1. Sar parudea i viața ieche tărneschi o congreso anda 1935?

IECH tărno boldea-pes cana sas-les 18 bărș, ande 1926. Lesche dada sas-le Studenți andi Biblia, cadea sar sas-le prinjiande atunci le Martori le Iehovasche. Vo sas bariardo ando ciacimos ande iech than pesche ștare phralența. Cadea sar cărde sea-l Studenți andi Biblia de atunci, vi cado tărno lelas anda o manro hai anda i mol ca i Comemorarea. Cu sea cadala, ande 1935, o modo sar dichelas vo i viața parudea-pe cu sea cana sas-lo ca iech congreso încărdo ando Washington, D.C. Atunci, o phral Rutherford încărdea iech cuvântarea zurales importanto „I bari mulțimea”. Ce ciacimos sas sicado cadale congresoste?

2. Ce ciacimos importanto sicadea o phral Rutherford ande peschi cuvântarea?

² Ande peschi cuvântarea, o phral Rutherford sicadea con si codola phrala cai avenas te cheren partea anda i ‘bari mulțimea’, sicadi andi Revelația 7:9. Ji atunci, pachialas-pe că cado grupo si iech duito clasa cerisco, mai țâra fideli sar codola machle. O phral Rutherford folosisardea le Scripturi, caște sicavel că codola cai cheren partea anda i bari mulțimea ci va traina ando cerii. Von sile le aver bacrea * anda save dea duma o Cristos, cadala  va așena jiuvinde ‘ando necazo baro’ hai va traina veșnico pi phuv. (Rev. 7:14) O Isus promitisardea: „Mai sima vi aver bacrea, cai nai-le anda cado staulo. Vi cadalen trebul te anav-le andre, hai von va ascultina mânre glasostar va avena iech corcori turma hai va avela-le iech corcoro păstoro”. (Ioan 10:16) Cadala aver bacrea si Martori le Iehovasche loiali, cai sile i speranța te train veșnico ando Paradiso pi phuv. (Mat. 25:31-33, 46) Te dichas sar parudea cado nevo hachiarimos i viața bute slujitorenghi le Iehovasche, vi le phraleschi anda savo deam duma mai anglal. (Ps. 97:11; Prov. 4:18)

3, 4. So hachiarde mii slujitori le Iehovasche ande 1935?

³ Iech momento cai cărdea te bariol o ilo codolengo cai sas-le co congreso sas cana o vorbitorii phendea: „Sea codola cai silen i speranța te train veșnico pi phuv mangav-tume te ușten ande pânrende”. Iech phral cai sas cothe phendea că mai but sar dipaș anda 20 000 cai sas-le co congreso uștile ande pânrende. Pala codoia, o phral Rutherford phendea: „Ita, i bari mulțimea!”. Atunci le phrala marde andal palme pherde bucuria. Codola cai uștile ande pânrende hachiarde că ci sile machle spiritoia sfânto hai că nai-le speranța cerisco. Ando ghies cai avilea bolde-pe 840 manușa, le mai but anda lende cherenas partea anda le aver bacrea.

⁴ Pala i cuvântarea, o tărno anda savo deam duma co începuto le articolosco hai vi aver mii slujitori le Iehovasche ci mai line anda o manro hai anda i mol ca i Comemorarea. But phrala, simțosarde cadea sar phendea iech phral umilo: „I Comemorarea anda 1935 sas i palutni data cana lem andal embleme. Dem mânri seama că o Iehova ci șiutea ande mande prin lesco spirito cadai speranța, mai but, hachiardem că sima i speranța te traiv pi phuv hai te lav partea ca i buchi cana i phuv va avela cărdi paradiso”. (Rom. 8:16, 17; 2 Cor. 1:21, 22) De atunci, i bari mulțimea barilea hai ajutil i rămășița *.

