1. O olah no Kawas pairaay to maanan a harateng iso?

‘O OLAH ko Kawas,’ sanay ko sowal no tarokos ci Yohani. (1 Yohani 4:8) Kantangay koniya sowal, kawra mihadakay to cecay kalimlaan kimad. Cowa ko pipowalan aca no ˈorip ko Kawas, o pipowalan no olah. Tada maolahay ci Yihofa kitaanan, o olah Ningra parihadayay kitaanan, lipahakay marenecay ko falocoˈ.

2. (1) Pakayni i Matay 22:37-40, o maanan a tosa limoˈot ko sakakaay kalimlaan? (2) Hano pasangar kita midofdof to saka tosa a limoˈot?

² Pakaynien i Krisciyang, paihkal to olah o limoˈot no Kawas kitaanan, o tatooren a midemak. (ˈOsien ko Matay 22:37-40.) Ikor no mafanaˈ kita ci Yihofaan, sapidofdofaw to saka cecay a limoˈot madoloay alatek, samanen malefotay ci Yihofa, hanaca patadoay kitanan a miharateng, damsayay. Kawra sapidofdofaw to saka tosa limoˈot cowa ko madoloay, misamaanay hani? Samanen ora kaolahan ita a tamdaw, mahawpay ko salikaka, sahtoay cowa ko malefotay. Latekay o sasowalen ato midemakan no salikaka midokaˈay kitaanan, pakasomaday kitaanan. Mafanaˈay ci Yihofa to masiˈayaway ita a sapalifet, mansa sakadademaken Ningra ko tamaw mitilid ko ihkalay a limoˈot itini Fangcalay Cudad, pasowal kitaanan hano masasiolah ato sasamaan ko hademak ita. Mahawpay ci Yohani.—1 Yohani 3:11, 12.

3. Misaliyaliyaway ci Yohani mitadtad to maanan a kimad?

³ Mitilid ci Yohani to Fangcalay Cudad i, misaliyaliyaway cingra misaˈicel papaihkal to olah ko Krisciyang. Soˈlinay i, itini mitilidan ningra hakelong no kaˈorip ni Yis kinapinaay  milengo to olah, ikakaay ko kaadihay to tolo a Ratoh a cudad. Mitilid ci Yohani to Yohani a Ratoh atoya tolo a tikami maedeng 100 ko mihecaan. Oniya maloloday cudad pasifanaˈay kitaanan, ano mananto ko hademak no Krisciyang kitinien ciolahay a falocoˈ a midemak. (1 Yohani 4:10, 11) Soˈlinay i, adihayay ko mapalakay ni Yohani a toki ngaˈ, mananamay konini a kimad.

4. Hakelong nokaˈorip ni Yohani mafanaˈay paihkal to olah itini i tao han?

⁴ Kaemangho ci Yohani, kina pinapinaay caka paihkal to olah. Kina cecayay, mikeridan ni Yis ko nisawawaan tayra Yirusalim, itini i fatad mitaˈlifay to niyaroˈ no Samariya, coka kahi micada cangranan. Samaanay ko harateng ni Yohani hani? Milicayan ningra ci Yis, ngaˈay tefaden ko namal i kakarayan, palaˈafoen ko polong a tamdaw noniya niyaroˈ sanay. (Luka 9:52-56) Kinacecayayho, cowa ka paihkal to olah ci Yohani to roma a tarokos. Cingra ato salikaka ningra ci Yakop misaaliay to wina tayra ci Yisan a micangacang, pafeli cangraanan to kalimlaan a saˈaroan itini i Hongti Kitakit. Mafanaˈ ko roma tarokos i, Tada maketeray. (Matay 20:20, 21, 24) Soˈlin mahaenay ko raraw ni Yohani, kamayan maolah ci Yis cingraanan.—Yohani 21:7.

5. Oniya lalakaw mamilengo to manan?

⁵ Oniya lalakaw mamilengo to taˈarawan ni Yohani, ato mitilidan ningra pakayniay i olah a sinael. Mamananam ita samaan paihkal to olah i salikaka. Mamananamho ita o kalimlaan a pakayraan no tawki no lomaˈ maolah to paro no lomaˈ.

