1. Kouman lanmou Bondjé ka aji asou to ?

« BONDJÉ sa lanmou », a sa apot Jan ékri (1 Jean 4:8). Sa déztrwa mo-ya ka fè nou sonjé roun vérité ki enpòrtan : Bondjé, ki sa sours lavi-a, a li ki sa osi sours lanmou-a. Jéova kontan nou ! A pou sa nou ka santi nou kò an sékirité é nou gen tchò kontan.

2. Dapré Matthieu 22:37-40, a kisa ki dé pi gran koumannman-yan é poukisa sa pouvé rèd pou nou obéyi dézyèm-an ?

² (Li Matthieu 22:37-40.) Ki i lé ki i pa lé, roun krétyen divèt gen lanmou. A roun koumannman Jézi bay nou. Kou nou byen konnèt Jéova, pitèt sa fasil pou nou obéyi prémyé koumannman-an, paské nou savé Jéova parfè i ka pran swen di nou é i janti ké nou. Mé dézyèm koumannman-an pouvé pi rèd pou nou obéyi l’. Poukisa ? Paské nou frè ké nou sò-ya ki sa nou konpanyen ki pi pròch, pa parfè. Détan, yé pouvé di ké fè dé bagaj nou ka trouvé ki pa janti. Jéova té savé ki sa té ké rèd pou nou obéyi sa koumannman-an, a pou sa i sèrvi plizyèr moun ki ékri Labib-a pou anprann nou poukisa nou divèt kontan nou konpanyen é kouman nou pouvé fè sa. Roun di sa moun-yan, a té Jan (1 Jean 3:11, 12).

3. Kisa Jan di asou lanmou ?

³ Annan liv i ékri-ya, Jan répété plizyèr fwa ki krétyen-yan divèt montré yé lanmou. Parèkzanp, annan so lévanjil, i ka sèrvi mo « lanmou »-a ké vèrb « kontan »-an pi souvan pasé sé trwa ròt moun-yan ki ékri lévanjil Matthieu, Marc ké Luc. Roun bagaj entérésan  nou ka wè a ki Jan té gen apéprè 100 lannen lò i ékri so lévanjil ké so trwa lèt-ya. Sa liv-ya ka anprann nou ki a lanmou ki divèt pousé roun krétyen fè tousa i ka fè. Mé Jan li menm pran tan pou anprann sa (1 Jean 4:10, 11).

4. Ès Jan té toujou gen lanmou pou ròt-ya ?

⁴ Lò Jan té jennjan, i pa toujou montré i té gen lanmou pou ròt-ya. Parèkzanp, roun jou, Jézi ké so disip-ya té ka alé Jérizalèm. Lò yé rivé annan roun ti-vilaj Samari, moun-yan réfizé rousouvwè yé. Kisa Jan fè ? I doumandé Jézi si li ké so frè té divèt fè difé tonbé asou tout vilaj-a pou tchwé yé tout ! (Luc 9:52-56). Rounòt jou, Jan pa aji ké lanmou ké ròt apot-ya. Dapré sa nou ka wè, li ké so frè doumandé yé manman doumandé Jézi bay yé plas enpòrtan òbò li annan Rwayonm-an. Lò ròt apot-ya konprann sa Jak ké Jan té fè, yé lévé faché ! (Mat. 20:20, 21, 24). Mé magré tout sa mové bagaj Jan fè, Jézi té kontan l’ (Jean 21:7).

5. Kisa nou ké wè annan sa artik-a ?

⁵ Annan sa artik-a, nou ké wè èkzanp Jan bay nou é nou ké wè osi sèrten bagaj i ékri asou lanmou. Konsa nou ké anprann kouman nou pouvé montré nou lanmou pou nou frè ké sò-ya. Nou ké wè osi roun bagaj enpòrtan roun chèf fanmi divèt fè pou pran swen di so fanmi ké lanmou.

