1. How the talk wey they give for one convention for 1935 affect one young man?

E GET one family wey dey among the Bible Students. Bible Students na the name wey Jehovah Witness people de answer before-before. The papa and mama for the family get three boys and two girls, and they teach their children to serve Jehovah and follow the example of Jesus Christ. One of the boys dey 18 years when e baptize for 1926. Just like all the Bible Students that time, this faithful young man de chop the bread and drink the wine for Memorial every year. But, the hope wey e get for future change when e hear the important talk wey the title na “The Great Multitude.” Brother J. F. Rutherford give that talk for one convention for America for 1935. Wetin the Bible Students learn for that convention?

2. Which better truth Brother Rutherford explain for e talk?

² For the talk wey Brother Rutherford give, e explain who go dey part of the “great multitude” (King James Version), or “great crowd,” wey Revelation 7:9 talk about. Before that time, the Bible Students be think say the great crowd, or the plenty people wey Revelation talk about, go go heaven but they no go rule with Jesus because they no dey faithful reach the anointed ones. Brother Rutherford use Bible explain say God no choose the great crowd to live for heaven, but they be Christ other sheep * wey go survive  “great tribulation” and live forever for earth. (Rev. 7:14) Jesus promise say: “I get other sheep and they no dey part of this group; I must bring them too, and they go listen to my voice. They go be one group of sheep and get one shepherd.” (John 10:16) This “other sheep” na people wey hold Jehovah tight and they get the hope to live forever for Paradise for this earth. (Matt. 25:31-33, 46) Make we see how this new way wey we understand this truth change the life of plenty servants of Jehovah, even the life of that brother wey dey 18 years that time.​—Ps. 97:11; Prov. 4:18.

3-4. For the 1935 convention, wetin many people understand about their hope, and why?

³ One part for the convention wey really sweet na when the speaker ask people for the convention say: “All the people wey get the hope to live forever for earth, abeg, wuna fit stand up?” One brother wey dey the convention that time talk say, the people wey stand up pass half of the people wey come the convention. And na around 20,000 people come the convention. Then Brother Rutherford talk say: “See! Plenty people!” After that one, everybody start to happy and de shout. People wey stand understand say Jehovah no choose them to go heaven. They know say God no anoint them with e spirit. For the next day of the convention, 840 people baptize as Jehovah Witness, and many of them dey part of the other sheep.

⁴ After that talk, the young man wey we talk about before and plenty other people stop to chop the bread and drink the wine for Memorial. Many people feel like one humble brother wey talk say: “The Memorial for 1935 na the last time wey I chop the bread and drink the wine. I know say Jehovah no use e holy spirit give me the hope to live for heaven. Instead, I get the hope to live for earth and to help turn-am to paradise.” (Rom. 8:16, 17; 2 Cor. 1:21, 22) Since that time, plenty people don add join the great crowd and they don de work with anointed Christians wey still dey alive for earth.

5. Wetin Jehovah de think about people wey don stop to chop the bread and drink the wine for Memorial?

⁵ Wetin Jehovah think about the people wey stop to chop the bread and drink the wine for Memorial after 1935? And what if servant of Jehovah today de chop the bread and drink the wine for Memorial but after, e come understand say e no really dey among the anointed? (1 Cor. 11:28) Some people don chop the bread and drink the wine because their hope no really dey clear to them. But if they tell theirself say they make mistake, they stop to chop the bread and drink the wine, and continue to serve Jehovah well, Jehovah go surely count them among the other sheep. Even if they no chop the bread and drink the wine, them de still go Memorial because they really dey happy for wetin Jehovah and Jesus don do for them.

6. Wetin Jesus command the angels make they do?

⁶ Because great tribulation go soon happen, e go good make we discuss other things wey Revelation chapter 7 talk about anointed Christians and the great  crowd wey dey part of the other sheep. Jesus command the angels make they continue to hold the four wind them wey fit destroy things. They no go release the wind them for the earth until all the anointed Christians don get the mark, and this one mean say Jehovah don give them pass mark. (Rev. 7:1-4) The anointed brothers of Christ go be kings and priests with Jesus for heaven. Na this one be their reward because them dey faithful. (Rev. 20:6) Jehovah, Jesus, and the angels go really dey happy when they see say the 144,000 anointed ones don get their reward for heaven.

