1. Ndiéjunʼ rí ni̱jkhánú nikro̱ʼo̱o̱ mbáa ndxájulú dxámá náa discurso rí nijuixná nákha tsiguʼ 1935 rá.

NÁKHA tsiguʼ 1926, nijngún iyááʼ mbáa dxámá bi̱ gíʼdoo 18 tsiguuʼ. Anu̱u̱ ga̱jma̱a̱ ru̱dúu̱ ninindxu̱ún bi̱ nunigajmaa Biblia. Numuu rí xúʼko̱ ethúún xa̱bi̱i̱ Jeobá nakha ikhú. Ikhiin niguáʼdiin ajtsíin jiámá ga̱jma̱a̱ a̱jmi̱i̱n wa̱ʼxa̱ʼ nisngúún mu mani̱ndxu̱ún xa̱bi̱i̱ Jeobá ga̱jma̱a̱ dí mbuʼyaridáá Jesús. Numuu rí xúgíinʼ bi̱ nunigajmaa Biblia nakha ikhú naʼphu̱ pan ga̱jma̱a̱ naʼwa̱a̱n vino, xúʼko̱ má eʼni dxámá bugi̱. Mú niriʼkhuu xóo endxaʼo edxuu índo̱ niʼdxawun mbá discurso rí ndiyá edxu̱u̱ “ra̱ʼkhá tháán mbaʼin xa̱bu̱”, dí nixná ndxájulú Rutherford nákha tsiguʼ 1935 náa mbá asamblea dí nirígá náa xuajen Washington ndrígóo Estados Unidos. Ndiéjunʼ rí nijmañún bi̱ nunigajmaa Biblia náa asamblea rúʼko̱ rá.

2. káʼnii rí gajkhun niguáʼnuu ndiyáa angiulúʼ náa discurso rí nixná ndxájulú Rutherford rá.

² Náa discurso rí nixná ndxájulú Rutherford niʼthí ga̱jma̱a̱ numún bi̱ phú “mbaʼin xa̱bu̱” dí nakha raʼthí náa Apocalipsis 7:9 (Versión del Rey Jacobo). Nákha ikhú nundxaʼwamíjná bi̱ phú mbaʼin xa̱bu̱ bugi̱ magúun mekhuíí mú xákúwi̱i̱n mijngii náa Dios numuu rí na̱nguá guájun wéñuʼ jmbu xó ma bi̱ kaxtaʼwíin. Rutherford nijmuu Biblia mu maʼthí kaʼwu ga̱jma̱a̱ numún bi̱ phú mbaʼin xa̱bu̱, rí ikhiin na̱nguá nixtaʼwíin mu magúun mekhuíí, ikhiin ni̱ndxu̱ún bi̱ “eʼwíínʼ mugu̱” bi̱ Cristo niʼthí rí ikhiin makáwíin náa “majphú mba̱a̱ gaʼkhu” ga̱jma̱a̱ makuwíin kámuu náa tsu̱du̱u̱ ku̱ba̱ʼ (Apoc. 7:14). “Ga̱jma̱a̱ gúʼdiin eʼwíínʼ mugu̱, bi̱ na̱nguá ni̱ndxu̱ún náa gúláa rígi̱; ikhiin mangiin ma̱ʼkhá kagu̱u̱n ga̱jma̱a̱ mudxawíín rí gáthá. Muwi̱i̱n mugu̱ ga̱jma̱a̱ imbawíí báxtúu gáʼni̱i̱” (Juan 10:16). Mugu̱ bugi̱ ni̱ndxu̱ún xa̱bi̱i̱ Jeobá bi̱ naguáju̱n jmbu náa ikhaa ga̱jma̱a̱ rí ikhiin guáʼthi̱i̱n makuwa kámuu mbiʼi náa  tsu̱du̱u̱ ku̱ba̱ʼ rí mitsaanʼ (Mat. 25:31, 33, 46). Índo̱ niguáʼnu nikru̱ʼu̱u̱n májánʼ dí nasngáa náa Biblia, ikhú niriʼkhuu xóo nindxa̱ʼwa̱míjna̱ mbaʼin xa̱bi̱i̱ Jeobá rí asndu ndxájulú bi̱ nigiʼdoo 18 tsiguuʼ (Sal. 97:11; Prov. 4:18). *

3, 4. Náa asamblea dí nirígá nákha tsiguʼ 1935 ndiéjunʼ rí niguánu ndiyáá mbaʼin xa̱bu̱ rá. Ga̱jma̱a̱ náa numuu rá.

