1. ¿Tuku titaxtulh chatum kgawasa akxni kgaxmatli akgtum taʼakgchuwin kʼasamblea nema tlawaka kkata 1935?

CHATUM kgawasa tiku xkgalhi 18 kata tamunulh kkata 1926. Xnatlatni xlikgalhtawakgananin Biblia xlitaxtukgo, chuna xkalilakgapaskan xtatayananin Jehová uma kilhtamaku. Xkgalhikgo kgalhtutu xlakgkgawasankan chu chatiy xlaktsumankan tiku xkamasiyanikgonit xlakata xtatayananin Jehová xlitaxtukgolh chu kstalanikgolh xliʼakxilhtit Jesucristo. Akgatunu kata uma kgawasa na xwa kaxtalanchu chu vino kTaway xla kiMalanakan, chuna la xtlawakgo xlikgalhtawakgananin Biblia uma kilhtamaku. Pero putum uma talakgpalilh akxni kgaxmatli taʼakgchuwin «lhuwa latamanin». Tala Joseph Rutherford mastalh uma taʼakgchuwin kkata 1935 kʼakgtum asamblea anta kkachikin Washington (Estados Unidos). ¿Tuku katsinikgolh xlikgalhtawakgananin Biblia kʼuma asamblea?

2. ¿Tuku xasasti lichuwinalh tala Rutherford kxtaʼakgchuwin?

² Kʼakgtum taʼakgchuwin, tala Rutherford lichuwinalh tiku xʼamakgo makgtapakgsikgo «lhuwa latamanin» nema lichuwinankan kʼApocalipsis 7:9. Uma kilhtamaku xlikgalhtawakgananin Biblia xlakpuwankgo pi uma grupo xʼama an kʼakgapun, pero ni lu xlipawankgo Dios chuna la xatalaksakni. Tala Rutherford maklakaskilh Biblia xlakata nalichuwinan pi tiku makgtapakgsikgo «lhuwa latamanin» ni kalaksakkanit xlakata nalatamakgo  kʼakgapun, wata litaxtukgo atanu xborregos * Cristo tiku nalakgtaxtukgo akxni lama nawan lhuwa tapatin chu putum kilhtamaku nalatamakgo kKatiyatni (Apoc. 7:14). Jesús malaknulh: «Kkgalhi amakgapitsi borregos nema ni unu tanumakgolh; xlakan na nakkalimin, chu nakgaxmatkgo kintachuwin, chu kgamputum borregos nalitaxtukgo chu kaj chatum mapuchwayanina naʼanan» (Juan 10:16). Kʼuma grupo makgtanumakgo xtatayananin Jehová tiku ni makgxtakgkgo Dios chu kgalhikgo takgalhkgalhin nalatamakgo putum kilhtamaku kKatiyatni kʼakgtum paraíso (Mat. 25:31-33, 46). Kaʼakxilhwi la kalakgpalinilh xlatamatkan lhuwa xtatayananin Jehová uma tuku xasasti, chu tala kgawasa tiku xkgalhi 18 kata (Sal. 97:11; Prov. 4:18).

3, 4. Kʼasamblea xla kata 1935, ¿tuku katsikgolh lhuwa mil natalan, chu tuku xlakata?

³ Tuku lu tlan xlakata uma asamblea wa akxni tala Rutherford xʼakgchuwinama chu kgalhskininalh: «¿Tlan xtayakgolh putum tiku kgalhikgo takgalhkgalhin pi putum kilhtamaku nalatamakgo kKatiyatni?». Chatum tala tiku xwi kʼasamblea uma kilhtamaku wa pi lata 20,000 tiku anta xwilakgolh akxilhli pi liwaka itat tayakgolh. Wa xlakata tiku xʼakgchuwinama wa: «¡Kakaʼakxilhtit lhuwa latamanin!». Uma kilhtamaku: lhuwa makgapakgxnankgolh chu lu lipaxuwakgolh. Tiku tayakgolh akgatekgskgolh pi ni xkalaksakkanit xlakata nalatamakgo kʼakgapun chu na ni xkalilaksakkanit espíritu santo. Lichali, 840 latamanin tamunukgolh kʼuma asamblea chu lhuwa umakgolh wa tiku xmakgtapakgsikgo kʼgrupo xla amakgapitsi borregos.

