1. Ino makani aakapegwa kumuswaangano wacooko mu 1935 akamugwasya buti mwaalumi umwi uucili mwana-mwana?

MWAALUMI uucili mwana-mwana wakajisi myaka iili 18 ciindi naakabbapatizyigwa mu 1926. Bazyali bakwe bakali Basikwiiya Bbaibbele, oobo mbobakazyibidwe Bakamboni ba Jehova kuciindi eeco. Bakajisi bana basankwa botatwe alimwi abana basimbi bobilo, balo mbobakayiisya kubelekela Jehova Leza alimwi akwiiya Jesu Kristo. Kweelana ambocakabede kuli Basikwiiya Bbaibbele boonse kaindi, mwaalumi ooyo iwakacili mwana-mwana alimwi iwakali kusyomeka, wakali kulya cinkwa akunywa waini mwaka amwaka lya Mulalilo wa Mwami. Nokuba boobo, bulangizi bwakwe bwakacinca ciindi naakamvwa makani aatalubiki aakajisi mutwe wakuti, “Nkamu Mpati.” Makani aaya akapegwa amukwesu J. F. Rutherford mu 1935 kumuswaangano wacooko ku Washington, D.C., U.S.A. Ncinzi cakayubununwa kumuswaangano ooyo?

2. Nkasimpe nzi kakkomanisya ikakayubununwa mumakani aa Mukwesu Rutherford?

² Mumakani aakwe, Mukwesu Rutherford wakapandulula kujatikizya baabo ibakali kupanga “nkamu mpati” iyaambidwe kulugwalo lwa Ciyubunuzyo 7:9. Kusikila kuciindi eeco, Basikwiiya Bbaibbele bakali kuyeeya kuti nkamu mpati yakali nkamu yabantu ibakali kuyoounka kujulu, pele ibatakajisi lusyomo luyumu mbuli bananike. Mukwesu Rutherford wakabelesya Magwalo kupandulula kuti bankamu mpati tabasalidwe kuyoopona  kujulu, pele mbambelele zimbi zya Kristo * ibayoofwutuka “mapenzi mapati” alimwi akuyoopona anyika kukabe kutamani. (Ciy. 7:14) Jesu wakaamba kuti: “Ndilijisi mbelele zimbi izitali zyamucaanda eeci; azyalo eezyo ndeelede kuzileta alimwi ziyooswiilila jwi lyangu, eelyo ziyooba tanga lyomwe alimwi zinooli amweembezi omwe.” (Joh. 10:16) Bantu aaba ibali mbuli mbelele ninkamu ya Bakamboni ba Jehova basyomeka, ibajisi bulangizi bwakuyoopona kukabe kutamani mu Paradaiso anyika. (Mt. 25:31-33, 46) Lino atubone kumvwisya kwakasimpe kamu Bbaibbele ooku kupya mbokwakacinca buumi bwabantu ba Jehova banji, kubikkilizya amukwesu uulya iwakajisi myaka iili 18.—Int. 97:11; Tus. 4:18.

3-4. Kumuswaangano wamu 1935, ncinzi bantu banji ncobakamvwisya kujatikizya bulangizi bwabo, alimwi nkaambo nzi?

³ Cakali kukkomanisya kapati kumuswaangano ciindi mwaambi naakaambila baswiilizi kuti: “Aabo boonse ibajisi bulangizi bwakupona kukabe kutamani aano anyika abaimikile!” Mukwesu umwi iwakaliko kumuswaangano ooyo wakaamba kuti bantu bainda kucisela bakaimikila! Mpoonya Mukwesu Rutherford wakoompolola kati, “Amulange! Nkamu mpati!” Kuzwa waawo, baswiilizi boonse bakoompolola cakukondwa. Boonse aabo ibakaimikila bakazyiba kuti tiibakasalidwe kuyoopona kujulu. Bakazyiba kuti tiibakananikwa amuuya wa Leza. Buzuba bwakatobela amuswaangano, Bakamboni bapya ibali 840 bakabbapatizyigwa, bunji bwabo bakali bambelele zimbi.

