1. Mar pa Lubanga weko iwinyo nining?

LAKWENA Jon ocoyo ni, “Lubanga aye mar.” (1 Jon 4:8) Wangeyo ni Lubanga aye Wang It me kwo. Ento lok pa Jon man poyo wiwa ni mar a ki bot Lubanga. Jehovah marowa! Marre weko wabedo ki kuc kacel ki yomcwiny, dok weko wawinyo ni pe tye gin mo ma orem i kwowa.

2. Ma lubbe ki Matayo 22:37-40, cik aryo ma pigi tego loyo gubedo ngo, dok pingo twero bedo tek botwa me lubo cik me aryone?

² Lukricitayo pe giyero ka omyero ginyut mar nyo pe. Man obedo cik ma omyero gulubi. (Kwan Matayo 22:37-40.) Ka wangeyo Jehovah maber, watwero nongo ni yot adada me lubo cik mukwongo. Tye kit meno pien Jehovah pe ki roc mo. En paro piwa dok nyuto kica i kit ma en terowa kwede. Ento, watwero nongo ni tek me lubo cik me aryone. Pingo? Pien omege ki lumegiwa​—ma gin aye gubedo luwotwa macok loyo​—gitye ki roc. I kare mogo gitwero waco nyo timo jami ma weko wawinyo ni pe giparo piwa dok pe gubedo lukica. Jehovah ongeyo ni pe bibedo yot piwa me lubo cik meno, pi meno en otiyo ki luco Baibul mogo me pwonyowa pingo pire tek me nyuto mar bot luwotwa ki kit me timone. I kin luco Baibul magi tye iye Jon.​—1 Jon 3:11, 12.

3. Gin ango ma Jon oloko tutwal iye?

³ I lok ma Jon ocoyo, en onwoyo teretere ni Lukricitayo myero gunyut mar. Ki lok ada, i lok ma Jon ocoyo i kom kwo pa Yecu, en oloko i kom mar tyen mapol makato luco Jiri mukene-ni ducu kadi kiribgi kacel.  Jon onongo tye i kine ka mwaka miya acel i kare ma en ocoyo Jirine kacel ki waragane adek. Lok ma en ocoyo magi nyuto ni mar aye myero odor jami ducu ma Lakricitayo timo. (1 Jon 4:10, 11) Kadi bed kit meno, otero kare ki Jon me niang pwony meno.

4. Jon tika onongo kare ducu nyuto mar bot jo mukene?

⁴ I kare ma Jon pud awobi, en i kare mogo onongo pe nyuto mar. Me labolle, i nino mo Yecu ki lupwonnyene onongo gitye ka cito i Jerucalem kun gikato ki i Camaria. I taun mo matidi ki kunu, kikwero jologi woko. Jon odok iye nining? En kacel ki omine Yakobo, gupenyo Yecu wek ominigi twero me lwongo mac ki i polo wek onek jo ma i taun meno woko! (Luka 9:52-56) I kare mo mukene doki, Jon pe onyuto mar bot lupwonnye luwote. En ki omine Yakobo nen calo gulego mingi ni openy Yecu wek ominigi rwom madito i Kerre. I kare ma lupwonnye mukene-ni guniang gin ma Jon ki Yakobo gutimo, cwinygi ocwer matek! (Mat. 20:20, 21, 24) Ento kadi bed Jon otimo bal magi ducu, Yecu onongo pud mare.​—Jon 21:7.

5. Ngo ma wabinyamo i pwony man?

⁵ I pwony man, wabinyamo labol pa Jon ki dok jami mogo ma en ocoyo madok i kom mar. Ka wawoto ki nyamone, wabipwonyo kit ma watwero nyuto kwede mar bot omegiwa ki lumegiwa. Wabipwonyo bene yo ma pire tek ma lawi ot twero nyuto kwede ni emaro jo me ode.