7. As e dey for Revelation 7:9, 10, who John see for vision, and wetin them de do? (Check picture for front cover.)

⁷ After John talk about the 144,000 kings and priests, e see one wonderful thing. E see “plenty people,” or “great crowd,” wey survive Armageddon. This second group dey different from the first one. The people for this group really plenty, and they no get number like the first group wey be 144,000. (Read Revelation 7:​9, 10.) They “wear white cloth.” This one mean say they don “stay clean” from this world wey Satan de control, and they no stop to hold God and Jesus tight. (Jas. 1:27) They shout say God don save them because of the thing wey Jehovah and Jesus wey be the Lamb of God, don do for them. Another thing be say, they hold palm tree leaf. This one show say they happy to accept Jesus as the King wey Jehovah don choose.​—Compare John 12:12, 13.

8. Wetin Revelation 7:11, 12 tell us about Jehovah, Jesus, the angels, and anointed ones wey go heaven?

⁸ Read Revelation 7:11, 12. Wetin happen when people for heaven see the great crowd? John see say everybody for heaven de glad and de praise God when they see the great crowd. Everybody for heaven go really glad to see as this vision go happen when the great crowd go survive the great tribulation.

9. As e dey for Revelation 7:13-15, wetin the great crowd de do now?

⁹ Read Revelation 7:13-15. John write say the great crowd, or the plenty people, “don wash their clothes and they make-am white with the blood of the Lamb.” This one mean say their conscience dey clean and Jehovah dey happy with them. (Isa. 1:18) They don give their life to God, they baptize as Christian, they get strong faith for the sacrifice of Jesus, and they get tight friendship with Jehovah. (John 3:36; 1 Pet. 3:21) Na because of this one God dey happy with them and they fit “worship [God] day and night” for earth. Even now, them de do their best and de do plenty part for the preaching work and de make disciples because the Kingdom of God na the number one thing for their life.​—Matt. 6:33; 24:14; 28:19, 20.

10. Wetin the great crowd dey sure of, which promise go happen wey they go see?

¹⁰ The great crowd wey survive the great tribulation dey sure say God go continue to take care of them, because “the Person wey sitdown for the throne go cover them with e tent.” This promise wey the other sheep don de wait for to happen, go finally happen: “[God] go wipe all the tears from their eye, and they no go die again, people no go de cry again, pain no go dey again.”​—Rev. 21:3, 4.

11-12. (a) Which better things Revelation 7:16, 17 talk say the great crowd go get for future? (b) Wetin the other sheep fit do for the Memorial, and why?

 ¹¹ Read Revelation 7:16, 17. Today, some servants of Jehovah de hungry because they no get enough money to buy food or because of the problem wey war cause. Other people dey prison because of their faith. But, the people wey dey part of the great crowd dey happy to know say after they don survive this wicked world wey God go destroy, they go always get plenty food and learn plenty things from Jehovah. When Jehovah go vex, this one be like “heat” wey de burn. But when Jehovah destroy this wicked world wey Satan de control, e go make sure say e protect the great crowd from this “heat.” After great tribulation end, Jesus go guide this plenty people wey survive go “water” wey de give everlasting life. Just think-am: For all the billions of people wey don live for this earth, the people wey dey among the great crowd fit no ever die. This one na really special hope for them!​—John 11:26.

¹² The other sheep get wonderful hope and them de thank Jehovah and Jesus for this hope. Na true say Jehovah no choose them to live for heaven, but e love them just as e love the anointed ones. The people for the two group fit praise God and Christ. One way wey them de do this one na to attend Memorial.

13-14. Why all of us suppose attend the Memorial of Christ death?

