1. Huli sa pagkamuot ni Jehova, ano an namamatian mo?

“AN Diyos pagkamuot,” an isinurat ni apostol Juan. (1 Juan 4:8) Ipinapagirumdom sa sato kan simpleng mga tataramon na iyan an sarong pundamental na katotoohan: An Diyos na gikanan nin buhay, iyo man an gikanan nin pagkamuot. Namumutan nanggad kita ni Jehova! Huli sa saiyang pagkamuot, namamatian tang ligtas kita, maugma, asin kontento.

2. Sigun sa Mateo 22:37-40, ano an duwang pinakaimportanteng tugon, asin taano ta tibaad madipisilan kitang sunudon an ikaduwa kaiyan?

² Para sa mga Kristiyano, an pagpahiling nin pagkamuot bakong opsiyonal. Iyan sarong pagbuot. (Basahon an Mateo 22:37-40.) Pag midbid tang marhay si Jehova, tibaad mas pasil sa sato na sunudon an inot na tugon. Perpekto kaya si Jehova, mapagmalasakit siya asin mabuot sa sato. Pero tibaad madipisilan kitang sunudon an ikaduwang tugon. Taano? Huling an satong mga tugang—na kaiba sa pinakaharani niyatong kapwa—bakong perpekto. Kun minsan, tibaad may masabi o magibo sinda na sa hiling ta bakong mapagmalasakit asin bakong mabuot. Aram ni Jehova na mangyayari ini sa sato, kaya pinasabngan niya an nagkapirang kagsurat kan Bibliya na iiba an espesipikong sadol kun taano ta dapat kitang magpahiling nin pagkamuot sa lambang saro asin kun paano gigibuhon iyan. Saro sa mga kagsurat na iyan iyo si Juan.—1 Juan 3:11, 12.

3. Ano an idinuon ni Juan?

³ Sa mga isinurat ni Juan, idinuon niya na an mga Kristiyano dapat na magpahiling nin pagkamuot. Sa katunayan, sa pagkasaysay niya manungod sa buhay ni Jesus, mas dakul na beses na  ginamit ni Juan an mga tataramon na “pagkamuot” asin “namutan” kisa sa tulong iba pang kagsurat kan Ebanghelyo. Mga sanggatos anyos na kaidto si Juan kan isurat niya an saiyang Ebanghelyo asin an tulo niyang surat. Itinutukdo kan ipinasabong na mga librong iyan sa Bibliya na dapat ipahiling nin sarong Kristiyano an pagkamuot sa gabos niyang ginigibo. (1 Juan 4:10, 11) Pero, kinaipuhan ni Juan nin panahon para manudan iyan.

4. Pirmi daw na nagpahiling si Juan nin pagkamuot sa iba?

⁴ Kan hoben pa si Juan, dai siya pirming nagpahiling nin pagkamuot. Halimbawa, may sarong pagkakataon na nagbaklay kaidto si Jesus asin an saiyang mga disipulo pa-Jerusalem asin nangagi sinda sa Samaria. May sarong baryo nin mga Samaritano na dai sainda nagin mapag-istimar. Ano an ginibo ni Juan? Naghapot siya kun puwede sindang magpababa nin kalayo tanganing tumtumon an gabos na nakaistar sa baryo! (Luc. 9:52-56) Sa saro pang pagkakataon, dai nakapahiling si Juan nin pagkamuot sa mga kapwa niya apostol. Minalataw na sinabi niya asin kan tugang niyang si Santiago sa saindang ina na magdulok ki Jesus para hagadon digdi na tawan sinda nin prominenteng posisyon sa Kahadian sa kataid niya mismo. Kan maaraman kan ibang apostol an ginibo ni Santiago asin Juan, angguton sinda! (Mat. 20:20, 21, 24) Alagad sa ibong kan gabos na salang nagibo ni Juan, namutan siya ni Jesus.—Juan 21:7.

5. Ano an sisiyasaton ta sa artikulong ini?

⁵ Sa artikulong ini, sisiyasaton ta an halimbawa ni Juan asin an nagkapirang bagay na isinurat niya manungod sa pagkamuot. Mantang ginigibo ta iyan, manunudan ta kun paano kita makakapahiling nin pagkamuot sa satong mga tugang. Manunudan man niyato an sarong mahalagang paagi na maipapahiling nin sarong payo nin pamilya na namumutan niya an saiyang pamilya.

