1. Ki mannyer lanmour ki Bondye i annan pour ou i fer ou santi?

ZAPOT Zan ti ekri: “Bondye i lanmour.” (1 Zan 4:8) Nou konnen ki Bondye in kree lavi me sa bann parol i fer nou rapel ki lanmour i sorti kot Bondye. Zeova i kontan nou! Son lanmour i fer nou santi nou an sekirite, ere e ki nou pa mank nanryen.

2. Dapre Matye 22:37-40, lekel sa de komannman pli enportan e akoz nou kapab vwar li difisil pour obei sa enn dezyenm?

² Bann Kretyen i devret demontre lanmour. Sa i en komannman. (Lir Matye 22:37-40.) I kapab fasil pour nou obei sa premye komannman ler nou konn Zeova byen. Sa i akoz Zeova i parfe. I enterese avek nou e i tret nou dan en fason zantiy. Me nou kapab vwar li difisil pour obei sa dezyenm komannman. Akoz? Parski nou bann frer ek ser ki pli pros avek nou i enparfe. Parfwa zot kapab dir e fer bann keksoz ki fer nou santi ki zot pa kontan nou e pa enterese avek nou. Zeova ti konnen ki i ti pou difisil pour nou obei sa komannman alor i ti servi bann ekriven Labib pour montre nou akoz nou devret demontre lanmour pour kanmarad e ki mannyer nou kapab fer sa. Zan ti enn parmi sa bann ekriven.​—1 Zan 3:11, 12.

3. Ki Zan ti dir konsernan lanmour?

³ Dan sa ki Zan ti ekri, plizyer fwa i ti dir ki bann  Kretyen i devret demontre lanmour. Dan sa liv ki Zan ti ekri lo lavi Zezi, i ti servi sa mo “lanmour” ek “kontan” plis fwa ki dan sa trwa lezot Levanzil ansanm. Zan ti annan apepre san-t-an ler i ti ekri Levanzil Zan ek son trwa let. Sa bann liv dan Labib i montre ki tou sa ki nou fer, nou devret fer avek lanmour. (1 Zan 4:10, 11) Me i ti pran letan pour Zan aprann sa leson.

4. Eski Zan ti toultan demontre lanmour pour lezot?

⁴ Ler Zan ti ankor zenn, pa toultan ki i ti demontre lanmour. Par egzanp, en zour Zezi ek son bann disip ti pe al Zerizalenm e zot ti pas par Samari. Bann dimoun dan en pti lavil Samari pa ti demontre lospitalite anver zot. Ki mannyer Zan ti reakte? Zan ek son frer Zak ti demann Zezi si zot kapab fer dife sorti dan lesyel pour vin detri tou dimoun dan sa vilaz! (Lik 9:52-56) En lot fwa, Zan pa ti demontre lanmour anver lezot zapot. I kapab ki li ek son frer ti dir zot manman demann Zezi pour donn zot bann plas enportan akote li dan Rwayonm. Ler lezot zapot ti tann sa ki Zak ek Zan ti’n fer, zot ti vreman ankoler! (Mat. 20:20, 21, 24) Me menm si Zan ti’n fer tou sa bann fot, Zezi ti kontan li.​—Zan 21:7.

5. Ki nou pou diskite dan sa lartik?

⁵ Dan sa lartik, nou pou egzamin legzanp Zan e serten keksoz ki i ti ekri konsernan lanmour. Anmezir nou fer sa, nou pou aprann ki mannyer nou kapab demontre lanmour pour nou bann frer ek ser. Nou pou osi diskit lo en fason enportan ki en sef fanmir i kapab montre ki i kontan son fanmir.