6. Jehovah onyuto marre piwa nining?

⁶ Pol kare watamo ni me nyuto mar bot jo mukene, omyero wawaccigi awaca keken. Ento ka wamarogi ada, ci omyero wanyut mar meno ki timo jami pigi. (Por ki Yakobo 2:17, 26.) Me labolle, Jehovah marowa. (1 Jon 4:19) Dok en wacciwa ni emarowa kun tiyo ki lokke mamwonya ma kicoyo i Baibul. (Jab. 25:10; Rom. 8:38, 39) Ento, watwero moko ni Lubanga marowa pe pi lokke keken ento bene pi jami ma en timo. Jon ocoyo ni: “Gin ma yam onyuto marre botwa en ene, Lubanga ocwalo Wode acel keken i lobo wek omi wabed kwo pire.” (1 Jon 4:9) Jehovah oye ni Wode ma en maro adada oden can dok oto piwa. (Jon 3:16) Tika dok watwero bedo ki akalakala mo keken ka Jehovah marowa?

7. Ngo ma Yecu otimo me nyuto marre piwa?

⁷ Yecu otito ki lupwonnyene ni  emarogi matek. (Jon 13:1; 15:15) En onyuto tut pa marre piwa pe ki lokke keken ento bene ki ticce. Yecu owaco ni, “Pe tye ngat mo ma tye ki mar madit makato man, ni dano miyo kwone pi lureme.” (Jon 15:13) Ka watamo i kom gin ma Jehovah ki Yecu gutimo piwa, man myero otug cwinywa me timo gin ango?

8. Gin ango ma 1 Jon 3:18 waco ni omyero watim?

⁸ Wanyuto ni wamaro Jehovah ki Yecu ka wabedo luwiny botgi. (Jon 14:15; 1 Jon 5:3) Dok Yecu ominiwa cik ni omyero wamar luwotwa. (Jon 13:34, 35) Pe omyero walok aloka ki dogwa ni wamaro omegiwa ki lumegiwa ento omyero bene wanyutigi marwa ki jami ma watimo pigi. (Kwan 1 Jon 3:18.) Ngo kikome ma watwero timo me nyutigi ni wamarogi?

9. Mar otugo cwiny Jon me timo gin ango?

⁹ Jon onongo oromo bedo ki wonne kun gitiyo cente madwong i biacaragi me mako rec. Me ka meno, en otiyo ki kwone ducu me konyo jo mukene me pwonyo lok ada i kom Jehovah kacel ki Yecu. Kwo ma Jon oyero-ni onongo pe obedo kwo mayot. Kiune dok kitweye bene i buc i agikki me cencwari me acel ma onongo en dong otii adada. (Tic 3:1; 4:1-3; 5:18; Yabo 1:9) Kadi wa i kare ma kitweye i buc pi tito kwena i kom Yecu, Jon pud onyuto ni etye ka tamo pi jo mukene. Me labolle, i kare ma en tye i cula nam me Patimo, en ocoyo ginanyuta ma en onongo macalo buk me Niyabo ci ocwalo i kacokke mapatpat wek gunge “gin ma myero otimme oyotoyot i kare me anyim.” (Yabo 1:1) Ci nen calo, i kare ma kigonye woko ki i buc i Patimo, Jon ocoyo Jirine ma loko i kom kwo pa Yecu kacel ki ticce me pwony. En bene ocoyo waraga adek me cuko ki jingo cwiny omegine ki lumegine. Itwero lubo lanen me jalle pa lakwena Jon nining?

10. Itwero nyuto nining ni imaro jo mukene?

¹⁰ Itwero nyuto ni imaro dano ki i gin ma iyero me timo ki kwoni. Lobo pa Catan-ni mito ni itam pi mitini keken kun itute ki keroni ducu me tiyo cente nyo nongo yweka piri keni. Me ka meno, Lukricitayo i twok lobo-ni ducu gitye ka tero kare malac kit ma gitwero i tito kwena dok gitye ka konyo dano me nyikke cok ki Jehovah. Lukricitayo mukene bene gitwero tiyo tic man me tito kwena pi cawa malac.

