NKHANI YAKUPFUNZA 3
Thimu Likulu la Mabira Manango Limbatumbiza Mulungu na Kristu
‘Cipulumuso cathu cacokera kwa Mulungu wathu, omwe adakhala pa mpando wa umambo pabodzi na kwa Mwana wa bira.’—CIBVUMBULUTSO 7:10.
NYIMBO 14 Tumbizani Mambo Mupsa wa Dziko la Pansi
BZOMWE TIN’PFUNZA *
1. Kodi tswaka linango lidatokonyedwa tani na nkhani yomwe idafotokozedwa pa mtsonkhano wacigawo mu 1935?
PAKHANA banja linango la Anyakupfunza wa Bibliya omwe na kupita kwa nthawe adadzadziwika na dzina lakuti Mboni za Yahova. Banjalo likhana wana wacimuna atatu na wacikazi awiri. Ndipo lidapfunzisa wanawo kuti atumikire Mulungu na kutewezera Jezu Kristu. Ndipo m’bodzi mwa wana wacimunawo, akhana magole 18 yakubadwa, pomwe adabatizidwa, mu 1926. Ninga momwe akhacitira Anyakupfunza wa Bibliya wentse, tswaka lakukhulupirikali likhadyambo mkate na kumwambo vinyu pa Ciraliro ca Mbuya gole liri-lentse. Napo bzikhali tenepo, cidikhiro cace cakutsogolo cidacinja thangwe ra nkhani yakufunika ya msolo wakuti: ‘Thimu likulu.’ Nkhani imweyi idafotokozedwa mu gole la 1935 na m’bale J. F. Rutherford, pa mtsonkhano wacigawo ku Washington, D.C., ku Estados Unidos. Kodi Anyakupfunza wa Bibliyawo adapfunza ciyani pa mtsonkhano wacigawoyo?
2. Kodi ni cadidi ciponi comwe m’bale Rutherford adafotokoza mu nkhani yace?
2 Mu nkhani yace, m’bale Rutherford adafotokoza bza wale omwe akucita mbali ya ‘thimu likulu’ lakufotokozedwa pa Cibvumbulutso 7:9. Kucokera pomwe akhanati kubva nkhaniyi, Anyakupfunza wa Bibliyawo akhakumbuka kuti pakhana thumu laciwiri la wanthu omwe angadadzayenda kudzulu, omwe akhana cikhulupiro cakucepa kusiyana na anyakudzozedwa. M’bale Rutherford adaphatisa basa bzinembo kuti afotokoze kuti wanthu omwe ambacita mbali mu thimu likululi * alibe kusankhulidwa kuti akakhale kudzulu, koma iwo ni mabira manango ya Kristu, omwe an’dzapulumuka pa ‘citsautso cikulu’ ndipo an’dzakhala na moyo pa dziko la pantsi pano mpaka kale-kale. (Cibvumbulutso 7:14) Jezu adalewa kuti: ‘Ndina mabira manango, yomwe ni ya thanga lini limweri, yamweyo ndiniyabweresambo, ndipo iyo yan’dzabva fala langu ndipo yan’dzakhala thimu libodzi na m’busa m’bodzi.’ (Juwau 10:16) Akristau omwe ambacita mbali ya mabira manangowa akuimira Mboni za Yahova zakukhulupirika, omwe ana cidikhiro cakudzakhala na moyo wakusaya kumala m’paraizo pantsi pano. (Mateu 25:31-33, 46) Mbatiwoneni momwe kabvesesedwe kapsaka ka cadidi ca m’Bibliya kadacinjira moyo wa atumiki wa Yahova kuphatanidzambo m’bale wa magole 18 ule.—Psalymo 97:11; Mimwani 4:18.
KABVESESEDWE KAPSA KADACINJA MOYO WA WANTHU AZINJI
3-4. Pa mtsonkhano wacigawo wa mu gole la 1935, n’ciyani comwe wanthu azinji adazindikira pakulewa bza cidikhiro cawo, ndipo n’thangwe ranyi?
