SAʼ LI naʼajej bʼarwiʼ naxokmank ebʼ li najteril kʼaʼaq re ru li naʼaatinak wiʼ li Santil Hu aran Jerusalén, wank jun li tzʼiibʼ chiru pek li kitzʼiibʼamank tana chiruhebʼ li chihabʼ 700 malaj 600 naq toj maajiʼ nachalk li Jesús saʼ Ruuchichʼochʼ. Aweʼ kitawmank saʼ jun li ochoch pek li naʼoksimank chaq joʼ muqlebʼaal kamenaq, moko najt ta rikʼin li tenamit Hebrón (Israel). Li tzʼiibʼ naxye: «Maajewanbʼilaq taxaq laj Hagaf ralal laj Hagav xbʼaan li Yahweh Sabaot». Li tzʼiibʼ aʼin naxchap ribʼ rikʼin li naxye li Santil Hu xbʼaan naq naxkʼut naq li xkʼabʼaʼ li Yos, aʼ li Jehobʼa malaj Yahweh li tzʼiibʼanbʼil saʼ li najteril aatinobʼaal hebreo joʼ YHWH, nawbʼil chaq ru chiʼus ut rajlal kutan nekeʼroksi chaq ebʼ li poyanam. Joʼkan ajwiʼ, kitawmank jalan chik tzʼiibʼ saʼebʼ li ochoch pek li naʼoksimank chaq joʼ muqlebʼaal kamenaq li naxkʼut naq ebʼ li xeʼoksink re li ochoch pek aʼan re chʼutamik malaj re xmuqbʼal ribʼ, rajlal xeʼxtzʼiibʼa li xkʼabʼaʼ li Yos chiru li pek ut ebʼ li kʼabʼaʼej li naxchap ribʼ rikʼin li xkʼabʼaʼ li Yos.

Li xRachel Nabulsi li naxtzʼil rix ebʼ li aatinobʼaal ut nakʼanjelak saʼ li Nimla Tzolebʼaal re Georgia kixye chirix ebʼ li tzʼiibʼ aʼin: «Saʼ xkʼabʼaʼ naq rajlal naʼoksimank chaq li kʼabʼaʼej YHWH, aʼin naraj xyeebʼal naq jwal wank chaq xwankil [...]. Ebʼ li raqal [re li Santil Hu] ut li tzʼiibʼ naxkʼut naq jwal wank chaq xwankil chiru ebʼ laj Israel ut ebʼ laj Judá li YHWH». Aʼin naxkʼut naq yaal naxye li Santil Hu bʼarwiʼ natawmank chi tzʼiibʼanbʼil naabʼal sut li xkʼabʼaʼ li Yos saʼ li najteril aatinobʼaal hebreo rikʼin li tzʼiibʼ YHWH. Joʼkan ajwiʼ, naabʼal sut kiʼoksimank chaq ebʼ li kʼabʼaʼej li naxchap ribʼ rikʼin li xkʼabʼaʼ li Yos.

Li aatin Yahweh Sabaot, li ak xooʼaatinak chirix rubʼelaj, naraj xyeebʼal «li Jehobʼa li Nimajwal Yos». Chanchan naq aʼin naraj xyeebʼal naq li xkʼabʼaʼ li Yos joʼwiʼ li tzʼiibʼ «li Jehobʼa li Nimajwal Yos» ak rajlal naʼoksimank chaq junxil. Naxkʼut ajwiʼ naq yaal naxye li Santil Hu chirix li aatin «li Jehobʼa li Nimajwal Yos» li natawmank numenaq 250 sut saʼ li xtasal li Santil Hu li kitzʼiibʼamank chaq saʼ hebreo, ut li xkʼihalil natawmank saʼ li xhu laj Isaías, laj Jeremías ut laj Zacarías.