1. Diosajj wal munasistu, ¿uk yatisajj kunjämakis jikjjatastan?

“DIOSAJJ munasiñawa” sasaw apóstol Juanajj qellqäna (1 Juan 4:8). Uka jukʼa arunakajj akwa amuytʼayistu: Jehová Diosaw jakañ vida churirejja, Juparakiw munasiñsa utjayaraki. Jehová Diosajj wal munasistu, uka munasiñapaw jan ajjsarayasiñataki, kusisitäñatak yanaptʼistu.

2. 1) Mateo 22:37-40 textorjamajja, ¿kawkïrinakas pä jachʼa mandamientonakajja? 2) ¿Kunatsa payïr mandamientor istʼañajj chʼamakïspa?

² Cristianonakajj munasirïpjjaniti janicha uk janiw ajllipkaspati, jupanakajj munasirïpjjañapawa, ukajj mä mandatowa (Mateo 22:37-40 liytʼañataki). Jehová Diosar jukʼamp uñtʼtan ukhajja, nayrïr mandamientor istʼañajj facilakiwa. ¿Kunatsa? Jehová Diosajj perfecto Diosawa, munasiñampipuniw uñjistu, jiwasat llakisitapsa uñachtʼayarakistuwa. Ukampis payïr mandamientor istʼañajj chʼamakïspawa. ¿Kunatsa? Jilat kullakanakajj jiwasjam pantjasirïpjjarakiwa, awisajj arsutapampi luratapampiw chuym ustʼayapjjestaspa. Ukatwa Diosajj Biblia qellqerinakat yaqheparojj kunatsa ukat kunjamsa maynit maynikam munasiñ uñachtʼayasipjjaspa uk qellqayäna. Jupanakat maynejj apóstol Juanänwa (1 Juan 3:11, 12).

3. ¿Kunsa apóstol Juanajj qhanstayäna?

³ Kawkïr libronaktï Biblian qellqkäna ukanjja, cristianonakajj munasirïpjjañasawa sasaw apóstol Juanajj qhanstayäna. Cheqas Mateo, Marcos, Lucas uka kimspach Evangelionakajj qhawqhtï munasiñ toqet parlki ukat sipanjja sutip apki uka Evangelionwa munasiñ toqet jukʼamp parli. Uka Evangeliop qellqkäna, kimsa cartanakap qellqkäna ukhajja, apóstol  Juanajj mä 100 maranakanëjjänwa. Cristianonakajj munasiñatwa kuns lurapjjañapa, ukwa uka libronakajj yatichistu (1 Juan 4:10, 11). Apóstol Juan pachpasa, tiempompejj munasirïñ yateqarakïnwa.

4. ¿Apóstol Juanajj mayninakar munasiñ uñachtʼayapunirïnti?

⁴ Juanajj waynäskäna ukhajja, awisajj janiw munasiñ uñachtʼayirïkänti. Mä kutejja, Jesusampi discipulonakapampejj Jerusalenar viajkasaw Samaria cheq pasapjjäna. Samariankir mä jiskʼa markanjja, janiw jupanakar katoqapkänti. ¿Uk uñjasajj kunsa Juanajj luräna? ‘Janit alajjpachat nina saraqaniñapatak mayipkirista, ukhamat uka jaqenakar qʼal jiwarayañapataki’ sasaw Jesusar jisktʼäna (Luc. 9:52-56). Yaqha kutinjja, janiw mayni apostolonakar munasitap uñachtʼaykänti. Amuyatajja, jupampi Santiago jilapampejj Jesusajj apnaqjjani ukhajj jupamp chika qontʼasiñwa munapjjäna, ukatwa mamaparojj Jesusar uk mayiñapatak iyawsayapjjäna. Uk yatisajj mayni apostolonakajj wal colerapjjäna (Mat. 20:20, 21, 24). Juanajj ukhamsa pantjaskchïnjja, Jesusajj jupar munasïnwa (Juan 21:7).

5. ¿Kunanakatsa aka yatichäwin yatjjataskañäni?

⁵ Aka yatichäwinjja, apóstol Juanan sarnaqäwipata, kunanaktï munasiñ toqet qellqkäna ukanakatwa yatjjataskañäni. Ukatjja, kunjamsa jilat kullakanakasar munasitas uñachtʼaysna, kunjamsa familia pʼeqtʼirinakajj familiapar munasipjjatap uñachtʼayapjjaspa ukanakatwa yatjjataskañäni.

6. ¿Jehová Diosajj kunjamsa munasitap uñachtʼayistu?