3 Pa mtsonkhanoyo bzidakhala bzakudekeza, pomwe mfotokozi adabvunza abveseri kuti: “Mwentse omwe muna cidikhiro cakudzakhala na moyo wakusaya kumala pa dziko la pansi pano mungaime?” Mwakubverana na bzomwe adalewa m’bale munango, omwe akhalipombo pa mtsonkhanopo, wanthu wakupitirira 20.000 adaima. Tenepo, m’bale Rutherford adalewa kuti: “Onani! Thimu likulu!” Pambuyo pa bzimwebzi, wanthu wentse adakomedwa kwene-kwene. Wentse omwe adaimawo adazindikira kuti akhalibe kusankhulidwa kuti akakhale na moyo kudzulu. Iwo adadziwa kuti akhalibe kudzozedwa na mzimu wa Mulungu. Pa ntsiku yaciwiri ya mtsonkhanoyo wanthu wakukwana 840 adabatizidwa, ndipo azinji wa iwo adadzakhala wa mabira manango.
4 Pambuyo pa nkhani ire, tswaka lomwe lafotokozedwa kumayambiriro kwa nkhaniyi pabodzi na wanthu azinji adasiya kudya mkate na kumwa vinyu pa Ciraliro ca Mbuya. Wanthu azinji adabva ninga momwe adabvera m’bale munango wakubzicepesa, omwe adalewa kuti: “Cikumbuso comwe cidacitika mu gole la 1935 cidakhala cakumaliza kudya mkate na kumwa vinyu. Ndidazindikira kuti Yahova alibe kuphatisa basa mzimu wace wakucena kuti ndikhale na cidikhiro cakuti ndikakhale na moyo kudzulu. M’mbuto mwace ndikhana cidikhiro cakudzakhala na moyo pantsi pano na kudzacitambo mbali pa basa la kukonza dziko la pantsi kukhala paraizo.” (Waroma 8:16, 17; 2 Wakolinto 1:21, 22) Kuyambira pamwepo mbogo ya wanthu wa mu thimu likulu ikuyenda icithimizirika, ndipo iwo akuphata basa pabodzi na anyakudzozedwa omwe akalipo. *
5. Kodi Yahova ambawawona tani wale omwe asiya kudya mkate na kumwa vinyu pa Cikumbuso?
5 Kodi Yahova ambawawona tani wale omwe adasiya kudya mkate na kumwa vinyu pambuyo pa Cikumbuso ca mu 1935? Kodi Yahova ambabvambo tani akambawona Akristau wale omwe adabatizidwa, ndipo ambakhulupira kuti an’funika kudya mkate na kumwa vinyu pa Ciraliro ca Mbuya, tsono patsogolo pace akabvesesa ambadzawona kuti alibe kudzozedwa na mzimu wakucena? (1 Wakolinto 11:28) Wanthu winango ambadya mkate na kumwa vinyu pa Cikumbuso thangwe rakuti ambabvesesa lini bza cidikhiro cawo. Koma penu iwo an’zindikira kuti akhaphonya acisiya kudya mkate na kumwa vinyuyo ndipo acipitiriza kutumikira Yahova mwakukhulupirika, iye an’dzawabvuma kukhala mu thimu la mabira manango. Napo kuti iwo adasiya kudya mkate na kumwa vinyu pa Cikumbuso koma ambapitiriza kugumanika pa Cikumbusopo thangwe ambatenda kwene-kwene bzomwe Yahova na Jezu adawacitira.
CIDIKHIRO CA MABIRA MANANGO
6. Kodi Jezu adauza anjo kuti acite ciyani?
6 Pakuti citsautso cikulu ciniyamba tsapanopapa mpsakuthandiza kwa ifepano kupfunza bukhu la Cibvumbulutso msolo 7, pomwe pambafotokoza bza Akristau wakudzozedwa na bza thimu likulu la mabira manango. Jezu adauza anjo kuti abakapitirize kuphatirira mwamphanvu mphepo zinai zakupfudza. Iwo anilekerera lini mphepozi kugwera pa dziko la pantsi mpaka pomwe Akristau wakudzozedwa wentse an’dzaikhidwa cidindo. Bzomwe bzikuthandauza kuti Yahova an’dzatsimikizadi kuti iwo mbakukhulupirika. (Cibvumbulutso 7:1-4) Ninga cisimbo thangwe ra kukhulupirika kwawo, abale wa Kristu wakudzozedwawa an’dzakhala amambo na wantsembe na Kristuyo kudzulu. (Cibvumbulutso 20:6) Yahova, Jezu pabodzi na anjo, an’dzakondwa kwene-kwene pakuwona anyakudzozedwa wa 144.000 akutambira mabaibai yawo kudzulu.