5. Sar dichel o Iehova codolen cai ci mai len andal embleme?

⁵ Sar dichlea o Iehova codolen cai ci mai line andal embleme pala o bărș 1935? Hai sar dichel o Iehova aghies codolen cai pachian că sile machle hai len andal embleme ca i Comemorarea, tha pala codoia hachiaren că nai-le speranța cerisco? (1 Cor. 11:28) Chichiva anda codola cai len andal embleme pachian că sile machle chiar cana na-i cadea. Tha, dacă den penghi seama că cărde iech greșeala, ci mai len andal embleme hai slujin mai dur loialo le Iehovasche, vo primil-len mașcar le aver bacrea. Von va jiana mai dur ca i Comemorarea, caște sicaven chichi de cuci si anda lende so cărde o Iehova hai o Isus ande lengo miștimos.

6. So phendea o Isus le îngerenghe te cheren?

⁶ Anda codoia că o baro necazo si cadichi de pașă, zuriarel-ame but te dichas o capitolo 7 anda i Revelația, cai del  duma andal creștini machle hai anda i bari mulțimea. O Isus phendea le îngerenghe te încăren zurales le ștar barvalea cai anen i distrugerea. Von va dena-le drom pi phuv numai pala soste sea-l creștini machle va avena sigilime, adică va primina i aprobarea finalo catar o Iehova. (Rev. 7:1-4) Anda codoia că sile fideli von va avena regi hai rașaia pașa o Cristos, ando cerii. (Rev. 20:6) O Iehova, o Isus hai le îngeri va bucurina-pe but cana le 144 000 va primina pengo pochinimos cerisco.

7. Cadea sar phenel-pe andi Revelația 7:9, 10, cas dichlea o Ioan andi viziunea hai so cherenas von? (Dich i imaginea pa i coperta.)

⁷ Pala soste o Ioan dea duma anda codola 144 000 regi hai rașaia, vo dichlea vareso zurales șucar: „iech bari mulțimea” cai nachel părdal o Armaghedono. Cadai mulțimea si but mai bari sar o iechto grupo hai ci jiangliol-pe exacto chichi manușa va cherena partea anda late. (Citisar Revelația 7:9, 10.) Codola cai cheren partea anda i bari mulțimea sile „hureade ande parne robe”, cadaia sicavel că von ci mechle ca i lumea le Satanoschi te meliarel-le hai așile loialo le Devlesche hai le Cristososche. (Iac. 1:27) Von phenen voceaia zurali că lenghi salvarea avel catar o Iehova hai o Isus, o Bacro le Devlesco. Von încăren andel vasta ranica palmierosche, cadaia sicavel că von acceptin bucurime le Isusos sar Rege numime le Iehovastar. (Dich vi Ioan 12:12, 13.)

8. So phenel-pe andi Revelația 7:11, 12 anda i familia cerisco le Iehovaschi?

⁸ Citisar Revelația 7:11, 12. Cadea sar phenel o Ioan, i familia cerisco le Iehovaschi bucuril-pe hai așarel le Devles cana dichel i bari mulțimea. Sea codola anda o cerii va bucurin-pe te dichen sar pherel-pe cadai viziunea, cana i bari mulțimea va nachela părdal o Armaghedono.

9. Cadea sar phenel-pe andi Revelația 7:13-15, ce lucrarea cheren codola anda i bari mulțimea?

⁹ Citisar Revelația 7:13-15. O Ioan phendea că codola anda i bari mulțimea „halade penghe robe hai parniarde-le ando rat le Bacresco”. Cadaia sicavel că len sile iech conștiința uji hai sile aprobime le Devlestar. (Is. 1:18) Von sile Martori bolde, cai sicaven iech pachiamos zuralo andi jertfa le Isusoschi hai sile iech amalimos chidino le Iehovaia. (Ioan 3:36; 1 Pet. 3:21) Anda codoia, von daștin te așen angla o trono le Devlesco caște anen lesche „ghies hai riat. . . iech servicio sfânto” cade pi phuv. Chiar vi aghies, von șion o Regato le Devlesco po iechto than andi viața cana pherde zelo cheren i mai bari partea anda i lucrarea de predicare hai cheren discipoli. (Mat. 6:33; 24:14; 28:19, 20)

