1. Cosa tu ta sinti por causa na amor del Dios?

“EL Dios amor,” ya escribi si apostol Juan. (1 Juan 4:8) Ese maga simple palabra ta hace acorda kanaton con el un importante verdad: El Dios, el Tuburan del vida, amo tambien el Tuburan del amor. Ta ama kanaton si Jehova! El de suyu amor ta manda kanaton sinti protegido, alegre y contento.

2. Asegun na Mateo 22:37-40, cosa el dos de con todo importante mandamiento y porque posible kita man dificil obedece con el segundo?

² El maga Cristiano gendeh puede iscuji si dale ba sila mira amor o gendeh. Un mandamiento este. (Le con el Mateo 22:37-40.) Cuando ya conoce kita con Jehova, posible que facil para kanaton que obedece con el primer mandamiento. Por causa se cay si Jehova perfecto, ta ama le kanaton y ta trata le kanaton enbuenamente. Pero posible kita man dificil obedece con el segundo mandamiento. Porque? Cay el diaton maga hermano y hermana​—quien incluido na diaton de con todo cerca projimo​—amo maga imperfecto. Tiene vez, posible sila habla o hace maga cosas que posible kanaton hace sinti duele. Sabe si Jehova que enfrenta kita con este dificultad, poreso ya usa le con el cuanto escritor del Biblia para escribi maga especifico consejo si porque y si paquemodo kita dale mira amor con uno y otro. Uno de ese maga escritor amo si Juan.​—1 Juan 3:11, 12.

3. Cosa ya hace claro si Juan acerca na amor?

³ Na cosa ya escribi si Juan, ya hace le claro que el maga  Cristiano debe dale mira amor. Gane, na de suyu libro acerca na vida de Jesus, ya usa si Juan con el palabra “amor” y “ama” manada beses contra na otro tres escritor del Evangelio. Maga cien año ya si Juan cuando ya escribi le con el de suyu Evangelio y con el de suyu tres carta. Ese maga libro ta enseña kanaton que el todo cosa kita ta hace debe por causa na amor. (1 Juan 4:10, 11) Pero ya aprende si Juan con ese leccion despues pa del largo tiempo.

4. Pirmi ba ya dale mira amor si Juan con otro?

⁴ Cuando joven pa si Juan, gendeh le pirmi ta dale mira amor. Por ejemplo, na un ocasion, si Jesus y el de suyu maga dicipulo ya viaja na Samaria para na Jerusalem. Na un barrio na Samaria, el maga gente alla nuay queda hospitable kanila. Cosa ya hace si Juan? Ya pidi le con Jesus si puede ba manda abaja fuego estaba na cielo para destroza con el todo quien ta queda na ese barrio! (Luc. 9:52-56) Na otro ocasion, nuay dale mira amor si Juan con el otro apostoles. Ele y el de suyu hermano, si Santiago, ya habla con el diila nana que pidi con Jesus que dale kanila prominente posicion na de suyu costao na Reino. Cuando ya sabe el otro maga apostoles acerca na cosa ya hace si Santiago y Juan, bien rabiao gayot sila! (Mat. 20:20, 21, 24) Maskin pa na maga kamali que ya hace si Juan, ya ama siempre con ele si Jesus.​—Juan 21:7.

5. Cosa kita hay examina na este articulo?

⁵ Na este articulo, hay examina kita con el ejemplo de Juan y con el cuanto cosas que ya escribi le acerca na amor. Hay aprende tambien kita si paquemodo dale mira amor con el diaton maga hermano y hermana. Y aprende tambien kita con el un importante manera si paquemodo el un cabeza de familia dale mira que ta ama le con el de suyu familia.

