1. K’a lɔn ko Ala b’i kanu, o be mun lo kɛ i la?

CIDEN ZAN y’a sɛbɛ ko: “N’i ko Ala, i ko kanuya le.” (1 Zan 4:8). O kumaw b’an hakili jigi tiɲɛn kuma nafaman dɔ la. O ye ko niin Dibaga lo ye kanuyatigi Ala ye fana. Jehova b’an kanu! O kanuya b’a to an b’a ye ko an latanganin lo, an ninsɔn ka di ani an wasanin lo.

2. Ka kɛɲɛ ni Matiyo 22:37-40 ye, cii fila jumanw lo kɔrɔtanin lo ka tɛmɛ cii tɔɔw bɛɛ kan? Mun na a be se ka gwɛlɛya an ma ka cii filanan labato?

² Kerecɛnw tɛ se k’a latigɛ n’u bena ɲɔgɔn kanu wala n’u tɛna ɲɔgɔn kanu. U ka ɲi ka ɲɔgɔn kanu le sabu o ye cikan lo ye min dira u ma (Matiyo 22:37-40 kalan). N’an ye Jehova lɔn ka ɲɛ, a ka nɔgɔ an ma ka cikan fɔlɔ labato. O ka nɔgɔ sabu Jehova dafanin lo, a b’a janto an na ani a b’an minɛ ni ɲumanya ye. Nka, a be se ka gwɛlɛya an ma ka cikan filanan labato. Mun na do? Sabu an balima minw be kafo kɔnɔ, olu y’an mɔgɔɲɔgɔn dɔw ye ani u dafanin tɛ. O kama tuma dɔw la, u be se ka koo dɔw kɛ minw b’a to an b’a miiri ko u t’u janto an na wala ko u t’an kanu. Jehova tun b’a lɔn ko a tun bena gwɛlɛya an ma ka cikan filanan labato. O kama, a y’a to Bibulu sɛbɛbaga dɔw ye ladili tigitigi dɔw sɛbɛ walisa k’an dɛmɛ k’a faamu fɛɛn min kama an ka ɲi k’a yira ko an b’an mɔgɔɲɔgɔn kanu ani an be se k’o kɛ cogo min na. Ciden Zan y’o ladiliw sɛbɛbaga dɔ ye.—1 Zan 3:11, 12.

3. Zan sinsinna mun lo kan?

³ Zan ka kitabuw kɔnɔ, a sinsinna a kan ko kerecɛnw ka ɲi k’a yira k’u be ɲɔgɔn kanu. A ye Yezu ka ɲɛnamaya  lakali a ka Evanzili kɔnɔ. O yɔrɔ la, a ye kumaden “kanu” ani “koo ka di” fɔ siɲɛ caaman ka tɛmɛ Evanzili sɛbɛbaga saba tɔɔw bɛɛ lajɛnnin kan. Zan y’a ka Evanzili ani a ka bataki saba sɛbɛ tuma min na a tun be ni saan 100 ɲɔgɔn ye. O kitabuw b’a yira ko an be koo o koo kɛ, kanuya lo ka ɲi k’an lasun k’o kɛ (1 Zan 4:10, 11). Nka sanni Zan k’o faamu, o ye wagati ta.

4. Yala Zan y’a yira tuma bɛɛ ko a be tɔɔw kanu wa?

⁴ Zan kanbele tuma, a tun t’a yira tuma bɛɛ ko a be tɔɔw kanu. Ɲɛyirali fɛ loon dɔ, Yezu n’a ka kalandenw tun be tagara Zeruzalɛmu ani u sera Samari dugudennin dɔ la. O dugumɔgɔw banna ka Yezu n’a ka kalandenw ladon u fɛ. Zan ye mun lo kɛ do? A ko Yezu k’a to olu b’a kɛ tasuma be jigi ka bɔ sankolo la ka dugumɔgɔw bɛɛ halaki! (Luka 9:52-56). Wagati wɛrɛ la, Zan m’a yira ko a be ciden tɔɔw kanu. A be komi ale n’a balimacɛ Zaki y’u bamuso lasun walisa a k’a ɲini Yezu fɛ a ka lɔyɔrɔba di olu ma a gɛrɛfɛ a ka Masaya kɔnɔ. Tuma min na ciden tɔɔw y’o mɛn, u dimina kosɔbɛ! (Mat. 20:20, 21, 24). Zan ka filiw bɛɛ n’a ta, a koo tun ka di Yezu ye.—Zan 21:7.