6. Ki mannyer Zeova in montre ki i kontan nou?

⁶ Nou kapab krwar ki kontan lezot i vedir annan bann bon santiman pour zot oubyen dir zot bann bon keksoz. Me si nou vreman kontan lezot, nou bezwen montre zot atraver nou aksyon. (Konpar Zak 2:17, 26.) Par egzanp, Zeova i kontan nou. (1 Zan 4:19) I dir nou ki i kontan nou atraver bann zoli parol dan Labib. (Ps. 25:10; Rom. 8:38, 39) Me nou asire ki Bondye i kontan nou pa zis akoz sa ki i dir me osi akoz sa ki i fer. Zan ti dir: “Dan nou ka, Bondye in montre ki i kontan nou par anvoy son sel Garson dan lemonn pour ki gras a li nou kapab ganny lavi.” (1 Zan 4:9) Zeova ti  les son Garson ki i kontan soufer e mor pour nou. (Zan 3:16) Sa i fer nou asire ki Zeova i vreman kontan nou.

7. Ki Zezi in fer pour montre ki i kontan nou?

⁷ Zezi ti dir son bann disip ki i kontan zot. (Zan 13:1; 15:15) Par sa ki Zezi ti dir e fer i ti montre ki kantite i kontan son bann disip e ki kantite i kontan nou osi. Zezi ti dir: “Personn napa en pli gran lanmour ki sa, ki en dimoun i pare pour donn son lavi pour son bann zanmi.” (Zan 15:13) Ler nou mazin sa ki Zeova ek Zezi in fer pour nou, ki sa i fer nou anvi fer?

8. Dapre 1 Zan 3:18, ki nou devret fer?

⁸ Nou montre ki nou kontan Zeova ek Zezi ler nou obei zot. (Zan 14:15; 1 Zan 5:3) Zezi ti donn nou lord pour kontan kanmarad. (Zan 13:34, 35) Nou devret dir nou bann frer ek ser ki nou kontan zot me nou devret osi montre zot ki nou kontan zot. (Lir 1 Zan 3:18.) Ki serten keksoz nou kapab fer pour montre ki nou kontan zot?

9. Ki lanmour ti motiv Zan pour fer?

⁹ Zan ti’n kapab reste dan biznes lapes ansanm avek son papa pour li fer larzan. Me i ti pas larestan son lavi pe ed lezot pour aprann konn laverite lo Zeova ek Zezi. Sa lavi ki Zan ti swazir pa ti enn ki fasil. I ti ganny persekite e ver lafen premye syek ler i ti’n vye, i ti ganny anvoye an egzil. (Akt 3:1; 4:1-3; 5:18; Rev. 1:9) Ler Zan ti dan prizon akoz i ti pe anons sa bon nouvel konsernan Zezi, i ti montre ki i kontan lezot. Par egzanp, ler i ti lo zil Patmos, i ti ekri liv Revelasyon e anvoy li kot bann kongregasyon pour zot konn bann keksoz ki “bezwen arive byento.” (Rev. 1:1) Osi, i kapab ki Zan ti ekri son Levanzil konsernan lavi ek minister Zezi apre ki i ti’n ganny large Patmos. I ti osi ekri trwa let pour ankouraz son bann frer ek ser. Ki mannyer ou kapab servi ou lavi pour ed lezot, parey Zan ti fer?

10. Ki mannyer ou kapab montre ki ou kontan lezot?

¹⁰ Ou kapab montre ki ou kontan lezot par sa ki ou swazir pour fer avek ou lavi. Lemonn Satan i anvi ki ou servi tou ou letan ek lenerzi pour satisfer zis ou prop lekor par esey fer larzan oubyen fer ou vin popiler. Me bann Kretyen partou dan lemonn pe pas plis letan posib pour anons sa bon nouvel e ed dimoun pour vin pli pros avek Zeova. Serten i menm kapab fer sa a plen tan.

