1. Јеһованын мәһәббәти сиздә һансы һиссләри доғурур?

«АЛЛАҺ мәһәббәтдир» (1 Јәһ. 4:8). Һәвари Јәһјанын јаздығы бу садә сөзләр тәмәл һәгигәти вурғулајыр: Аллаһ һәјатын мәнбәји олдуғу кими, мәһәббәтин дә мәнбәјидир. Јеһова бизи севир! Онун севҝиси сајәсиндә өзүмүзү архајын, хошбәхт вә мәмнун һисс едирик.

2. Мәтта 22:37—40 ајәләринә әсасән, ән бөјүк ики әмр һансыдыр? Бәс нәјә ҝөрә икинҹи әмрә әмәл етмәк бизә чәтин ола биләр?

² Мәсиһиләр үчүн мәһәббәт ҝөстәрмәк сечим мәсәләси дејил, бу, әмрдир. (Мәтта 22:37—40 ајәләрини охујун.) Јеһованы јахындан таныјанда бизим үчүн биринҹи әмрә әмәл етмәк асан олур. Ахы Јеһова камилдир; О бизимлә нәвазишлә рәфтар едир, гајғымыза галыр. Амма икинҹи әмрә әмәл етмәк бизә чәтин ҝәлә биләр. Нәјә ҝөрә? Чүнки баҹы-гардашларымыз гејри-камилдир. Бундан ирәли ҝәләрәк, ола билсин, бәзән бизимлә сојуг даврансынлар, гәлбимизә дәјән нәсә десинләр. Јеһова билирди ки, бу ҹүр проблемләр олаҹаг вә буна ҝөрә дә Мүгәддәс Китаб јазарларына бир-биримизи нәјә ҝөрә вә неҹә севмәли олдуғумуза даир конкрет мәсләһәтләр јаздырыб. Бу јазарлардан бири Јәһјадыр (1 Јәһ. 3:11, 12).

3. Јәһја јазыларында нәји вурғуламышды?

³ Һәвари Јәһја јазыларында мәсиһиләрин мәһәббәт ҝөстәрмәли олдуғуну хүсусилә вурғуламышды. О, Исанын һәјаты һагда јаздығы Мүждәдә мәһәббәт мөвзусунда диҝәр үч Мүждәнин јазарынын данышдыгларынын ҹәминдән чох данышмышды. Јәһја өз адыны дашыјан Мүждәни вә үч мәктубу јазаркән тәхминән 100 јашында иди. Јеһованын илһамы илә гәләмә алынан бу јазылар ҝөстәрир ки, мәсиһинин етдији һәр бир шеј мәһәббәтдән гајнагланмалыдыр (1 Јәһ. 4:10, 11).  Амма Јәһја өзү дә буну заманла өјрәнди.

4. Јәһја башгаларына гаршы һәмишә мәһәббәтлә давраныб?

⁴ Јәһја ҹаванлығында һеч дә һәмишә мәһәббәтлә давранмырды. Мәсәлән, бир дәфә Иса шаҝирдләри илә бирликдә Сәмәријјәдән кечиб Јерусәлимә ҝедирди. Бир Сәмәријјә кәнди онлара гонагпәрвәрлик ҝөстәрмәди. Ҝөрүн Јәһја буна неҹә јанашды. О, Исаја белә деди: «Истәјирсән дејәк ҝөјдән алов ҝәлиб [кәндин бүтүн әһалисини] мәһв етсин?» (Лука 9:52—56). Башга бир һадисәдә исә о, һәвариләрә гаршы мәһәббәт ҝөстәрмәмишди. Гардашы Јагубла бирҝә о, анасыны дилә тутуб Исанын јанына ҝөндәрмишди ки, Падшаһлыгда ән шәрәфли јерләри онлара версин. О бири һәвариләр Јагубла Јәһјанын бу һәрәкәтиндән хәбәр тутанда чох әсәбиләшмишдиләр (Мәт. 20:20, 21, 24). Јәһја бу ҹүр сәһвләр етсә дә, Иса ону севирди (Јәһ. 21:7).

5. Бу мәгаләдә нәләр өјрәнәҹәјик?

