MUSIAMONG wa dinaga tšeo go bolelwago ka tšona ka Beibeleng wa kua Jerusalema, go na le leswika leo le ngwadilwego magareng ga ngwaga wa bo-700 le wa bo-600 pele ga ge Jesu a ka tla mo lefaseng. Leswika leo le hweditšwe leweng leo le bego le dirišwa e le lebitla kgauswi le motse wa Hebron kua Isiraele. Leswika leo le ngwadilwe gore: “Go rogakwe Hagaf morwa wa Hagav ka leina la Yahweh Sabaot.” Mantšu ao a ngwadilwego mo leswikeng le a hlatselana bjang le seo se ngwadilwego ka Beibeleng? Mantšu ao a bontšha gore leina la Modimo e lego Jehofa leo le bego le ngwalwa ka maletere a Seheberu e lego YHWH, le be le tlwaelegile e bile le dirišwa ka mehla mehleng ya Beibele. Batho ba bangwe bao ba bego ba kopana le go utama ka moo maweng ba be ba ngwala dilo tše itšego ka moo. Ba be ba ngwala leina la Modimo le maina a bona a na le karolwana ya leina la Modimo.

Moporofesara Rachel Nabulsi wa yunibesithi ya Georgia ge a bolela ka dilo tšeo di ngwadilwego ka moo maweng o re: “Leina YHWH le ngwadilwe gantši ka mo maweng. Seo se bolela gore leina le le bohlokwa. Se se bego se ngwadilwe mo maswikeng se bontšha gore Jehofa e be e le yo bohlokwa go Baisiraele le go Bajuda.” Mantšu ao a hlatselana le Beibele, ka ge leina la Modimo leo le ngwadilego ka maletere a Seheberu YHWH le tšwelela ka makga a mantšintši ka Beibeleng. Gantši maina a batho a be a akaretša le leina la Modimo.

Mantšu “Yahweh Sabaot,” ao a ngwadilwego moo leswikeng a ra gore “Jehofa wa madira.” Go bonagala batho ba mehleng ya Beibele ba be ba diriša leina la Modimo le polelwana ye e rego “Jehofa wa madira.” Se se thekga Beibele ge e diriša polelwana Jehofa wa madira yeo e tšwelelago ka makga a e ka bago a 283 ka mangwalong a Seheberu, kudukudu lengwalong la Jesaya, la Jeremia le la Sakaria.