1. ¿Toni panok keman se telpoch kikakik se tanojnots tein motemakak itech xiuit 1935?

ITECH xiuit 1926 moauij se telpoch akin kipiaya 18 xiujmej. Itatuan katkaj Momachtianij ika Biblia, tokayit tein ijkuak kipiayaj itaixpantijkauan Jiova. Kipiayaj eyi okichpipil uan ome siuapipil akin kinpaleuijkaj maj mochiuanij itekitikauan Jiova uan maj kichiuanij kemej Jesucristo. Telpoch xijxiujtika kikuaya pan uan tayaya vino keman moelnamikia imikilis Cristo porin kinemiliaya ke yaskia iluikak, ijkon kemej nochin Momachtianij ika Biblia itech nejon xiujmej. Sayoj ke mopatak tein kinemiliaya keman kikakik se tanojnots tein amo keman moelkauaskia, tein motokaytij “Uel miak tagayot”. Kitemakak tokniuj Joseph Rutherford itech se ueyi nechikol tein mochiuak itech xolal Washington (Estados Unidos) itech xiuit 1935. ¿Toni tamachtilis mopatak itech nejon ueyi nechikol?

2. ¿Toni yankuik tamachtilis kitemakak tokniuj Rutherford itech itanojnots?

² Itech itanojnots, tokniuj Rutherford kijtoj akonimej “uel miak tagayot” akin ininka motajtoua itech Apocalipsis 7:9. Ijkuak, Momachtianij ika Biblia kinemiliayaj ke “uel miak tagayot” yaskiaj iluikak, sayoj ke amo tekiuajtiskiaj iuan Jesús porin amo semi tatakamatkaj. Ika Biblia, tokniuj Rutherford kijtoj ke “uel miak tagayot” amo kinixpejpenaj maj nemikan iluikak, ta yejuan okseki iichkauan * Cristo akin makisaskej itech  okachi ueyi tajyouilis uan nemiskej nochipaya nikan taltikpak (Apoc. 7:14). Jesús kijtoj: “Nikinpia oksekin noichkauan [...]. Yejuan nojonkes no moneki nikinualkuis uan yejuan no kitakamatiske notajtoluan. Uan ijkon onkas sayo se sen oloch yetolis de noichkauan uan no onkas sayo se tapixke” (Juan 10:16). Nejin okseki ichkamej yejuan itaixpantijkauan Jiova tatakamatinij akin kichiaj nemiskej nochipaya itech Xochital nikan taltikpak (Mat. 25:31-33, 46). Maj tikitakan keniuj nejin yankuik tamachtilis kipatak ininnemilis miakej itekitikauan Jiova, hasta tokniuj telpoch akin kipiaya 18 xiujmej (Sal. 97:11; Prov. 4:18).

3, 4. ¿Toni kiajsikamatkej miakej tokniuan itech xiuit 1935, uan keyej kiajsikamatkej nejon?

³ Semi kualtsin tein panok keman tokniuj Rutherford kintajtanij akin moajsiaj itech nejon ueyi nechikol: “¿Ueliskia nanmoketsaskej nochin akin nankichiaj nannemiskej nochipaya nikan taltikpak?”. Se tokniuj takat akin ompa moajsia kijtoj ke moketskej panoua tajko akin mosentilijkaj, akin katkaj kemej 20,000. Ompa tokniuj Rutherford kijtoj: “¡Xikinitakan “uel miak tagayot”!”. Satepan, nochin momataxkalojkej uan hasta tsajtsikej ika yolpakilis. Akin ijkatoyaj kiajsikamatkej ke Dios amo kinixpejpenka maj nemikan iluikak nion kinixpejpenka ika iyektikatsin espíritu. Mostika moauijkej 840, uan miakej katkaj okseki ichkamej.

