MOMISIUMA imwe i na sha noinima yOmbiibeli i li muJerusalem omu na emanya la shangwa mo 700-600 K.O.P. lwaapo. Emanya olo ola hangwa mekololo lombila popepi naHebron muIsrael. Emanya olo ola shangwa ngaha: “Hagaf omonamati waHagav na fingwe kuYahweh Sabaot.” Eshangelo eli otali yambidida ngahelipi Ombiibeli? Otali ulike kutya edina laKalunga Jehova, olo mOshiheberi hali shangwa YHWH, ola li li shiivike nawa nola li hali longifwa efiku keshe pefimbo Ombiibeli ya li tai shangwa. Kakele kaasho, omashangelo amwe oo taa hangwa momakololo oo eembila otaa ulike kutya opa li ovanhu hava ka ongala nokuhondama mo, nova li hava shange luhapu edina laKalunga nosho yo omadina avo vene komakuma.

Omundokotola Rachel Nabulsi wokOuniversiti yaGeorgia okwa popya shi na sha nomashangelo oo a ti: “Okulongifwa kwedina YHWH lwoikando otaku ulike kutya ola fimana. . . . Omashangelo okwa ulika nghee edina YHWH la li la fimana kOvaisrael nokOvajuda.” Osho otashi yambidida Ombiibeli omo edina laKalunga la shangwa meendada dOshiheberi YHWH, la holoka mo lwoikando omayovi. Luhapu omadina opaumwene okwa kwatela mo edina laKalunga.

Outumbulilo “Yahweh Sabaot,” oo u li kemanya, otau ti, “Jehova womatanga ovakwaita.” Osha fa shi li ngaha kutya ovanhu ovo va li ko pefimbo opo Ombiibeli ya li tai shangwa ova li hava longifa edina laKalunga nosho yo outumbulilo “Jehova womatanga ovakwaita.” Osho otashi yambidida yo eshi Ombiibeli ya longifa outumbulilo “Jehova womatanga ovakwaita,” oo wa holoka lwoikando 283 mOmishangwa dOshiheberi, unene tuu momambo oo a shangwa kuJesaja, Jeremia nosho yo Sakaria.