1. 1935 watachö juk asamblëa rurakanqanchö, ¿imatatan juk jövin entiendirirqan?

JUK jövinmi 1926 watachö 18 watayoqllaraq këkar bautizakurqan. Tsë jövinpa teytankunaqa Bibliata estudiaqkunam kayarqan, tsënömi unëqa Jehoväpa testïgunkunata reqiyaq. Pëkunaqa kima ollqu wamrayoq y ishkë warmi wamrayoqmi kayarqan. Pëkunatam Jehoväta sirwiyänampaq y Jesucristupa qateqnin tikrayänampaq yachatsiyarqan. Tsë jövinqa, tsë witsan Bibliata Estudiaqkunanöpis, cada watam Jesus Wanunqanta Yarpäna reunionchö, tantata mikoq y vïnuta upoq. Peru ciëluta ëwëta shuyaranqanmi cambiarirqan, “Mëtsikaq nunakuna” neq discursuta wiyariptin. Estädus Unïdus nacionchö këkaq Washington markachö, 1935 wata rurakanqan asamblëachömi, wawqi Joseph Rutherford tsëpaq parlarqan. ¿Imatatan tsë asamblëachö entienditsikuyarqan?

2. ¿Imatatan wawqi Rutherfordqa juknöpa entienditsikurqan?

² Revelacion 7:9 ninqanchö, “mëtsikaq nunakuna” nir pikunapaq parlëkanqantam tsë asamblëachöqa wawqi Rutherford entienditsikurqan. Tsë witsanyaqqa tsë grüpu nunakunapis ciëluta ëwayänampaq kaqtam creiyaq. Peru llapanchö mana wiyakushqa kayaptinmi, tsë mëtsikaq nunakunaqa juk grüpupita kayänan karqan. Wawqi Rutherfordmi Bibliawan yachatsikurqan, tsë juk üshakuna * grüpuqa, ciëluman mana ëwayänampaq kaqta, sinöqa ‘alläpa jatun sufrimientu’ ushariptin Patsachö kawayänampaq  kaqtam (Rev. 7:14). Jesusmi kënö änikurqan: “Juk üshäkunapis kapamanmi, pëkunaqa manam kë kanchapitatsu kayan; pëkunatapis kë kanchamanmi pushamushaq, y qayanqätam wiyayanqa, y juk grüpulla y juk mitseqyoqllam kayanqa” (Juan 10:16). Tsë grüpu nunakunaqa kayan, Diosta mana dejëpa sirweq Jehoväpa testïgunkunam, pëkunam Shumaq Patsachö mana wanushpa kawëta shuyaräyan (Mat. 25:31-33, 46). Wawqi Rutherford tsëta entienditsikunqanqa, tsë witsan mëtsika wawqi panikunata y tsë 18 watayoq jövinta imanö yanapanqanta rikärishun (Sal. 97:11; Prov. 4:18).

3, 4. 1935 wata asamblëachöqa, ¿imatatan mëtsikaq wawqi panikuna cuentata qokuriyarqan y imanir?

³ Tsë asamblëachö kushikuypaqqa karqan, tsëchö këkaqkunata wawqi Rutherford kënö tapunqanmi: “¿Manatsuraq Patsachö kawëta shuyaraqkuna, llapëki sharkayämunkiman?”. Tsëchö këkaqkunapita jukninmi nirqan, tsëchö 20 milnö juntarëkaqkunapita, pullampitapis mas sharkuyanqanta. Tsënam wawqi Rutherfordqa, kënö nirqan: “¡Rikäyë, pëkunam mëtsikaq nunakuna kayan!”. Tsëta wiyarirmi kushikur paqchir o taqllar qallëkuyarqan. Tsëchö shëkaqkunaqa, clärum entiendiriyarqan ciëluchö kawayänampaq Dios mana akrashqa kanqanta. Waränin junaqmi, 840 bautizakuriyarqan y pëkunapita mëtsikaqmi Patsachö kawëta shuyaräyarqan.

