1. Иегованыҥ сӱӱжин сананзагар, слерге кандый сезим келет?

АПОСТОЛ Иоанн «Кудай — ол сӱӱш» деп бичиген (1 Иоанн 4:8). Бу сӧстӧрдиҥ учурын тереҥ сананып ийзе, јӱрӱмди Иегова берген деп кӧрӱнет. Анайда ок чын сӱӱшке ол бисти ӱредет деп кӧрӱнет. Иегова бисти чыннаҥ ла сӱӱп јат. Ол бисти амыр, сӱӱнчилӱ јӱрӱм јӱрзин деп кӱӱнзеп јат.

2. Матфей 22:37—40-лӧ болзо, кандый эки јакылта бар? Экинчи јакылтаны нениҥ учун бӱдӱрерге кӱч болот?

² Христиан кижи Иегованы ла улусты сӱӱр учурлу. Бу јанынаҥ эки јаан јакылта берилген. (Матфей 22:37—40 кычырыгар.) Баштапкы јакылтала болзо, Иегованы сӱӱр керек, экинчизиле — јуугысты сӱӱр керек. Иегованы сӱӱрге бир де кӱч эмес, нениҥ учун дезе ол сӱрекей улу, агару, бисти сӱӱп турган теҥеридеги Адабыс. Је экинчи јакылтаны бӱдӱрерге кӱч, нениҥ учун дезе бистиҥ ака эјелер толо кемдӱ эмес. Кезикте олордыҥ айткан сӧстӧри эмезе эткен керектери бисти ачындырып јат. Бу јанынаҥ бистерге кӱч болуп турганын Иегова јакшы оҥдоп јат. Оныҥ учун бойыныҥ сӧзи ажыра бой-бойысты канайып сӱӱр керек ле нениҥ учун сӱӱр керек деп јартап јат. Сӱӱш керегинде,  темдектезе апостол Иоанн бичиген (1 Иоанн 3:11, 12).

3. Иоанн эҥ ле кӧп не керегинде бичиген?

³ Иоанныҥ бичиген Сӱӱнчилӱ јарынаҥ христиан кижи ӱзе немени акту кӱӱнинеҥ эдер керек деп кӧрӱнип јат (1 Иоанн 4:10, 11). Апостол Иоанн Иисустыҥ јӱрӱмин бичип турарда, сӱӱш керегинде Матфей, Марк, Луканаҥ канча киреге кӧп бичиген. Ол 100 јаш кирелӱ болордо бу Сӱӱнчилӱ јарды ла ӱч самараны бичиген. Је бу бичиктерди бичиирдеҥ озо, Иоанн чыннаҥ сӱӱп ӱренгелек болгон.

4. Иоанн улусты јаантайын сӱӱген бе?

⁴ Иоанн јиит тужында улусты јакшы сӱӱп билбес болгон. Бир катап Иисус ӱренчиктериле кожо Самария ажыра барган. Анда бир јурт Иисустыҥ ӱренчиктерин јуутпадылар. Ол тушта Иоанн ачынала, теҥеридеҥ от тӱжӱп, бу јуртты кӱйдӱрип салзын деп, Иисусты сураган (Лука 9:52—56). База бир учуралда Иоанн Кудайдыҥ Каандыгында Иисустыҥ јанында отурарга суранган. Ол мыны Иаковло кожо энези ажыра эткен. Мыны угала ӧскӧ апостолдор Иоанн ла Иаковко коркышту тыҥ ачынгылаган (Матф. 20:20, 21, 24). Је Иисус Иоаннды, ол јастырып та турган болзо, тӱҥей ле сӱӱген (Иоанн 21:7).

5. Бу јӧрмӧлдӧ нени шӱӱжерис?

⁵ Бу јӧрмӧлдӧ бис Иоанныҥ темин ле сӱӱш керегинде бичиген оныҥ сӧстӧрин кӧрӧрис. Анайда ок бис ака-эјелерге сӱӱжисти канайып кӧргӱзер аргалу деп шӱӱжерис. А јӧрмӧлдиҥ учында билелӱ акалар билезине сӱӱжин канайып кӧргӱзер аргалу деп кӧрӧрис.

6. Иегова бойыныҥ сӱӱжин канайып кӧргӱскен?