⁵ Бу мәгаләдә Јәһјанын нүмунәсиндән данышаҹағыг вә онун мәһәббәтлә бағлы јаздығы бәзи фикирләри арашдыраҹағыг. Баҹы-гардашлара мәһәббәт ҝөстәрмәјин јолларыны өјрәнәҹәјик. Һәмчинин аилә башчысынын аиләсинә мәһәббәтини һансы ваҹиб саһәдә ҝөстәрмәли олдуғуну өјрәнәҹәјик.

6. Јеһова бизә мәһәббәтини неҹә изһар едиб?

⁶ Чох вахт бизә елә ҝәлир ки, мәһәббәт ҝөзәл сөзләрлә ифадә олунан хош һиссдир. Амма әсл мәһәббәт әмәлләрлә дә мүшајиәт олунмалыдыр. (Јагуб 2:17, 26 ајәләри илә әлагәләндирин.) Мәсәлән, Јеһова бизи севир (1 Јәһ. 4:19). О, севҝисини Мүгәддәс Китабда јаздырдығы ҝөзәл сөзләрлә ифадә едир (Зәб. 25:10; Ром. 8:38, 39). Амма бизи Јеһованын севҝисинә әмин едән тәкҹә Онун сөзләри јох, һәмчинин бизим үчүн етдикләридир. Јәһја јазмышды: «Аллаһ мәһәббәти бизә бу ҹүр изһар олду: Аллаһ илкин Оғлуну дүнјаја ҝөндәрди ки, онун васитәсилә һәјата говушаг» (1 Јәһ. 4:9). Јеһова биздән өтрү әзиз Оғлунун әзаб чәкиб өлмәсинә изин верди (Јәһ. 3:16). Бәли, Јеһованын бизи севдијинә зәррә гәдәр шүбһә етмәјә әсасымыз јохдур!

7. Иса бизә мәһәббәтини сүбут етмәк үчүн нә етди?

⁷ Иса шаҝирдләрини өз мәһәббәтинә әмин етмишди (Јәһ. 13:1; 15:15). О, һәвариләрини вә бизи неҹә ҝүҹлү мәһәббәтлә севдијини тәкҹә сөзләри илә јох, әмәлләри илә дә ҝөстәрмишди. Иса демишди: «Достлары  уғрунда ҹаныны фәда едән инсанын мәһәббәтиндән бөјүк мәһәббәт јохдур» (Јәһ. 15:13). Јеһованын вә Исанын бизим үчүн етдикләри үзәриндә дүшүнмәк бизи нәјә тәшвиг етмәлидир?

8. 1 Јәһја 3:18 ајәсинә әсасән, биз нә етмәлијик?

⁸ Биз Јеһоваја вә Исаја мәһәббәтимизи онларын әмринә итаәт етмәклә ҝөстәририк (Јәһ. 14:15; 1 Јәһ. 5:3). Иса әмр едир ки, бир-биримизи севәк (Јәһ. 13:34, 35). Биз баҹы-гардашларымыза мәһәббәтимизи тәкҹә сөзләримизлә јох, һәмчинин әмәлләримизлә дә ҝөстәрмәлијик. (1 Јәһја 3:18 ајәсини охујун.) Онлара олан севҝимизи ҝөстәрмәк үчүн нәләр едә биләрик?

9. Мәһәббәт һәвари Јәһјаны нәјә тәшвиг етмишди?

