1. Vulè Bàrì tõo ní ló naa vàẹ?

NEǸ tóm Jọ́ọ̀n beè emí kọọ̀ “Bàrì dú vulà.” (1 Jọ́ọ̀n 4:8) Nakà tã́á belá náa kọ é kẽ̀èa boo ene kà bel ea palàge dì bíi ea dú kà kà kọọ̀: Bàrì ea dú Nen ea néi dùm ní e vulà aà nàgé bá ẹ́. Jìhóvà vulèi! A vulè náa kọ é ié ẹ́ẹ́-ẹẹ̀ nyíe, kpènà, nè dĩ̀ìnè ló.

2. Dẹ̀ẹ̀a boo nú ea di mm̀ kpá Máátìù 22:37-40, éé ní ea dú bàà kà log ea palàge bọọ ẹ́, vaá éé ní ea náa àé láá tàvàlà ge gbàn tṍ ló ní ea égè bàà kà logá ẹ́?

² Kilma ló gbò níí Kráìst, ge vùlè dõòna gbò níì nú eé náa be à léémái nì. Níà nú ea bọ́ló gè naa. (Bugi Máátìù 22:37-40.) Tṍó e palàge nyimá ló Jìhóvà, àé náa kọ á valíí ló gè gbàn tṍ ló túá kà logá. Boo béè kọọ̀ Jìhóvà gbõoma; à ólò bùlà nú ea kilíí ló vaá tú lé bá faamái. Sõò àé láá tàvàlàí ló gè gbàn tṍ ló ní ea égè bàà kà logá. Ló éé? Boo béè kọọ̀ pá vígà mm̀ bõ̀ònatõ̀ò—e bà dú nágé pá bẹẹ nen—náa gbõoma. Sìgà tṍó, bàé láá labví láb àbèè ge ló bel mm̀ sĩ́deè ea é náa kọ é bugi togó kọọ̀ bà náa vulèi àbèè ge bùlà nú ea kilíí ló. Jìhóvà beè nyimá kọọ̀ àé tavàlàí ló gè gbàn tṍ ló logá, níà nú ea náa vaá à tú sìgà gbò e ba beè emí Kpá Káí emá gbò nú ea é nóòmài nú ea náa èé íè ge vùlè ene nè bé eé náa naa ẽ́. Enè nen ea beè dì naa vó dú Jọ́ọ̀n.—1 Jọ́ọ̀n 3:11, 12.

3. Éé ní e Jọ́ọ̀n beè kọ̀ ea kil ló vulà ẹ?

 ³ Mm̀ a émì nu, Jọ́ọ̀n beè nvèè kà m kọọ̀ gbò níí Kráìst íè ge vùlà. Kàsĩ́, mm̀ a nòòtẽ́ ea kil ló dùm Jíízọ̀s, moǹ bel ea kọlà “vulà” sila mm̀ kpá Jọ́ọ̀n èlmà mm̀ kpá Máátìù, Máàk, nè Lúùk. Jọ́ọ̀n beè láá toolá ene gbò gbáá tṍó ea beè emí kpá Jọ́ọ̀n nè taà kà a kpá lẹ̀ẹ̀la tóm. Gbò kpáá nóòmài kọọ̀ vulà ní ea bọ́ló kọ á lẹ̀ẹ̀là bel ló kọ̀láá nú eé náa ẽ́. (1 Jọ́ọ̀n 4:10, 11) Kọ̀láá bé ea dì naa, a beè tú tṍó bá Jọ́ọ̀n kọbé à láá nó naa vó.

4. É kọọ̀ Jọ́ọ̀n beè olòó zogè kọ à vulèè dõòna gbò dénè tṍó? Baatẽ́.

