1. E uqeti iko vakacava na loloma ni Kalou?

“NI KALOU ga na loloma,” qori na ka e vola na yapositolo o Joni. (1 Joni 4:8) Eda vulica ena ivakamacala rawarawa qori e dua na ka dina e bibi sara: E sega wale ga ni iVurevure ni bula na Kalou, e iVurevure tale ga ni loloma. E lomani keda! Na nona loloma e vakanuideitaki keda, eda marau kina, da lomavakacegu tale ga.

2. Me vaka e tukuni ena Maciu 22:37-40, na cava na rua na ivunau levu duadua? Cava ena rairai dredre kina meda muria na kena ikarua?

² Vei keda na lotu vaKarisito, e sega ni vakatau tu ga vei keda noda vakaraitaka na loloma, ia e dua sara ga na ivakaro. (Wilika Maciu 22:37-40.) Nida mai kila e levu na ka me baleti Jiova, de dua ena rawarawa meda muria na imatai ni ivakaro. Na vuna? Ni uasivi o Jiova, e dau veinanumi, e yalovinaka tale ga. Ia ena rairai dredre meda muria na ikarua ni vakaro. Na vuna? Era sega ni uasivi na kainoda voleka duadua, ya o ira na mataveitacini. Ena rawa gona nira sega ni veinanumi se yalovinaka ena so na ka era tukuna se cakava vei keda. E kila o Jiova ni qori e dua na ituvaki dredre eda na sotava. E uqeta gona eso na dauvola iVolatabu mera vola na ivakasala matata ena sala meda vakaraitaka kina na loloma, kei na vuna meda cakava kina qori. O Joni e dua vei ira.—1 Joni 3:11, 12.

3. Na cava e vakamatatataka o Joni?

³ E vakamatatataka ena nona ivola o Joni, ni bibi meda vakaraitaka na loloma na lotu vaKarisito. Ni volatukutukutaka mada ga na bula i Jisu, e laurai ni vakayagataka  sara vakalevu o Joni na vosa loloma kei na lomani, ni vakatauvatani kei ratou na tolu tale na dauvola Kosipeli. E vola o Joni nona Kosipeli kei na tolu tale nona ivola ni sa voleka ni yabaki duanadrau. Eda vulica ena ivola uqeti vakalou qori, ni dodonu meda vakaraitaka na loloma na lotu vaKarisito ena ka kece eda cakava. (1 Joni 4:10, 11) Ia e taura na gauna me qai vulica qori o Joni.

4. E dau vakaraitaka tu ga na loloma o Joni?

⁴ Ni se gonetagane o Joni, e sega ni laurai vua na loloma ena so na gauna. Kena ivakaraitaki, dua na gauna e gole o Jisu kei ratou nona tisaipeli i Samaria ena nodratou ilakolako i Jerusalemi. A sega ni vakacegui ratou e dua na koro e Samaria. Na cava e qai cakava o Joni? E tarogi Jisu ke vinakata me kaciva na bukawaqa mai lomalagi me vakarusai ira na lewenikoro qori! (Luke 9:52-56) Dua tale na gauna, e sega ni lomani ratou na vo ni yapositolo. Erau marici tinadrau o Jemesa kei Joni, me kerea vei Jisu me solia vei rau na itutu dokai ni sa veiliutaki ena Matanitu ni Kalou. Ni ratou kila qori na vo ni yapositolo, eratou cudru sara ga! (Maciu 20:20, 21, 24) E laurai gona vei Joni e levu nona malumalumu, ia e lomani koya o Jisu.—Joni 21:7.

5. Na cava ena veivosakitaki ena ulutaga qo?

⁵ Eda na veivosakitaka ena ulutaga qo na ivakaraitaki nei Joni, kei na so na ka e vola me baleta na loloma. Eda na vulica na sala meda vakaraitaka kina na loloma vei ira na tacida vakayalo. Eda na vulica tale ga e dua na sala bibi mera vakaraitaka kina na ulunivuvale nira lomana nodra vuvale.