¹³ For some years now, for every 1,000 people wey attend Memorial, the number of people wey de chop the bread and drink the wine no reach anything. So plenty congregation no get person wey de chop the bread and drink the wine for Memorial. Among the people wey de attend Memorial, the people wey plenty pass, na people wey get the hope to live for earth. So, why them de attend Memorial? Them de attend because of the same reason why people de attend their friend wedding. This people de attend the wedding because they want show their love and support for the people wey de marry. For the same way, people wey dey  among the other sheep de attend Memorial because they want show their love and support for Jesus and the anointed ones. People for the other sheep still de attend to show say they really like the sacrifice of Jesus. Na this sacrifice give them the hope to live forever for this earth.

¹⁴ Another important reason why the other sheep de attend Memorial na to obey Jesus command. When Jesus first do this special meeting with the faithful apostles, e tell them say: “Make wuna de do-am to remember me.” (1 Cor. 11:23-26) So the other sheep de continue to attend Memorial as long as say some anointed ones still dey alive for this earth. And the other sheep de invite everybody make they come attend Memorial with them.

15. Wetin we fit do to praise God and Jesus Christ for Memorial?

¹⁵ For Memorial, we get the chance to praise God and Christ with song and prayer. The Memorial talk for this year na “Show Say You Love Wetin God and Christ Don Do for You!” E go make us de thank Jehovah and Jesus Christ more-more. So when them de pass the bread and wine, this one go make us fit think about wetin they mean, wey be, Jesus body and e blood. And we go remember say Jehovah allow e Son to die for us so that we go fit get life. (Matt. 20:28) Everybody wey love our Papa for heaven and e Son, go want attend the Memorial.

16. How the anointed and the other sheep resemble?

¹⁶ For some ways, the anointed Christians and other sheep resemble. Jehovah no love one group pass the other one. The anointed and the other sheep dey important to Jehovah. E love the two group the same way. After all, na the price wey e pay to buy the anointed ones, e still pay to buy the other sheep. And this price na the life of e dear Son. The thing wey make the two group dey different na say, they get different hope. But the two group must continue to hold God and Jesus Christ tight. (Ps. 31:23) And remember say, Jehovah de give e holy spirit to each person according to wetin the person need, whether the person na anointed or na other sheep.

17. Wetin anointed ones wey remain for earth de really wait for?

¹⁷ They no born anointed Christians with the hope wey they get to live for heaven. Na God de give them the hope. Them de think about their hope, de pray about-am, and e de hungry them to get  their reward for heaven. They no know wetin their body go be like for heaven. (Phil. 3:20, 21; 1 John 3:⁠2) But e de hungry them to meet Jehovah, Jesus, the angels, and the other anointed ones. They really want dey with them for the Kingdom for heaven.

18. Wetin the other sheep de really wait for?

¹⁸ The other sheep really de wait for the time wey they go live forever for earth. Everybody want live forever. (Eccl. 3:11) E de hungry them to see the day wey they go turn the whole earth to paradise. They really want see the day wey they go build their own house, plant their own garden, and train their children with perfect body. (Isa. 65:21-23) Them de really wait for the time wey they go de travel go many place for this earth, de see mountains, forest, and ocean, and de study all the things wey Jehovah don make. But the number one thing be say, they over glad to know say their friendship with Jehovah go continue to strong more-more.

19. Memorial na time for each of us to do wetin, and when we go do Memorial this year?

¹⁹ Jehovah don give each of e servant wonderful hope for future. (Jer. 29:11) Memorial na special time for the anointed ones and all of us to praise God and Christ for wetin they don do for us so that we fit enjoy life forever. Memorial na the number one important meeting wey true Christians get every year. They go do-am after sun don go down for Saturday, March 27, 2021. This year, plenty people de live for place wey they go dey free to attend this important meeting. Some people go still attend even though say other people de give them trouble. Some people go do Memorial for prison. As Jehovah, Jesus, the angels, and the anointed ones wey don go heaven de look, make all the congregation, group, and each person enjoy the Memorial!