⁶ Maynitï maynir munaschi ukhajja, janiw arunakampik munasitap uñachtʼaykiti. Jan ukasti luratanakapampiw uñachtʼayi (Santiago 2:17, 26 uñjjattʼarakïta). Sañäni, Jehová Diosajj wal munasistu (1 Juan 4:19). Qhawqsa munasistu ukjja Biblia toqew suma arunakampi sistu (Sal. 25:10, TNM; Rom. 8:38, 39). Janiw munasitap arunakampik siskistuti, jan ukasti luratanakapampiw uñachtʼayistu. Apóstol Juanajj akham sänwa: “Diosajj mä sapa Yoqaparuw akapachar khitanïna, ukhamat jupïpan wiñay jakañ katoqañasataki, ukhamatwa Diosan munasiñap uñjtanjja” sasa (1 Juan 4:9). Jehová Diosajja, jiwasanakar munatap laykuw yoqapan tʼaqesiñapsa jiwañapsa jan jarkʼkänti (Juan 3:16). Ukatwa jiwasar munasitapat jan pächasktanti.

7. ¿Kunjamsa Jesusajj jiwasar munasitap uñachtʼayäna?

⁷ ¿Jesusat kamsaraksnasa? Jupajj discipulonakaparojj munasipjjsmawa sasaw säna  (Juan 13:1; 15:15). Discipulonakapar munasitapsa jiwasar munasitapsa janiw arunakampik siskänti, jan ukasti luratanakampiw uñachtʼayäna. Jupajj akham sänwa: “Khititï jakañap amigonakap layku churki ukat sipansa jukʼamp munasiñanejj janiw utjkiti” sasa (Juan 15:13). Kuntï Jehová Diosampi Jesusampejj jiwasar munasipjjatap layku lurapkäna uk yatisajja, ¿kunsa jiwasajj lurañasa?

8. 1 Juan 3:18 textorjamajja, ¿kunsa lurañasa?

⁸ Jehová Diosaru Jesusar istʼasaw jupanakar munasitas uñachtʼaytanjja (Juan 14:15; 1 Juan 5:3). Ukampis Jesusajja, maynit maynikam munasipjjam sasaw ewjjtʼawayistu (Juan 13:34, 35). Uka munasiñjja janiw jilat kullakanakasarojj arunakasampik sañasäkiti, jan ukasti luratanakasampiw uñachtʼayañasa (1 Juan 3:18 liytʼañataki). Ukhamajj ¿kunanaksa jupanakar munasitas uñachtʼayañatakejj lursna?

9. ¿Kunsa apóstol Juanajj munasiñat luräna?

⁹ Apóstol Juanajj tatapampi chawlla katuña negociopan trabajiñatak quedasisajja, walja qollqwa ganaspäna. Uk lurañat sipansa, jiwañkamaw Jehová Diosata Jesusat kunatï cheqäki uk jaqenakar yatichawayäna. Ukham jakañ ajllitapajj janiw faciläkänti ¿Kunatsa? Arknaqataw uñjasïna, yaqha markar apayataw patak maranak tukuyajj uñjasirakïna, ukapachajj wali edadanëjjänwa (Hech. 3:1; 4:1-3; 5:18; Apoc. 1:9). Jesusat predicatap layku carcelan jistʼantatas uñjaskchïnjja, mayninakat llakisitap uñachtʼayaskakïnwa. Patmos islankkasajja, kuna visionanaktï Diosat katoqkäna ukanak qellqasajj congregacionanakaruw apayäna, ukhamat “kunatï mä jukʼa tiempot paskani” ukanak yatipjjañapataki (Apoc. 1:1). Patmos islat antutatäjjäna uka qhepatwa Jesusan jakäwipata, predicatapat qellqäna. Jilat kullakanakar chʼamañchtʼañatakejj kimsa cartanakwa qellqarakïna. ¿Kunjamsa apóstol Juanat yateqasisajj jilat kullakanakat llakisitas uñachtʼaysna?

10. ¿Kunjamatsa jaqenakar munasitas uñachtʼaysna?

¹⁰ Kuntï vidasamp lurkañäni ukampiw jaqenakar munasitas uñachtʼaysna. Supayan apnaqat akapachajja, qollqe jikjjatañataki jan ukajj wali uñtʼatäñataki chʼamassa tiempossa aptʼassna ukwa muni. Ukampis aka oraqpachanjja, walja jilat kullakanakaw predicañataki tiempo apsusipjje, jaqenakar Jehová Diosar jakʼachasipjjañapatakis yanaptʼapjjaraki. Yamas yaqhepajj sapüruw predicapjje, yatichapjjaraki.

11. Jehová Diosar jan jitheqtas serviri jilat kullakanakajj ¿kunjamsa Diosaru jilat kullakanakar munasitap uñachtʼayapjje?

