1. Ou sav kè Jéova enmé-w fò. Alò, kijan ou ka santi-w ?

LAPÒT Jan maké kè « Bondyé sé lanmou » (1 Jan 4:8). Nou sav kè sé Bondyé ki ban-nou lavi men ti vèwsé-lasa ka fè-nou sonjé kè lanmou ka vin dè-y osi. Jéova enmé-nou fò toubònman ! É konm i enmé-nou, nou ka santi-nou ansékirité, nou ni tchè-kontan é nou adoumanman.

2. Matyé 22:37-40 ka palé dè sé 2 pli gran komandman-la. Ki komandman ésa, é poukwa sa pé rèd dè suiv dézyèm-la ?

² (Li Matyé 22:37-40.) Lè ou krétyen, fò ou ni lanmou pas sé sa Bondyé ka mandé. Lè nou konnèt Jéova byen, sa pi fasil pou nou suiv prèmyé komandman-la. Nou sav kè Jéova pawfé, ké i ka sousyé-y dè nou é anplisdisa, i janti èvè nou. Men pawkont, pou suiv dézyèm komandman-la, sa pé rèd toubònman. Poukwa ? Pas nou ka pasé onlo tan èvè frè é sè an nou é yo enpawfè. Kifè, défwa, nou pé ni lenprésyon kè yo pa janti èvè nou pas yo ka di-nou oben yo ka fè-nou dé biten ki ka fè-nou mal. Jéova té sav kè nou té’é ni dimal a suiv komandman-lasa. Sé pousa, adan Bib-la, i ka èspliké-nou poukwa fò yonn enmé lòt é kijan pou nou fè sa. É jistèman, i sèvi èvè lapòt Jan pou ban-nou déotwa konsèy an domenn-lasa (1 Jan 3:11, 12).

3. Ka Jan di anrapò èvè lanmou ?

 ³ Lè nou ka li sa Jan maké, nou ka rann-nou kont kè a plizyè rèpriz i ka di sé krétyen-la kè fò yo montré kè yo ni lanmou yonn pou lòt. Adan évanjil-la i maké la, Jan ka palé dè lanmou pli souvan ki Mawk, Matyé é Lik. Jan té ni apépré 100 an lè i maké évanjil-lasa é sé 3 lèt-la ki ka pòté non a-y la. Sé lèt-lasa ka montré-nou kè sé lanmou ki dwètèt dèyè do a tousa on krétyen ka fè (1 Jan 4:10, 11). Men Jan limenm a-y pa konprann sa tousuit.

4. Ès Jan toujou montré kè i té enmé pwochen a-y ?

⁴ Lè Jan té jennboug, a pa touttan i aji èvè lanmou. Pa ègzanp, ni on fwa, Jézi é disip a-y té k’ay Jérizalèm é yo pasé pa Lasamari. Yo rivé adan on vilaj é sé moun-la pa té vé akéyi-yo. Men Jan pa pran sa menm ! I jous mandé Jézi ès yo pé fè difé sòti an syèl-la pou brilé sé moun-la ! (Lik 9:52-56). Ondòt lè, Jan pa aji èvè lanmou épi sélézòt apòt-la. I ka sanm sa kè Jan é frè a-y Jak voyé manman-yo mandé Jézi si yo té’é pé ni on bèl ti plas adan Wayòm-la. Lè sélézòt apòt-la vin sav sa, difé limé ! (Mat. 20:20, 21, 24). Men magré tout défo Jan té ni, Jézi té enmé-y fò (Jan 21:7).

5. Ka nou ké vwè adan awtik-lasa ?

⁵ Adan awtik-lasa, nou ké vwè ka ègzanp a Jan ka aprann-nou, é nou ké palé dè déotwa biten kè i maké anrapò èvè lanmou. Kifè, nou ké aprann kijan nou pé montré frè é sè an nou kè nou enmé-yo fò. Nou ké vwè osi kijan on chèf a fanmi pé montré kè i enmé fanmi a-y toubònman.

