1. Ida liña ladügün línsiñehabu Bungiu lun wasandiragun woungua?

ABÜRÜHATI apostolu Huan, “ínsiñeni Bungiu” (1 Huan 4:8). Haritaguagüda lumutiwa dimurei le luagu inarüni le: lídanñein Bungiu lubuñe ibagari ligíati, lídanñein giñe Bungiu lubuñe ínsiñeni. Hínsiñetiwa lun Heowá! Adügati línsiñehabu lun chouru lan wasandiragun woungua luma lun gunda wamá.

2. a) Según Matéu 22:37-40, ka bián gumadi súdinitimabei? b) Ka uagu gayara lubéi hénrengu lan lun gaganbadi wamá lun libiaman gumadi?

² Mama aban katei lánina anúadahani harufudun kristiánugu ínsiñeni; aban gumadi lira (aliiha huméi Matéu 22:37-40). Dan le wasubudiruni Heowá buidu buidu, ménrengubei lun gaganbadi wamá lun furumiñeti gumadi. Macharati Heowá ani súnwandan lóuseruniwa lau ínsiñehabuni. Luagu le aban oubaü, másiñati hénrengubei lan woun lun gaganbadi wamá lun libiaman gumadi. Ka uagu? Ladüga charatiña wíbirigu ani anihein dan ariñagatiña o adügatiña katei le adügübei lun wuriba lan wasandiragun woungua. Subudi lumuti Heowá hénrengubei lan woun lun gaganbadi wamá lun gumadi le, ligía ladügübei lun habürüha fiu wügüriña ha abürühabarun Bíbülia, luagu ida luba lan ani ka lan uagu mosu lubéi warufudun ínsiñeni wadaagua. Huan aban hádangiñe (1 Huan 3:11, 12).

3. Ka meha lariñagubei Huan libügürü ínsiñeni?

³ Lidan Ewanhéliu le labürühabei Huan ayanuhóuati ñein luagu lunti lan harufudun kristiánugu ínsiñehabuni. Ayanuhóuati giñe ñein saragu wéiyaasu luagu ínsiñeni sügǘ luéi ǘrüwa líbiri Ewanhéliu. Kei burí san irumu lau Huan dan le labürühabalin Ewanhéliu le tuma ǘrüwa ligaradan. Arufudati le  labürühabei Huan sun lan katei le lunbei ladügüni aban kristiánu lunti lan ladügüni lau ínsiñehabuni (1 Huan 4:10, 11). Lau sun lira barüti meha dan lun lafurendeiruni Huan katei le.

4. Afuranguagüda humá fiu sügǘ le ídanbei marufudun lan Huan ínsiñehabuni?

⁴ Sun meha nibureingili lan Huan mama meha súnwandan lóuserun lau ínsiñehabuni. Luagu meha aban dan, dan le laweiyasuhabei Hesusu hama lani disipulugu Herusaléun aba hásügürün Samariagiñe. Meresibirúnwatiña meha lidan aban aüdü Samariana. Ka meha lariñagubei Huan? Aba lálügüdüni Huan Hesusu anhein gayara lubéi hamuriahan lun lararirun watu gemeti siélugiñe lun lagumuchun hau samariana hagía (Luk. 9:52-56). Luáguya amu dan marufudunti Huan ínsiñehabuni houn ha híbiri apostolugu. Ligía úara luma Santiagu le líbiri, aba meha hamuriaha tuma háguchu lun tidin amuriaha luma Hesusu lun líchugun ubaraü houn lun hañuurun lóubagiñe lidan Larúeihan. Dan le haganbunbalin ha híbiri apostolugu katei le aba hagañidun (Mat. 20:20, 21, 24). Íbini chará lan meha Huan saragu wéiyaasu, hínsiñegili meha lun Hesusu (Huan 21:7).

5. Kaba wakutiha lidan aturiahani le?

⁵ Lidan aturiahani le, lakutihóuba fiu katei le gayaraabei wafurendeirun lúmagiñe apostolu Huan luma fiu katei le labürühabei libügürü ínsiñeni. Wafurendeiruba giñe ida luba lan warufudun ínsiñeni houn wíbirigu, warihiba giñe aban katei súdiniti le gayaraabei hadügüni hachügüdina tílana muna lun harufudun ínsiñeni houn haduheñu.