⁴ Tsë witsampitam, mëtsikaq wawqi panikuna y tsë jövinpis, Jesus Wanunqanta Yarpäna reunionchö, tantata mikuyarqannatsu ni vïnuta upuyarqannatsu. Mëtsikaqmi tsë wawqinö pensayarqan, pëmi kënö nirqan: “1935 watachö Jesus Wanunqanta Yarpäna reunionllachönam, tantata mikurqä y vïnuta upurqä. Tsëchömi cuentata qokurirqä, ciëluta ëwanäpaq Jehovä mana akramashqa kanqanta. Tsëpa rantinqa, Patsachö kawëta y entëru Patsa Shumaq Huertaman tikranampaq yanapakuytam shuyararqä” (Rom. 8:16, 17; 2 Cor. 1:21, 22). Tsëpita kananyaqqa, Bibliachö willakunqan mëtsikaq nunakunaqa masmi mirayashqa. Y ciëlupaq akrashqa këkaqkunawan juntum, Diospita yachatsikurnin këkäyashqa.

5. Tantata mikuyta y vïnuta upuyta dejashqa kaqkunataqa, ¿imanötan Jehovä rikan?

⁵ 1935 watachö tantata mikuyta y vïnuta upuyta dejashqa kaqkunataqa, ¿imanötan Jehoväqa rikan? Pipis Jehoväpa testïgun ciëlupaq akrashqa kanqanta creir, tantata mikunman y vïnuta upunman. Peru tiempuwanqa ciëlupaq akrashqa mana kanqanta cuentata qokunman, ¿imatan pëta pasanqa? (1 Cor. 11:28). Wakinqa ciëlupaq akrashqa kayanqanta pensarmi tsëta rurayaq. Peru pantashqa kayanqanta cuenta qokurir tantata mikuyta y vïnuta upuyta dejarir Jehoväta sirwir sïguiyaptinqa, pëqa Patsachö kawayänampaqmi permitinqa. Tantata manana mikurnin ni vïnuta manana upurpis, Jehoväta y Jesusta agradecikurmi, Jesus Wanunqanta Yarpäna reunionmanqa ëwarnin sïguiyan.

6. ¿Imata rurayänampaqtan angelkunata Jesus mandan?

⁶ Alläpa jatun sufrimientu chämunampaqqa ichikllanam pishin. Tsëqa  ciëlupaq akrashqakunapaq y Patsachö kawayänampaq kaqkunapaq Revelacion librupa 7 kaq capïtulumpita yachakunqantsikmi yanapamäshun. Tsëchömi nin, Patsapa chuskun lädunkunapita shamoq vientukunata tsapararnin sïguiyänampaq angelkunata Jesus mandanqanta. Pëkunaqa, manam tsë vientukuna Patsaman pükayänanta dejayänantsu, ciëlupaq akrashqakuna sellashqa kayanqanyaq, juk parlakuychöqa, ushananyaq alli tsarakushqa kayanqanta Jehovä ninqanyaq (Rev. 7:1-4). Alli tsarakurllam, ciëlupaq akrashqakunaqa sacerdöti kayanqa y Cristuwan gobernayämunqa (Rev. 20:6). 144.000 ciëlupaq akrashqakuna premiunkunata chaskiriyaptinqa, Jehovä, Jesus y angelkunam alläpa kushikuyanqa.

7. Revelacion 7:9 y 10 ninqannöpis, ¿pikunatatan Juan rikarqan, y imatatan rurëkäyarqan? (Kë revistapa qaranchö këkaq dibüjuta rikäri).