¹¹ Diosar jan jitheqtas serviri walja jilat kullakanakajja, kunanakatï jupatakisa familiapatakis munaski uk jikjjatañatakejj sapüruw trabajipjje. Ukhamäkchisa, qhawqtï lurirjamäki ukampiw Diosan markapar yanaptʼapjje. Sañäni, yaqhepajj jan waltʼäwinak utjki ukanakanwa yanaptʼapjje, yaqhepasti Tantachasiñ Utanaka ukat yaqha ukhamanakajj luraski ukanwa yanaptʼapjjaraki. Ukampis taqeniw obra mundial ukar donacionanakapampi yanaptʼapjjarakispa. Ukanak lurasaw Diosar munasipjjatapa, jaqe masipar munasipjjatap uñachtʼayapjje. Ukat jiwasanakajja qaritäkasas tantachäwinakar sapa semana sarasaw jilat kullakanakar munasitas uñachtʼaytanjja. Arstʼañ ajjsarayaskasas arstʼapuntanwa, problemanïkasas tantachäwi janïr qalltkipana jan ukajj tukuyjjepan mayninakar chʼamañchtʼapuntanwa (Heb. 10:24, 25).  Taqe ukanak jilat kullakanakan lurapjjatapat wal yuspärtanjja.

12. Apóstol Juanajj ¿kun lurasas jilat kullakanakapar munasitap uñachtʼayarakïna?

¹² Apóstol Juanajj jilat kullakanakar felicittʼasa, ewjjtʼasaw jupanakar munasitap uñachtʼayäna. Sañäni cartanakapanjja, Diosar confiyapjjatapata suma luräwinak lurapjjatapat felicitänwa, juchar jan purtʼasiñ toqetsa qhanwa ewjjtʼarakïna (1 Juan 1:8-2:1, 13, 14). Jiwasanakajj ukhamarakiw jilat kullakanakarojj sum lurapjjatapat chʼamañchtʼañasa. Ukampis maynin jan wal luraskatap amuyañäni ukhajja, munasiñampiw kuntï lurañapäki uk ewjjtʼañasaraki. Ukatakejj jan ajjsarirïñaw wakisi. Suma amigonakajj purapatwa afiltʼasipjje, mä arunjja purapatwa cheqañchtʼasipjje sasaw Bibliajj qhanañchi (Prov. 27:17).

13. ¿Kunsa jan lurañasäki?

¹³ Yaqhanak jan lurasaw jilat kullakanakar munasitas uñachtʼayaraksna. Sañäni, kuna jan waltï sapkistani ukhajj janiw jankʼak chuym ustʼayasiñasäkiti. Jesusajj janïr jiwkäna uka nayrajj kunas pasäna uk amtañäni. Jupajja, ‘khititejj jañchij manqʼkani, wilajsa umkani ukaw wiñay jakañ katoqani’ sasaw discipulonakapar säna (Juan 6:53-57). Uk istʼasajj waljaniw chuym ustʼayasisajj jaytanukjjapjjäna. Ukampis cheqpach amigonakapajj janiw jaytanukupkänti, ukanakat maynejj apóstol Juanänwa. Kunsa ukamp sañ munaskäna uk janiw amuyapkänti, inas sustjasipjjarakchïna, ukampis janiw chuym ustʼayasipkänti, ni pantjaspachawa sasas amuyapkänti. Antisas cheq parlirïtap yatisajj taqe chuymaw confiyapjjäna (Juan 6:60, 66-69). Jiwasajja, kunanaktï jilat kullakanakajj sapkistu ukanakat jankʼak chuym ustʼayasiñat sipansa, kunsa sañ munistu uk pacienciampiw istʼañasa (Prov. 18:13; Ecl. 7:9).

14. ¿Kunatsa jilat kullakanakasar jan uñisiñasäki?

¹⁴ Apóstol Juanajj janiw jilat kullakanakasar uñisiñasäkiti sasaw ewjjtʼarakistu. Ukar jan istʼkañäni ukhajja, Supayajj munañaparjamaw jan walinak lurayistaspa (1 Juan 2:11; 3:15). Ukaw Diosan yaqhep servirinakaparojj khä nayra patak maranak tukuyarojj pasäna. Supayajja, jupanakkam uñisisipjjañapataki, tʼaqjtayañatakiw wal chʼamachasïna. Apóstol Juanajj cartanakap qellqkäna uka tiempotakejja, Supayjam chuymani jaqenakaw congregacionan utj-jjäna. Ukanakat  maynejj Diótrefes chachänwa, jupajj mä congregacionaruw tʼaqjtayaskäna. Jerusalenankir jilïr irpirinakajj congregacionanak tumptʼirinakar khitkäna ukanakarus janiw respetomp uñjkänti. Diotrefesajj wali jachʼa jachʼa tukur jaqënwa. Khitinakarutï uñiskäna ukanakar katoqtʼañ munir jilat kullakanakarojj congregacionat jaqsuñ kunwa munirïna (3 Juan 9, 10). Jichhürunakanjja, Supayajj kunaymanitwa Diosan markapar tʼaqjtayañatak chʼamachasiskaki. Janipuniw jilat kullakanakasar uñisiñasäkiti, yanaptʼañasapuniwa.