![[Cithunzi-thunzi pa tsamba lakuyamba]](https://assetsnffrgf-a.akamaihd.net/assets/m/2021241/univ/wpub/2021241_univ_cnt_1_xs.jpg)
Thimu likulu lidabvala mikanjo micena ndipo lina mithambi ya kanjedza m’manja mwawo, lidaima patsogolo pa ceza ca mpando waumambo wa Mulungu na patsogolo pa mwana wa Bira (Onai ndime 7)
7. Mwakubverana na Cibvumbulutso 7:9, 10, kodi Juwau adawona yani m’matsomphenya, ndipo iwo akhacita ciyani? (Onani cithunzi-thunzi pa tsamba lakuyamba.)
7 Pomwe Juwau adamala kulewa bza wamambo na wantsembe wakukwana 144.000, iye adawona pomwe ‘thimu likulu la wanthu’ lomwe lin’dzapulumuka pa nkhondo ya Armagedo. Mwakusiyana na thimu lakuyamba lire, thimu laciwirili lina wanthu azinji kwene-kwene, ndipo ifepano timbadziwa lini bwino-bwino mbogo yawo. (Werengani Cibvumbulutso 7:9, 10. *) Wanthuwo akhadabvala ‘mikanjo micena.’ Bzimwebzi bzikulatiza kuti iwo adapitiriza ‘kukhala wakusaya nthontsa’ m’dziko la Sathaniri ndipo adapitirizambo kukhala wakukhulupirika kwa Mulungu na Kristu. (Tiyago 1:27) Iwo ambalewa mwakukuwa kuti adapulumusidwa thangwe ra bzomwe Yahova na Jezu, omwe ni Mwana wa Bira wa Mulungu, adawacitira. Wanthuwo adaphata mithambi ya kanjedza m’manja mwawo, bzomwe bzikulatiza kuti iwo mwakukondwa ambabvuma kuti Jezu adasankhulidwa na Yahova kuti akhale Mambo.—Ndendemezerani na Juwau 12:12, 13.
8. Kodi Cibvumbulutso 7:11, 12, ambatiuza ciyani pakulewa bza banja la Yahova lakudzulu?
8 Werengani Cibvumbulutso 7:11, 12. * Kodi n’ciyani cidacitika pomwe wale omwe ali kudzulu adawona bzimwebzi bzikucitika? Juwau adawona wentse omwe ali kudzulu akukondwa ndipo akutumbiza Mulungu thangwe ra kuwona thimu likulu la wanthu. Banja la Yahova lakudzulu lin’dzakondwa thangwe ra kuwona kukwanirisidwa kwa polofesiyayi, pomwe thimu likulu la wanthu lin’dzapulumuka pa citsautso cikulu.
9. Mwakubverana na Cibvumbulutso 7:13-15, kodi wale omwe ambacita mbali ya thimu likulu akucita ciyani ntsiku zino?
9 Werengani Cibvumbulutso 7:13-15. * Juwau adanemba kuti thimu likulu la wanthu ‘[afula] mikanjo yawo, aciicenesa na mulopa wa Mwana wa Bira.’ Bzimwebzi bzikufuna kulewa kuti iwo ana makumbukidwe yakucena ndipo Yahova ambakomedwa nawo. (Zaiya 1:18) Wanthuwo mbakristau wakubzipereka na kubatizidwa, omwe ana cikhulupiro camphanvu pa ntsembe ya Jezu, ndipo iwo ali pa uxamwali bwamphanvu na Yahova. (Juwau 3:36; 1 Pedru 3:21) Ndipopa Mulungu ambakomedwa nawo, ndipo iwo akumucitira ‘utumiki bwakupambulika usiku na masikati,’ pa dziko la pantsi pano. Napo ntsiku zino, iwo mbanyongo ndipo akucita bzizinji pa basa lakupalizira Umambo bwa Mulungu na kupfunzisa wanthu. Iwo akucita bzimwebzi thangwe rakuti Umambo bwa Mulungu ni nkhani yakufunika kwene-kwene pa moyo wawo.—Mateu 6:33; 24:14; 28:19, 20.
