1. Со паруделяпэ еқэ ԥралэстэ посли кода, сар во ашундя и речь по канӷрэсо, саво сас андо 1935 бэрш?

ЕК ТЭРНО мануш болделя андо 1926 бэрш, кала лэсти сас 18. Лэстирэ родителя, ай кадяжэ ԥрала и ԥэя сас Исследователя Библии (кадя тоди ԥэнэнас пэ свидетеля лэ Иеговастирэ). Кажно бэрш, кала сас и Вечеря, кай вспоминают лэ Иисусостири смэрть, во сар и всаворэ Исследователя Библии, халас о марно и пэлас о вино. Андо 1935 бэрш по канӷрэсо андо Вашингтоно во ашундя и речь, сави ԥэндя о ԥрал Рутерфордо. Вой называлась «Фартэ бут мануша». Кода, со во ашундя, парудя вся лэстири жызня. Пала со сас и дума пэ кодэва канӷрэсо?

2. Пала со нэво росԥэндя о ԥрал Рутерфордо андэ пэстири речь?

² Андэ пэстири речь о ԥрал Рутерфордо росԥэндя, ко авэна кодэла «фартэ бут мануша», пала савэ ԥэнэнпэ андэ Откровение 7:9. Жы кай кодэва канӷрэсо гиндонас, кай кадэла мануша жана по нэбо, хоть вонэ най кацавэ дэ преданни, сар и 144 000. Но о ԥрал Рутерфордо драго сыкадя па Библия, кай и фартэ бут мануша, када лэ Христостирэ «авэр бакрорэ» *, савэ пэрэжувэна и «само бари бида» и жувэна вечно андо раё пэ ԥув  (Отк. 7:14). О Иисусо ԥэндя: «Мандэ исин и авэр бакрорэ, най анда кадэва заӷоно. Лэн мэ тожэ трэбуй тэ анав. Вонэ ашунэна мэрно ӷолосо, и авэла ек стадо и ек пастухо» (Иоан. 10:16). И мануша, савэн о Иисусо сыстосардя лэ бакрорэнца, када лэ Иеговастирэ свидетеля, савэндэ исин надежда тэ жувэн вечно андо раё пэ ԥув (Матф. 25:31—33, 46). Давайте уӷанаса, сар и нэви библейско понимания парудя и жызня бутэ лэ Иеговастирэ свидетелёнэнди, ай кадяжэ кодэлэ тэрнэ манушэсти (Пс. 97:11; Прит. 4:18).

3, 4. Со по канӷрэсо андо 1935 бэрш полинэ тысячи ԥрала и ԥэя и васо?

³ Представьте, со сас по ди кай и 20 тысяч мануша, кала о Джозефо Рутерфордо ԥэндя: «Мангав, ущен всаворэ кодэла, кастэ исин надежда вечно тэ жувэн андо раё пэ ԥув». Ек мануш, саво сас котэ, ԥэнэн, кай ущелэ май бут чем епаш анда кодэла, ко котэ сас. Посли када о ԥрал Рутерфордо ԥэндя: «Диқэн, акэ фартэ бут мануша». И всаворэ линэ фартэ тэ радуинпэ. Кодэла, ко ущеля, полэнас, кай о Иегова лэн на витидя важ и жызня по нэбо и вонэ на сас помазани свынтонэ духоса. Пэ авэр дес болделэ 840 мануша и май бут андар лэндэ, када авэр бакрорэ.

⁴ Посли речь, сави называлась «Фартэ бут мануша», кодэва тэрно ԥрал и тысячи авэр христианоря, парашэлэ тэ хан о марно и тэ пэн о вино пэ Вечеря. Акэ, со ԥэндя ек ԥрал пала кода, со по ди кай бут лэ Иеговастирэ служытеля: «Андо 1935 бэрш сас послиднё Вечеря, пэ сави мэ халэм о марно и пилэм о вино. Мэ полэм, кай о Иегова дя манди надежда тэ жував андо раё пэ ԥув, ай най по нэбо» (Рим. 8:16, 17; 2 Кор. 1:21, 22). Кадэла времятар и фартэ бут мануша ашэлэ инке май бут и вмести терэн и дила лэ памазаниконэнца, савэ ашэлэпэ *.

5. Сар о Иегова диқэл пэ кодэла, ко парашэля тэ хал о марно и тэ пэл о вино пэ Вечеря?

