1. Kimfilu eymi tami piwkeyeetew Chaw Dios, ¿chumi tami piwke?

APOSTOL Juan wirintukuy ‘Ngünechen ta piwkeyen-ngey’ (1 Juan 4:⁠8). Chaw Jewba eli ta mongen, welu ñi wirintukuel ta Juan ka pengelkeeiñmu Jewba mu ñi küpan ti piwkeyewün. Jewba rume piwkeyenieeiñmu, feymu küme duamkeiñ ka ayüwkülekeiñ.

2. 1) Ñi feypin Matew 22:⁠37-40, ¿chuchi am ti epu werkün dungu doy falilu? 2) ¿Chumngelu küdawngeafuy inanieafiel ti epungechi werkün dungu?

² Iñchiñ taiñ cristiano ngen mu, müley taiñ piwkeyecheal. Femngechi werküngeiñ taiñ femal (papeltunge Matew 22:⁠37-40). Chaw Jewba re nor dungu müten ta femkey, duamnieeiñmu ka kümelkakeeiñmu. Feymu küdawtukelaiñ taiñ piwkeyeafiel. Welu taiñ pu peñi, taiñ pu lamngen culpan chengeyngün. Kiñeke mu müte piwkeyechelayafuy, feymu doy küdawngeafuy taiñ piwkeyeafiel. Chaw Jewba kimniey tüfa, feymu adniefi kiñeke wentru ñi wirintukual Biblia mu chumngelu fente falin-ngey taiñ piwkeyecheal ka chumngechi femürpuafuiñ. Kiñe tüfachi pu wentru fey ti apostol Juan (1 Juan 3:⁠11, 12).

3. Juan ñi wirintukuel mu, ¿chem nütramkay fentren rupa?

³ Tañi carta mu, Juan fentren rupa feypi pu cristiano ñi  welukonke piwkeyewal. Tañi Evangelio mu Juan fentren rupa nütramkay ti piwkeyewün mu. Ti kakelu küla Evangelio fente nütramkalayngün ti piwkeyewün mu chumngechi ñi femün Juan tañi Evangelio mu. Juan niekefuy pataka tripantu peno feychi wirintukulu tañi Evangelio ka tañi küla carta. Ñi wirintukuel ta Juan enseñalkeeiñmu müley taiñ piwkeyenkechi femal itrokom dungu (1 Juan 4:⁠10, 11). Juan alüñmay ñi adümal feytachi kimeltun.

4. Juan, ¿rumel piwkeyekefuy kakelu che?

⁴ Juan petu wechengelu, kiñeke mu müte piwkeyechekelafuy. Kiñe rupa Juan ka kakelu discipulo compañkiyawülfi Jesus, fey rumeyngün ta Samaria waria mu. Welu feychi waria mu kiñeke che pilafuy ñi llowaetew engün. ¿Chumürkey am ta Juan? Juan Santiaw engu feypifi ta Jesus nagpayafel kütral wenu mu ñi apümkayafiel engün (Luka 9:⁠52-56). Ka kiñechi Juan müte piwkeyelafi kakelu pu apostol. Juan Santiaw engu ayülefuy chi ñi kiñeñtrür müleal Jesus engün wenu mu. Feymu feypipelafingu tañi ñuke ñi feypimeafiel ta Jesus: “Kiñe tañi epu püñeñ anüpupe eymi tami man ad püle, fey kangelu ñi püñeñ, tami wele ad püle”. Pu kakelu apostol kimlu tüfachi dungu, rume illkuyngün (Mat. 20:⁠20, 21, 24). Fente welulkawlu rume ta Juan, Jesus piwkeyenieeyew (Juan 21:⁠7).

5. ¿Chem ngüneduamaiñ tüfachi trokiñ mu?

⁵ Tüfachi trokiñ mu ngüneduamaiñ Juan tañi femün ka chem ñi wirintukuel ti piwkeyewün mu. Ka peaiñ chumngechi pengelafuiñ taiñ piwkeyefiel taiñ pu peñi ka pu lamngen. Ka peaiñ kiñe falin dungu pu ngen familia ñi pengelelafiel piwkeyen tañi pu familia.

6. ¿Chumngechi pengeli Jewba taiñ piwkeyeetew?