11. I yo ma nining ma lutit kwena mapol ma lugen ginyuto kwede ni gimaro Jehovah kacel ki omege ki lumege?

¹¹ Mitte ni Lukricitayo ma lugen mapol guti i dog ticgi nino ducu wek ginong cente me konyo jo me odigi. Kadi bed kit meno, Lukricitayo magi pud gimiyo kony bot dul pa Jehovah i yo mo keken ma gitwero. Me labolle, mogo gicito ka miyo kony ka ma can opoto iye atura, ki mukene gimiyo kony i gedo odiwa me woro, dok wan ducu watye ki kare me miyo cente pi ticwa ma kwako wi lobo ducu-ni. Gitimo jami magi ducu pien gimaro Lubanga kacel ki dano luwotgi. Cabit ducu, wanyuto ni wamaro omegiwa ki lumegiwa ka wabedo tye i cokke dok wanywako i cokke magi. Kadi bed waol matek, pud watute me bedo tye i cokke magi. Kadi bed watye ki lworo, pud wayelle me miyo lagam. Dok kadi bed wan ducu watye ki pekkiwa, pud watute me  cuko cwiny jo mukene ma peya cokke ocakke ki dok i ngeye. (Ibru 10:24, 25) Pud dong watye ki pwoc madit ya pi tic ma lutit kwena luwotwa gitimo!

12. I yo mukene ango ma Jon onyuto kwede marre pi omegine ki lumegine?

¹² Jon onyuto marre pi omege ki lumege pe ki i pwonyogi keken, ento bene ki minigi tira ma rwatte. Me labolle, i waragane, Jon opwoyo omegine ki lumegine pi ticgi mabeco, ento en bene ominigi tira madok i kom bal. (1 Jon 1:8–2:1, 13, 14) I yo acel-lu, wan bene omyero wapwo omegiwa ki lumegiwa pi jami mabeco ma gitimo. Ento ka ngat mo ocako dongo cwiny ki kit maraco, wanyuto bote mar ki titte gin ma myero en owiny. Tekcwiny mitte adada me miyo tira ki luwotwa, ento Baibul tittiwa ni larem me ada twero pwonyo lawote kit macalo nyonyo pako lawote doko bit.​—Car. 27:17.

13. Gin ango ma omyero wagwokke ki timone?

¹³ I kare mogo, wanyuto marwa pi omegiwa ki lumegiwa ki i gin ma pe watimo. Me labolle, pe wakeco oyotoyot pi gin ma guwaco. Tam kong i kom gin mutimme i kare ma Yecu tye ka kwo i lobo kany. En owaco ki lupwonnyene ni wek gunong kwo omyero kong gucam ringo kome dok gumat remone. (Jon 6:53-57) Lupwonnye pa Yecu mapol pe gumaro lok man, pi meno, guweko lubo kore woko. Ento lureme ma lugen calo Jon gumedde ki lubbe. Pe guniang i kom lok ma Yecu owaco-ni, dok gubedo ki ur me winyone. Ento, lurem Yecu ma lugen pe gutamo ni lok ma Yecu owaco-ni pe tye atir dok cwinygi pe ocwer i kome. Me ka meno, gin gugenne, kun gingeyo ni en loko lok ada. (Jon 6:60, 66-69) Pud dong pire tek ya ni pe wawek jami ma luwotwa giwaco ocwer cwinywa oyotoyot! Me ka meno, waminigi kare me tito gin ma okelo niang manok meno.​—Car. 18:13; Latit. 7:9.

14. Pingo omyero pe waye ni adegadega odong i cwinywa?

¹⁴ Jon owacciwa ni omyero pe wadag omegiwa ki lumegiwa. Ka pe walubo tira meno ci Catan bibedo ki kare me doro tamwa. (1 Jon 2:11; 3:15) Man aye gin mutimme i kom jo mogo i cencwari me acel. I kare meno, Catan otiyo matek me  kelo adegadega i kin jo pa Lubanga wek gubed ma gupokke. I kare ma Jon ocoyo waragane, co mogo ma gitye ki tam pa Catan-ni onongo dong gudonyo woko i kacokke. Me labolle, Diotrepe obedo ka kelo apokapoka matek i kacokke mo. (3 Jon 9, 10) En onongo pe nyuto woro bot luneno ma giwoto awota ma lukiko madit ooro. En bene otute me ryemo woko ki i kacokke utmege ma gijolo jo ma en dagi. Meno onongo tim marac adada! Catan pud tye ka tic matek adada i kare-ni wek epok kin jo pa Lubanga dok ebed ki twero i komgi. Dong omyero wati matek wek pe waye ni adage opok kinwa woko.