6. Kijan Jéova montré kè i enmé-nou ?

⁶ Ni moun ki ka kwè kè dépi yo ka palé jantiman ba on moun é kè yo ka di-y kè yo ka aprésyé-y, sa vé di kè yo enmé-y. Men lè nou enmé on moun, sa k’ay pi lwen ki sa. Fò-nou montré-y sa osi (gadé Jak 2:17, 26). Pa ègzanp, Jéova enmé-nou (1 Jan 4:19). É pou i di-nou sa, i ka sèvi èvè dé bèl tipawòl nou ka touvé an Bib-la (Sòm 25:10 ; Wom. 8:38, 39). Men a pa sa tousèl ki ka fè si nou sèten kè Jéova enmé-nou. Nou sav Jéova enmé-nou pas i ka fè sèwten biten ki ka montré-nou sa. Mi sa Jan maké : « Adan ka an nou, mi konsa lanmou a Bondyé vin klè : Bondyé voyé sèl Gason a-y adan lèmond, pou  nou pé sa ni lavi grasa-y » (1 Jan 4:9). Jéova voyé Gason-la i té pi enmé la asi latè pou i té bay vi a-y pou nou. É Jézi soufè bon soufè la ! (Jan 3:16). Alò, nou sèten Jéova enmé-nou ! Nou pa ni pon dout asi sa !

7. Kijan Jézi montré kè i enmé-nou fò ?

⁷ Jézi pa kaché disip a-y kè i té enmé-yo toubònman ! (Jan 13:1 ; 15:15). Lè nou ka gadé sa Jézi di é sa i fè, nou ka rann-nou kont kè i té enmé disip a-y fò é kè i enmé-nou fò osi. Dayè, mi sa Jézi di : « Ponmoun pa ni pli gran lanmou ki sila ki ka bay vi a-y pou zanmi a-y » (Jan 15:13). Lè nou ka sonjé tousa Jéova é Jézi fè pou nou, ka sa ka ban-nou anvi fè ?

8. Ka 1 Jan 3:18 ka ankourajé-nou fè ?

⁸ Nou pé montré Jéova é Jézi kè nou enmé-yo fò, si nou ka fè tousa yo mandé-nou (Jan 14:15 ; 1 Jan 5:3). É Jézi di-nou kè fò yonn enmé lòt (Jan 13:34, 35). Fò-nou di frè é sè an nou kè nou enmé-yo é fò-nou montré-yo sa osi (li 1 Jan 3:18). Ka nou pé fè pou montré-yo kè nou enmé-yo ?

9. Konm Jan té ni onlo lanmou, ka sa pousé-y fè ?

⁹ Jan té’é pé gangné onpakèt lajan si i té kontinyé fè lapèch adan antrèpriz a pap’a-y. Men olyé dè sa, tout rèstan a vi a-y, i édé lézòt konnèt lavérité asi Jéova é Jézi. Vi-la Jan chwazi la pa té fasil. Padavwa i té ka préché, yo pèwsékité-y é yo chayé-y pa fòs asi on lilèt yo té ka kriyé Patmòs. É lè sa rivé-y i té ja ni on bèl laj (Akt 3:1 ; 4:1-3 ; 5:18 ; Rév. 1:9). Menm lè i té lajòl, Jan montré kè i té enmé pwochen a-y. Pa ègzanp, lè i té Patmòs, i maké liv a Larévélasyon é i voyé-y ba sé lasanblé-la pou yo té sav « sa ki pou rivé byento » (Rév. 1:1). É sé pétèt apré yo fè-y sòti Patmòs kè i ékri évanjil-la ki ka pòté non a-y la. Anplisdisa, i maké 3 lèt pou ankourajé frè é sè a-y é pou édé-yo vin pi fò. Jan fè onlo sakrifis. Kijan nou pé imité-y ?

10. Kijan ou pé montré kè ou enmé pwochen a-w ?

¹⁰ Sa ou ka désidé fè adan lavi pé montré si ou enmé pwochen a-w. Sistèm a Satan vé fè-w kwè kè sèl moun ki ka konté sé vou, vou é vou. I ka ankourajé-w a fè tousa ou pé pou gangné onpakèt lajan é pou ou vin on gwotchak. Men olyé dè sa, toupatou si latè, sé krétyen-la ka fè tousa yo pé pou préché bon nouvèl-la é pou édé sé moun-la a vin bon bon zanmi èvè Jéova. Ni onlo adan yo ki ka préché é ki ka anségné aplentan.