6. Pakayni kitaanan midemakay ci Yihofa to maanan, paihkal to olah Ningra hani?

⁶ Miharateng kita o mamaolah to tao, pasowal to padihkoay to falocoˈ a sowal cangranan, paihkal to nafalocoˈan ita. Kawra, o soˈlinay olah pairaen ko waywayan ngaˈ ngaˈay. (Nengnengen ko Yakop 2:17, 26.) Tinakoen, maolahay ci Yihofa kitaanan. (1 Yohani 4:19) Itini Fangcalay Cudad, misakadademakay Cingra to adihayay makapahay a sowal paihkal to olah Ningra. (ˈOlic 25:10; Loma 8:38, 39) Kawra pakasoˈlin kita to maolahay ko Kawas kitaanan, cowa ko pakayniay aca i sasowalen Ningra, pakayniayho i nano demak Ningra kitaanan. Sowal ni Yohani: ‘Miocoran no Kawas ko foseniˈan a wawa tayni i hekal, ho ngaˈay kita pakayni cingraanan milifok to ˈorip, paihkalay koni to olah no Kawas kitaanan.’ (1 Yohani 4:9) Hai sanay ci Yihofa papisemsem to kaolahan ningra a wawa pakayni kitaanan a kinafalah to ˈorip. (Yohani 3:16) Makahi ci Yihofa mihaen to demak, wa cisasaho kita to olah Ningra han?

7. Patadoay ci Yis midemak kitaanan to maanan, misawacay to maolahay cingra kitaanan?

 ⁷ O nano sowal ni Yis, paihkalay to olah ningra to nisawawaan. (Yohani 13:1; 15:15) Kawra cowa ko tano sowal aca ci Yis, tano waywayanho misawacay to tangongolay ko olah ningra to nisawawaan ato kitaanan. Sowal ni Yis: ‘Pakayni i widang kinafalah to ˈorip, awaay ko mikikakaay to hatiniay a olah.’ (Yohani 15:13) Maharateng ko nano demak ni Yihofa aci Yis kitaanan, wa samaan kita padiˈo to olah Nangra hani?

8. Sowal itini saka 1 Yohani 3:18 oha mamidemak kita to maanan?

⁸ Maolah kita ci Yihofaan aci Yisan, wa midofdof to limoˈot Nangra. (Yohani 14:15; 1 Yohani 5:3) Ihkalay ko limoˈot ni Yis kitaanan masasiolaolah. (Yohani 13:34, 35) Ano maolah kita to salikaka, cowa ko tano ngoyos aca a somowal, tano waywayen misawacay tonini. (ˈOsien ko 1 Yohani 3:18.) Mihaenay, oha mamidemak kita to maanan a demakaan, paihkal to maolahay kita to salikaka hokira?

9. Mikitini ciolahay a falocoˈ, midemakay ci Yohani to manan a demakan?

⁹ Ci Yohani na ngangaˈay cingra kalacafay to wama micowat to tayal no paro no lomaˈ, adihay ko maetanay a payci. Kawra cowa pihaen ko demak ningra, hakelong no ˈorip ningra misarocoday to mitosilay a tayal, padama to tamdaw mafanaˈ ci Yihofaan aci Yisan. Mipiliˈan ni Yohani nokaˈorip cowa ko madoloay. Na pakayniay cingra i mitosilay demak tahacada to sapalak, matoˈasto i, mapaholiwayho cingra. (Dmak 3:1; 4:1-3; 5:18; Paˈarawan 1:9) Pakayni i noka pilasil ci Yisan a mapalit ci Yohani i, kamayan ciharateng to salikaka. Tinakoen itini potipot i Patmos i, mitilidan ningra ko sapatemer no Kawas cingraanan, ikor parakatan ningra ko cudad tayni kasakopang, araaw i, ho mafanaˈ cangra ‘caka halafin o mamifekad a demak.’ (Paˈarawan 1:1) Ci Yohani ikor no matedal caka halafin mitiliday to Yohani a Ratoh, maˈoningay ko hakelong no kaˈorip ni Yis ato mitosilay a tayal. Roma i, mitilidayho cingra to tolo a tikami pakalalok to salikaka, paˈicel to pakasoˈlin nangra. Wa ngaˈay kiso samaan a mitodong ci Yohanian, paihkal to kinafalahay harateng hani?

10. Wa ngaˈay kiso samanen misawacay to maolahay ko niyah to tao?

¹⁰ Mipiliˈan iso samaan misakadademak to nokaˈorip, wa ngaˈay misawacay to maolahay kiso to tao hokira. Tokel ni Satan nanay palaken iso ko polong no toki ato ˈicel i tireng no niyah, o sakacihafay aca ato sakacingangan ko haratengen sanay. Kawra itini cowacowa pala, o salikaka paihkalay to kinafalahay a harateng, adihayay ko mapalakay a toki nangra milasil to ngaˈayay lihaf, padama to tao patireng to kalawidang ci Yihofaan. O roma salikaka misakafahay, mieminay to toki mitosil ato pasifanaˈay to tamdaw a tayal.

11. ˈAlomanay madimadiay Krisciyang samanay misawacay to maolahay cangra ci Yihofaan, maolahayho to salikaka?