⁴ Kuzwa ciindi eeco, mwaalumi uucili mwana-mwana iwaambwa kumatalikilo alimwi abamwi bakaleka kulya cinkwa alimwi akunywa waini lya Mulalilo wa Mwami. Banji bakalimvwa mbubwenya mbwaakalimvwa mukwesu umwi uulicesya iwakaamba kuti: “Lya Ciibalusyo camu 1935 nceciindi nondakaleka kulya cinkwa akunywa waini. Ndakalizyi kuti Jehova kunyina naakabelesya muuya wakwe uusalala kundipa bulangizi bwakuyoopona kujulu. Muciindi caboobo, ndijisi bulangizi bwakuyoopona anyika alimwi akugwasyilizya mukwiibamba kuti ibe paradaiso.” (Rom. 8:16, 17; 2Kor. 1:21, 22) Kuzwa ciindi eeco, bankamu mpati bavwula kapati alimwi babelekela antoomwe abananike basyeede. *

5. Ino Jehova ubabona buti aabo ibaleka kulya cinkwa akunywa waini lya Ciibalusyo?

⁵ Ino Jehova ubabona buti aabo ibakaleka kulya cinkwa akunywa waini lya Ciibalusyo nowakainda mwaka wa 1935? Alimwi ino mbuti Jehova mbwamubona Kamboni uubbapatizyidwe mazuba aano uusyoma kuti uleelede kulya cinkwa akunywa waini lya Mulalilo wa Mwami, pele kumbele wazyiba kuti kunyina naakananikwa amuuya uusalala? (1Kor. 11:28) Bamwi balalya cinkwa akunywa waini nkaambo tiibakabumvwisya bulangizi bwabo. Pele kuti bazumina kuti bakalubizya, akucileka kulya cinkwa akunywa waini, mpoonya bazumanana kubelekela Jehova cakusyomeka, mubwini uyoobatambula kabali cibeela cambelele zimbi. Nokuba kuti lino tabalyi cinkwa akunywa waini, balajanika ku Ciibalusyo nkaambo  balalumba kapati kucintu ncaakabacitila Jehova alimwi a Jesu.

6. Malailile nzi Jesu ngabapede bangelo?

⁶ Mbwaanga mapenzi mapati alaafwaafwi, inga catukulwaizya kubandika lugwalo lwa Ciyubunuzyo caandaano 7 ilwaamba makani aajatikizya Banakristo bananike alimwi ankamu mpati yambelele zimbi. Jesu ulailila bangelo kuti bazumanane kwiijata myuuwo yone yalunyonyooko. Tabeelede kwiilekezya myuuwo eeyo kubbubbula anyika kusikila mane Banakristo bananike boonse bakabikkwe ciganto, icitondezyo cakuti Jehova wababona kuti balasyomeka. (Ciy. 7:1-4) Akaambo kakusyomeka kwabo, banabokwabo Kristo bananike bayoopegwa bulumbu bwakuba bami abapaizi antoomwe anguwe kujulu. (Ciy. 20:6) Aboobo Jehova, Jesu alimwi abangelo bayookkomana kapati kubona bananike ibali 144,000 kabatambula bulumbu bwabo bwakujulu.

7. Kweelana a Ciyubunuzyo 7:9, 10, mbaani Johane mbaakabona mucilengaano, alimwi ino bakali kucita nzi? (Amubone cifwanikiso icili aacivwumbyo.)