³ Rakha tháán mitsaanʼ ninindxu̱u̱ mbiʼi rúʼko̱, índo̱ ndxájulú Rutherford nirajxu̱u̱n angiulúʼ. Lá kúwi̱i̱n xúgíinʼ gi̱i̱ bi̱ guáʼthi̱i̱n makuwa náa tsu̱du̱u̱ ku̱ba̱ʼ rá. Niʼthí mbáa bi̱ ndiʼyoo rí itháan bi̱ mbá taphi̱i̱n rí 20,000 xa̱bu̱ bi̱ kúwi̱i̱n ikhí, niguaʼjun. Rutherford niʼthí gu̱ya̱a̱: “¡Ra̱ʼkhá tháán mbaʼin xa̱bu̱!” ga̱jma̱a̱ ikhú xúgíinʼ nigi̱ʼdi̱i̱ nixuba̱a̱ gakhii wéñuʼ ñawún. Bi̱ niguájun ndiyáá rí na̱nguá ni̱ndxu̱ún bi̱ magúun mekhuíí ga̱jma̱a̱ na̱nguá ni̱ndxu̱ún bi̱ nixtaʼwíin ga̱jma̱a̱ xí kaʼwu. Imbo̱ʼ mbiʼi niwi̱i̱n mbá 840 xa̱bu̱ ga̱jma̱a̱ nijngúun iyááʼ, mbaʼin dí ikhiin ni̱ndxu̱ún eʼwíinʼ mugu̱.

⁴ Nda̱wa̱á rí nidxáwiin discurso rúʼko̱, dxámá bi̱ niʼthá náa timbá kutriga̱ ga̱jma̱a̱ eʼwíinʼ niniñanʼ raʼphu̱ pan ga̱jma̱a̱ vino índo̱ nagumariya̱a̱ʼ ganitsuwañu Señor. Mbaʼin nakumu̱ún xó má ndxájulú bi̱ niʼthí, iwáá kayúʼ rí nikhu pan ga̱jma̱a̱ niga̱nʼ vino nákha tsiguʼ 1935. Numuu rí ni̱jkhánú ndi̱yo̱o̱ rí Jeobá taraʼún ga̱jma̱a̱ xí kaʼwu ndrígóo mu ikhúún maʼgáaʼ mekhuíí. Ikhúún guʼthúún rí maxtáá náa tsu̱du̱u̱ ku̱ba̱ʼ gi̱i̱ ga̱jma̱a̱ mañajún mu maʼni ku̱ba̱ʼ mitsaanʼ (Rom. 8:16, 17; 2 Cor. 1:21, 22). Asndu nákha ikhú, bi̱ phú mbaʼin xa̱bu̱ niʼni itháan mbaʼin ga̱jma̱a̱ nuñajunʼ mbóó gajmiún bi̱ kaxtaʼwíin bi̱ xóó naguanún. *

5. Xú káʼnii eʼñún Jeobá bi̱ niniñanʼ raʼphu̱ pan ga̱jma̱a̱ bi̱ nánguá eʼwa̱a̱n vino rá.

⁵ Xú káʼnii eʼñún Jeobá bi̱ niniña̱a̱nʼ raʼphu̱ pan ga̱jma̱a̱ bi̱ niniñanʼ raʼwa̱a̱n vino nákha tsiguʼ 1935 rá. Ndiéjunʼ gárígá á mu mbáa xa̱bi̱i̱ Jeobá dí mbiʼi xúgi̱ bi̱ nijngún má iyááʼ naʼkhu̱ pan ga̱jma̱a̱ naʼga̱a̱n vino, numuu dí naku̱mu̱u̱ rí nindxu̱u̱ mbáa bi̱ kixtiʼyaaʼ ga̱jma̱a̱ nda̱wa̱á na̱jkha̱nú nakro̱ʼo̱o̱ dí na̱nguá nindxu̱u̱ rá. (1 Cor. 11:28.) Tikhun naʼphu̱ pan ga̱jma̱a̱ naʼwa̱a̱n vino numuu rí tséyáá náa phú gajkuwiin. Índo̱ nduyáá di raʼkhí dí kúwá runi, ikhú nuniñaaʼ raʼphu̱ pan ga̱jma̱a̱ nánguá eʼwa̱a̱n vino. Mú, nuni ma xúʼko̱ ñajuunʼ Jeobá ga̱jma̱a̱ ikhiin ni̱ndxu̱ún bi̱ eʼwíinʼ mugu̱. Gajkhun má nánguá eʼphu̱ pan ga̱jma̱a̱ nánguá eʼwa̱a̱n vino, mu nagún má xúʼko̱ índo̱ nagumariya̱a̱ʼ ganitsuwañu Señor, numuu dí nuxnáa wéñuʼ núma̱aʼ Jeobá ga̱jma̱a̱ Jesús rí niʼni ga̱jma̱a̱ ni̱ndxu̱ún.