5. An bena mun lo lajɛ barokun nin na?

⁵ Barokun nin na, an bena Zan ka ɲɛyirali lajɛ. An bena koo dɔw lajɛ fana a ye minw sɛbɛ kanuya koo la. U lajɛtɔ, an bena a faamu an be se k’a yira an balimaw na cogo min na ko an b’u kanu. An bena a ye fana cogo jɔnjɔn minw na sotigi be se k’a yira ko a b’a somɔgɔw kanu.

6. Jehova y’a yira cogo di ko a b’an kanu?

⁶ An be se k’a miiri ko walisa k’a yira ko an be tɔɔw kanu, an ka ɲi ka kɛ ni miiriya ɲumanw ye u koo la ani ka kuma ɲumanw fɔ u ye dɔrɔn. Nka o dama tɛ bɔri kɛ. N’an b’u kanu sɔbɛ la, an ka ɲi k’o yira an ka kɛwalew fɛ fana (Zaki 2:17, 26 lajɛ). Ɲɛyirali fɛ, Jehova b’an kanu (1 Zan 4:19). A y’o kanuya yira kuma ɲumanw fɛ minw sɛbɛra Bibulu kɔnɔ (Zab. 25:10; Ɔrɔm. 8:38, 39). Nka, o kumaw dama lo t’a to an lanin b’a la ko Ala b’an kanu. Ala b’o yira fana a ka kɛwalew fɛ. Zan y’a sɛbɛ ko: “Dencɛ kelenpe min be Ala fɛ, a y’o ci diɲɛ na waasa an ka balo ale barika la. Ala y’a ka kanuya yira an na ten le.” (1 Zan 4:9). Jehova y’a to a Dencɛ kanulen nana tɔɔrɔ ani ka sa an kosɔn (Zan 3:16). O kama, an lanin b’a la ko Jehova b’an kanu yɛrɛ le!

7. Yezu ye mun lo kɛ min b’a yira ko a b’an kanu?

 ⁷ Yezu y’a fɔ a ka kalandenw ye ko a b’u kanu (Zan 13:1; 15:15). A y’a yira a ka kumaw fɛ ko a b’a ka kalandenw ni anw kanu kosɔbɛ. Nka a ma dan o ma, a y’o yira a ka kɛwalew fana fɛ. Yezu y’a fɔ ko: “K’i yɛrɛ nii di i teriw kosɔn, kanuya wɛrɛ te yen min ka fisa n’o ye.” (Zan 15:13). Jehova ni Yezu ye min kɛ an ye, n’an miirila o la, o ka ɲi k’an lasun ka mun lo kɛ?

8. Ka kɛɲɛ ni 1 Zan 3:18 ye, an ka ɲi ka mun lo kɛ?

⁸ N’an be mɛnni kɛ Jehova ni Yezu fɛ, an b’a yira ko an b’u kanu (Zan 14:15; 1 Zan 5:3). Yezu ye cii di an ma fana ko an ka ɲɔgɔn kanu (Zan 13:34, 35). An ka ɲi k’a fɔ an balimaw ye ko an b’u kanu. Nka o dɔrɔn tɛ, an ka ɲi k’o yira fana an ka kɛwalew fɛ (1 Zan 3:18 kalan). An be se ka mun lo kɛ tigitigi k’a yira ko an b’u kanu?