⁷ Naakamana kwaamba kujatikizya bami abapaizi ibali 144,000, Johane wakabona cintu cimwi cikkomanisya, “nkamu mpati” iyakafwutuka a Amagedoni. Mukwiimpana ankamu yakusaanguna, nkamu eeyi yabili nimpati kapati nkaambo ijisi mweelwe wabantu uutabaliki. (Amubale Ciyubunuzyo 7:9, 10.) ‘Basamide zisani zilamfwu zituba,’ kutondezya kuti ‘tabakwe kabala kali koonse’ kamunyika ya Saatani alimwi bazumanana kusyomeka kuli Jehova Leza alimwi a Kristo. (Jak. 1:27) Baloompolola kuti bakafwutulwa akaambo kancaakabacitila Jehova alimwi a Jesu, Mwanaambelele wa Leza. Alimwi bajisi malala, icitondezya kuti calukkomano balazumina kuti Jesu Mwami uusalidwe a Jehova.—Amweezyanisye Johane 12:12, 13.

8. Ino lugwalo lwa Ciyubunuzyo 7:11, 12 lutwaambila nzi kujatikizya mukwasyi wa Jehova wakujulu?

⁸ Amubale Ciyubunuzyo 7:11, 12. Ino ncinzi cakacitika kujulu ciindi nobakabona nkamu mpati? Johane wakabona kuti boonse kujulu bakakkomana alimwi akutembaula Leza. Mukwasyi wa Jehova wakujulu uyookkomana kubona kuzuzikizyigwa kwacilengaano eeci, ciindi bankamu mpati baakuzwa mumapenzi mapati kabali baumi.

9. Kweelana alugwalo lwa Ciyubunuzyo 7:13-15, ino bankamu mpati bacita nzi lino?

⁹ Amubale Ciyubunuzyo 7:13-15. Johane wakalemba kuti bankamu mpati eeyo ‘bakawasya zisani zyabo zilamfwu akuzitubya mubulowa bwa Mwanaambelele.’ Eeci caamba kuti balijisi manjezeezya aasalala alimwi baliluleme mumeso aa Jehova. (Is. 1:18) Mbanakristo balyaabide, ibabbapatizyidwe, ibajisi lusyomo luyumu mucipaizyo ca Jesu alimwi ibajisi cilongwe a Jehova. (Joh. 3:36; 1Pet. 3:21) Akaambo kaceeci, baleelela kwiima kumbele lyacuuno ca Bwami ca Leza, alimwi ‘akubeleka mulimo uusetekene isyikati amasiku’ mulubuwa lwatempele lyakwe lyakumuuya anyika. Noliba lino, cabusungu balacita lubazu lupati mumulimo wakukambauka Bwami bwa Leza alimwi akugwasya bantu kuba basikwiiya, kubikka ziyandika zya Bwami bwa Leza mubusena bwakusaanguna.—Mt. 6:33; 24:14; 28:19, 20.

10. Ino bankamu mpati bajisi lusyomo nzi, alimwi ino ncisyomezyo nzi ncobayoobona kacizuzikizyigwa?

¹⁰ Bankamu mpati ibayoozwa mumapenzi mapati balijisi lusyomo lwakuti Leza uyoozumanana kubalanganya, nkaambo “ooyo uukkede acuuno cabwami uyoobavwumba atente lyakwe.” Cisyomezyo ncobali kulindila bankamu mpati ciyoozuzikizyigwa, icakuti: “[Leza] uyoosindula misozi yoonse kumeso aabo, alimwi lufwu talukabi limbi, akwalo koomoka,  kulila nokuba kucisa takukabi limbi pe. Zintu zyakaindi zyamana.”—Ciy. 21:3, 4.

11-12. (a) Kweelana alugwalo lwa Ciyubunuzyo 7:16, 17, nzilongezyo nzi nzyobabambilidwe bankamu mpati? (b) Ncinzi bambelele zimbi ncobakonzya kucita ku Ciibalusyo, alimwi nkaambo nzi?

