva̱ʼa ta xi̱xiʼira tá vino tá xi̱ndakaʼánna xa̱ʼa̱ ña̱ ni̱xi̱ʼi̱ ta̱ Jesús, nda̱a̱ táki̱ʼva xi̱keʼé ndiʼi na̱ xi̱kaʼvi Biblia tiempo saá. Soo va̱ása níkeʼékara ña̱yóʼo tá xi̱niso̱ʼora discurso ña̱ nani “La grande muchedumbre”. Ta̱ hermano Joseph Rutherford kúú ta̱ ta̱xi ña̱yóʼo tá ku̱i̱ya̱ 1935, ti̱xin iin asamblea ña̱ ni̱xi̱yo chí ñuu Washington (Estados Unidos). ¿Ndáaña ni̱xa̱a̱na ku̱nda̱a̱-inina ti̱xin asamblea kán?

2. ¿Ndáa iin ña̱ ndáyáʼviní ni̱ka̱ʼa̱n ta̱ hermano Rutherford ti̱xin iin discurso?

² Ti̱xin discurso ña̱ ta̱xi ta̱ hermano Rutherford ni̱ka̱ʼa̱nra ndáana kúú na̱ “gran muchedumbre” na̱ káʼa̱n Apocalipsis 7:9 xa̱ʼa̱. Na̱ xi̱kaʼvi Biblia xi̱ndakanixi̱nína ña̱ na̱ gran muchedumbre kúúna inka tiʼvi na̱ yiví na̱ ku̱ʼu̱n chí ndiví, soo va̱ása nda̱kúní níxi̱yo inina xíʼin Ndióxi̱. Ta̱ hermano Rutherford xi̱niñúʼura Biblia ña̱ va̱ʼa ka̱ʼa̱nra xa̱ʼa̱ na̱ gran muchedumbre ña̱ va̱ása níndaka̱xin Ndióxi̱ na̱yóʼo ña̱ koona chí ndiví, chi na̱yóʼo kúú na̱ inkaka ndikachi na̱ kúú kuenta ta̱ Cristo, * na̱ ka̱ku tá  ná kuu ña̱ gran tribulación ta kutakuna ndiʼi tiempo nu̱ú ñuʼú yóʼo (Apoc. 7:14). Ta̱ Jesús ni̱ka̱ʼa̱nra ña̱yóʼo: “Íyo inkaka ndikachi sa̱na̱i̱, ta kǒorí ñúʼu ti̱xin ña̱ corra yóʼo; ku̱ʼu̱ntui̱ ndakiʼi̱n tíyóʼova, ta tíyóʼo kuniso̱ʼorí ña̱ káʼi̱n. Ta iin ndakutáʼan ndiʼirí ta iinlá nduu pastor tíyóʼo” (Juan 10:16). Na̱ inkaka ndikachi yóʼo kúú na̱ testigo Jehová na̱ nda̱kú-ini, ta ndátuna koona ndiʼi tiempo nu̱ú ñuʼú yóʼo tá ná nduliviña (Mat. 25:31-33, 46). Tá ni̱xa̱a̱na ku̱nda̱a̱-inina xa̱ʼa̱ ña̱yóʼo ku̱a̱ʼání na̱ xi̱kachíñu nu̱ú Jehová na̱samana ña̱ xi̱keʼéna, nda̱a̱ ta̱ hermano ta̱ xi̱kuumií 18 ku̱i̱ya̱ (Sal. 97:11; Prov. 4:18).

3, 4. ¿Ndáaña ku̱nda̱a̱-ini ku̱a̱ʼání na̱ hermano ti̱xin asamblea ña̱ ni̱xi̱yo tá ku̱i̱ya̱ 1935, ta nda̱chun?