9. Kanuya ye Zan lasun ka mun lo kɛ?

⁹ Zan tun be se ka to ka jɛgɛminɛ baara kɛ n’a facɛ ye ani ka wari caaman sɔrɔ. Nka a m’o kɛ. A y’a ka ɲɛnamaya tɔɔ bɛɛ kɛ ka to ka tɔɔw dɛmɛ u ka Jehova ni Yezu lɔn. A y’a latigɛ ka min kɛ a ka ɲɛnamaya kɔnɔ, o tun man nɔgɔ. U y’a tɔɔrɔ ani saan kɛmɛkulu fɔlɔ laban fan fɛ, a kɛlɛbagaw tagara n’a ye yɔrɔ dɔ la k’a kɛ kasoden ye. O y’a sɔrɔ a tun ye cɛkɔrɔba ye (Kɛw. 3:1; 4:1-3; 5:18; Yir. 1:9). U ye Zan don kaso la sabu a tun be waajuli kɛ Yezu koo la. O bɛɛ n’a ta, k’a to kaso la, a y’a yira ko a be tɔɔw kanu. Ɲɛyirali fɛ, k’a to Patimɔsi guun kan, a ye Yirali ka kitabu sɛbɛ ani k’a ci kafow ma. A y’o kɛ walisa u k’a lɔn “koo minw ka kan ka kɛ yanni dɔɔni.” (Yir. 1:1). O kɔ, Zan y’a ka Evanzili sɛbɛ, o min na a ye Yezu ka ɲɛnamaya n’a ka cidenya baara lakali. A be komi a y’o sɛbɛ a bɔnin kɔ Patimɔsi guun kan. A ye bataki saba sɛbɛ fana walisa k’a balimaw jija ani k’u barika bonya. Tiɲɛn na, Zan tun b’a yɛrɛ saraka tɔɔw nafa kosɔn. I be se k’a ladegi o la cogo di?

10. I be se k’a yira cogo di ko i be i mɔgɔɲɔgɔn kanu?

¹⁰ I b’a latigɛ ka min kɛ i ka ɲɛnamaya kɔnɔ, i be se k’a yira o fɛ ko i b’i mɔgɔɲɔgɔn kanu. Sutana ka duniɲa b’a fɛ i ka miiri i yɛrɛ dɔrɔn lo koo la ani i k’a ɲini ka wari wala tɔgɔba sɔrɔ. Nka duniɲa kuru bɛɛ kɔnɔ, Masaya waajulikɛlaw b’u yɛrɛ saraka tɔɔw nafa kosɔn u kɛtɔ k’u seko bɛɛ kɛ waajuli la. U be kibaro diiman fɔ mɔgɔw ye ani k’u dɛmɛ u k’u magwɛrɛ Jehova la. Dɔw yɛrɛ be sera k’o kɛ kudayi.

11. Weleweledala kantigi caaman b’a yira cogo di ko u be Jehova n’u balimaw kanu?

¹¹ Kerecɛn kantigi caaman ka ɲi ka baloɲini baara kɛ wagati caaman na walisa k’olu n’u somɔgɔw mako wasa. O bɛɛ n’a ta, o weleweledala kantigiw be Ala ka ɔriganisasiyɔn dɛmɛ cogo caaman na. Ɲɛyirali fɛ, dɔw be sera ka dɛmɛ don balawow kɛra yɔrɔ minw na ani dɔ wɛrɛw be sera ka dɛmɛ don Masaya Boonw n’a ɲɔgɔnnaw lɔli baara la. Waajuli baara min be kɛra duniɲa kuru bɛɛ kɔnɔ, sababu dira bɛɛ ma fana ka niliw kɛ o kosɔn. U b’o koow kɛ sabu Ala n’u mɔgɔɲɔgɔn koo ka di u ye. An b’a yira ko an b’an balimaw kanu an kɛtɔ ka taga lajɛnw na lɔgɔkun o lɔgɔkun ani ka lakalitaw kɛ. An be taga o lajɛnw na hali n’an sɛgɛnnin lo. Hali n’an  be siran, an be lakalitaw kɛ. An bɛɛ be n’an ka gwɛlɛyaw ye. O bɛɛ n’a ta, an be tɔɔw jija sanni lajɛn ka daminɛ ani a bannin kɔ (Eburuw 10:24, 25). An b’an balima kanulenw waleɲuman lɔn kosɔbɛ u ka baara kosɔn!

12. Zan y’a yira cogo wɛrɛ juman na ko a b’a balimaw kanu?

¹² Zan y’a yira ko a b’a balimaw kanu a kɛtɔ k’u tando. Nka o dɔrɔn tɛ, a tun be ladiliw di u ma fana. Ɲɛyirali fɛ, a ye batakiw sɛbɛ a balimaw ma walisa k’u tando u ka limaniya n’u ka baara ɲuman kosɔn. Nka a ma dan o ma, a ye ladiliw di u ma ka gwɛ jurumu koo la (1 Zan 1:8–2:1, 13, 14). An fana ka ɲi k’an balimaw tando u ka kɛwale ɲumanw kosɔn. Nka, ni mɔgɔ dɔ y’a daminɛ ka kɛ ni delinanko juguw wala kɛwale juguw ye, an be se k’a yira ko an b’a kanu an kɛtɔ ka ladili di a ma nɛmɛnɛmɛ. Walisa k’i teri dɔ ladi, fɔɔ i k’i jaa gwɛlɛya. Bibulu b’a fɔ ko teri sɔbɛ b’a teriɲɔgɔn hakili diya, o kɔrɔ, a b’a ladi.—Talenw 27:17.

