1. ¿Imataj pasashga juc jovinwan 1935 watacho discursuta wiyarcuptin?

JUC joven bautizacurgan 1926 wata, 18 watayoj caycar. Taytancunaga Jehovapa testigunmi cargan. Payga quimsa olgu wamrancunata y ishcay warmi wamrancunatami Jehovapita y Jesuspita yachachirgan. Cay jovinga waquin cristianucunanönami wata wata tantata micoj y vinuta upoj Jesuspa wanuyninta yarpänapaj chacaycho. Pero tiempuwanga chayta rurargannachu, ¿imanir? 1935 watacho ruracargan juc jatun asamblea, Estados Unidos naciuncho. Wawgui Rutherford “La grande muchedumbre” nej tituluyoj discursupita parlaramurgan. ¿Imatataj tantiachicamurgan chay asambleacho?

2. ¿Imatataj wawgui Rutherford tantiachicushga discursuncho?

² Chay discursunchomi, wawgui Rutherford shumaj tantiachicurgan yupaytapis mana atipaypaj runacuna pïcuna cashganta, chaypaj parlan Apocalipsis 7:9. Chaycamaga nipäcorgan lapan shongunwan Jehovata mana sirvej cielupaj aywaj cristianucuna cashgantami. Wawgui Rutherford Bibliawan shumaj tantiachicorgan chay yupaytapis mana atipaypaj runacuna Biblia nishganga cielupaj mana aywananpaj cajta, sinoga Armagedón wichan cay Pachacho caycänanpaj y nircur imaycamapis cawananpaj cajtami nirgan (Apoc. 7:14). Jesusmi cayno nirgan: “Manami cayllachöchu uyshäcuna caycan. Juc-lä canchacunachöpis caycanmi. Chaycunatapis  shuntashämi. Paycunaga nishäcunatami wiyaconga. Chaymi llapanpis jucllachacashalla canga. Uyshërunpis jucnayllami canga” (Juan 10:16, TDI). * Cay grupuchomi caycan Diosta mana cachaypa sirvej, imayajpis cawayta shuyaraj, Jehovapa testiguncuna (Mat. 25:31-33, 46). Canan yachacurishun cay mushoj tantiachicuy imano maychicaj cristianucunata yanapashganta (Sal. 97:11; Prov. 4:18).

3, 4. 1935 watacho, ¿imatataj hermanucuna cuentata gocärergan y imanir?

³ Chay asambleacho caycajcunapa alapa cushicuypäga caycargan wawgui Rutherford cayno tapucamushganmi: “¿Sharcurcunquimanchuraj cay Pachacho cawayta shuyarajcuna?”. Chayno tapuriptinmi chay asambleacho lapan caycajcunapita pulanpita mas-shi sharcurgan. Chaypita discursaj nirgan: “¡Paycunami yupaytapis mana atipaypaj runacuna caycan!”. Chauras lapancuna chipyaypa cushicuycurgan. Paycunami cuentata gocärirgan cielupaj mana aywananpaj cajta ni espíritu santunwan acrashga mana cashganta. Warayninnanmi casi 840 runacunano bautizacärirgan y casi lapancuna cargan cay Pachacho cawayta shuyarajcuna.

⁴ Chaypitaga galaycunancho parlashganchi joven y maychicaj waquin hermanucunapis manami Señorpa Cenancho tantata micupäcurgannachu vinutapis upupäcurgannachu. Maychicajmi cay humilde hermano nishganno nipäcurgan: “Señorpa Cenancho tantata y vinuta upurgä 1935 watayajla. Cuentatami gocurgä Jehovaga cielupaj aywanäpaj mana acramashganta. Nogaga shuyarargä cay Pachacho cawayta y munaycargä mayna paraisumanna ticrananta” (Rom. 8:16, 17; 2 Cor. 1:21, 22). Chaypita wichaypäga cay Pachacho cawananpaj cajcunaga maychicajmi mirashga y cielupaj manaraj aywajcunawanmi igual igual aruycan.