6. Paquemodo si Jehova ya dale mira que ta ama le kanaton?

⁶ Posible kita pensa tiene vez que el amor amo un sentido que puede dale mira por medio na maga buen palabra. Pero, para queda deverasan ese amor, debe tambien kita dale mira con ese por medio na accion. (Compara na Santiago 2:17, 26.) Por ejemplo, ta ama kanaton si Jehova. (1 Juan 4:19) Y ya dale le mira con el de suyu amor por medio na maga bonito palabra que escribido na Biblia. (Sal. 25:10; Roma 8:38, 39) Pero convincido kita que ta ama kanaton el Dios, gendeh lang na cosa le ya habla, sino na cosa tambien le ya hace. Si Juan ya escribi: “Ansina ya dale mira el Dios el disuyo amor canaton: Ele ya imvia con el disuyo unico Anak aqui na  mundo para puede kita tene vida por medio disuyo.” (1 Juan 4:9) Ya permiti si Jehova con el de suyu Anak que sufri y muri para kanaton. (Juan 3:16) Tan duda pa ba kita que ta ama gayot kanaton si Jehova?

7. Cosa ya hace si Jesus para dale mira que ta ama le kanaton?

⁷ Ya asigura si Jesus con el de suyu maga dicipulo que ta ama le kanila. (Juan 13:1; 15:15) Ya dale le mira si paquemodo de hondo el de suyu amor para kanila y para kanaton gendeh lang na cosa le ya habla sino na cosa tambien le ya hace. Si Jesus ya habla, “El mas grande amor que un gente puede dale con su maga amigo, amo el dalida del disuyo vida por causa diila.” (Juan 15:13) Si pensa kita acerca na cosa ya hace si Jehova y si Jesus para kanaton, paquemodo este debe afecta kanaton?

8. Cosa ta habla el 1 San Juan 3:18 que debe kita hace?

⁸ Puede kita dale mira que ta ama kita con Jehova y con Jesus si obedece kita kanila. (Juan 14:15; 1 Juan 5:3) Y si Jesus ya manda kanaton que ama kita con uno y otro. (Juan 13:34, 35) Debe kita dale mira amor con el diaton maga hermano y hermana gendeh lang por medio na maga palabra, sino por medio tambien na cosa kita ta hace. (Le con el 1 San Juan 3:18.) Cosa el cuanto cosas que puede kita hace para dale mira que ta ama kita kanila?

9. Cosa ya hace si Juan por causa na amor?

⁹ Puede era esta si Juan junto con el de suyu tata y trabaja como pescador na diila negocio. Pero nuay le se hace, sino ya usa le con el de suyu vida para ayuda con otro aprende con el verdad acerca con Jehova y con Jesus. Gendeh facil el vida que ya iscuji si Juan. Ya persigui con ele y cuando viejo ya le cerca na fin del primer siglo, ya hace con ele preso. (Act. 3:1; 4:1-3; 5:18; Rev. 1:9) Maskin na preso le por causa cay ta predica le acerca con Jesus, ya dale siempre mira si Juan que ta pensa le con otro. Por ejemplo, mientras talla le na isla de Patmos, ya escribi le con el libro de Revelacion y ya imbia este na maga congregacion para sabe sila “el maga cosa-cosa que gendeh tarda ay sucede ya.” (Rev. 1:1) Posible despues con ele larga, ya escribi si Juan con el de suyu Evangelio acerca na vida y ministerio de Jesus. Ya escribi tambien le tres carta para anima y hace fuerte con el de suyu maga hermano y hermana. Paquemodo tu puede imita con el maga sacrificio que ya hace si Juan?

10. Paquemodo tu dale mira que ta ama tu con el maga gente?

¹⁰ Puede tu dale mira que ta ama tu con el maga gente por medio na maga decision que ta hace tu na de tuyu vida. El mundo de Satanas quierre que usa tu con el de tuyu tiempo y fuerza para na de tuyu mismo bien, pricura queda rico o conocido. Pero el maga Cristiano na entero mundo ta usa con el diila tiempo para predica con el buen noticia y ayuda con el maga gente queda cerca con Jehova. Gane el cuanto ta puede predica y enseña full-time.