13. An man ɲi ka mun lo kɛ?

¹³ Tuma dɔw la n’an tɛ koo dɔ kɛ, an b’a yira o fɛ ko an b’an balimaw kanu. Ɲɛyirali fɛ, an tɛ dimi joona u ka kumaw kosɔn. An ka koo dɔ lajɛ min kɛra Yezu ka wagati laban na dugukolo kan. Yezu y’a fɔ a ka kalandenw ye ko ni mɔgɔ min ma ale farisogo dumu ani k’ale joli min, o tigi tɛna ɲɛnamaya banbali sɔrɔ (Zan 6:53-57). O kuma ye mɔgɔw kɔnɔ gwan fɔɔ a ka kalanden caaman bɔra a kɔ. Nka Zan ni Yezu teri sɔbɛ tɔɔw ma bɔ a kɔ. U tora n’a ye kantigiya la. U tun ma Yezu ka kuma faamu ani o kuma barila u la. Nka u m’a miiri ko a ye min fɔ, o ye kuma jugu ye ani u ma dimi o kosɔn. U y’u jigi la Yezu kan sabu u tun b’a lɔn ko a be tiɲɛn lo fɔ (Zan 6:60, 66-69). Tiɲɛn na, a kɔrɔtanin lo an kana dimi joona an teriw ka kumaw kosɔn! Nka, an ka sababu di u ma u k’a ɲɛfɔ an ye u b’a fɛ ka min fɔ.—Talenw 18:13; Waaj. 7:9.

14. Mun na an man ɲi k’an balimaw kɔniya abada?

¹⁴ Zan y’an jija fana ko an kana an balimaw kɔniya. N’an t’an janto o ladilikan na, Sutana bena nɔɔ jugu to an kan (1 Zan 2:11; 3:15). O ɲɔgɔn ye kerecɛn dɔw sɔrɔ saan kɛmɛkulu fɔlɔ laban na. Sutana tun be koo bɛɛ lajɛnnin kɛra walisa Ala sagokɛlaw  ka ɲɔgɔn kɔniya ani u ka faranfaran. Zan y’a ka lɛtɛrɛw sɛbɛ tuma min na, mɔgɔ minw tun be ni Sutana ka miiriya ɲɔgɔn ye, olu dɔw tun donna kafo kɔnɔ. Ɲɛyirali fɛ, Diyotɛrɛfu tun y’a kɛ bɛnbaliyakow donna kafo dɔ kɔnɔ (3 Zan 9, 10). Koow ɲɛnabɔla jɛnkulu ka lasigiden minw tun be na bɔ kafow ye, a tun tɛ bonya la olu kan. Mɔgɔ minw koo man di a ye, kafoden minw tun b’olu ladon u ka soo, a yɛrɛ tun b’a ɲini k’olu gwɛn ka bɔ kafo kɔnɔ. Diyotɛrɛfu tun fanin lo a yɛrɛ la kojugu! Bi fana, Sutana bele be koo bɛɛ lajɛnnin kɛra walisa ka Ala sagokɛlaw faranfaran. O kama, an man ɲi k’an balimaw kɔniya abada ani ka ban k’u dɛmɛ.

