1. Fa yu e fii di i sabi taki Gadu lobi i?

APOSTEL Yohanisi sikiifi taki ‘Gadu a lobi’ (1 Yoh. 4:8). U sabi taki a Gadu meke ala sani. Ma a sani di Yohanisi taki ya e leli u taki a Gadu lobi komoto tu. Yehofa lobi u. A sabi di u sabi a sani ya e meke wi e piisii.

2. Enke fa Mateyesi 22:37-40 e soi, da san a den tu moo gaan weiti? Saide a á makiliki fu du san a du fu tu weiti e taki?

² Wan Kelesten á poi taki a ná o lobi taawan, bika Yesesi taki den bakaman fi en mu lobi denseefi. (Leisi Mateyesi 22:37-40.) Yehofa ná abi sondu. Ai libi switi anga u tu, neen meke te u sabi en bun, a nai taanga gi u fu lobi en. Ma a ná ala yuu a makiliki gi u fu lobi taa sama, bika wi abi sondu. Wan baala efuso sisa sa taki efuso du wan sani anga u di wi á lobi. Yehofa sabi taki a á makiliki fu lobi taa sama, neen meke a sikiifi aini Beibel saide u mu lobi taawan, anga san o yeepi u fu du a sani ya. Apostel Yohanisi a wan fu den sama di sikiifi den sowtu toli ya.​—1 Yoh. 3:11, 12.

3. San Yohanisi taki fu lobi?

³ A omen leisi Yohanisi sikiifi taki Kelesten mu lobi denseefi. Te i teli ala den leisi di a wowtu ‘lobi’ sikiifi aini den Beibel buku Mateyesi, Malikisi anga Lukasi kon a wan, da den nai ipi enke ala den leisi di a sikiifi aini a Beibel buku Yohanisi. A wan sani fu 100 yali Yohanisi be abi, di a sikiifi a Beibel buku ya anga den taa dii biifi fi en. A soi wi aini den buku ya taki Kelesten  mu soi lobi aini ala san den e du (1 Yoh. 4:10, 11). Ma a be teke ten fosi Yohanisi seefi be fusutan a sani ya.

4. Na ala yuu Yohanisi be e soi lobi gi taawan?

⁴ Di Yohanisi be de wan yonkuman, a ná ala yuu a be e soi lobi. Wan leisi Yesesi anga den disipel be e waka pasa aini Samaliya fu go a Yelusalem. Di den doo wan pikin foto fu Samaliya, den sama á be wani teke den a osu. Di a sani ya pasa, Yohanisi anga en baala Yakowbesi ati boon te neen den akisi Yesesi efu den sa meke faya komoto a hemel boon ala den sama fu a foto kii (Luk. 9:52-56). Wan taa leisi baka, Yohanisi be du wan sani di hati den taa apostel. En anga en baala Yakowbesi be meke den mma go akisi Yesesi fu gi den hei posisi aini a Kownukondee. Di den taawan yee san den du, ná pikin boon den ati boon (Mat. 20:20, 21, 24). Ma winsi fa Yohanisi be e meke fowtu, tokuso Yesesi be lobi en.​—Yoh. 21:7.

5. San wi o luku aini a artikel ya?

⁵ Aini a artikel ya, wi o luku wantu fu den sani di Yohanisi be sikiifi, anga a fasi fa a be e tyai enseefi. Wi o luku fa u sa soi den baala anga sisa fu u taki u lobi den. Wi o si tu fa osufamii edeman sa soi taki den lobi den sama fu den.

6. Fa Yehofa soi taki a lobi u?

⁶ Son sama e si enke te yu e taigi taawan taki i lobi den, da dati sai kaba. Ma lobi a mofu á sai, u mu e du sani tu fu soi taki u lobi taawan. (Luku Yakowbesi 2:17, 26 tu.) U sabi taki Yehofa lobi u (1 Yoh. 4:19). A taigi wi aini Beibel tu taki a lobi u (Ps. 25:10; Rom. 8:38, 39). Ma a sani di e yeepi u fu biibi taki Yehofa lobi u tuutuu, a den sani di a du gi u. Yohanisi taki: ‘Gadu soi taki a lobi u, di a sende a wan kodo Manpikin fi en kon a goontapu, fu a sa yeepi u fu fende a libi’ (1 Yoh. 4:9). Yehofa sende a wan kodo Manpikin fi en di a lobi kon dede gi u (Yoh. 3:16). A sani ya e soi kiin taki Yehofa lobi u tuutuu.

7. Fa Yesesi soi taki a lobi u?

⁷ Yesesi be taigi den disipel fi en taki a lobi den (Yoh. 13:1; 15:15). Ma a ná taigi a be e taigi den namo, a be e du sani tu fu soi taki a lobi den. Yesesi be taki: ‘A moo gaan lobi di wan sama sa soi, a fu dede gi den mati fi  en’ (Yoh. 15:13). Yehofa anga Yesesi du sani fu soi taki den lobi u. San a sani ya e leli u?

