1. Кызьы егит агайлэн улонэз воштӥськиз, куке со 1935-тӥ арын конгресс дыръя одӥг речез кылӥз?

 ОДӤГ конгрессын егит агай кылӥз сое, мар солэсь улонзэ чутрак воштӥз. Со пылатӥськиз 1926-тӥ арын, куке солы 18 арес вал. Солэн анаез но атаез, озьы ик вын-агайёсыз но сузэр-апайёсыз Библиез Эскерисьёс вал (соку озьы нимаськизы Иеговалэн Адӟись-Ивортӥсьёсыз). Котькуд аре Иисус Христослэсь кулонзэ Тодэ ваён ӝытанын, мукет Библиез Эскерисьёс сямен, со нянь сииз но вина юиз. Но ваньмыз воштӥськиз, куке 1935-тӥ арын Вашингтон карын ортчись конгрессын со кылӥз Рутерфорд агайлэсь «Туж-туж трос калык» речьсэ. Мар сярысь вераськиз со конгрессын?

2. Кыӵе кулэ луись зэмлык сярысь вераз Рутерфорд агай?

² Речьсэ веракуз, Рутерфорд агай валэктӥз, кинъёс пырозы «туж-туж трос калык» пӧлы, кудӥз сярысь вераське Усьтӥськонын 7:9. Со конгресс дырозь малпазы, та адямиос инме ӝутскозы шуыса, соос 144 000 адямиос кадь туж ик оскымонэсь ӧвӧл ке но. Нош Рутерфорд агай Библия вылэ пыкиськыса валэктӥз: «Туж-туж трос калык» — со Христослэн мукет ыжъёсыз b, кудъёсыз «туж бадӟым курадӟон-куректон  пыр» потозы но музъем вылын улозы (Усьт. 7:14). Иисус вераз: «Вань на Мынам мукет ыжъёсы но, кудъёсыз та азбарысь ӧвӧл, соосты но Мыным вайыны кулэ: соос но Мынэсьтым куараме кылозы,— соку луоз одӥг уллё, одӥг Возьмась» (Иоанн 10:16). Адямиос, кудъёссэ Иисус ыжъёсын ӵошатӥз,— со Иеговалэн Адӟись-Ивортӥсьёсыз, кудъёсыз Инмарлы оскымон ужало-тыршо но рай музъем вылын улыны оско (Матф. 25:31—33, 46). Ойдолэ учкомы, кызьы Библиысь та зэмлыкез выль сямен валан Иеговалэн тросэзлэсь ужась-тыршисьёсызлэсь улонзэс воштӥз, озьы ик та егит агайлэсь но (Пс. 96:11; Мад. 4:18).

3, 4. Мае валазы трос сюрс агайёс но сузэръёс 1935-тӥ арын ортчем конгрессын но мар соослы юрттӥз тае валаны?

³ Со паймымон конгрессэ ог 20 000 адямиос лыктӥзы. Джозеф Рутерфорд соосты куриз: «Курисько, султэ ваньды, кинъёс оско музъем вылын пырак дауръёс ӵоже улыны». Одӥг адями, кудӥз со конгрессын вал, вераз, лыктэмъёс пӧлысь ӝыныезлэсь тросгес султӥзы шуыса. Собере Рутерфорд агай бадӟым куараен шуиз: «Учке! Тани туж-туж трос калык!» Тае кылыса, лыктэмъёс шумпотыса чабыны кутскизы. Соос, кинъёс султӥзы, валазы, Иегова соосты инмын улыны ӧз бырйы но святой духеныз ӧз зырӟы шуыса. Конгресслэн мукет нуналаз 840 выль Адӟись-Ивортӥсьёс пылатӥськизы. Соос пӧлысь тросэз мукет ыжъёс пӧлы пыризы.