⁶ Kiñeke che rakiduamafuy ti piwkeyewün müley piwke mu müten ka kimfalngekey piwkeyenkechi dungun mu ta che. Welu taiñ rüf piwkeyecheal, pengelaiñ taiñ femken mu (ka ngüneduamafuymi Santiaw 2:⁠17, 26). Rakiduamnge tüfa, Jewba piwkeyenieeiñmu (1 Juan 4:⁠19). Feymu Biblia mu feypikeeiñmu taiñ piwkeyeetew (Sal. 25:⁠10; Rom. 8:⁠38, 39). Doyelchi may tañi femün mu pengelkeeiñmu taiñ piwkeyenieetew. Juan feypi: “Ngünechen pengeleleiñmew taiñ piwkeyeetew feychi werkülu tañi kiñen Fotüm ta tüfachi mapu mew femngechi taiñ nieal rumel mongen ta kidu ñi Fotüm mew” (1 Juan 4:⁠9). Jewba wültukuy ñi sakin Fotüm  ñi kutrankawal ka tañi layal iñchiñ mew (Juan 3:⁠16). Feymu rüf kimnieiñ taiñ piwkeyenieetew Jewba.

7. ¿Chumngechi pengeli ñi piwkeyechen Jesus?

⁷ Jesus feypifi tañi pu inanieetew tañi piwkeyefiel (Juan 13:⁠1; 15:⁠15). Pengeli ñi piwkeyefiel ta che re tañi feypin mu no, welu tañi femün mu may. Feymu feypi: “Tati doy fütra piwkeyen tañi nieafel ta kiñe che fey tañi wülal kidu ñi mongen kütu ñi weni mew” (Juan 15:⁠13). Kimlu iñchiñ ñi femün Jewba ka Jesus kom iñchiñ mu, ¿chem mülefuy taiñ femal? Peafiyiñ.

8. Ñi feypin 1 Juan 3:⁠18, ¿chem müley taiñ femal?

⁸ Femliyiñ kom ñi feypin Jewba ka Jesus, femngechi pengelaiñ taiñ piwkeyefiel (Juan 14:⁠15; 1 Juan 5:⁠3). Jesus werküeiñmu taiñ welukentu piwkeyewal (Juan 13:⁠34, 35). Feymu feypiafiyiñ taiñ pu peñi, pu lamngen taiñ piwkeyefiel. Welu ka pengelaiñ taiñ femken mu (papeltunge 1 Juan 3:⁠18). Feymu, ¿chumngechi pengelafuiñ taiñ pu peñi, pu lamngen taiñ piwkeyefiel? Peafiyiñ.

9. Fente ñi piwkeyechefe ngen, ¿chumi ta Juan?

⁹ Juan pifule, mülenagafuy tañi chaw mu ñi challwayal, fey ñi ngülümal plata. Welu doyümi ñi kelluafiel che tañi kimafiel Jesus ka Jewba. Welu femngechi femlu, rume kutrankawi. Juan inakangey ka kayñetungey tañi amuldungun mu. Dew füchalu kechanentungey ka mapu mu (Hecho 3:⁠1; 4:⁠1-3; 5:⁠18; Apok. 1:⁠9). Juan presulefuy rume, pengeli ñi piwkeyechefe ngen. ¿Chumngelu feypiafuiñ? Feychi presulelu Patmo pingechi wapi mu, Juan wirintukufi ti lifru Apokalipsi ka werkülelfi tati pu trawünche, fey ñi kimal engün chem dungu ñi rupayal (Apok. 1:⁠1). Fey wüla peno lifreletulu wirintukufi ti lifru yenielu kidu ñi üy. Kafey wirintukuy küla carta ñi yafültukuafiel tañi pu peñi ka pu lamngen. ¿Chumngechi inayentuafuiñ ñi femün ta Juan? Ngüneduamafiyiñ.

10. ¿Chumngechi pengelafuiñ taiñ piwkeyefiel ta che?

¹⁰ Weküfü ñi ngünenieelchi pu che ayülefuyngün taiñ femal kidu taiñ duam müten, taiñ ngülümal fentren plata, falin chengeal. Welu küme dulliliyiñ chem chumal taiñ mongen mu, pengelafuiñ taiñ piwkeyefiel tati pu che. Feymu wall Mapu püle, Jewba tañi pu che doyümkey ñi amuldungual ka kelluafiel che tañi kimafiel ta Jewba. Kiñeke fill antü küdawkey ñi kimeltucheal.