6. Kouman Jéova ka montré nou i kontan nou ?

⁶ Bokou moun ka pansé ki kontan roun moun, a yenki di moun-an sa nou gen annan nou tchò ké bèl ti paròl an bouch. Mé si nou kontan sa moun-an vréman, nou divèt montré li sa lanmou-a ké sa nou ka fè (gadé Jacques 2:17, 26). Parèkzanp Jéova kontan nou. Annan Labib-a, i ka di nou i kontan nou (Ps. 25:10 ; Rom. 8:38, 39 ; 1 Jean 4:19). Si nou sir i kontan nou, a pa sèlman paské i ka di nou l’, mé a gras a sa i ka fè osi. Jan ékri : « Men kouman Bondjé montré i kontan nou : Bondjé voyé so sèl Pitit annan monn-an pou nou pouvé gen lavi gras a li » (1 Jean 4:9). Jéova lésé so Pitit i kontan-an soufri é mouri pou nou (Jean 3:16). Donk nou sir ki Jéova kontan nou !

7. Kisa Jézi fè pou montré i kontan nou ?

⁷ Jézi di so disip i té kontan yé (Jean 13:1 ; 15:15). Mé a pa ké paròl rounso i  di yé i té kontan yé bokou. Annan fason i fè ké yé, i montré yé i té kontan yé, é ki i kontan nou osi. I di : « Pésonn pa gen pi gran lanmou ki sa-la ki ka bay so lavi pou so zanmi » (Jean 15:13). Lò nou ka sonjé sa Jéova ké Jézi fè pou nou, kisa nou divèt anvi fè ?

8. Dapré 1 Jean 3:18, kisa nou divèt fè ?

⁸ Nou ka montré nou kontan Jéova ké Jézi lò nou ka kouté yé (Jean 14:15 ; 1 Jean 5:3). É Jézi doumandé nou kontan nou konpanyen (Jean 13:34, 35). Nou divèt di nou frè ké nou sò ki nou kontan yé, mé nou divèt osi montré nou lanmou ké sa nou ka fè (li 1 Jean 3:18). Kisa nou pouvé fè pou montré yé ki nou kontan yé ?

9. Kou Jan té gen bokou lanmou, kisa i fè ?

⁹ Jan té pouvé rété ké so papa é fè bokou soumaké annan antrépriz lapèch so fanmi. Mé pasé i fè sa, i pasé tout so lavi ka idé moun anprann lavérité asou Jéova ké Jézi. Lavi Jan té chwazi-a pa té fasil. Yé pèrsékité l’ é yé mété l’ lajòl lwen di so koté. Dèrnyé fwa sa rivè l’, a té a lafen 1^é syèk-a, lò i té ja granmoun (Actes 3:1 ; 4:1-3 ; 5:18 ; Rév. 1:9). Menm lò i té lajòl paské i té préché pou palé di Jézi, Jan montré ki i té kontan ròt-ya. Parèkzanp, lò i té asou zilé Patmos, i ékri liv Révélation-an épi i voyé sa pou tout asanblé-ya, pou yé té pouvé savé kisa ki té pou rivé pita (Rév. 1:1). A pitèt apré yé lésé l’ pati di Patmos Jan ékri so lévanjil asou lavi Jézi, so prédikasyon ké tousa i fè. I ékri osi trwa lèt pou so frè ké so-ya pou ankourajé yé é pou fè yé divini pi fò. Kouman to pouvé imité fason Jan sèrvi so lavi pou idé ròt-ya ?

10. Kouman to pouvé montré ki to kontan moun-yan ?

¹⁰ To pouvé montré to kontan moun-yan asou fason to ka chwazi mennen to lavi. Monn Satan-an té ké lé to pran tout to tan ké tout to fòrs pou to gadé pou to douvan lèstomak, pou to gen patché soumaké ouben pou to divini sélèb. Pasé yé fè sa, krétyen-yan asou tout latè-a ka pasé tout tan yé pouvé ka préché bon nouvèl-a ké idé ròt moun vini pi pròch ké Jéova. I menm gen sa ki ka rivé préché a plen tan.