6. E vakaraitaka vakacava o Jiova ni lomani keda?

⁶ Eda na rairai nanuma ni loloma e vakaraitaki ena noda vosa ga vakayalovinaka. Ia ena vakadinadinataki ga na loloma ena ka eda cakava. (Vakatauvatana Jemesa 2:17, 26.) Kena ivakaraitaki, e lomani keda o Jiova. (1 Joni 4:19) E tukuna sara ga vei keda ena nona Vosa na iVolatabu ni lomani keda. (Same 25:10; Roma 8:38, 39) Ia eda nuidei ni lomani keda na Kalou ena ka sara ga e cakava, sega ni ka ga e tukuna. E vola o Joni: “E kilai na loloma ni Kalou ena ka e yacovi keda ni tala mai vuravura na Kalou na Luvena e duabau ga e vakatubura, meda vakabulai kina ena vukuna.” (1 Joni 4:9) E vakalaiva o Jiova  me vakararawataki na Luvena lomani qai vakamatei ena vukuda. (Joni 3:16) Eda nuidei gona ni lomani keda o Jiova!

7. E vakaraitaka vakacava o Jisu ni lomani keda?

⁷ E vakadeitaka o Jisu vei ratou na nona tisaipeli ni lomani ratou. (Joni 13:1; 15:15) E sega ni laurai ga ena ka e tukuna nona lomani keda kei ratou na nona tisaipeli, e laurai tale ga ena ka e cakava. E kaya o Jisu: “E sega ni dua na loloma e sivia na loloma qo, me dua e solia nona bula ena vukudra na nona itokani.” (Joni 15:13) Nida vakasamataka na ka e cakava o Jiova kei Jisu ena vukuda, ena uqeti keda vakacava?

8. Na cava e kaya na 1 Joni 3:18 meda cakava?

⁸ Eda vakaraitaka nida lomani Jiova kei Jisu nida muria na ka erau vinakata. (Joni 14:15; 1 Joni 5:3) E vakarota gona o Jisu meda veilomani. (Joni 13:34, 35) Meda kua ni tukuna wale ga vei ira na tacida nida lomani ira, ia meda vakaraitaka noda loloma ena ka sara ga eda cakava. (Wilika 1 Joni 3:18.) Na cava eda rawa ni cakava meda vakaraitaka nida lomani ira?

9. E uqeti Joni vakacava na loloma?

⁹ A rawa sara ga ni tiko ga kei tamana o Joni, me rawa ilavo ena nodratou bisinisi vakavuvale ni qoli. Ia e sega ni cakava qori. E vakayagataka ga na vo ni nona bula me vukea eso tale mera kila na ka dina me baleti Jiova kei Jisu. E sega ni rawarawa na vakatulewa qori. E vakacacani, e kau vakavesu tale ga ni sa qase sara, donuya na icavacava ni imatai ni senitiuri G.V. (Caka. 3:1; 4:1-3; 5:18; Vkta. 1:9) Ni vesu tu ena vuku ni nona vunautaki Jisu, e vakaraitaka tiko ga na loloma. Kena ivakaraitaki ni tiko ena yanuyanu o Patimo, e vola na ka e vakatakilai vua qai vakauta ena ivavakoso me rawa nira kila na ka “ena vakarau yaco.” (Vkta. 1:1) E kena irairai ni qai vola o Joni na Kosipeli ni bula i Jisu kei na nona cakacaka vakaitalatala ni sa sereki mai Patimo. E vola tale ga e tolu nona ivola me vakayaloqaqataki ira na mataveitacini. O na vakatotomuria vakacava nona vakuai koya o Joni?

10. O na vakaraitaka vakacava ni o lomani ira na lewenivanua?

¹⁰ O rawa ni vakaraitaka ni o lomani ira na lewenivanua ena ka o vakatulewataka ena nomu bula. E vinakata na vuravura i Setani mo nanumi iko ga ni o vakayagataka nomu gauna kei na igu ena ka ga e baleti iko, ya ni o saga mo rawailavo se mo rogo. Ia e laurai vei ira na lotu vaKarisito e veiyasai vuravura nira vakayagataka e levu nodra gauna ena vunautaki ni itukutuku vinaka, nodra vukei e levu mera toro voleka vei Jiova. Eso e nodra cakacaka sara ga vakatabakidua qori.