¹¹ Amubale Ciyubunuzyo 7:16, 17. Aciindi cino, bantu ba Jehova bamwi balaanzala akaambo kakubula mali aakuula cakulya ncobayandika naa balajana mapenzi aaboola akaambo kamanyongwe ankondo. Bamwi balaangidwe akaambo kalusyomo lwabo. Nokuba boobo, bankamu mpati balikkomene kapati kuzyiba kuti baakufwutuka kulunyonyooko lwabweende bwazintu oobu bubyaabi, lyoonse banoojisi cakulya cakumuuya alimwi acakumubili cinji kapati. Ciindi lunyonyooko lwaakusikila bweende bwazintu bwa Saatani, bankamu mpati bayookwabililwa ‘kukutentwa akupya’ kwabukali bwa Jehova oobo mbwayootila kumasi. Aakwiinda mapenzi mapati, Jesu uyoobasololela bantu aaba ibayoofwutuka ‘kumaanzi aabuumi butamani.’ Amuciyeeyele buyo: Bankamu mpati bajisi bulangizi bulibedelede. Akati kamabbiliyoni aabantu boonse ibakaponede, balo kunyina nobayoofwa!—Joh. 11:26.

¹² Bambelele zimbi balijisi bulangizi bukkomanisya kapati alimwi balamulumba Jehova a Jesu! Nokuba kuti Jehova tanaakabasala kuyoopona kujulu, ulabayanda kapati mbubwenya mbwabayanda bananike. Bananike alimwi abambelele zimbi boonse balakonzya kumutembaula Leza a Kristo. Nzila imwi mbobacita oobo nkwiinda mukujanika ku Mulalilo wa Mwami.

13-14. Nkaambo nzi bantu boonse ncobeelede kujanika ku Ciibalusyo calufwu lwa Kristo?

¹³ Mazuba aano, akati kabantu ibali 1,000 ibajanika ku Ciibalusyo, kuyeeyelwa kuti omwe nguulya cinkwa akunywa waini. Mumbungano zinji kunyina uulya cinkwa akunywa waini lya Ciibalusyo. Bunji bwabantu ibajanika ku Ciibalusyo bajisi bulangizi bwakuyoopona anyika. Pele ino nkaambo nzi ncobajanika ku Mulalilo wa Mwami? Balacita oobo mbubwenya bantu ibajanika kumucado wabalongwe mbobacita. Balacita oobo akaambo kakuyanda kugwasyilizya basikukwatana alimwi akutondezya luyando ndobajisi kulimbabo. Mbubwenya buyo, bambelele zimbi balajanika ku Ciibalusyo akaambo  kakuti bayanda kugwasyilizya Kristo abananike, alimwi akutondezya luyando ndobajisi kulimbabo. Kuyungizya waawo, bambelele zimbi balajanika kutegwa batondezye kuti balalumba kucipaizyo ca Jesu, calo cipa kuti cikonzyeke kulimbabo kuyoopona kukabe kutamani anyika.

¹⁴ Akambi kaambo kayandika kapati ikapa kuti bambelele zimbi kabajanika ku Ciibalusyo, nkumvwida mulawo wa Jesu. Ciindi Jesu naakatalisya Mulalilo wa Mwami antoomwe abaapostolo bakwe basyomeka, wakabaambila kuti: “Kamucita oobu lyoonse kutegwa kamundiyeeya.” (1Kor. 11:23-26) Aboobo bambelele zimbi balazumanana kujanika ku Mulalilo wa Mwami kufwumbwa buyo kuti bananike kabaciliko aano anyika. Alimwi, bambelele zimbi balabatamba bantu boonse kutegwa baswaangane antoomwe ambabo ku Ciibalusyo.

15. Ncinzi ncotukonzya kucita kutegwa tumutembaule Leza alimwi a Kristo lya Ciibalusyo?

¹⁵ Lya Ciibalusyo, tulijisi coolwe cakutembaula Leza, kutondezya luyando alimwi akulumba Leza a Kristo ciindi notwiimba akupaila antoomwe. Mutwe wamakani aa Ciibalusyo mwaka uuno ngwakuti: “Amumulumbe Leza Alimwi a Kristo Akaambo Kancobakamucitila!” Makani aaya ayooyumya luyando lwesu kuli Jehova alimwi a Kristo. Aboobo ciindi zitondezya nozinooinzyigwa, tuyooyeeya kujatikizya ncoziiminina, nkokuti mubili wa Jesu alimwi abulowa bwakwe. Alimwi tuyooyeeya kujatikizya luyando ndwaakatondezya Jehova kulindiswe ciindi naakaaba Mwanaakwe kuti atufwide. (Mt. 20:28) Aboobo boonse ibamuyanda Taateesu wakujulu alimwi a Mwanaakwe bayookulwaizyigwa kujanika ku Ciibalusyo.

