1. Ci mìnya mɔ Mawu lɔn mì ɖe, lé ewanɔ nɔ mìɔ?

APOTRU Ӡan ŋwlɛ mɔ “Mawu nyi lɔnlɔn.” (1 Ӡan 4:8) Enyɔgbe kleŋ cɛwo ɖo ŋwi nyɔnɔnwi vevi ɖeka nɔ mì. Nyɔnɔnwi vevi lɔ yí nyi mɔ, Mawu ci yí nyi Agu alo Soxu nɔ agbe lɔ ke yí gbenyi Agu nɔ lɔnlɔn. Yehowa lɔn mì taŋ! Lɔnlɔn ci elɔn mì dɔ mìkpɔɛni mɔ mìle vofamɛ, eji jɔnɔ mì, yí ŋɖe dehwedo mì o.

2. Sɔ koɖo Matie 22:37-40 ɖe, ese amɛve ciwo yí nyi gangantɔwoɔ, yí nyi yí taɖo atɛnŋ agbɔnnu nɔ mì mɔ mìawa do amɛvetɔ lɔ jiɔ?

² Denyi nɔ edro Kristotɔwo yí woalɔn amɛ o. Ese enyi wodo nɔ wo mɔ wo le wɛ ahan. (Hlɛn Matie 22:37-40.) Nɔ mìvajeshi Yehowa ɖɛ nywiɖeɔ, mìtɛnŋ kpɔɛ mɔ wawa do ese ŋkɔtɔ lɔ ji degbɔnnu o. Ðo afɛn ɖekɛ dele Yehowa nu o; élenɔ bu nɔ mì yí gbewanɔ xomɛvu nɔ mì. Vɔ atɛnŋ agbɔnnu mɔ mìawa do ese amɛvetɔ lɔ yɛ ji. Nyi yí taɖoɔ? Ðo afɛn le mìwo nɔviŋsu koɖo nɔvinyɔnu ciwo yí nyi amɛkpena ciwo yí sɔ mì gbɔ nu. Gaɖewo mɛɔ, wotɛnŋ nu nyɔ ɖewo alo wa ŋɖe ci yí adɔ mìakpɔ mɔ wogbali mì alo wodelɔn mì o. Yehowa nya mɔ wawa do ese cɛ ji agbɔnnu nɔ mì, eyi dɔ esɔ gbɔngbɔn kɔkɔɛ kpedo Bibla ŋwlɛtɔ ɖewo nu yí woŋwlɛ enu ciwo koŋ yí adɔ mìakpɔ enu ci yí taɖo ele mɔ mìalɔn amɛ koɖo lé mìawɛ do. Ӡan nyi ɖeka le nuŋwlɛtɔ lɔwo mɛ.—1 Ӡan 3:11, 12.

3. Enyɔ ci Ӡan nu so lɔnlɔn nuɔ?

³ Le enu ciwo Ӡan ŋwlɛ mɛɔ, énu zenɛniɖe mɔ Kristotɔwo ɖo alɔn wowonɔnɔwo. Eyi taɖo nyɔgbe “lɔnlɔn” koɖo “lɔn” ciwo Ӡan ɖekɛ zan hwenu elɔlɔ xo so Yesu gbenɔnɔ nu sugbɔ sɔwu ciwo pleŋ Eŋɛnywiwemaŋwlɛtɔ  amɛtɔn kpɛtɛwo zan. Ӡan ɖo exwe sanŋdi ɖeka han hwenu eŋwlɛ yi Ŋɛnywiwema lɔ koɖo wema amɛtɔn kpɛtɛwo. Enyɔ cɛ ciwo yí so gbɔngbɔnmɛ dasɛ mɔ lɔnlɔn yí ɖo acucu Kristotɔ le ŋɖekpokpui ci ewanɔ mɛ. (1 Ӡan 4:10, 11) Ele ahan gan, ejinjin boo gbɔxwe Ӡan vamɔŋje mɛ ahan.

4. Ӡan wa nu gashiagamɛ yí sɔ dasɛ mɔ yelɔn mɛbuwoa?