⁴ Tṍó e Jọ́ọ̀n beè di mm̀ a deè ãa, náa beè ié vulè dénè tṍó. Dì belí nu dòòmà bá, ene dee e Jíízọ̀s nè gbò e bà ólò nyoonée nvée géè tení Sàmérìà kil Jèrúsalẹ̀m. Gbò e ba beè di ene kà ńkem̀ bon ea di Sàmérìà náa beè kolí va kyáà. Éé ní e Jọ́ọ̀n beè naa ẽ́? Ẹlẹ nè a vígà Jém̀z beè bĩiná Jíízọ̀s be bàé láá kolìè sã́ lọl gbàn deè vaá kyọ̀ọ̀mà sĩ́ gbò e bà di boná! (Lúùk 9:52-56) À íe nágé tṍó e Jọ́ọ̀n náa beè zogè kọ à vulèè na gbò e bà géè gbá nyoone nvéè Jíízọ̀sa. Ẹlẹ nè a vígà Jém̀z beè tãgĩ bá ba kà kọ á bàn Jíízọ̀s kọ á neèe va dọ̀ ka ge ĩìnìèe tẽ́ kpàn mm̀ a Boǹ Méné. Tṍó e na gbò tómá dã́ nu e ẹlẹ nè a vígà Jém̀z náa, ba beè palàge bã̀ súng! (Máát. 20:20, 21, 24) Náa kal ló béè vó, Jíízọ̀s beè tení boo dénè lọ̀ e Jọ́ọ̀n náaí vaá vùlèe.—Jọ́ọ̀n 21:7.

5. Éé ní eé nó mm̀ nakà togó belí é?

⁵ Mm̀ nakà togó belí, èé ló sọ́l boo nu dòòmà bá Jọ́ọ̀n nè sìgà gbò nú ea beè emí ea kil ló vulà. Ge naa vó é nóòmài bé eé láá vulè pá vígà naa. Èé nó nágé kà lé sĩ́deè e tẹ̀ boo tọ é láá zogè kọ à vulèè pá a tọ.

6. Mósĩ́ deè ní e Jìhóvà bẹẹ tẹlẹ a vulà bàlà kẽ kìlmàí ló é?

⁶ Èé láá bugi togó kọọ̀ kọbé è láá vùlè gbò nen, èé ólòó bugi lé bug togó kìlmà vá ló. Sõò kọbé vulà láá dú kà kà, láb íè ge bììa nvée. (Doolé ló Jém̀z 2:17, 26.) Dì belí nu dòòmà bá, Jìhóvà vulèi. (1 Jọ́ọ̀n 4:19) Vaá à kọ́ bé ea vulèi naa tení dú ló gbò a moǹ bel ea di mm̀ Kpá Káí. (Ps. 25:10; Róm̀ 8:38, 39) Kọ̀láá bé ea dì naa, è nyímà kọọ̀ Bàrì vulèi níì boo béè áá bel ea ló nì, sõò tení nágé dú ló nu ea náa. Jọ́ọ̀n beè emí kọọ̀: “Sĩ́ deè e Bàrì tẹ́lẹ̀ a vula bàlà kẽ nèi kọlà vóí: À lẹẹlà áá kà a Sã́áná tẹlẹ bàlà booí kọ bé è íe dùm tenmáé bá.” (1 Jọ́ọ̀n 4:9) Jìhóvà beè sọ̀tọ́ deè a Sã́áná ea vulè kọ á mòn tã̀àgã̀ vaá  úí boo. (Jọ́ọ̀n 3:16) É kọọ̀ èé íe bàà-bàà ea kil ló kọ Jìhóvà vulèi?

7. Éé ní e Jíízọ̀s beè naa gè zogè kọ à vulèèi é?

⁷ Jíízọ̀s beè kọ́ nè pá a gbò nyòòne nvée kọ à vulèè va. (Jọ́ọ̀n 13:1; 15:15) A beè zogè bé ea vulè va naa, níì tení dú ló áá bel ea ló nì, sõò tení dú ló nu ea beè naa nagé. Jíízọ̀s beè kọọ̀: “Kùbmà nvée vulà e nen é láá ié ló a kóò kọlà ge di kpènà ló gè úé boo.” (Jọ́ọ̀n 15:13) Tṍó e bugì togó boo nú e Jìhóvà nè Jíízọ̀s ni náa nèi, éé ní ea bọ́ló kọ é naa ẽ́?

8. Éé ní e 1 Jọ́ọ̀n 3:18 kọ́ é naa ẽ́?