11. Kijan onlo pwoklamatè ka montré kè yo enmé Jéova é kè yo enmé frè é sè a yo osi ?

¹¹ Onlo krétyen oblijé travay aplentan pou yo pé sa ni on dèkwa pou yo é pou fanmi a yo. Men magrésa, yo ka fè plizyè biten diféran pou soutyenn òwganizasyon a Bondyé. Pa ègzanp, lèwvwè ni on katastwòf, ni sa ki k’ay pòté sèkou é ni dòt ki k’ay travay asi chantyé a konstriksyon. Anplisdisa, ni sa ki ka bay on ti monné pou soutyenn travay a prédikasyon-la ki ka fèt toupatou asi latè. Yo ka fè tousa pas yo enmé Bondyé é pas yo enmé pwochen a yo. Chak simenn, nou ka montré kè nou enmé frè é sè an nou lè nou ka vin réinyon é lè nou ka bay bèl ti komantè. Défwa, kò-la ka pran on koud krazé, men nou ka vin réinyon kanmenm. Menmsi tchè an nou  ka bat fò, nou ka fè éfò pou bay on ti komantè. É menmsi nou ni ti pwoblèm an nou, yonn ka ankourajé lòt, ki sé avan ki sé apré sé réinyon-la (Ébr. 10:24, 25). A pa ti kontan nou kontan tout éfò frè é sè an nou ka fè !

12. Jan montré kè i té enmé frè é sè a-y ondòt jan ankò. Kijansa ?

¹² Jan montré kè i té enmé frè é sè a-y pas i té ka félisité-yo é pas i té ka ba-yo dé bon ti konsèy osi. Pa ègzanp, adan sé lèt-la Jan maké la, i té ka félisité frè é sè a-y pas yo té ni onlo fwa é pas yo té ka fè on bèl travay. Men lè sé té pou di-yo kè fò-yo té fè atansyon pou yo pa té péché, i té ka palé ba yo franchman osi (1 Jan 1:8 – 2:1, 13, 14). Menmjan-la, fò-nou félisité frè é sè an nou pou tout bon biten yo ka fè. Men si nou konstaté kè on frè oben on sè koumansé pran on mové chimen oben ni on mové mantalité, si nou enmé-y, nou ké palé ba-y jantiman men franchman osi. Sé vré, fò-nou ni kouraj pou nou ba zanmi an nou on konsèy, men Labib ka di kè on vré zanmi « ka édé zanmi a-y fè douvan » (Pwov. 27:17).

13. Konm nou enmé frè é sè an nou, ni dé biten nou pé’é fè. Ki biten ésa ?

¹³ Défwa osi, sé lè nou pa’a fè sèwten biten kè nou ka montré frè é sè an nou kè nou enmé-yo. Pa ègzanp, siwvwè yo di-nou on biten ki pa’a fè-nou plézi, nou ka fè tousa nou pé pou nou pa lévé cho. An-nou palé dè on biten ki fèt kèlkè tan avan Jézi mò. I di disip a-y kè pou yo pé sa sové, fò-yo manjé chè a-y é fò-yo bwè san a-y (Jan 6:53-57). Ni onlo disip a Jézi ki pa aprésyé sa i di la ditou, kifè, yo arété suiv-li. Men sé zanmi fidèl la i té ni la, kon Jan pa ègzanp, pa arété maché èvè-y menmsi yo pa konprann sa i di la. Pétèt kè yomenm a yo touvé-yo étoné lèwvwè Jézi di sa. Men konm sé té bon bon zanmi a Jézi, yo pa mèt an tèt a yo kè sa Jézi di la pa té bon é yo pa fè kòlè nonplis. Olyé dè sa, yo té ka fè-y konfyans pas yo té sav kè sé té on boug ki toujou té ka di lavérité (Jan 6:60, 66-69). Si on zanmi a-w di-w on biten é kè ou pa byen konprann sa i té vé di, fò pa ou mal pran sa. Okontrè, fò ou ba-y lokazyon èspliké-w sa i té vé di (Pwov. 18:13 ; Ékl. 7:9).

14. Poukwa fò pa nou jen hay frè é sè an nou ?

 ¹⁴ Jan di-nou osi kè fò-nou enmé frè é sè an nou. Si nou pa kouté konsèy-lasa, sé konsi nou ka fè chimen pou Satan (1 Jan 2:11 ; 3:15). Lè 1^é syèk-la té k’ay bout, sé sa ki rivé sèwten krétyen. A moman-lasa, Satan té ka fè tousa i té pé pou yonn hay lòt é pou i té mèt zizanni an lasanblé-la. Lè Jan maké sé 3 lèt-la ki ka pòté non a-y la, ni déotwa nonm ki té ni menm mantalité ki Satan ki rantré an lasanblé-la. Pa ègzanp, akòz dè Dyotréfès té ni onpakèt zizanni adan on lasanblé. I pa té ni pon rèspé pou sé frè-la komité santral la té ka voyé la. É lè on moun té bizwen akéyi sé frè-lasa akaz a-y, Dyotréfès té paré a mèt moun-lasa déwò an lasanblé-la. Misyé té ni fon-é-toupé ! (3 Jan 9, 10). Jousalè, Satan ka éséyé simé zizanni adan pèp a Bondyé. Men fò pa nou antré an jé a-y. Fò pa nou hay frè é sè an nou é fò-nou toujou kontinyé soutyenn-yo.