⁴ «Туж-туж трос калык» речь бере егит агай, кудӥз сярысь вераськиз ини, но трос мукет христианъёс Ӝытанын нянь сиемысь но вина юэмысь дугдӥзы. Тани кызьы одӥг зӥбыт-востэм агай вераз со сярысь, мае шӧдӥзы Иеговалэн тросэз ужась-тыршисьёсыз: «1935-тӥ арын ортчем Ӝытанын мон берпуметӥзэ нянь сии но вина юи. Мон валай, Иегова монэ инмын улон понна святой духеныз ӧз зырӟы шуыса. Со мыным оскон кузьмаз музъем вылын улыны но сое райлы пӧрмытыны» (Рим. 8:16, 17; 2 Кор. 1:21, 22). Со дырысен туж-туж трос калыклэн лыдыз будэ. Со калык мылысь-кыдысь тырше зырӟем христианъёс пӧлысь кылемъёсыныз c.

5. Кызьы Иегова учке соос шоры, кинъёс Ӝытанын нянь сиемысь но вина юэмысь дугдӥзы?

⁵ Кызьы Иегова учке соос шоры, кинъёс 1935-тӥ ар бере Ӝытанын нянь сиемысь но вина юэмысь дугдӥзы? Мар Инмар малпа пылатӥськем Адӟись-Ивортӥсьёс сярысь, кудъёсыз асьме нуналъёсы Ӝытанын нянь сиё но вина юо вал, нош берлогес валазы, соос святой духен зырӟемын ӧвӧл шуыса? (1 Кор. 11:28). Соос пӧлысь куд-огъёсыз шонертэм малпазы со сярысь, кыӵе соослэн осконзы. Но соос янгышсэс валазы ке, Ӝытанын нянь сиемысь но вина юэмысь дугдӥзы ке но Иеговалы оскымон ужаны-тыршыны азьланьто ке, соос оскыны быгато, мукет ыжъёс пӧлы пырозы шуыса. Та христианъёс Ӝытанын нянь уг сиё но вина уг юо ке но, соос та пумиськонэ лыкто, малы ке шуоно туж тау каро Иеговалы но Иисуслы ваньмыз понна, мае соос соослы лэсьтӥзы.

6. Мар карыны косӥз Иисус кылчинъёсты?

⁶ Ми улӥськомы бадӟым куректон вуон азьын, соин ик милесьтым мылкыдмес  ӝутыны быгатэ со, мар гожтэмын Усьтӥськон книгаысь 7-тӥ люкетын зырӟем христианъёс сярысь но туж-туж трос мукет ыжъёс сярысь. Та книгаын гожтэмъя, Иисус кылчинъёсты косэ бырон вайись ньыль тӧлъёсты кутыса возьыны. Соослы уг яра та тӧлъёсты музъем вылэ лэзьыны со дырозь, куке вань зырӟем христианъёслы печать пуктэмын луоз, яке со дырозь, куке Иегова ужпум кутоз, та христианъёс солы оскымон луэмзэс возьматӥзы шуыса (Усьт. 7:1—4). Оскымон луэмзы понна Инмар зырӟем христианъёсты бакель кароз: Христосэн ӵош соос инмын эксэйёс но священникъёс луозы (Усьт. 20:6). Иегова, Иисус но кылчинъёс туж шумпотозы, куке 144 000 зырӟем христианъёс инме ӝутскозы.

7. Усьтӥськонын 7:9, 10 гожтэмъя, мае эшшо адӟиз на Иоанн? (Учке вылбамысь суредэз.)

⁷ Иоанн, 144 000 эксэйёс но священникъёс сярысь верамез бере, мае ке паймымонзэ адӟе — «туж-туж трос калыкез», кудӥз Армагеддон пыр потӥз. Зырӟем христианъёсын ӵошатыса, та адямиос тросгес луо. Иоанн гожтэ, «соосты нокин но лыдъяны ӧз быгаты» шуыса. (Лыдӟе Усьтӥськонэз 7:9, 10.) Та адямиос дӥсяськемын «тӧдьы дӥськутэн», кудӥз возьматэ, соос Шайтан дуннелэн ужъёсыныз ӧз саптаське но Инмарлы но Христослы оскымон кылизы шуыса (Иак. 1:27). Соос бадӟым куараен верало: «Престол вылын пукись Инмармылэн но Ыжпилэн кияз утиськон!» Соослэн киосазы пальма вайёс, кудъёсыз возьмато: соос шумпото, Иегова Иисусэз эксэе пуктӥз шуыса. (Ӵошатэ Иоаннлэсь 12:12, 13.)