⁴ Lata uma kilhtamaku, kgawasa tiku lichuwinaw xapulana, chu lhuwa mil natalan nialh tsukukgolh wakgo vino chu kaxtalanchu kTaway xla kiMalanakan. Lhuwa xmakgkatsikgo la chatum tala tiku xataktujun wa: «Akxni lakapastakka akxni tinilh Cristo kkata 1935 wa xaʼawatiya kilhtamaku akxni kwalh kaxtalanchu chu vino. Kkatsilh pi Jehová ni xmaklakaskinit xʼespíritu santo xlakata xkiwanilh pi xaklatamalh kʼakgapun. Wata xakkgalhi takgalhkgalhin naklatama kKatiyatni chu xakmakgtayanalh xlakata akgtum paraíso xlitaxtulh» (Rom. 8:16, 17; 2 Cor. 1:21, 22). Lata uma kilhtamaku, grupo xla lhuwa latamanin chuntiya stakma chu akxtum taskujmakgo xatalaksakni tiku lamakgolhku kkatiyatni.

5. ¿La kaʼakxilha Jehová tiku nialh wakgo kaxtalanchu chu vino?

⁵ ¿La kaʼakxilha Jehová tiku nialh tsukukgolh wakgo kaxtalanchu chu vino akxni xtitaxtunita kata 1935? ¿Chu tuku kitaxtu komo chatum xtatayana Jehová wa kaxtalanchu chu vino xlakata lakpuwan pi xatalaksakni pero chuna la titaxtu kilhtamaku katsi pi ni chuna? (1 Cor. 11:28). Makgapitsi xwakgo kaxtalanchu chu vino xlakata xlakpuwankgo pi xʼamakgo ankgo kʼakgapun. Pero komo litayakgo pi nitlan tuku tlawamakgo, nialh wakgo kaxtalanchu chu vino, chu chuntiya skujnanikgo Jehová chu ni makgatsankgananikgo, xla nakamakgamakglhtinan xlakata namakgtapakgsikgo kʼgrupo xla amakgapitsi borregos. Maski nialh nawakgo kaxtalanchu chu vino akxni talakapastaka akxni tinilh Cristo, chuntiya ankgo uma kilhtamaku xlakata lu paxtikatsinikgo tuku Jehová chu Jesús tlawakgonit xpalakatakan.

6. ¿Tuku kalimapakgsi Jesús xʼángeles?

⁶ Xlakata lhuwa tapatin lu lakatsu wi. Wa xlakata lu tlan nawan komo tlakg nakatsiyaw tuku wan Apocalipsis, capítulo 7, xlakata  xatalaksakni kstalaninanin Cristo chu xlakata lhuwa latamanin tiku makgtapakgsikgo atanu borregos. Anta wan pi kalimapakgsi ángeles pi chuntiya xmalakgachokgokgolh un nema malakgsputunan chu minkgoyacha klakatati xchastunin katiyatni. Ni xlimastatkan talakaskin pi naunan kKatiyatni asta akxni putum xatalaksakni kawilinikanit nawan sello, uma wamputun asta akxni Jehová nakamakgamakglhtinan (Apoc. 7:1-4). Xlakata ni makgxtakgkgo Dios, xatalaksakni xnatalan Cristo mapakgsinanin chu sacerdotes nalitaxtukgo kʼakgapun, wa uma xtatlajakan (Apoc. 20:6). Jehová, Jesús chu ángeles lu napaxuwakgo akxni 144,000 tiku xatalaksakni namakglhtinankgo xtatlajakan kʼakgapun.

7. Chuna la wan Apocalipsis 7:9, 10, ¿tiku kaʼakxilhli Juan, chu tuku xtlawamakgo? (Kaʼakxilhti xmakni revista).

⁷ Akxni Juan xkalichuwinanita 144,000 mapakgsinanin chu sacerdotes, akxilha tuku kaks malakawaninan: «lhuwa latamanin» tiku lakgtaxtukgo kʼArmagedón. Uma xliʼakgtiy grupo tlakg lhuwa nixawa xapulana grupo chu ni takatsi la xlilhuwa (kalikgalhtawakga Apocalipsis 7:9, 10). «Xlilhakganankgonit laklhman laksnapapa lhakgat», uma wamputun pi ni litaxkajwikgonit xkakilhtamaku Satanás chu nikxni makgxtakgkgonit Dios chu Cristo (Sant. 1:27). Pixlanka wankgo pi lakgtaxtukgo xlakata tuku tlawakgonit Jehová chu Jesús, xborrego Dios. Nachuna, linkgo xpakgan mokgot nema limasiya pi xatapaxuwan makgamakglhtinankgo Jesús la xMapakgsinakan tiku Jehová laksaknit (katamalakxtupi Juan 12:12, 13).