⁹ Јәһја атасы илә бирликдә балыгчылыг ишинә давам едиб пул газана биләрди. Амма о, өмрүнүн галаныны инсанлара Јеһова вә Иса Мәсиһ һагда һәгигәти өјрәтмәјә һәср еләди. Онун сечдији һәјат јолу һеч дә асан дејилди. О, тәгибләрә мәруз галмышды, үстәлик, ерамызын биринҹи әсринин сонларына јахын гоҹа јашында сүрҝүн олунмушду (Һәв. 3:1; 4:1—3; 5:18; Вәһј 1:9). Иса Мәсиһ һагда тәблиғ етдијинә ҝөрә һәбс олунанда белә о башгаларыны дүшүнүрдү. Мәсәлән, Патмос адасында оларкән һәвари Јәһја она назил олан вәһји гәләмә алды вә ону јығынҹаглара ҝөндәрди. Чүнки истәјирди ки, онлар «тезликлә баш верәҹәк» һадисәләрдән хәбәрдар олсунлар (Вәһј 1:1). Еһтимал ки, Патмосдан азадлыға бурахыландан сонра Јәһја Исанын һәјаты вә хидмәти һагда Мүждәни јазды. Баҹы-гардашлары руһландырыб, мөһкәмләндирмәк үчүн о һәмчинин үч мәктуб да јазмышды. Фәдакар өмүр сүрән һәвари Јәһјадан неҹә өрнәк ҝөтүрә биләрсиниз?

10. Инсанлара севҝинизи неҹә сүбут едә биләрсиниз?

¹⁰ Инсанлара севҝинизи сечдијиниз һәјат јолу илә сүбут едә биләрсиниз. Шејтан дүнјасы истәјир ки, јалныз өзүнүзү дүшүнәсиниз, бүтүн вахтынызы вә ҝүҹүнүзү өзүнүзә сәрф едәсиниз, пул газаныб, ад-сан саһиби оласыныз. Амма бүтүн дүнјада Падшаһлығын фәдакар тәблиғчиләри баҹардыглары гәдәр вахтларыны хош хәбәрин тәблиғинә сәрф едирләр, инсанлара Јеһоваја јахынлашмаға көмәк едирләр. Һәтта онлардан бәзиләри тәблиғ вә тәлим ишиндә тамвахтлы иштирак едир.

11. Бир чох садиг мәсиһи Јеһоваја вә диндашларына мәһәббәтини неҹә сүбут едир?

¹¹ Бир чох мәсиһи өзүнү вә аиләсини доландырмаг үчүн сәһәрдән ахшама гәдәр ишләмәли олур. Буна бахмајараг, бу садиг тәблиғчиләр Аллаһын тәшкилатыны баҹардыглары үсулларла дәстәкләјирләр. Мәсәлән, кимиси зәрәрчәкәнләрә јардым едир, кимиси тикинти лајиһәләриндә көмәк едир; үмумдүнја ишини ианәләрлә дәстәкләмәјә исә һамынын имканы вар. Онлары бу ишләри ҝөрмәјә Аллаһа вә инсанлара мәһәббәт тәшвиг едир. Баҹы-гардашлара мәһәббәтимизи һәр һәфтә јығынҹаг ҝөрүшләриндә иштирак едиб, шәрһләр вермәклә ҝөстәририк. Ола биләр ки, биз јорғунуг, амма јығынҹагларда иштирак едирик. Ола биләр ки, һәјәҹанланырыг, амма шәрһ веририк. Һәмчинин һамымызын өз проблеми олса да, јығынҹагдан әввәл вә сонра бир-биримизи руһландырырыг (Ибр. 10:24, 25). Баҹы-гардашлара чәкдикләри зәһмәтә ҝөрә чох миннәтдарыг!

12. Јәһја баҹы-гардашлара мәһәббәтини башга һансы јолла ҝөстәрмишди?

¹² Һәвари Јәһја диндашларына мәһәббәтини  тәкҹә онлары тәрифләмәклә јох, јери ҝәлсә, мәсләһәт вермәклә дә ҝөстәрирди. Мәсәлән, о, мәктубларында баҹы-гардашларыны иманларына вә јахшы ишләринә ҝөрә тәрифләмишди. Амма бунунла јанашы, онлара ҝүнаһ етмәмәләри илә бағлы ҹидди нәсиһәт вермишди (1 Јәһ. 1:8—2:1, 13, 14). Ејнилә, биз дә диндашларымызы јахшы ишләринә ҝөрә тәрифләмәлијик. Амма кимдәсә јанлыш дүшүнҹә вә ја вәрдишин јарандығыны ҝөрүрүксә, биз мәһәббәтдән ирәли ҝәләрәк она нәзакәтли шәкилдә лазым олан мәсләһәти верәҹәјик. Доста мәсләһәт вермәк үчүн ҹәсарәт лазымдыр. Амма Мүгәддәс Китабда дејилир ки, әсл достлар бир-бирини итиләр, башга сөзлә, бир-биринә дүзәлиш едәр (Мәс. 27:17).