¹¹ Pakayni sapaririˈaw to niyah ato paro no lomaˈ, ˈalomanay madimadiay salikaka mieminay to toki a mawmah. Soˈlin hatira, misarocoday cangra midama to likakawa no Kawas. Tinakoen, o roma tamadw mirienangay to padamaay to tahapadesay, o roma tamdaw mirienangay to patirengay a tayal. Roma i, kita kahacecay a tamdaw wa ngaˈay pakiyaho midama to mitosilay a tayal. To lipalipay, mirienangay kita to saˈopo tawlikay mirienang to kamok, misawacayay koni to maolahay kita to salikaka. Soˈlin malotayay kita alatek, kamayanho mirienang to saˈopo. Soˈlin marawraway ko harateng ita, kamayan misaˈicel  pakamay a pacaˈof. Soˈlin adihayay ko pasangaray ita, kamayanho misarocod itini ˈayaw no saˈopo ato ikor pakalalok to tao. (Hipray 10:24, 25) Maˈaraw ko pisaˈicel no salikaka, tada mitemeray to falocoˈ!

12. Tada maolahay ci Yohani to salikaka, mansa samaanay ko demak ningra?

¹² Maolahay ci Yohani to salikaka, mihaenay coko pakahemek aca cangraanan, pakalalokayho cangraanan. Tinakoen, itini tikami ningra, pakahemekay to salikaka tanektek ko pakasoˈlin, makahi kinafalah. Roma i, ihkalay a mihadakan ningra a limoˈot, patalipaˈelalay cangraanan aka mararaw. (1 Yohani 1:8–2:1, 13, 14) Malecaday, ano ngaˈay ko demak no salikaka, papakahemeken ita cangra. Kawra ano misatapang ira ko tatiihay waywayan ato tatiihay nanaman no salikaka i, damsayen ita a patalipaˈelal cingra, mihaen o soˈlinay maolah cingranan. Ano papalimoˈot to widang misaaliay to timolo. Kawra sowal no Fangcalay Cudad, o soˈlinay widang masasipakalalokay, masasisalofay.—Taneng 27:17.

13. Aka a pidemak kita to maanan?

¹³ Latekay, caka pidemak kita to cecay demak o maolahay to salikaka konini. Tinakoen, aka ranikay kita pakayni sowal no salikaka a maketer. Haratengen ˈayaw no mapatay ci Yis mifekaday a demak. Pasowalan ningra ko nisawawaan, cima ko sapilifokaw to tahadaˈoc a ˈorip, kakomaen to heci ningra, minanom to ˈirang ningra. (Yohani 6:53-57) Matengil no ˈalomanay nisawawaan ko sowal ni Yis, macekiday, miliyasay cingraanan. Kawranan ci Yohani ato romaroma soˈlinay widang ni Yis padotocay mikotod cingraanan. Soˈlinay i, cowa ka cipinang cangra to sowal ni Yis, macekiday alatek, kawra cowa pisaˈosi cangra to mararaway ci Yis, cowa mapiliˈ ko harateng. Pakasoˈlinay cangra ci Yisan, mafanaˈay sahtoay o soˈlinay kimad ko sowal ningra. (Yohani 6:60, 66-69) Mananamay ita, aka ranikay kita pakayni i sowal no widang a maketer, kalimlaan konini. Pairaen ita ko toki no tao a mitadtad, ho malahdaw ko mararaway harateng.—Taneng 18:13; Patnakay 7:9.

14. Hano caka ngaˈay kita palahad to ˈintehay itini i falocoˈ?

¹⁴ Roma i, patalipaˈelalay ci Yohani kitaanan, aka ˈinteh to salikaka, ano caka tengilen ita koniya limoˈot, pafeliay to toki ci Satanan mionting kitaanan. (1 Yohani 2:11; 3:15) Salikoray no saka 1 hahekalan, iraay ko mahaenay a tamdaw. Mihalakaay ci Satan mikosam  to ˈintehay itini finawlan no Kawas, paira to maliwasakay. Mitilid ci Yohani to tolo a tikami pafeli to kasakopang i, iraay ko mitakaway micomod i kasakopang no Krisciyang, paihkalay nangra to harateng ni Satan. Tinakoen, ci Tiyotrifis (Titefi) mikidatay cingra to pakidemay kalacongis i kasakopang. Cowa ka ngodo cingra to miocoran no malohemay malitengay i congpo. Ano iraay ko tamdaw sapicadaaw to kapiliˈan ningra a tamdaw, milaplapan nignra cangra itini kasakopang. Tada pakidemay kora waywayan. (3 Yohani 9, 10) Anini, kamayanho ci Satan mihalaka paliwasak to finawlan no Kawas, sapitapiˈaw kitaanan. Mihaenay aka ka ˈinteh to salikaka, mipalak to kakelec a malacecay.

