LONG Bible Lands Museum lo Jerusalem, iu savve lukim wanfala ston wea garem raeting lo hem. Olketa raetem datwan lo samting olsem 700-600 B.C.E. Olketa faendem ston hia lo wanfala cave for putim man wea dae wea stap klosap lo Hebron lo Israel. Raeting wea stap lo ston sei: “Bae Yahweh Sabaot panisim Hagaf datfala son blo Hagav.” Hao nao toktok hia sapotim samting wea Bible storyim? Hem showimaot nem blo God Jehovah, wea lo Hebrew languis olketa raetem olsem YHWH, hem nem wea pipol savve and iusim lo datfala taem. Lo olketa nara cave lo Hebron olketa lukim tu staka raeting blo pipol wea meet or haed lo olketa cave hia. Olketa raetem lo wall nem blo God and nem blo olketa seleva wea nem blo God insaed nem hia.

Wanfala savve woman, Rachel Nabulsi, wea waka lo University of Georgia sei olsem abaotem raeting hia: “From olketa raetem YHWH staka taem hem showimaot wanfala important samting. . . . Hem showimaot God wea garem nem YHWH, hem important lo olketa lo Israel and Judah.” So hem stret taem Bible iusim YHWH lo Hebrew languis staka thousand taem. Staka taem olketa Jew iusim nem blo God tu insaed lo nem blo olketa seleva.

Toktok “Yahweh Sabaot” wea stap lo datfala ston minim “Jehovah, komanda blo olketa angel.” So luk olsem lo datfala taem pipol savve iusim nem blo God and disfala toktok “Jehovah, komanda blo olketa angel.” Datwan pruvim hem stret for Bible iusim disfala toktok “Jehovah, komanda blo olketa angel” wea insaed olketa Hebrew scripture samting olsem 280 taem. Staka taem Isaiah, Jeremiah, and Zechariah talem datfala toktok lo Bible buk blo olketa.