³ Íyo iin ña̱ ndáyáʼviní ku̱u ti̱xin asamblea kán, nu̱ú ni̱xa̱ʼa̱n ki̱ʼva 20,000 na̱ yiví, saáchi ta̱ hermano Rutherford ni̱nda̱ka̱tu̱ʼunrana: “¿Á kivi ndaku̱ndita ndiʼi ndóʼó na̱ ndátu koo nu̱ú ñuʼú yóʼo ndiʼi saá tiempo?”. Iin na̱ ni̱xa̱ʼa̱n asamblea kán ni̱ka̱ʼa̱nna ña̱ ku̱a̱ʼánína nda̱kundita. Tasaá ta̱ hermano Rutherford ni̱ka̱ʼa̱nra: “Na̱yóʼo kúú na̱ gran muchedumbre”. Ta ndiʼi na̱ nda̱kutáʼan kán ka̱nindaʼa̱na ta ndeéní ku̱si̱í-inina. Na̱ hermano na̱ nda̱kundita ni̱xa̱a̱na ku̱nda̱a̱-inina ña̱ va̱ása kutakuna chí ndiví, chi va̱ása níxiniñúʼu Ndióxi̱ espíritu santora ña̱ va̱ʼa ndaka̱xinrana. Tá inka ki̱vi̱, 840 na̱ yiví nda̱kuchi ti̱xin asamblea kán ta ku̱a̱ʼání na̱yóʼo xi̱kuuna na̱ inkaka ndikachi.

⁴ Tá ku̱u ña̱yóʼo, ku̱a̱ʼání na̱ hermano nda̱a̱ ta̱ loʼo ta̱ ni̱ka̱ʼa̱nyó xa̱ʼa̱ va̱ása níxixikana si̱táva̱ʼa ta ni va̱ása níxiʼikana tá vino, tá xi̱ndakaʼánna xa̱ʼa̱ ña̱ ni̱xi̱ʼi̱ ta̱ Jesús. Ku̱a̱ʼánína xi̱ndakanixi̱nína nda̱a̱ táki̱ʼva ni̱ka̱ʼa̱n iin ta̱ hermano: “Tá ku̱i̱ya̱ 1935 xi̱xikavai̱ si̱táva̱ʼa ta xi̱ʼikavai̱ tá vino tá nda̱kaʼánndi̱ xa̱ʼa̱ ña̱ ni̱xi̱ʼi̱ ta̱ Jesús, soo va̱ása níndikókai̱ keʼíi̱ña saáchi ku̱nda̱a̱-inii̱ ña̱ va̱ása kutakui̱ chí ndiví xa̱ʼa̱ ña̱ va̱ása níndaka̱xin Jehová yi̱ʼi̱ xíʼin espíritu santora. Chi ña̱ xi̱ndatui̱ kúú ña̱ koi̱ nu̱ú ñuʼú yóʼo ta kachíñui̱ ña̱ nduliviña” (Rom. 8:16, 17; 2 Cor. 1:21, 22). Nani tiempo saá ta nda̱a̱ vitin, na̱ gran muchedumbre ku̱a̱ʼáka ku̱a̱ʼa̱n ndúuna ta inkáchi káchíñuna xíʼin na̱ nda̱kaxin Ndióxi̱ ku̱ʼu̱n chí ndiví, na̱ kíndo̱o nu̱ú ñuʼú yóʼo tiempo vitin.

5. ¿Ndáaña ndákanixi̱ní Jehová xa̱ʼa̱ na̱ va̱ása xíxika si̱táva̱ʼa ta saátu va̱ása xíʼikana tá vino?

⁵ ¿Ndáaña ndákanixi̱ní Jehová xa̱ʼa̱ na̱ va̱ása níxixika si̱táva̱ʼa ta saátu va̱ása níxiʼikana tá vino xa̱ʼa̱ ña̱ na̱kunda̱a̱-inina tá ku̱i̱ya̱ 1935? Ta, ¿ndáaña ndákanixi̱níra xa̱ʼa̱ na̱ xíxi si̱táva̱ʼa ta xíʼina tá vino saáchi túvina ña̱ nda̱kaxinrana ña̱ ku̱ʼu̱nna chí ndiví, soo tá yáʼa tiempo kúnda̱a̱-inina ña̱ va̱ása níndaka̱xinrana? (1 Cor. 11:28). Savana kéʼéna ña̱yóʼo saáchi ndákanixi̱nína ña̱ nda̱kaxin Ndióxi̱ miína ña̱ ku̱ʼu̱nna chí ndiví. Soo tá ndákunina ña̱ va̱ása va̱ʼa íyo ña̱ kéʼéna ta va̱ása xíxikana si̱táva̱ʼa ni va̱ása xíʼikana tá vino, ta ndákundeéna nda̱kú káchíñuna nu̱ú Jehová, ndakunirana ña̱ kúúna táʼan na̱ inkaka ndikachi. Ni va̱ása xíxikana si̱táva̱ʼa ta ni va̱ása xíʼikana tá vino tá xíyo Conmemoración, soo ndákundeévana xáʼa̱nna saáchi táxinína tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱na.

