1. ?Lav blong God i mekem yumi harem olsem wanem?

APOSOL Jon i raetem se: “God hem i lav.” (1 Jon 4:8) Sot toktok ya i rimaenem yumi long wan stamba trutok: God we i Stamba blong laef, hem i Stamba blong lav tu. !Jehova i lavem yumi! Lav blong hem i mekem yumi harem se yumi sef, yumi hapi, mo yumi no sot long wan samting.

2. ?Wanem tu bigfala komanmen we i stap long Matiu 22:37-40? ?Mo from wanem i had blong obei long sekenwan?

² Ol Kristin oli no mas jusum se bambae oli soem lav o nogat. Oli kasem oda se oli mas soem lav. (Ridim Matiu 22:37-40.) Taem yumi kasemsave gud long Jehova, maet yumi luk se i isi blong obei long fas komanmen. Hemia from we Jehova i stret gud olgeta, hem i tingbaot yumi mo i kaen long yumi. Be maet yumi luk se i had blong obei long seken komanmen. ?From wanem? From we ol brata sista, we oli neba we i klosap moa long yumi, oli ol sinman. Samtaem, maet oli talem o mekem samting we yumi luk se i no kaen. Jehova i save se bambae yumi fesem samting olsem, taswe hem i pulum sam man blong oli raetem sam stret advaes long Baebol, se from wanem mo olsem wanem yumi mas lavlavem yumi. Wan long ol man ya blong raetem Baebol, hemia Jon.—1 Jon 3:11, 12.

3. ?Jon i tokbaot wanem moa?

³ Long ol leta blong hem, Jon i tokbaot moa se ol Kristin oli mas soem lav. Yes, taem hem i raetem stori blong Jisas, hem i yusum tok ya “lav” mo “lavem,” plante taem moa i bitim trifala Gospel. Jon i gat samwe wan handred yia taem hem i raetem Gospel mo ol trifala leta blong hem. Ol buk ya we hem i raetem, oli soem se wan Kristin  i mas mekem evri samting from lav. (1 Jon 4:10, 11) Be, i tekem taem blong Jon i lanem lesen ya.

4. ?Jon i soem lav oltaem?

⁴ Taem Jon i wan yangfala man, i no oltaem we hem i soem lav. Eksampol, wan taem, Jisas wetem ol disaepol blong hem oli pastru long Sameria blong go long Jerusalem. Nao wan vilej blong Sameria i no wantem welkamem olgeta. ?Jon i mekem wanem? !Hem i askem sipos i save singaot faea i kamdaon long heven, blong distroem olgeta man long vilej ya! (Luk 9:52-56) Long wan narafala taem, Jon i no soem lav long ol nara aposol. Hem mo brata blong hem Jemes, tufala i pulum mama blong tufala blong go askem long Jisas se i givim hae posisen long tufala long Kingdom. !Taem ol nara aposol oli faenemaot samting ya, oli kros tumas long tufala! (Mat. 20:20, 21, 24) Nating se Jon i gat ol slak fasin blong hem, be Jisas i lavem hem.—Jon 21:7.

5. ?Bambae yumi tokbaot wanem long stadi ya?

⁵ Long stadi ya, bambae yumi tokbaot eksampol blong Jon, mo sam samting we hem i raetem long saed blong lav. Long semtaem, bambae yumi lanem olsem wanem blong soem lav long ol brata sista blong yumi. Mo tu, bambae yumi lanem wan impoten rod we wan hed blong famle i save soem se i lavem famle blong hem.

6. ?Olsem wanem Jehova i soem se hem i lavem yumi?