⁴ Satepan ke motemakak nejon tanojnots, tokniuj telpoch akin achto ika titajtojkej uan miakej okseki tokniuan amo kikuayajok pan nion tayayajok vino keman moelnamikia imikilis Cristo. Miakej momachiliayaj kemej se tokniuj takat akin kijtoj ika yolyemanilis: “Nikuajkaok pan uan nitayikaok vino keman moelnamikik imikilis Cristo itech xiuit 1935. Satepan amo nikuajok nion nitayikok porin nikajsikamatik ke Jiova amo nechmatiltijka ika iyektikatsin espíritu ke niaskia iluikak. Nejua nikchiaya ninemis nikan taltikpak uan nitapaleuis maj mochiua se xochital” (Rom. 8:16, 17; 2 Cor. 1:21, 22). Ijkuak uan hasta axkan, “uel miak tagayot” kisentokanij momiakilianij uan tekitij iniuan tokniuan taixpejpenalmej akin yetokejok nikan taltikpak.

5. ¿Keniuj kinita Jiova akin amo kikuajok pan nion tayijok vino?

⁵ ¿Keniuj kinita Jiova akin amo kikuajkejok pan nion tayikejok vino satepan ke motemakak tanojnots itech xiuit 1935? ¿Uan keniuj kiita Jiova se tokniuj akin kikua pan uan tayi vino porin kinemilia ke taixpejpenal, sayoj ke satepan kiajsikamati ke amo kiixpejpenkej maj youi iluikak? (1 Cor. 11:28). Sekin kikuayaj pan uan tayayaj vino porin kinemiliayaj ke yaskiaj iluikak, maski tein melauj mopolojtoyaj. Maski ijkon, Jiova kinselis iniuan okseki ichkamej komo yekmelauj kiajsikamatij ke mopolojtoyaj, amo kikuajok pan nion tayijok vino uan kisentokaj kitekitiliaj Jiova. Uan maski amo kikuajok pan nion tayijok vino, kisentokaj mosentiliaj keman moelnamiki imikilis Cristo porin semi kitasojkamatij taxtauil tein Jiova uan Jesús kitemakakej.

6. ¿Toni kinnauatia Jesús ángeles?

⁶ Kemej amo uejkaua peuas okachi ueyi tajyouilis, semi techyolchikauas komo tikitaj tein kijtoua Apocalipsis capítulo 7, kampa ininka tajtoua tokniuan taixpejpenalmej uan “uel miak tagayot”. Ompa kijtoua ke Jesús kinnauatia ángeles maj ayamo kikajkauakan “nauin tataman ejekame” tein ika taixpolos. Amo moneki kikauaskej maj nejin ejekamej taixpolokan itech taltikpak hasta maj nochin taixpejpenalmej “taixkuaneskayotilme ya”, tein kijtosneki, hasta  maj Jiova kijto ke yejuan nochipa kitakamatkej (Apoc. 7:1-4). Iikniuan Cristo taixpejpenalmej mochiuaj tekiuanij uan tiopixkamej ompa iluikak iuan Cristo. Nejin yejua netetayokolil tein kiseliaj porin nochipa tatakamatkej (Apoc. 20:6). Jiova, Jesús uan ángeles semi yolpakiskej keman 144,000 taixpejpenalmej kiseliskejya ininnetetayokolil ompa iluikak.

7. Kemej kijtoua Apocalipsis 7:9, 10, ¿akonimej kinitak Juan, uan toni kichiujtoyaj? (Xikonita taixkopin ipeujyan amaix).

⁷ Satepan ke Juan ininka tajtoj 144,000 tekiuanij uan tiopixkamej, kiita okse taman tein semi kualtsin. Kinita “uel miak tagayot” akin makisaj itech Armagedón. Yejuan okachi miakej ke 144,000 uan amo senkis momati kanachimej (xikonixtajtolti Apocalipsis 7:9, 10). “Takentokke ika istak tilma”, tein kijtosneki ke amo kichiuanij “pitsotik chiualisme de nikan taltikpak” kampa taixyekana Satanás uan kitakamatinij Dios uan Cristo (Sant. 1:27). Chikauak kijtouaj ke ika taxtauil tein kitemakakej Jiova uan Jesús, “ichkatsin de Dios”, yejuan makiskej. Uan no, “maaktokke kuouxiuit” uan ika kinextiaj ke ika pakilis kiseliaj Jesús kemej Tekiuaj akin Jiova kiixtalij (no xikonita Juan 12:12, 13).