6. Ida liña larufuduni Heowá woun hínsiñe wamá lun?

⁶ Anhein sandí habéi gürigia ínsiñeni hámagua úabei buídurügü lan hariñaguni. Lun inarüni lan ínsiñeni mosu larufudúniwa (ariha waméi giñe Santiagu 2:17, 26). Kei hénpulu, hínsiñetiwa lun Heowá (1 Huan 4:19). Ani ariñaga lumuti hínsiñe wamá lun lau burí lubuidun dimurei le wadarirubei tidan Bíbülia (Sal. 25:10; Rom. 8:38, 39). Subudi wamuti hínsiñe wamá lun, mámarügü ladüga le lariñagubei, arufuda lumuti giñe lau le ladügübei. Abürühati Huan: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe” (1 Huan 4:9). Ígirati Heowá lun lasufurirun luma lun lounwe Liráü le hínsiñetimabei lun, wawagu (Huan 3:16). Ligía chouru wabalin hínsiñe wamá lun Heowá.

7. Ida liña larufuduni Hesusu hínsiñe wamá lun?

⁷ Kaba wariñaga luagu Hesusu? Ariñagati houn lani disipulugu hínsiñe hamá lun (Huan 13:1; 15:15) Arufuda lumuti giñe lanarime ínsiñeni le houn luma giñe le lasandirubei  wawagu, mámarügü lau le lariñagubei, arufuda lumuti giñe lau le ladügübei. Ariñagati: “Lueirin-agei ínsiñeni le gayaraabei gani lani gürigia, lun líchuguni libagari hawagu lumadagu” (Huan 15:13). Dan le wasaminarun luagu sun le adüga láalibei Hesusu luma Heowá wawagu, ka san lunbei wadügüni?

8. Según 1 Huan 3:8, ka lunbei wadügüni?

⁸ Warufudubei hínsiñe lan Heowá luma Hesusu woun lau gaganbadi wamá houn (Huan 14:15; 1 Huan 5:3). Lanwoun lira, ruti Hesusu gumadi woun lun hínsiñegua wamá wámagua (Huan 13:34, 35). Ani lunti giñe warufuduni ínsiñeni le hawagu wíbirigu, mámarügü lau dimurei, lunti giñe warufuduni lau le wadügübei (aliiha huméi 1 Huan 3:18). Kátima lunbei wadügüni?

9. Ka ladügübei Huan ladüga ínsiñeni?

⁹ Gayaraati hamuga meha lerederun Huan luma lúguchi agañeira seinsu etenira lun hani lagübürigu bísinisi. Lubaragiñe lira himei lumuti meha lederegeruni limigifen libagari lun líderaguniña gürigia afurendeirei inarüni luagu Heowá luma luagu Hesusu. Ani ibagari le lanúadirubei mama meha aban ibagari ménrengunti. Éibaahouati ani lidan lagumuchagüle furumiñeti sígulu, dan le derebuguhali aba labugún lageiragiñe (Adü. 3:1; 4:1-3; 5:18; Aruf. 1:9). Lau sun ladaürǘña lan meha ladüga lapurichihan luagu Hesusu, saminati meha hawagu amu. Kei hénpulu, sun anihán lan adaürǘwa lidan ubouhu Pátümosu bürǘ lumuti arufudúni le larihibei ani óunaha lumuti lun burí damuriguaü lun hasubudiruni “katei le burí lunbei lasuseredun madise” (Aruf. 1:1). Dan lárigiñe, chóuruti lárigiñe lan láfuridun furisunrugúgiñe abürüha lan luagu libagari Hesusu luma lani Hesusu ministeriu. Abürühati giñe ǘrüwa gárada houn líbirigu lidan afiñeni lun líchugun gurasu houn luma lun lederebudagüdüni hafiñen. Ida luba wáyeihani lubuidun igaburi le larufudubei Huan lidan sun libagari?

10. Ida luba warufuduni hínsiñe hamá gürigia woun?

¹⁰ Gayaraati warufuduni hínsiñe hamá gürigia woun lau le wanúadirubei wadügün lidan wabagari. Ubóu le lábugiñebei lubafu Satanási busenti lun wawesiruni wadaani luma were áfaagua lun risi wamá o lun subudiwa wamá. Gama lumoun, lidan sun ubóu añahein kristiánugu ha ederegerubaña saragu lídangiñe hadaani, lun hapurichihani uganu buiti luma lun híderaguniña gürigia ayarafada lun Heowá. Añahein hádangiñe adüga hamuti lidan dan dayarüti.