11. Taiñ pu peñi ka pu lamngen, ¿chumngechi pengelkey ñi piwkeyefiel ta Jewba ka ñi welukonke piwkeyewken?

¹¹ Fentren peñi ka pu lamngen rume küdawkeyngün ñi eluafiel kom tañi duamnieel tañi familia, welu fillke dungu mu kelluntukukeyngün Jewba tañi küdaw. Kiñeke kellukonkeyngün rupayüm nüyün, mangiñ, lüfkon ka fillke dungu. Kakelu küdawkey dewmarukan mu. Ka kom iñchiñ kelluntukuafuiñ plata mu. Tüfachi pu peñi ka pu lamngen femkeyngün tañi piwkeyefiel mu ta Jewba ka tati pu che. Fillke semana amukeiñ trawün mu ka wiñoldungukeiñ tüfa mu. Femngechi pengelkeiñ taiñ piwkeyefiel taiñ pu peñi ka pu lamngen. Cansaleiñ rume, amukeiñ ta trawün mu. Müllmüllküleiñ rume, wiñoldungukeiñ. Rupamekeiñ rume wedake dungu mu, yafüluwkeiñ puwiyüm trawün mu. Ka yafüluwkeiñ afiyüm taiñ trawün (Eb. 10:⁠24, 25). Rume mañumküleiñ  tañi küme küdawken taiñ pu peñi ka pu lamngen.

12. ¿Ka chumngechi pengelkefuy Juan ñi piwkeyefiel tañi pu peñi ka pu lamngen?

¹² Juan sakikefuy tañi pu peñi ka pu lamngen, welu ka femngechi ngülamtufi engün, femngechi pengeli ñi piwkeyefiel. Kiñe tañi carta mu, Juan sakifi tañi pu peñi ka tañi pu lamngen ñi maneluwkülen Jewba mu ka tañi küme femün. Welu ka femngechi küme ngülamtufi engün tañi culpanoal (1 Juan 1:⁠8–2:⁠1, 13, 14). Ka femngechi sakiafiyiñ taiñ pu peñi ka pu lamngen ñi küme femken engün. Welu ngüneduamliyiñ ñi epe welulkawkülen kiñe peñi kam kiñe lamngen, piwkeyenkechi ngülamtuafiyiñ, femngechi pengelaiñ taiñ piwkeyefiel. Küdawngeafuy ngülamtuafiel kiñe weni, welu Biblia feypi pu rüf weniwen welukentu ngülamtuwkey (Prov. 27:⁠17).

13. ¿Chem müley taiñ femnoal?

¹³ Kiñeke mu taiñ pengelal taiñ piwkeyefiel pu peñi, pu lamngen, ngünewkeiñ taiñ femnoal kiñeke dungu. Feymu pürüm lladküfemkelaiñ ñi feypin mu engün. Kiñe rupa petu mülepalu Jesus Mapu mu, feypifi tañi pu inanieetew ñi iñmayaetew ñi cuerpo ka putuñmayaetew ñi mollfüñ, fey ñi nieal engün ta rumel mongen (Juan 6:⁠53-57). Fentren che inakefilu ta Jesus nüngaytuyngün ñi feypin, feymu elkünutufingün. Welu femngechi femlayngün Jesus tañi pu kümeke weni, kiñe tüfa ta Juan. Jesus tañi pu inanieetew ka adümlayngün Jesus tañi feypin, feymu ka femngechi afmatulewepelayngün. Tüfa engün welulkawkülelu trokilafingün ta Jesus ka illkulayngün rume. Kimniefuyngün Jesus ñi rüf dungu piken, feymu maneluwingün müten (Juan 6:⁠60, 66-69). Rume falin-ngey taiñ pürüm lladküfemnoal taiñ pu weni ñi feypin mu. Doy may küme adümnofiliyiñ tañi feypin engün, eluafiyiñ taiñ feypiaetew chem ñi rüf küpa pifel (Prov. 18:⁠13; Ecl. 7:⁠9).

14. ¿Chumngelu ngelay taiñ üdeafiel taiñ pu peñi, pu lamngen?

¹⁴ Juan ka ngülamtueiñmu taiñ üdenoafiel taiñ pu peñi ka pu lamngen. Inanoliyiñ tüfachi ngülam, Weküfü katrükonafuy (1 Juan 2:⁠11; 3:⁠15). Tüfa rupay pu wünenke cristiano ñi antü mu. Weküfü eluwkülefuy ñi üdewal pu cristiano,  fey ñi wüdamkayafiel engün. Feychi Juan wirintukulu tañi carta, konpuyngün kiñeke wentru trawünche mu ka ayüfuyngün ñi wüdamkayafiel tati trawünche. Kiñe tüfa Diotrefe pingefuy. Ka yamkelafi pu longkolelu witrankontupakelu tati trawünche. Ka ayüfuy ñi kechanentuafiel ti trawünche mu pu llowfilu tati pu witran. ¡Weda piwkengefuy ta Diotrefe! (3 Juan 9, 10). Fantepu mu, Weküfü chumkey rume ñi wüdamkayafiel tati trawünche. Chumkawnorume ngelay taiñ üdeafiel taiñ pu peñi, pu lamngen, doy may taiñ kelluafiel.