8. ¿Tuku wan Apocalipsis 7:11, 12 xlakata xfamilia Jehová xalak akgapun?

⁸ Kalikgalhtawakga Apocalipsis 7:11, 12. ¿Tuku tlawakgolh tiku xwilakgo kʼakgapun akxni akxilhkgolh lhuwa latamanin? Juan akxilha pi putum paxuwakgo chu maxkikgo kakni Dios akxni akxilhkgo lhuwa latamanin, Jehová chu xfamilia xalak akgapun lu napaxuwakgo akxni naʼakxilhkgo la nakgantaxtu uma tuku akxilhli Juan akxni lhuwa latamanin nalakgtaxtukgo akxni kama nawan lhuwa tapatin.

9. Chuna la wan Apocalipsis 7:13-15, ¿tuku tlawamakgo lhuwa latamanin?

⁹ Kalikgalhtawakga Apocalipsis 7:13-15. Juan wan pi tiku makgtapakgsikgo kʼgrupo xla lhuwa latamanin «chakgakgonit laklhman klhakgatkan chu limasnapapikgonit xkgalhni Borrego». Uma wamputun pi tlan wi xtalakapastaknikan chu pi makgapaxuwakgo Jehová (Is. 1:18). Umakgolh kstalaninanin Cristo tamakamastakgonit chu tamunukgonit, lu kanajlanikgo xtamakamastan Jesús chu xʼamigos Jehová litaxtukgo (Juan 3:36; 1 Ped. 3:21). Wa xlakata, tlan tayakgo kxlakatin kxputawilh Dios niku mastakgo “xasanto xtaskujutkan tantaku chu tantaskaka” anta kxkilhtin kxtemplo nema wi kkatiyatni. La uku, xatapaxuwan liskujkgo nalichuwinankgo Dios chu namakgalhtawakgenankgo, xlakata xTamapakgsin Dios wa tuku tlakg xlakaskinka xpalakatakan (Mat. 6:33; 24:14; 28:19, 20).

10. ¿Tuku liwana katsikgo tiku makgtapakgsikgo kʼgrupo xla lhuwa latamanin, chu tuku tamalaknun naʼakxilhkgo pi nakgantaxtu?

¹⁰ Tiku makgtapakgsikgo kʼgrupo xla lhuwa latamanin, liwana katsikgo pi Dios chuntiya nakakuentajtlawa akxni titaxtunita nawan lhuwa tapatin, xlakata Biblia wan pi «tiku wi kpumapakgsin nakakuentajtlawa». Nachuna, nakgantaxtu uma stlan tamalaknun nema lhuwata kilhtamaku kgalhkgalhimakgo amakgapitsi borregos: «Chu nakaxakani putum xlakgpixtajatkan, chu nialh katiʼanalh linin, nialh katiʼanalh talipuwan, tatasa chu takatsanajwa» (Apoc. 21:3, 4).

11, 12. 1) Chuna la wan Apocalipsis 7:16, 17, ¿tuku tasikulunalin kakgalhkgalhima lhuwa latamanin? 2) Akxni natalakapastaka akxni tinilh Cristo, ¿tuku tlan natlawakgo amakgapitsi borregos chu tuku xlakata chuna natlawakgo?