⁸ È zógè kọ è vulè Jìhóvà nè Jíízọ̀s tení dú ló gè gbàn va tṍ ló. (Jọ́ọ̀n 14:15; 1 Jọ́ọ̀n 5:3) Vaá Jíízọ̀s beè nèi log kọ é vùlè ene. (Jọ́ọ̀n 13:34, 35) Néé zógè kọ è vulè pá vígà tení dú ló áá bel e lóò, sõò tení domá nágé ló nu e náà. (Bugi 1 Jọ́ọ̀n 3:18.) Sìgà gbò éé ní eé láá naa gè zogè kọ è vulè va ẹ́?

9. Éé ní e vulè beè siè kpóó ló Jọ́ọ̀n kọ á naa ẽ́?

⁹ Jọ́ọ̀n gáẹ̀ beè láá gbẹá ló a tẹ̀ vaá tú píílaà pá ba tọ ea dú gè kpó dọọ̀ iémá kpègè. Sõò tãá ea náa vó, a beè tú kùbmà dẽè dee ea sígaẹ́ bá gè tõ̀òma dùm nvèèmà bá nè dõòna gbò kọ bàá nó nu ea kil ló Jìhóvà nè Jíízọ̀s. Dùm e Jọ́ọ̀n beè sà náa beè valí. Ba beè biigèe ló boo béè ge vee lé kpẹ̀a, vaá ba beè kpóe nyòòmà kùbmà nvéè túá gbò gbááá tṍó ea ni ána. (Tóm 3:1; 4:1-3; 5:18; Kùùà 1:9) Kọbèè tṍó ea beè di tọọ̀ kpọ́gọ́lọ́ boo béè ge vee lé kpẹ̀a ea kil ló Jíízọ̀s, Jọ́ọ̀n beè zogè kọọ̀ à vulèè dõòna gbò. Dì belí nu dòòmà bá, tṍó ea beè di boo kpò kunukẽ̀ e múú bééá tení ló ea kọlà Pátmọ̀s, ní ea beè emí gbò nu e Bàrì beè kùùlà nèe mm̀ kpá Kùùà Nù vaá lẹ̀ẹ̀là má gbò bõ̀ònatõ̀ò naa ní e bàé nyímá “gbò nu e a é gé íè ge naaá” ẽ́. (Kùùà 1:1) Be à sẹlẹ, pọ́ì ńkem̀ tṍó aa ló tṍó e bà sọ́ẹ bá lọl Pátmọ̀s ní e Jọ́ọ̀n beè emí nòòtẽ́ ea kil ló dùm Jíízọ̀s nè a tóm kọ̀ kpẹ̀a ẹ́. A beè emí nágé taà kà kpá lẹ̀ẹ̀la tóm kọbé à síè kpóó ló vaá agẹlẹ ló pá a vígà mm̀ bõ̀ònatõ̀ò. Mósĩ́ deè ní e olo é láá nó bé e Jọ́ọ̀n beè tú a dùm vaamá gyọ́ọ naa ẽ́?

10. Mósĩ́ deè ní e olo é láá zogè kọ ò vulèè gbò nen ẽ́?

¹⁰ Òó láá zogè kọ ò vulèè gbò nen tení dú ló nu eo saà ge tú o dùm naamá. Bàlà boò Sétàn gbĩ́ kọ ó tú dénè o tṍó nè kói bùgmà togó boo áá o bá, gbĩ́ gè ié kpègè àbèè ge kọ gbò nen á nyimá ni ló. Sõò gbò níí Kráìst beeá ló bàlà booí ólò tú gã́bug tṍó nvee mm̀ ge vee lé kpẹ̀a nè ge nvèè bá nè gbò nen kọ bàá tõo bã ló Jìhóvà. Sìgà gbò a láá tú dénè ba tṍó vèèmà lé kpẹ̀aí vaá noòmà nu gbò nen.

