1. Polelo yeo e ilego ya newa kopanong ya selete ya 1935 e ile ya kgoma bjang ngwanabo rena yo mongwe wa mofsa?

GO BE go na le lapa le lengwe la Barutwana ba Beibele, e lego tsela yeo Dihlatse tša Jehofa di bego di bitšwa ka yona kgale. Ka lapeng leo go be go na le barwa ba bararo le barwedi ba babedi, gomme batswadi ba bona ba ile ba ba ruta go hlankela Jehofa Modimo le go ekiša Jesu Kriste. Yo mongwe wa barwa bao o be a na le mengwaga e 18 ge a be a kolobetšwa ka 1926. Ngwanabo rena yo wa mofsa yo a botegago, o be a eja senkgwa le go nwa beine Segopotšong ngwaga o mongwe le o mongwe go no swana le ge Barutwana ba Beibele ka moka ba be ba dira ka nako yeo. Eupša kholofelo ya gagwe ka bokamoso e ile ya fetoga ge a be a ekwa polelo ya bohlokwa ya sehlogo seo se rego, “Lešaba le Legolo.” Polelo yeo e ile ya newa ke Ngwanabo rena J. F. Rutherford kopanong ya selete yeo e bego e swaretšwe Washington, D.C., U.S.A. ka 1935. Barutwana ba Beibele ba ile ba ithuta’ng kopanong yeo?

2. Ke therešo efe yeo Ngwanabo rena Rutherford a ilego a e hlalosa polelong ya gagwe?

² Polelong yeo ya gagwe, Ngwanabo rena Rutherford o ile a hlalosa gore ke bomang bao e bego e tla ba karolo ya “lešaba le legolo” leo go bolelwago ka lona go Kutollo 7:9. Go fihla ka nako yeo, Barutwana ba Beibele ba be ba nagana gore lešaba le legolo e be e le sehlopha sa batho bao ba bego ba tla ya legodimong, eupša ba be ba sa botege go swana le batlotšwa. Ngwanabo rena Rutherford o ile a diriša Mangwalo go hlalosa gore lešaba le legolo le ka se ye go phela legodimong, eupša lešaba le legolo ke  ba dinku tše dingwe * bao ba tlago go phologa ‘masetlapelo a magolo’ gomme ba tla ba phela ka mo go sa felego mo lefaseng. (Kut. 7:14) Jesu o tshepišitše gore: “Ke na le dinku tše dingwe tšeo e sego tša lešaka le; le tšona ke swanetše go di tliša gomme di tla theetša lentšu la ka, ya ba mohlape o tee wa modiši o tee.” (Joh. 10:16) Ba “dinku tše dingwe” bao go bolelwago ka bona mo, ke Dihlatse tša Jehofa tšeo di botegago tšeo di nago le kholofelo ya go tlo phela ka mo go sa felego lefaseng la Paradeise. (Mat. 25:31-33, 46) A re boneng kamoo kwešišo ye e mpsha ya therešo ya Beibele e ilego ya fetoša maphelo a Dihlatse tša Jehofa tše dintši, go akaretša le bophelo bja ngwanabo rena wa mofsa wa mengwaga e 18 yoo re boletšego ka yena.—Ps. 97:11; Die. 4:18.

3-4. Batho ba bantši ba ile ba kwešiša eng ka kholofelo ya bona kopanong ya 1935, gona ke ka baka la’ng ba ile ba ba le kwešišo yeo?

³ Nako e kgahlišago kopanong yeo e ile ya fihla ge seboledi se be se kgopela batheetši gore: “Ke kgopela gore bohle bao ba nago le kholofelo ya go tlo phela ka mo go sa felego mo lefaseng ba emelele.” Kopanong yeo go be go na le batho ba ka bago ba 20 000, gomme ngwanabo rena yo mongwe yoo a bego a le moo o re go ile gwa emelela batho ba ka godimo ga ba 10 000. Ke moka Ngwanabo rena Rutherford o ile a re: “Bonang! Lešaba le legolo!” Ka morago ga moo, batho ka moka bao ba bego ba le gona kopanong yeo ba ile ba goeletša ka lethabo. Bao ba bego ba emeletše ba be ba kwešiša gore Jehofa ga se a ba kgetha gore ba yo phela legodimong, ka gobane ba be ba tseba gore ga se ba tlotšwa ka moya wa Modimo. Letšatšing le le latelago kopanong yeo go ile gwa kolobetšwa batho ba 840, bao ba bantši ba bona e bego e le ba dinku tše dingwe.