11. Paquemodo el manada fiel publisher ta dale mira que ta ama sila con Jehova y con el diila maga hermano y hermana?

¹¹ Manada leal Cristiano el necesita trabaja full-time para puede suporta con el diila mismo cuerpo y con el diila familia. Pero maskin pa ansina, este maga fiel publisher ta suporta con el organizacion del Dios na maskin cosa manera que puede sila. Por ejemplo, el cuanto ta puede ayuda na disaster relief, el otro tan voluntario na construction y el todo puede dale donacion. Ta hace sila con este maga  cosas cay ta ama sila con Dios y na diila projimo. Cada semana, ta dale kita mira que ta ama kita con el diaton hermano y hermana si ta atende kita na maga miting y tan comento. Maskin pa posible cansao kita, presente kita na ese maga miting. Maskin pa ta nervia, tan comento kita. Y maskin pa todo kita tiene maga problema, ta anima kita con otro antes y despues del miting. (Heb. 10:24, 25) Ta aprecia gayot kita con el cosa ta hace el diaton maga hermano y hermana!

12. Cosa el otro manera ya dale mira si Juan que ta ama le con el de suyu maga hermano y hermana?

¹² Ya dale mira si Juan que ta ama le con el de suyu maga hermano y hermana gendeh lang cuando ya dale le kanila comendacion, sino cuando ya dale tambien le kanila consejo. Por ejemplo, na de suyu maga carta, ya dale comendacion si Juan con el de suyu maga hermano y hermana por causa na diila fe y buen trabajo. Pero ya dale tambien le kanila directa consejo acerca na pecado. (1 Juan 1:8–2:1, 13, 14) Na igual manera, necesita tambien kita dale comendacion con el diaton maga hermano y hermana na maga buen cosas que ta hace sila. Pero si tiene quien ta principia dale mira gendeh buen custumbre o accion, puede kita dale mira que ta ama kita con ele si habla kita si cosa le necesita oi. Necesita coraje para dale consejo na un amigo, pero el Biblia ta habla que el maga deverasan amigo ta hace agudo o ta corecta con uno y otro.​—Prov. 27:17.

13. Cosa kita debe evita hace?

¹³ Tiene vez, ta dale kita mira que ta ama kita con el diaton maga hermano y hermana por medio na maga cosas que gendeh kita ta hace. Por ejemplo, gendeh kita dayun ta rabia na cosa sila ta habla. Considera con el cosa ya sucede cuando taqui si Jesus na tierra. Ya habla le con el de suyu maga dicipulo que para obtene sila el vida necesita sila come con el de suyu laman y toma con el de suyu sangre. (Juan 6:53-57) Manada del maga dicipulo de Jesus nuay gusta con el cosa le ya habla poreso ya descanza sila sigui con ele. Pero el maga leal amigo de Jesus ya esta junto con ele, incluido ya si Juan. Nuay sila entende con el cosa ya habla si Jesus y posible ya espanta tambien sila. Pero el maga leal amigo de Jesus nuay pensa que gendeh justo el cosa le ya habla y nuay sila rabia. Sino, ya confia sila con ele cay sabe sila que ta habla le el verdad. (Juan 6:60, 66-69) Bien importante que  gendeh dayun kita rabia na cosa ta habla el diaton maga amigo. En vez, dale kita kanila oportunidad para explica si cosa sila quierre decir.​—Prov. 18:13; Ecl. 7:9.

14. Porque gendeh kita debe odia con el diaton maga hermano y hermana?

¹⁴ Ya anima tambien kanaton si Juan que no odia con el diaton maga hermano y hermana. Si gendeh kita obedece con este consejo, ta deja kita con Satanas que manipula kanaton. (1 Juan 2:11; 3:15) Ya sucede este con el cuanto maga Cristiano na fin del primer siglo C.E. Ya pricura si Satanas hace el todo para odia el maga siervo del Dios con uno y otro y causa division. Cuando ya escribi si Juan con el de suyu maga carta, el maga gente quien ya dale mira igual espiritu de Satanas ya queda parte del congregacion. Por ejemplo, si Diotrephes ya causa division na un congregacion. (3 Juan 9, 10) Nuay le respeta con el maga representante que ya imbia el cuerpo gobernante. Ya pricura pa gane le quita na congregacion con aquellos quien ya queda hospitable con el maga gente con quien gendeh le ta gusta. Gendeh gayot bueno el cosa le ya hace! Ta pricura siempre si Satanas causa division con el maga siervo del Dios ahora. Ojala, gendeh kita odia con el diaton maga hermano y hermana y descanza suporta kanila.