Wanthu wakukondwa wa mu thimu likulu la mabira manango apulumuka pa citsautso cikulu (Onani ndime 10)
10. Kodi thimu likulu la wanthu lina citsimikizo ciponi, ndipo ni bzinthu bziponi bzomwe iwo an’dzawona bzikukwanirisidwa?
10 Thimu likulu la wanthu omwe apulumuka pa citsautso cikulu, ana citsimikizo cakuti Mulungu an’dzapitiriza kuwasamalira thangwe ‘omwe akhadakhala pa mpando wa umambo an’dzafuthula tendi lace padzulu pawo kuti awakhotcerere.’ Ndipo bzomwe wanthu omwe ambaimira mabira manango akudikhirira kudzawona, bzin’dzacitikadi: ‘[Mulungu] an’dzapukuta misozi yentse m’maso mwawo, ndipo infa in’dzawoneka lini pomwe. Pan’dzawoneka lini pomwe kulira, ayai kubuula ne kuwawidwa.’—Cibvumbulutso 21:3, 4.
11-12. (a) Mwakubverana na Cibvumbulutso 7:16, 17, kodi omwe ambacita mbali ya thimu likulu an’dzatambira bzisimbo bziponi? (b) Kodi Akristau wa mabira manango angacite ciyani pa Cikumbuso, ndipo thangwe ranyi?
11 Werengani Cibvumbulutso 7:16, 17. * Atumiki winango wa Yahova ambabonera na njala thangwe ra kusaya kobiri zakuti agulire cakudya ayai thangwe ra mabvuto yomwe yambabwera thangwe ra nkhondo. Ndipo winango adafungiridwa m’kawoko thangwe ra cikhulupiro cawo. Koma napo bziri tenepo, wale omwe ambacita mbali ya thimu likulu ambakomedwa thangwe ra kudziwa kuti akadzapulumuka pa kupfunzidwa kwa dziko lakuipali, iwo nthawe zentse an’dzakhala na cakudya cizinji pabodzi na mapfunziso mazinji yakucokera kwa Yahova. Ndipo Yahovayo akadzapfudza dziko la Sathaniri, thimu likulu la wanthu lin’dzabva lini ‘kutentha kuli-kwentse’ thangwe ukali bwa Yahova bun’dzawafikira lini. Cikadzamala citsautso cikulu, Jezu an’dzatsogolera wanthu omwe an’dzakhala pa dziko la pantsiwo ku ‘madzi ya moyo’ wakusaya kumala. Bzimwebzi bzikulatiza kuti thimu likulu lina cidikhiro cabwino kwene-kwene. Ndipo wanthu azinji omwe an’dzakhala na moyo pa nthawe imweyo, angadzafe lini!—Juwau 11:26.
12 Akristau wa mabira manango ana cidikhiro cabwino ndipo thangwe ra cidikhiroco iwo ambatenda Yahova na Jezu! Yahova alibe kuwasankhula kuti akakhale kudzulu, koma iye ambawafuna kwene-kwene ninga momwe ambafunira anyakudzozedwa. Anyakudzozedwa na wakusaya kudzozedwa, wentse ambatumbiza Mulungu na Kristu. Ndipo njira ibodzi yakucitira bzimwebzi ndiyo kugumanika pa Ciraliro ca Mbuya.
TUMBIZANI NA MTIMA WANU WENTSE YAHOVA NA JEZU PA CIKUMBUSO
Mkate na vinyu, bzomwe bzimbafambisidwa pa Cikumbuso bzimbatikumbusa kuti Jezu adatifera kuti tidzakhale na moyo (Onani ndime 13-15)
13-14. Thangwe ranyi munthu ali-wentse an’funika kugumanika pa msinda wakukumbukira infa ya Jezu Kristu?