8. San 1 Yohanisi 3:18 taki u mu du?

⁸ Te wi e du san Yehofa anga Yesesi taigi u, wi e soi taki u lobi den tuutuu (Yoh. 14:15; 1 Yoh. 5:3). Yesesi be taigi u taki u mu lobi taawan (Yoh. 13:34, 35). Wi á mu e taki a mofu namo taki u lobi u baala anga sisa, ma u mu e du sani fu soi taki u lobi den. (Leisi 1 Yohanisi 3:18.) San u sa du fu soi taki u lobi den?

9. Fa Yohanisi soi taki a be lobi den baala anga sisa fi en?

⁹ A fisiwooko Yohanisi anga en famii be e du. A be e meke moni na a wooko ya, ma toku a fika en neen a go yeepi sama fu kon sabi Yehofa anga Yesesi. A omen sani be e miti Yohanisi te a be e du a peleikiwooko. Sama be e du ogii anga en. Di a kon gaandi, den poti en wawan a wan tabiki den e kai Patmos fu di a be e taki fu Yesesi (Toli 3:1; 4:1-3; 5:18; Openb. 1:9). Winsi fa a be sooto, a be e booko en ede anga taawan. A Patmos a be de sikiifi a Beibel buku Openbaring sende gi den kemeente. A so a yeepi den baala anga sisa fi en fu sabi san o pasa aini a ten di e kon (Openb. 1:1). A gei a baka di den puu en a Patmos a sikiifi a Beibel buku Yohanisi, di e taki fu a libi fu Yesesi. A sikiifi dii biifi gi den baala anga sisa tu fu gi den taanga-sikin. Den sani ya e soi taki Yohanisi be e booko en ede anga taawan. Fa u sa waka neen baka?

10. Fa i sa soi taki i lobi taawan?

¹⁰ Den sani di yu e du anga i libi, e soi efi i lobi taawan. Den sama aini a goontapu fu Saatan e wooko taanga fu meke moni. Den e meke moiti fu abi balinen tu. Ma den sama di e dini Yehofa e wooko taanga fu paati a bun nyunsu a hii goontapu. Den e meke moiti fu yeepi sama fu toon Yehofa mati. Son baala anga sisa na a wooko ya wawan den e du, den nai du taa wooko.

11. Fa omen baala anga sisa e soi taki den lobi Yehofa anga den baala anga sisa fu den?

¹¹ A omen baala anga sisa e wooko taanga fu solugu den osufamii. Winsi fa den e wooko taanga, toku den e du ala san den man fu holibaka gi a olikanisâsi fu Yehofa. Son wan fu den e yeepi te wan gaan ogii pasa a wan peesi, taawan e yeepi meke Kownukondee zaal. Yu abi taawan tu di e gi moni fu holibaka gi a wooko di e du a hii goontapu. A di den lobi Gadu anga taa sama meke den e du den sani ya. Wi e go a komakandaa ala wiki winsi u weli son yuu. Winsi sen e kisi u, wi e meke moiti gi piki tu. Ala wi abi polobelema, ma toku wi e meke moiti fu gi taawan taanga-sikin fosi komakandaa anga baka komakandaa. A di u lobi u baala anga sisa meke wi e du ala den sani ya (Heb. 10:24, 25). Ai bigi gi u te taki wi abi baala anga sisa di e wooko taanga gi Yehofa.

12. San a wan taa fasi fa Yohanisi soi taki a be lobi den baala anga sisa fi en?

¹² Yohanisi be lobi den baala anga sisa fi en, neen meke a be e gafa den, ma a be e poti den a pasi tu. Di a sikiifi  biifi gi den a gafa den fu a biibi fu den, anga a fasi fa den be e wooko taanga. Ma a soi den tu san den mu du fu den á sondu (1 Yoh. 1:8–2:1, 13, 14). Useefi mu e gafa u baala anga sisa fu den bun sani di den e du. Ma efu u si wan fu den e du wan sani di sa meke en anga Yehofa poli, u mu poti en a pasi. Ma a fasi fa wi o taki anga en mu soi taki u lobi en, wi á mu taki sani di o meke a fii wan fasi. A á makiliki fu soi wan sama taki ai du wan sani di á bun. Ma Beibel taki wan tuutuu mati o poti yu a pasi te a de fanowdu.​—Odo 27:17.

13. San wi á mu du?

¹³ Efu u lobi u baala anga sisa u ná o du son sani. Efu den taki wan sani di yu á kaba fusutan, yu ati á mu boon gaw. A so wan sani be pasa fosi Yesesi dede. A be taigi den bakaman fi en taki efu den wani fende a teego libi, den mu nyan mi en sikin da den diingi en buulu (Yoh. 6:53-57). Gaanse fu den sama di be de ape dyombo te neen den gwe fika en. Ma den tuutuu mati fi en á gwe fika en. Yohanisi a be wan fu den mati ya. Denseefi á be kaba fusutan san Yesesi be wani taki, ma den be e fitoow en. Den be sabi taki Yesesi á be o leli den falisi sani (Yoh. 6:60, 66-69). A sani ya e leli u taki wi ati á mu e boon gaw te wan mati fu u taki wan sani di wi á kaba fusutan. Pe fu wi ati boon, a moo bun fu akisi en san a wani taki.​—Odo 18:13; Peleik. 7:9.