⁶ Plante taem yumi ting se lav i wan filing we man i soem long ol toktok we i kaen. Be trufala lav i mas kamaot long ol aksen tu. (Skelem Jemes 2:17, 26.) Eksampol, Jehova i lavem yumi. (1 Jon 4:19) Mo hem i soem lav ya long ol naesfala toktok we oli stap long Baebol. (Sam 25:10; Rom 8:38, 39) Be, yumi save se God i lavem yumi, i no from ol toktok blong hem nomo, be from ol samting we hem i mekem tu. Jon i raetem se: “God i soemaot lav ya long yumi olsem: Hem i sanem stret Pikinini blong hem, wan nomo we hem i gat, i kam long wol, blong yumi save kasem laef from hem.” (1 Jon 4:9) Jehova i letem Pikinini blong hem we hem i lavem tumas, blong i safa mo i ded from yumi. (Jon 3:16) Taswe yumi sua se Jehova i rili lavem yumi.

7. ?Jisas i mekem wanem blong pruvum se hem i lavem yumi?

⁷ Jisas i talem long ol disaepol blong hem se hem i lavem olgeta. (Jon 13:1; 15:15) Hem i pruvum bigfala lav we hem  i gat long olgeta mo long yumi, tru long ol toktok mo ol aksen blong hem. Hem i talem se: “Man we i rere blong ded blong sevem ol fren blong hem, lav ya blong hem i bigwan moa i bitim lav blong ol narafala man.” (Jon 15:13) Taem yumi tingbaot samting we Jehova mo Jisas i mekem blong yumi, ?hemia i mas pusum yumi blong mekem wanem?

8. ?Fas Jon 3:18 i talem se yumi mas mekem wanem?

⁸ Yumi pruvum se yumi lavem Jehova mo Jisas taem yumi obei long tufala. (Jon 14:15; 1 Jon 5:3) Mo Jisas i talem klia se yumi mas lavlavem yumi. (Jon 13:34, 35) Yumi mas talem long ol brata sista se yumi lavem olgeta, be i no hemia nomo, yumi mas soem tu long ol aksen blong yumi. (Ridim 1 Jon 3:18.) ?Wanem sam samting we yumi save mekem blong soem se yumi lavem olgeta?

9. ?Lav i pulum Jon blong mekem wanem?

⁹ Sipos Jon i wantem, hem i save stap wetem papa blong hem blong winim mane long bisnes ya blong fising. Be nogat. Bighaf blong laef blong hem, hem i yusum blong halpem ol narafala, blong oli save trutok long saed blong Jehova mo Jisas. Laef ya we Jon i jusum i no isi. Ol man oli ronem mo kilim hem from we hem i stap prij, mo klosap long en blong fas handred yia, taem Jon i olfala, oli sanem hem i go stap long wan nara aelan. (Wok 3:1; 4:1-3; 5:18; Rev. 1:9) Taem hem i stap long kalabus from we hem i stap tokbaot Jisas, Jon i soem se hem i stap tingbaot ol narafala. Eksampol, taem hem i stap long aelan blong Patmos, hem i raetem revelesen blong ol samting we hem i kasem, mo i sanem i go long ol kongregesen, blong oli save ol samting we “bambae oli hapen i no longtaem.” (Rev. 1:1) Biaen, maet afta we hem i aot long Patmos, Jon i raetem Gospel blong laef mo minista wok blong Jisas. Mo tu, hem i raetem tri leta blong enkarejem ol brata sista blong hem mo mekem oli strong. ?Olsem wanem yu save folem fasin ya blong Jon blong tingbaot ol narafala?

10. ?Olsem wanem yu save soem se yu lavem ol man?

¹⁰ Yu save soem se yu lavem ol man, taem yu jusum samting we yu wantem mekem long laef blong yu. Wol blong Setan i wantem se yu spenem olgeta taem mo paoa blong yu long samting we yu nomo i wantem, olsem winim mane, o gat haenem. Be long olgeta ples long wol, ol man blong talemaot Kingdom oli tingbaot ol narafala, taswe oli spenem plante taem blong olgeta blong talemaot gud nius, mo halpem ol man blong oli kam klosap long Jehova. Sam long olgeta oli go moa, oli prij mo tij fultaem.

11. ?Plante gudfala pablisa oli soem olsem wanem se oli lavem ol brata sista blong olgeta?