13 Ntsiku zino pa wanthu 1.000 ni wanthu ang’ono-ng’ono okha omwe ambadya mkate na kumwa vinyu pa Cikumbuso. M’magwere mazinji ya pa dziko la pantsi mulibe ne munthu m’bodzi omwe ambadya mkate na kumwa vinyu pa Cikumbuso. Ndipo wanthu azinji omwe ambagumanika pa Cikumbusoco ana cidikhiro cakudzakhala pa dziko la pantsi. Tsono, thangwe ranyi iwo ambagumanika pa Ciraliro ca Mbuya? Iwo ambagumanika na cakulinga cibodzi-bodzi ninga comwe wanthu ambagumanikira pa malowozi ya xamwali wawo. Iwo ambagumanika thangwe ambafuna kulatiza lufoyi lawo na kuthandiza wanthu omwe akulowolanawo. Mwakundendemerana na bzimwebzi, Akristau wa mabira manango ambagumanika pa Cikumbuso thangwe ambafuna kulatiza lufoyi lawo na kuthandiza Kristu pabodzi na anyakudzozedwa. Wa mabira manangowo ambagumanikambo pa Cikumbuso kuti alatize kutenda kwawo ntsembe ya Jezu Kristu, yomwe in’dzacitisa kuti iwo adzakhale na moyo wakusaya kumala pa dziko la pantsi.
14 Thangwe linango lomwe limbacitisa kuti wa mabira manango agumanike pa Cikumbuso ni kubvera lamulo la Jezu. Pomwe Jezu adayambisa msinda wakupambulikayu pabodzi na apostolo wace wakukhulupirika, iye dawauza kuti: ‘Mumbadzacite bzimwebzi m’Cikumbuso cangu.’ (1 Wakolinto 11:23-26) Tenepo, wa mabira manango ambapitiriza kugumanika pa Ciraliro ca Mbuya pomwe anyakudzozedwa anango akali pa dziko la pantsi pano. Ndipo iwo ambacemera munthu ali-wentse kuti adzagumanikembo pa Cikumbusopo.
15. Kodi tingatumbize tani Mulungu na Kristu pa Cikumbuso?
15 Pa Cikumbuso timbakhala na mwayi wakutumbiza Mulungu na Kristu mwa kuimba nyimbo na kupemba. Nkhani ya gole lino ina msolo wakuti: “Tendani Bzomwe Mulungu na Kristu Adakucitirani!” Nkhaniyi in’dzaticitisa kukuza kutenda kwathu Yahova na Kristu. Tenepo, pomwe mkate na vinyu bzin’dzafambisidwa tin’dzakwanisa kukumbukira kuti bzimwebzi bzikuimira thupi na mulopa wa Jezu. Ndipo tin’dzakumbukira bza lufoyi lomwe Yahova adalilatiza pakubvuma kupereka Mwanace kuti adzafe, kuti tikhale na moyo. (Mateu 20:28) Ali-wentse omwe ambafuna Baba wanthu wakudzulu na Mwana wace an’dzagumanika pa Cikumbuso.
MBATENDANI YAHOVA THANGWE RA CIDIKHIRO COMWE ADAKUPASANI
16. Kodi ni mwa njira ziponi anyakudzozedwa na wa mabira manango mbakundendemerana?
16 Pa bzinthu bzinango anyakudzozedwa na mabira manango mbakundendemerana. Ndipo Yahova ambafuna lini kwene-kwene thimu linango kuposa linango. Mathimu yentse ngakufunika kwa iye. Kuposa bzentse, iye adapagali na preso ibodzi-bodzi anyakudzozedwa na wa mabira manango, na mulopa wa Mwana wace omwe iye ambamufuna kwene-kwene. Kusiyana kwa mathimu mawiriya n’kwakuti iwo ana cidikhiro cakusiyana. Mathimu mawiriya yan’funika kukhala yakukhulupirika kwa Mulungu na kwa Kristu. (Psalymo 31:23) Ndipo kumbukirani kuti mzimu wa Mulungu umbaphata basa mwakundendemerana kwa tentsenefe. Bzimwebzi bzin’funa kulewa kuti Yahova ambapereka mzimu wace wakucena kwa munthu ali-yentse, mwakubverana na bzomwe iye akufunikira.