6. Ndiéjunʼ rí naʼthá ñajúúnʼ muni ángeles Jesús rá.

⁶ Xúgi̱ rí gíʼ mijngii majphú mba̱a̱ gaʼkhu, mitsaanʼ wéñuʼ ganindxu̱u̱ náa ikháán á mu nuʼnigajmaa itháán dí naʼthí náa capitulo 7 ndrígóo Apocalipsis, náa naʼthí ga̱jma̱a̱ númúún bi̱ kaxtaʼwíin ma̱ngaa bi̱ majphú mbaʼin xa̱bu̱ bi̱ ni̱ndxu̱ún eʼwíinʼ mugu̱. Ikhí naʼthí dí Jesús naʼthá ñajúúnʼ ángeles dí murikhaʼ ma xúʼko̱ náa mbá nájkhu̱ níʼkhóo giñán rí maʼni gámbíin xa̱bu̱. Murikháá má xúʼko̱ asndu índo̱ xúgíinʼ bi̱ kaxtaʼwíin mundrígú sello ndrígu̱ún, xóo muʼthá rí magruiguíin Jeobá (Apoc. 7:1-4). Bi̱ kaxtaʼwíin bugi̱, numuu rí  niguájun jmbu ikha jngó mani̱ndxu̱ún reyes ga̱jma̱a̱ ndxajkun náa mekhuíí (Apoc. 20:6). Jeobá, Jesús ga̱jma̱a̱ ángeles, ra̱ʼkhá tháán gákuwá gagi índo̱ bi̱ kaxtaʼwíin bi̱ ni̱ndxu̱ún mbá 144,000 mundrígú rí mudaaʼ náa mekhuíí.

7. Xó má eʼthí náa Apocalipsis 7:9, 10, tsíin ndiʼñún Juan ga̱jma̱a̱ ndiéjunʼ kuwa runi xá. (Atayáá xtiʼkhu rí na̱ʼkhá náa timbá ináa.)

⁷ Nda̱wa̱á dí Juan ndiʼñún bi̱ mbáa 144,000 bi̱ mani̱ndxu̱ún reyes ga̱jma̱a̱ ndxajkun, ikhú ndiʼñún bi̱ phú mbaʼin xa̱bu̱ bi̱ nakáwíin náa Armagedón. Mu, ikhiin ni̱ndxu̱ún mixtiʼkuiin numuu dí ra̱ʼkhá tháán mbaʼin, rí asndu nimbáa xa̱bu̱ tséʼngo̱o̱ gáguxniin (atraxnuu Apocalipsis 7:9, 10). * Ikhiin “kagúwún xtíin rí miʼxá mbi̱jua̱” rí nandoo gaʼthúun dí nikúwá mikaʼwu náa numbaaʼ ndrígóo Gixa̱a̱ ga̱jma̱a̱ rí nikuwa jmbu náa Dios ga̱jma̱a̱ náa Cristo (Sant. 1:27). Nundxa̱ʼwa̱ gakhii, numuu rí nikáwíin ga̱jma̱a̱ numuu Jeobá ma̱ngaa Jesús bi̱ nindxu̱u̱ mugiu̱u̱ Dios. Ga̱jma̱a̱ kuda ida, numuu rí xúʼko̱ nusngajmá rí kúwá gagi numuu dí Jesús nindxu̱u̱ Rey bi̱ Jeobá nigíiʼ (Juan 12:12, 13).