11. Ida liña harufuduni saragu íbirigu úaraguatiña hínsiñe lan Heowá hama hábirigu houn?

¹¹ Añahein saragu íbirigu úaraguatiña, mosu hawadigimaridun dan dayarüti lun hibihini le hemegeirubei luma lun hanuriahaniña tílana haban. Íbini ítara ídehatiña tuma lóundarun Heowá lau sun hayaraati. Añahein ídehatiña dan le hemegeirúniwa íbirigu lidan lasuseredun somu liñawan dan, híbiri ídehatiña lidan bunaguaü, híbiri lau híchugun budagia lun lamainirúniwa apurichihani. Ítara liña harufuduni hínsiñehabu lun Bungiu luma houn gürigia háledigu. Lanwoun lira, sagü dimaasu warufuduni wínsiñehabu houn wíbirigu lau wachülürün adamuridagua íbini buchá lan wawagu, lau wíchuguni wóunabagüle lau sun haburi wamá luma lau wáfaagun lun wíchugun gurasu houn lubaragiñe luma lárigiñe adamuridaguni, íbini gaturobulin wamá (Ebü. 10:24, 25). Ma rútiwa seremei luagu sun le hadügübei íbirigu ha!

12. Ida liña larufuduni Huan hínsiñe hamá íbirigu lun?

¹² Arufuda lumuti meha giñe Huan línsiñehabu houn íbirigu lau burí lariñagun houn buidu lan hadüga dan le hadügün somu katei, ani  ererehati meha giñe houn. Kéiburi, tidan ligaradan ariñagati houn buidu lan hadüga ladüga hafiñen luma buiti le hadügübei, gama lumoun ruti giñe aban eweridihani dǘgüdati houn libügürü figóu (1 Huan 1:8–2:1, 13, 14). Ítarameme, ariñagatiwa houn wíbirigu buidu lan le hadügübei luagu buiti le burí hadügübei. Ánhawa ariha láhüchüña lan aban luriban igaburi luagu somu íbiri o lagumeseruña lan adüga somu katei le gayaraabei lagadeiruni lumadagua luma Bungiu, gayaraati warufuduni wínsiñehabu lun lau wariñaguni lun lau inebesei le lemegeirubei lun laganbun. Mégeiwati ganigi lun ladügǘniwa katei le, gama lumoun ariñagatu Bíbülia ererehatiña lan umadagu buítiña hámagua (Ari. 27:17).

13. Ka katei moun lumuti lun wadügüni?

¹³ Gayaraati giñe warufuduni wínsiñehabu houn wíbirigu lau madügün wamá ítaga katei. Kéiburi, moun lumuti wagañidun lau lóufudagun luagu le hariñagubei. Samina wamá luagu le asuseredubei murusun dan lubaragiñe lounwe Hesusu. Aba lariñagun houn lani disipulugu lun gayara lan heresibiruni ibagari magumuchaditi mosu lan héigini lǘgürügü ani gurá hameime lita (Huan 6:53-57). Saragu hádangiñe mínsiñeti le lariñagubei Hesusu houn darí lun hígiruni. Gama lumoun ha lumadagu ha tímatimaatiña, Huan haganagua, úaraguatiña lun ani mígirun hamuti. Úati meha gunfuranda hamani le meha labusenrubei Hesusu lariñagun ani chóuruti aba lan meha taweiridun hanigi, gama lumoun magañiduntiña ani mariñaguntiña giñe labulieidaguña lan. Le hadügübei aba hafiñerun luagu ladüga subudi hamuti súnwandan lan lariñaguni inarüni (Huan 6:60, 66-69). Súdiniti lun magañidun wamá lau lóufudagun lau le hariñagubei wíbirigu, lubaragiñe lira ru wamá chansi houn lun hafuranguagüdüni ka lan habusenrubei hariñagun (Ari. 18:13; Apur. 7:9).

14. Ka uagu moun lumuti lubéi iyereegu hamá wíbirigu woun?

¹⁴ Wéridi lumutiwa giñe Huan moun lumuti lan wabulieiduniña wíbirigu. Ánhawa madügün gasu wígiraguagüdüña woungua lun lahandilihaniwa Mafia (1 Huan 2:11; 3:15). Ligía asuseredubei houn fiu íbirigu lidan furumiñeti sígulu. Adüga lumuti Mafia sun liyaraati lun línchahaniña íbirigu lun iyereehabu hamá hámagua luma lun hafanreinragun. Dan le labürühabarün Huan ligaradan, beluhaña meha gürigia ha gagaburibalin igaburi burí le lidoun damuriguaü. Diótürefesi aban hádangiñe, láluguña meha lun hafanreinragun  lílana damuriguaü (3 Huan 9, 10). Minebentiña meha íbirigu ha lóunahabaña sétanu le arihibei lau apurichihani lidan dan ligía lun. Hanarimeti meha luriban darí lun lálugun labuguniña íbirigu ha eresibirubaliña íbirigu ha wuribabaña héiguadun lun lídangiñe damuriguaü. Uguñe weyu, anihamémegua Mafia adügei sun liyaraati lun lafanreingugüdüniña wíbirigu. Maweiyasun wamá ígira lun lafanreinguagüdüniwa.