5. ¿Imanotaj Jehová rican Conmemoración junaj tantata mana micojta y vinuta mana upojtana?

⁵ 1935 watacho waquincuna cuentata gocärergan cay Pachacho quedacunanpaj, ¿imanotaj paycunata Jehová rican? Waquincuna ninman ‘cielupaj aywanäpaj Dios acramashga’, pero tiempuwan cuentata gocunman chayno mana cashganta. ¿Ima nishwantaj paycunapita? (1 Cor. 11:28). Manaraj shumaj tantiarmi waquincunaga unaycho tantata micoj y vinuta upoj, pipis chaypa pasarga ali shongulanwanchi manana micunganachu tantata y upunganachu vinuta y ali yaracoj cashpanmi Tayta Jehovaga cay Pachacho tiyananpaj yanapanga. Conmemoración wichan tantata mana micurpis y vinuta mana upurpis cayno shumaj reuniunmanga aywarcaycanlami. Chaycho ricacan Jehovata y Jesusta alapa agradecicäringanta.

6. ¿Angelcuna imata rurananpätaj Jesús mandan?

⁶ Chayamunanpäna caycan alapa nacanapaj tiempo, chaymi alapa ali canga  cielupaj aywajcunapita y Pachacho quedajcunapita ichic masla tantiarishganchi. Apocalipsis 7 caj capitulucho caypita parlaycämun. Chaychomi Jesús mandan angelcunata ushacächicoj chuscu wayracunata chaparaycänanpaj, Pachaman mana pücamunanpaj. Chaytaga ruran, cielupaj aywajcuna señalashga cashgancama o Jehová Dios aprobaciunninta goshgancama (Apoc. 7:1-4). Paycunami reyman y sacerdotiman ticrapäcunga y Jesuswan gobernamunga (Apoc. 20:6). Jehová, Jesús y angelcunaga alapami cushicuycunga 144.000 acrashgacuna cielucho premiunta chasquiriptin.

7. Apocalipsis 7:9, 10 textucuna nishganno, ¿pïcunatataj Juan ricargan, y imata ruraycajta? (Garancho caycaj dibujuta ricay).

⁷ 144.000 acrashga reycunata y sacerdoticunata ricashganlachomi, apóstol Juan ricargan “yupaytapis mana atipaypaj” chaychicaj runacunata, Armagedoncho salvacojcunata (leiriy Apocalipsis 7:9, 10). Paycunaga Satanaspa munayninta mana rurashga carmi, Diosta y Jesusta mana jaguiypa sirvishga carmi yulaj ropawan vistishga caycan. Y cushicurmi sinchipa nipäcun: ‘salvashgaga caycanchi Jehová y Jesús rurashganraycurmi’. Jina palmera ramacunata aptash carcaycan Jesuspa Gobiernunta chasquicurmi (Juan 12:12, 13 textuwan tincuchiy).

8. Apocalipsis 7:11, 12 textucuna nishganno, ¿imatataj angelcuna ruran?

⁸ Leiriy Apocalipsis 7:11, 12. ¿Y imataraj rurapäconga cielucho lapan angelcuna? Juanga rican alapa cushicäringanta y Diosta alabar carcaycashganta, paycunaga ricarpaycangami imano mana atipaypaj chaychicaj runacuna salvacunganta. Taytalanchi Jehová y Jesuspis mayraj cushicärenga.

9. Apocalipsis 7:13-15 textucuna nishganno, ¿imatataj rurarcaycan yupaytapis mana atipaypaj cristianucuna?

⁹ Leiriy Apocalipsis 7:13-15, TDI. Juanmi wilacun: “Cashni uysha yawarninta mashtar wañushanpitami perdunashana carcaycan. Chaymi röpancunapis yuraj caycan”. Chayno vistishgaga caycan Jehová Dios chasquishgan captinmi (Is. 1:18). Chay cristianucunaga dedicacushga y bautizacushgami carcaycan, y lapan shongunwan Jesuspa sacrificiunmanmi yaracun y Jehová Diospa amigun carcaycan (Juan 3:36; 1 Ped. 3:21). Cay Pachapita “pagasta junajta” Diosta alabarcaycan. Paycunami may chaychopis predicarcaycan y más discipulucuna mirananpaj yanapacurcaycan, y Diospa Gobiernunla imatapis alchananpaj cajman yaracun (Mat. 6:33; 24:14; 28:19, 20).