13. Мәһәббәтимизи сүбут етмәк үчүн биз нә етмәмәлијик?

¹³ Бәзән исә баҹы-гардашларымыза мәһәббәтимизи нәләрисә етмәмәклә ҝөстәрә биләрик. Мәсәлән, биз онларын дедији һәр сөзә о дәгигә инҹимәјәҹәјик. Ҝәлин Исанын јерүзү һәјатынын сонуна јахын баш верән бир һадисәни јадымыза салаг. О, шаҝирдләринә демишди ки, һәјата говушмаг үчүн онун бәдәнини јемәли, ганыны ичмәлидирләр (Јәһ. 6:53—57). Онун бу сөзләри шаҝирдләрин чохуну елә дәһшәтә салмышды ки, ону тәрк етмишдиләр. Амма Јәһја да дахил олмагла, әсл достлары онун јанында галдылар, она сәдагәтли чыхдылар. Онлар да Исанын сөзләрини баша дүшмәмишдиләр, јәгин ки, мәәттәл галмышдылар. Амма онун дедикләринин сәһв олдуғуну дүшүнүб, ондан инҹимәдиләр. Әксинә, она етибар етдиләр, чүнки һәгигәти данышдығыны билирдиләр (Јәһ. 6:60, 66—69). Чох ваҹибдир ки, достумузун дедији сөздән дәрһал инҹимәјәк, әксинә, јаранан анлашылмазлығы изаһ етмәјә имкан верәк (Мәс. 18:13; Ваиз 7:9).

14. Нәјә ҝөрә нифрәтин үрәјимиздә көк атмасына гәтијјән јол вермәмәлијик?

¹⁴ Һәмчинин һәвари Јәһја бујурурду ки, баҹы-гардашлара нифрәт етмәјәк. Онун мәсләһәтинә әмәл етмәсәк, өз әлимизлә өзүмүзү Шејтанын ихтијарына верәрик (1 Јәһ. 2:11; 3:15). Биринҹи әсрин сонларында бәзиләри илә белә бир шеј баш вермишди. Һәмин вахт Шејтан Аллаһын халгы арасында нифрәт ојатмаг вә парчаланма салмаг үчүн әлиндән ҝәләни едирди. Јәһја мәктубларыны јазан вахт  бу ҹүр шејтани дүшүнҹәјә саһиб олан инсанлар јығынҹағын ичиндә идиләр. Мәсәлән, Диотреф јығынҹагда ҹидди парчаланма јарадырды (3 Јәһ. 9, 10). О, рәһбәрлик шурасынын јығынҹаглара ҝөндәрдији ағсаггаллара гаршы һөрмәтсизлик едирди. Һәтта онун севмәдији инсанлара гонагпәрвәрлик ҝөстәрәнләри јығынҹагдан говмаға чалышырды. Дикбашлығын дәрәҹәсинә бир бах! Шејтан бу ҝүн дә Аллаһын халгы арасында парчаланма јаратмаг үчүн әлләшиб-вурушур. Ҝәлин нифрәтин арамызда парчаланма јаратмасына гәтијјән јол вермәјәк!

15. Аилә башчысы нәји унутмамалыдыр?

¹⁵ Аилә башчысы аиләсини доландырмагла онлара олан мәһәббәтини ҝөстәрир (1 Тим. 5:8). Бу ваҹибдир. Амма о унутмамалыдыр ки, аиләсинин руһани тәләбатыны өдәмәк бундан да ваҹибдир (Мәт. 5:3). Иса Мәсиһ аилә башчылары үчүн бу саһәдә ҝөзәл нүмунәдир. Һәвари Јәһјанын Мүждәсинә әсасән, Иса ишҝәнҹә дирәјиндә өлүм ајағында оларкән белә аиләсини дүшүнүрдү. Һәмин вахт о, шиддәтли ағрылар чәкирди, буна бахмајараг, едам јериндә анасы Мәрјәмин јанында олан Јәһјадан хаһиш едир ки, анасынын гајғысына галсын (Јәһ. 19:26, 27). Сөз јох ки, Исанын баҹы-гардашлары Мәрјәмин мадди тәләбатларынын гајғысына галырды. Амма ҝөрүнүр, һәлә о вахт онларын һеч бири Мәсиһин давамчысы олмамышды. Буна ҝөрә Иса истәјирди ки, Мәрјәмин һәм мадди, һәм дә руһани ҹәһәтдән гајғысына галан кимсә олсун.

