1. Yini leyenteka kulelinye lijaha ngemuva kwekulalela inkhulumo leyabekwa emhlanganweni lomkhulu nga-1935?

LELIJAHA belineminyaka lengu-18 budzala nalibhajatiswa nga-1926. Batali balo bebaBafundzi BeliBhayibheli, njengobe BoFakazi BaJehova bebatiwa kanjalo ngaleso sikhatsi. Bebanemadvodzana lamatsatfu nemadvodzakati lamabili, lababafundzisa kutsi bakhonte Jehova futsi balingise Jesu Khristu. Njengabo bonkhe Bafundzi BeliBhayibheli ngaleso sikhatsi, lelijaha belidla sinkhwa futsi linatsa neliwayini njalo ngemnyaka eSidlweni SeNkhosi Sakusihlwa. Nanobe kunjalo, litsemba lebelinalo ngelikusasa lashintjwa yinkhulumo lebalulekile lebeyinesihloko lesitsi “Sicumbi Lesikhulu.” Lenkhulumo yabekwa ngumzalwane J. F.  Rutherford nga-1935 emhlanganweni lomkhulu lobewuseWashington, D.C., e-U.S.A. Yini leyafundvwa Bafundzi BeliBhayibheli kulowo mhlangano?

2. Nguliphi liciniso lelavetwa ngumzalwane Rutherford enkhulumeni yakhe?

² Enkhulumeni yakhe, Umzalwane Rutherford wachaza kutsi bobani labakha “sicumbi lesikhulu,” lokukhulunywa ngaso kuSembulo 7:9. Kuze kube nguleso sikhatsi, Bafundzi BeliBhayibheli bebacabanga kutsi lesicumbi lesikhulu bekulicembu lebantfu lebelitakuya ezulwini, kodvwa lebeletsembeke kancane kunalabagcotjiwe. Umzalwane Rutherford wachaza asebentisa imiBhalo kutsi lesicumbi lesikhulu besingakakhetfwa kutsi siyophila ezulwini, kodvwa besinguletinye timvu * taKhristu lebetitawusindza ngemuva ‘kwekuhlupheka lokukhulu’  futsi tiphile phakadze emhlabeni. (Semb. 7:14) Jesu wetsembisa watsi: “Nginaletinye timvu letingasito takulesibaya; nato kufanele ngitiletse, titalilalela livi lami, futsi titawuba ngumhlambi munye, tibe nemelusi munye.” (Joh. 10:16) Laba labanjengetimvu, BoFakazi BaJehova labetsembekile, labanelitsemba lekuphila phakadze emhlabeni loliPharadisi. (Mat. 25:31-33, 46) Asesibone kutsi indlela lebesebalicondza ngayo leliciniso leliseBhayibhelini lakushintja njani kuphila kwebantfu baJehova, lokufaka ekhatsi nalomzalwane loneminyaka lengu-18.—Hla. 97:11; Taga 4:18.

3-4. Emhlanganweni wanga-1935, yini tinkhulungwane tebantfu letayicondza mayelana nelitsemba lato futsi leni?

³ Kwajabulisa kakhulu kulomhlangano ngesikhatsi sikhulumi sitsi: “Ngicela bonkhe labanelitsemba lekuphila phakadze emhlabeni basukume.” Ngekusho kwalobekakhona kulomhlangano, kwasukuma bantfu labangetulu kwehhafu, kubantfu labangu-20 000 lebebakhona. Umzalwane Rutherford wabese utsi: “Bukani! Sicumbi lesikhulu!” Ngemuva kwaloko, bonkhe bantfu bamemeta bajabulile. Labo labasukuma bacondza kutsi bebangakakhetfwa kutsi bayophila ezulwini. Bebati kutsi abakagcotjwa ngemoya waNkulunkulu. Ngelilanga lelilandzelako lalomhlangano, BoFakazi labasha labangu-840 babhajatiswa, futsi labanyenti babo bebabaletinye timvu.

⁴ Ngemuva kwalenkhulumo, lelijaha lesikhulume ngalo ekucaleni kanye naletinye tinkhulungwane tebantfu, bayekela kudla sinkhwa nekunatsa liwayini eSidlweni SeNkhosi Sakusihlwa. Labanyenti bativa ngendlela lomunye umzalwane lotfobekile lativa ngayo, watsi: “Sikhumbuto sanga-1935 kwaba sikhumbuto sekugcina sekutsi ngidle tifanekiselo. Besengati kutsi ngite litsemba lekuyophila ezulwini, kodvwa benginelitsemba lekuphila emhlabeni futsi ngisite ekuwenteni ube lipharadisi.” (Rom. 8:16, 17; 2 Khor. 1:21, 22) Kusukela ngaleso sikhatsi, labo labakha sicumbi lesikhulu bebasolo bandza ngelinani futsi bebasebenta nalabagcotjiwe labasesele emhlabeni.