17. Kodi anyakudzozedwa omwe akali pa dziko la pantsi pano akudikhirira ciyani?
17 Akristau wakudzozedwa ambabadwa lini na cidikhiro ca kukakhala kudzulu. Koma Mulungu ndiye omwe ambawapasa cidikhiro cimweci. Iwo ambakumbukira bza cidikhiro cawoci, ambacipempherera ndipo ambadikhirira mwakukomedwa kudzatambira mabaibai yawo kudzulu. Iwo ambadziwa lini kuti mathupi yawo yan’dzakhala tani kudzuluko. (Wafiripo 3:20, 21; 1 Juwau 3:2) Koma napo bziri tenepo, iwo akudikhirira kukawonana na Yahova, Jezu, anjo na anyakudzozedwa winango. Ndipo akufunisisa kukakhala m’mbuto zawo mu Umambo bwa Mulungu.
18. Kodi wa mabira manango akudikhirira ciyani?
18 Akristau wa mabira manango ambakomedwa na cidikhiro comwe munthu ali-yentse ambakhumba kukhala naco, comwe ni kukhala na moyo wakusaya kumala pa dziko la pantsi. (Mpalizi 3:11) Iwo ambadikhirira na mtima wentse ntsiku yomwe an’dzathandizira kukonza dzikoli kuti likhale paraizo. Ndipo akudikhirirambo na mtima wentse ntsiku yomwe an’dzamanga nyumba zawo, an’dzalima minda yawo, na kulera wana wawo pomwe ana thanzi labwino. (Zaiya 65:21-23) Iwo akudikhirirambo kudzazungira mbuto zizinji pa dziko la pantsi, kudzawona mapiri, mathengo yakudeka, nyanza, na kupfunza bzinthu bzentse bzomwe Yahova adalenga. Kuthimizira bzimwebzi, comwe cimbawakondwesa kwene-kwene ni kudziwa kuti uxamwali bwawo na Yahova bun’dzapitiriza kukula.
19. Kodi msinda wa Cikumbuso umbatipasa mwayi uponi, ndipo gole lino Cikumbusoco cin’dzacitika ntsiku iponi?
19 Yahova adapereka kwa mtumiki wace ali-wentse cidikhiro cabwino cakutsogolo. (Jeremiya 29:11) Msinda wakukumbukira infa ya Jezu Kristu umbatipasa mwayi wakutumbiza Mulungu na Kristu pa bzomwe iwo adaticitira. Ndipo bzomwe adaticitirabzo bzin’dzacitisa kuti tidzakondwe na moyo wakusaya kumala kutsogolo. Msinda wa Cikumbuso ni mtsonkhano wakufunika kwene-kwene omwe Akristau ambakhala nawo gole liri lentse. Msinda umweyi un’dzacitika pa Sabudu, 27 Março, 2021, dzuwa likamira. Wanthu azinji ambakhala m’mbuto zomwe ana ufulu bwakugumanika pa msinda wakufunikayu. Wanthu winango an’dzagumanika pa msindayu napo kuti akuletsedwa kutsonkhana. Ndipo winango an’dzacita msindayu napo kuti ali m’kawoko. Yahova, Jezu, anjo pabodzi na anyakudzozedwa omwe adalamusidwa kale, ambawona pomwe gwere liri-lentse, thimu, ayai munthu ali-yentse payekha akambacita msinda wakukumbukira infa ya Jezu!