16. Јәһјанын һансы өһдәчиликләри вар иди?

¹⁶ Јәһјанын чохлу өһдәчиликләри вар иди. Бир һәвари кими о, тәблиғ ишинә рәһбәрлик едирди. Һәмчинин, ола билсин, о, евли иди. О, һәм аиләсини доландырмалы иди, һәм дә онларын Јеһова илә мөһкәм мүнасибәтләринин олмасынын гајғысына галмалы иди (1 Кор. 9:5). Аилә башчылары ондан нә өјрәнә биләр?

17. Нәјә ҝөрә аилә башчысынын аиләсинин руһани ҹәһәтдән гајғысына галмасы ваҹибдир?

¹⁷ Аилә башчысы олан гардашын үзәринә бөјүк мәсулијјәтләр дүшүр. Мәсәлән, Јеһованын адына шәрәф ҝәтирмәк үчүн о, ишиндә виҹданла чалышмалыдыр (Ефес. 6:5, 6; Тит. 2:9, 10). Һәмчинин ола билсин, јығынҹагда да өһдәчиликләри вар. Мәсәлән, бир  ағсаггал вә ја јығынҹаг хидмәтчиси кими, баҹы-гардашлары руһландырмалыдыр, тәблиғ ишинин тәшкили илә мәшғул олмалыдыр. Бунунла јанашы, ваҹибдир ки, о, мүнтәзәм олараг арвады вә ушаглары илә Мүгәддәс Китабы арашдырсын. Аиләсинин сағлам, хошбәхт вә Јеһова илә ҝөзәл мүнасибәтдә олмасы үчүн әлиндән ҝәләни етдијинә ҝөрә аиләси она чох миннәтдар олаҹаг (Ефес. 5:28, 29; 6:4).

18. Јәһја нәјә әмин иди?

¹⁸ Јәһја маҹәраларла долу узун бир өмүр сүрмүшдү. Амма иманыны зәифләдә биләҹәк чохлу сынагларла да үзләшмишди. Буна бахмајараг, Мәсиһин әмрләринә риајәт етмәк үчүн һәмишә әлиндән ҝәләни едирди, о ҹүмләдән баҹы-гардашларыны севмәк әмринә дә. Буна ҝөрә дә Јәһја әмин иди ки, Јеһова вә Иса ону севир вә истәнилән сынаға дөзмәси үчүн она ҝүҹ верәҹәкләр (Јәһ. 14:15—17; 15:10; 1 Јәһ. 4:16). Нә Шејтан, нә дә онун дүнјасы Јәһјаја севмәјә вә севҝисини ҝөстәрмәјә әнҝәл ола билмәди!

19. 1 Јәһја 4:7 ајәси бизи нәјә тәшвиг едир вә нәјә ҝөрә?

¹⁹ Јәһја кими, биз дә Шејтанын, бу дүнјанын нифрәт долу танрысынын идарә етдији дүнјада јашајырыг (1 Јәһ. 3:1, 10). Бахмајараг ки, о, баҹы-гардашларымызы севмәјимизи истәмир, амма биз өзүмүз буна јол вермәсәк, о, буна наил ола билмәз. Ҝәлин баҹы-гардашларымызы севмәјә гәтијјәтли олаг. Онлара олан мәһәббәтимизи һәм сөзлә ифадә едәк, һәм әмәлдә сүбут едәк. Онда Јеһованын аиләсиндә олдуғумуз үчүн севинҹ дујаҹағыг вә һәјат бизә зөвг верәҹәк. (1 Јәһја 4:7 ајәсини охујун.)