⁵ Сар о Иегова диқэл пэ кодэла, ко посли 1935 бэрш парашэля тэ хал о марно и тэ пэл о вино пэ Вечеря? И со о Иегова гиндой пала свидетеля, савэ андэ амарэ деса гиндонас, кай вонэ трэбуй тэ хан о марно и тэ пэн о вино пэ Вечеря, но потом полинэ, кай вонэ най помазани свынтонэ духоса? (1 Кор. 11:28). Дэсавэ андар лэндэ нэ правильно полэнас, сави лэндэ надежда. Но если вонэ прижанэн пэстири ошыбка, будэр на хан о марно и на пэн о вино пэ Вечеря и на парашэн тэ служын лэ Иеговасти, тоди вонэ моӷут тэ патян, кай авэна машкар авэр бакрорэ. Хоть кадэла христианоря будэр на хан о марно и на пэн о вино пэ Вечеря, вонэ всаек авэн пэр латэ, важ кода кай вонэ блаӷодарни лэ Иеговасти и лэ Иисусости пала вся, со вонэ важ лэндэ стердэ.

6. Со о Иисусо приԥэндя лэ анӷелонэнди?

⁶ Амэ жувас андэ кодэя время, кала авэла и само бари бида. Важ када амэнди трэбуй кода, со амэн подритярэла и пала када пистромэ андэ 7 ӷлава андэ  книӷа Откровение, пала памазаникоря и пала фартэ бут мануша анда авэр бакрорэ. Котэ ԥэнэнпэ, кай о Иисусо приԥэндя лэ анӷелонэнди тэ ритярэн и штар балваля, савэ умарэна. И лэнди нащи тэ одмэкэн кадэла балваля пэ ԥув жы каринг кода, пока пэ памазаникоря на авэла стоди печать. Када авэла, кала о Иегова сыкавэла, кай вонэ доԥэндэ, кай на парашэлэ тэ кандэн лэс (Отк. 7:1—4). Посли када, о Дэл наӷрадия лэн, кай вонэ лэ Христоса по нэбо тэ авэн царёря и рашая (Отк. 20:6). О Иегова, о Иисусо и анӷелоря авэна фартэ лошалэ, кала и 144 000 памазаникоря получина пэстири небесно наӷрада.

7. Со инке о Иоанно диқля андэ видения, сар пистромэ андэ Откровение 7:9, 10?

⁷ Кала о Иоанно росԥэндя пала 144 000 памазаникоря, во инке росԥэндя пала «фартэ бут мануша», савэ пэрэжудэ о Армагеддоно. Кадэлэ манушэн май бут чем лэ памазаниконэн. О Иоанно пистросардя, кай «лэн нико нэ моӷ тэ пэрэадиной». (Адиносар Откровение 7:9, 10.) Кадэла мануша сас утидэ андэ «лунго парни ӥда». Када сыкавэл, кай вонэ на парашэлэ тэ кандэн лэ Дэвлэс и лэ Христос и ашэлэпэ вужэ андэ лэ Сатанастири люма (Иак. 1:27). Вонэ анда вся ӷолосо ԥэнэнас: «Фэрисардя амэн амаро Дэл, саво бэшэл по престоло и о Бакроро». Лэндэ андэ вас сас пальмови виточки, савэ сыкавэн, кай вонэ анда вся оди прижанэн лэ Иисусос, сар Царёс, савэс стодя о Иегова (Диқэн Иоанна 12:12, 13.)

8. Со андэ Откровение 7:11, 12 ԥэнэнпэ пала лэ Иеговаско небесно ери?

⁸ Адиносар Откровение 7:11, 12. Со андэ кадэя время терэлпэ по нэбо? О Иоанно пистрой, кай о Иегова и лэско небесно ери фартэ лошавэн, кала диқэн пэ фартэ бут мануша, савэ кандэн лэс. Инке вонэ авэна фартэ лошалэ кодэлэсти, кала диқэна, кай кадэла фартэ бут мануша пэрэжувэна о Армагеддоно.

9. Со, сар пистромэ андэ Откровение 7:13—15, терэн фартэ бут мануша?

⁹ Адиносар Откровение 7:13—15. О Иоанно пистрой, кай кадэла фартэ бут мануша «вихаладэ пэстири ӥда и стердэ ла парни андэ лэ Бакрорэско рат». Када сыкавэл, кай лэндэ вужи совесть и кай о Иегова прижанэн, кай вонэ праведни (Ис. 1:18). Кодэла, кас диқля о Иоанно, динэ алав лэ Дэвлэсти и болделэ. Вонэ фартэ патян андэ лэ Иисусостири жэртва и лэндэ лащи дружба лэ Иеговаса (Иоан. 3:36; 1 Пет. 3:21). Важ када о Дэл домэкля, кай вонэ тэ тердён англа престоло «о дес и рят» и тэ терэн лэстири свынто дила пэ ԥув. Адес важ лэндэ нинай нисо май куч, чем лэ Дэвлэско Царство и важ када, вонэ пристон вся пэско зор, кай тэ росԥэнэн пала лэстэ и тэ сытярэн лэ манушэн, кай вонэ тэ авэн ученикоря (Матф. 6:33; 24:14; 28:19, 20).