⁴ Hwenu Ӡan nyi ɖajɛviɔ, denyi gashiagamɛ yí ewanɔ nu koɖo lɔnlɔn o. Le kpɔwɛ mɛ, gbeɖekaɔ, Yesu koɖo yi dokplɔtɔwo ɖe kunu so Galile vayi Samari. Vɔ ci wovaɖo Samari kɔxwi ɖeka mɛɔ, enɔ tɔwo gbe mɔ yewodaxɔ Yesu koɖo mɛ ciwo yí kplɔɛdo mɛdru o. Lé Ӡan wa nu doɔ? Énu mɔ yewoayɔ ezo so jeŋkwimɛ nɔ avafiɔn kɔxwiɛmɛtɔwo pleŋ! (Luiki 9:52-56) Gabumɛɔ, Ӡan dewa nu yí sɔ dasɛ mɔ yelɔn ye kpena apotruwo o. Yi koɖo nɔviɛ Ӡaki vayi nu nɔ wowo nɔ mɔ yɛ le vayi biɔ texwe vevi ɖeka Yesu nɔ yewo le Fyɔɖuxu lɔ mɛ. Ci apotru kpɛtɛwo se nyɔ lɔɔ, eve wo nu haan! (Mt. 20:20, 21, 24) Ӡan wa afɛn ŋtɔ́wo pleŋ gan, Yesu luin.—Ӡan 21:7.

5. Nyi mìakpɔ le nyɔta cɛ mɛɔ?

⁵ Le nyɔta cɛ mɛɔ, mìakpɔ Ӡan kpɔwɛ koɖo ŋɖewo ciwo yí eŋwlɛ so lɔnlɔn nu. Ecɛ akpedo mì nu mìakpɔ lé mìawɛ yí mìwo nɔviŋsu koɖo nɔvinyɔnuwo akpɔɛ mɔ mìlɔn yewo. Mìagbekpɔ emɔ ŋtɔŋtɔ ci ji xomutatɔ ɖe ato yí adasɛ nɔ yi xomumɛtɔwo mɔ yelɔn wo.

6. Nyi Yehowa wa yí sɔ dasɛ mɔ yelɔn mìɔ?

⁶ Mìtɛnŋ bui mɔ nɔ mìɖonɔ seselelanmɛ nywi do amɛwo nu alo nunɔ lɔnlɔn nyɔwo nɔ wo kpoŋ ɔ, anyi mìlɔn wo. Vɔ gbɔxwe lɔnlɔn lɔ anyi lɔnlɔn akun-akun ɔ, enuwanawo ɖo abɔdo nu. (Sɔ sɔ koɖo Ӡaki 2:17, 26.) Le kpɔwɛ mɛ, Yehowa lɔn mì. (1 Ӡan 4:19) Yiŋtɔ nu le enyɔ vivi ciwo woŋwlɛ do Bibla mɛ mɔ yelɔn mì. (Eha. 25:10; Rɔm. 8:38, 39) Ele ahan gan, denyi enyɔ ciwo Mawu nu ɖekɛ yí dɔ mìkando ji mɔ yɛlɔn mì o, enu ciwo ewa can dɔ yí mìkando ji. Ӡan ŋwlɛ mɔ: “Mí kpɔ lé hanci yí lɔnlɔn Mawutɔ ze do ŋkɔ nɔ mì ɖaa: Mawu sɔ Eviɛ akogo lɔ ɖaɖa xexe lɔ mɛ nɔ mì a tɛnŋ nɔ̀ agbe toto Eyɛ ji.” (1 Ӡan 4:9) Yehowa lɔn yí sɔ Eviɛ vevi lɔ ɖaɖa yí ekpe fun yí ku do ta nɔ mì. (Ӡan 3:16) Ecɛ dedɔ mìkando ji mɔ Yehowa lɔn mì nyao ba?

7. Nyi Yesu wa yí sɔ dasɛ mɔ yelɔn mìɔ?

 ⁷ Yesu nu nɔ yi dokplɔtɔwo mɔ yelɔn wo. (Ӡan 13:1; 15:15) De nuxu mɛ ɖekɛ yí Yesu dasɛ le mɔ yelɔn wo koɖo mìwo can le sugbɔ o, égbedasɛ yi le enu ciwo ewa mɛ. Yesu nu mɔ “Lɔnlɔn gangantɔ ci yí amɛ a dasɛ nyi mɔ wo a sɔ amɛ ŋtɔ gbe sɔ na dota nɔ exlɔwo.” (Ӡan 15:13) Nɔ mìbu tamɛ kpɔ so enu ci Yehowa koɖo Yesu wa nɔ mì nu ɖe, nyi mìaji mɔ mìawaɔ?