5. Jehova ubatsatsa njani labo labayekele kudla tifanekiselo teSikhumbuto?

⁵ Jehova ubatsatsa njani labo labayekela kudla tifanekiselo teSikhumbuto ngemuva kwa-1935? Jehova umtsatsa njani Fakazi lokholelwa kutsi kufanele adle sinkhwa futsi anatse neliwayini eSidlweni SeNkhosi Sakusihlwa kodvwa ngekuhamba kwesikhatsi acondze kutsi akakagcotjwa ngemoya longcwele? (1 Khor. 11:28) Labanye badle letifanekiselo ngobe bebangalicondzi kahle litsemba labanalo. Kodvwa nangabe bavuma kutsi bebenta liphutsa, bayekele kudla tifanekiselo, futsi bachubeke bakhonta Jehova ngekwetsembeka, Jehova utawubemukela njengencenye yaletinye timvu. Ngisho nobe bangasidli sinkhwa futsi banatse neliwayini, bayachubeka babe khona eSikhumbutweni ngobe bayabonga ngaloko Jehova naJesu lababentele kona.

6. Jesu uyale tingilosi kutsi tenteni?

⁶ Njengobe kuhlupheka lokukhulu kusondzela, kutasikhutsata kucoca ngaloko Sembulo sehluko 7 lesikushoko ngemaKhristu lagcotjiwe kanye nesicumbi lesikhulu saletinye timvu. Jesu wayala tingilosi kutsi tichubeke tibambe imimoya lemine yembhubhiso. Akukafaneli tiyiyekele lemimoya kuze kube  ngulapho Jehova ancuma kutsi lamaKhristu lagcotjiwe etsembekile. (Semb. 7:1-4) Ngenca yekwetsembeka kwawo, bomnakaboKhristu labagcotjiwe batawuba ngemakhosi nebaphristi kanye naye ezulwini. (Semb. 20:6) Jehova, Jesu netingilosi batawujabula kakhulu nababona labo labangu-144 000 labagcotjiwe batfola umvuzo wabo wekuyophila ezulwini.

7. KuSembulo 7:9, 10, bobani lababonwa nguJohane embonweni, futsi bebentani? (Buka sitfombe lesisekhasini lekucala.)

⁷ Ngemuva kwekukhuluma ngalamakhosi nebaphristi langu-144 000, Johane ubona intfo lemangalisako, “sicumbi lesikhulu” lesisindze ku-Amagedoni. Ngalokwehlukile kulelicembu lekucala, lelicembu lesibili likhulu kakhulu futsi kute lowatiko kutsi litawuba nebantfu labangakanani. (Fundza Sembulo 7:9, 10.) ‘Sigcoke tingubo letimhlophe,’ letikhombisa kutsi batigcine bete libala kulelive laSathane futsi bebetsembekile kuNkulunkulu nakuKhristu. (Jak. 1:27) Bayamemeta kutsi basindzisiwe ngenca yaloko Jehova naJesu loliWundlu laNkulunkulu labakwentile. Ngetulu kwaloko, baphetse emagala elusundvu, lakhombisa kutsi bayamemukela Jesu njengeNkhosi lebekwe nguJehova.—Catsanisa naJohane 12:12, 13.

8. Sembulo 7:11, 12 sisitjelani ngemndeni waJehova losezulwini?

⁸ Fundza Sembulo 7:11, 12. Yini leyenteka ngesikhatsi labasezulwini babona sicumbi lesikhulu? Johane ubona umndeni waJehova losezulwini ujabulile futsi udvumisa Nkulunkulu njengobe ubona sicumbi lesikhulu. Umndeni waJehova losezulwini utawujabula kakhulu nawubona kugcwaliseka lesembulo futsi ubona sicumbi lesikhulu siphuma ekuhluphekeni lokukhulu siphila.

9. Ngekusho kweSembulo 7:13-15, yini leyentiwa sicumbi lesikhulu nyalo?

⁹ Fundza Sembulo 7:13-15. Johane utsi sicumbi lesikhulu ‘sihlante tingubo taso satenta taba mhlophe engatini yeliWundlu.’ Loku kusho kutsi bananembeza lohlantekile futsi Jehova uyajabula ngabo. (Isa. 1:18) BangemaKhristu latinikele futsi labhajatisiwe, lanekukholwa lokucinile enhlawulweni yaJesu futsi anebuhlobo lobuhle naJehova. (Joh. 3:36; 1 Phet. 3:21) Bayakufanela kuma embikwesihlalo sebukhosi saNkulunkulu kuze bamentele “umsebenti longcwele busuku nemini” lapha emhlabeni. Nyalo bayatimisela kwenta umsebenti wekushumayela ngeMbuso nekwenta bafundzi, ngobe uMbuso waNkulunkulu ubaluleke kakhulu kubo.—Mat. 6:33; 24:14; 28:19, 20.