15. ¿Kunsa familia pʼeqtʼirinakajj janipun armasipjjañapäki?

¹⁵ Familia pʼeqtʼirinakajja, kunanakatï jakañatak munaski uk churasaw familiapar munasipjjatap uñachtʼayapjje (1 Tim. 5:8). Ukampis Jehová Diosamp sum apasipjjañapatak familiapar yanaptʼañaw nayrankañapa, uk janipuniw armasipjjañapäkiti (Mat. 5:3). Kunsa Jesusajj luräna uk uñjañäni. Juan Evangeliorjamajja, Jesusajj lawan chʼakkatatäkäna ukhas familiapat janiw armaskänti. Apóstol Juanampi Jesusan María mamapampejja, Jesusajj chʼakkatatäkäna uka cheqankasipkänwa, wal tʼaqeskasasa Jesusajj mamapar cuidañapatakejj Juanaruw encargäna (Juan 19:26, 27). Mariarojj mayni wawanakapaw kunanakatï jakañatak munaski uk churapjjaspäna. Ukampis amuyatajj jilanakapat janïraw maynis Jesusan discipulopäkänti. Ukatwa Jesusajj jañchi toqetsa Diosar serviñ toqetsa mamapar janipun kunas faltañapatak segurtʼasïna.

16. ¿Juanajj kuna luräwinakanïnsa?

¹⁶ Juanajj walja luräwinakanïnwa. Niyakejjay apostolöchïnjja, predicacionan wali yateqaskayäñapänwa. Inas esposanirakïchïna. Ukhamajj kunatï jakañatak munaski uka toqetsa Diosamp sum apasin toqetsa familiapar cuidañapänwa (1 Cor. 9:5). ¿Kunsa familia pʼeqtʼirinakajj jupat yateqasipjjaspa?

17. ¿Familia pʼeqtʼirinakajj familiapan kuna luräwinakanïpjjesa?

¹⁷ Familia pʼeqtʼiri mä jilatajj walja wakiskir luräwinakanïspawa. Sañäni, jupajj suma trabajtʼirïñapawa ukhamatwa mayninakajj luratanakap uñjasin Jehová Diosar jachʼañchapjjani (Efes. 6:5, 6; Tito 2:9, 10). Congregacionan luräwinakanïchi ukhajja, jilat kullakanakaruw chʼamañchtʼañapa, cuidañapa, predicacionans wali yateqaskayäñapawa.  Esposapampi wawanakapampis jan jaytasaw Bibliat yatjjatapjjañapa. Familiapan jan kuns faltañapataki, kusisitäpjjañapataki, Diosar servisipkakiñapatak yanaptʼani ukhajja, familiapajj wal jupar yuspärani (Efes. 5:28, 29; 6:4).

18. ¿Kuna toqetsa Juanajj jan pächaskäna?

¹⁸ Apóstol Juanajj walja maranakaw jakäna, suma experiencianakanirakïnwa. Jupajj kunayman jan walinakanwa uñjasïna, ukajj Diosar serviñan aynachtʼayaspänwa, ukampis Jesusan mandamientonakaparjam lurañatakejj wal chʼamachasïna. Uka mandamientonakat mayajja, jilat kullakanakar munasiñänwa. Ukatwa Juanajj Jehová Diosampi Jesusampejj munasipjjetuwa, jan waltʼäwinakansa yanaptʼapjjapunitaniwa sasin jan pächaskänti (Juan 14:15-17; 15:9, 10; 1 Juan 4:16). Janiw Supayasa ni jupan apnaqat akapachas Juanarojj jilat kullakanakapar arunakapampi luratanakapampi munasiñ uñachtʼayañapatakejj jarkʼkänti.

19. ¿Kun lurañatakis 1 Juan 4:7 textojj chʼamañchistu, ukat kunatsa?

¹⁹ Jiwasajja, apóstol Juanjamarakiw Supayan apnaqata jan wali pachan jaktanjja, aka pachajj uñisiñampi phoqantatawa (1 Juan 3:1, 10). Supayajj jilat kullakanakasar uñissna ukwa muni, jan jupar dejkañäni ukhajj janiw puedkaniti. Ukhamajja, jilat kullakanakasar arunakasampi luratanakasampi munasitas uñachtʼayapjjapuniñäni. Ukham lurañäni ukhajja, Jehová Diosan markap taypinkatasat wali kusisitäñäniwa, janirakiw kunats arrepentiskañäniti (1 Juan 4:7 liytʼañataki).