10. Андэр со патян и фартэ бут мануша и саво пророчество вонэ додиқэна, кай исполнийпэ?

¹⁰ И фартэ бут мануша патян, кай, кала вонэ пэрэжувэна и само бари бида, о Дэл на парашэла пала лэндэ тэ диқэл. Важ кода кай о Иоанно ԥэндя: «Кодэва, ко бэшэл по престоло росшола понад лэндэ пэстири катуна». Тоди, кодэла мануша додиқэна, сар исполнийпэ пророчество: «[О Дэл] виқосэла всаворэ ясва па лэндирэ яқа и смэрть будэр на авэла, нисави  бида, ни дук будэр на авэла» (Отк. 21:3, 4).

11, 12. а) Савэ блаӷословении аштярэн фартэ бут мануша, сар пистромэ андэ Откровение 7:16, 17? б) Васо авэр бакрорэ авэн пэ Вечеря и со лэн каринг када цырдэл?

¹¹ Адиносар Откровение 7:16, 17. Через кода, кай адес жан войны и мануша умардёнпэ машкар пэстэ, кай нинай ловэ и ԥарэс тэ затерэс, кай дэсавэ лэ Иеговастирэ служытеля нинай, со тэ хас. Ай дэсавэ бэшэн андо баруно пала пэстири вера. Но вонэ всаек бахталэ, важ кода кай патян, кай пэрэжувэна кадэя лэ Сатанастири люма. И вонэ никала на авэна боқалэ и лэндэ авэла кода, со трэбуй важ и дружба лэ Иеговаса. О Иоанно пистрой: «И жара и о қам на ԥабарэла лэн». Када сыкавэл, кай, кала о Иегова улэла лэ Сатанастири найлащи люма, во фэрия кажнонэ пэстирэ служытелёс. Кати погиндон, сави дэ лащи надежда кай кодэла, ко пэрэжувэла о Армагеддоно. О Иисусо андярэла лэн каринг о паи, саво дэл вечно жызня. Пэ ԥув жувэнас милионоря мануша и вонэ мэрэнас, но кадэла мануша никала на мэрэна (Иоан. 11:26).

¹² Авэр бакрорэ блаӷодарни лэ Иеговасти и лэ Иисусости важ кадэя лащи надежда. Хоть вонэ на жувэна по нэбо, вонэ кадяжэ куч лэ Иеговасти. Сар и памазаникоря авэр бакрорэ моӷут тэ славин лэ Иеговас и лэ Иисусос. Ек анда кацави возможность, сар вонэ када моӷут тэ терэн, када тэ авэн пэ Вечеря.

13, 14. Васо и памазаникоря и авэр бакрорэ трэбуй тэ авэн пэ Вечеря лэ Иисусостири?

¹³ Андэ послидни бэрша пэ Вечеря авэн авэр бакрорэ пэ бутэстэ май бут, чем и памазаникоря. Дэкала пэ Вечеря дажэ нинай кодэлэн, ко хал о марно и пэл о вино. Ай исин май бут кодэла, ко лэла тэ жувэл пэ ԥув. Если када кадя тоди, васо вонэ авэн пэ Вечеря? Лэн цырдэл каринг када оди, кадя жэ сар амэн, кала амэ жас по ябьяв кай о друӷо. Кадэлэса амэ сыкавас, кай амэ любисарас лэ тэрнэс и ла тэрня и подритярас лэн. Кадяжэ  и авэр бакрорэ, кала авэн пэ Вечеря, сыкавэн, кай любин лэ Христос и лэ памазаниконэн, и подритярэн лэн. Ай кадяжэ вонэ сыкавэн пэстири блаӷодарность, кай о Иисусо отдя пэстири жызня, кай вонэ тэ жувэн вечно пэ ԥув.

¹⁴ Инке ек, васо вонэ авэн пэ Вечеря, важ кода кай када приԥэндя о Иисусо. Во ԥэндя пэстирэ апостолонэнди: «Терэн када, кай тэ сэрэн пала мандэ» (1 Кор. 11:23—26). Пока и памазаникоря жувэн пэ ԥув, авэр бакрорэ на парашэна тэ ԥирэн пэ Вечеря и тэ ақарэн всаворэн.