⁶ Сӱӱш керектердеҥ кӧрӱнет. Бис кӧп сабада кижи сӱӱжин айткан сӧстӧриле, сезимдериле кӧргӱзет деп сананадыс. Је чынынча болзо, сӱӱшти керектерле де кӧргӱзер керек. (Иаков 2:17, 26 тӱҥдештиригер.) Бу јанынаҥ Иегова биске тем кӧргӱзет (1 Иоанн 4:19). Бис оныҥ сӱӱжин Агару Бичиктеги сӱреен јылу сӧстӧринеҥ кӧрӧдис (Сар. 25:10; Рим. 8:38, 39). Је ол биске сӱӱжин јӱк ле сӧстӧриле эмес, керектериле де кӧргӱзет. Агару Бичикте мынайып бичилген: «Ол ажыра бисти јӱрӱм алзын деп, Кудай телекейге Бойыныҥ сок јаҥыс Уулын ийген. Мынызыла Кудайдыҥ сӱӱжи бистиҥ  бойыбыста ачылган» (1 Иоанн 4:9; Иоанн 3:16). Оныҥ учун Иегова бисти сӱӱп турган деп, бис бир де алаҥзыбас аргалу.

7. Иисус сӱӱжин канайып кӧргӱскен?

⁷ Иисус сӱӱжин база кӧргӱскен (Иоанн 13:1; 15:15). Оныҥ да сӱӱжи јӱк сӧстӧринеҥ эмес, је эткен керектеринеҥ де кӧрӱнип јат. Агару Бичикте айдылат: «Бойыныҥ најылары учун јӱрӱмин берер сӱӱштеҥ артык сӱӱш јок» (Иоанн 15:13). Иегова ла Иисус сӱӱжин анайып кӧргӱзерде, бис сӱӱжисти канайып кӧргӱзерис?

8. 1 Иоанн 3:18-ле болзо, бис нени эдер учурлу?

⁸ Бис Иегованы ла Иисусты сӱӱп турганысты олордыҥ јакылталарын бӱдӱрип турганысла кӧргӱзедис (Иоанн 14:15; 1 Иоанн 5:3). Иисус бистерге бой-бойыгарды сӱӱгер деп јакылта берген (Иоанн 13:34, 35). Оныҥ учун ака-эјелериске сӱӱжисти биске јӱк ле сӧстӧрисле эмес, је керектерисле де кӧргӱзер керек. (1 Иоанн 3:18 кычырыгар.) Мыны канайып эдер?

9. Иоаннды ака-эјелерди сӱӱгени неге кӱӱнзеткен?

⁹ Иоанн адазыла кожо балык тудар ижин оноҥ ло ары улалтып, арга-чакту јадар аргалу болгон. Је мыныҥ ордына ол улуска Иегова ла Иисус керегинде чындыкты билерге болушкан. Оныҥ мындый јӱрӱми јеҥил эмес болгон. Нениҥ учун дезе ого кӧп истежӱлер ӧдӧргӧ келишкен. Анайда ок карып каларда, ол ссылкага аткарылган (Ап. ижи 3:1; 4:1—3; 5:18; Ачыл. 1:9). Је Иоанн ссылкада да болордо, ака-эјелерди тыҥ сӱӱген деп кӧрӱнет. Патмос деп ортолыкта ол Ачылта деп бичикти бичиген. Ака-эјелерди «удабастаҥ не болотонын» билзин деп, Иоанн бу бичикти олорго аткарган (Ачыл. 1:1). Ссылканаҥ јайымдалган кийнинде, ол Иисустыҥ јӱрӱми керегинде Сӱӱнчилӱ јар бичиген, анайда ок ака-эјелердиҥ кӱӱнин кӧдӱрерге ле бӱдӱмјизин тыҥыдарга, бойыныҥ ӱч самаразын бичиген. Бис Иоаннаҥ неге ӱренер аргалу?

10. Бис улуска сӱӱжисти канайып кӧргӱзер аргалу?

¹⁰ Ака-эјелерди сӱӱп турганыс па, јок по деп, бистиҥ јӱрӱмистеҥ кӧрӱнет. Сатананыҥ телекейи ӧйисти ле ийде-кӱчисти улуска эмес, је бойыска берзин деп ӱредет. Темдектезе, ол бисти кӧп акча иштеп алзын, јарлу болзын деп кӱӱнзедип јат. Је Иегованыҥ ишчилери бойыныҥ ийде-кӱчин ле ӧйин улуска берип јат. Олор улуска сӱӱнчилӱ јарды куучындаарга албаданат, анайда ок улуска Кудайга јууктаарга болужат. Кезик андый ишчилер дезе, Кудайга ӧйин толо берип, иштеп јат.