15. Cosa debe acorda el un cabeza de familia?

¹⁵ El un importante manera que puede dale mira el un cabeza de familia que ta ama le con el de suyu familia amo si dale le el diila material necesidad. (1 Tim. 5:8) Pero debe le acorda que el material cosas gendeh puede satisfecha con el espiritual necesidad del de suyu familia. (Mat. 5:3) Nota el buen ejemplo que ya dale si Jesus para na maga cabeza de familia. Asegun na Evangelio de Juan, mientras pamurida ya si Jesus na estaca, ta pensa le siempre con el de suyu familia. Parao si Juan junto con el nana de Jesus, si Maria, na lugar onde ya mata con Jesus. Maskin pa ta sufri ya si Jesus, ya pidi le con Juan que cuida con el de suyu nana. (Juan 19:26, 27) Tiene maga hermano y hermana si Jesus quien puede dale con el fisical necesidad de Maria, pero na aquel tiempo, posible gendeh pa sila maga dicipulo de Jesus. Poreso, ya asigura si Jesus que tiene quien hay dale el fisical y espiritual necesidad de Maria.

16. Cosa el maga responsibilidad de Juan?

 ¹⁶ Manada responsibilidad si Juan. Como un apostol, necesita le queda activo na trabajo predicacion. Posible casao tambien le, poreso necesita le queda balance para puede dale el material y espiritual necesidad del de suyu familia. (1 Cor. 9:5) Cosa el leccion para na maga cabeza de familia ahora?

17. Porque importante para na un cabeza de familia que dale el espiritual necesidad del de suyu familia?

¹⁷ El un hermano que un cabeza de familia posible tiene manada pesao responsibilidad. Por ejemplo, debe le trabaja enbuenamente para el de suyu conducta puede dale alabanza con Jehova. (Ef. 6:5, 6; Tito 2:9, 10) Y posible tiene le maga responsibilidad na congregacion igual como man shepherding y guia na trabajo predicacion. Importante tambien que regular le estudia con el Biblia junto con el de suyu mujer y maga anak. Responsibilidad de suyu para cuida kanila na fisical, emocional y espiritual, y hay aprecia gayot el familia con el de suyu esfuerzo.​—Ef. 5:28, 29; 6:4.

18. Na cosa asigurao si Juan?

¹⁸ Tiene largo vida si Juan y manada le cosa ya experiencia. Ya enfrenta le con el todo clase de dificultad que puede hace luya con el de suyu fe. Pero ya hace le el todo para obedece con el maga mandamiento de Jesus, incluido ya el mandamiento que ama con el de suyu maga hermano y hermana. Como resulta, asigurao si Juan que ta ama con ele si Jehova y si Jesus y dale sila con ele el fuerza para enfrenta con el maskin cosa probanza. (Juan 14:15-17; 15:10; 1 Juan 4:16) Nuay cosa ya puede hace si Satanas o el de suyu mundo para hace descanza con Juan dale mira con el de suyu amor por medio na cosa le ta habla y hace.

19. Cosa kanaton ta anima hace el 1 San Juan 4:7 y porque?

¹⁹ Igual con Juan, ta vivi kita na un mundo que ta rula si Satanas, el Dios que nuay con quien ta ama. (1 Juan 3:1, 10) Quierre le que descanza kita ama con el diaton maga hermano y hermana pero gendeh se sucede si gendeh kita con ele permiti. Ojala queda kita determinao ama con el diaton maga hermano y hermana, y dale kita mira con ese por medio na cosa kita ta habla y ta hace. Como resulta, hay queda kita bien alegre como parte del familia de Jehova.​—Le con el 1 San Juan 4:7.