11. Kouman bokou krétyen ka montré ki yé kontan Jéova ké yé frè ké sò-ya ?

¹¹ Bokou krétyen fidèl divèt travay a plen tan pou yé gen asé soumaké pou okipé di yé fanmi. Magré sa, sa proklamatèr fidèl-ya ka fè tousa yé pouvé pou soutni òrganizasyon Bondjé-a. Parèkzanp, yé ka alé idé lò i gen katastròf ouben yé ka alé idé asou chantyé pou konstrwi, é yé ka bay soumaké. Yé ka fè sa paské yé kontan Bondjé é yé kontan yé konpanyen. Chak simenn nou tout ka montré ki nou kontan nou frè ké so-ya lò nou ka alé annan réinyon asanblé-a é lò nou ka réponn pannan réinyon-an. Menm si détan nou pouvé las, nou ka alé annan sa réinyon-yan. Menm si nou pè, nou ka lévé nou lanmen pou réponn. É menm si nou tout nou gen noupa problèm, nou ka ankourajé nou konpanyen anvan ouben apré réinyon-yan (Héb. 10:24, 25). Nou tchò plen ké rékonésans pou tousa nou frè ké sò-ya ka fè !

12. Kisa Jan fè ankò pou montré ki i té kontan so frè ké sò-ya ?

 ¹² Jan té ka montré i té kontan so frè ké sò-ya lò i té ka félisité yé, mé osi lò i té ka bay yé konsèy. Parèkzanp, annan so lèt i voyé pou so frè ké sò-ya, i félisité yé pou yé lafwa ké bon bagaj yé té ka fè, mé i palé franchman osi ké yé asou péché-a (1 Jean 1:8 – 2:1, 13, 14). Nou menm osi, nou divèt félisité nou frè ké sò-ya pou bon bagaj yé ka fè. Mé, si roun moun ka koumansé gen roun mové labitid ouben pran roun mové chimen, nou pouvé montré nou kontan l’ lò nou ka di li jantiman sa i bézwen tandé. A pou to gen kouraj pou to bay roun zanmi roun konsèy, mé Labib-a ka di ki vré zanmi ka idé yé konpanyen vansé (Prov. 27:17).

13. Kisa nou pa divèt fè ?

¹³ Détan, nou ka montré nou kontan nou frè ké sò-ya lò nou pa ka fè sèrten bagaj. Parèkzanp, nou pa ka kouri faché lò yé ka di roun bagaj. Annou palé di roun bagaj ki rivé lò Jézi té asou latè-a. Lò i di so disip-ya, ki pou yé té pouvé gen lavi, yé té divèt manjé so lachè ké bwè so disan bokou annan yé pa té kontan, sa té tròp pou yé é yé arété swiv li (Jean 6:53-57). Mé so vré zanmi ki té fidèl, kou Jan, rété ké li. Yé pa konprann sa Jézi di, é sa divèt sirprann yé. Mé yé pa pansé ki sa i té ka di-a pa té vré é yé pa faché pou sa. Non, yé té ka fè li konfyans paské yé té savé i toujou té ka di lavérité (Jean 6:60, 66-69). Nou ka konprann kouman sa enpòrtan pou nou pa faché lò nou zanmi ka di nou sèrten bagaj ! Pasé nou fè sa, nou ka lésé yé èspliké nou sa yé té lé di (Prov. 18:13 ; Eccl. 7:9).

14. Poukisa nou pa janmen divèt rayi nou frè ké sò-ya ?

¹⁴ Jan di nou osi panga rayi nou frè ké sò-ya. Si nou pa ka kouté sa konsèy-a, Satan ké pouvé fè sa i lé ké nou (1 Jean 2:11 ; 3:15). A sa ki rivé sèrten krétyen a lafen 1^é syèk-a. A sa lépòk-a, Satan té ka fè tousa i té pouvé pou fè sèrvitèr Bondjé-ya rayi yé konpanyen é pou séparé yé. Lò Jan ékri so lèt, plizyèr wonm ki té gen menm mantalité  ké Satan té antré an mitan frè-ya. Parèkzanp, Dyotréfès té ka mété dézòrd séryé annan roun asanblé. I pa té ka rèspèkté ansyen-yan kolèj santral-a té ka voyé. I jis té ka éséyé mété sa-ya ki té ka rousouvwè moun i pa té kontan, dèrò. A té vréman roun mové bagaj i té ka fè ! (3 Jean 9, 10). Satan pa chanjé, i ka fè tousa i pouvé pou pèp Bondjé-a pa soutni yé konpanyen. Nou pa janmen divèt ni rayi nou frè ké sò-ya ni arété soutni yé.