8. ¿Toni kijtoua Apocalipsis 7:11, 12 ke kichiuaj akin nemij iluikak?

⁸ Xikonixtajtolti Apocalipsis 7:11, 12. ¿Toni panok keman akin nemij iluikak kinitakej “uel miak tagayot”? Juan kiita ke nochin semi yolpakij uan kiueyichiuaj Dios. Akin nemij iluikak semi yolpakiskej keman “uel miak tagayot” makisaskej itech okachi ueyi tajyouilis ijkon kemej kiitak Juan.

9. Kemej kijtoua Apocalipsis 7:13-15, ¿toni kichiujtokejya “uel miak tagayot”?

⁹ Xikonixtajtolti Apocalipsis 7:13-15. Juan kijtoua: “Nochi yejuan moyolchipauke ika esyotsin de Yejuatsin ten tamati keme ichkatsin”. Nejin kijtosneki ke “uel miak tagayot” kipiaj chipauak inintanemilil uan ke Jiova kiyolpaktia tein kichiuaj (Is. 1:18). Yejuan motemaktijkejya, moauijkejya, senkis takuaujtamatij itech inemilis Jesús tein kitemakak uan kuali mouikaj iuan Jiova (Juan 3:36; 1 Ped. 3:21). Yejua ika Dios kiyolpaktia tein kichiuaj uan yejuan ueli “kitekitilijtokke [...] youalitonal” nikan taltikpak. Tein melauj, yejuan akin okachi kiteixmatiltiaj iTekiuajyo Dios uan kinpaleuiaj oksekin maj mochiuakan itatojtokakauan Cristo, uan kichiuaj ika yolpakilis porin semi kipatiuitaj iTekiuajyo Dios (Mat. 6:33; 24:14; 28:19, 20).

10. ¿Toni kimatij “uel miak tagayot”, uan toni tein uejkaujya kichixtokej mochiuas?

¹⁰ “Uel miak tagayot” kimatij ke Dios kisentokas kinyekpias satepan ke panos okachi ueyi tajyouilis porin Biblia kijtoua ke “ten tokotsyetika tech ne tayekankatrono, Yejuatsin momasoutok inpan nochi nojonkes para kinpaleuijtiu”. Uan no, mochiuas nejin tein okseki ichkamej uejkaujya kichixtokej: Dios “kinelkaualtis de ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apoc. 21:3, 4).

11, 12. 1) ¿Toni tatiochiualismej kijtoua Apocalipsis 7:16, 17 ke kiseliskej “uel miak tagayot”? 2) ¿Toni ueli kichiuaj okseki ichkamej keman moelnamiki imikilis Cristo, uan keyej kichiuaj?

¹¹ Xikonixtajtolti Apocalipsis 7:16, 17. Itech nejin tonalmej, seki itekitikauan Jiova kipanouaj mayan porin amo kinajsi tomin oso tajyouiaj porin itech ininaltepeuj taltikpakneminij takuejmolchiuaj oso onkak neteuilis. Oksekin tsaktokej porin kitekitiliaj Jiova. Sayoj ke, “uel miak tagayot” kinyolpaktia kimatiskej ke keman makisaskej satepan ke ixpoliuis tein amo kuali, nochipa kipiaskej tein kikuaskej uan Jiova nochipa kinmakas tamachtilis. Keman Jiova kiixpolos tein amo kuali tein Satanás kiixyekana, kinyekpias “uel  miak tagayot” porin ikualanyo kemej yeskia “totonkayot den tonaltsin”. Satepan ke panos okachi ueyi tajyouilis, Jesús kinuikas akin makisaskej kampa onkak “atsin ten kitemaka in yek nemilis”. Nikan taltikpak neminij millones taltikpakneminij uan sayoj “uel miak tagayot” kipiaj se kualtsin nechialis, porin xa sayoj yejuan amo keman momikiliskej (Juan 11:26).

