1. Sar vlijajngja upro jekh terno čhavo jekh govor so sine ikerdo ko jekh kongres ko 1935 berš?

KO 1926 BERŠ jekh terno čhavo krstingja pe keda sine le 18 berš. Leskere roditelija sine Istražuvačija e Biblijakere, sar so vikinena pe sine e Jehovaskere svedokija ko adava vreme. Len sine len trin murša hem duj čhaja. Akala roditelija sikavena sine pumare čhaven te služinen e Jehovaske hem te džan palo e Isuseskoro primer. Sar sa o Istražuvačija e Biblijakere ko adava vreme, akava da terno manuš lela sine taro maro hem tari mol sekova berš ki e Gospodareskiri večera. Ama, i nadež bašo leskoro životo ki idnina meningja pe jekhe važno govorea so sine le naslov „O baro mnoštvo“. Akava govor ikergja le o Raterford ko 1935 berš, ko jekh kongres ko Vašington, SAD. So sine otkrimo ko adava kongres?

2. Kova čačipe o phral Raterford objasningja le ko plo govor?

² Ko akava govor, o phral Raterford objasningja koj tane adala so pripadinena ko „baro mnoštvo“ soj tano spomnimo ko Otkrovenie 7:9. Dži tegani, o Istražuvačija e Biblijakere mislinena sine kaj akaja da grupa ka džal te živinel ko nebo, ama nane te oven carija zaedno e Isusea adaleske so sine pohari verna. O phral Raterford koristingja stihija te šaj te objasninel kaj o manuša taro baro mnoštvo nane birime te živinen ko nebo, ama ola tane o javera  bakhre * e Hristoseskere kola so ka preživinen i bari nevolja hem ka živinen večno ki Phuv (Otk. 7:14). O Isus vetingja: „Isi man javera da bakhre, kola so nane taro akava trlo. Lende da mora te anav, hem ola ka šunen mlo glaso, pa sarine ka oven jekh stado jekhe pastirea“ (Jovan 10:16). Akala javera bakhre tane e Jehovaskere svedokija kola soj verna hem isi len nadež te živinen zasekogaš ko raj ki Phuv (Mat. 25:31-33, 46). Te dikha sar akava nevo objasnuvanje meningja o životija bute phralengoro hem phenjengoro kote so sine vklučimo akava terno phral da (Ps. 97:11; Izr. 4:18).

3-4. So halile but džene baši pumari nadež ko kongres ko 1935 berš, hem soske?

³ Ko adava kongres but sine vozbudlivo keda o phral so ikergja o govor pučlja e publika: „Šaj li te ušten sarine adala so isi len nadež te živinen večno akate ki Phuv?“ Jekh phral, kova so sine ko adava kongres vakergja kaj ov dikhlja poviše taro ekvaš taro adala manuša so sine ki publika sar uštena. O phral Raterford vakergja: „Dikhen! O baro mnoštvo!“ Palo adava sarine ki publika glasno aplaudiringje. Adala so uštile halile kaj o Jehova na biringja len te živinen ko nebo hem kaj na sine pomazime e Devleskere duhoja. O javer dive ko kongres, 840 džene krstingje pe a poviše lendar sine taro javera bakhre.

⁴ Palo akava govor, o terno čhavo so spomningjem le angleder hem milja javera sine spremna više te na len taro maro hem tari mol ki e Gospodareskiri večera. But džene osetingje pe isto sar jekh ponizno phral kova so vakergja: „Posledno puti so leljum taro simbolija sine ki Spomen-svečenost ko 1935 berš. Džanljum kaj o Jehova ple sveti duhoja na dengja ma nadež te živinav ko nebo. Namesto adava, sine man nadež te živinav ki Phuv hem te pomožinav te kerel pe o raj“ (Rim. 8:16, 17; 2. Kor. 1:21, 22). Ottegani, o broj taro okola soj tane taro baro mnoštvo bajrola hem ola sorabotinena zaedno e pomazanikoncar so ačhile ki Phuv hem so lena ponadari da taro simbolija ki e Gospodareskiri večera.