8. Nyi 1 Ӡan 3:18 nu mɔ mìwo le waɔ?

⁸ Mìsenɔ tonu nɔ Yehowa koɖo Yesu yí sɔ danasɛ mɔ mìlɔn wo. (Ӡan 14:15; 1 Ӡan 5:3) Yesu gbedo se nɔ mì koŋ mɔ mìwo le lɔn mìwonɔnɔwo. (Ӡan 13:34, 35) Nunu nɔ mìwo nɔviŋsu koɖo nɔvinyɔnuwo mɔ mìlɔn wo ɖekɛ desun o, vɔ mìɖo agbedasɛ yi le enu ciwo mìwanɔ mɛ. (Hlɛn 1 Ӡan 3:18.) Nyiwo koŋ yí mìawa asɔ dasɛ mɔ mìlɔn woɔ?

9. Ci Ӡan lɔn nɔviɛ Kristotɔwo ɖe, nyiwo ewaɔ?

⁹ Ӡan hɛn amɔ yeanɔ ye daye gbɔ aleleɛ kpavi yí asasa keŋ akpɔ ho. Vɔ dewɛ ahan o. Ézan yi gbe kpɛtɛ yí sɔ kpedo mɛbuwo nu wokpla nu yí vajeshi Yehowa koɖo Yesu ɖɛ. Gbeta ci Ӡan sɔ mɔ yeakplɔ Yesu do le ye gbemɛ defa di o. Wotre fun ni yí li hɛn yi hwashigbemɛ do kunu ci eɖekɔ ji. Godugodutɔ ci cɛ jɔ do jiɔ, éshin yí ku nyɔxo. (Edɔ. 3:1; 4:1-3; 5:18; Enyɔ. 1:9) Ci Ӡan ɖekɔ kunu so Yesu nu yí woli cu can ɔ, édasɛ mɔ mɛbuwo nu gbekpɔtɔ le susumɛ nɔ ye. Le kpɔwɛ mɛ, hwenu ele Patmosi tɔdomɛnyigban ji yí eŋwlɛ enu ciwo Mawu dasɛ ni keŋ yí sɔ wo ɖaɖa hamɛ lɔ nɔ woanya “enu ci yí ɖo a va jɔ [le majinjinɖe mɛ].” (Enyɔ. 1:1) Ewa mɔ ci wojo Ӡan yí eso le Patmosi gbɔxwe evaŋwlɛ Eŋɛnywiwema yi tɔ lɔ ci yí xo nuxu so Yesu gbenɔnɔ koɖo yi sumɔsumɔdɔ lɔ nu. Égbeŋwlɛ wema amɛtɔn buwo ɖaɖa nɔviɛ Kristotɔwo keŋ sɔ do ŋsɛn wo. Lé àwɛ asran amɛɖekisɔsɔsavɔn gbenɔnɔ Ӡan tɔɔ?

10. Lé àwɛ adasɛ mɔ yelɔn amɛwoɔ?

¹⁰ Àsɔ gbeta dru yí awa ŋɖe le ao gbemɛ asɔ dasɛ mɔ yelɔn amɛwo. Satana xexe lɔ jijiɛ mɔ eo le zan ao gamɛ koɖo ao ŋsɛn pleŋ do eɔɖeki nu yí ale gbla dokɔ mɔ yeakpɔ ho sugbɔ alo anyi amɛ kpɛnkpin. Vɔ Fyɔɖuxu ŋɛnywidratɔ ciwo pleŋ yí le xexeɛ mɛ dejinɔ wowoɖekɛwo tɔ. Wozannɔ gamɛ sugbɔ lé woakpe ji do yí sɔ dranɔ eŋɛnywi lɔ yí gbekpenɔdo amɛwo nu wovanyinɔ Yehowa xlɔwo. Mɛɖewo sun ji hɛnnɛ yí wakɔ kunuɖeɖe koɖo enukplaviwowawadɔ lɔ gashiagamɛ.