15. ¿Chem müley ñi kimnieal pu ngen familia?

¹⁵ Ti ngen familia müley ñi eluafiel tañi pu che kom tañi duamnieel, femngechi pengelelkefi tañi piwkeyefiel (1 Tim. 5:⁠8). Welu müley tañi kimnieal doy falin-ngey kelluafiel tañi pu che ñi poyeafiel ta Jewba (Mat. 5:⁠3). Rakiduamaiñ chem ñi femün Jesus mülepalu Mapu mu. Jesus epe lalelu ti orkon mamüll mu, rakiduamyeniefi tañi pu che. Feychi mu inafülkülefuy Jesus tañi ñuke ka Juan. Jesus lalefuy rume, feypifi ta Juan ñi cuidalelaetew tañi ñuke (Juan 19:⁠26, 27). Maria niekefuy kakelu püñeñ, tüfa engün eluafeyew kom tañi duamnieel tañi mongeluwam. Welu inakelafuyngün ta Jesus, feymu kellulayafuyngün tañi ñuke ñi poyenieafiel ta Jewba. Feymu Jesus feypifi ta Juan ñi femal tüfachi dungu.

16. Juan, ¿chumngelu fentren duam niefuy?

¹⁶ Juan fentren duam niekefuy. Apostol ngefuy, feymu müna amuldungukefuy. Kafey Juan kurengefuy chi. Femfule, elukefuy tañi pu che chem tañi duamnieel engün ka kellukefuy ñi fülküleal ta Jewba mu (1 Kor. 9:⁠5). Ñi femün ta Juan, ¿chem enseñalkefi tati pu ngen familia? Ngüneduamafiyiñ.

17. Ti ngen familia, ¿chumngechi pengelafuy ñi piwkeyeniefiel tañi pu che?

¹⁷ Pu ngen familia fentren duam niey. ¿Chumngelu am? Müley ñi küme küdawfe ngeal, femngechi peetew mu ta che ñi püramyeafiel ta Jewba (Efes. 6:⁠5, 6; Tito 2:⁠9, 10). Kiñeke ngen familia longkoley trawünche mu kam siervo ministerial ngeyngün, feymu müley ñi yafültukuafiel pu peñi ka pu lamngen ka koneltual amuldungun mu. Welu ka femngechi müley ñi  kiñentrür estudiayal ta Biblia tañi pu che engün. Tati ngen familia chumkey rume ñi tremoleal tañi pu che, ñi ayüwküleal engün ka ñi fülküleal ta Jewba mu. Femle ti ngen familia, pengelelafi tañi pu che fente tañi piwkeyeniefiel, fey tüfa engün müna mañumküleay (Efes. 5:⁠28, 29; 6:⁠4).

18. ¿Chem küme kimniefuy Juan?

¹⁸ Juan fentren tripantu mongelefuy. Fillke kümeke dungu mu rupay, welu ka femngechi rupay wedake dungu mu. Femfulu rume, eluwi ñi inayal kom tañi werküel ta Jesus, feymu piwkeyefi tañi pu peñi, tañi pu lamngen. Juan rume kimniefuy Jewba ka Jesus ñi piwkeyenieetew ka kimniefuy ñi kellungeal chem dungu rume rupafule (Juan 14:⁠15-17; 15:⁠10; 1 Juan 4:⁠16). Juan piwkeyefi tañi pu peñi, tañi pu lamngen. Pengelelfi kom tañi femün mu. Weküfü ka tañi pu inanieetew no rume katrütulaeyew tañi femal tüfa.

19. 1) Ñi feypin 1 Juan 4:⁠7, ¿chem eluwaiñ taiñ femal? 2) Femliyiñ, ¿chumlerpuaiñ?

¹⁹ Juan ñi antü mu reke, tüfachi Mapu ngünenieeyew tati Weküfü (1 Juan 3:⁠1, 10). Feyta piwkeyen-ngelay, feymu ayülay taiñ piwkeyeafiel taiñ pu peñi, taiñ pu lamngen. Welu eluwlayaiñ taiñ katrütuaetew ti Weküfü. Doy may eluwküleaiñ taiñ piwkeyeafiel taiñ pu peñi ka taiñ pu lamngen. Pengelelafiyiñ taiñ feypin mu ka taiñ femün mu. Femliyiñ, koneltuaiñ Jewba ñi fütra familia mu ka rume ayüwküleaiñ (papeltunge 1 Juan 4:⁠7).