¹¹ Plante gudfala Kristin oli mas wok fultaem blong kasem mane, blong oli save gat samting we olgeta mo famle blong olgeta oli nidim. Nating se i olsem, ol gudfala pablisa ya oli mekem evri samting we oli naf blong mekem, blong sapotem oganaesesen blong God. Eksampol, samfala oli naf blong givhan long taem blong disasta, mo sam narafala oli joen long sam projek blong konstraksen, mo evriwan i gat janis blong givim presen mane, blong givhan long wok blong Kingdom long fulwol. Oli mekem  olsem from we oli lavem God mo ol brata sista blong olgeta. Evri wik, yumi soem se yumi lavem ol brata sista taem yumi go long ol miting, mo yumi mekem haf blong yumi mo givim ansa. Nating se maet yumi taed, be yumi stap long ol miting ya. Nating se maet yumi fraet, be yumi givim ansa. Mo nating se yumi evriwan i gat prapa problem blong yumi, be yumi enkarejem ol narafala bifo mo afta long miting. (Hib. 10:24, 25) !Yumi glad tumas long wok we ol gudfala brata mo sista blong yumi oli mekem!

12. ?Wanem narafala rod we Jon i soem se hem i lavem ol brata sista blong hem?

¹² Jon i soem se hem i lavem ol brata sista blong hem taem hem i talem gudfala toktok long olgeta, be i no hemia nomo, hem i givim advaes tu long olgeta. Eksampol, long ol leta blong hem, hem i soem se hem i glad long ol brata sista from bilif mo gudfala wok blong olgeta, mo tu hem i givim stret advaes long olgeta long saed blong sin. (1 Jon 1:8–2:1, 13, 14) Long sem fasin, yumi mas talem gudfala toktok long ol brata sista blong yumi from ol gudfala samting we oli mekem. Be sipos wan man i stat blong gat rong tingting o i mekem i no stret, yumi soem se yumi lavem hem taem yumi givim advaes we hem i nidim, be long kaen fasin. I nidim strong tingting blong givim advaes long wan fren, be Baebol i talem se ol tru fren oli stap sapenem, o stretem, olgeta.—Prov. 27:17.

13. ?Yumi no mas mekem wanem?

¹³ Samtaem yumi no mekem sam samting, blong soem long ol brata sista se yumi lavem olgeta. Eksampol, yumi no kwik blong harem nogud from tok blong olgeta. Tingbaot wan samting we i hapen long en blong laef blong Jisas long wol. Hem i talem long ol disaepol blong hem se blong kasem laef, oli mas kakae bodi blong hem mo dring blad blong hem. (Jon 6:53-57) Plante long ol disaepol blong hem oli sek long tok ya, nao oli lego hem, be ol tru fren blong hem olsem Jon, oli no mekem olsem. Oli holemstrong long hem. Olgeta oli no kasemsave long tok blong Jisas, mo i sua se oli sapraes long tok ya. Be oli no ting se wanem we hem i talem i rong, nao oli harem nogud from. Defren olgeta, oli trastem  hem from we oli save se hem i stap tokbaot trutok. (Jon 6:60, 66-69) !I impoten tumas we yumi no kwik blong harem nogud from ol tok we ol fren blong yumi oli talem! Be yumi letem janis long olgeta blong oli eksplenem risen blong olgeta.—Prov. 18:13; Pri. 7:9.

14. ?From wanem fasin ya blong no laekem narafala i no mas stap long hat blong yumi?

¹⁴ Mo tu, Jon i talem se yumi no mas gat fasin ya blong no laekem ol brata mo sista blong yumi. Sipos yumi no lesin long advaes ya, yumi letem rod long Setan blong i yusum yumi. (1 Jon 2:11; 3:15) Samting ya i hapen long samfala long en blong faswan handred yia. Setan i mekem bes blong hem blong mekem ol man blong God oli no moa laeklaekem olgeta mo seraotem olgeta. Long taem we Jon i raetem ol leta blong hem, sam man we oli tingting olsem Setan, oli kam insaed long kongregesen. Eksampol, Diotrefes i mekem plante samting blong mekem olgeta long wan kongregesen oli seraot. (3 Jon 9, 10) Hem i no soem respek long olgeta we hed kampani i sanem olgeta. Mo hem i traem blong putumaot long kongregesen, olgeta ya tu we oli welkamem ol man we hem i no laekem. !Hem i flas tumas! Tede, Setan i stap traem yet blong seraotem mo winim ol man blong God. I gud yumi neva letem fasin ya blong no laekem narafala i seraotem yumi.