15. Kisa roun chèf fanmi divèt sonjé ?

¹⁵ Roun chèf fanmi ka montré ki i kontan so fanmi lò i ka bay yé tousa yé bézwen pou viv (1 Tim. 5:8). Mé i divèt sonjé ki sa ki pi enpòrtan-an, a idé so fanmi gen roun bon rélasyon ké Jéova (Mat. 5:3). Gadé èkzanp Jézi lésé pou chèf fanmi-ya. Sélon Lévanjil Jan, pannan Jézi té ka mouri asou poto-a, i té ka kontinyé sonjé so fanmi. Jan té doubout òbò Mari koté yé té mété Jézi pou tchwé l’. Magré Jézi té ka soufri so kont soufri, i doumandé Jan okipé di Mari (Jean 19:26, 27). Jézi té gen frè ké sò ki té ké bay Mari sa i té bézwen. Mé dapré sa nou ka konprann, yé pyès patékò divini so disip. Donk Jézi té lé roun moun pou pran swen di Mari ké ankourajé l’ pou i kontinyé sèrvi Jéova.

16. Ki rèsponsabilité Jan té gen ?

¹⁶ Jan té gen roun patché rèsponsabilité. Kou i té sa roun apot, i té ka pran douvan annan travay prédikasyon-an. É pitèt i té maryé. Donk, i té gen pou bay so fanmi sa yé té bézwen pou viv é an menm tan idé yé gen roun bon rélasyon ké Bondjé (1 Cor. 9:5). Kisa chèf fanmi-ya jòdla pouvé anprann asou sa ?

17. Kouman roun chèf fanmi pouvé montré so fanmi i kontan yé ?

¹⁷ Roun frè ki sa roun chèf fanmi pouvé gen roun patché rèsponsabilité. Parèkzanp, i divèt travay rèd annan so travay pou moun-yan ki ka wè li pouvé louwé Jéova (Éph. 6:5, 6 ; Tite 2:9, 10). É i pitèt gen rèsponsabilité annan asanblé-a, kou ankourajé frè ké so-ya é pran douvan annan travay  prédikasyon-an. É an menm tan, sa enpòrtan pou i étidyé Labib-a chak simenn ké so madanm ké so pitit. Yé ké gen rékonésans pou tousa i ka fè pou yé pouvé gen roun bon santé, pou yé pouvé gen tchò kontan é pou idé yé kontinyé sèrvi Jéova (Éph. 5:28, 29 ; 6:4).

18. Di kisa Jan té sir ?

¹⁸ Jan viv lontan é i viv roun patché bagaj entérésan. I trapé roun lo problèm ki té pouvé fè so lafwa fébli. Mé i toujou fè tousa i té pouvé pou obéyi koumannman Jézi kou parèkzanp kontan so frè ké sò-ya. A pou sa i té sir ki Jéova ké Jézi té kontan li é ki yé té ké bay li fòrs pou i tchenbé rèd annan nenpòrt ki éprèv (Jean 14:15-17 ; 15:9, 10 ; 1 Jean 4:16). I pa janmen lésé Satan ké so monn anpéché l’ kontan so frè ké sò-ya é montré yé sa lanmou-a ké sa i té ka di ké fè.

19. Kisa 1 Jean 4:7 ka ankourajé nou fè, é poukisa ?

¹⁹ Kou Jan, nou ka viv annan roun monn Satan ka dirijé é ki pa kontan pyès moun (1 Jean 3:1, 10). Menm si i lé nou arété kontan nou frè ké sò-ya, a sèlman si nou ka lésé l’ fè sa ki i ké rivé. A pou nou byen désidé kontan nou frè ké sò-ya é montré yé sa lanmou-a ké sa nou ka fè ké sa nou ka di ! Si nou ka fè sa, nou ké gen tchò kontan paské nou ka fè parti di fanmi Jéova, é nou lavi ké bèl toubonnman (li 1 Jean 4:7).