FOR Bible Lands Museum for Jerusalem, they get one stone wey they write something. And na around 700-600 B.C.E. they write-am. They take this stone from one cave wey them de bury people. And this cave no too far from Hebron for Israel. The thing wey they write for the stone talk say: “Curse go follow Hagaf wey be Hagav pikin in the name of Yahweh Sabaot.” How this thing wey they write for the stone support wetin Bible talk? This one show say people for Bible time know and de use God name wey be Jehovah, but that time them de write-am for olden days Hebrew letters as YHWH. For the cave, other things still dey wey people wey de meet and hide for there write. Sometimes, they add God name join their own name wey they write for the walls of the cave.

One woman from the University of Georgia, study about Bible matter. This woman name na Dr. Rachel Nabulsi, and e talk about this thing wey they write for stone say: “As they write the name YHWH for many place, this one dey important. . . . Wetin they write for [Bible] and for the stone show say the person wey de bear the name dey important to the people of Israel and Judah.” This one support wetin Bible talk, because God name wey be YHWH for Hebrew letters appear for Bible thousands of times. Many times, the name wey people de answer de get God name inside.

The word them wey be “Yahweh Sabaot” wey they write for the stone mean “Jehovah wey get army.” This one fit be say for Bible time, people de always use the name of God and even “Jehovah wey get army.” So this one still support wetin Bible talk because “Jehovah wey get army” appear 283 times for Hebrew Scriptures. E appear plenty times for the Bible book of Isaiah, Jeremiah, and Zechariah.