11. Mósĩ́ deè ní e gã́bug pá vígà e bà bọ́ló dẹ̀lẹ̀ nyíé boo zógè kọ bà vulèè Jìhóvà nè pá vígà ẹ?

¹¹ Gbele tõ̀ò gbò níí Kráìst ólò tú gã́bug tṍó siimá ba pííla kọbé bà láá ẹ̀b nú ea kil ló ba bá nè pá ba tọ. Kọbèè vó, gbò vígàí ólò nvèè sãa kúm bõ̀ònatõ̀ò Bàrì mm̀ bọ́ọ̀ló dẹ̀lẹ̀ nyíé boo tení dú ló nu e bà láá naa. Dì belí nu dòòmà bá, sìgà ọ̀và a láá nvèè bá nè gbò e nu kyọa ló, dõòna gbò a nveè bá ló tóm gè tìb tọ, vaá kọ̀láá nen íe nèà deè ge tú ba lọ̀là-lọ̀là nvèèmà sãa kúm tóm kọ̀ kpẹ̀aí beeá ló bàlà booí. Bà ólò naa vóí boo béè kọọ̀ bà vulè Bàrì nè gbò nen. Èé láá zogè kọ è vulèè pá vígà mm̀ bõ̀ònatõ̀ò buù sè tení dú ló gè olòó sí nònù nè ge aalá bíb gbẹá nònù. Née ólò lọẹ gè sí nònù, náa kal ló béè kọọ̀ lóói  ólò ọọ́ sìgà tṍó. Kọbèè pọ̀ sííi, è ólò aalá bel. Vaá náa kal ló béè kọọ̀ dénè bẹ̀ì íègi tã̀àgã̀ e gé téní bá, è ólò siè kpóó ló dõòna gbò besĩ́ è kálá bã̀ nònù àbèè tṍó e ni zaalà. (Híb. 10:24, 25) Nyíéi palàge ẹẹ ló gbò tóm e pá vígàí gé sí!

12. Mókà dõòna kà sĩ́deè ní e Jọ́ọ̀n beè zogè kọ à vulèè pá a vígà mm̀ bõ̀ònatõ̀ò ẽ?

¹² Jọ́ọ̀n beè zogè kọ à vulèè pá vígà tení dú ló gè nèva dùùlà bá deè tṍ e bè níì áá gè lèèlà va nì. Dì belí nu dòòmà bá, mm̀ gbò a kpá lẹ̀ẹ̀la tóm, Jọ́ọ̀n beè lèèlà pá a vígà mm̀ Kráìst boo béè ba zìgà nè ba lé tóm, sõò a beè palàge dùùlà va bá deè tṍ ea kil ló ge sí pọ́lọ́. (1 Jọ́ọ̀n 1:8–2:1, 13, 14) Mm̀ tẽ̀ènè sĩ́deèá, à bọ́ló kọ é lèèlà pá vígà boo béè lé nu e bà náa. Sõò be à íe nen ea daamà togó gè labví pọ́lọ́ láb àbèè ge naa nú ea é kyọgàlà a gbaa ló kilma ló Jìhóvà, èé láá zogè kọ è vulèèe tení dú ló gè tú nyìmànù kọọmá nú ea bọ́ló nèe. À ólò bĩiná sìà kpóó ló kọbé nen láá nè dùùlà bá deè tṍ a kóò, sõò Kpá Káí kọ́ọ̀ kà kà gbò kóò ólò dùùlà bá deè tṍ ene.—Pró. 27:17.

13. Éé ní ea bọ́ló kọ é gá naa ẽ́?

¹³ Sìgà tṍó, è ólò zogè kọọ̀ è vulèè pá vígà tení dú ló nu e bè née náà. Dì belí nu dòòmà bá, née ólò vàlẹ̀ bá nvèè súng boo béè bel e bà ló. Zẹ́ẹ́ ni bugi togó boo nú ea beè naaá nyòòmà dee deè nvéè dùm Jíízọ̀s gbẹá boo kunukẽ̀í. A beè kọ́ nè pá a gbò nyòòne nvée kọọ̀, bàé íè ge bà a nom̀ kpá ló vaá ṍ a mii kọbé bà íe dùm. (Jọ́ọ̀n 6:53-57) Nakà belá beè palàge tãagẽ gã́bug gbò e bà géè nyoonée nvée naa ní e bà náa nyooné náe—sõò kà kà pá a kóò bii ló Jọ́ọ̀n, náa beè ààẹ́ nvée. Ba beè davá gbẹáẹ́ ló. Bà náa beè dã́tẽ́ ló bel e Jíízọ̀s beè lòa, vaá a beè láá bọọ́ vá ló. Kọ̀láá bé ea dì naa, pá kóò Jíízọ̀s e bà bọ́ló dẹ̀lẹ̀ nyíé booá náa beè bugi togó kọọ̀ à ló pọ́lọ́ bel vaá bà gbóó biile nyíe. Tãa vó, ba beè dẹlẹ́ẹ nyíé boo boo béè kọọ̀ ba beè nyimá kọọ̀ à ló kà kà bel. (Jọ́ọ̀n 6:60, 66-69) Àé palàge dú lé be beele née gbálà bã̀ súng boo béè bel e pá bẹẹ kóò ló! À bọ́ló kọ é sọ̀va tọ́ deè kọ bàá baatẽ́ nu e bà gé kọ́.—Pró. 18:13; Ẹ̀klì. 7:9.