6. ¿Ndáa chiñu kúú ña̱ xa̱ʼnda ta̱ Jesús nu̱ú na̱ ángel?

⁶ Si̱lóʼo tiempo kúma̱ní ta kixáʼa ña̱ gran tribulación. Ña̱kán xíniñúʼu viíní kaʼviyó ña̱ káʼa̱n Apocalipsis capítulo 7 xa̱ʼa̱ na̱ nda̱kaxin Ndióxi̱ ku̱ʼu̱n chí ndiví, xíʼin na̱ gran muchedumbre na̱ kúú inkaka ndikachi, chi tá ná keʼéyó ña̱yóʼo chika̱a̱níña ndee̱ xíʼinyó. Nu̱ú ña̱ capítulo yóʼo káʼa̱nña xa̱ʼa̱ ta̱ Jesús ña̱ xa̱ʼndara chiñu nu̱ú na̱ ángel ña̱ ná kasina ta̱chí ña̱ ndeéní ña̱ sándiʼi-xa̱ʼa̱ ndiʼi ña̱ʼa. Va̱ása xíniñúʼu taxina ya̱ʼa  ta̱chí yóʼo nu̱ú ñuʼú, chi xíniñúʼu kundatuna nda̱a̱ ná ndakiʼin ndiʼi na̱ nda̱kaxin Ndióxi̱ sello, ña̱yóʼo kúni̱ kachiña ña̱ ndákuni Jehová ña̱ nda̱kú ni̱xi̱yo inina xíʼinra (Apoc. 7:1-4). Na̱ nda̱kaxin Ndióxi̱ xa̱a̱na koona rey ta saátu koona su̱tu̱ xíʼin ta̱ Cristo chí ndiví, xa̱ʼa̱ ña̱ nda̱kúní ni̱xi̱yo inina (Apoc. 20:6). Jehová, ta̱ Jesús xíʼin na̱ ángel kusi̱íní-inina tá ná ndakiʼin na̱ 144,000 ña̱ kutakuna chí ndiví.

7. Nda̱a̱ táki̱ʼva káchi Apocalipsis 7:9, 10, ¿ndáana xi̱ni ta̱ Juan, ta ndáaña kéʼéna? (Koto na̱ʼná ña̱ va̱xi chí sa̱tá tutu yóʼo).

⁷ Ta̱ Juan, siʼna ni̱ka̱ʼa̱nra xa̱ʼa̱ na̱ 144,000 ña̱ kúúna rey ta saátu su̱tu̱, tándi̱ʼi xi̱nira inkakana: xi̱nira ku̱a̱ʼání na̱ yiví na̱ ni̱ka̱ku ti̱xin Armagedón. Soo na̱yóʼo ku̱a̱ʼáníka kúúna nu̱ú na̱ siʼna xi̱nira ta kǒo kúnda̱a̱-iniyó nda̱saa kúúna (kaʼvi Apocalipsis 7:9, 10). * Ta “ndíxina ti̱ko̱to̱ káni̱ ña̱ yaa”, ña̱yóʼo kúni̱ káchiña ña̱ kǒo níkeʼéna táʼan ña̱ kéʼé na̱ ñuyǐví ta̱ Ndi̱va̱ʼa, ta nda̱kú ni̱xi̱yo inina xíʼin Ndióxi̱ ta saátu xíʼin ta̱ Cristo (Sant. 1:27). Ndeéní káʼa̱nna ña̱ ni̱ka̱kuna tíxa̱ʼvi ña̱ ke̱ʼé Jehová, ta saátu ta̱ Jesús ta̱ kúú ndikachi kuenta Ndióxi̱. Ta saátu níʼina yu̱ku̱ ndaʼa̱ tú palmera, xíʼin ña̱yóʼo náʼa̱na ña̱ ndákunina ta̱ Jesús ña̱ kúúra rey ta̱ nda̱kaxin Jehová (chitáʼanña xíʼin Juan 12:12, 13).

8. ¿Ndáaña káʼa̱n Apocalipsis 7:11, 12 xa̱ʼa̱ na̱ ndóo chí ndiví?