5. So mislinela o Jehova bašo adala so čhinavgje te len taro simbolija ki Spomen-svečenost?

⁵ Sar dikhela o Jehova ko adala so čhinavgje te len taro simbolija ki Spomen-svečenost palo 1935 berš? Hem so ako akana jekh Svedoko kova so lela taro simbolija ki e Gospodareskiri večera pokasno haljola kaj ov ustvari nane pomazimo e Devleskere duhoja? (1. Kor. 11:28). Nesave počmingje te len taro simbolija adaleske so na halile šukar koja tani lengiri nadež. Ama, ako ola iskreno priznajnena pumari greška, čhinavena te len taro simbolija, hem ponadari da verno služinena e Jehovaske, ov sigurno ka prifatinel len sar delo taro javera bakhre. Iako više na lena taro maro hem tari mol, ola ponadari da ka oven prisutna ki Spomen-svečenost adaleske so but ceninena adava so o Jehova hem o Isus kergje baši lende.

6. So zapovedingja o Isus e angelenge?

⁶ Adaleske so i bari nevolja tani but  paše, ka ovel ohrabruvačko te dikha so vakerela o Otkrovenie 7 poglavje bašo pomazime hristijanja hem bašo baro mnoštvo. O Isus zapovedingja e angelenge ponadari da te ikeren o štar bavlala e uništibaskere. Ola na valjani te mukhen adala bavlala te phuden ki Phuv džikote sa o pomazime hristijanja nane zapečatime, a adava značinela kaj konečno ka oven odobrime taro Jehova (Otk. 7:1-4). Sar nagrada bašo adava so ačhile verna, e Hristoseskere pomazime phralja ka oven carija hem sveštenikija zaedno lea ko nebo (Otk. 20:6). O Jehova, o Isus hem o angelija ka oven but bahtale keda sa o pomazanikija ka dobinen pumari nagrada upre ko nebo.

7. Sprema Otkrovenie 7:9, 10, kas dikhlja o Jovan ki vizija, hem so kerena? (Dikh i slika ki naslovno strana.)

⁷ Otkeda kerela lafi bašo akala 144.000 carija hem sveštenikija, o Jovan dikhela nešto vozbudlivo — jekh „baro mnoštvo“ kova so preživinela o Armagedon. Akala duj grupe razlikujnena pe jekh jekhatar, adaleske so ko baro mnoštvo isi poviše manuša nego ko 144.000 hem lengoro broj nane odredimo. (Čitin Otkrovenie 7:9, 10.) Ola tane uravde ko parne šeja, adava sikavela kaj tane bizi fleka taro e Satanaskoro sveto hem kaj ačhile verna e Devleske hem e Hristoseske (Jak. 1:27). Ola glasno vikinena adaleske soj tane spasime taro Jehova hem taro Isus, e Devleskoro bakhro. Ola isto agjaar ko pumare vasta isi len palmengere granke kova so sikavela kaj prifatinena e Isuse sar postavimo cari taro Jehova. (Sporedin Jovan 12:12, 13.)

8. So vakerela amenge o Otkrovenie 7:11, 12 baši e Jehovaskiri nebesno familija?

⁸ Čitin Otkrovenie 7:11, 12. Sar reagiringje adala soj ko nebo keda dikhle e bare mnoštvo? O Jovan dikhlja kaj sarine ko nebo tane bahtale hem falinena e Devle keda dikhle e bare mnoštvo. E Jehovaskiri nebesno familija edvaj adžikerela te dikhel sar ka ispolninel pe akaja vizija keda o baro mnoštvo ka preživinel i bari nevolja.

9. Sprema Otkrovenie 7:13-15, so kerela o baro mnoštvo akana?

⁹ Čitin Otkrovenie 7:13-15. O Jovan pišinela kaj o baro mnoštvo thovgja ple šeja hem parnargja len ko rat e bakhreskoro. Akava značinela kaj isi len čisto sovest hem kaj anglo e Jehovaskere jakhja tane pravedna (Isa. 1:18). Ola vetingje e Jehovaske kaj ka služinen leske, krstingje pe, sikavena vera ki e Isuseskiri žrtva hem paše tane e Jehovaja (Jovan 3:36; 1. Pet. 3:21). Adaleske, o Devel tano zadovolno lencar hem ola šaj te služinen leske dive hem rat akate ki Phuv. Akana ola revno propovedinena bašo Carstvo hem kerena učenikija soske e Devleskoro Carstvo tano lenge najvažno taro sa (Mat. 6:33; 24:14; 28:19, 20).