15. Ka lunbei laritaguni aban hachügüdina tílana muna?

¹⁵ Arufudati aban hachügüdina tílana muna berese lan hau tílana luban dan le líchuguni le hemegeirubei houn (1 Tim. 5:8). Gama lumoun lunti laritaguni súdinitimati lan lun líderaguniña tílana luban lun buidu lan hamadagua luma Heowá (Mat. 5:3). Ariha waméi hénpulu le lígirubei Hesusu habá hachügüdina tílana muna. Ariñagatu liliburun Huan, dan le anihein lan Hesusu luagu wagabu anihaguameme asaminara hawagu liduheñu. Anihein meha Huan úara tuma María to lúguchu Hesusu, lidan fulasu le ñein lubéi lafarúa Hesusu. Lau sun lasufuriruña lan meha Hesusu saragu, adügati aransehani luma Huan lun lóunigirunu Huan María (Huan 19:26, 27). Garahüñütu meha María amu luéi Hesusu ha gayaraabei meha híchuguni le temegeirubei tun, gama lumoun genegeti madügagungiña lan meha houngua kristiánugume dan ligía. Ligíati, busenti meha Hesusu lun tibihini lúguchu le temegeirubei luma lun tiderawagúniwa lun buidu lan tumadagua luma Heowá.

16. Ka meha lánibei Huan buligasion?

¹⁶ Gíbeti meha lani Huan buligasion. Kei aban lubéi meha apostolu ligía, mosu meha lalidihani apurichihani. Ani, lanwoun lira, genegeti aban lan meha wügüri maríeiti. Ligíati, mosu meha lanúriahaniña liduheñu ani mosu meha giñe líderaguniña lun buidu lan hamadagua luma Heowá (1 Ko. 9:5). Ka gayaraabei hafurendeirun hachügüdina tílana muna lúmagiñe Huan?

17. Ka uagu súdini lubéi lun híderaguniña hachügüdina tílana muna tílana haban lun buidu lan hamadagua luma Heowá?

¹⁷ Másiñati giñe gibe lan lani aban hachügüdina tílana muna buligasion. Kéiburi, mosu ladügüni luadigimari buidu lun lanügün uéiriguni lun liri Heowá (Efe. 6:5, 6; Titu 2:9, 10). Ani háfuga gadasin lan lidan damuriguaü, kei burí lalidihani apurichihani luma labisidahaniña  íbirigu lun líchugun dǘgüdaguaü houn. Lau sun lira, súdiniti meha lun lasagarun dan lun laturiahanu Bíbülia tuma lani weiriou luma hama lirahüñü. Híchuguba tílana luban seremei luagu sun le ladügübei lun líchuguni le hemegeirubei houn lun gunda hamá luma lun buidu lan hamadagua luma Heowá (Efe. 5:28, 29; 6:4).

18. Ka meha lachoururubei Huan?

¹⁸ Migifeti meha libagari Huan ani wínwanti meha saragu lubuidun sügǘ. Gagibuguati meha luma saragu lénrengunga le meha gayaraabei ledebilidagüdüni lafiñen. Íbini ítara adüga lumuti sun liyaraati lun gaganbadi lan lun lugumadin Hesusu, lun hínsiñe hamá líbirigu lun. Ladüga lira chóuruti meha Huan hínsiñe lan lun Heowá luma lun Hesusu, ani híchugunbei lan erei le lemegeirubei lun lun gayara lan lagagibudagun luma furumiñeguarügü lénrengunga (Huan 14:15-17; 15:10; 1 Huan 4:16). Ni Mafia, ni ubóu le lábugiñebei lubafu, siñati meha hararamuni Huan luéi lariñaguni luma lun larufuduni houn líbirigu hínsiñe hamá lun.

19. Ka un línchahawa 1 Huan 4:7 lun wadügüni, ani ka uagu?

¹⁹ Ítara kei Huan, wawinwanduña lidan ubóu le lábugiñebei lubafu Mafia, le buinbei lau iyereehabúni (1 Huan 3:1, 10). Busenti Mafia lun marufudun wamá ínsiñeni houn wíbirigu, ani mibihin lubéi, ánheingubeirügü wígiraguagüdün woungua lun. Ligíati aranseñu wamá lun warufuduni houn wíbirigu hínsiñe hamá woun lau le wariñagubei luma lau le wadügübei. Ítara luba hádangiñe baadiwa lan lubúeingu Bungiu ha ítarabaña woun kei iduheñu ani wawinwanduba aban ibagari lau saragu ugundani (aliiha huméi 1 Huan 4:7).