10. Anda soste daștin te aven siguri codola anda i bari mulțimea hai ce promisiunea va dichena că pherdiol-pe?

¹⁰ Codola anda i bari mulțimea, cai aven anda o baro necazo, daștin te aven siguri că o Del, „Codo cai beșel po trono”, va lela sama vi mai dur lendar hai va „zinghiarela peschi țărha opral lende”. Ande cado timpo, von va dichena sar pherdiol-pe i promisiunea cai ajucărde-la cadea de but: „[O Del] va chosela sea asfa anda lenghe iacha hai o merimos ci va mai avela. Nici roimos, ci necazo hai nici duch ci va mai avena”. (Rev. 21:3, 4)

11, 12. a) Cadea sar phenel-pe andi Revelația 7:16, 17, ce miștimata va avena codolen anda i bari mulțimea? b) Sar daștin le aver bacrea te sicaven penghi recunoștința ca i Comemorarea?

 ¹¹ Citisar Revelația 7:16, 17. Aghies, unii slujitori le Iehovasche nachen prin bochalimos anda codoia că nai-le love te chinen hamos sau si marimos ando than cai beșen. Aver sile phandade anda lengo pachiamos. Von de abia ajucăren o timpo cana cadai lumea nasul va nachela hai va avela-le but hamos fizico hai spiritualo. Cana o sistemo le Satanosco va avela distrugime, o Iehova va șiorela peschi holi opral le națiuni. Cadai holi cai si sar ‘iech baro tachimos’ ci va azbavela i bari mulțimea. O Isus va îngărela codolen cai va nachena părdal o Armaghedono ca le „paia la viațache” veșnico. Ce șucar speranța si codolen anda i bari mulțimea! Anda sea-l manușa cai traisarde ji acana pi phuv, von daștin te na meren niciechdata. (Ioan 11:26)

¹² Le aver bacrea sile recunoscători le Iehovasche hai le Isusosche anda cadai șucar speranța. Chiar cana o Iehova ci alosardea-le te jian ando cerii, von sile sa cadea de cuci ande lesche iacha sar codola machle. Codola machle hai vi le aver bacrea daștin te anen laude le Devlesche hai le Cristososche cana jian ca i Comemorarea.

13, 14. Sostar trebul ca sea-l creștini te aven prezenți ca i Comemorarea?

¹³ Andel palutne bărșa, cam 1 anda 1 000 cai sas ca i Comemorarea lea andal embleme. Ande mai but andal congregații na-i creștini machle. Le mai but anda codola cai jian ca i Comemorarea sile speranța te train pi phuv. Atunci, sostar sile vi von prezenți ca i Cina le Raieschi? Te gândisaras-ame varecaste cai jial ca o abiav ieche amalesco. Vo camel te avel prezento cothe caște sicavel peschi iubirea anda i nevi familia hai te avel pașa lende. Sa cadea, le aver bacrea camen te sicaven penghi iubirea hai loialitatea caring o Cristos hai codola machle. Mai but, von camen te sicaven că si cuci anda lende i jertfa le Cristososchi prin savi daștin te train veșnico pi phuv.

 ¹⁴ Iech aver motivo importanto sostar le aver bacrea jian ca i Comemorarea si că von camen te încăren i porunca le Isusoschi. Cana încărdea i iechto data i Cina le Raieschi, o Isus phendea pesche apostolenghe fideli: „Continuin te cheren cadai buchi ande mânri amintirea”. (1 Cor. 11:23-26) Anda codoia, le aver bacrea va jiana ca i Comemorarea le merimaschi le Cristososchi chichi timpo va avena creștini machle pi phuv hai va acharena vi averen te aven ande iech than lența.