⁷ Ciëlupaq akrashqa 144.000 reykunata y sacerdötikunata rikärirmi, Juanqa Armagedon guërrata kawëkar pasashqa mëtsika nunakunata rikarqan. Pëkunaqa ciëlupaq akrashqakunapitapis mas atskaqmi kayan y manam musyëtsu ëkaq kayanqan (leyi Revelacion 7:9, 10). ‘Largu y yulaq röpakunawan vistishqam’, tsëqa rikätsikun Satanas gobernanqan nunakunanö mana kashqa kayanqanta y Diostawan Cristuta mana dejëpa sirwishqa kayanqantam. Y fuertipam kënö niyan: “Salvacionqa Diosnintsikpitam shamun, gobernar täkunachö tëkaqpita, y Achkaspita”. Jina Jesusta Rey kanampaq Jehovä akranqampita kushishqa kayanqanta rikätsikurmi, palmërapa rämankunata tsararëkäyan (Juan 12:12, 13 ninqantawan igualaratsi).

8. Revelacion 7:11 y 12 ninqanqa, ¿ima nintan Jehoväwan ciëluchö këkaqkunapaq?

⁸ Leyi Revelacion 7:11 y 12. Jehoväwan ciëluchö këkaqkuna ¿imatatan rurayarqan? Mëtsikaq nunakunata rikarnin alläpa kushikuyarqan y Diosta alabayarqan, tsëtam Juanqa rikarqan. Alläpa jatun sufrimientuta mëtsikaq nunakuna kawëkar pasayaptinqa, Jehoväwan ciëluchö këkaqkunaqa alläpam kushikuyanqa.

9. Revelacion 7:13 a 15 ninqannöpis, ¿imatatan Patsachö kawaqpaq mëtsikaq nunakuna rurëkäyan?

⁹ Leyi Revelacion 7:13 a 15. Juanqa, tsë mëtsikaq nunakuna “Achkaspa yawarninchö largu röpankunata taqshayashqa y yulaqyätsiyashqa” kanqantam nin. Tsëqa rikätsikun limpiu concienciayoq y Jehoväpa rikëninchö alli kayanqantam (Is. 1:18). Pëkunaqa Diosllatana sirwiyänampaq änikurmi, bautizakuyashqa y Jesusman markäkuyanqanrëkur o yärakuyanqanrëkurmi Jehoväwan amïgu kayan (Juan 3:36; 1 Pëd. 3:21). Tsërëkurmi Diospa gobernar täkunampa nöpanchö këkäyan y Templumpa patiunchö, juk parlakuychöqa, kë Patsachömi paqasta junaqta Diosta sirwikäyan. Rasumpa kaqchöqa, mëtsikaq nunakunatam yachëkätsiyanna y Diospa kaqtam puntaman churëkäyan (Mat. 6:33; 24:14; 28:19, 20).

10. Patsachö kawaqpaq kaqkunaqa, ¿imapitatan següru këkäyan y ima änikuytatan cumplikaqta rikäyanqa?

¹⁰ Patsachö kawaqpaq kaq mëtsikaq nunakunaqa, alläpa jatun sufrimientu ushariptin Diosnintsik pëkunata cuidarnin sïguinampaq kaqtaqa segürum këkäyan, tsëtaqa nintsik Bibliachö kënö niptinmi: “Diospa carpa wayinmi nunakunawan këkan”. Jina Bibliachö kënö ninqanmi cumplikanqa: “Nawinkunapitam llapan  weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu” (Rev. 21:3, 4).

11, 12. (1) Revelacion 7:16 y 17 ninqannöpis, ¿ima bendicionkunatatan mëtsikaq nunakuna chaskiyanqa? (2) Jesus Wanunqanta Yarpäna reunionchöqa, ¿imatatan mëtsikaq nunakuna rurayan y imanirtan tsëta rurayan?