⁸ Kaʼvi Apocalipsis 7:11, 12. * ¿Ndáaña ke̱ʼé na̱ ndóo chí ndiví tá xi̱nina ku̱a̱ʼání na̱ yiví yóʼo? Ta̱ Juan xi̱nira ña̱ kúsi̱íní-inina ta ndásakáʼnuna Ndióxi̱ tá xi̱nina na̱yóʼo. Jehová xíʼin na̱ ndóo chí ndiví kusi̱íní-inina tá ná kunina ka̱ku na̱ gran muchedumbre ti̱xin ña̱ gran tribulación.

9. Nda̱a̱ táki̱ʼva káchi Apocalipsis 7:13-15, ¿ndáaña xa̱a̱ kéʼé na̱ gran muchedumbre?

⁹ Kaʼvi Apocalipsis 7:13-15. * Ta̱ Juan káʼa̱nra xa̱ʼa̱ na̱ gran muchedumbre ña̱ “nda̱katana ti̱ko̱to̱ káni̱na ta nda̱sayaanaña xíʼin ni̱i̱ ta̱ íyo táki̱ʼva íyo ndikachi”. Ña̱yóʼo kúni̱ kachiña ña̱ vií íyo ña̱ xínitúni̱na ta kúsi̱í-ini Jehová xíʼin ña̱ kéʼéna (Is. 1:18). Xa̱a̱ nda̱taxina miína ndaʼa̱ Ndióxi̱ ta nda̱kuchina ta kándíxanína ña̱ ni̱xi̱ʼi̱ ta̱ Jesús xa̱ʼa̱ ku̱a̱china, ta saátu kúúna migo Jehová (Juan 3:36; 1 Ped. 3:21). Xa̱ʼa̱ ña̱yóʼo nda̱a̱ táki̱ʼva íyo na̱ ndítana nu̱ú íyo trono Ndióxi̱ saá íyona, ta ñuú xíʼin káʼñu káchíñuna nu̱úra nu̱ú ñuʼú yóʼo. Ta xa̱a̱ kúsi̱íní-inina káchíñuna nu̱ú Ndióxi̱, saáchi ku̱a̱ʼa̱nna nátúʼunna xíʼin na̱ yiví xa̱ʼa̱ra ña̱ va̱ʼa ná xa̱a̱na koona discípulo ta̱ Cristo. Ta iinlá ña̱yóʼo ndíʼi̱-inina xa̱ʼa̱ nu̱úka ña̱ keʼéna ña̱ kúni̱ miína (Mat. 6:33; 24:14; 28:19, 20).

10. ¿Ndáaña kándíxa na̱ gran muchedumbre, ta ndáaña kunina xi̱nu?

¹⁰ Na̱ gran muchedumbre kándíxana ña̱ ndakundeé Ndióxi̱ kundaarana tá ná ndiʼi ña̱ gran tribulación, saáchi saá íyo ña̱ káʼa̱n Biblia. Ta saátu kunina xi̱nu ña̱ xi̱ndatuna ndakiʼinna: Ndióxi̱ “ya̱kúnra ti̱kui̱í nu̱úna, ta kǒo kuvikana, ni va̱ása kooka ña̱ kusuchí-inina ni va̱ása kuakukana, ni va̱ása kooka ña̱ xoʼvi̱na” (Apoc. 21:3, 4).

11, 12. a) Nda̱a̱ táki̱ʼva káchi Apocalipsis 7:16, 17, ¿ndáaña va̱ʼa ndátu na̱ gran muchedumbre ndakiʼinna chí nu̱únínu? b) ¿Ndáaña kivi keʼé na̱ kúú inkaka ndikachi ti̱xin Conmemoración, ta nda̱chun kéʼéna ña̱yóʼo?