15. Tawki no lomaˈ o mamiharateng to manan?

¹⁵ Tawki no lomaˈ o kalimlaan a pakayraan ciharateng to paro no lomaˈ i, paririˈen cangra to sakaˈorip. (1 Timoti 5:8) Kawra haharatengen nangra, kalimlaan ko pirenec to dafongan a saali no paro no lomaˈ, kawra sakakaay kalimlaan i parenecen to noˈadingoan a saali nangra. (Matay 5:3) Sinanoten ko patirengan ni Yis a taˈarawan pakayni tawki no paro no lomaˈ. Pakayni i Yohani a Ratoh, ya mapacek i pisemseman a hecek i, tomirengay ko wina ningra ci Mariya i tatihi ni Yohani. Ya mamapatayto ci Yis i, ciharatengayho cingra to paro no lomaˈ. Soˈlin pakidemay ko adada, patorodan ningra ci Yohani midipot to wina ningra ci Mariyaan. (Yohani 19:26, 27) Soˈlinay i, wa dipoten no safasafa ni Yis ko sakaˈorip ni Mariya, kawra cowaho ko nisawawaan ni Yis cangra itiya, mansa ciharatengay ci Yis to saali ni Mariya i tirengan ato noˈadingoan milifok to sangaˈayay noka pidimokos.

16. Wa mitamorong ci Yohani to manan a ˈinorong hani?

¹⁶ Adihayay ko mitamorongan ni Yohani a ˈinorong. Malo tarokos, mamikerid cingra mitosilay a tayal. Roma i, ciraramoday to cingra alatek, mamidimokos cingra to sakaˈorip no paro no lomaˈ, mamirenec to noˈadingoan a saali nangra. (1 Korinto 9:5) Tawki no lomaˈ anini wa ngaˈay mananam ko maanan hani?

17. Samaan ko demak no tawki no lomaˈ, o ciharatengay a maolah to paro no lomaˈ?

¹⁷ Malo tawkiay no paro no lomaˈ a salikaka adihayay ko ˈinorong alatek, tinakoen wa malalok cingra a mawmah paririˈ to paro no lomaˈ, ngaˈay paˈdil ci Yihofaan. (Ifiso 6:5, 6;  Titus 2:9, 10) Itini kasakopang iraay ko adihayay a ˈinorong ningra alatek, tinakoen padama to salikaka ato mikerid mitosilay a tayal. O roma i, mamikeridho cingra to paro no lomaˈ midoko to Kawas, micerid micekiw to Fangcalay Cudad. Mitamorong to ˈinorong ko tawki no lomaˈ, misaˈicel midimokos to tirengan, nafalocoˈan, noˈadingoan a saali no paro no lomaˈ, maedeng o mamiakoˈid ko paro no lomaˈ cingraanan.—Ifiso 5:28, 29; 6:4.

18. Pakasoˈlinay ci Yohani to manan?

¹⁸ Koˈedaway ko ˈorip ni Yohani, kasemeran ko hakelong nokaˈorip. Soˈlin adihayay ko malifaay ningra a pasangaray, kawra cowa ka lahdaw ko pakasoˈlin. Padotocay misarocod midofodof to limoˈot ni Yis, mahawpay ko kaolah to salikaka oniya limoˈot. Mihaenay, pakasoˈlinay ci Yohani maolahay ci Yihofa aci Yis cingraanan, hanaca pafeliay cingraanan to ˈicel misaysay to masakenaay a sapalifet. (Yohani 14:15-17; 15:10; 1 Yohani 4:16) Ano samaanto ko demak ni Satan ato hekal, cowa pakaˈafas to olah ni Yohani i falocoˈ, cowa ka pakaconged cingraanan tano sowal tano waywayan paihkal to olah i salikaka.

19. Itini saka 1 Yohani 4:7 pakalalokay kitaanan misamaan ko demak? Misamaanay?

¹⁹ Malecad ci Yohanian, itiniay kita makowanay ni Satan a hekal maˈorp, o kawas noniya hekal cingra, matomesay ko ˈinteh no falocoˈ. (1 Yohani 3:1, 10) Misamacayay ci Satan miconged kitaanan maolah to salikaka, anoca pafelien ita cingra to toki, cowa ko mamalaˈosi cingra. Nanay seteken ita ko falocoˈ, maolah to salikaka. Cowa ko tano sowal aca, tano waywayanho paihkal to olah no mita. Mihaen ko demak ita, wa pakayni i noka masalalomaˈ no paro no lomaˈ ni Yihofa, marenec ko falocoˈ ita, wa ciepoc ko hakelong no kaˈorip ita.—ˈOsien ko 1 Yohani 4:7.