11. Кӧп ака-эјелер Иеговага ла ака-эјелерге сӱӱжин канайып кӧргӱзет?

¹¹ Кӧп ака-эјелер билезин азыраарга, бӱдӱн кӱн иштеп јат. Је андый да болзо, олордыҥ кезиги Каандыктыҥ Тураларын тударында туружат, ар-бӱткенниҥ тӱбеги болзо, ака-эјелерге болужат эмезе Каандыктыҥ ижине акча-манадыла јӧмӧжӧт. Олор мыны Иегованы ла ака-эјелерди сӱӱп турганы учун эдет. Анайда ок бис сӱӱжисти кажы ла неделе јуунныҥ туштажуларында кӧргӱзедис. Арып та калган болзоос, туштажуларга јӱрерге албаданып  јадыс. Санааркаштар да болуп турза, јартамалдар бередис. Ол эмезе туштажунаҥ озо, эмезе кийнинде, бой-бойыбыстыҥ кӱӱнисти кӧдӱрижедис (Евр. 10:24, 25). Бис ака-эјелерге мындый сӱӱжи учун јаан быйанду болодыс!

12. Иоанныҥ ака-эјелерге сӱӱжи база недеҥ кӧрӱнет?

¹² Иоанн бойыныҥ сӱӱжин ака-эјелерди јӱк ле мактаганыла эмес, је јӧп тӧ бергениле кӧргӱскен. Темдектезе, ол бойыныҥ самаразында ака-эјелерди јакшы керектери учун мактап јат, је анайда ок кинчек јанынаҥ јӧп берип јат (1 Иоанн 1:8—2:1, 13, 14). Анайып ла бис ака-эјелерди јакшы керектери учун мактап јадыс. Је керек тушта, олорго јӧп тӧ берер керек. Темдектезе, јастыра кӧрӱмин кӧрӱп турзаас. Јӧп берерге, кезикте эби јок болордоҥ айабас. Је Агару Бичикте айдылганыла, бис бой-бойыбысты «курчыдадыс», ӧскӧртӧ айтса тӱзедедис (Укаа 27:17).

13. Бис сӱӱжисти база канайып кӧргӱзедис?

¹³ Бис анайда ок ака-эјелериске сӱӱжисти олордыҥ сӧстӧрине ачынбай турганысла кӧргӱзедис. Иисус јерде болордо, ӱренчиктерине мындый сӧстӧр айткан: «Мениҥ эди-канымды јиири, Мениҥ канымды ичери, ӱргӱлји јӱрӱм јӱрери ол» (Иоанн 6:53—57). Иисустыҥ кезик ӱренчиктери бу сӧстӧргӧ бӱдӱрилип, чындыктаҥ јӱрӱп калган. Је оныҥ чын најылары оныҥ сӧстӧрин оҥдобогон до болзо, оны тӱҥей ле артыргыспаган. Нениҥ учун дезе Иисустыҥ ӱреткенинде бир де јастыра неме јок деп, олор бӱткен (Иоанн 6:60, 66—69). Айдарда, биске де ака-эјелердиҥ айткан сӧстӧрине капшай ла ачынбас керек. Карын олордоҥ: «А не болгон? А не анайып айттыҥ?» — деп, сурап угар керек (Укаа 18:13; Эккл. 7:9).

14. Биске нениҥ учун ака-эјелерди качан да јаман кӧрбӧс керек?

¹⁴ Иоанн биске ака-эјелерди јаман кӧрбӧс керек деп бичиген. Бу јӧпти алынбазаас, Сатананыҥ колына кире берерис (1 Иоанн 2:11; 3:15). Мындый неме б. э. баштапкы чагыныҥ учы јаар болгон. Ол ӧйдӧ Сатана Кудайдыҥ  албатызын коркышту ла чачылтарга албаданган. Иоанныҥ самаралары бичилген кийнинде, јуундарга Сатананыҥ кӧрӱминдий кӧрӱмдӱ улус кирип баштаган. Темдектезе, Диотреф. Ол Башкару јӧптиҥ тургускан акаларын тообогон. Анайда ок кӱндӱзек ака-эјелерди ого јарабай турган улусты кӱндӱлебезин деп токтоткон (3 Иоанн 9, 10). Бӱгӱнги де кӱнде Сатана јуундарды чачылтарга албаданат. Је бистер дезе, Сатанага бир де јеҥдиртпектер!