10. Ko so tano sigurno o baro mnoštvo, hem kova vetuvanje adžikerela te ispolninel pe?

¹⁰ O baro mnoštvo kova so avela tari bari nevolja tano sigurno kaj o Devel ka grižinel pe lenge adaleske so „okova so bešela ko prestol ka phravel plo šatori maškar lende“. Konečno ka ispolninel pe o vetuvanje kova so adžikergje le o javera bakhre kaj o Devel „ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha“ (Otk. 21:3, 4).

11-12. a) Sprema Otkrovenie 7:16, 17, save bereketija ka dobinel o baro mnoštvo? b) So šaj o javera bakhre te keren ki Spomen-svečenost, hem soske?

¹¹ Čitin Otkrovenie 7:16, 17. Avdive, nesave taro e Jehovaskere svedokija tane  bokhale adaleske so nane len dovolno pare te kinen peske hajbaske ili adaleske so isi gragjanska nemirija hem vojne. Javera tane ko zatvor baši pli vera. Ama, okola taro baro mnoštvo tane but bahtale soske džanena kaj otkeda ka ovel uništimo akava lošno sveto, len ka ovel len but duhovno hem fizičko hrana. Keda o Jehova ka uništinel e Satanaskoro lošno sveto, ov ka zaštitinel e bare mnoštvo tari pli holi koja so ka ovel sar „baro tatipe“. Otkeda ka završinel i bari nevolja, o Isus ka vodinel okolen so ka ačhoven ki Phuv ko „panja so dena [večno] životo“. Razmislin bašo akava: savi šuži nadež isi e bare mnoštvo. Milijarde manuša nikogaš nane te meren! (Jovan 11:26).

¹² O javera bakhre but tane blagodarna e Jehovaske hem e Isuseske baši akaja but šuži nadež so isi len! Iako o Jehova na biringja len te živinen ko nebo, ov mangela len isto sar so mangela e pomazanikon. Solduj grupe šaj te slavinen e Devle hem e Hristose. Jekh način sar šaj te keren adava tano agjaar so ka oven prisutna ki e Gospodareskiri večera.

13-14. Soske valjani sarine te oven prisutna ki Spomen-svečenost bašo e Isuseskoro meribe?

¹³ Ko berša so nakhle, ki Spomen-svečenost okolu jekh taro milja manuša lena taro maro hem tari mol. Ko poviše sobranija nikoj na lela taro simbolija. O pobaro delo taro adala soj tane prisutna ki Spomen-svečenost isi len nadež te živinen ki Phuv. Tegani, soske tane prisutna ola da ki e Gospodareskiri večera? Adava šaj te sporedinel pe e manušencar kola tane prisutna ko bijav taro lengoro amal. Ola avena ko bijav te šaj te sikaven pumaro mangipe hem pumari poddrška e bračno pareske. Slično agjaar, o javera bakhre tane prisutna ki Spomen-svečenost adaleske so mangena te sikaven pumaro mangipe hem te poddržinen e Hristose hem leskere pomazanikon. Isto agjaar, adalea ola sikavena kaj ceninena e Isuseskiri žrtva preku koja šaj te živinen zasekogaš ki Phuv.

¹⁴ Javer pričina soske o javera bakhre tane prisutna ki Spomen-svečenost tani  adaleske so mangena te oven poslušna ki e Isuseskiri zapoved. Keda o Isus kergja i prvo Spomen-svečenost ple verna apostolencar, ov vakergja lenge: „Keren akava te setinen tumen ki mande“ (1. Kor. 11:23-26). Adaleske, o javera bakhre ponadari da tane prisutna ki Spomen-svečenost sa džikote isi pomazanikija ki Phuv. Isto agjaar, o javera bakhre kaninena sarinen te oven prisutna ki Spomen-svečenost zaedno lencar.