8. Ndiéjunʼ eʼthúlú náa Apocalipsis 7:11, 12 ga̱jma̱a̱ numún bi̱ kúwi̱i̱n gajmíi̱n Jeobá rá.

⁸ Atraxnuu Apocalipsis 7:11, 12. * Mú xú káʼnii nikumu̱ún bi̱ kuwa mekhuíí rá. Juan ndiʼñún xúgíinʼ bi̱ kúwá mekhuíí gajmiún Jeobá dí ra̱ʼkhá tháán nadxún ga̱jma̱a̱ nunimba̱a̱ Dios índo̱ nakujmiin bi̱ phú mbaʼin xa̱bu̱. Jeobá ga̱jma̱a̱ xúgíinʼ bi̱ xtáa gajmii ra̱ʼkhá tháán gaʼdxún índo̱ gambánuu rí nindún ga̱jma̱a̱ índo̱ gúyáá rí nakháwíin náa majphú mba̱a̱ gaʼkhu bi̱ phú mbaʼin xa̱bu̱.

9. Xó má naʼthí náa Apocalipsis 7:13-15, ndiéjunʼ eni rí mbiʼi xúgi̱ bi̱ mbaʼin wéñuʼ xa̱bu̱ rá.

⁹ Atraxnuu Apocalipsis 7:13-15. * Juan niʼthí: “Ikhiin ni̱ndxu̱ún bi̱ nagájnún náa majphú mba̱a̱ ga̱ʼkhu̱ ga̱jma̱a̱ nijña̱a̱ xtíñún rí mbi̱jua̱ rí asndu niʼni̱i̱ miʼxá ga̱jma̱a̱ eʼdiuu Aʼdá Múgú”. Rígi̱ nandoo gáʼthúu̱n rí guáʼdáá mbá ku̱ma̱ kaʼwu ga̱jma̱a̱ mbá ñajunʼ náa Jeobá (Is. 1:18). Ni̱ndxu̱ún cristianos bi̱ nixnaxímíjná ga̱jma̱a̱ nijngún má iyááʼ, ma̱ngaa guáʼdáá fe náa tsigijñaʼ rí niʼni Jesús ga̱jma̱a̱ nambáxu̱u̱n májánʼ gajmiún Jeobá (Juan 3:36; 1 Ped. 3:21). Ikha jngó, ikhiin ma̱ndoo mbuyamajkuíí Dios asndu náa trono ndrígóo “mbiʼí mbruʼun” náa tsu̱du̱u̱ ku̱ba̱ʼ gi̱i̱. Ma̱ngaa dí mbiʼi xúgi̱ nuni ga̱jma̱a̱ gagi ñajunʼ rí miʼtáraʼa ga̱jma̱a̱ rí mbuñiínʼ nuxi̱i̱nʼ discípulos, nugíʼ ginii muni ñajunʼ Reino ki xóo rí nandún ikhiin (Mat. 6:33; 24:14; 28:19, 20).

10. Ndiéjunʼ eʼni Dios gajmíi̱n bi̱ mbaʼin xa̱bu̱, ga̱jma̱a̱ ndiéjunʼ dí guáʼthi̱i̱n mambanúu xá.

¹⁰ Mbaʼin wéñuʼ xa̱bu̱ bi̱ nigájni̱i̱n náa majphú mba̱a̱ gaʼkhu nduyáá kaʼwu dí Dios mañewu̱u̱n má xúʼko̱ numuu dí “bi̱ gíʼ náa trono makuajan guʼwá xtíin ndrígóo náa ikhiin.” Rí naguáʼthi̱i̱n bi̱ eʼwíinʼ mugu̱ rí nandún wéñuʼ mambanúu dí naʼthí náa Apocalipsis 21:3, 4: “[Dios] margujndooʼ xúgíʼ iyooʼ idún, ní xákháñún itháan, ní xárígá tsingíná, ni xtambiyaʼ  asndu má gaʼkhu. Xúgíʼ dí nirígá nákha ginii nindáti̱ga̱a̱ gáʼni ikhú”.

11, 12. a) Xó má naʼthí náa Apocalipsis 7:16, 17, ndiéjunʼ dí phú gundrígúu bi̱ mbaʼin xa̱bu̱ rá. b) Ndiéjunʼ rí ma̱ndoo muni bi̱ eʼwíinʼ mugu̱ náa Conmemoración ga̱jma̱a̱ náá numuu rá.