11. Lé eŋɛnywidratɔ egbejinɔtɔ sugbɔ danasɛ do mɔ yewolɔn Yehowa koɖo yewo kpena Kristotɔwoɔ?

¹¹ Kristotɔ egbejinɔtɔ sugbɔ ɖo awa dɔ gashiagamɛ yí asɔ kpɔ wowoŋtɔwo koɖo wowo xomuwo ji. Ci enyi ahan can ɔ, egbejinɔtɔ cɛwo donɔ alɔ Mawu habɔbɔ lɔ dɔwo lé woakpe ji do. Ðewo nanɔ kpekpedonu le jɔjɔmɛfɔkuwo godu yí buwo wanɔ dɔ le exɔcucudɔwo mɛ. Nɔvi ɖewo nanɔ ho hɛnnɛ yí sɔ donɔ alɔ xexeɛ pleŋ mɛ dɔ. Wowanɔ enu cɛwo pleŋ ɖo wolɔn Mawu koɖo wowo kpenawo. Mìyinɔ hamɛ lɔ bɔbɔwo kwɛshila ɖeshiaɖe yí wanɔ ci mìawa le mɛ keŋ sɔ danasɛ mɔ mìlɔn mìwo nɔviŋsu koɖo nɔvinyɔnuwo. Nɔ nu cikɔ nɔ mì can ɔ, mìdegɔnnɔ bɔbɔ cɛwo o. Nɔ mìvɔnkɔ can ɔ, mìɖonɔ enyɔ ŋci. Yí ci enuwo kpekpeɛ mì pleŋ can ɔ, mìdonɔ ŋsɛn mìwonɔnɔwo doŋkɔ nɔ bɔbɔ lɔwo alo nɔ  mìkpa. (Ebre. 10:24, 25) Edɔ ciwo mìwo kpena eŋɛnywidratɔwo wanɔ jɔ ji nɔ mì yí mìdo akpe nɔ wo taŋ!

12. Nyi Ӡan gbewa yí sɔ dasɛ mɔ yelɔn ye kpena Kristotɔwoɔ?

¹² Ӡan dekannɔfu yi kpena Kristotɔwo yí asɔ dasɛ mɔ yelɔn wo yí enyi evɔ o, vɔ égbenanɔ nukplamu wo. Le kpɔwɛ mɛ, le wema ciwo eŋwlɛ ɖaɖa nɔviɛ ŋsu koɖo nɔviɛ nyɔnuwo mɛɔ, ékanfu wo nɔ xɔse ci woɖo koɖo edɔ nywi ciwo yí wowa, vɔ égbena nukplamu wo tiin so nuvɔn nu. (1 Ӡan 1:8–2:1) Ahanke ele mɔ mìwo can mìakannɔfu mìwo nɔviŋsu koɖo nɔvinyɔnuwo nɔ dɔ nywi ciwo yí wowanɔ nɛ. Vɔ nɔ mɛɖe tɔ ŋɖe wawa yí denyɔ o alo tɔ adɛn ɖe wuwuɔ, mìatɛnŋ asɔ ayexa axo nuxu so nu ni yí asɔ dasɛ mɔ mìluin. Eӡan edɔngbegbe gbɔxwe woana nukplamu exlɔ ɖe. Vɔ Bibla nu mɔ, exlɔ adodwiwo gbenɔ nyɔ nɔ wowonɔnɔwo.—Elo. 27:17.

13. Nyi mìdeɖo awanɔɔ?

¹³ Hweɖewonuɔ, evajɔnɔ mɔ mìgbenɔ ŋɖekatɔwo keŋ asɔ dasɛ nɔ mìwo nɔviŋsu koɖo nɔvinyɔnuwo mɔ mìlɔn wo. Le kpɔwɛ mɛ, nɔ wonu nyɔ ci yí ave mì nuɔ, mìdeɖeblɛ donɔ dɔmɛzi o. Enu cɛ hanci ɖeka jɔ le vɔvɔnu nɔ Yesu nyigban ji gbenɔnɔ. Yesu nu nɔ yi nukplaviwo mɔ gbɔxwe woakpɔ agbeɔ, woɖo aɖu ye ŋcilan yí anu ye hun. (Ӡan 6:53-57) Enyɔ lɔ wa ɖeka nɔ yi nukplaviwo yí sugbɔ trɔ gbeɖi ɖɛ, vɔ yi xlɔ vevi lɔwo detrɔ gbeɖi ɖɛ o. Ӡan can le wo mɛ. Woku kpla Yesu le egbejinɔnɔ mɛ. Wodemɔŋje enyɔ ci Yesu nu mɛ o, yí taŋfuin enyɔ lɔ kpaca wo. Vɔ Yesu xlɔ egbejinɔtɔwo lɔwo denu zeɖeka mɔ enyɔ ci enu desɔgbe yí wa dɔmɛzi o. Ewaɖeɔ, wokando ji yí nya mɔ yɛtonɔ nyɔnɔnwi. (Ӡan 6:60, 66-69) Ci mìdeɖeblɛ donɔ dɔmɛzi, nɔ mìwo xlɔwo nu nyɔ ɖe yí eve mì nuɔ, enu nywi enyi! Mìtanɔshi wo yí wodrenɔ enyɔ ci wojikɔ anu mɛ nɔ mì.—Elo. 18:13; Ŋun. 7:9.