¹¹ Kalikgalhtawakga Apocalipsis 7:16, 17.  La uku, makgapitsi kskujnin Jehová patinamakgolh xlakata anan tatsinksni, ni anan tumin o xlakata anan taʼakglhuwit chu guerra. Amakgapitsi tanumakgolh kpulachin xlakata xtakanajlakan. Pero tiku makgtapakgsikgo kʼgrupo xla lhuwa latamanin paxuwakgo akxni katsikgo pi akxni namasputukan uma xalixkajnit kakilhtamaku tlan nalakgtaxtukgo, putum kilhtamaku nakgalhikgo tuku nawakgo chu tuku xla xtakanajlakan. Akxni Jehová namasputu xalixkajnit xkakilhtamaku Satanás, nakakuentajtlawa lhuwa latamanin xlakata nitu nakatlawani xtasitsi nema xtachuna la “lhkakna”. Akxni titaxtunita nawan lhuwa tapatin, Jesús nakapulalin niku wi «chuchut nema masta latamat» nema ni kgalhi xlisputni. Kalilakpuwanti xastlan takgalhkgalhin nema kgalhikgo lhuwa latamanin: maski lhuwa millón latamanin latamakgonit kKatiyatni, kajwatiya amakgapitsi borregos tiku nikxni katinikgolh (Juan 11:26).

¹² Amakgapitsi borregos lu paxtikatsinikgo Jehová chu Jesús xlakata lu xastlan xtakgalhkgalhinkan. Maski Jehová ni kalaksakli xlakata nalatamakgo kʼakgapun, lu kapaxki chu xtapalh kaʼakxilha chuna la xatalaksakni. Chuna la xatalaksakni kakninanikgo Jehová, amakgapitsi borregos na tlan malankikgo Dios chu Cristo, chu pulaktum la chuna tlawakgo wa akxni ankgo kTaway xla kiMalanakan.

13, 14. ¿Tuku xlakata kimputumkan kiliʼanatkan akxni lakapastakkan akxni tinilh Cristo?

¹³ Umakgolh kata, lata 1,000 tiku ankgo akxni lakapastakkan akxni tinilh Cristo, tlan nawanaw pi max chatum tiku way kaxtalanchu chu vino. Uma wamputun pi ni putum kcongregaciones anan tiku way kaxtalanchu chu vino. Lhuwa tiku ankgo akxni lakapastakkan akxni tinilh Cristo kgalhikgo takgalhkgalhin xlakata nalatamakgo kKatiyatni. ¿Pero tuku xlakata ankgo? Uma xtachuna akxni lhuwa latamanin ankgo niku tamakgaxtokgmaka. Ankgo xlakata nakalimasiyanikgo xtapaxkitkan tiku tamakgaxtokgmakgo. Nachuna, tiku makgtapakgsikgo kʼgrupo xla amakgapitsi borregos ankgo akxni lakapastakkan akxni tinilh Cristo xlakata kalimasiyaniputunkgo Cristo chu xatalaksakni pi kapaxkikgo chu pi katatayakgo.

¹⁴ Atanu tuku xlakata amakgapitsi borregos ankgo akxni lakapastakkan akxni tinilh Cristo wa xlakata nakgalhakgaxmatkgo xlimapakgsin Jesús. Akxni xla katalakkaxwililh xʼapóstoles uma taway, kawanilh: «Chuntiya katlawatit  uma xlakata nakililakapastakatit» (1 Cor. 11:23-26). Wa xlakata amakgapitsi borregos chuntiya naʼankgo akxni nalakapastakkan akxni tinilh Cristo xlakata chuntiyaku anankgo kKatiyatni tiku xatalaksakni. Nachuna, kawanikgo putum latamanin xlakata na naʼankgo kʼuma lu xlakaskinka kilhtamaku.

15. ¿La tlan chatunu akinin namalankiyaw Dios chu Cristo akxni nalakapastakkan akxni tinilh Cristo?

¹⁵ Akxni nalakapastakkan akxni tinilh Cristo, nakgalhiyaw talakgalhaman namalankiyaw Dios chu Cristo akxni akxtum nakilhtliyaw chu natlawayaw oración. Taʼakgchuwin xla uma kata wanikan: «Kalimasiyaw pi paxtikatsiniyaw tuku Dios chu Cristo tlawakgonit kimpalakatakan». Akxni nakgaxmataw, tlakg napaxtikatsiniyaw Jehová chu Cristo. Akxni namatitaxtikan kaxtalanchu chu vino, tiku anta wilaw nawan tlan nalakapastakaw tuku kilhchanima pulakatunu uma: xtiyatliwa chu xkgalhni Jesús. Na kalakapastakwi pi Jehová mastalh talakaskin pi xKgawasa xnilh xlakata tlan xkgalhiw latamat (Mat. 20:28). Putum tiku paxkikgo kinTlatkan xalak akgapun chu xkgawasa naʼankgo akxni nalakapastakkan akxni tinilh Cristo.