8. Мар вераське Иеговалэн инмысь семьяез сярысь Усьтӥськонын 7:11, 12?

⁸ Лыдӟе Усьтӥськонэз 7:11, 12. Нош мар луэ та дыре ик инмын? Иоанн гожтэ, туж-туж трос калыкез адӟыса, Иеговалэн инмысь быдэс семьяез шумпотэ но Инмарез данъя шуыса. Иегова но инмысь оскымон кылдытэмъёсыз шумпотозы адӟыны та адӟытонлэсь быдэсмемзэ, куке туж-туж трос калык, Армагеддон пыр потыса, улэп кылёз.

9. Усьтӥськонын 7:13—15 гожтэмъя, мар каре туж-туж трос калык?

⁹ Лыдӟе Усьтӥськонэз 7:13—15. Иоанн гожтӥз, туж-туж трос калык пӧлысь адямиос «Ыжпилэн вирыныз... дӥськутсэс миськизы, чылкыт, тӧдьы каризы» шуыса. Со возьматэ: соослэн чылкыт возьытлыксы но Иегова соосты шонерлыкоесь шуыса лыдъя (Ис. 1:18). Соос, кинэ адӟиз Иоанн,— Инмарлы сӥзиськем пылатӥськем христианъёс. Соос Иисус Христослэн курбонэзлы юн оско но, соослэн Иеговаен умой кусыпъёссы (Иоанн 3:36; 1 Пётр 3:21). Соин ик Инмар лэзиз соослы престолэз азьын сылыны, озьы ик «уй но нунал» солы музъем вылын ужаны-тыршыны. Тодытон но дышетскисьёсты дасян ужлэсь самой бадӟым люкетсэ соос быдэсто, малы ке шуоно Инмарлэн Эксэйлыкез соос понна тужгес но валтӥсез луэ (Матф. 6:33; 24:14; 28:19, 20).

10. Кыӵе осконзы вань туж-туж трос калык пӧлысь адямиослэн но кыӵе кылъёслэсь быдэсмемзэс соос адӟозы?

¹⁰ Туж-туж трос калык, кудӥз бадӟым куректон пыр потэ, юн оске, Инмар соос сярысь азьланяз но сюлмаськоз шуыса, малы ке шуоно Иоанн вераз: «Престол вылын Пукись соос пушкы улыны интыяськоз». Соку мукет ыжъёс адӟозы, кызьы быдэсмозы та кылъёс: «Инмар соослэн син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ» (Усьт. 21:3, 4).

11, 12. а) Усьтӥськонын 7:16, 17 гожтэмъя, кызьы азьланяз бакель каремын луоз туж-туж трос калык? б) Малы мукет ыжъёс Ӝытанэ лыкто но мар соослэсь мылкыдзэс ӝутэ отчы лыктыны?

 ¹¹ Лыдӟе Усьтӥськонэз 7:16, 17. Туннэ Иеговалэн куд-ог ужась-тыршисьёсыз коньдонэн герӟаськем шуг-секытъёс сэрен, бугыръяськонъёс но ожмаськонъёс сэрен сютэм уло. Нош куд-огъёсыз осконзы понна пытсэтын пуко. Озьы ке но соос шудоесь, малы ке шуоно тодо: та лек дуннеез быдтыку, улэп кылёзы, азьланяз соослэн тырмыт сиёнзы луоз но Иеговалэсь юрттэмзэ котьку адӟыны быгатозы. Иоанн гожтӥз, соосты «нокыӵе ӵушкась пӧсь но уз ни суты» шуыса. Та возьматэ, куке Иегова Шайтанлэсь лек дуннезэ быдтоз но вань калыкъёс вылэ вожпотонзэ кисьтоз, ужась-тыршисьёсыз пӧлысь одӥгезлы но изъян ваемын уз луы шуыса. Соосты, кинъёс бадӟым куректон дыръя улэп кылёзы, Иисус «улэп вуэн ошмесъёс доры... нуллоз». Малпалэ гинэ, кыӵе паймымон осконэз вань туж-туж трос калыклэн: трос миллиард адямиосын ӵошатыса, кудъёсыз куке но музъем вылын улӥзы, соос ноку уз кулэ! (Иоанн 11:26).