¹¹ Atraxnuu Apocalipsis 7:16, 17. * Rí mbiʼi xúgi̱ mbaʼin xa̱bi̱i̱ Jeobá kúwá rumíniiʼ ga̱jma̱a̱ numuu rí nda̱a̱ mbújkha̱a̱ o ga̱jma̱a̱ numuu dí narígá guerra, eʼwíinʼ nuxudiinʼ náa guʼwá e̱jua̱nʼ ga̱jma̱a̱ numuu fe ndrígu̱ún. Mú bi̱ mbaʼin wéñuʼ xa̱bu̱, nadxún numuu rí ikhiin nduyáá rí makáwíin índo̱ gámbáa dí xkawiʼ dí rígá náa numbaaʼ rígi̱. Ma̱ngaa maguaʼdáá wéñuʼ ganitsu rí muphu ma̱ngaa rí majmañún ga̱jma̱a̱ numuu Dios. Índo̱ Jeobá gaʼni gámbáaʼ dí rígá náa numbaaʼ ndrígóo Gixa̱a̱, ikhú bi̱ mbaʼin xa̱bu̱ makáwíin índo̱ ikhaa gakiʼnáa kaʼñún xa̱bu̱ numbaaʼ. Nda̱wa̱á rí gájngoo majphú mba̱a̱ gaʼkhu, Jesús maxnúún ikha bi̱ gakáwíin náa tsu̱du̱u̱ ku̱ba̱ʼ “náa iyaʼ rí maʼni mbuya kámuu”. Atatsaʼwáminaʼ rí bi̱ phú mbaʼin xa̱bu̱ rígá mbá dí guáʼthi̱i̱n, dí ikhiin nditháan xákhañun, dí eʼwíinʼ na̱nguá ndiyáá (Juan 11:26).

¹² ¡Bi̱ eʼwíinʼ mugu̱ guáʼthi̱i̱n mbá rí mitsaanʼ wéñuʼ nda̱wa̱á, ikha jngó, nuxna̱a̱ núma̱a̱ Jeobá ga̱jma̱a̱ Jesús! Gajkhun má ikhiin na̱nguá nixtaʼwíin mu magún mekhuíí, mú raʼkháa rúʼko̱ eʼni rí xáguáʼdáá numún náa Jeobá. Bi̱ magúun mekhuíí ga̱jma̱a̱ bi̱ makuwa náa tsu̱du̱u̱ ku̱ba̱ʼ gi̱jyooʼ, ma̱ndoo muxnáá gamajkhu Dios ga̱jma̱a̱ Cristo. Mbá rí xóo ma̱ndoo muni, nindxu̱u̱ rí makuwíin índo̱ nagumariya̱a̱ʼ Conmemoración.

13, 14. Náá numuu rí xúgiáanʼ ndayóoʼ makuwáanʼ índo̱ nagumariya̱a̱ʼ rí xóo nikháñuu Cristo rá.

¹³ Náa nawi̱i̱n mbá mil xa̱bu̱ náa Conmemoración, ngu káaʼ mbawíí bi̱ na̱ʼkhu̱ pan ga̱jma̱a̱ naʼga̱a̱n vino. Xóo muʼthá mbaʼa congregación, nda̱wa̱a̱ nimbáa bi̱ maʼga̱a̱ mekhuíí. Nakujmaa kaʼwu rí itháan mbaʼin bi̱ nawi̱i̱n náa congregación kaʼñún makuwa náa tsu̱du̱u̱ ku̱ba̱ʼ. Mú, náá numuu dí nawi̱i̱n náa nagumariya̱a̱ʼ Conmemoración xá. Nagún ga̱jma̱a̱ numuu xóo nuni xa̱bu̱ índo̱ nagún náa  ndxa̱a̱ gatsigúnʼ ndrígóo mbáa bi̱ nambáxu̱u̱n gajmiún. Ikhiin nagún numuu rí nandún musngájma rí nandún mumbañún ga̱jma̱a̱ rí nandún kuñúún bi̱ munigu̱nʼ. Xúʼko̱ má kayuuʼ eni eʼwíinʼ mugu̱ nagún náa Conmemoración numuu rí nandún musngájma rí numbayíí ga̱jma̱a̱ rí nandún kuyáá Cristo gajmíi̱n bi̱ kaxtaʼwíin. Ma̱ngaa nakuwa numuu rí nusngájma dí nuxna̱a̱ nu̱ma̱a̱ tsigijñaʼ dí niʼni Jesús. Ma̱ngaa rúʼko̱ naniñúúnʼ dí ma̱ndoo makuwa kámuu náa tsu̱du̱u̱ ku̱ba̱ʼ.

