1. Apa pengaruh sěmbaụ nasẹ̌ su pertemuan taung 1935 su sěngkatau umbaseng?

SĚNGKATAU umbaseng umure 18 su taunge nibaptisẹ̌ su taung 1926. Matimade kai Sahiding Yehuwa, arau su tempo ene nisěbạ Siswa-Siswa Alkitab. Umbaseng ene anạ tal᷊oara bọu lima tahatuari, kụ i sire kěbị nihiking su ral᷊ungu katěngadẹ̌. Kere biasa kẹ̌koatengu Siswa-Siswa Alkitab su tempo ene, umbaseng ene lai kụkaěng borotẹ̌ dingangu něnginung anggorẹ̌ sabang taung su acara Perjamuan Hěbing Tuang. Katewe, pěbawiahe nẹ̌bal᷊ui su tempong i sie nakaringihẹ̌ nasẹ̌ sěbạe penting tatěmbọe ”Perhimpunan Besar”. Nasẹ̌ ini nilahẹ i J. F. Rutherford su pertemuan su Washington, DC, AS, su taung 1935. Apa nikaěndungangu Siswa-Siswa Alkitab su pertemuan ene?

2. Katěngadẹ̌ penting apa nilahẹ su nasẹ̌ i Saudara Rutherford?

² Su nasẹ̌e, Saudara Rutherford nělahẹ i sai ”perhimpunan besar” (King James Version), arau ”komol᷊ang gěguwạ”, nilahẹ su Wahyu 7:9. Su tempo ene, Siswa-Siswa Alkitab nẹ̌pikirẹ̌ kelompok ini kai taumata apang tawe tumanịu masatia kụ piạ pělaharapẹ̌ měbiahẹ̌ su sorga. Saudara Rutherford něpakẹ ayatẹ̌ ini gunang mělahẹ komol᷊ang gěguwạ bal᷊inẹbe taumata apang nipile gunang měbiahẹ̌ su sorga, katewe i sire ini kai domba wal᷊inẹ * bọu i Kristus kụ sarung masal᷊amatẹ̌  lumiu ”kasasusah masaria” kụ měbiahẹ̌ kěkalẹ̌ su dunia. (Why. 7:14) Yesus nẹ̌diandi, ”Iạ lai piạ domba wal᷊inẹ, kụ bal᷊inẹ bọu kandang ini. I sire lai harusẹ̌ takụ bawaneng. I sire sarung dumaringihẹ̌ tingihẹ̌ku, kụ kěbị sarung makoạ sěmbaụ gapaěng, dingangu sěmbaụ měngangahạe.” (Yoh. 10:16) Manga domba ini kai Sahiding Yehuwa masatia apang piạ pělaharapẹ̌ měbiahẹ̌ kěkalẹ̌ su Firdaus su dunia. (Mat. 25:31-33, 46) Mahi měmanda kerea pělaharapẹ̌ ini seng nakawal᷊ui pěbawiahu lawọ ělang i Yehuwa, sarang lai nakawal᷊ui pěbawiahu sěngkatau umbaseng nisěbạ kanini.​—Mz. 97:11; Amsal 4:18.

3-4. Su pertemuan taung 1935, hiwune taumata nasadarẹ̌ soal u apa?

³ Hadirin sěbạe mal᷊uasẹ̌ su tempong měnanasẹ̌ něgausẹ̌, ”I saing piạ pělaharapẹ̌ měbiahẹ̌ kěkalẹ̌ su dunia, darisịe!” Su tempo ene, nal᷊iu bọu stengah hadirin dimarisị. Bọu ene, Saudara Rutherford němohang, ”Pěmandạe! I sire ini kai perhimpunan besar!” Su apang nakaringihẹ̌ bohang ene, hiwune taumata nẹ̌tal᷊okạ. I sire apang dimarisị nasadarẹ̌ i sire tawe nipile gunang měbiahẹ̌ su sorga. I sire masingkạ i sire tawe nilanisẹ̌ dingangu rohkẹ̌ masusi. Dịěllone, piạ 840 taumata nibaptisẹ̌, kụ kal᷊awokange kai domba wal᷊inẹ.