¹¹ Leyi Revelacion 7:16 y 17. Kanan witsanqa, Jehoväpa wakin sirweqninkunaqa qellëninkuna mana kaptin, mikuyninkuna pishiptin o guërrakuna kaptin o juk problëmakunapa pasarmi sufrikäyan. Wakinnam Diosta sirwiyanqanrëkur carcelarëkäyan, tsënö kaptimpis imëka mana allikuna ushakäriptin, mëtsika mikuy-yoq y Diospita yachakurnin sïguiyänampaq kaqtam següru këkäyan. Satanas munanqanta ruraq nunakunata ushakätsirqa, Patsachö kawaqpaq kaqkunatam Jehoväqa cuidanqa. Alläpa jatun sufrimientu pasariptinnam, kawëkar pasaqkunata mana wanurna kawakuyänampaq Jesus yanapanqa. Pensari, Patsachö mëtsika millon kawëkaq nunakunapitaqa, ¡itsa pëkunallachi ni imëpis wanuyanqatsu! (Juan 11:26).

¹² Patsachö kawaqpaq kaqkuna tsëta shuyaräyanqampitam, Jehoväta y Jesusta alläpa agradecikuyan. Ciëluchö kawayänampaq mana akrashqa karpis, Jehoväqa ciëlupaq akrashqakunatanöllam kuyan. Patsachö kawaqpaq kaqkuna y ciëlupaq akrashqakunaqa, Jesus Wanunqanta Yarpäna reunionman ëwarninmi, Diosta y Jesusta alabayan.

13, 14. Jesus Wanunqanta Yarpäna reunionmanqa, ¿imanirtan llapantsik ëwanantsik?

¹³ Jesus Wanunqanta Yarpäna reunionman kanan witsan ëwaqkunapitaqa, cäsi waranqa nunakunapitaran jukllëlla tantata mikun y vïnuta upun. Juk parlakuychöqa, mëtsika congregacionkunachömi, ni pipis tantata mikuntsu ni vïnuta upuntsu. Jesus Wanunqanta Yarpäna reunionman ëwaqkunapitaqa, cäsi llapanmi Patsachö kawëta shuyaräyan. Tsëqa, ¿imanirtan tsë reunionman ëwayan? Imanömi amïgunkuna casakuptin, kuyayanqanta rikätsikur mëtsikaq nunakuna ëwayan, tsënöllam Patsachö  kawaqpaq kaqkunapis, Jesus Wanunqanta Yarpäna reunionman ëwayan Jesusta y ciëluchö kawaqpaq kaqkunata kuyarnin. Y manam tsëllatsu, pëkunarëkur Jesus wanunqampita Patsachö imëyaqpis kawayänampaq kaqpita agradecikurmi.

¹⁴ Jina Patsachö kawaqpaq kaqkunaqa, Jesus Wanunqanta Yarpäna reunionmanqa ëwayan, pë mandakunqanta cäsukurmi. Wanunqanta yarpänapaq patsätsinqanchömi kënö nirqan: “Këta rurar sïguiyë, cada upurnin noqata yarpäyämarnï” (1 Cor. 11:23-26). Ciëluman ëwaq kaqkuna Patsachö kayanqanyaqqa, Patsachö kawaqpaq kaqkunaqa Jesus wanunqanta yarpëkäyanqallam. Y tsë reunionmanqa pï mëtam invitayan.

15. Jesus Wanunqanta Yarpäna reunionchöqa, ¿imanötan Jehoväta y Jesusta alabashun?

¹⁵ Jesus Wanunqanta Yarpäna reunionchöqa, cantarnin y mañakurninmi Diostawan Jesusta alabashun. Kë watapaq tsë reunionchöqa, “Teyta Dioswan Jesucristu noqantsikrëkur rurayanqampita agradecikushun” neqpitam yachakushun. Tsëta wiyarqa, Jehoväta y Jesusta masran agradecikushun. Tsë tantata y vïnuta makyanakunqantsik höram, Jesuspa cuerpunta y yawarninta rikätsikunqanta yarpäshun. Manana wanur kawakunapaq Tsurin wanunanta Jehovä permitinqantawanmi yarpäshun (Mat. 20:28). Teytantsik Jehoväta y Jesusta llapan kuyaqkunam, Jesus Wanunqanta Yarpäna reunionman ëwayanqa.