¹⁴ I̱mba̱ dí gíʼdoo numuu dí eʼwíinʼ mugu̱ nawi̱i̱n o nagún náa Conmemoración numuu dí nunimbu̱ún dí niʼtañajúnʼ Jesús. Índo̱ Jesús nikuiʼtsu timbá aʼphu̱ gajmíi̱n discípulos ndrígio̱o̱, ikhaa niʼthúún: “Guni má xúʼko̱ rígi̱ mu marmáʼáan a̱jkia̱la kuyoʼ” (1 Cor. 11:23-26). Nakúwá má xúʼko̱ náa nagumariya̱a̱ʼ ganitsuwañu Señor numuu rí xóó kúwá tikhun bi̱ kaxtaʼwíin náa tsu̱du̱u̱ ku̱ba̱ʼ. Ma̱ngaa bi̱ eʼwíinʼ mugu̱ nutún xúgíinʼ makuwá náa Conmemoración gajmiún ikhiin.

15. Xú káʼnii gándoo muʼni mba̱a̱ Jeobá ga̱jma̱a̱ Cristo náa Conmemoración rá.

¹⁵ Náa Conmemoración ikhí nandoo nuʼni mba̱a̱ Dios ga̱jma̱a̱ Cristo índo̱ nuʼni ajmúú ga̱jma̱a̱ nuʼtájkáan. Náa discurso rí mixná tsiguʼ rígi̱ “¡Guxnáa núma̱a̱ Dios ga̱jma̱a̱ Cristo rí nini̱ ga̱jma̱a̱ numulú!”. Rúʼko̱ gáʼni rí maʼndulú muxnáa itháan núma̱a̱ Jeobá ga̱jma̱a̱ Cristo. Índo̱ ga̱ʼga̱ ranújngoo pan ga̱jma̱a̱ vino náa inulu maʼni marmáʼáan a̱jkiu̱lú dí nandoo gáʼthúu̱n xuyuuʼ ga̱jma̱a̱ eʼdiuu Jesús. Garmáʼáan a̱jkiu̱lú rí Jeobá niniñuuʼ dí A̱ʼdióo makhañúu mu xúʼko̱ ikháanʼ ma̱ndoo makáwáanʼ (Mat. 20:28). Xúgíinʼ bi̱ nandún kuyáá Jeobá ga̱jma̱a̱ A̱ʼdióo maʼndún makuwa náa Conmemoración.

16. Ndiéjunʼ dí nambríguii xóo káʼniún bi̱ magúun mekhuíí ga̱jma̱a̱ bi̱ makuwá náa tsu̱du̱u̱ ku̱ba̱ʼ rá.

¹⁶ Bi̱ kaxtaʼwíin ga̱jma̱a̱ eʼwíinʼ mugu̱ na̱nguá mixtiʼkuiin eʼyoo Dios xúgíinʼ guáʼdáá numún náa ikhaa. Numuu rí ikhaa niniñuuʼ dí A̱ʼdióo makhañúu mu xúʼko̱ ma̱ndoo maʼtsi̱i̱n bi̱ kaxtaʼwíin ga̱jma̱a̱ bi̱ eʼwíinʼ mugu̱. Mú dí naʼni mixtiʼkuiin, numuu rí eʼwíinʼ magúun mekhuíí ga̱jma̱a̱ eʼwíinʼ makuwíin náa tsu̱du̱u̱ ku̱ba̱ʼ. Mú, xúgíinʼ mbaʼyóoʼ makuwíin jmbu náa Dios ga̱jma̱a̱ náa Cristo (Sal. 31:23). Mú xi̱ʼ kaʼwu ndrígóo Dios ma̱ndoo mambáyúu ikháá má xúgíinʼ. Rígi̱ nandoo gáʼthúu̱n rí Jeobá naxnúu xi̱ʼ kaʼwu mámbáa xó má ndayóoʼ.