⁴ Ka morago ga polelo yeo, ngwanabo rena wa mofsa yo re boletšego ka yena le ba bangwe ba bantši ba ile ba tlogela go ja senkgwa le go nwa beine Segopotšong. Ngwanabo rena yo mongwe o ile a bolela ka tsela yeo ba bantši ba bego ba ikwa ka yona ge a be a re: “La mafelelo ge ke be ke eja senkgwa le go nwa beine Segopotšong e be e le ka 1935. Ke ile ka tlogela go ja Segopotšong ka gobane ke be ke tseba gore Jehofa ga se a diriša moya wa gagwe o mokgethwa go nkgetha gore ke yo phela legodimong. Go e na le moo, ke be ke na le kholofelo ya go tlo phela mo lefaseng le go thuša go le dira gore e be paradeise.” (Baroma 8:16, 17; 2 Bakor. 1:21, 22) Ga e sa le go tloga ka nako yeo, palo ya ba lešaba le legolo e oketšegile kudu gomme ba šoma gotee le batlotšwa bao ba sa lego mo lefaseng.

5. Jehofa o lebelela bjang bao ba tlogetšego go ja senkgwa le go nwa beine Segopotšong?

⁵ Jehofa o lebelela bjang bao ba ilego ba tlogela go ja senkgwa le go nwa beine Segopotšong ka morago ga 1935? Gona Jehofa o lebelela bjang motho yo e lego Hlatse e kolobeditšwego yoo a jago Segopotšong, ke moka ka morago a tla a lemoga gore ga se a tlotšwa ka moya o mokgethwa? (1 Bakor. 11:28) Ba bangwe ba be ba eja Segopotšong ka ge ba be ba sa kwešiše kholofelo yeo ba nago le yona. Eupša ge e ba ba amogela gore ba dirile phošo, ba tlogela go ja Segopotšong, ke moka ba tšwela pele ba hlankela Jehofa ka go mmotegela, ga go pelaelo gore o tla ba amogela e le karolo ya ba dinku tše dingwe. Le ge ba sa je senkgwa le go nwa beine, ba ba gona Segopotšong ka gobane ba leboga kudu seo Jehofa le Jesu ba ba diretšego sona.

6. Jesu o laetše barongwa gore ba dire’ng?

⁶ Ka ge masetlapelo a magolo a le kgauswi kudu, e tla ba mo go kgothatšago gore re boledišane ka seo Kutollo kgaolo 7 e se bolelago ka Bakriste ba tloditšwego le ka lešaba le legolo la dinku tše dingwe. Jesu o ile a laela barongwa gore ba tšwele pele ba thibetše diphefo tše nne tša phedišo. Barongwa bao ga se ba swanela go tlogela diphefo tšeo gore di foke mo lefaseng go fihlela Bakriste ka moka ba tloditšwego ba swailwe, seo se ra gore go fihlela Jehofa a phethile gore ba botegile. (Kut. 7:1-4) Ka baka la ge bana bao babo Kriste ba ile ba botega, e tla ba dikgoši le baperisita le yena legodimong. (Kut. 20:6) Jehofa, Jesu le barongwa ba tla thaba kudu ge ba bona batlotšwa ka moka ba 144 000 ba amogela moputso wa bona wa go phela legodimong.

7. Go ya ka Kutollo 7:9, 10, Johane o ile a bona bomang ponong, gona ba be ba dira’ng? (Bona seswantšho sa letlakala la ka ntle.)