14. Saide u mu luku bun fu u nai buuse u baala anga sisa?

¹⁴ Yohanisi be taki wi á mu e buuse u baala anga sisa. Efu wi e buuse den, Saatan o fende u kisi (1 Yoh. 2:11; 3:15). Na a sani ya be miti son Kelesten baka di gaanse fu den apostel dede. A pisiten de Saatan be e du ala san a be poi fu meke den baala anga sisa á libi na a wan moo. A yuu di Yohanisi sikiifi a biifi ya, a omen sama di be e denki enke Saatan be kon aini a kemeente fu koli den Kelesten. Diotreifes a be wan fu den sama ya (3 Yoh. 9, 10). A á be e lesipeki den baala di be e tii a wooko. Te wan sama be e libi bun anga sama di a be e buuse, a be e meke moiti fu puu  a sama de aini a kemeente. A be abi heimembee. Aini a ten ya Saatan e du ala san a poi tu fu meke a kemeente á libi na a wan. Neen meke noiti u mu buuse u baala anga sisa.

15. San osufamii edeman mu holi a pakisei?

¹⁵ Osufamii edeman di lobi den famii e meke moiti fu den abi nyanyan, koosi anga wan peesi fu tan (1 Tim. 5:8). Ma den mu yeepi den osufamii fu lobi Yehofa tu, bika na a sani de o meke den piisii tuutuu (Mat. 5:3). Osufamii edeman sa waka a Yesesi baka. Te wi e leisi a Beibel buku Yohanisi, da ai soi taki di den be sipikii Yesesi a wan ponsu seefi a be e pakisei den sama fi en ete. Yohanisi be taampu anga Yesesi mma a pe den be sipikii en. Anga ala a pen de Yesesi e akisi Yohanisi fu luku en mma gi en (Yoh. 19:26, 27). Yesesi be abi baala anga sisa di be o solugu en mma. Maliya á be o mankei nyanyan efuso taa sani di a be abi fanowdu. Ma a gei enke den baala anga sisa fu Yesesi á be toon en bakaman fosi a dede. Neen meke Yesesi akisi Yohanisi fu a solugu en mma gi en. A be mu yeepi en tu fu a á gwe fika Yehofa.

16. Sowtu faantiwowtu Yohanisi be abi?

¹⁶ A omen faantiwowtu Yohanisi be abi. En a be wan apostel, neen meke a be abi fu e peleiki fayafaya. Efu a be abi uman anga pikin, a be mu solugu den, ma a be mu yeepi den fu dini Yehofa tu (1 Kor. 9:5). Fa osufamii edeman sa waka a Yohanisi baka?

17. Saide osufamii edeman mu yeepi den osufamii fu dini Yehofa?

¹⁷ Son osufamii edeman abi taa faantiwowtu. Te den e wooko fu solugu den osufamii, den mu e du den wooko bun fu sama á fende fowtu a den (Efe. 6:5, 6; Tit. 2:9, 10). Son osufamii edeman a owluman di mu teke fesi aini a peleikiwooko. Den mu e gi den baala anga sisa taanga-sikin tu. Boiti den sani ya, den mu sutudeli anga den uman anga den pikin fu den. Ai bigi gi den uman fu den baala ya anga den pikin te den si a moiti di den e meke fu  solugu den, anga fa den e yeepi den fu dini Yehofa.​—Efe. 5:28, 29; 6:4.

18. San Yohanisi be sabi?

¹⁸ Yohanisi be libi langa. A omen sani miti en di be sa swaki a biibi fi en. Ma ala yuu a be e meke moiti fu du san Yesesi be taigi den bakaman fi en. Yohanisi be lobi den baala anga sisa fi en, enke fa Yesesi be taigi den. Fu di a be e du den sani ya meke a be sabi taki Yehofa anga Yesesi be lobi en. A be sabi tu taki winsi san be e miti en, den be o yeepi en fu holidoo (Yoh. 14:15-17; 15:10; 1 Yoh. 4:16). Saatan anga a goontapu fi en á be poi tapu Yohanisi fu lobi den baala anga sisa fi en. A á be lobi den a mofu namo, ma a be e du sani tu fu soi taki a lobi den.

19. Sowtu taanga-sikin 1 Yohanisi 4:7 e gi u? Saide u mu du a sani de?

¹⁹ Leti enke a ten fu Yohanisi, a Saatan e tii a goontapu ya, neen meke den sama fu a goontapu ya á lobi taawan (1 Yoh. 3:1, 10). Saatan wani u buuse den baala anga sisa fu u, ma wi á mu gi en a okasi fu poli wi anga den. U mu du ala san u poi fu lobi den baala anga sisa fu u. Wi á mu lobi den a mofu namo, ma u mu e du sani gi den tu fu soi taki u lobi den. Efu wi e du den sani ya, a libi o moo switi gi u, bika wi o tan aini a osufamii fu Yehofa.​—Leisi 1 Yohanisi 4:7.