10. Sicumbi lesikhulu siciniseka ngani, futsi ngusiphi setsembiso lesitasibona sigcwaliseka?

¹⁰ Sicumbi lesikhulu lesiphuma ekuhluphekeni lokukhulu siyaciniseka kutsi Nkulunkulu utawuchubeka asinakekela, ngobe “loyo lohleti esihlalweni sebukhosi utawumisa lithende lakhe etikwabo.” Setsembiso lebesisolo silangatelelwa sicumbi lesikhulu sitawugcwaliseka, sitsi: “[Nkulunkulu] uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona.”—Semb. 21:3, 4.

11-12. (a) Ngekusho kweSembulo 7:16, 17, ngutiphi tibusiso letitawutfolwa sicumbi lesikhulu? (b) Letinye timvu tingentani eSikhumbutweni, futsi leni?

¹¹ Fundza Sembulo 7:16, 17. Lamuhla, bantfu labanyenti balambile ngenca yekutsi bete imali leyenele yekutsenga kudla labakudzingako nobe ngenca yetinkinga letibangelwa timphi. Labanye bayaboshwa ngenca yekukholwa kwabo. Nobe kunjalo, sicumbi lesikhulu siyajabula ngobe siyati kutsi ngemuva  kwekusindza ekubhujisweni kwalelive lelibi, sitawuhlale sinekudla lokunyenti futsi sitawucondziswa nguJehova. Nakubhujiswa lelive laSathane, sicumbi lesikhulu ngeke sikutfole “kushisa lokuhlabako” kwentfukutselo yaJehova latayitfululela etiveni. Nasekuphelile kuhlupheka lokukhulu, Jesu utawucondzisa laba labasindzile abayise ‘emantini ekuphila [lokuphakadze].’ Cabanga nje: Sicumbi lesikhulu sinelitsemba lelihle. Emkhatsini wetigidzigidzi tebantfu labake baphila, emalunga aso kungenteka angafi!—Joh. 11:26.

¹² Letinye timvu tibonga Jehova naJesu ngelitsemba lelihle letinalo! Atikakhetfwa kutsi tiyophila ezulwini, kodvwa tiligugu kakhulu kuJehova. Labagcotjiwe kanye naletinye timvu bangadvumisa Nkulunkulu naKhristu. Lenye indlela labakwenta ngayo loku kutsi babe khona eSidlweni SeNkhosi Sakusihlwa.

13-14. Kungani sonkhe kufanele sibe khona eSikhumbutweni sekufa kwaKhristu?

¹³ Kuleminyaka, kulinganiselwa kutsi kubantfu labangu-1 000 uba munye umuntfu lodla sinkhwa futsi anatse neliwayini eSikhumbutweni. Emabandla lamanyenti ete bantfu labadlako eSikhumbutweni. Labanyenti lababa khona esikhumbutweni banelitsemba lekuphila emhlabeni. Kodvwa kungani baba khona eSidlweni Senkhosi Sakusihlwa? Banesizatfu lesifanako nesemuntfu loya emshadweni wemngani wakhe. Uya emshadweni ngobe ufuna kukhombisa kutsi uyabatsandza futsi uyabasekela labo labashadako. Ngendlela lefanako, labo baletinye timvu baya eSikhumbutweni ngobe bafuna kukhombisa kutsi bayamtsandza futsi bayamsekela Khristu nalabagcotjiwe. Letinye timvu tiphindze tibe khona eSikhumbutweni ngobe tifuna kukhombisa kutsi tiyabonga ngenhlawulo yaJesu, letakwenta kutsi tiphile phakadze emhlabeni esikhatsini lesitako.

¹⁴ Lesinye sizatfu lesenta letinye timvu tibe khona eSikhumbutweni kutsi tifuna kulalela umyalo waJesu. Ngesikhatsi Jesu acalisa Sidlo SeNkhosi Sakusihlwa anebaphostoli bakhe labetsembekile, watsi: “Chubekani nikwenta, ningikhumbula.” (1 Khor. 11:23-26) Ngako, letinye timvu titawuchubeka tiba khona eSidlweni SeNkhosi Sakusihlwa uma nje labagcotjiwe basaphila lapha emhlabeni.  Ecinisweni, letinye timvu timema nalabanye kutsi babe khona eSikhumbutweni.