¹² Мукет ыжъёс Иеговалы но Иисуслы тау каро вуоноезлы туж умой осконзы понна. Соос инмын улыны быръемын ӧвӧл ке но, Иегова понна сыӵе ик дуноесь. Зырӟем христианъёс но, мукет ыжъёс но Инмарез но Христосэз данъяны быгато. Сое лэсьтыны одӥгез луонлык — Тодэ ваён ӝытанэ лыктыны.

13, 14. Малы мукет ыжъёс но, зырӟем христианъёс но Иисус Христослэсь кулонзэ Тодэ ваён ӝытанэ лыктыны кулэ?

¹³ Берло аръёсы соос, кинъёс Ӝытанын нянь сиё но вина юо, сюрс поллы ӧжытгес соослэсь, кинъёс та пумиськонэ огшоры гинэ лыкто. Ӵем дыръя кенешъёсын ӧвӧл соос, кинъёс Ӝытанын нянь сиё но вина юо. Лыктэмъёс пӧлысь тросэз музъем вылын улыны оско. Соку малы соос Ӝытанэ лыкто? Соослэн сыӵе ик мылкыдзы, кыӵе милям мылкыдмы луэ, куке ми эшъёсмылэн сюаназы лыктӥськомы. Милям возьматэммы потэ, ми соосты яратӥськомы но соослы юрттыны дась шуыса. Озьы ик мукет ыжъёс но Ӝытанэ лыкто, малы ке  шуоно соос Христосэз но зырӟем христианъёсты ярато но соослы юрттыны дась. Со сяна, Ӝытанэ лыктыса, мукет ыжъёс тау каремзэс возьмато Иисус Христослэн мозмытӥсь курбонэз понна, кудӥзлы луыса соос музъем вылын пырак дауръёс ӵоже улыны быгатозы.

¹⁴ Вань на эшшо одӥг кулэ луись муг, малы соос Ӝытанэ лыкто. Соос быдэсто Иисус Христослэсь курон-косонзэ. Куке Иисус Ӝытанэз пусйыны косӥз, оскымон апостолъёсызлы со вераз: «Монэ буре вайыса, тазьы каре» (1 Кор. 11:23—26). Соин ик, зырӟем христианъёс пӧлысь одӥгез ке но музъем вылын улытозь, «мукет ыжъёс» Ӝытанэз пусъёзы но отчы мукетъёссэ ӧтёзы.

15. Кызьы ми пӧлысь котькудӥз Тодэ ваён ӝытанын Инмарез но Христосэз данъяны быгатэ?

¹⁵ Ӝытанын милям луонлыкмы вань Иеговаез данъяны кырӟаса, вӧсяськыса, тау карыса ваньмыз понна, мае Инмар но Христос ми понна лэсьтӥзы. Нош Библия вылэ пыкиськыса дасям речь юрттоз милемлы инмысь Атаймылы но солэн Пиезлы тау карон мылкыдмес будэтыны. Таяз арын со речь нимаськоз «Дунъялэ ваньзэ, мае Инмар но Христос тӥ понна лэсьтӥзы!». Киысь кие винаез но нянез сётыкуды, кудъёсыз Иисуслэсь мугорзэ но вирзэ возьмато, ми малпаськомы, макем бадӟым яратонзэ Иегова милемлы возьматӥз, куке аслэсьтыз Пизэ музъем вылэ ыстӥз, со ми понна мед кулоз шуыса, нош ми улыны мед быгатомы шуыса (Матф. 20:28). Ваньмыз, кинъёс инмысь Атаймес но солэсь Пизэ ярато, Тодэ ваён ӝытанэ одно ик лыктозы.