15. Sar šaj sekova jekh amendar te falinel e Devle hem e Hristose ki Spomen-svečenost?

¹⁵ Ki Spomen-svečenost, isi amen prilika te falina e Jehova hem e Hristose keda zaedno giljavaja hem molinaja amen. O govor so ka ikerel pe akava berš isi le naslov „Sikav kaj sian blagodarno bašo adava so kergja tuke o Devel hem o Isus!“ Akava govor ka bajrarel amari blagodarnost bašo Jehova hem bašo Hristos. Džikote nakhena o simbolija, adala soj tane prisutna ka setinen pe kaj ola prestavinena e Isuseskoro telo hem leskoro rat. Isto agjaar, ka razmislina bašo e Jehovaskoro mangipe so sikavgja le amenge adalea so dozvolingja leskoro čhavo te merel te šaj amen te dobina životo (Mat. 20:28). Sekoj so mangela amare nebesno Dade hem leskere Čhave ka mangel te ovel prisutno ki Spomen-svečenost.

16. Ko kola načinija o pomazanikija hem o javera bakhre tane slična?

¹⁶ Ko nesave načinija o pomazanikija hem o javera bakhre tane slična. O Jehova na mangela jekhe grupa poviše tari javer. Leske solduj grupe tane skapocena. Džanaja adava adaleske so i cena so platingja te šaj te kinel e pomazanikon hem e javere bakhren tani isto — o životo leskere najmangle čhaveskoro. I razlika maškar o duj grupe tani adaja so isi len različno nadež. Ama, solduj grupe valjani te ačhoven verna e Devleske hem e Hristoseske (Ps. 31:23). Hem ma bistre, o Jehova dela plo sveti duh sekole jekheske sprema leskere potrebe, bizi razlika dali tano pomazaniko ili taro javera bakhre.

17. Bašo so radujnena pe o pomazanikija soj tane ki Phuv?

¹⁷ E pomazime hristijanen nane len nebesno nadež keda bijangjovena. O Devel dengja len adaja nadež. Ola razmislinena baši pli nadež, molinena pe baši late hem edvaj adžikerena te dobinen pumari nagrada ko nebo. Ola na džanena savo ka ovel lengoro telo ko nebo (Fil. 3:20; 1. Jov. 3:2). Ama, edvaj adžikerena zaedno te oven e Jehovaja, e Isusea, e angelencar hem e javere pomazanikoncar. Isto agjaar, edvaj  adžikerena te džan ko pumare thana so isi len ko nebesno Carstvo.

18. Bašo so radujnena pe o javera bakhre?

¹⁸ E javere bakhren isi len nadež te živinen zasekogaš ki Phuv, a adaja tani jekh prirodno želba so isi sekole manuše (Prop. 3:11). Ola edvaj adžikerena o dive keda ka pomožinen te kerel pe celi Phuv raj. Radujnena pe bašo dive keda ka šaj te gradinen pumare khera, te sadinen pumare bavče hem keda ola hem lengere čhave ka oven sovršeno saste (Isa 65:21-23). Isto agjaar, edvaj adžikerena te patujnen ko različna thana ki Phuv, te dikhen o planine, o šume hem o okeanija hem te istražinen sa o bukja so kergja len o Jehova. Ama, kerela len najbahtale adava so džanena kaj lengoro amalipe e Jehovaja ka ovel sa pozoralo.

19. So valjani te kerel sekova jekh amendar ki Spomen-svečenost, hem keda ka ikerel pe akava berš i Spomen-svečenost?

¹⁹ O Jehova dengja sa ple slugenge jekh but šuži nadež baši idnina (Erem. 29:11). I Spomen-svečenost bašo e Isuseskoro meribe dela prilika sekole jekheske te slavinel e Devle hem e Hristose bašo sa adava so kergje te šaj te dobina večno životo. I Spomen-svečenost tano najvažno sostanok kova so o čačutne hristijanja ikerena le sekova berš. Ov ka ikerel pe sabota, 27 mart 2021 berš, otkeda ka perel o kham. But džene živinena ko thana kote so šaj slobodno te prisustvujnen ko akava važno sostanok. Javera ka oven prisutna iako isi len protivibe a nesave i Spomen-svečenost ka ikeren la ko zatvor. Bizi razlika ko kola okolnostija ka ikera i Spomen-svečenost, sekova jekh amendar na valjani te bistrel kaj o Jehova, o Isus, hem o voskresnime pomazanikija dikhena amen. Adaleske, sekova sobranie, grupa ili poedinco neka nakhel šukar ki Spomen-svečenost!