11. Era vakaraitaka vakacava e levu na dautukutuku nira lomani Jiova kei ira na mataveitacini?

¹¹ E levu na lotu vaKarisito yalodina era cakacaka saumi mera qaravi ira kei na nodra vuvale. Ia era tokona na isoqosoqo ni Kalou ena nodra vinaka kece. Kena ivakaraitaki, eda rawa kece ni cau meda tokona na cakacaka ena vuravura raraba. Eso era veivuke ena vakacoko, eso tale era veivuke ena tarataravaki. Na vuna? Nira lomana na Kalou kei na kainodra. Eda vakaraitaka tale ga nida lomani ira na mataveitacini nida tiko ena soqoni e veimacawa qai vakaitavi. De  dua eda oca, ia eda sasaga meda tiko ena soqoni. De dua eda rere, ia eda vakamacala. E tiko na veika dredre eda dui sotava, ia eda veivakayaloqaqataki ni bera na soqoni, ni oti tale ga. (Iper. 10:24, 25) Eda vakavinavinakataka na ka era cakava tiko na mataveitacini!

12. Na cava e dua tale na sala e vakaraitaka kina o Joni ni lomani ira na mataveitacini?

¹² E sega ni vakaraitaka ga o Joni ni lomani ira na tacina vakayalo ena nona vakacaucautaki ira, ia e veivakasalataki tale ga. Kena ivakaraitaki, e vakacaucautaki ira na mataveitacini o Joni ena nona ivola, ena vuku ni nodra vakabauta kei na caka vinaka. Ia e vakasalataki ira vakadodonu tale ga ena ka e vauca na ivalavala ca. (1 Joni 1:8–2:1, 13, 14) E bibi meda vakacaucautaki ira na tacida ena ka vinaka era cakava. Ia ke dua e bucina tiko na rai cala se itovo ca, eda na vakasalataki koya vakadodonu ena yalovinaka. E vinakati na yaloqaqa nida vakasalataka e dua na itokani, e kaya gona na iVolatabu nira na dau veivagatari na itokani dina, era na veivakadodonutaki.—Vkai. 27:17.

13. Na cava meda kua ni cakava?

¹³ Eda vakaraitaka nida lomani ira na tacida vakayalo nida sega ni cakava eso na ka. Kena ivakaraitaki, ena sega ni totolo noda cudru nira tukuna eso na ka. Dikeva na ka e yaco ni sa voleka ni cava na bula i Jisu e vuravura. E tukuna vei ira nona tisaipeli nira na bula tawamudu ke ra kania na lewena, gunuva tale ga nona dra. (Joni 6:53-57) E levu e dredre sara ga mera vakabauta qori ra mani biuti Jisu, ia eratou sega ni cakava qori na nona itokani dina, wili kina o Joni. Eratou muri koya tiko ga. E sega ni matata vei ratou na ka e tukuna o Jisu, e rairai dredre tale ga me ratou vakabauta. Ia eratou sega ni cudru se nanuma ni cala o Jisu. Eratou nuitaki koya ga, eratou kila ni dau tukuna na ka dina. (Joni 6:60, 66-69) E bibi gona meda kua ni dau cudru totolo ena ka era tukuna na noda itokani! Meda rogoci ira mada mera vakamacalataka nodra rai.—Vkai. 18:13; Dauv. 7:9.

14. Na cava meda qarauna kina na yalo ni veicati?

¹⁴ E uqeti keda tale ga o Joni meda kua ni cati ira na tacida. Ke da sega ni  muria na ivakasala qori, ena rawarawa sara nona rawai keda o Setani. (1 Joni 2:11; 3:15) Qori na ka e yacovi ira eso ena imatai ni senitiuri G.V. E saga vakaukaua o Setani mera veicati na tamata ni Kalou, mera duiyaloyalo. Gauna e vola tiko kina o Joni nona ivola, era sa lewe ni ivavakoso tu eso e laurai vei ira na yalo i Setani. Kena ivakaraitaki, e saga o Tiotirifi mera duiyaloyalo na lewe ni ivavakoso. (3 Joni 9, 10) E sega ni dokai ira na qase e tala mai na ilawalawa dauvakatulewa. Era veiciqomi eso na lewe ni ivavakoso vei ira e cata o Tiotirifi, e mani saga me biuti ira tani mai na ivavakoso. E viavialevu dina nona itovo. E saga tiko ga vakaukaua o Setani me rawai ira na tamata ni Kalou nikua mera duiyaloyalo. Meda kua mada ga ni rawai ena veicati ni na vakaleqa noda duavata.