15. Sar daisaras te așaras le Devles hai le Cristosos ca i Comemorarea?

¹⁵ Ca i Comemorarea, ame așaras le Iehovas hai le Cristosos prin ghilea hai rugăciuni. Ande cado bărș i cuvântarea cai va avela încărdi si: „Te sicavas recunoștința anda soste cărdea o Del hai o Cristos ande amaro miștimos!”. Cadaia va bariarela amari aprecierea anda o Iehova hai o Isus. Ando timpo so le embleme va nachena anda amare vasta, va anena amenghe amintea că von reprezentin o corpo hai o rat le Cristososco. Mai but, va avela te gândisaras-ame ca i iubirea savi sicadea-la o Iehova cana mechlea pesche Șiaves te merel ca ame te avel-ame viața. (Mat. 20:28) Sea codola cai iubin amare Dades cerisco hai lesche Șiaves va avena ca i Comemorarea.

16. Ande ce felo amean codola machle hai le aver bacrea?

¹⁶ Ande le Iehovasche iacha vi codola machle hai vi le aver bacrea sile sa cadea de cuci. O Iehova pochindea sa codo prețo, i viața pesche Șiaveschi iubime, caște răscumpăril vi codolen machle hai vi le avere bacrean. I corcori deosebirea mașcar le dui grupuri si lenghi speranța. Le jene anda le dui grupuri trebun te încăren penghi loialitatea caring o Del hai o Cristos. (Ps. 31:23) Mai but, o Iehova del pesco spirito sfânto fiesave manușesche andi măsura cai trebul-les, indiferento că cherel partea anda codola machle sau le aver bacrea.

17. So ajucăren anda sea o ilo le creștini machle?

¹⁷ Le creștini machle ci năștin-pe la speranțaia cerisco. Cadaia si lenghe șiuti ando ilo le Devlestar. Von gândin-pe ca lenghi speranța, rughin-pe anda late hai ajucăren te primin pengo pochinimos ando cerii. Von ci jianen sar va avela lengo corpo spiritualo. (Filip. 3:20, 21; 1 Ioan 3:2) Cu sea cadala, abia ajucăren te aven ande iech than le Iehovaia, le  Isusoia, le îngerența hai le coavere creștinența machle, tha vi te len penghe thana ando Regato cerisco.

18. So ajucăren anda sea o ilo le aver bacrea?

¹⁸ Anda le aver bacrea si zurales cuci i speranța te train sea o timpo pi phuv, iech speranța cai si șiuti ando manuș. (Ecl. 3:11) Von de abia ajucăren o timpo cana va cherena sea i phuv iech paradiso. Sa cadea, ajucăren but o ghies cana va avela-le lengo chăr, lenghi bar hai va daștina te bariaren șiave perfecți sasteveste. (Is. 65:21-23) Von de abia ajucăren te dichen sea i phuv – le plaina, le veșa, le mări – hai te sichion anda le but șucar buchia cai cărdea-le o Iehova. Tha o mai but, bucurin-pe te jianen că lengo amalimos le Iehovaia va avela sea mai zuralo.

19. Ce ocazia si i Comemorarea anda fiesavo anda amende hai cana va încărela-pe i Comemorarea ande cado bărș?

¹⁹ O Iehova dea fiesaves anda lesche slujitori dedichime iech șucar speranța ande soste priveal o viitorii. (Ier. 29:11) I Comemorarea le merimaschi le Cristososchi si iech bari ocazia ande savi daisaras te așaras le Devles hai le Isusos anda so cărde anda amende, ca ame te daisaras te bucurisaras-ame viațatar veșnico. Cadea că, anda le ciace creștini, i Comemorarea si i mai importanto întrunirea. Voi va avela încărdi savatone, 27 martia 2021, pala soste perel o cham. But anda codola cai va avena ande cado bărș ca i Comemorarea bucurin-pe catar i libertatea. Aver va avena prezenți chiar cana nachen prin opoziția. Hai aver va încărena i Comemorarea ando phandaimos, chiar cana ci va avela lenghe ușoro. Camas ca fiesavi congregația, grupo hai creștino te bucuril-pe catar i Comemorarea tela le iacha le Iehovasche, le Isusososche, le îngerenghe hai codolenghe cai sile creștini machle jiuvindime!