16. ¿Tuku wamputun pi tiku xatalaksakni chu amakgapitsi borregos xlakxtumkan?

¹⁶ Tiku xatalaksakni chu amakgapitsi borregos, Dios akxtum xlakaskinka kaʼakxilha. Lakxtum kapaxki umakgolh akgtiy grupo. Chu watiya xtapalh lixokgolh, xlatamat xkgawasa, xlakata xkatamawaxtulh xatalaksakni chu amakgapitsi borregos. Tuku litalakgpalikgo wa pi tanu tanu takgalhkgalhin kgalhikgo, pero talakaskin pi umakgolh pulaktiy ni namakgatsankgananikgo Dios chu Cristo (Sal. 31:23). Chu kalakapastakwi pi Dios tlan tlawa pi putum kskujnin nalitamakgtayakgo espíritu santo. Jehová tlan namaxki xʼespíritu santo chatum lataman chuna la maklakaskin, maski xatalaksakni o amakgapitsin borregos.

17. ¿Tuku kgalhkgalhimakgo xatalaksakni pi kalalh?

¹⁷ Tiku xatalaksakni ni lakachinkgo xlakata naʼankgo kʼakgapun, wa Jehová tiku wili uma takgalhkgalhin kxnakujkan. Xlakan lilakpuwankgo xtakgalhkgalhinkan, lichuwinankgo uma kxʼoracioneskan chu lu makglhtinamputunkgo xtatlajakan kʼakgapun. Chu maski nila lilakpuwankgo la nawan xmaknikan xaʼespíritual, kgalhkgalhikgo akxni makxtum natalakgo Jehová, Jesús, ángeles chu amakgapitsi tiku xatalaksakni, chu la nalakgatayakgo tuku kalakgchan kʼakgapun (Filip. 3:20, 21; 1 Juan 3:2).

18. ¿Tuku lu kgalhkgalhimakgo amakgapitsi borregos?

¹⁸ Amakgapitsi borregos kgalhkgalhimakgo nalatamakgo putum kilhtamaku kKatiyatni. Uma wa tuku putum latamanin lakaskinkgo (Ecl. 3:11). Lu kgalhkgalhimakgo pi xchilha kilhtamaku akxni tlan namakgtayanankgo xlakata putum Katiyatni akgtum paraíso nawan,  chu tlan natlawakgo xchikkan, natlawakgo xjardineskan, chu nakamakgastakkgo xkamanankan tiku nialh katitatatlakgolh (Is. 65:21-23). Lu amputunkgo paxialhnankgo kxlikalanka Katiyatni, akxilhputunkgo sipi, kakiwin chu pupunu, chu tlakg liwana lakgapasputunkgo xalakstlan xtamalakatsukin Jehová. Pero tuku tlakg kamakgapaxuwa wa pi chuna la talalinkgo Jehová tlakg natatliwakglha.

19. Akxni natalakapastaka akxni tinilh Cristo, ¿tuku kinkamaxkiyan talakaskin natlawayaw, chu tuku kilhtamaku natlawakan uma kata?

¹⁹ Jehová kamaxkinit chatunu xlakskujnin tiku tamakamastanikgonit akgtum lu stlan takgalhkgalhin (Jer. 29:11). Akxni talakapastaka akxni tinilh Cristo kimputumkan kgalhiyaw talakaskin nakamalankiyaw Jehová chu Cristo xlakata tuku tlawakgonit xlakata tlan nalatamayaw putum kilhtamaku. Xlikana pi akxni talakapastaka akxni tinilh Cristo wa tlakg xlakaskinka tamakxtumit xpalakata xaxlikana kstalaninanin Cristo. Kkata 2021, natlawakan sábado 27 xla marzo akxni tsankganita nawan Chichini. Uma kata, lhuwa tiku tlan naʼankgo kʼuma lu xlakaskinka tamakxtumit xlakata kamaxkikan talakaskin, amakgapitsi na natlawakgo maski titaxtumakgo taputsastalanit chu amakgapitsi natlawakgo kpulachin. Xlakata Jehová, Jesús chu ángeles kinkaʼakxilhmakgon lata kʼakgapun, putum congregaciones, grupos chu lhuwa latamanin kalipaxuwakgolh uma lu xlakaskinka kilhtamaku.