15. ?Wan hed blong famle i mas tingbaot wanem?

¹⁵ Wan impoten rod blong wan hed blong famle i soem se hem i lavem famle blong hem, hemia taem hem i givim samting we famle i nidim long bodi. (1 Tim. 5:8) Be hem i mas tingbaot se, ol samting long bodi oli no samting we famle i nidim long spirit. (Mat. 5:3) Makem eksampol we Jisas i soem long ol hed blong famle. Folem Gospel blong Jon, taem klosap Jisas i ded long pos, hem i tingbaot yet famle blong hem. Jon i stap stanap wetem Meri we i mama blong Jisas, long ples we oli hangem Jisas long hem. Jisas i safa bitim mak, be nating se i olsem, hem i mekem rod blong Jon i lukaot long Meri. (Jon 19:26, 27) Jisas i gat ol brata mo sista we oli save lukaot long nid blong Meri, be i luk olsem se i no gat wan long olgeta i kam disaepol yet. So Jisas i wantem  meksua se Meri i kasem samting we hem i nidim long bodi mo long spirit tu.

16. ?Wanem ol responsabiliti we Jon i gat?

¹⁶ Jon i gat plante responsabiliti. Hem i wan aposol, taswe hem i lidim wok ya blong prij. Mo tu, maet hem i mared, taswe hem i mas skelem wok blong hem, blong i save givim ol samting we famle i nidim long bodi mo long spirit. (1 Kor. 9:5) ?Ol hed blong famle tede oli save lanem wanem long samting ya?

17. ?From wanem wan hed blong famle i mas givim samting we famle i nidim long spirit?

¹⁷ Wan brata we i hed blong famle, i save gat plante responsabiliti. Eksampol, hem i mas wok gud long wok blong winim mane, blong fasin blong hem i leftemap Jehova. (Efes. 6:5, 6; Taet. 2:9, 10) Mo maet hem i gat responsabiliti long kongregesen, olsem wan elda mo lidim wok blong prij. Long semtaem, i impoten we hem i stadi Baebol oltaem wetem waef mo ol pikinini blong hem. Bambae oli glad tumas long traehad blong hem blong mekem se oli stapgud long bodi, filing, mo spirit.—Efes. 5:28, 29; 6:4.

18. ?Jon i sua long wanem?

¹⁸ Laef blong Jon i longfala mo i fulap long ol gudfala ekspiriens. Hem i fesem plante hadtaem we i save slakem bilif blong hem. Be hem i mekem bes blong hem oltaem blong obei long ol komanmen blong Jisas, wetem oda ya tu blong lavem ol brata mo sista. Frut we i kamaot se, Jon i sua se Jehova mo Jisas i lavem hem, mo se bambae tufala i givim paoa long hem blong winim eni hadtaem. (Jon 14:15-17; 15:10; 1 Jon 4:16) Setan mo wol blong hem i no save stopem Jon blong i lavem ol narafala long ol toktok, filing, mo aksen blong hem.

19. ?Fas Jon 4:7 i enkarejem yumi blong mekem wanem, mo from wanem?

¹⁹ Olsem Jon, yumi laef long wan wol we Setan, god ya we i no laekem nating ol man, i bos long hem. (1 Jon 3:1, 10) Hem i wantem se yumi stop blong lavem ol brata mo sista, be sipos yumi blokem hem, bambae hem i no win. I gud yumi gat strong tingting blong lavem ol brata mo sista blong yumi. Yumi soem lav ya long ol toktok blong yumi mo long ol aksen blong yumi. Nao bambae yumi glad blong stap long famle blong Jehova, mo yumi haremgud long laef blong yumi.—Ridim 1 Jon 4:7.