15. Ka pou on chèf a fanmi pa jen oubliyé ?

¹⁵ Lè on chèf a fanmi ka ba fanmi a-y sa i bizwen pou viv, i ka montré on mannyè ki klè kè i enmé fanmi a-y (1 Tim. 5:8). Men fò i sonjé kè sa ki pi enpòwtan sé kè li é fanmi a-y rété bon bon zanmi èvè Jéova (Mat. 5:3). Sonjé bèl ègzanp-la Jézi lésé ba sé chèf a fanmi-la. Dapré sa ki maké adan Lévanjil a Jan, pannan Jézi té anlè poto-siplis-la, i té ka kontinyé sonjé fanmi a-y. Mari té doubout la poto-la té yé la é Jan té akoté a-y. Men magré i té ka soufè bon soufè la, Jézi mandé Jan pran swen a Mari (Jan 19:26, 27). Apapoudi Jézi pa té ni frè é sè pou okipé dè Mari, men i ka sanm sa yo ponyonn poto’o vin disip a-y. An réyalité, Jézi té vé mèt on moun pou okipé dè Mari é pou ankourajé-y kontinyé sèvi Jéova.

16. Ki rèsponsabilité Jan té ni ?

¹⁶ Jan té ni onlo rèsponsabilité. Sé té on apòt, kifè, fò i té pòté bon mannèv an travay a prédikasyon-la. Pétèt osi i té mayé, kifè, fò i té ba fanmi a-y sa i té bizwen pou viv é fò i té édé-y rété bon bon zanmi èvè Jéova (1 Kor. 9:5). Kijan ègzanp a-y pé édé sé chèf a fanmi-la jòdijou ?

17. Poukwa sa enpòwtan kè on chèf a fanmi édé fanmi a-y rété bon bon zanmi èvè Jéova ?

 ¹⁷ Délè, on frè ki ni on fanmi ka ni onlo rèsponsabilité. Pa ègzanp, fò i pòté bon mannèv an travay a-y pou yo palé dè Jéova anbyen (Éféz. 6:5, 6 ; Tit 2:9, 10). Pétèt i pé ansyen an lasanblé-la, kifè, fò i ankourajé sé frè é sè-la é fò i pran swen a yo osi. É nòwmalman, sé li ki dwètèt prèmyé douvan an travay a prédikasyon-la. É toupannan i ka fè tousa, fò i étidyé Labib èvè madanm a-y é timoun a-y chak simenn. Si i ka ba fanmi a-y tousa i bizwen pou viv é si i ka fè tousa i pé pou fanmi a-y rété bon bon zanmi èvè Jéova, yo ké kontan toubònman (Éféz. 5:28, 29 ; 6:4).

18. Dè ki biten Jan té sèten ?

¹⁸ Jan viv lontan é i viv onlo bèl èkspéryans. Sèlman, i jwenn onlo difikilté osi é sa té’é pé fébli fwa a-y. Men i toujou fè tousa i té pé pou suiv komandman a Jézi. Donk, i fè éfò pou enmé frè é sè a-y. Kifè, Jan té sèten kè Jéova é Jézi té enmé-y é kè yo té ké ba-y fòs pou andiré nenpòt ki éprèv. I pa té ni pon dout asi sa ! (Jan 14:15-17 ; 15:9, 10 ; 1 Jan 4:16). Satan é mond a-y pa té pé fè ayen pou anpéché Jan enmé frè é sè a-y. Sa Jan té ka di é sa i té ka fè té ka montré kè i té enmé frè é sè a-y.

19. Ka 1 Jan 4:7 ka ankourajé-nou fè, é poukwa ?

¹⁹ Nou an menm sitiyasyon ki Jan : mond-la nou ka viv adan-y la sé Satan ki ka gouvèné-y é misyé pa enmé ponmoun (1 Jan 3:1, 10). Sa i té’é vé sé kè nou arété enmé frè é sè an nou. Men si nou baré balan a-y, i pé’é jen rivé fè sa. Fò-nou byen désidé a enmé frè é sè an nou. Fò-nou di-yo kè nou enmé-yo é fò-nou montré-yo sa osi. Si noutout ka montré kè nou enmé frè é sè an nou, nou ké kontan nou ka fè pawti a fanmi a Jéova é sa ké mèt onlo jwa an tchè an nou (li 1 Jan 4:7).