¹² Okseki ichkamej kipiaj se kualtsin nechialis, uan yejua ika semi motasojkamatij iuan Jiova uan Jesús. Maski Jiova amo kinixpejpenak maj nemikan iluikak, no semi kintasojta uan kinpatiuita ijkon kemej taixpejpenalmej. Okseki ichkamej uan taixpejpenalmej ueli kiueyichiuaj Dios uan no kinextiliaj yejuatsin uan Cristo ke kintasojtaj uan motasojkamatij, uan se taman kemej kichiuaj yejua keman mosentiliaj itech iTakualis toTekotsin oso keman moelnamiki imikilis Cristo.

13, 14. ¿Keyej moneki nochin timosentiliskej keman moelnamiki imikilis Cristo?

¹³ Itech xiujmej tein panouanij, moitani ke keman moelnamiki imikilis Cristo, itech 1,000 taltikpakneminij akin mosentiliaj, sayoj kemej se kikua pan uan tayi vino. Nejin kijtosneki ke itech miak nechikolmej, amo akin kikua pan nion tayi vino. Miakej akin mosentiliaj nejon tonal kichiaj nemiskej nikan taltikpak. Komo ijkon, ¿keyej mosentiliaj? Keman monamiktia se taltikpaknenkej, akin kuali iuan mouikaj youij porin kinekij kinnextiliskej akin monamiktiaj ke kintasojtaj uan ke kinpaleuiaj. No ijkon, okseki ichkamej youij keman moelnamiki imikilis Cristo porin kinekij kinnextiliskej Cristo uan taixpejpenalmej ke kintasojtaj uan ke kinpaleuiaj. Uan no, ijkon kinextiaj ke kitasojkamatij inemilis Jesús tein kitemakak, tein kichiua maj satepan uelikan nemikan nochipaya nikan taltikpak.

¹⁴ Okseki ichkamej no mosentiliaj keman moelnamiki imikilis Cristo porin kinekij kitakamatiskej tein Jesús tanauatij. Keman Jesús yekinika kichiuak nejin takualis iniuan itatitaniluan akin amo kikaujkej, kiniluij: “Xiksentokakan xikchiuakan nejin uan ika xinechelnamikikan” (1 Cor. 11:23-26, TNM). Yejua ika, kemej moajsijok taixpejpenalmej nikan taltikpak, okseki ichkamej kisentokaskej mosentiliskej itech iTakualis toTekotsin. Uan no, kinyoleuaj nochin taltikpakneminij maj no iniuan mosentilikan nejon tonal.

15. Keman tikelnamikiskej imikilis Cristo, ¿keniuj uelis tikueyichiuaskej Dios uan no tiknextiliskej yejuatsin uan Cristo ke tikintasojtaj uan ke timotasojkamatij?

 ¹⁵ Keman tikelnamikiskej imikilis Cristo, uelis tikueyichiuaskej Dios uan no tiknextiliskej yejuatsin uan Cristo ke tikintasojtaj uan ke timotasojkamatij keman timokuikatiskej uan tikchiuaskej netataujtil. Tanojnots tein motemakas nejin xiuit motokaytia: “Maj tiktasojkamatikan tein Dios uan Cristo toka kichiujkej”. Keman tikakiskej, okachi timotasojkamatiskej iuan Jiova uan Cristo. Keman kipanoltiskej pan uan vino, uelis tikelnamikiskej ke kiixnextiaj inakayo uan iesyo Jesús. No tikelnamikiskej ke Jiova kikauak maj iKonetsin toka momikiliani uan ijkon tejuan ueliskia tinemiskej nochipaya (Mat. 20:28). Nochin akin kitasojtaj toTajtsin akin moajsi iluikak uan iKonetsin mosentiliskej keman moelnamikis imikilis Cristo.

16. ¿Keyej moijtoua ke taixpejpenalmej uan okseki ichkamej amo tatamamej?