6. Paano ipinahiling ni Jehova an saiyang pagkamuot sa sato?

⁶ Sa parati, iniisip ta na an pagkamuot sarong marahayon na pagmati na ipinapahayag paagi sa mabuot na mga tataramon. Pero an tunay na pagkamuot dapat na ipahiling man paagi sa gibo. (Ikumparar an Santiago 2:17, 26.) Halimbawa, namumutan kita ni Jehova. (1 Juan 4:19) Asin ipinapahayag niya an saiyang pagkamuot paagi sa magagayon na tataramon na nasa Bibliya. (Sal. 25:10; Roma 8:38, 39) Pero kumbinsido kita na namumutan kita nin Diyos bako lang dahil sa mga sinasabi niya kundi pati man sa mga ginigibo niya. Isinurat ni Juan: “Kun manungod sa sato, an pagkamuot nin Diyos nahayag sa arog kaining paagi: isinugo nin Diyos sa kinaban an Saiyang bugtong na Aki tanganing magkamit kita nin buhay paagi sa saiya.” (1 Juan 4:9) Itinugot ni Jehova na magsakit  asin magadan para sa sato an saiyang namumutan na aki. (Juan 3:16) Mayong duda na namumutan nanggad kita ni Jehova!

7. Ano an ginibo ni Jesus para patunayan na namumutan niya kita?

⁷ Inasigurar ni Jesus sa saiyang mga disipulo na namumutan niya sinda. (Juan 13:1; 15:15) Pinatunayan niya an saiyang dakulang pagkamuot para sa sainda asin para sa sato bako sanang paagi sa mga sinabi niya kundi paagi man sa mga ginibo niya. “Mayo nin pagkamuot na malabi pa kaini,” an sabi ni Jesus, “na itao kan saro an saiyang buhay para sa mga amigo niya.” (Juan 15:13) Pag iniisip ta an ginibo ni Jehova asin ni Jesus para sa sato, dapat na mapahiro kita kaiyan na gibuhon an ano?

8. Ano an sinasabi kan 1 Juan 3:18 na dapat tang gibuhon?

⁸ Pinapatunayan ta na namumutan ta si Jehova asin si Jesus paagi sa pagsunod sa sainda. (Juan 14:15; 1 Juan 5:3) Asin espesipikong ipinagbuot sa sato ni Jesus na kamutan an lambang saro. (Juan 13:34, 35) Dai ta lang dapat ipahiling sa tataramon an pagkamuot sa satong mga tugang kundi paagi man sa mga ginigibo ta. (Basahon an 1 Juan 3:18.) Ano an espesipikong mga bagay na puwede tang gibuhon para patunayan na namumutan ta sinda?

9. Huli sa pagkamuot, ano an ginibo ni Juan?

⁹ Puwede kutang nagdanay na sana si Juan kaiba kan saiyang ama asin nagtrabaho sa negosyong paninira kan saiyang pamilya. Imbes, ginamit niya an natatada kan saiyang halawig na buhay para tabangan an iba na manudan an katotoohan manungod ki Jehova asin ki Jesus. Bakong madali an buhay na pinili ni Juan. Pinersegir siya, asin kan madali nang matapos an inot na siglo, kan gurang na siya, puwersahan siyang dinara sa ibang lugar. (Gibo 3:1; 4:1-3; 5:18; Kap. 1:9) Dawa kan nakapreso huli sa paghuhulit manungod ki Jesus, pinatunayan ni Juan na an kapakanan kan iba an iniisip niya. Halimbawa, kan siya nasa isla nin Patmos, isinurat niya an kapahayagan na itinao sa saiya asin ipinadara iyan sa mga kongregasyon tanganing maaraman ninda kun ano an “madali nang mangyari.” (Kap. 1:1) Dangan, posibleng marhay na kan paluwason na siya sa Patmos, isinurat ni Juan an saiyang Ebanghelyo manungod sa buhay asin ministeryo ni Jesus. Naggibo man siya nin tulong surat para pakusugon an saiyang mga tugang. Paano mo maaarog an pagigin mapagsakripisyo ni Juan?

10. Paano mo mapapatunayan na namumutan mo an mga tawo?

¹⁰ Mapapatunayan mo na namumutan mo an mga tawo paagi sa kun paano mo ginagamit an saimong buhay. Gusto kan sistema ni Satanas na gamiton mo sa sadiring kapakanan an bilog mong panahon asin kusog, na magmaigot na yumaman o magin sikat. Sa kabaliktaran, an mapagsakripisyong mga parabalangibog kan Kahadian sa bilog na kinaban ginagamit an pinakadakul na panahon na maitatao ninda sa paghuhulit kan maugmang bareta asin sa pagtabang sa mga tawo na rumani ki Jehova. An iba ngani sa sainda bilog na panahon na naghuhulit asin nagtutukdo.