14. Éé ní ea náa vaá née é ọ́bví pá vígà ẹ?

¹⁴ Jọ́ọ̀n beè siè nài gé kpóó ló kọ é gá ọbví pá vígà. Be née gban tṍ ló nakà dùùlà bá deè tṍá, Sétàn é láá túi siimá tóm.  (1 Jọ́ọ̀n 2:11; 3:15) Níí beè naaá ló sìgà gbò e ba beè di mm̀ bõ̀ònatõ̀ò nyòòmà dee deè nvéè túá gbò gbááá. Tṍóá, Sétàn géè palàge pììgà ge naa kọọ̀ gbò gyóòlo Bàrì á ọbví ene vaá pòòà. Tṍó e Jọ́ọ̀n beè emí a kpá lẹ̀ẹ̀la tóm, gbò e bà géè labví láb belí Sétàn beè bã mm̀ bõ̀ònatõ̀ò. Dì belí nu dòòmà bá, Daiọ́tràfìs géè tãa pò-pòòà tẹlẹ mm̀ bõ̀ònatõ̀ò. (3 Jọ́ọ̀n 9, 10) Náa beè fã̀ dẽè gbò kànen e gbò ge tulè tóm beè lẹ̀ẹ̀là. À géè gbĩ́ gè kpó gbò e bà kólí kyáà gbò e bà náa léémá ẹlẹ lọl mm̀ bõ̀ònatõ̀ò. Níà beè kà pọ́lọ́ láb! Sétàn dì ea gé palàge pììgà ge kpèg gbò níí Bàrì lọl ló gè nvèè bá nè ene deè nieí. Naanii mè née é ọ́bví pá vígà vaá òòà aa ló gè nvèè bá nèva.

15. Éé ní e tẹ̀ boo tọ íè ge kẽ̀èa boo é?

¹⁵ Ene kà lé sĩ́deè e tẹ̀ boo tọ ólò zogè kọ à vulèè pá a tọ dú gè naa kọ bàá ié gbò nu ea dú va bíi ló gè tõ̀òma dùm. (1 Tím. 5:8) Kọ̀láá bé ea dì naa, à bọ́ló kọ á kẽ̀èa boo kọọ̀ áá nu e bà íe bíi ló mm̀ nom̀ kpá ló náa é náa kọ bàá láá ié lé gbaa ló kilma ló Bàrì. (Máát. 5:3) Nvèè kpíí ló lé nu dòòmà bá e Jíízọ̀s beè zogè gbò tẹ̀ boo tọ. Dẹ̀ẹ̀a boo nú ea di mm̀ kpá Jọ́ọ̀n ea kil ló Jíízọ̀s, boo tṍó e ba beè tú Jíízọ̀s ká kú té, a beè bùlà nú ea kil ló pá a tọ. Jọ́ọ̀n beè di élá kpàn Mérì ea dú kà Jíízọ̀s gbẹá kiẽ́e ba beè tú Jíízọ̀s ká kú téá. Náa kal ló béè íb gbò nyaa ló e Jíízọ̀s beè di bá, a beè kọ́ nè Jọ́ọ̀n kọ á ẹ̀b nú ea kil ló Mérì. (Jọ́ọ̀n 19:26, 27) Jíízọ̀s beè ié pá vígà e bà dúá gbàà e bà gáẹ̀ láá ẹ̀b nú ea kil ló bíì Mérì, sõò à bélí kọọ̀ tọ́ọ̀ ọ̀và gáà beè nyoonée nvée tṍóá. Vóà naa, Jíízọ̀s beè gbĩ́ kọọ̀ Mérì á ié nen ea é síèe kpóó ló kọbé à láá kilsĩ́ gè fã̀ Jìhóvà.