⁴ Nal᷊iu bọu pertemuan ene, umbaseng nisěbạ kanini dingangu hiwune taumata wal᷊inẹ něngědo kimaěng borotẹ̌ dingangu něnginung anggorẹ̌ su Perjamuan Hěbing Tuang. Sěngkatau saudara dingangu kasasanạu naung nẹ̌bera, ”Acara Pẹ̌tatahěndungang taung 1935 ene kai taung pěngěngsuenge iạ kimaěng borotẹ̌ dingangu něnginung anggorẹ̌. Iạ nasadarẹ̌ Yehuwa tawe nělanisẹ̌ si siạ dingangu rohkẹ̌ masusi gunang měbiahẹ̌ su sorga. Katewe, iạ piạ pělaharapẹ̌ gunang měbiahẹ̌ su dunia kụ tumol᷊e měkoạ dunia ini makoạ firdaus.” (Rm. 8:16, 17; 2 Kor. 1:21, 22) Lawọ lai piạ pěndang kere saudara ene. Něnětạ tempo ene, komol᷊ang gěguwạ turusẹ̌ kakạtambane kụ i sire něhal᷊ẹ̌ sěngkasio dingangu lěmbeng apang nilanisẹ̌. *

5. Kerea pěndang i Yehuwa si sire apang seng něngědo něngal᷊ạ bageang su Pẹ̌tatahěndungang?

⁵ Kerea pěndang i Yehuwa si sire apang seng něngědo něngal᷊ạ bageang su Pẹ̌tatahěndungang nal᷊iu bọu taung 1935? Kụ kerea mạeng piạ sěngkatau Sahiding Yehuwa kimaěng borotẹ̌ dingangu něnginung anggorẹ̌ su Perjamuan Hěbing Tuang katewe samurine i sie nasadarẹ̌ i sie tawe kahěngang-hěngang nilanisẹ̌? (1 Kor. 11:28) Pirang katau seng něngal᷊ạ bageang ual᷊ingu tawe tumanịu nakaěna soal u pělaharapi sire. Katewe, mạeng i sire jujurẹ̌ měngakui pẹ̌sasal᷊ang i sire, měngědo měngal᷊ạ bageang, kụ turusẹ̌ masatia mẹ̌tahamawu si Yehuwa, Yehuwa sarung měnarimạ si sire makoạ bageang bọu domba wal᷊inẹ. Maning i sire seng tawe kumaěng borotẹ̌ dingangu měnginung anggorẹ̌, i sire tatapẹ̌ duměnta su Pẹ̌tatahěndungang ual᷊ingu sěbạe měngẹ̌ngarěga apa seng nikoạ i Yehuwa dingangi Yesus gunang i sire.

6. Yesus něgělị parenta apa su manga malaekatẹ̌?

⁶ Ual᷊ingu kasasusah masaria seng mal᷊ighạ mariadi, i kitẹ tantu mal᷊uasẹ̌ měngěndung apa nilahẹ su Wahyu pasalẹ̌ 7 soal u tau Kristen apang nilanisẹ̌ dingangu komol᷊ang gěguwạ domba wal᷊inẹ. Yesus nẹ̌parenta su manga malaekatẹ̌ gunang  turusẹ̌ měnahang anging kawawinasa. I sire tawe wotonge měmělọ anging ene sarang kěbị tau Kristen apang nilanisẹ̌ seng nakaěbạ meterai, ene mangal᷊ene Yehuwa němutusẹ̌ i sire masatia. (Why. 7:1-4) Ual᷊ingu i sire masatia, manga anạu sěngkataung i Kristus ini sarung makoạ datu dingangu imang su sorga. (Why. 20:6) Su tempong 144.000 tau Kristen apang nilanisẹ̌ nakatarimạ ene, kěbị apang nakoạ bageang bọu kěluargang Mawu su sorga sarung sěbạe mal᷊uasẹ̌.

7. Kere nilahẹ su Wahyu 7:9, 10, Yohanes nakasilo si sai, kụ apa kẹ̌koateng i sire? (Pěmanda gambarẹ̌ sampul.)

⁷ Su apang bọu nẹ̌bisara soal u 144.000 datu dingangu imang, Yohanes nakasilo sěmbaụ hal᷊ẹ̌ makạlaherang, ene kai ”komol᷊ang gěguwạ” nasal᷊amatẹ̌ bọu Armagedon. Bal᷊inẹ kere kelompok humotong, kelompok karuane ini limembong gěguwạ kụ tawe karekenang kal᷊awọe. (Basa Wahyu 7:9, 10.) I sire něluhe ”pakeang mawira”, ene něnodẹ i sire něndiagạ watangeng i sire ”tawe nakotorẹ̌” karạu duniang Setang, kụ i sire lai tatapẹ̌ masatia su Mawu dingangi Kristus. (Yak. 1:27) I sire nẹ̌bera dingangu tingihẹ̌ maihạ, i sire seng nasal᷊amatẹ̌ ual᷊ingu apa seng nikoạ i Yehuwa dingangi Yesus, Anạ Dombang Mawu. Bọu ene lai, i sire měnẹ̌něngal᷊ẹ̌ daokalung palem, ene něnodẹ i sire mal᷊uasẹ̌ něnarimạ i Yesus nakoạ datu seng nipileng Yehuwa.​—Bandingkan Yohanes 12:12, 13.