15. Билениҥ бажы билезин јеткилдеп тура, баштапкы јерге нени тургузар учурлу?

¹⁵ Билелӱ акалар бойыныҥ билезине сӱӱжин канайып кӧргӱзер аргалу? Олор билезин акча-манатла јеткилдейт (1 Тим. 5:8). Је анайда ок кӧгӱс јанынаҥ јеткилдеер учурлу. Нениҥ учун дезе билениҥ кӧгӱзи баштапкы јерде турат (Матф. 5:3). Олорго јакшы темди Иисус кӧргӱскен. Ол керӱ агашка кададып салган болордо до, бойыныҥ билезин сананган. Бу ла ӧйдӧ ол Иоаннды оныҥ энезин кичеезин деп сураган (Иоанн 19:26, 27). Бир јанынаҥ Иисустыҥ кожо чыккандары да Марияны кӧрӱп турар эди, је кӧгӱс јанынаҥ олор оны кичееп болбос эди. Нениҥ учун дезе олор Иисустыҥ ӱренчиктери болбогон. А Иоанн дезе, ого кӧгӱс јанынаҥ болужар эди. Анайып Иисус энезин акча-манат та јанынаҥ, кӧгӱс те јанынаҥ кичеерге турганын кӧргӱскен.

16. Иоаннда кандый молјулар болгон?

¹⁶ Иоанн кӧп молјуларлу болгон. Ол апостолдордыҥ бирӱзи болуп, јарлаар ишти башкарган. Анайда ок ол билелӱ болгон болор. Билелӱ болгон болзо, ого билезин акча-манат та јанынаҥ, кӧгӱс те јанынаҥ јеткилдеерге келишкен болор (1 Кор. 9:5). Иоаннаҥ билениҥ бажы неге ӱренер аргалу?

17. Билениҥ бажы билезине сӱӱжин канайып кӧргӱзер аргалу?

¹⁷ Билелӱ акада кӧп молјулар болот. Ого ижинде де Кудайдыҥ ады макталзын деп јакшы иштеер керек (Еф. 6:5, 6; Титке 2:9, 10). Анайда ок ого јуунда да молјулар берилет. Темдектезе ака-эјелерди кичеер керек ле јарлаар  ишти башкарар керек. Бого ло коштой ака бойыныҥ билезине билелик бажырыш ӧткӱрер учурлу. Мынайда ол билезин сӱӱп турганын кӧргӱзет. А билези ого акча-манат ла кӧгӱс јанынаҥ, анайда ок эмоциональный јанынаҥ кичеегени учун быйанду болор (Еф. 5:28, 29; 6:4).

18. Иоанн неде алаҥзыбаган?

¹⁸ Апостол Иоанн сӱреен јилбилӱ узун јӱрӱм јӱрген. Ол кӧп кӱчтер ӧткӧн. Је ол Иисустыҥ јакылталарын ӱзе бӱдӱрерге албаданган. Ол тоодо ака-эјелерди сӱӱген. Мынайып ол Иегова ла Иисус оны сӱӱп турган ла кандый ла кӱчтерди ӧдӧргӧ болужар деп, бир де алаҥзыбаган (Иоанн 14:15—17; 15:9, 10; 1 Иоанн 4:16). Сатана да, Сатананыҥ телекейи де ого ака-эјелерди сӱӱрге буудак болбогон.

19. 1 Иоанн 4:7-ле болзо, биске нени эдер керек, нениҥ учун?

¹⁹ Бис Иоанн ла чылап калју Сатананыҥ телекейинде јададыс (1 Иоанн 3:1, 10). Ол бисти ака-эјелерди сӱӱбезин деп албаданат. Је бис ого удура турзаас, оныҥ амадузы тӱҥей ле бӱтпес. Айдарда, ака-эјелерге сӱӱжисти јаҥыс ла сӧс лӧ эмес, је керектерисле де оноҥ ло ары кӧргӱзектер. Ол тушта Иегованыҥ билезине кирип турганыстаҥ јаан сӱӱнчи алып јӱрерис. (1 Иоанн 4:7 кычырыгар.)