¹⁶ Dios amo okachi kinpatiuita taixpejpenalmej ke okseki ichkamej, ta yejuatsin nochin kintasojta. Tikmatij nejin porin kitemakak sayoj se taman taxtauil, inemilis iKonetsin tein ika kinkouak taixpejpenalmej uan okseki ichkamej. Sayoj taman nechialis tein kipiaj. Sayoj ke nochin, taixpejpenalmej uan okseki ichkamej, moneki kisentokaskej kitakamatiskej Dios uan Cristo (Sal. 31:23). Uan maj amo tikelkauakan ke Dios uelis kichiuas maj iespíritu kinmaka chikaualis nochin itekitikauan. Jiova ueli kimaka iespíritu sejse itekitikauj ijkon kemej monekis, yeski taixpejpenal oso amo.

17. ¿Toni kinekij taixpejpenalmej maj pano?

¹⁷ Keman tokniuan taixpejpenalmej yolij amo kichiaj yaskej iluikak, ta Jiova kinmaka nejon nechialis. Yejuan itech tanemiliaj nechialis tein kipiaj, ika tajtouaj itech ininnetataujtiluan uan kinekij kiseliskej ininnetetayokolil ompa iluikak. Uan maski amo kimatij keniuj chijchiujtoskej ompa iluikak, kinekij yetoskejya iuan Jiova, Jesús, ángeles uan taixpejpenalmej akin yetokejok nikan taltikpak, uan iniuan yetoskej itech iTekiuajyo Dios ompa iluikak (Filip. 3:20, 21; 1 Juan 3:2).

18. ¿Toni kinekij maj pano okseki ichkamej?

¹⁸ Okseki ichkamej kichiaj nemiskej nochipaya nikan taltikpak. Nejin se taman tein kiyolnejnekij nochin taltikpakneminij (Ecl. 3:11). Okseki ichkamej kinekij maj ejko tonal keman uelis tapaleuiskej maj nochi taltikpak mochiua se xochital, keman uelis kichijchiuaskej ininchan, tatokaskej uan kuali kiniskaltiskej ininkoneuan porin amo akinok kokolispeuas  (Is. 65:21-23). Kinekij yajtinemiskej itech nochi taltikpak, kiitaskej tepemej, kampa semi koujyoj uan uejueyi amej, uan kinekij okachi kiixmatiskej tein Jiova kichijchiuak. Sayoj ke okachi kinyolpaktia kimatiskej ke ininkuali uikalis iuan Jiova okachi mochikaujtias mojmostaj.

19. ¿Toni ueli tikchiuaj keman moelnamiki imikilis Cristo, uan kemanian mochiuas itech nejin xiuit?

¹⁹ Jiova kinmakani nochin itekitikauan akin iuan motemaktijkejya se kualtsin nechialis (Jer. 29:11). Itech tonal keman moelnamiki imikilis Cristo, tinochin ueli tikueyichiuaj Dios uan tiknextiliaj yejuatsin uan Cristo ke tikintasojtaj uan timotasojkamatij porin kichiujkej maj ueli tikchiakan tinemiskej nochipaya. Keman moelnamiki imikilis Cristo yejua nechikol tein okachi kipia ipatiuj tein tikpiaj xijxiujtika akin yekmelauj tikchiuaj kemej Cristo. Itech xiuit 2021, nejin nechikol mochiuas sábado 27 metsti marzo satepan ke pankalakis Tonaltsin. Miakej uelis mosentiliskej porin itech ininaltepeuj tekiuanij amo kinixnamikij, sekin mosentiliskej maski kinixnamikij uan oksekin kichiuaskej nejin nechikol kampa tsaktokej. Maj itech nochi nechikolmej, tein ayamo nechikolmej uan nochin akin mosentiliskej maj yolpakikan itech nejin tonal tein semi kipia ipatiuj. Jiova, Jesús, ángeles uan taixpejpenalmej akin yetokejya ompa iluikak kinitstoskej.