1. ¿Jamüsü waaʼin sutuma alin waya nüpüla Maleiwa?

NÜKÜJAIN Juan suluʼu tü karaloʼuta nüshajakat, aipüralin maʼin wayuu Maleiwa (1 Juan 4:8). Sünainjee tü nümakat Juan, wayaawata aaʼu niain Jeʼwaa katüin atuma soʼu wayuu otta niain chi shikiishikai tü aipüralüükat, aishii waya nüpüla Jeʼwaa. Müsüjeseʼe talatüin waaʼin sükajee watüjaain saaʼu alin waya nüpüla.

2. (1) Sünainjee tü sümakat Mateo 22:37-40, ¿jarat tü piamasükat pütchi alanaʼaleekat maʼin saʼakajee tü aluwataanakalü anain waya? (2) ¿Jamüsü eeka süpüla kapüleein wamüin woonooin sümaa tü wane pütchikat?

² Nuluwataain Jeʼwaa na anoujashiikana süpüla alinjatüin wayuu napüla. Nnojotsü naneeküinjatüin jaralüinjatüin alin napüla (paashajeʼera Mateo 22:37-40, TNM). Weʼraajapa nukuwaʼipa Jeʼwaa mapüleesat wamüin oonowaa sümaa tü palajatkat pütchi nuluwataakalü anain waya, jama lotuin nukuwaʼipa, naaʼinmajüin waya otta kamaneein nia wamüin. Eepejeʼe kapüleere wamüin woonooin sümaa tü wane kasa nuluwataakalü anain waya. ¿Jamüsüche kapüleeka wamüin waaʼinrüin tia? Shia süka nnojoluin lotuin nakuwaʼipa na wawalayuukana otta eeshii naküjale wanee pütchi airuʼutka wamüin otta naaʼinrüle waneirua kasa nnojotkalü anashiin wamüin. Nütüjaa aaʼu Jeʼwaa kapüleein maʼin wamüin tia, nüshajirüinjeseʼe suluʼu tü Wiwüliakat waneirua pütchi akaalinjeenaka waya süpüla wayaawatüin saaʼu jamüin aipüraliinjanaka waya otta tü waaʼinrajatkat süpüla aijiraain waya waneʼewai wakua. Wanee wayuu ashajakai süchiki tia nia Juan (1 Juan 3:11, 12).

3. ¿Jamüsü nünüiki Juan süchiki aipüraliinjanain waya?

 ³ Suluʼu tü karaloʼuta nüshajakat Juan, nüküjain aipüraliinjanain na anoujashiikana. Kojuyatua nüküjain tia suluʼu tü karaloʼuta nüshajalakat. Eesüjaʼa eere maʼaka saaʼin 100 nuuyase Juan wanaa sümaa nüshajüin tü karaloʼuta nünülialuʼukat otta tü wane apünüinsükat karaloʼuta. Wayaawatüin sünainjee tü pütchi nüshajirakat Jeʼwaa choʼujaain waaʼinrajatüin wanee kasa saaʼujee alin na waneinnua wapüla (1 Juan 4:10, 11). Nnojoipejeʼe joʼuujiraain Juan suluʼu aipüralin nia, nütüjain tia mapa.

4. ¿Jamüsü watüjaaka saaʼu nnojoluin aitüjülüin wayuu nüpüla Juan?

⁴ Jintüliiwaʼaya Juan, nnojoishi aipüraitüjülin nia wayuu. Jamüsüjaʼa soʼu wanee kaʼi, oʼunushi Jesuu namaa na nikirajüinkana chaʼwalii naya Jerusalénmüin, alatajana naya Samariapünaa. Shiasaʼa nantapa suluʼumüin wanee pueulo suluʼu tia mmakat, mamaneesalii na wayuukana nümüin Jesuu jee namüin na nümaajanakana. Anuukalaka nünüiki Juan saalinjee tia: «Senyotkalee, ¿pücheküin wachuntüin wane siki nümüin Maleiwa süpüla aʼajia tü wayuukolüirua [...]?» (Luc. 9:52-56). Nnojotsüinka niiʼiyatüin Juan naalin na aluwataaushikana wanaa nümaa. Jamüshijaʼa nia nümaa Santiago chi nuwalakai, eesüjaʼa najütüle tü neikat süpüla suchuntajatüin nümüin Jesuu naikalaainjanain naʼatoʼu sünain aluwatawaa. Shiasaʼa natüjaapa saaʼu tia na wane nikirajüinkana Jesuu, aashichijaashii naya nümüin Santiago otta nümüin Juan (Mat. 20:20, 21, 24). Mayaainjeʼe wainmain tü kasa mojukuwaʼipatkat nutuma Juan, aishi nia nüpüla Jesuu (Juan 21:7).