16. Mókà gbò tóm ní e Jọ́ọ̀n beè iè ge sìe?

¹⁶ Jọ́ọ̀n beè ié gã́bug tóm gè sì. Dì belí enè neǹ tóm Jíízọ̀s, a beè tú bẹ̀à sã́ bùlà kọọmá kpẹ̀a. Àé láá dú kọọ̀ a beè ilí va, ea é náa kọ á ẹ̀b nú ea kil ló bíì pá a tọ nè ge naa kọ bàá ié lé gbaa ló kilma ló Bàrì. (1 Kọ́r. 9:5) Éé ní e níí nóòmà gbò tẹ̀ boo tọ deè nieí é?

17. Éé ní ea náa vaá à dú bíi kọọ̀ tẹ̀ boo tọ á bumá pá a tọ kọ bàá láá fã̀ Bàrì e?

¹⁷ Vígà págbálà ea ni dú tẹ̀ boo tọ é láá ié gã́bug tóm ea dú bíi gè sì. Dì belí nu  dòòmà bá, àé íè ge sí tóm agẹlẹ bá tṍó ea di boo tóm kọbé à nveè ka ló Jìhóvà. (Ẹ́fẹ. 6:5, 6; Táítọ̀s 2:9, 10) Vaá àé láá ié nágé gã́bug tóm gè sí mm̀ bõ̀ònatõ̀ò, dì belí gè siè kpóó ló pá vígà vaá nvèè bá nèva kọ bàá láá tú bẹ̀à sã́ bùlà kọọmá kpẹ̀a. Tṍó ea gé náa dénè gbò nuí, à dú bíi kọ á zọ̀ a va nè pá a nvín noá Kpá Káí lee. Nyíé va é palàge ẹẹ ló a pììgà ge naa kọ bàá ié ẹ́ẹ́-ẹẹ̀ nyíe nè válá ló nè ge naa kọ bàá láá kilsĩ́ gè fã̀ Jìhóvà.—Ẹ́fẹ. 5:28, 29; 6:4.

18. Éé ní e Jọ́ọ̀n beè àgala boo é?

¹⁸ Jọ́ọ̀n beè tõó dùm mm̀ gã́bug gbáá vaá gã́bug lé nu beè naaá ẽ́ ló. A beè tení bá gã́bug nu ànà-ànà ea gáẹ̀ láá ọọvẹ ló a zìgà. Sõò a beè kilsĩ́ gè pììgà inmá kiẽ́e ea kpóó sim tùlà mm̀ ge gbàn tṍ ló gbò log e Jíízọ̀s beè nè, bii nágé ló níí ea kọ́ á vùlè pá a vígà. Boo béè vó, Jọ́ọ̀n beè àgala boo kọọ̀ Jìhóvà nè Jíízọ̀s vulèèe vaá bàé neèe kói gè láá beemá kọ̀láá kà tã̀àgã̀ ea kpee sĩ́ ló èlbá. (Jọ́ọ̀n 14:15-17; 15:10; 1 Jọ́ọ̀n 4:16) Tọ́ọ̀ nú e Sétàn nè a bàlà booí beè naa náa beè láá kpèg Jọ́ọ̀n lọl ló gè vùlè pá a vígà, nè ge zogè tẹlẹ bàlà kẽ tení dú ló bel ea ló nè a láb.

19. Éé ní e 1 Jọ́ọ̀n 4:7 síèi kpóó ló kọ é naa ẽ́, vaá ló éé?

¹⁹ Dì belí Jọ́ọ̀n, è di mm̀ bàlà boo e Sétàn e bè náa vulè tọ́ọ̀ nená ní ea gé lẹẹlà bel ló é. (1 Jọ́ọ̀n 3:1, 10) Ẹlẹ gbĩ́ kọ é òòà aa ló gè vùlè pá vígà, sõò níá náa é láá naaá, áá bèè kọọ̀ beele neèe deè kọ á naa vó. Naanii mè é bééláfùl ge vùlè pá vígà, vaá zogè kọ è vulè va tení dú ló bel e lóò nè nú e náà. Tṍó e vulè va naa vó, èé íe zààvà ea dú ló gè dũunà pá tọọ̀ Jìhóvà vaá nyíéi é palàge ẹẹ.—Bugi 1 Jọ́ọ̀n 4:7.