16. Мар огкадез вань зырӟем христианъёслэн но мукет ыжъёслэн?

¹⁶ Зырӟем христианъёсты но, мукет ыжъёсты но Иегова одӥг кадь юн яратэ. Соосыз но, таосыз но солы дуно пото, малы ке шуоно соос понна со одӥг кадь дун тыриз — аслэсьтыз яратоно Пизэ сётӥз. Зырӟем христианъёс но мукет ыжъёс пӧртэм луо соин гинэ, кыӵе оскон соослы кузьмаз Инмар. Но кыӵе гинэ осконзы соослэн медаз луы, соос ваньзы Иеговалы но Иисуслы оскымон луыны кулэ (Пс. 30:24). Милемлы тодамы возёно, Инмар вань ужась-тыршисьёсызлы святой духсэ сётэ шуыса. Со возьматэ: Иегова зырӟем христианъёс пӧлысь но мукет ыжъёс пӧлысь котькудӥзлы святой духсэ сётэ сомында, кӧня солы кулэ.

17. Мае ӵыдытэк витё зырӟем христианъёс пӧлысь кылемъёсыз?

¹⁷ Зырӟем христианъёс инмын улыны осконэн уг вордӥсько — сое соослы Инмар  кузьма. Соос со сярысь малпасько, вӧсясько но ӵыдытэк витё, куке Инмар та кузьымез соослы сётоз. Соос уг тодо, кыӵе мугорзы соослэн инмын луоз (1 Иоанн 3:2; Флп. 3:20, 21). Но соос туж возьмало со дырез, куке соос инмын Инмарлэн Эксэйлыказ Иеговаен, Иисусэн, кылчинъёсын но мукет зырӟем христианъёсын ӵош луозы.

18. Мае туж возьмало мукет ыжъёс?

¹⁸ Мукет ыжъёс оско пырак дауръёс ӵоже музъем вылын улыны. Сыӵе мылкыдыз котькуд адямилэн вань (Екк. 3:11). Соос туж возьмало со дырез, куке музъемез райлы пӧрмытыны юрттозы. Соослэн асьсэлэн корказы но бакчазы луоз. Соос асьсэос но, нылпиоссы но ноку уз висе (Ис. 65:21—23). Со сяна, соос быгатозы пӧртэм интыосы ветлыны, адӟыны чебересь гурезьёсты, нюлэсъёсты, зарезьёсты но эскерыны Иеговалэсь кылдытэмъёссэ. Нош соос эшшо но шумпотозы, нуналысь нуналэ Иеговаен кусыпъёссы юнгес но юнгес луозы шуыса.

19. Кыӵе луонлык сётэ милемлы Тодэ ваён ӝытан но ку со ортчытӥськоз таяз арын?

¹⁹ Котькуд ужась-тыршисезлы Иегова вуоноезлы паймымон оскон кузьмаз (Иер. 29:11). Инмарлы но Христослы луыса ми быгатомы пырак дауръёс ӵоже улыны. Со понна тау каронмес возьматыны но соосты данъяны ми быгатӥськомы Иисус Христослэсь кулонзэ Тодэ ваён ӝытанын. Зэм но, Ӝытан зэмос христианъёс понна тужгес но кулэ луись пумиськон. 2021-тӥ арын со ортчоз 27-тӥ южтолэзе, кӧснуналэ, шунды пуксем бере. Иегова, Иисус, кылчинъёс но улӟытэм зырӟем христианъёс солы вань саклыксэс висъялозы. Ми пӧлысь тросэзлы Ӝытанэз пусйыны номыр уз люкеты. Мукетъёсыз сое пусъёзы, уйылон-уллянъёс но пытсэтын пукемзы шоры учкытэк. Озьыен, милемлы номыр но медаз люкеты та ужрадэз ортчытыны!