15. Na cava mera nanuma tiko na ulunivuvale?

¹⁵ Dua na sala bibi e vakaraitaka kina na ulunivuvale ni lomana nona vuvale, ya ni vakarautaka na veika vakayago me ratou bula kina. (1 Tim. 5:8) Ia e vinakati me nanuma tiko ni bibi sara me vakarautaka na veika vakayalo, me ratou veiwekani voleka kei Jiova nona vuvale. (Maciu 5:3) E ivakaraitaki vinaka o Jisu vei ira na ulunivuvale. Eda kila ena ka e vola o Joni, ni se kauaitaka tiko ga o Jisu nona vuvale ena gauna e vako tu kina ena kaunirarawa. E duri voleka tu o Joni kei Meri na tinai Jisu. Sa voleka tu ni mate o Jisu qai dua na ka nona vutugu, ia se tataunaki tinana tiko ga vei Joni. (Joni 19:26, 27) Eda kila ni ratou na kauaitaki Meri tale ga na taci Jisu, ia e kena irairai ni ratou se sega ni tisaipeli ena gauna ya. E macala gona ni vinakata o Jisu me kauaitaki nona bula vakayago o Meri, nona bula vakayalo tale ga.

16. Na itavi cava e qarava o Joni?

¹⁶ E levu na itavi e qarava o Joni. Ni yapositolo, ena gugumatua ena cakacaka vakavunau. De dua sa vakawati tale ga, ena vinakati gona me vakarautaka na ka me ratou bula kina na nona vuvale, me ratou veivolekati tale ga kei na Kalou. (1 Kor. 9:5) Na cava era vulica kina na ulunivuvale nikua?

17. Na cava e bibi kina vua na ulunivuvale me kauaitaka na bula vakayalo ni nona vuvale?

 ¹⁷ Ena rairai levu na itavi e qarava e dua na tacida e ulunivuvale. De dua e cakacaka saumi qai vinakati me cakacaka vakaukaua, ni na vakacaucautaki o Jiova ena nona ivakaraitaki vinaka. (Efeso 6:5, 6; Taito 2:9, 10) Ena rairai tiko tale ga nona itavi ena ivavakoso, me vaka na veivakatawani, me gumatua tale ga ena cakacaka vakavunau. E bibi tale ga me vulica wasoma na iVolatabu kei watina kei ratou na luvena. E macala ga ni ratou na vakavinavinakataka nona sasaga me ratou marau, me ratou bulabula vakayago, vakayalo tale ga.—Efeso 5:28, 29; 6:4.

18. Na cava e vakadeitaka o Joni?

¹⁸ E dede na bula nei Joni qai levu na ka e marautaka. E sotava e levu na ituvaki dredre e rawa ni vakamalumalumutaka nona vakabauta. Ia e saga ena nona vinaka taucoko me muria tiko ga na ivakaro i Jisu, okati kina nona lomani ira na mataveitacini. E vakadeitaka kina o Joni ni lomani koya o Jiova kei Jisu, erau na vakaukauataki koya tale ga me vosota na ituvaki dredre. (Joni 14:15-17; 15:10; 1 Joni 4:16) E sega ni rawa ni tarovi Joni o Setani se na nona vuravura ena nona lomani ira na mataveitacini ena ka e tukuna, kei na ka e cakava.

19. Me vaka e tukuni ena 1 Joni 4:7 na cava eda uqeti meda cakava? Na vuna?

¹⁹ Me vakataki Joni, eda bula tu ena vuravura e lewa tu o Setani, e sega ni dau loloma. (1 Joni 3:1, 10) Ena saga meda kua ni lomani ira na tacida. Ena rawa ga qori ke da vakamalumalumu ena nona sasaga. Meda vakadeitaka mada ga meda lomani ira na mataveitacini. Meda tukuna qori vei ira, da qai vakadinadinataka ena ka eda cakava. Eda na vakila ga kina na marau ena vuvale i Jiova, ena vakainaki tale ga na noda bula.—Wilika 1 Joni 4:7.