YƐBUƐ kun o ninnge’m be siewlɛ kun m’ɔ o Zerizalɛ- mun lɔ’n i nun. Ndɛ kun klɛ yɛbuɛ sɔ’n su. Be klɛli ndɛ sɔ’n afuɛ 700 nin 600 ka naan Klisifuɛ’m be blɛ’n w’a ju’n be afiɛn’n nun. Be wunnin yɛbuɛ sɔ’n asieliɛ buɛ kun m’ɔ o laa Izraɛli lɔ klɔ nga be flɛ i kɛ Ebrɔn i wun koko lɛ’n i nun. Ndɛ nga be klɛli i yɛbuɛ sɔ’n su’n yɛ: “Maan Yave Sabao bo Agafu m’ɔ ti Agavu wa’n i sannzan.” ?Ngue yɛ laa ndɛ sɔ’n kle e Biblu’n nun ndɛ’n su-ɔ? Ndɛ sɔ’n kle kɛ laa sran’m be si Ɲanmiɛn i dunman Zoova mɔ be klɛ i Ebre nun kɛ YHWH i kpa. Afin be fa kan ndɛ cɛn kwlakwla. I kpa bɔbɔ’n ndɛ wie mɔ be wunnin be asieliɛ buɛ wie’m be nun’n, be kle kɛ be nga be ko fia buɛ sɔ’m be nun annzɛ be nin sran uflɛ be yia lɔ’n, be klɛ Ɲanmiɛn i dunman’n nin sran wie mɔ Ɲanmiɛn i dunman’n o be dunman’n nun’n, be dunman talɛ’m be wun.

Be flɛ bla kun m’ɔ suan aniɛn’m be su like kɛ Rasɛli Nabulizi. Ɔ di junman Inivɛsite kun m’ɔ o nvle nga be flɛ i kɛ Zɔɔzi’n su’n i nun. Ɔ kannin ndɛ ng’ɔ o yɛbuɛ nga be wunnin i Ebrɔn i wun koko lɛ’n i ndɛ. Ɔ seli kɛ: “Kpɛ sunman’n kɛ sran’m bé kán ndɛ’n, be fa Ɲanmiɛn i dunman mɔ be klɛ i Ebre nun kɛ YHWH wla nun. [...] I sɔ’n kle kɛ dunman sɔ’n ti Izraɛlifuɛ mun nin Zidafuɛ’m be cinnjin kpa.” I sɔ’n kusu nin ndɛ nga Biblu’n kan’n be kɔ likawlɛ. Afin Ɲanmiɛn i dunman mɔ be klɛ i Ebre nun kɛ YHWH ɔ o Biblu’n nun kpɛ kaka kpa. Ɔ ju wie bɔbɔ’n, be fa Ɲanmiɛn i dunman’n be wlɛ i sran’m be dunman’n nun.

“Yave Sabao” mɔ be klɛli i yɛbuɛ sɔ’n su’n i bo’n yɛle kɛ “Zoova m’ɔ ti sonja’m be su kpɛn’n.” Ndɛ sɔ’n kle kɛ lalafuɛ sran’m be fa Ɲanmiɛn i dunman’n ɔ nin “Zoova m’ɔ ti sonja’m be su kpɛn’n,” be kan ndɛ. I sɔ’n kusu nin ndɛ nga Biblu’n kan’n be kɔ likawlɛ wie. Afin Biblu’n i bue nga be klɛli i Ebre nun’n, “Zoova m’ɔ ti sonja’m be su kpɛn’n” wo nun kpɛ kɔe 283. I li Ezai nin Zeremin nin Zakari be fluwa nun yɛ ɔ sɔnnin dan-ɔn.