⁷ Ka morago ga gore Johane a bolele ka dikgoši le baperisita ba 144 000, o ile a bona selo se sengwe seo se kgahlišago kudu. O ile a bona “lešaba le legolo” leo le phologago Haramagedone. Dihlopha tše tše pedi ga di swane ka gobane lešaba le legolo le na le batho ba bantši ba fetago ba 144 000, le gona ga re tsebe gabotse gore lešaba le le legolo le tla feleletša le na le batho ba bakae. (Bala Kutollo 7:9, 10.) Ba lešaba le legolo ba apere ‘diaparo tše tšhweu,’ e lego seo se bontšhago gore ba ile ba se itšhilafatše ka dilo tša lefaseng la Sathane gomme ba dula ba botegela Modimo le Jesu. (Jak. 1:27) Ba goeletša ka gore ba phološitšwe ka baka la seo Jehofa le Jesu, e lego Kwana ya Modimo, ba ba diretšego sona. Le gona ba swere makala a mepalema ka diatleng e lego seo se bontšhago gore ba thabela go amogela Jesu e le Kgoši yeo e kgethilwego ke Jehofa.—Bapiša le Johane 12:12, 13.

8. Kutollo 7:11, 12 e re botša eng ka Jehofa, Jesu, barongwa le batlotšwa bao ba tsošeditšwego legodimong?

⁸ Bala Kutollo 7:11, 12. Bao ba lego legodimong ba ile ba arabela bjang ge ba bona lešaba le legolo? Ponong yeo Johane a e bonego, o ile a ba bona ka moka ga bona ba thabile e bile ba tumiša Modimo ge ba bona lešaba le legolo. Jehofa, Jesu, barongwa le batlotšwa bao ba tsošeditšwego legodimong, ba tla thaba kudu ge ba bona pono ye ya Johane e phethagala ge lešaba le legolo le etšwa masetlapelong a magolo le phela.

9. Go ya ka Kutollo 7:13-15, lešaba le legolo le dira’ng gona bjale?

⁹ Bala Kutollo 7:13-15. Johane o boletše gore ba lešaba le legolo ba “hlatswitše diaparo tša bona tše telele ba di šweufatša mading a Kwana.” Se se ra gore ba na le matswalo a hlwekilego e bile Jehofa o a ba amogela. (Jes. 1:18) Ke Bakriste bao ba ineetšego go Modimo le go kolobetšwa, bao ba nago le tumelo e tiilego sehlabelong sa Jesu le bao ba nago le tswalano e botse le Jehofa. (Joh. 3:36; 1 Pet. 3:21) Ka baka leo ba swanelega go ema pele ga sedulo sa bogoši sa Modimo gore ba mo hlankele mosegare le bošego mo lefaseng. Gona bjale ba bolela ditaba tše dibotse ka mafolofolo le go dira batho barutiwa ka gobane ba etiša Mmušo wa Modimo pele.—Mat. 6:33; 24:14; 28:19, 20.

10. Lešaba le legolo le kgodišegile ka eng, gona ke tshepišo efe yeo le tlago go e bona e phethagala?

¹⁰ Ba lešaba le legolo bao ba tlago go phologa masetlapelo a magolo ba kgodišegile gore Modimo o tla tšwela pele a ba hlokomela, ka gobane “Yo a dutšego sedulong sa bogoši o tla phurollela tente ya gagwe godimo ga bona.” Tshepišo yeo e lego kgale ba dinku tše dingwe ba e letetše e tlo phethagala. “[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—Kut. 21:3, 4.

11-12. (a) Go ya ka Kutollo 7:16, 17, lešaba le legolo le tlo hwetša ditšhegofatšo dife? (b) Ba dinku tše dingwe ba ka dira’ng ge ba le Segopotšong, gona ba tutueletšwa ke’ng go dira seo?

 ¹¹ Bala Kutollo 7:16, 17. Gona bjale ba bangwe ba batho ba Modimo ba bolawa ke tlala ka baka la ge ba se na tšhelete ya go reka dijo goba ka baka la mathata ao a bakilwego ke ntwa. Ba bangwe ba golegilwe ka baka la tumelo ya bona. Eupša ba lešaba le legolo ba thabišwa ke go tseba gore ka morago ga gore ba phologe ge lefase le la Sathane le tla be le fedišwa, ba tla dula ba na le dijo tše dintši e bile Jehofa o tla ba hlahla. Ge Jehofa a tla be a fediša lefase le la Sathane, o tla kgonthišetša gore lešaba le legolo le šireletšwa kgalefong ya gagwe yeo e swanago le ‘phišo e babolago.’ Ka morago ga masetlapelo a magolo, Jesu o tla iša bao ba phologilego “didibeng tša meetse a bophelo” bjo bo sa felego. Nagana ka se: Lešaba le legolo le tlo diragalelwa ke selo seo se sa kago sa diragalela batho ba bangwe. Gare ga batho ka moka ba bantšintši bao ba kilego ba phela, ke bona feela bao go ka diregago gore ba ka se tsoge ba hwa!—Joh. 11:26.