14. Nyi yí taɖo mìdagbe ŋwa nɔ mìwo nɔviwo gbeɖeɔ?

¹⁴ Ӡan gbedo ŋsɛn mì mɔ mìŋgbegbe ŋwa nɔ mìwo nɔviŋsu alo nɔvinyɔnuwo o. Nɔ mìdewa do nukplamu cɛ jiɔ, mìatashi mìwoɖekiwo ɖɛ yí Satana azan. (1 Ӡan 2:11; 3:15) Enu cɛ han yí jɔ do mɛɖewo ji le vɔvɔnu nɔ exwe sanŋdi ŋkɔtɔ K.H. Hwenɔnuɔ, Satana je agbla  sɛnsinɖe mɔ yeadɔ vu do Mawu mɛwo mɛ nɔ woagbe ŋwa nɔ wowonɔnɔwo keŋ ama. Hwenɔnu ci Ӡan ŋwlɛkɔ yi wemawo ɖaɖa hamɛ lɔɔ, ŋsu ɖewo ciwo yí ji mɔ yewoawa Satana tɔ han le hamɛ lɔ mɛ xoxoxo. Ðeka yí nyi Diotrɛfu ci yí xa ɖui koŋ yí dɔdɔ vu do nɔviwo mɛ nɔ hamɛ lɔ ama kpeɖekpeɖe. (3 Ӡan 9, 10) Nɔ edɔjikpɔha lɔ ɖo mɛɖe ɖaɖa hamɛ lɔ mɛɔ, Diotrɛfu debunɔ mɛ lɔ kuiɖeka o. Nɔ nɔviwo xɔ mɛdru mɛ ciwo nu yí dekpenɔ niɔ, éjinɔ hɛnnɛ mɔ yeaɖe wo ti le hamɛ lɔ mɛ. Egoyiyi gbɔngbɔn teŋ nɛ! Satana gbejekɔ agbla sɛnsinɖe gbɛ hɛnnɛ mɔ, yeadɔ vu do Mawu mɛwo mɛ keŋ akpɔ mɔ asun wo ji. Mìdagbe ŋwa nɔ mìwo nɔviwo yí ami kpekpedo wo nu gbeɖe o.

15. Nyi ele mɔ xomutatɔ aɖo ŋwiɔ?

¹⁵ Enuvevi ɖeka ci yí xomutatɔ awa asɔ dasɛ mɔ yelɔn ye xomu yí nyi mɔ, ákpɔnɔ xomu lɔ mɛ tɔwo ŋcilanmɛ ӡanwo gbɔ. (1 Tim. 5:8) Vɔ éɖo aɖo ŋwi mɔ ŋcilanmɛnuwo datɛnŋ akpedo xomu lɔ nu le gbɔngbɔnmɛ o. (Mt. 5:3) Kpɔ kpɔwɛ nywi ci Yesu ɖo nɔ xomutatɔwo ɖa. Ӡan nu le Eŋɛnywiwema yi tɔ lɔ mɛ mɔ, hwenu Yesu le efuntrenamɛci lɔ nu yí jikɔ akuɔ, enɔlɔ koɖo nɔviɛwo nu gbekpɔtɔ le susumɛ ni. Ӡan le te le axa nɔ Yesu nɔlɔ Mari, le fini wokan Yesu do aci nu le. Ci Yesu le baɖaxo yí sekɔ gbazavi sugbɔ can ɔ, énu nɔ Ӡan mɔ yɛ le le bu nɔ ye nɔye Mari. (Ӡan 19:26, 27) Yesu nɔviɛwo li yí kankandoji li mɔ woasun ji ale bu nɔ Mari le ŋcilanmɛ dru, vɔ ewa mɔ ɖekɛ denyi Yesu dokplɔtɔ hwenɔnu o. Eyi taɖo Yesu wɛ ahan nɔ ŋɖe ŋgbevahwedo Mari le gbɔngbɔnmɛ koɖo ŋcilanmɛ o.

