MUZUVO yamuYelusalema yakulamina vyuma vyakushikulu, vize vyahanjika hamafuchi vavuluka muMbimbiliya, mwatwama lilolwa lize vasonekele kafwe mukachi ka 700 B.C.E., na 600 B.C.E. Lilolwa kana valiwanyine muchimbumbe chakutota kwakamwihi naHevelone, muIsalele. Vasonekeleho ngwavo: “Hangafwe mwana Hangave, vamwangule kuli Yawe Savote.” Uno mazu kana akundwiza ngachilihi Mbimbiliya? Asolola nge lijina lyaKalunga Yehova lize vasoneka muvasona vachiHepeleu ngwavo YHWH, valitachikijile chikuma nakulizachisa kuvatu vakushikulu. Kaha nawa malolwa eka, asolola nge vatu vaze vachinyinyinenga kuvimbumbe nakuswama, vasonekelenga lijina lyaKalunga hajimbango namajina avo aze alifwanyine nalijina lyaKalunga.

Rachel Nabulsi wahayunivesiti yaGeorgia, uze alinangula chikuma vyamalimi naVisoneka vyachiHepeleu, ahanjikile hamazu vasoneka hamalolwa kana ngwenyi: “Lijina lyaKalunga valisoneka muvasona vachiHepeleu (YHWH) mapapa kakavulu hamalolwa kana. Kahechi chatunangula vyavivulu. . . . Mazu amuMbimbiliya namazu vasoneka hamalolwa kana, asolola nge vaIsalele navaYuta, vamwenenga Kalunga kupwa wamulemu nalijina lyenyi.” Mazu ahanjikile Rachel akundwiza Mbimbiliya, mwomwo muMbimbiliya vasonekamo lijina lyaKalunga mapapa kakavulu muvasona vachiHepeleu. Kakavulu vatu vavalukilenga majina akulifwana nalijina lyaKalunga.

Mazu “Yawe Savote,” vasonekele haze halilolwa, alumbununa “Yehova wamayongomena.” Echi chasolola nge vatu kushikulu vazachishilenga chikuma lijina lyaKalunga nahanjikiso yakwamba ngwavo “Yehova wamayongomena.” Echi chasolola nge Mbimbiliya yoloka, mwomwo yazachisa hanjikiso yakwamba ngwavo “Yehova wamayongomena” kafwe mapapa akuzomboka 270, muVisoneka vyachiHepeleu, chikumanyi, mumukanda waIsaya, naYelemiya naZekaliya.