15. Sotigi ka ɲi ka mun lo to a hakili la?

¹⁵ Sotigi b’a yira cogo jɔnjɔn minw na ko a b’a somɔgɔw kanu, u la dɔ ye k’u mako wasa bololafɛnw ta fan fɛ (1 Tim. 5:8). Nka, a ka ɲi k’a to a hakili la ko bololafɛnw tɛ se k’a ka denbaya ka Alakow wasa (Mat. 5:3). A filɛ Yezu ye ɲɛyirali min to sotigiw ye. Ka kɛɲɛ ni Zan ka Evanzili ye, ka Yezu to gwengwenyiri kan, a bele tun be miirila a somɔgɔw koo la. Yezu tun gwengwena yiri kan yɔrɔ min na, Zan tun lɔnin lo ni Yezu bamuso Mariyamu ye o yɔrɔ la. Hali k’a sɔrɔ Yezu tun tɔɔrɔnin lo kosɔbɛ, a y’a ɲini Zan fɛ a k’a janto ale bamuso la (Zan 19:26, 27). Yezu dɔgɔninw tun be se ka Mariyamu mako wasa bololafɛnw ta fan fɛ. Nka, a be komi u si tun ma kɛ Yezu ka kalanden ye fɔlɔ. O kama, Yezu ye labɛnw kɛ walisa Mariyamu mako ka wasa bololafɛnw ani Alako ta fan fɛ.

16. Zan tun be ni kunkanbaara jumanw lo ye?

¹⁶ Zan tun be ni kunkanbaarabaw ye. Komi Yezu ka ciden dɔ tun lo, a tun kisɛyanin lo waajuli baara la. A be komi a tun ye muso furu fana. O kama, a tun b’a ka denbaya mako wasa bololafɛnw ani Alako ta fan fɛ (1 Kor. 9:5). Sotigiw be kalan juman lo sɔrɔ o koo la bi?

17. Mun na a kɔrɔtanin lo sotigi k’a ka denbaya mako wasa Alako ta fan fɛ?

¹⁷ Balimacɛ min ye sotigi ye, ale be se ka kɛ ni kunkanbaaraba caaman ye. Ɲɛyirali fɛ, a ka ɲi k’a sɔbɛ don a ka baloɲini baara la. O la, a bena nɔɔrɔ la Jehova kan  (Efɛz. 6:5, 6; Titi 2:9, 10). N’a sɔrɔ a be ni kunkanbaaraw ye fana kafo kɔnɔ i n’a fɔ ka balimaw jija, k’a janto u la, ani ka waajuli baara ɲɛminɛ. O wagati kelen na, a kɔrɔtanin lo a ka to ka Bibulu sɛgɛsɛgɛ tuma o tuma n’a muso n’a deenw ye. A be jijali minw kɛra walisa k’u mako wasa bololafɛnw, dusukunnakow ani Alako ta fan fɛ, u bena a waleɲuman lɔn kosɔbɛ o kosɔn.—Efɛz. 5:28, 29; 6:4.

18. Zan tun lanin be mun lo la?

¹⁸ Zan ye sijan sɔrɔ ani a fana ye ninsɔndiyako caaman sɔrɔ a ka ɲɛnamaya kɔnɔ. A ye gwɛlɛya caaman sɔrɔ fana minw tun be se k’a ka limaniya nagasi. Nka, a y’a seko fisaman kɛ tuma bɛɛ ka Yezu ka cikanw labato i n’a fɔ k’a balimaw kanu. O kama, Zan tun lanin b’a la ko Jehova ni Yezu b’ale kanu ani ko u bena fanga di ale ma walisa a ka se ka gwɛlɛya sifa bɛɛ muɲu (Zan 14:15-17; 15:10; 1 Zan 4:16). Sutana n’a ka duniɲa tun tɛ se ka koo foyi kɛ walisa ka Zan bali a k’a balimaw kanu ani k’o yira a ka kumaw n’a ka kɛwalew fɛ.

19. Min fɔra 1 Zan 4:7 kɔnɔ, o b’an jija ka mun lo kɛ ani mun na do?

¹⁹ I ko Zan, an be ɲɛnamaya kɛra duniɲa min kɔnɔ, Sutana lo y’a kuntigi ye ani a tɛ mɔgɔ si kanu (1 Zan 3:1, 10). Sutana b’a fɛ an kana an balimaw kanu tugun. Nka a tɛ se k’o kɛ fɔɔ n’an yɛrɛ lo ye sira di a ma. An k’an jija k’an balimaw kanu ani k’o yira an ka kumaw n’an ka kɛwalew fɛ. O la, an bena nɛɛma sɔrɔ ka kɛ Jehova ka denbayamɔgɔ dɔw ye ani ka ninsɔndiya sɔbɛ sɔrɔ an ka ɲɛnamaya kɔnɔ.—1 Zan 4:7 kalan.