8. Apa niul᷊ị u Wahyu 7:11, 12 soal u kěluargang i Yehuwa su sorga?

⁸ Basa Wahyu 7:11, 12. Kerea reaksing i sire apang su sorga su tempong nakasilo komol᷊ang gěguwạ? Yohanes němohẹ kěluargang i Yehuwa su sorga sěbạe mal᷊uasẹ̌ dingangu nẹ̌dalo Mawu su tempong nakasilo komol᷊ang gěguwạ. Kěluargang i Yehuwa su sorga sarung mal᷊uasẹ̌ su tempong penglihatan i Yohanes soal u komol᷊ang gěguwạ nasal᷊amatẹ̌ bọu kasasusah masaria maghanapẹ̌.

9. Kere nilahẹ su Wahyu 7:13-15, apa kẹ̌koatengu komol᷊ang gěguwạ orasẹ̌ ini?

⁹ Basa Wahyu 7:13-15. Yohanes němohẹ komol᷊ang gěguwạ seng ”něnguhasẹ̌ lakụ i sire kụ někoạ ene nipakawira dingangu dahang Anạ Domba”. Ene mangal᷊ene i sire piạ hati nurani burěsi dingangu nakal᷊uasẹ̌ si Yehuwa. (Yes. 1:18) I sire kai tau Kristen seng nibaptisẹ̌ kụ piạ pangangimang matoghasẹ̌ su tatěbusi Yesus kụ i sire lai mědẹ̌dal᷊ahapị dingangi Yehuwa. (Yoh. 3:36; 1 Ptr. 3:21) Bọu ene lai, i sire dụdarisị su těngong takhtang Mawu kụ ”někoạ pelayanan masusi gunang i Sie ěllo-hěbi” su dunia. Orasẹ̌ ini, i sire masěmangatẹ̌ měhabarẹ̌ soal u Kararatuang dingangu měkoạ muritẹ̌, ual᷊ingu Kararatuangu Mawu nakoạ kahumotongange su pěbawiahi sire.​—Mat. 6:33; 24:14; 28:19, 20.

10. Komol᷊ang gěguwạ mangimang apa, kụ diandi apa lẹ̌ampal᷊eng i sire?

¹⁰ Komol᷊ang gěguwạ nasal᷊amatẹ̌ bọu kasasusah masaria mangimang Mawu sarung turusẹ̌ měngurusẹ̌ si sire. Alkitapẹ̌ nẹ̌bera, ”I Sie kụkaiang su takhta ene sarung měndiagạ si sire”. Diandi seng marěngụ lẹ̌ampal᷊engu domba wal᷊inẹ seng tawe kararěngụe maghanapẹ̌. Ini kai diandi su Wahyu 21:3, 4: ”[Mawu] sarung měngěmụ kěbị ěllo matang i sire. Papate sarung mailang. Pěndang lụl᷊ahunsusah, sasangị, arau pěndang matědụ lai sarung mailang. Manga hal᷊ẹ̌ nariadi kangerẹ seng tawe dịe.”

11-12. (a) Kere nilahẹ su Wahyu 7:16, 17, al᷊amatẹ̌ apa nisadia gunang komol᷊ang gěguwạ? (b) Apa wotonge koatengu domba wal᷊inẹ su Pẹ̌tatahěndungang, kụ kawe nụe?

¹¹ Basa Wahyu 7:16, 17. Orasẹ̌ ini, pirang katau ělang i Yehuwa nikal᷊unusang ual᷊ingu masalah ekonomi arau ual᷊ingu piạ  sekẹ. Sěnggạ lai nipěnjara ual᷊ingu pangangimang i sire. Katewe, komol᷊ang gěguwạ sěbạe mal᷊uasẹ̌ ual᷊ingu masingkạ su apang i sire masal᷊amatẹ̌ bọu kawawinasang dunia dal᷊akị ini, i sire sarung sěntiniạ piạ lawọ kaěng rohani dingangu jasmani. Su tempong Yehuwa měminasa duniang Setang dal᷊akị ini, i Sie sarung měndiagạ komol᷊ang gěguwạ tadeạu tawe kahinongu tětịu pědu-Ne. Mal᷊iu bọu kasasusah masaria, Yesus sarung měngahạ taumata apang nasal᷊amatẹ̌ sarang ”akẹ u pěbawiahẹ̌ [kěkalẹ̌]”. Kěnang pẹ̌tiněna: Komol᷊ang gěguwạ piạ pělaharapẹ̌ sěbạe makạlaherang. Apang nasal᷊amatẹ̌ aramanung seng tawe makapěndang papate.​—Yoh. 11:26.