11. Ki mannyer bann proklanmater fidel i montre ki zot kontan Zeova ek zot bann frer ek ser?

¹¹ Bokou Kretyen fidel i bezwen travay a plen tan pour siport zot lekor ek zot fanmir. Me kantmenm sa, sa bann proklanmater fidel i siport lorganizasyon Zeova dan nenport fason ki zot kapab. Par egzanp, serten i ede dan travay led sekour apre en dezas, lezot i kapab travay lo bann proze konstriksyon e tou dimoun i annan sa loportinite pour fer kontribisyon volonter pour sa travay predikasyon ki pe ganny fer partou dan lemonn. Zot fer sa bann keksoz akoz zot kontan Bondye e zot kontan lezot. Ler nou asiste e partisipe dan renyon tou le semenn, nou montre ki nou kontan nou bann frer ek ser. Nou al nou bann renyon menm si nou fatige. Menm si nou timid, nou partisipe. Kantmenm  nou annan problenm, nou ankouraz lezot avan e apre renyon. (Ebr. 10:24, 25) Nou apresye travay ki nou bann frer ek ser i fer!

12. Ki lot fason Zan ti montre ki i kontan son bann frer ek ser?

¹² Zan ti montre ki i kontan son bann frer ek ser par felisit zot e par donn zot konsey. Par egzanp, dan son bann let, Zan ti felisit son bann frer ek ser pour zot lafwa e zot bon travay. Me i ti osi donn zot konsey konsernan pese. (1 Zan 1:8–2:1, 13, 14) Pareyman, nou bezwen felisit nou bann frer ek ser pour bann bon keksoz ki zot fer. Me si en dimoun i konmans annan en move latitid oubyen i konmans fer en keksoz ki kapab gat son lanmitye avek Zeova, nou kapab demontre nou lanmour pour li par zantiman konsey li. I demann bokou kouraz pour donn konsey en zanmi me Labib i dir ki bann bon zanmi i bezwen konsey kanmarad.​—Prov. 27:17.

13. Ki nou pa devret fer?

¹³ Parfwa i annan keksoz ki nou pa fer pour montre ki nou kontan nou bann frer ek ser. Par egzanp, nou pa ankoler vitman par sa ki zot dir. Mazin sa ki ti arive pa bokou letan avan Zezi ti mor. I ti dir son bann disip ki pour zot ganny lavi eternel, zot bezwen manz son laser e bwar son disan. (Zan 6:53-57) Bokou son bann disip pa ti kontan sa ki i ti’n dir e plizyer zot ti aret swiv li. Me son bann vre zanmi enkli Zan ti reste avek li. Zot pa ti konpran sa ki Zezi ti’n dir e i tre probab sa ti’n sok zot. Me bann zanmi fidel Zezi pa ti krwar ki sa ki Zezi ti’n dir ti mal e zot pa ti ofanse. O kontrer zot ti annan konfyans dan li akoz zot ti konnen i koz laverite. (Zan 6:60, 66-69) Pa i vreman enportan ki nou pa ofans fasilman par sa ki nou bann zanmi i dir! O kontrer nou les zot eksplike ki zot pe esey dir.​—Prov. 18:13; Ekle. 7:9, NWT.

14. Akoz nou pa devret annan laenn pour nou bann frer ek ser?

¹⁴ Zan ti osi dir ki nou pa devret annan laenn pour nou bann frer oubyen ser. Si nou pa obei sa konsey, Satan i kapab enfliyans nou. (1 Zan 2:11; 3:15) Sanmenm sa ki ti arive avek serten Kretyen ver lafen premye syek. Satan ti pe fer tou sa ki i kapab pour fer sa bann serviter  Bondye annan laenn pour kanmarad e pour diviz zot. Ler Zan ti ekri son bann let, bann zonm ki ti esey fer parey Satan ti’n fini antre dan kongregasyon. Par egzanp, Dyotref ti pe fer divizyon dan en kongregasyon. (3 Zan 9, 10) I ti napa respe pour bann ansyen ki ti’n ganny anvoye par konsey direkter. I ti menm esey pous bann dimoun ki ti akey sa bann frer dan kongregasyon. Sa ki i ti fer pa ti byen ditou! Ozordi, Satan i ankor pe fer tou sa ki i kapab pour diviz pep Bondye. Nou pa devret zanmen annan laenn pour nou bann frer ek ser e aret siport zot.