16. Agbanleamɛji ciwo yí le kɔ nɔ Ӡan ɔ?

¹⁶ Agbanleamɛji sugbɔ le kɔ nɔ Ӡan. Ci enyi apotruɔ, éɖo aɖenɔ kunu koɖo zo. Ewa mɔ éɖe nyɔnu hɛnnɛ yí ɖo alenɔ bu nɔ yi xomu lɔ le gbɔngbɔnmɛ koɖo ŋcilanmɛ. (1 Kor. 9:5) Enukplamu ci yí le mɛ nɔ xomutatɔwo gbɛɔ?

17. Nyi yí taɖo ele veviɖe mɔ xomutatɔ ɖo alenɔ bu nɔ yi xomumɛtɔwo le gbɔngbɔnmɛɔ?

¹⁷ Agbanleamɛji vevi sugbɔ tɛnŋ le kɔ nɔ nɔviŋsu ɖe ci yí nyi xomutatɔ. Le kpɔwɛ mɛ, éɖo adonɔ vevi dɔ le dɔmɛ keŋ ahɛn kanfukanfu vɛ nɔ Yehowa.  (Efe. 6:5, 6; Titu 2:9, 10) To akpo nɔ yɛɔ, étɛnŋ ɖo agbanleamɛjiwo le hamɛ lɔ mɛ, shigbe mɔ ayi jinɔ nɔviŋsu koɖo nɔvinyɔnuwo kpɔ keŋ ado ŋsɛn wo, ágbenɔnɔ ŋkɔ nɔ kunuɖeɖedɔ lɔ. Áwawa ŋtɔ́wo gan yí egbele veviɖe mɔ, akplanɔ Bibla koɖo ashiɛ koɖo viɛwo yí daglinɔ nukplakpla ɖe o. Egbla ciwo yí edonɔ mɔ yeana ye xomu akpɔtɔ anɔ lanmɛsɛn mɛ le gbɔngbɔnmɛ koɖo ŋcilanmɛ yí akpɔnɔ jijɔ ajeŋ nɔ ashiɛ koɖo eviɛwo sugbɔ.—Efe. 5:28, 29; 6:4.

18. Nyi ji Ӡan kandoɔ, yí nyi yí taɖoɔ?

¹⁸ Ӡan nɔ agbe jinjin yí to enu dojijɔnamɛ sugbɔ mɛ. Cukaɖa hamɛhamɛ ciwo mɛ eto atɛnŋ adɔ yí yi xɔse agble. Vɔ étenɔkpɔ gashiagamɛ yí wanɔ do Yesu sewo ji. Le kpɔwɛ mɛ, élɔnnɔ nɔviɛ Kristotɔwo. Ci Ӡan wanɔ do Yesu sewo ji ahan ɔ, ékando ji mɔ, Yehowa koɖo Yesu lɔn ye yí woado ŋsɛn ye yí yeato cukaɖa ɖekpokpui mɛ. (Ӡan 14:15-17; 15:10; 1 Ӡan 4:16) Ŋɖekpokpui ci Satana koɖo yi xexe vwin lɔ wa, detɛnŋ ɖo te Ӡan yí emi nɔviɛ Kristotɔwo lɔnlɔn le nuxuxoxo koɖo nuwana mɛ o.

19. Nyi yí 1 Ӡan 4:7 do ŋsɛn mì mɔ mìwo le waɔ, yí nyi yí taɖoɔ?

¹⁹ Shigbe Ӡan nɛɔ, mìwo can mìle xexe vwin ci yí amɛxatɔ Satana kpakpa cɛ nɔ mɛ. (1 Ӡan 3:1, 10) Mìnya mɔ enu ci ejijiɛ yí nyi mɔ mìami mìwo nɔviŋsu koɖo nɔvinyɔnuwo lɔnlɔn. Vɔ mìdalɔn ajeji ni gbeɖe o. Eyi taɖo mìaɖui gligaan alɔnnɔ mìwo nɔviŋsu koɖo nɔvinyɔnuwo yí adanasɛ yi le mìwo nuxuxoxo koɖo mìwo nuwanawo mɛ. Nɔ mìwɛni ahan ɔ, mìasenɔ vivi nɔ Yehowa xomu lɔ mɛ nɔnɔ yí eji ajɔnɔ mì sugbɔ.—Hlɛn 1 Ӡan 4:7.