5. ¿Kasa wekirajaainjatkalü anain sünain ekirajaayakat tüü?

⁵ Sünain ekirajaayakat tüü, wekirajaajeerü anain nukuwaʼipa Juan otta süchiki waneirua kasa nüshajakat süchiki aipüraliinjanain waya. Sünainjee tia, wayaawateerü aaʼu tü waaʼinrajatkat süpüla weeʼiyatüin naalin na wawalayuukana wapüla otta wekirajaajeerü anain tü naaʼinrajatkat chi wayuu laülaakai saaʼu nüpüshi.

6. ¿Kasa wayaawataka anainjee alin maʼin waya nüpüla Jeʼwaa?

⁶ Eesüjaʼa jülüjale waaʼin alin wapüla wayuu sünainjee kamaneein neʼe waya namüin jee sünainjee anain wanüiki namüin. Nnojotpejeʼe shiain waaʼinrajatüin neʼe tia, shiimainrejeʼe alin wapüla wayuu aaʼinreena waya kasa anasü napüleerua (anasü paashajeʼerüle Santiago 2:17, 26). Aishii waya nüpüla Jeʼwaa (1 Juan 4:19). Nüküjain suluʼu tü Wiwüliakat alin waya nüpüla (Sal. 25:10; Roma 8:38, 39). Nnojotsü nüküjain neʼe tia wamüin, aaʼinrüshi nia kasa wapüleerua. Anuu tü nüshajakat Juan süchiki tia: «Niiʼiyatüin chi Maleiwakai  sünain alin waya nüpüla, nuluwataainjeseʼe chi waneeshikai Nüchon süpüla katüinjatüin woʼu nünainjee» (1 Juan 4:9, TNM). Naapüin Jeʼwaa nikii chi Nüchonkai süpüla outajachin nia saaʼu waainjala (Juan 3:16). ¿Aashin wayaawatüin sünainjee tia alin maʼin waya nüpüla Jeʼwaa?

7. ¿Kasa niiʼiyataka akajee Jesuu waalin nüpüla?

⁷ Nüküjain Jesuu alin nüpüla na nikirajüinkana (Juan 13:1; 15:15). Niiʼiyatüin tia sükajee tü kasa naaʼinrakat napüleerua otta wapüleerua. Anuu nünüiki: «Wane wayuu, aapajiraakai nukuaippa süpüla ouktaa saaʼujee nütünajutüirua, miyoʼushaata maʼi naalin nüpüla» (Juan 15:13). ¿Kaseetche waaʼinraka jülüjale waaʼin süpüshuaʼa tü kasa naaʼinrakat Jeʼwaa otta Jesuu wapüleerua?

8. ¿Kasa waaʼinrajatka saashin 1 Juan 3:18?

⁸ Weeʼiyateerü naalin Jeʼwaa otta Jesuu wapüla jaa wamüle sümüin tü naluwataakalü anain waya (Juan 14:15; 1 Juan 5:3). Nuluwataain waya Jesuu sünain aijiraainjanain waya waneʼewai wakua (Juan 13:34, 35). Nnojotpejeʼe «aishi pia tapüla» müinjanain neʼe waya namüin na wawalayuukana. Shia anaka aluʼu waaʼinrüle kasa anasü napüleerua (paashajeʼera 1 Juan 3:18). ¿Kasakaʼa waaʼinrajatüin süpüla weeʼiyatajatüin naalin na wawalayuukana wapüla?

9. ¿Kasa naaʼinraka Juan sutuma alin wayuu nüpüla?