¹² Ba dinku tše dingwe ba leboga Jehofa le Jesu ka kholofelo e kgahlišago yeo ba nago le yona! Le ge Jehofa a se a ba kgetha gore ba yo phela legodimong, o ba rata go swana le ka tsela yeo a ratago batlotšwa ka yona. Batlotšwa le ba dinku tše dingwe, ka moka ga bona ba ka tumiša Modimo le Jesu. Tsela e nngwe yeo ba dirago se ka yona ke ka go ba gona Segopotšong.

13-14. Ke ka baka la’ng ka moka ga rena re swanetše go ba gona Segopotšong?

¹³ Go thoma mengwageng e sego kae e fetilego, ke batho ba sego kae feela bao ba jago senkgwa le go nwa beine Segopotšong. Diphuthegong tše dintši ga go na batho bao ba jago Segopotšong. Batho ba bantši bao ba bago gona Segopotšong ba na le kholofelo ya go tlo phela mo lefaseng. Bjale ke ka baka la’ng ba eba gona Segopotšong? Ba ba gona ka mabaka a swanago le ao a dirago gore batho ba ye manyalong a bagwera ba bona. Batho ba ya manyalong a bagwera ba bona ka gobane ba nyaka go ba bontšha gore ba a ba rata e bile ba nyaka go ba thekga. Ka mo go swanago, ba dinku tše dingwe ba ba gona Segopotšong ka gobane ba nyaka go bontšha gore ba rata Jesu le batlotšwa e bile ba nyaka go ba thekga. Le gona ba nyaka  go bontšha gore ba leboga sehlabelo sa Jesu seo se dirilego gore go kgonege gore ba tle ba phele ka mo go sa felego mo lefaseng.

¹⁴ Lebaka le lengwe la bohlokwa leo le dirago gore ba dinku tše dingwe ba be gona Segopotšong ke gore ba nyaka go kwa taelo ya Jesu. Ge Jesu a be a thoma tiragalo yeo ya bohlokwa le baapostola ba gagwe ba botegago, o ile a re go bona: “Dulang le dira se e le go nkgopola.” (1 Bakor. 11:23-26) Ka gona ba dinku tše dingwe ba tla tšwela pele ba eba gona Segopotšong ge feela go sa na le batlotšwa mo lefaseng. Le gona ba dinku tše dingwe ba mema batho ka moka gore le bona ba be gona Segopotšong.

15. Re ka dira’ng go tumiša Modimo le Jesu ge re le Segopotšong?

¹⁵ Ge re le Segopotšong re na le sebaka sa go tumiša Modimo le Jesu ge re opela le ge re rapela re le gotee. Sehlogo sa polelo yeo e tlago go newa Segopotšong ngwageng wo se re: “Bontšha Gore o Leboga Seo Modimo le Jesu ba go Diretšego Sona!” Polelo yeo e tlo dira gore re leboge Jehofa le Jesu ka mo go tseneletšego. Ka gona ge senkgwa le beine di fetišwa, re tla naganišiša ka seo di se swantšhetšago, e lego mmele wa Jesu le madi a gagwe. Le gona re tla naganišiša ka taba ya gore Jehofa o ile a re bontšha lerato ka go dumelela Morwa wa gagwe gore a tlo re hwela e le gore re tle re phele ka mo go sa felego. (Mat. 20:28) Yo mongwe le yo mongwe yo a ratago Tatago rena wa legodimong le Morwa wa gagwe, o tla nyaka go ba gona Segopotšong.