10. ¿Imapitataj seguro carcaycan yupaytapis mana atipaypaj cristianucuna, y Biblia ima awnicushgantataj chasquipäcunga?

¹⁰ Cay yupaytapis mana atipaypaj cristianucunaga segurumi carcaycan jatun nacay pasariptin Diosninchi cuidananpaj cajta, Bibliaga ninmi maquincho caycajcunapaj bendiciunninta Diosninchi jichamunanpaj. Jina “Wagay manami canganachu. Wanuy manami canganachu. Nanächicuypis, llaquicuypis manami canganachu” nir achca watacunapa Biblia awnicushganpis cumplicämungami (Apoc. 21:3, 4, TDI).

11, 12. 1) Apocalipsis 7:16, 17 textucuna nishganno, ¿ima bendiciuntataj chasquipäcunga cay yupaytapis mana atipaypaj cristianucuna? 2) Y Conmemoración junaj, ¿imatataj ruranman y imanir?

 ¹¹ Leiriy Apocalipsis 7:16, 17. Canan wichanga maychicaj Jehovapa sirvejnincunami nacarcaycan micuy mana captin, guellay mana captin, tarashgan naciunnincho guerracuna o peliacunaraycur, y hasta waquinga carcelchopis carcaycan Diosta sirviycashganpita. Pero chay lapanta pasaycaptinpis, cay yupaytapis mana atipaypaj cristianucunaga alapami cushicun cay mana ali mundo ushacäcuptin shamoj tiempucho imatapis mana faltapacunanpaj cajta musyar. Cay Satanaspa maquincho caycaj munduta ushacächishgan wichanga, cay yupaytapis mana atipaypaj cristianucunata Jehovaga cuidangami imapis mana pasananpaj. Jatun nacay päsariptinga Jesusmi yanapanga mana ushacaj cawayta tarinanpaj y maychica bendiciuncunatapis gonga. Imano cushicuypäraj canga, Dioslata adurajcunaga cuentatachi gocunga chay wichan imano Dios salvashganta y quiquincunapitana caycanga imaypis manana wanunanpaj (Juan 11:26).

¹² Cay Pachacho cawaj cristianucunaga imano agradecicushgami caycan Jehovata y Jesusta. Y paycunataga igual-lami Jehovaga cuyan, cielupaj aywacoj cajcunatawanpis. Cay ishcay grupo cristianucunaga Conmemoraciunman aywarmi Jehovata y Jesusta alabarcaycan.

13, 14. ¿Imanirtaj lapanchi Conmemoraciunman aywashwan?

¹³ Juc waranga cristianucuna Conmemoraciunman aywajcunapita, juclaylami o manapis tantata micun y vinuta upun. Chayga casi lapan Conmemoraciunman aywajcunaga Pachacho cawaytami shuyaran. Chaurasga, ¿imanirtaj aywapäcun chay reuniunman? Imanomi juc matrimoniuman casaracojcunapa amiguncuna paycunata cuyashpan aywan, chaynolami cay Pachacho imaycamapis cawaj cristianucuna Conmemoraciunman aywan Jesusta y cielupaj  aywajcunata cuyashpan. Y mana chaylachu, paycunaraycur Jesús wanushganta agradecicurpis aywapäcunmi.

¹⁴ Jinamanpis, cay Pachacho cawaj cristianucunaga Conmemoraciunman aywan, “cay tantata micur imaypis yarpapäcamanqui” nir Jesús mandacushganta casucurmi (1 Cor. 11:23-26). Chaurasga, paycunaga jinalami Conmemoraciunman aywarcaycanga cielupaj aywajcuna lapancuna cielupaj aywacushganyaj. Chaymi, pï mayta invitan cay shumaj reuniunman aywananpaj.