16. ¿Imachötan ciëlupaq ëwaqkuna y Patsachö kawaqpaq kaqkuna igual-lla kayan?

¹⁶ Ciëluman ëwaqpaq kaqkunata y Patsachö kawaqpaq kaqkunatapis, Jehoväqa igualmi kuyan. Ishkan grüputapis, Jehoväqa kuyashqa Tsurimpa yawarninwanmi rantishqa. Tsë ishkan grüpukunaqa mëchö kawayänampaq kaqllapitam jukläya kayan. Peru ishkampis, Jehoväta y Jesucristutam mana dejëpa sirwiyänan (Sal. 31:23). Yarpäshun, Jehoväqa llapan sirweqninkunatam, poderninwan igualpa yanapëta puëdin. Y cada ünutam necesitäyanqanmannö kallpayoqta tikratsita puëdin, ciëlupaq kaptin o Patsachö kawaqpaq kaptimpis.

17. ¿Imatatan ciëlupaq akrashqakuna shuyarëkäyan?

¹⁷ Ciëluchö kawaqpaq kaqkunaqa manam ciëluchö kawëta munartsu yuriyan, sinöqa Jehovämi tsë munëta shonqunkunachö yuritsin. Pëkunaqa ciëluman ëwayänampaq Diosnintsik äninqanmanmi yarparäyan, mañakuyanqanchömi tsëpaq parlayan y ciëluman ëwëtam munayan.  Y ciëluchö imanö cuerpuyoq kayänampaq kaqta mana musyarpis, Jehoväwan, Jesuswan, angelkunawan y ciëlupaq 144.000 akrashqakunapita wakinwan juntakëtaqa alläpam munayan y ciëlupita gobernëtanam munayan (Filip. 3:20, 21; 1 Juan 3:2).

18. Patsachö kawaqpaq kaqkunaqa, ¿imakunatatan shuyaräyan?

¹⁸ Juk üshakunaqa kayan, Patsachö kawëta shuyaraq nunakunam. Y tsëtaqa llapan nunakunam munayan (Ecl. 3:11). Pëkunaqa alläpam munayan kë Patsata shumaq tikratsichö yanapakuyta, wayinkunata rurëta, huertankunachö murupakuyta y familiankunawan manana qeshyar kawakuyta (Is. 65:21-23). Pëkunaqa, entëru Patsapa purita, jirkakunata, bosquikunata, lamarta y Jehovä llapan kamanqankunata rikëta y maslla reqitam munayan. Peru tsëpitapis masqa, cada junaq pasanqanmannö Jehoväwan mas amïgu këtam shuyaräyan.

19. Jesus Wanunqanta Yarpäna reunionchöqa, ¿imatatan rurëta puëdishun y imëtan kë wataqa kanqa?

¹⁹ Jehoväqa llapan sirweqninkunatam, shumaq y alli kawakuyänampaq änishqa (Jer. 29:11). Jesus Wanunqanta Yarpäna reunionman ëwarqa, imëyaqpis kawakunapaq imëkata rurayanqampitam Jehoväta y Jesusta alabantsik y agradecikuntsik. Tsëmi Jesus Wanunqanta Yarpäna reunionmanqa, Diospa llapan sirweqninkuna mana faltëpa ëwayänan. 2021 wata säbadu 27 de marzu killachömi, inti o rupay jeqarkuptin Jesus Wanunqanta Yarpäshun. Kë wataqa mëtsikaqmi, imapaqpis alläpa mana yarpachakurnin, wakinnam michëkäyaptin o chikikäyaptimpis ëwayanqa. Y wakinnam, carcelarëkarpis tsë reunionta rurayanqa. Jehovä, Jesus y ciëluchö këkaqkuna rikëkäyaptin, llapan congregacionkuna, grüpukuna y ëwaq nunakuna tsë paqas reunionchö kushishqa kayätsun.