¹² Domba wal᷊inẹ piạ pělaharapẹ̌ makạlaherang, hakị u ene i sire makitarimakasẹ si Yehuwa dingangi Yesus! Maning Yehuwa tawe němile si sire gunang měbiahẹ̌ su sorga, Yehuwa makěndagẹ̌ si sire kere i Sie makěndagẹ̌ su tau Kristen apang nilanisẹ̌. Anggota bọu darua kelompok ene sarung mẹ̌dalo Mawu dingangi Kristus. Sěmbaụ cara i sire mẹ̌dalo su Mawu dingangi Kristus ene kai duměnta su Perjamuan Hěbing Tuang.

13-14. Kawe nụe i sire apang nilanisẹ̌ dingangu domba wal᷊inẹ diměnta su Pẹ̌tatahěndungang papateng Kristus?

¹³ Su pira taung ini, bọu 1.000 taumata, kětạeng piạ sěngkatau kimaěng borotẹ̌ dingangu něnginung anggorẹ̌ su acara Pẹ̌tatahěndungang. Su lawọ sidang, tawẹ apa taumata něngal᷊ạ bageang. Kal᷊awokange taumata apang diměnta su Pẹ̌tatahěndungang ene kai i sire apang piạ pělaharapẹ̌ měbiahẹ̌ su dunia. Mạeng kerene, kawe nụe i sire diměnta su Perjamuan Hěbing Tuang? I sire diměnta ual᷊ingu piạ alasang mẹ̌sul᷊ung kere taumata diměnta su acara pẹ̌kakawing. I sire diměnta ual᷊ingu něnodẹ kakěndagẹ̌ su duang katau apang nẹ̌kawing. Kerene lai, domba wal᷊inẹ diměnta su Pẹ̌tatahěndungang ual᷊ingu i sire mapulu měnodẹ kakěndagẹ̌ si Kristus dingangu si sire apang nilanisẹ̌. Domba wal᷊inẹ lai diměnta ual᷊ingu mapulu měnodẹ pěngangarěga su tatěbusi Yesus seng nakakoạ si sire botonge měbiahẹ̌ kěkalẹ̌ su dunia.

¹⁴ Alasang wal᷊inẹ kawe nụe domba wal᷊inẹ diměnta su Pẹ̌tatahěndungang ene  kai gunang tumuhụ parentang Yesus. Su tempong i Yesus někoạ acara penting ene dingangu manga rasule masatia, i sie naul᷊ị, ”Turusẹ̌e pěkoạ ini gunang mẹ̌tahěndung si siạ.” (1 Kor. 11:23-26) Hakị u ene domba wal᷊inẹ turusẹ̌ dụděnta su Perjamuan Hěbing Tuang ual᷊ingu apang nilanisẹ̌ bědang ene su dunia. Kụ, domba wal᷊inẹ lai měgẹ̌gausẹ̌ taumata wal᷊inẹ gunang duměnta su acara Pẹ̌tatahěndungang.

15. Kerea i kitẹ botonge mẹ̌dalo su Mawu dingangi Kristus su Pẹ̌tatahěndungang?

¹⁵ Su Pẹ̌tatahěndungang, i kitẹ piạ kesempatan gunang mẹ̌dalo su Mawu dingangi Kristus bọu kakantarị lai daroa. Nasẹ̌ sarung lahẹkang taung ini tatěmbọe ene kai ”Pěngarěga Apa Seng Nikoạ u Mawu dingangi Kristus gunang i Kitẹ!” Nasẹ̌ ene sarung makakoạ si kitẹ limembong měngarěga si Yehuwa dingangi Kristus. Su tempong borotẹ̌ dingangu anggorẹ̌ luhuang, i kitẹ kěbị apang diměnta sarung makatahěndung ene nakoạ tatialang badang dingangu dahang i Yesus. I kitẹ sarung mẹ̌tahěndung Yehuwa seng němala Ahus’E mate gunang měngganti si kitẹ tadeạu i kitẹ botonge makaěbạ pěbawiahẹ̌. (Mat. 20:28) Kěbị taumata apang makěndagẹ̌ si Amang su sorga dingangu su Ahus’E sarung duměnta su acara Pẹ̌tatahěndungang ene.