15. ¿Imanotaj lapanchi Diosta y Cristuta alabashwan Conmemoración junaj?

¹⁵ Conmemoración junajga lapanchimi Diosta y Jesusta alabashun y oracushun. Cay wata discursupa titulunga nin: “Alapa agradecicushun noganchiraycur Cristo rurashganta”. Cayta wiyarga, más agradecidumi sienticushun Jehovata y Jesusta. Tanta y vino pasashgancamami lapanchi yarpäshun caycunaga Jesuspa yawarnin y cuerpun japuy cashganta. Jina yarpäshunmi noganchi wanunanchita mana munar Jehová Churinta cachamushganta (Mat. 20:28). Lapan Jehovata y Jesusta cuyajcunami Conmemoraciunman aywapäcunga.

16. ¿Imacunachotaj igual caycan ishcan grupo cristianucuna?

¹⁶ Cielupaj aywajcuna y Pachacho cawajcunapis igual-lami caycan Diospa nawpancho. Ishcancunatapis igualpami cuyan Diosga. Ishcan grupo salvacunanpämi cawayninta Jesús goshga, ishcay grupumanga raquican juc-lä juc-lä sitiucho cawanan captilanmi. Pero ishcan grupumi salvacunanpäga Jehovata y Jesusta mana cachaypa sirvipäcunman (Sal. 31:23). Cielupaj aywanan captin o Pachacho cawanan captinpis, Jehovaga espíritu santunwan igualpami lapan sirvejnincunata necesitashganmanno yanapan.

17. ¿Imatataj shuyarpaycan cielupaj acrashgacuna?

¹⁷ Cielupaj aywananpaj acrashgacunaga manami cielupaj aywayta munaycarchu yuripäcun, quiquin Jehovami shonguncunacho churan imata munananpaj. Paycunaga imaypis cielulamanmi yarparäcun, y hasta oraciunnincunachopis chaylatami mañacun. Imano cuerpuncuna cananpa cajta mana musyarpis, paycunaga alapami munarcaycan Jehovawan, Jesuswan angelcunawan y waquin  acrashgacunawan tronuncunacho jamacäriyta (Filip. 3:20, 21; 1 Juan 3:2).

18. ¿Imatataj shuyarcaycan Pachacho cawajpa caj cristianucuna?

¹⁸ Pachacho imaycamapis cawajpa caj cristianucunanami lapan runacunanopis Pachacho imaycamapis cawayta alapa munapäcun (Ecl. 3:11). Paycunaga alapami munaycun mayna hora chayamunanta cay Pacha juc shumaj paraisuman ticrananpaj yanapacuyta, plantacunata plantapacur, wasincunata sharcachir, familiancunawan cushi cushila goyar, mana gueshyaypa cawar y maspis (Is. 65:21-23). Alapami munaycun may chaypa puriyta, jircacunapa, monticunapa, lamarcunapa y lapan Jehová camashgancunata ricapacur puriyta. Pero más cushishgami shuyacuycan Jehovawan goyay goyay más amigun cashgan junaj chayamunantami.

19. ¿Imata ruraytataj puedishun Conmemoración junaj, y imaytaj canga cay wata?

¹⁹ Jehovaga lapan sirvejnincunatami juc shumaj bendiciunta shuyaraycächin (Jer. 29:11). Conmemoración junajmi cielupaj aywajcuna y Pachacho cawajcunapis agradecicuyta puedinchi Jehová y Jesús noganchiraycur rurashganta. Conmemoración junajmi lapan rasunpa caj cristianucunapaj más importante. Cay wataga 27 de marzo junajmi inti jegarcuptin goricäshun, achcajmi cay wataga libri juntacanga, waquincunapaj ichanga facilchu canga, chiquicoj runacuna rurincho cawashganraycur o carcelcho cashganraycurpis. Lapan congregaciuncuna, grupucuna y lapan runacunapis cushi cushila cay importante reuniuncho caycäshun, Jehová, Jesús y angelnincunaga cushi cushilami ricaraycanga.