 ¹¹ Kaʼvi Apocalipsis 7:16, 17. * Tiempo vitin sava na̱ hermano kǒo ña̱ kuxuna saáchi kǒo xu̱ʼún kúúmiína, á xóʼvi̱na xa̱ʼa̱ ña̱ íyoní tu̱ndóʼo xíʼin ku̱a̱chi ñuu nu̱ú íyona. Ta inkana ñúʼuna veʼeka̱a xa̱ʼa̱ ña̱ ndásakáʼnuna Ndióxi̱. Na̱ gran muchedumbre kúsi̱í-inina chi tá ná ndiʼi-xa̱ʼa̱ ñuyǐví ta̱ Ndi̱va̱ʼa, kooní ña̱ kuxuna saátu ña̱ sakuaʼana xa̱ʼa̱ Jehová. Tá ná sandíʼi-xa̱ʼa̱ Jehová ñuyǐví ta̱ Ndi̱va̱ʼa, kundaara na̱ gran muchedumbre nu̱ú ña̱ sáa̱ra, ña̱ íyo nda̱a̱ táki̱ʼva íyo “ña̱ niʼníní”. Tá ná ndiʼi ña̱ gran tribulación, ta̱ Jesús kuniʼira yi̱chí nu̱ú na̱ ka̱ku ta ku̱ʼu̱nra xíʼinna nu̱ú kána “ti̱kui̱í tá taxi ña̱ kutakuna ndiʼi tiempo”. Ndakanixi̱ní xa̱ʼa̱ ña̱ va̱ʼaní ndakiʼin na̱ gran muchedumbre: xa̱a̱ ku̱a̱ʼání na̱ yiví ni̱xi̱yo nu̱ú ñuʼú yóʼo ta ni̱xi̱ʼi̱na, soo na̱ gran muchedumbre va̱ása kunda̱a̱-inina ndáa ki̱ʼva ndóʼo iin na̱ yiví tá xíʼi̱na chi sana va̱ása kuvina (Juan 11:26).

¹² Na̱ kúú inkaka ndikachi táxinína tíxa̱ʼvi ndaʼa̱ Jehová ta saátu ta̱ Jesús, xa̱ʼa̱ ña̱ va̱ʼaní ndátuna ndakiʼinna chí nu̱únínu. Ni va̱ása níndaka̱xin Jehová na̱yóʼo ña̱ koona chí ndiví, soo kúʼvi̱níva-inira xínirana nda̱a̱ táki̱ʼva kúʼvi̱-inira xínira na̱ nda̱kaxinra ku̱ʼu̱n chí ndiví. Na̱ kúú inkaka ndikachi ta saátu na̱ ku̱ʼu̱n chí ndiví kivi ndasakáʼnuna Ndióxi̱ xíʼin ta̱ Cristo, ta iin ki̱ʼva ña̱ keʼéna ña̱yóʼo kúú ña̱ ku̱ʼu̱nna Conmemoración.

13, 14. ¿Nda̱chun xíniñúʼu ku̱ʼu̱n ndiʼiyó tá ndákaʼányó xa̱ʼa̱ ña̱ ni̱xi̱ʼi̱ ta̱ Jesús?

¹³ Tiempo vitin, nu̱ú 1,000 na̱ yiví na̱ xáʼa̱n Conmemoración sana iinlá kuití kúú na̱ xíxi si̱táva̱ʼa ta xíʼina tá vino. Ña̱yóʼo kúni̱ kachiña, ti̱xin ku̱a̱ʼání congregación ña̱ íyo iníísaá nu̱ú ñuʼú kǒo na̱ xíxi si̱táva̱ʼa ta xíʼina tá vino tá xíyo Conmemoración. Ña̱kán ku̱a̱ʼání na̱ xáʼa̱n Conmemoración ndátuna koona nu̱ú ñuʼú yóʼo. Tá saá, ¿nda̱chun xáʼa̱nna? Saáchi kéʼéna nda̱a̱ táki̱ʼva kéʼé iin na̱ yiví na̱ xáʼa̱n nu̱ú tíndaʼa̱ iin na̱ migona, chi kúnina na̱ʼa̱na ña̱ kúsi̱í-inina xíʼin  na̱ tíndaʼa̱ kán ta kúni̱na chindeétáʼanna xíʼinna. Ki̱ʼva saá kéʼé na̱ kúú inkaka ndikachi ta xáʼa̱nna Conmemoración, chi saá náʼa̱na ña̱ kúʼvi̱-inina xínina ta̱ Cristo xíʼin na̱ nda̱kaxin Ndióxi̱ ku̱ʼu̱n chí ndiví, ta kúni̱na chindeétáʼanna xíʼinna. Ta xíʼin ña̱yóʼo náʼa̱na ña̱ táxina tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús, chi saá kivi ndakiʼinna ña̱ kutakuna ndiʼi tiempo nu̱ú ñuʼú yóʼo.