16. Su piram baụ hal᷊ẹ̌ apa tau Kristen apang nilanisẹ̌ mẹ̌sul᷊ung dingangu domba wal᷊inẹ?

¹⁶ Su piram baụ hal᷊ẹ̌, tau Kristen apang nilanisẹ̌ mẹ̌sul᷊ung dingangu domba wal᷊inẹ. Darua kelompok ini kěbị maarěga su těngong Yehuwa. Yehuwa seng něměli darua kelompok ini dingangu arěga mẹ̌sul᷊ung ene kai pěbawiahu Ahus’E. Pẹ̌tatěntangu darua kelompok ini kai pělaharapi sire. Darua kelompok ini harusẹ̌ tatapẹ̌ masatia su Mawu dingangi Kristus. (Mz. 31:23) Kụ pẹ̌tahěndung, Yehuwa botonge měgělị rohkẹ̌’E masusi su kěbị ělang’E tuhụ kebutuhan i sire, tawẹ soale i sire nilanisẹ̌ arau domba wal᷊inẹ.

17. Lěmbeng tau Kristen apang nilanisẹ̌ měngẹ̌ngampal᷊ẹ̌ apa?

¹⁷ Tau Kristen apang nilanisẹ̌ tawe nalahirẹ̌ dingangu pělaharapẹ̌ měbiahẹ̌ su sorga. Pělaharapẹ̌ ene nighělị u Mawu si sire. I sire mětẹ̌tiněna soal u pělaharapẹ̌ ene, nẹ̌doa soal u ene, dingangu masěmangatẹ̌ měngampal᷊ẹ̌ tempone i sire měbiahẹ̌ su sorga. I sire běga kerea badang i sire su tempong i sire seng su sorga. (Flp. 3:20, 21; 1 Yoh. 3:2) Maning kerene, i sire měngẹ̌ngampal᷊ẹ̌ tempone mẹ̌sombang dingangi Yehuwa, Yesus, dingangu manga malaekatẹ̌. I sire lai mapulu mẹ̌sombang dingangu tau Kristen apang nilanisẹ̌ kụ  seng ene su sorga tadeạu botonge mẹ̌parenta sěngkasio su Kararatuang su sorga.

18. Manga domba wal᷊inẹ měngẹ̌ngampal᷊ẹ̌ apa?

¹⁸ Manga domba wal᷊inẹ měngẹ̌ngampal᷊ẹ̌ tempone měbiahẹ̌ kěkalẹ̌ su dunia. Ini kai hal᷊ẹ̌ kẹ̌kapuluangu kěbị taumata. (Pkh. 3:11) I sire měngẹ̌ngampal᷊ẹ̌ tempone měmal᷊ui patikụ dunia ini makoạ firdaus. I sire lai měngẹ̌ngampal᷊ẹ̌ tempone měndarisị bal᷊eng i sire hala, mẹ̌kěbong, dingangu měhiking anạ masasehatẹ̌. (Yes. 65:21-23) I sire lai měngẹ̌ngampal᷊ẹ̌ tempone gunang makoạ sarang haghing tampạ su dunia, měmanda wul᷊udẹ̌, kěhu, dingangu laudẹ̌, kụ měngěndung soal u kěbị apa seng nikoạ i Yehuwa. Katewe, i sire sarung limembong mal᷊uasẹ̌ su tempong makasingkạ pẹ̌dal᷊ahapị i sire dingangi Yehuwa sauneng kakạtoghase dingangu kakạrěduhe.

19. Acara Pẹ̌tatahěndungang sarung makoạ kesempatan gunang měkoạ apa, kụ su taung ini, kange Pẹ̌tatahěndungang sarung koateng?

¹⁹ Yehuwa seng něgělị pělaharapẹ̌ sěbạe makạlaherang gunang kěbị ělang’E. (Yer. 29:11) Acara Pẹ̌tatahěndungang papateng Kristus sarung makoạ kesempatan si kitẹ gunang mẹ̌dalo Mawu dingangi Kristus ual᷊ingu apa seng nikoạ i rẹ̌dua tadeạu i kitẹ botonge měbiahẹ̌ sarang karěngụe. Pẹ̌tatahěndungang kai acara sěbạe penting kẹ̌koatengu tau Kristen sabang taung. Ini sarung koateng su Kaehẹ̌, 27 Maret 2021. Su negeri tawe nẹ̌sěding hal᷊ẹ̌ i kitẹ, sarung lawọ taumata duměnta su acara ini. Sěnggạ lai sarung duměnta maning dẹ̌darihang. Pirang katau lai sarung tatapẹ̌ měkoạ acara ini maning ene su penjara. Su tempong Yehuwa, Yesus, dingangu kěluargang Mawu su sorga měmanda, karimạko i kitẹ kěbị tumol᷊e acara Pẹ̌tatahěndungang ini.