17. Ndiéjunʼ dí guáʼthi̱i̱n nda̱wa̱á bi̱ kaxtaʼwíin rá.

¹⁷ Bi̱ kaxtaʼwíin, índo̱ nagumiin raʼkháa núkhu ekanún rí magúun mekhuíí, rúʼko̱ ndayóoʼ rí Dios magiwa̱nʼ náa a̱jkiu̱ún. Nundxaʼwamíjná ga̱jma̱a̱ dí mundrígúu, nutajkháan  ga̱jma̱a̱ numuu rúʼko̱ ma̱ngaa ra̱ʼkhá tháán nandún mundrígúu dí magúun mekhuíí. Dí asndu tséʼngu̱u̱n gundxaʼwámíjná xóo gáʼni índo̱ gánindxu̱ún espíritu (Filip. 3:20, 21; 1 Juan 3:2). Maski ajndu xúʼko̱ nuguaʼthi̱i̱n mbuyáá Jeobá ga̱jma̱a̱ Jesús, ángeles, ma̱ngaa eʼwíinʼ bi̱ kaxtaʼwíin ga̱jma̱a̱ dí mundrígúu ñajunʼ náa Reino dí rígá mekhuíí.

18. Ndiéjunʼ guáʼthi̱i̱n bi̱ ni̱ndxu̱ún eʼwíinʼ mugu̱ rá.

¹⁸ Bi̱ eʼwíinʼ mugu̱ nduyamajkuíí dí nuguaʼthi̱i̱n xúgíinʼ, dí nda̱wa̱á makuwá kámuu mbiʼi náa tsu̱du̱u̱ ku̱ba̱ʼ (Ecl. 3:11). Ga̱jma̱a̱ ra̱ʼkhá tháán nadxún naguáʼthi̱i̱n maʼga̱nú mbiʼi rí ikhiin muñambáá, mu xúʼko̱ ma̱ndoo maʼni̱i̱ mitsaanʼ náa xúgíʼ numbaaʼ. Ma̱ngaa nadxún naguáʼthi̱i̱n maʼga̱nú mbiʼi rí ikhiin ma̱ndoo muni guʼwún, muduu ixi̱ ri̱ʼi̱ ga̱jma̱a̱ munimbani̱i̱ e̱jñún náa ní xáʼniun nandii (Is. 65:21-23). Ga̱jma̱a̱ naguáʼthi̱i̱n mbuyáá xúgíʼ dí rígá xóo, kúbá, xáxi̱ ga̱jma̱a̱ lamáa ma̱ngaa munigajmaa xúgíʼ dí Jeobá niʼniwíi. Mú rí itháan nanigu̱u̱nʼ ikhaa nindxu̱u̱ rí ma̱ndoo mambáxu̱u̱n itháan májánʼ gajmiún Jeobá ma̱ngaa dí makumún dí kúwá mijngii náa ikhaa.

19. Ndiéjunʼ dí naniñuuʼ maʼni mámbáa dí ikháanʼ índo̱ narígá Conmemoración ga̱jma̱a̱ nguáná gárígá tsiguʼ rígi̱ rá.

¹⁹ Jeobá nixnúu mámbáa xa̱bi̱i̱ mbá rí mitsaanʼ wéñuʼ rí magiʼthu̱u̱n maxtáa nda̱wa̱á (Jer. 29:11). Índo̱ nuʼniriyaaʼ dí nikháñuu Cristo, bi̱ kaxtaʼwíin ga̱jma̱a̱ bi̱ ni̱ndxu̱lú eʼwíinʼ mugu̱ ma̱ndoo musngajmá rí nuʼni mba̱a̱ Dios ga̱jma̱a̱ Cristo rí nini ga̱jma̱a̱ numulú mu xúʼko̱ ikháanʼ ma̱ndoo makuwáan kámuu mbiʼi. Índo̱ nuʼniriyaaʼ Conmemoración nindxu̱u̱ mbá mbiʼi rí itháan gíʼdoo numuu náa xúgíinʼ bi̱ ni̱ndxu̱ún cristianos gajkhun. Tsiguʼ 2021 maʼni mbá mbiʼi Sábado 27 ñajunʼ gu̱nʼ Marzo, nda̱wa̱á dí garámaaʼ a̱jkha̱ʼ. Tsiguʼ rígi̱ mbaʼin ma̱ndoo magimbíin, mú eʼwíinʼ magimbíin maski má kúwá ruxkúún o runi gíníín. Mú tikhun maʼniuu mingíjyúuʼ muniriyaaʼ numuu rí gajchún náa guʼwá e̱jua̱nʼ. Xúgíʼ congregación, grupo o mámbáa gáʼniriyaaʼ Conmemoración xó má nandoo Jeobá, Jesús ga̱jma̱a̱ xúgíinʼ bi̱ kúwá mekhuíí.