15. Сар кажно андар амэндэ можэт пэ Вечеря тэ славий лэ Дэвлэс и лэ Христос?

¹⁵ Пэ Вечеря амэ можэм тэ сыкавас пэстири блаӷодарность лэ Иеговасти и лэ Иисусости, кала дилабас и диля и мангаспэ. Ай и библейско речь поможыя инке май фартэ тэ полас, васо амэ блаӷодарни лэ Дэвлэсти и лэстирэ Шавэсти. Пэ кадэва бэрш и речь авэла называца: «Цэнин вся, со о Дэл и о Христос стердэ важ тумэндэ!». Кала пэрэдас о марно и о вино, саво сыкавэл лэ Иисусостири тила и о рат, амэ можэм тэ погиндосарас пала кода, кай во отдя важ амэндэ пэстири жызня. Амэ инке ласа тэ гиндосарас пала кода, пэ скати дэ фартэ амэн любий о Иегова, кай отдя пэстирэ Шавэс, саво муля вместо амэндэ, кай амэ тэ жувас вечно (Матф. 20:28). Всаворэнди, касти куч амаро небесно Дад и лэско Шаво, авэна пэ Вечеря!

16. Соса шонпэ и памазаникоря и авэр бакрорэ?

¹⁶ Хоть и памазаникоря жана по нэбо, ай авэр бакрорэ жувэна пэ ԥув, важ о Иегова вонэ одинаково куч, важ кода кай во потиндя ек цэмин пала лэндэ, отдя пэстирэ Шавэс. И всаек, кай вонэ авэна тэ жувэн, вонэ трэбуй тэ на парашэн тэ кандэн лэ Дэвлэс и лэ Иисусос (Пс. 31:23). Инке трэбуй тэ сэрас, кай о Иегова дэла кажнонэ пэстирэ служытелёсти пэско свынто духо, скати лэнди трэбуй.

17. Со фартэ аштярэн и памазаникоря, савэ ашэлэпэ?

¹⁷ Помазани христианоря. Кадэла мануша на арақадёнпэ кодэлэса, кай камэн тэ жувэн по нэбо. Кадэя надежда дэл лэнди о Иегова. Вонэ гиндон пала латэ, мангэнпэ и фартэ аштярэн кодэя время, кала авэна тэ жувэн по нэбо. Вонэ на ӷанэн, сави лэндэ тила авэла по нэбо (Флп. 3:20, 21; 1 Иоан. 3:2). Но вонэ всаек фартэ  аштярэн кодэя время, кала авэна вмести лэ Иеговаса, лэ Иисусоса, лэ анӷелонэнца и аврэ памазаниконэнца, и залэна пэско ҭан андэ лэ Дэвлэско Царство.

18. Со фартэ аштярэн авэр бакрорэ?

¹⁸ Авэр бакрорэ. Лэндэ надежда тэ жувэн вечно андо раё пэ ԥув (Эккл. 3:11). Вонэ фартэ аштярэн кодэя время, кала лэна тэ поможын, кай вся и ԥув тэ ашэл раё. Лэндэ авэла пэско цэр и садо. Вонэ и лэндирэ бэяцэ будэр никала на авэна тэ насвавэн (Ис. 65:21—23). Инке вонэ смоӷут тэ диқэн, савэ исин шукарнэ плая, вэша и моря и тэ розуӷанэн пала вся, со стердя о Иегова. Но со май важно вонэ фартэ лошалэ кодэлэсти, кай лэндири дружба лэ Иеговаса дес десэстар авэла май састи.

19. Со амэ сыкавас, кала аваса пэ Вечеря лэ Иисусостири и кала вой авэла андэ кадэва бэрш?

¹⁹ Кажнонэ пэстирэ служытелёсти о Иегова подарисардя лащи надежда (Иер. 29:11). Через кода, со важ амэндэ стердя о Иегова и о Христос, амэ можэм тэ жувас вечно. Важ када амэ можэм лэн тэ слависарас и тэ сыкавас пэстири блаӷодарность, кала авас пэ Вечеря, кай тэ сэрас пала лэ Иисусостири смэрть. Да, и Вечеря, када само важно мероприятия важ всаворэ чачунэ христианоря. Андо 2021 бэрш вой авэла 27 марта в субботу, кала зажала о қам. О Иегова, о Иисусо, анӷелоря и авэр памазаникоря, фартэ шона сама пэ кадэя мероприятия. Амэ всаек ласа празновать и Вечеря, нэ важно, кай амэ аваса, чи андо баруно, чи андэ страны, андэ савэ преследуют, чи котэ, кай када можно. И мэк нисо тумэн на тердярэл, кай тэ авэн пэ Вечеря!