15. Gin ango ma lawi ot myero wiye opo iye?

¹⁵ Yo acel ma lawi ot nyuto kwede ni emaro jo me ode aye ki miyogi jami me kom. (1 Tem. 5:8) Ento wiye myero opo ni, jami me kom keken pe twero cobo miti me cwiny pa jo me ode. (Mat. 5:3) Nen kong labol ma Yecu oweko pi luwi odi. Ma lubbe ki Jiri pa Jon, i kare ma kingabo Yecu i kom yat dok cok to, en onongo pud tye ka tam i kom jo me ganggi. Jon onongo tye ocung kacel ki Maliam min Yecu i kabedo ma kineko iye Yecu. Kadi bed ni Yecu onongo tye ki arem madwong adada, en oketo yub pi Jon me gwoko Maliam. (Jon 19:26, 27) Yecu onongo tye ki omegine ki lumegine ma onongo gibimiyo jami me kom ma mitte pi Maliam, ento nen calo onongo pe tye omine nyo laminne mo ma odoko lapwonnyene. Pi meno, Yecu onongo mito neno ni kigwoko Maliam i yo me kom kacel ki me cwiny.

16. Tic ango ma onongo Jon tye kwede?

¹⁶ Jon onongo tye ki tic mapol. Macalo lakwena, en onongo telo jo mukene i tic me tito kwena. Twero bedo ni en bene onongo onyomme, pi meno onongo mitte ni en omi jami me kom ma mitte pi jo me ode dok onen ni gitye ki wat macok ki Lubanga. (1 Kor. 9:5) Pwony ango ma luwi odi gitwero nongone i kare-ni?

17. Lawi ot twero nyuto nining ni emaro jo me ode?

¹⁷ Omego mo ma tye lawi ot twero bedo ki tic mapol ma pigi tego. Me labolle, en myero obed latic matek i dog  ticce wek kite okel deyo bot Jehovah. (Ep. 6:5, 6; Tito 2:9, 10) Omego man twero bedo laelda nyo lakony kor tic i kacokke, pi meno en myero ocit i lim me kwat dok otel wi tic me tito kwena. Ki tungcel bene, pire tek adada ni en okwany kare me kwano Baibul ki dakone ki lutinone. Gibibedo ki pwoc pi jami ducu ma en timo me gwokogi wek gubed ma komgi yot dok cwinygi yom kun bene konyogi me bedo ki wat cok ki Jehovah.​—Ep. 5:28, 29; 6:4.

18. Gin ango ma onongo Jon ngeyo maber adada?

¹⁸ Lakwena Jon obedo kwo pi mwaki mapol dok okato ki i jami mapol ma oyomo cwinye. En bene okato ki i kwo matek ma onongo twero kweyo niyene woko. Ento en otute matek me lubo cik pa Yecu kadi wa cikke me maro omegine ki lumegine. Macalo adwogine, Jon onongo ngeyo maber adada ni Jehovah ki Yecu gimare dok ni onongo gibimine kero me loyo atematema mo keken. (Jon 14:15-17; 15:9, 10; 1 Jon 4:16) Catan ki lobone onongo pe gitwero timo gin mo keken me juko Jon ki nyuto marre pi omegine ki lumegine, i lokke ki ticce.

19. Gin ango ma 1 Jon 4:7 cuko cwinywa me timone, dok pingo?

¹⁹ Calo Jon wan bene watye ka kwo i lobo ma tye i te loc pa Catan, ma en aye lubanga me lobo man dok pe maro ngat mo keken. (1 Jon 3:1, 10) Kadi bed ni en mito ni wajuk maro omegiwa ki lumegiwa, en pe twero diyowa me timo meno nikwanyo ka wan aye waye. Dong omyero wamoku tamwa me maro omegiwa ki lumegiwa, me tito mar meno i lokwa, kun wanyuto bene i jami ma watimo. Ka watimo meno, wabibedo ki yomcwiny me bedo jo me ot pa Jehovah, dok kwowa bibedo maber adada.​—Kwan 1 Jon 4:7.