NYIMBO 150 Lingani Yahova Kuti Mudzapulumuke
^ ndi. 5 27 Março, 2021, ni ntsiku yakupambulika kwa Mboni za Yahova. Usiku bwa ntsiku imweyi tin’dzakumbukira infa ya Kristu. Azinji omwe an’dzagumanika pa Cikumbusoci, ni wale omwe ambacita mbali ya thimu lomwe Jezu adalicemera kuti ‘mabira manango.’ Kodi ni cadidi ciponi comwe Mboni za Yahova zidapfunza pakulewa bza thimuli mu gole la 1935? Kodi mabira manango yakudikhirira kudzawona ciyani pambuyo pa citsautso cikulu? Kodi wa mabira manango ambatumbiza tani Mulungu na Kristu akagumanika pa Cikumbuso?
^ ndi. 2 KAFOTOKOZEDWE KA MAFALA MANANGO: Mabira manango yakuphatanidza wale omwe adatsonkhanisidwa kuyambira pomwe ntsiku zakumalizira zidayamba. Iwo ambatewezera Kristu, ndipo ana cidikhiro cakudzakhala na moyo pa dziko la pantsi pano mpaka kale-kale. Thimu likulu ni Akristau wa mabira manango omwe an’dzakhala akana moyo pomwe Kristu an’dzatonga wanthu pa citsautso cikulu, ndipo iwo an’dzapulumuka pa citsautso cikuluco.
^ ndi. 4 KAFOTOKOZEDWE KA MAFALA MANANGO: Fala lakuti ‘akalipo’ likulewa bza Akristau wakudzozedwa omwe akana moyo pa dziko la pantsi pano ndipo ambadya mkate na kumwa vinyu pa Ciraliro ca Mbuya.
^ ndi. 7 Cibvumbulutso 7:9 Bzitamala bzimwebzi, ndidawona thimu likulu la wanthu lomwe palibe munthu angadakwanisa kulilewenga, lakucokera ku mitundu, madzinza, mbumba na bzirewedwe bzentse. Iwo akhadaima pa maso pa mpando wa umambo na pa maso pa Mwana wa Bira, atabvala mikanjo micena, ndipo akhana mithambi ya kanjedza m’manja mwawo. 10 Ndipo iwo akhakuwa, acimbati: “Cipulumuso cathu cacokera kwa Mulungu wathu, omwe adakhala pa mpando wa umambo pabodzi na kwa Mwana wa Bira.”
^ ndi. 8 Cibvumbulutso 7:11 Ndipo wanjo wentse akhadaima mwakuzungulira mpando wa umamboyo na akulu pabodzi na bzakulengedwa bzinai bza moyo bzire. Ndipo adagodama mpaka nkhope zawo pantsi pa maso pa mpando wa umamboyo, acinamata Mulungu, 12 acimbati: “Ameni! Cisimbo, mbiri, nzeru, kutenda, ciremekezo na mphanvu zikhale za Mulungu wathu mpaka kale-kale. Ameni.”
^ ndi. 9 Cibvumbulutso 7:13 Ndipo m’bodzi wa akuluwo adandibvunza kuti: “Kodi mbani adabvala mikanjo micenawa, ndipo acokera kuponi?” 14 Ine ndidamutawiriratu nthawe ibodzi-bodziyo kuti: “Mbuya wangu, imwepo ndimwe mun’dziwa bzimwebzo.” Ndipo iye adati: “Amwewa ni wale womwe akucokera ku citsautso cikulu, ndipo afula mikanjo yawo, aciicenesa na mulopa wa Mwana wa Bira. 15 Ndipopa iwo ali pa maso pa mpando wa umambo wa Mulungu. Iwo akumucitira utumiki bwakupambulika usiku na masikati m’templo mwace. Ndipo omwe akhadakhala pa mpando wa umambo an’dzafuthula tendi lace padzulu pawo kuti awakhotcerere.
^ ndi. 11 Cibvumbulutso 7:16 Iwo an’dzabva lini pomwe njala ne kubva nyota. Ndipo an’dzapsa lini na dzuwa ne kutentha kuli-kwentse, 17 thangwe Mwana wa bira omwe ali ku mbali kwa mpando wa umambo, an’dzawausa na kuwalondoza mpaka ku ntsantsa ya madzi ya moyo. Ndipo Mulungu an’dzapukuta misozi yentse m’maso mwawo.”