11. Paano pinapatunayan kan dakul na maimbod na parahayag na namumutan ninda si Jehova asin an saindang mga tugang?

¹¹ Dakul na maimbod na Kristiyano an kaipuhan na magtrabaho nin bilog na panahon para masustentuhan an sadiri asin an saindang pamilya. Dawa arog kaiyan, sinusuportaran kan maimbod na mga parahayag na ini an organisasyon nin Diyos sa ano man na paaging magigibo ninda. Halimbawa, an iba nagtatabang sa pag-ayuda, may mga nagtatabang sa mga proyekto sa pagtugdok, asin an gabos igwa kan oportunidad na magdonar nin pondo para sa pambilog na kinaban na gibuhon. Ginigibo ninda iyan huling namumutan ninda an Diyos asin an saindang kapwa. Kada semana,  pinapatunayan tang namumutan ta an satong mga tugang paagi sa pag-atender sa mga pagtiripon kan kongregasyon asin pagpartisipar diyan. Dawa tibaad pagal na kita, yaon kita sa mga pagtiripon na iyan. Dawa tibaad ninenerbiyos kita, nagkokomento kita. Asin dawa gabos kita may kanya-kanyang problema, pinapakusog ta an iba bago asin pagkatapos kan pagtiripon. (Heb. 10:24, 25) Nagpapasalamat nanggad kita sa mga ginigibo kan satong mga kapwa parahayag!

12. Ano an saro pang paagi na pinatunayan ni Juan na namumutan niya an saiyang mga tugang?

¹² Pinatunayan ni Juan na namumutan niya an saiyang mga tugang bako sana sa pagtao nin komendasyon sa sainda kundi sa pagtao man nin konseho. Halimbawa, sa saiyang mga surat, kinomendaran ni Juan an mga tugang sa saindang pagtubod asin marahay na mga gibo, pero tinawan niya man sinda nin direktang konseho manungod sa kasalan. (1 Juan 1:8–2:1, 13, 14) Siring man, kaipuhan tang komendaran an mga tugang sa marahay na mga bagay na ginigibo ninda. Pero kun marisa ta na an saro nagkakaigwa na nin maraot na ugali o paggawi, maipapahiling ta an pagkamuot paagi sa mataktikang pagsabi saiya kan kaipuhan niyang madangog. Kaipuhan nin kusog nin buot para magtao nin konseho sa sarong amigo, pero sinasabi kan Bibliya na an tunay na mag-amigo pinapatarom, o itinatanos, an lambang saro.—Tal. 27:17.

13. Ano an dai ta dapat gibuhon?

¹³ Kun minsan, pinapatunayan tang namumutan ta an mga tugang paagi sa mga bagay na dai ta ginigibo. Halimbawa, dai tulos nagkukulog an buot ta sa nasabi ninda. Isipa an nangyari kan madali nang matapos an buhay ni Jesus digdi sa daga. Sinabi niya sa saiyang mga disipulo na tanganing magkamit nin buhay, kaipuhan nindang kakanon an saiyang laman asin inumon an saiyang dugo. (Juan 6:53-57) Nakakabiglang marhay an mga tataramon na iyan kaya dakul sa mga disipulo niya an binayaan siya—pero bakong arog kaiyan an saiyang tunay na mga amigo, kaiba si Juan. Maimbod sindang nagdanay na kaibanan niya. Dai ninda nasabutan an sinabi ni Jesus asin posibleng marhay na ikinabigla man ninda iyan. Dawa arog kaiyan, dai tulos inisip kan maimbod na mga amigo ni Jesus na sala an sinabi niya asin dai ninda iyan ikinaanggot. Imbes, nagtiwala sinda saiya huling aram ninda na an itinataram niya iyo an katotoohan. (Juan 6:60, 66-69) Mahalaga nanggad na dai tulos magkulog an buot ta sa sinasabi kan satong mga amigo! Imbes, tinatawan ta sinda nin pagkakataon na ipaliwanag an mga dai pagkasinabutan.—Tal. 18:13; Par. 7:9.

14. Taano ta dai niyato dapat ikaungis an satong mga tugang?

 ¹⁴ Dinagka man kita ni Juan na dai maungis sa satong mga tugang. Kun dai ta susunudon iyan, puwede kitang impluwensiyahan nin Satanas. (1 Juan 2:11; 3:15) Nangyari iyan sa nagkapira kan katapusan kan inot na siglo C.E. Ginigibo ni Satanas an gabos tanganing palakupon an pagkaungis asin pagkabaranga sa mga lingkod nin Diyos. Kan ginigibo ni Juan an saiyang mga surat, may mga nakalaog na sa kongregasyon na nagpapahiling kan espiritung iyan ni Satanas. Halimbawa, nagkakaigwa na kaidto nin grabeng pagkabaranga sa sarong kongregasyon huli ki Diotrefes. (3 Juan 9, 10) Daing galang siya sa mga nagbibiyaheng representante kan namamahalang grupo. Hininguwa pa ngani niyang pahalion sa kongregasyon idtong mga mapag-istimar sa mga tawong dai niya suno. Talagang arogante siyang marhay! Sagkod ngunyan grabe an pagmamaigot ni Satanas na magkaigwa nin pagkabaranga sa mga lingkod nin Diyos. Lugod na nungka kitang magkabaranga huli sa pagkaungis.