16. Batlotšwa le ba dinku tše dingwe ba swana bjang?

¹⁶ Go na le ditsela tše dingwe tšeo batlotšwa le ba dinku tše dingwe ba swanago ka tšona. Jehofa ga a rate sehlopha se sengwe go feta se sengwe. Jehofa o rata batlotšwa le ba dinku tše dingwe go swana. Re tseba se ka gobane o dirišitše bophelo bja Morwa wa gagwe yo a rategago go lopolla batlotšwa le ba dinku tše dingwe. Phapano magareng ga dihlopha tše tše pedi ke gore ba bangwe ba yo phela legodimong gomme ba bangwe ba tlo phela mo lefaseng. Eupša dihlopha tše ka bobedi di swanetše go dula di botegela Modimo le Jesu. (Ps. 31:23) Le gona gopola gore Jehofa o nea yo mongwe le yo mongwe wa rena moya wa gagwe o mokgethwa ge re o hloka, go sa šetšwe gore motho ke motlotšwa goba ga se motlotšwa.

17. Batlotšwa ba fela pelo ya gore go direge’ng?

¹⁷ Bakriste bao ba tloditšwego ga ba belegwe ba na le kholofelo ya go yo phela legodimong. Modimo ke yena a ba neago kholofelo yeo. Ba nagana ka yona, ba rapela ka yona e bile ba fela pelo ya go tlo hwetša moputso wa bona wa go yo phela legodimong. Ga ba tsebe gore mebele ya bona ya legodimong e tlo ba bjang. (Bafil. 3:20, 21; 1 Joh. 3:2) Eupša ba fela pelo ya go bona  Jehofa, Jesu, barongwa le batlotšwa ba bangwe gotee le go buša le bona legodimong.

18. Ba dinku tše dingwe ba fela pelo ya gore go direge’ng?

¹⁸ Ba dinku tše dingwe ba fela pelo ya go tlo phela ka mo go sa felego mo lefaseng. Ye ke kganyogo yeo batho ba belegwago ba na le yona. (Mmo. 3:11) Le gona ba fela pelo ya go tlo fetoša lefase le ka moka gore e be paradeise. Ba fela pelo ya gore letšatši leo ba tlago go kgona go ikagela dintlo, ba bjala dirapa le go thabela bophelo le bana ba bona, le fihle. (Jes. 65:21-23) Ba nyaka go tlo bona mafelo a mantši ao a lego gona mo lefaseng, ba bone dithaba, mašoka, mawatle le go ithuta ka dilo tše dintši tšeo Modimo a di bopilego. Eupša selo seo se ba thabišago kudu ke go tseba gore segwera sa bona le Jehofa se tlo tšwela pele se gola le go feta.

19. Segopotšo se re nea sebaka sa go dira’ng, gona se tlo swarwa neng ngwageng wo?

¹⁹ Jehofa o neile bahlanka ba gagwe ka moka kholofelo e kgahlišago. (Jer. 29:11) Segopotšo sa lehu la Jesu se nea yo mongwe le yo mongwe wa rena sebaka sa go tumiša Modimo le Jesu ka seo ba re diretšego sona gore re tle re kgone go phela ka mo go sa felego. Segopotšo ke seboka sa bohlokwa kudu seo Bakriste ba bago le sona ngwaga o mongwe le o mongwe. Se tla swarwa ka morago ga ge letšatši le sobetše ka Mokibelo wa di-27 tša March 2021. Ngwageng wo ba bantši ba tla kgona go ba gona tiragalong ye ya bohlokwa ba sa šitišwe ke selo. Ba bangwe ba tla ba gona Segopotšong le ge ba ganetšwa. Mola ba bangwe ba tla swara Segopotšo ba le kgolegong. Go sa šetšwe gore maemo a rena e tla ba e le afe, eka yo mongwe le yo mongwe a ka gopola gore Jehofa, Jesu, barongwa le batlotšwa bao ba šetšego ba tsošeditšwe legodimong ba tla be ba lebeletše. Le gona, eka phuthego e nngwe le e nngwe, sehlopha se sengwe le se sengwe le motho yo mongwe le yo mongwe a ka thabela Segopotšo!