15. Ki en sef fanmir i devret rapel?

¹⁵ En fason enportan ki en sef fanmir i montre ki i kontan son fanmir, i ler i donn zot sa ki zot bezwen pour viv. (1 Tim. 5:8) Me i bezwen rapel ki i bokou pli enportan pour li ek son fanmir annan en bon lanmitye avek Zeova. (Mat. 5:3) Mazin sa bon legzanp ki Zezi in kite pour bann sef fanmir. Dapre Levanzil Zan, ler Zezi ti pe mor lo poto, i ti ankor pe mazin son fanmir. Zan ti pe debout o bor Mari, manman Zezi, pros kot Zezi ti pe ganny touye. Menm si Zezi ti pe soufer en kantite, i ti demann Zan pour pran swen avek Mari. (Zan 19:26, 27) Zezi ti annan frer ek ser ki ti pou kapab donn Mari bann keksoz materyel ki i ti pou bezwen me i paret ki ni enn ant zot pa ti ankor vin son disip. Alor, Zezi ti anvi fer sir ki ti annan en dimoun ki ti pou pran swen avek Mari e ankouraz li pour kontinyen servi Zeova.

16. Ki responsabilite Zan ti annan?

¹⁶ Zan ti annan en kantite responsabilite. I ti en zapot, alor i ti bezwen devoue dan sa travay predikasyon. I kapab ki Zan ti’n marye. Alor i ti pou bezwen pran swen avek bezwen materyel son fanmir e osi ed son fanmir pour annan en bon lanmitye avek Bondye. (1 Kor. 9:5) Ki bann sef fanmir i kapab aprann avek Zan?

17. Akoz i enportan pour en sef fanmir pran swen avek bezwen spirityel son fanmir?

¹⁷ En frer ki en sef fanmir i kapab annan plizyer responsabilite enportan. Par egzanp, kot son travay i bezwen  travay dir pour ki son kondwit i anmenn loner pour Zeova. (Efe. 6:5, 6; Tit 2:9, 10) I kapab annan bann responsabilite dan kongregasyon, parey pour ankouraz e pran swen avek bann frer ek ser e osi pour diriz sa travay predikasyon. An menm tan, i enportan ki i regilyerman etidye Labib avek son madanm ek son zanfan. Zot pou vreman apresye tou sa ki i fer pour ed zot reste an bonn sante e ere. Zot pou osi apresye tou sa ki i fer pour ed zot kontinyen servi Zeova.​—Efe. 5:28, 29; 6:4.

18. Ki Zan ti asire?

¹⁸ Zan ti viv lontan e i ti eksperyans bokou keksoz eksitan. I ti osi pas dan bokou difikilte ki ti’n kapab afebli son lafwa. Me i ti toultan fer tou sa ki i ti kapab pour obei bann lord Zezi, ki enkli kontan son bann frer ek ser. Sa ti fer Zan asire ki Zeova ek Zezi ti kontan li e ki zot ti pou donn li sa lafors pour fer fas avek okenn difikilte. (Zan 14:15-17; 15:10; 1 Zan 4:16) Satan ek son lemonn pa ti kapab anpes Zan montre par sa ki i ti dir e fer ki i ti kontan son bann frer ek ser.

19. Ki 1 Zan 4:7 i ankouraz nou pour fer e akoz?

¹⁹ Parey Zan, nou viv dan en lemonn dirize par Satan, ki pa kontan personn. (1 Zan 3:1, 10) Satan i anvi ki nou aret kontan nou bann frer ek ser. Me si nou pa les li, i pa pou kapab fer sa. Nou devret determinen pour kontan nou bann frer ek ser e pour montre par sa ki nou dir e fer ki nou kontan zot. Ler nou demontre sa kalite lanmour, nou pou annan sa lazwa pour form parti fanmir Bondye e nou lavi pou pli ere.​—Lir 1 Zan 4:7.