16. Muunzila nzi bananike alimwi abambelele zimbi mobeelene?

¹⁶ Munzila zimwi, bananike alimwi abambelele zimbi baleelene. Boonse Jehova ulabayanda. Eeci cili boobu akaambo kakuti muulo ngwaakabbadela kuula bananike alimwi abambelele zimbi uleelene, nkokuti buumi bwa Mwanaakwe ngwayandisya. Lwiindano luliko ndwakuti bajisi bulangizi bwiindene. Pele boonse beelede kuzumanana kusyomeka kuli Leza alimwi akuli Kristo. (Int. 31:23) Alimwi amuyeeye kuti, Jehova ulapa muuya wakwe uusalala ngwayandika muntu umwi aumwi, tacikwe makani naa muntu ooyo munanike naa ngwambelele zimbi.

17. Ncinzi bananike basyeede ncobalangila?

¹⁷ Banakristo bananike tabazyalwi kabajisi bulangizi bwakujulu. Leza ubapa buya bulangizi oobu. Balayeeya kujatikizya bulangizi bwabo, balabupailila alimwi baliyandide kutambula bulumbu bwabo bwakujulu. Tabazyi mboinoobede mibili yabo yamuuya kujulu.  (Flp. 3:20, 21; 1Joh. 3:2) Nokuba boobo, baliyandide kapati kuyoobonana a Jehova, Jesu, bangelo abananike bambi, alimwi akuyooba ambabo mu Bwami bwakujulu.

18. Ncinzi bambelele zimbi ncobalangila?

¹⁸ Bambelele zimbi bajisi bulangizi bwakuyoopona anyika mane kukabe kutamani, icintu ncobayanda bantu boonse. (Muk. 3:11) Balangila ciindi nobayoogwasyilizya kusandula nyika yoonse kuba paradaiso. Balangila ciindi nobayooyaka maanda aabo, kulima myuunda yabo alimwi akukomezya bana bajisi buumi bulondokede. (Is. 65:21-23) Balangila ciindi nobayakweendeeda mumasena manji aamunyika, kubona malundu, zisaka, lwaanje alimwi akwiiya kujatikizya zintu zyoonse nzyaakalenga Jehova. Pele cibakkomanisya kapati kwiinda, nkuzyiba kuti cilongwe cabo a Jehova ciyoozumanana kuyuma.

19. Ino Ciibalusyo citupa coolwe nzi toonse, alimwi ndilili nociyoocitwa mwaka uuno?

¹⁹ Jehova wakamupa bulangizi bubotu kapati umwi aumwi wababelesi bakwe balyaabide. (Jer. 29:11) Ciibalusyo calufwu lwa Kristo citupa coolwe cilibedelede toonse, cakutembaula Leza a Kristo akaambo kancobakatucitila kutegwa tukabe abuumi butamani. Ciibalusyo muswaangano uuyandika kapati ooyo Banakristo bakasimpe ngobacita mwaka amwaka. Uyoocitwa mu Mujibelo, mu March 27, 2021 lyaakubbila zuba. Mwaka uuno banji bayoocikonzya kujanika kumuswaangano ooyu uuyandika kapati kabaangulukide. Bamwi bayoocita oobo nokuba kuti balakazyigwa. Mpoonya bambi bayoocita Ciibalusyo kabali muntolongo. Kufwumbwa mbocinoobede, toonse atuzyibe kuti Jehova, Jesu, alimwi acibeela camukwasyi wa Leza wakujulu banoolangilila. Tacikwe makani naa muyooswaangana ambungano, kabunga naa nyolikke, amukaswaangane kabotu!