15. Yini lesingayenta kuze sidvumise Nkulunkulu naKhristu eSikhumbutweni?

¹⁵ NasiseSikhumbutweni, sinelitfuba lekudvumisa Nkulunkulu naKhristu nasihlabela futsi sithantaza. Sihloko senkhulumo yeSikhumbuto kulomnyaka sitawube sitsi “Khombisa Kubonga Ngaloko Nkulunkulu naKhristu Labakwentela Kona!” Lenkhulumo itawusenta simbonge kakhulu Jehova naKhristu. Ngako njengobe kutawube kwendluliswa sinkhwa neliwayini, sitawukhona kucabanga ngekutsi letifanekiselo tisho kutsini, umtimba waJesu nengati yakhe. Sitawukhumbula kutsi Jehova wavuma kutsi iNdvodzana yakhe ife ngenca yetfu kuze sitawutfola kuphila. (Mat. 20:28) Bonkhe labamtsandzako Babe wetfu losezulwini neNdvodzana yakhe batawuba khona kuleSikhumbuto.

16. Labagcotjiwe naletinye timvu bafana ngatiphi tindlela?

¹⁶ Ngalenye indlela, labagcotjiwe naletinye timvu bayafana. Jehova akatsandzi kakhulu lelinye licembu kunalelinye. Omabili lamacembu uwatsandza ngendlela lefanako. Ngetulu kwako konkhe, wawatsenga ngelinani lelifanako, lokukuphila kweNdvodzana yakhe layitsandzako. Umehluko lokhona kulamacembu lamabili kutsi anematsemba langafani. Lamacembu kufanele ahlale etsembekile kuNkulunkulu nakuKhristu. (Hla. 31:23) Kufanele sikhumbule kutsi umoya longcwele waNkulunkulu ungasebenta ngendlela lefanako kitsi sonkhe. Loku kusho kutsi Jehova usinika sonkhe umoya longcwele kuye ngetidzingo tetfu, kungayi ngekutsi umuntfu ugcotjiwe nobe ungulomunye wesicumbi lesikhulu.

17. Yini labagcotjiwe labasesele emhlabeni labayilangatelelako?

¹⁷ EmaKhristu lagcotjiwe akatalwa anelitsemba lekuyophila ezulwini. NguNkulunkulu lobanika lelitsemba. Bacabanga ngelitsemba labo, bathantaza ngalo futsi bayakulangatelela kuyophila ezulwini. LamaKhristu akati kutsi imitimba yawo itawuba njani ezulwini. (Fil. 3:20, 21; 1 Joh. 3:2) Nanobe kunjalo, ayakulangatelela kuba naJehova, Jesu, netingilosi kanye nabo bonkhe labagcotjiwe. Bayakulangatelela nekuhlala etihlalweni tebukhosi eMbusweni wasezulwini.

18. Yini letinye timvu letiyilangatelelako?

¹⁸ Letinye timvu tilangatelela kuphila phakadze emhlabeni, futsi lesi sifiso bonkhe bantfu labanaso. (Shu. 3:11) Basibuke ngalabovu sikhatsi lapho batawushintja khona  wonkhe umhlaba ube lipharadisi. Bayasilangatelela sikhatsi lapho batawakha khona tindlu tabo, bahlanyele tihlahla futsi bakhulise bantfwana babo labaphilile. (Isa. 65:21-23) Bayasilangatelela sikhatsi lapho batawuvakashela khona tindzawo letinyenti emhlabeni, babone tintsaba, emahlatsi nelwandle, futsi bafundze ngetintfo letinyenti Jehova latidalile. Ngetulu kwaloko, bayajabula ngekwati kutsi buhlobo babo naJehova butawucina kakhulu.

19. Sikhumbuto sisiniketa litfuba lekwentani, futsi sitawuba khona nini kulomnyaka?

¹⁹ Jehova unikete tonkhe tikhonti takhe litsemba lelihle ngelikusasa. (Jer. 29:11) Sikhumbuto sekufa kwaKhristu sisiniketa litfuba lelihle lekudvumisa Nkulunkulu naKhristu ngaloko labasentele kona kuze sijabulele kuphila lokungapheli. Sikhumbuto singumhlangano lobaluleke kakhulu emaKhristu eliciniso laba nawo njalo ngemnyaka. Sikhumbuto sitawuba ngemuva kwekushona kwelilanga ngeMgcibelo, March 27, 2021. Kulomnyaka, labanyenti batawukhona kuba khona kulomkhosi lobalulekile. Labanye batawuba khona ngisho baphikiswa. Labanye batasitfola Sikhumbuto ngisho nobe basemajele. Njengobe Jehova, Jesu kanye nencenye yemndeni waNkulunkulu losezulwini babukile, shengatsi onkhe emabandla, emacembu nebantfu bangasijabulela Sikhumbuto!