15. Ano an dapat tandaan nin sarong payo nin pamilya?

¹⁵ An sarong mahalagang paagi na pinapatunayan nin sarong payo nin pamilya na namumutan niya an saiyang pamilya iyo an pagtao kan saindang materyal na pangangaipo. (1 Tim. 5:8) Pero dapat niyang tandaan na dai mapapaniguan nin materyal na mga bagay an espirituwal na pangangaipo kan saiyang pamilya. (Mat. 5:3) Mangnuhon an halimbawa na itinao ni Jesus para sa mga payo nin pamilya. Sigun sa Ebanghelyo ni Juan, mantang naghihingagdan si Jesus sa hariging pasakitan, an pamilya niya pa man giraray an iniisip niya. Nakatindog si Juan kataid kan ina ni Jesus na si Maria sa lugar kun sain ipinako si Jesus. Sa ibong kan namamatian na grabeng kulog, itinugon ni Jesus si Maria ki Juan. (Juan 19:26, 27) May mga tugang si Jesus na siguradong masustento ki Maria, pero minalataw na bako pa sindang mga disipulo niya. Kaya gustong masigurado ni Jesus na maitatao an materyal pati an espirituwal na pangangaipo ni Maria.

16. Ano an mga responsabilidad ni Juan?

¹⁶ Dakul an responsabilidad ni Juan. Bilang saro sa mga apostol, nanginginot siya sa gibuhon na paghuhulit. Tibaad may pamilya man siya, kaya kaipuhan niyang asikasuhon bako lang an materyal na pangangaipo kan saiyang pamilya, kundi pati man an saindang espirituwal na pangangaipo. (1 Cor. 9:5) Ano an manunudan diyan kan mga payo nin pamilya ngunyan?

17. Taano ta mahalagang itao nin sarong payo nin pamilya an espirituwal na pangangaipo kan saiyang pamilya?

 ¹⁷ Tibaad dakul an magagabat na responsabilidad nin sarong brother na payo nin pamilya. Halimbawa, dapat na mahigos siya sa trabaho tanganing makatao nin kaumawan ki Jehova. (Efe. 6:5, 6; Tito 2:9, 10) Asin tibaad may mga paninimbagan siya sa kongregasyon arog nin pagpapastor asin panginginot sa gibuhon na paghuhulit. Kasabay kaiyan, mahalagang magkaigwa siya nin regular na pag-adal nin Bibliya kaiba kan saiyang agom asin mga aki. Maaapresyar nindang marhay an saiyang mga paghihinguwa na maitao sa sainda an saindang pisikal, emosyonal, asin espirituwal na mga pangangaipo.—Efe. 5:28, 29; 6:4.

18. Sa ano sigurado si Juan?

¹⁸ Halawig an buhay ni apostol Juan asin nagkaigwa siya nin pambihirang mga eksperyensiya. Napaatubang siya sa dakul na kadipisilan na puwede kutanang nakapaluya sa saiyang pagtubod. Pero pirmi niyang ginigibo an saiyang pinakamakakaya tanganing sunudon an mga tugon ni Jesus kaiba na an pagbuot na kamutan an saiyang mga tugang. Bilang resulta, sigurado si Juan na namumutan siya ni Jehova saka ni Jesus asin na tatawan ninda siya kan kusog na kaipuhan niya para makayanan an ano man na pagbalo. (Juan 14:15-17; 15:10; 1 Juan 4:16) Dai napugulan ni Satanas o kan saiyang kinaban na mamatian, maipahayag, asin maipahiling ni Juan an pagkamuot.

19. Dinadagka kita kan 1 Juan 4:7 na gibuhon an ano, asin taano?

¹⁹ Arog ni Juan, nabubuhay kita sa kinaban na pinamamahalaan ni Satanas, an pano nin pagkaungis na diyos kan sistemang ini. (1 Juan 3:1, 10) Dawa ngani gusto niyang pugulan kita na mamutan an satong mga tugang, dai niya iyan magigibo apuwera na sana kun tutugutan ta siya. Lugod na magin determinado kita na kamutan an satong mga tugang asin ipahayag an satong pagkamuot paagi sa satong mga sinasabi, asin patunayan an satong pagkamuot paagi sa gibo. Pag ginibo ta iyan, mauugma kitang magin parte kan pamilya ni Jehova asin magkakaigwa kita nin makahulugan na buhay.—Basahon an 1 Juan 4:7.