¹⁴ Ta saátu na̱ kúú inkaka ndikachi xáʼa̱nna Conmemoración, saáchi kándíxana chiñu ña̱ xa̱ʼnda ta̱ Jesús. Ñuú tá xi̱xira xíʼin na̱ apóstolra ka̱chira: “Kǒo sandákoondó keʼéndó ña̱yóʼo” (1 Cor. 11:23-26). Ña̱kán, na̱ kúú inkaka ndikachi ndákundeévana ndákaʼánna xa̱ʼa̱ ña̱ ni̱xi̱ʼi̱ ta̱ Jesús, nani kíndo̱oka na̱ nda̱kaxin Ndióxi̱ ku̱ʼu̱n chí ndiví nu̱ú ñuʼú yóʼo. Ta saátu káʼa̱nna xíʼin ku̱a̱ʼání na̱ yiví ña̱ ná ku̱ʼu̱nna xíʼinna ki̱vi̱ ña̱ ndáyáʼviní yóʼo.

15. ¿Ndáa ki̱ʼva kivi ndasakáʼnu iin tá iinyó Ndióxi̱ xíʼin ta̱ Jesús ti̱xin Conmemoración?

¹⁵ Ti̱xin Conmemoración kivi ndasakáʼnuyó Ndióxi̱ xíʼin ta̱ Cristo, tá ná katayó ta saátu tá ná keʼéna oración. Discurso ña̱ taxina ku̱i̱ya̱ vitin naníña: “Ná na̱ʼa̱yó ña̱ kúsi̱í-iniyó xa̱ʼa̱ ña̱ ke̱ʼé Ndióxi̱ ta saátu ta̱ Cristo xa̱ʼa̱yó”. Tá ná kuniso̱ʼoyóña kuni̱kayó taxiyó tíxa̱ʼvi ndaʼa̱ Jehová ta saátu ta̱ Cristo. Tá ná sayáʼana si̱táva̱ʼa xíʼin tá vino, ndiʼiyó kivi ndakaʼányó ña̱ ndánaʼa̱ña ku̱ñu xíʼin ni̱i̱ ta̱ Jesús. Ta saátu ndakaʼányó ña̱ ta̱xi Jehová se̱ʼéra ña̱ ni̱xi̱ʼi̱ra xa̱ʼa̱yó ña̱ va̱ʼa ni̱ʼíyó ña̱ kutakuyó (Mat. 20:28). Ndiʼi na̱ kúʼvi̱-ini xíni yiváyó ta̱ íyo chí ndiví ku̱ʼu̱nna Conmemoración.

16. ¿Nda̱chun inkáchi ndáyáʼvi na̱ nda̱kaxin Ndióxi̱ ta saátu na̱ inkaka ndikachi?

¹⁶ Na̱ nda̱kaxin Ndióxi̱ ku̱ʼu̱n chí ndiví ta saátu na̱ kúú inkaka ndikachi, inkáchi ndáyáʼvina nu̱ú Ndióxi̱. Kúʼvi̱-inira xíni̱ra u̱vi̱ saána, saáchi ña̱ táku se̱ʼéra kúú ña̱ cha̱ʼvira xa̱ʼa̱ na̱ nda̱kaxinra ku̱ʼu̱n chí ndiví ta saátu na̱ kúú inkaka ndikachi. Xa̱a̱ síín síín íyo ña̱ ndátu na̱yóʼo ndakiʼinna, soo inkáchi xíniñúʼu nda̱kú koo inina xíʼin Ndióxi̱ ta saátu xíʼin ta̱ Cristo (Sal. 31:23). Ná ndakaʼányó chi espíritu santo Ndióxi̱ kivi inkáchi chindeétáʼanña xíʼin ndiʼi na̱ káchíñu nu̱úra. Jehová kivi taxira espíritu santora ndaʼa̱ iin tá iin na̱ yiví tá xíniñúʼunaña, ni kúúna na̱ nda̱kaxinra ku̱ʼu̱n chí ndiví á na̱ inkaka ndikachi.

17. ¿Ndáaña kúni̱ní na̱ nda̱kaxin Ndióxi̱?

¹⁷ Mií Jehová kúú ta̱ chíka̱a̱ níma̱ na̱ ndáka̱xinra ña̱ kutóona koona chí ndiví. Na̱yóʼo ndákanixi̱nína xa̱ʼa̱ ña̱ ndátuna ndakiʼinna, káʼa̱nna xa̱ʼa̱ña ti̱xin oración ta saátu kúni̱nína ndakiʼinna ña̱ koona chí ndiví. Ni va̱ása kúnda̱a̱-inina ndáa ki̱ʼva koo ku̱ñuna tá ná koona chí ndiví, soo xa̱a̱ kúni̱nína ndakutáʼanna  xíʼin Jehová, ta̱ Jesús, na̱ ángel ta saátu xíʼin inkaka na̱ nda̱kaxin Ndióxi̱, tasaá ndakiʼinna chiñu ña̱ kuumiína ti̱xin Reino ña̱ íyo chí ndiví (Filip. 3:20, 21; 1 Juan 3:2).

18. ¿Ndáaña kúni̱ní na̱ kúú inkaka ndikachi keʼéna?

¹⁸ Na̱ kúú inkaka ndikachi ndátuna kutakuna nu̱ú ñuʼú yóʼo nda̱a̱ táki̱ʼva kútóo ndiʼi na̱ yiví (Ecl. 3:11). Kúni̱nína ña̱ ná kixaa̱ ki̱vi̱ ña̱ kachíñuna ña̱ ndulivi nu̱ú ñuʼú yóʼo, tasaá ixava̱ʼana veʼena ta chiʼina ña̱ kuxuna á inkaka planta. Ta va̱ása kuumiíkana kue̱ʼe̱ ta va̱ʼaní kundoona xíʼin na̱ veʼena (Is. 65:21-23). Ta kúni̱nína ku̱ʼu̱nna kotona ña̱ íyo iníísaá nu̱ú ñuʼú. Tá kúú, kotona tá mar xíʼin yuku̱ nu̱ú íyo yitu̱n, ta saátu sakuaʼakana xa̱ʼa̱ ndiʼi ña̱ʼa ña̱ i̱xava̱ʼa Jehová. Soo iin ña̱ sákusi̱íníka-inina kúú ña̱ viíka kutáʼanna xíʼin Jehová ki̱vi̱ tá ki̱vi̱.

19. ¿Ndáaña kivi keʼéyó ti̱xin Conmemoración, ta ama keʼéyóña ku̱i̱ya̱ vitin?

¹⁹ Na̱ xa̱a̱ nda̱taxi mií ndaʼa̱ Jehová ta káchíñuna nu̱úra, íyo iin ña̱ va̱ʼaní taxira ndaʼa̱na chí nu̱únínu (Jer. 29:11). Ti̱xin Conmemoración kúú ña̱ kivi ndasakáʼnu ndiʼiyó Ndióxi̱ ta saátu ta̱ Cristo, xa̱ʼa̱ ña̱ ke̱ʼéna xa̱ʼa̱yó ña̱ va̱ʼa ndakiʼinyó ña̱ kutakuyó ndiʼi tiempo. Ña̱kán nu̱ú miíyó na̱ ndíku̱n ta̱ Cristo, Conmemoración kúú iin ña̱ ndáyáʼviní kéʼéyó ku̱i̱ya̱ tá ku̱i̱ya̱. Ña̱yóʼo keʼéyóña ki̱vi̱ sábado 27 tí marzo ña̱ ku̱i̱ya̱ 2021 tá xa̱a̱ ni̱ndi̱ʼvi ñu̱ʼu á ña̱ ka̱ndii. Ku̱i̱ya̱ vitin ku̱a̱ʼánína va̱ása ixayo̱ʼvi̱ña xíʼinna ña̱ ndakutáʼanna ki̱vi̱ ña̱ ndáyáʼviní yóʼo, soo inkana keʼénaña ni sásina nu̱úna ña̱ ndasakáʼnuna Ndióxi̱, ta inkana keʼénaña ti̱xin veʼeka̱a. Ni nda̱a̱ ndáaka ña̱ ná kuu, ná ndakaʼányó chi xíto Jehová, ta̱ Jesús xíʼin inkaka na̱ ndóo chí ndiví tá kéʼéyó ña̱yóʼo. Ña̱kán ndiʼi na̱ congregación, na̱ grupo xíʼin iin tá iinyó ná kusi̱í-iniyó tá ndákaʼányó xa̱ʼa̱ ña̱ ni̱xi̱ʼi̱ ta̱ Cristo.