⁹ Shiaje naaʼinmaaka maʼin Juan olojoo jime nümaa chi nüshikai, nnojotpejeʼe naaʼinrüin tia. Shia nüneekaka nükaalinjüinjatüin wayuu süpüla shiyaawatajatüin saaʼu tü shiimainkat nüchiki Jeʼwaa otta Jesuu. Nnojotsü mapüleein tü kasa nüneekakat Juan. Jamüshijaʼa nia, müliashi nia atumawaa sünainjee nüküjain pütchi otta püreesashi nia atumawaa nütaralapa (Aluw. 3:1; 4:1-3; 5:18; Alat. Map. 1:9). Mayaainjeʼe püreesain Juan atumawaa sünainjee nüküjain pütchi nüchiki Jesuu, nnojotsü kapülain naaʼin nukuwaʼipa neʼe nümüiwaʼa. Jamüsüjaʼa wanaa sümaa chajachin nia püreesain suluʼu tü mma kanüliakat Patmos, pasanainka sünain palaa, nüshajüin süchiki tü kasa eeʼiyatünakat nümüin nutuma Maleiwa otta nuluwataain shia namüin na anoujashiikana süpüla natüjaainjatüin saaʼu tü kasa alatajatkat mapeena (Alat. Map. 1:1). Nüjütünapa achiki Juan chejee Patmos, nüshajüin tü karaloʼutakat Juan eere nüküjain süchiki tü nukuwaʼipakat jee tü niʼyataainkat Jesuu otta nüshajüinya tü wane apünüinsükat karaloʼuta süpüla nütütüleʼerüin jee nükatchinrüin naaʼin na nuwalayuukana. ¿Kasache waaʼinrajatka süpüla washatüin nukuwaʼipa Juan?

10. ¿Kasa paaʼinreetka müleka shiimainrejeʼe alin püpüla wayuu?

¹⁰ Atüjaaneerü aaʼu shiimainrejeʼe alin püpüla wayuu sünainjee tü kasa püneekakat süpüla paaʼinrüin. Na wayuu nuluwataakana aaʼu Satanaa, shia keeʼireeka naaʼin kapülainjatüin neʼe paaʼin pukuwaʼipa pümüiwaʼa otta shia nachajaaka achiki pükanajüinjachin maʼin nneerü otta piʼraajünajachin maʼin. Naatapejeʼe maʼin nakuwaʼipa na anoujashiikana nünain Jeʼwaa. Sainküin mmakat süpüshuaʼa aküjashii naya pütchi sümüin wayuu otta nekirajüin wayuu süpüla aleewainjatüin shia nümaa Jeʼwaa otta eeshii na waneepiakana sünain aaʼinraa tia.

11. ¿Kasa naaʼinraka waneinnua wawalayuu süpüla neeʼiyatüin naalin Jeʼwaa napüla jee naalin na nawalayuukana?

¹¹ Wainma na wawalayuu aʼyataakana waneepia süpüleerua tü kasa choʼujaakat namüin jee tü choʼujaakat sümüin napüshi. Mayaainjeʼe müin nakuwaʼipa wawalayuukana naainnua, nakaalinjain nupueulose Jeʼwaa sünain waneirua kasa eeka süpüla naaʼinrüin. Eeshii na akaalinjakana eere sukutkujaain mma jee süsetüin wüin. Eetaashii na akaalinjakana  sünain akumajaa piichi eeinjachire nuʼwaajünüin Jeʼwaa. Eeshii süpüla wasülajüin süpüshi wanneetse süpüla saaʼinnajatüin tü aʼyatawaakat nümüin Jeʼwaa sainküin mmakat süpüshuaʼa. Wawalayuukana naainnua naaʼinrüin süpüshuaʼaleʼeya tia süka alin Jeʼwaa napüla jee alin na wayuukana napüla. Weeʼiyatüin naalin na wawalayuukana wapüla woʼunule sünain tü outkajawaakat jaʼitashii mapüsain waya. Wasoutule shiʼipajee tü asakinnakalü anain jaʼitashii mmoleʼein waya jee watütüleʼerüle naaʼin süpülapünaa jee süchikijee tü outkajawaakat mayaainjeʼe sülatüin kasa mojusü wamüin (Heb. 10:24, 25). Talatüsü maʼin waaʼin sutuma tü kasa naaʼinrakat na wawalayuukana wapüleerua.

12. ¿Jarat tü wane kasa naaʼinrakat Juan süpüla niiʼiyatüin naalin na nuwalayuukana nüpüla?

¹² Nnojotsü anain neʼe nünüiki Juan namüin na nuwalayuukana süpüla niiʼiyatüin naalin nüpüla, nüchiaainya naya. Jamüsüjaʼa suluʼu tü karaloʼuta nüshajakat, anasü maʼin nünüiki nachiki na nuwalayuukana sünainjee kanoulain naya jee anain maʼin tü naʼyataainkat, nüchiaapejeʼeya naya suulia kaainjalajüin naya (1 Juan 1:8–2:1, 13, 14). Akaataajaʼaya neʼe wayakana, choʼujaasü anainjatüin wanüiki namüin na wawalayuukana saaʼujee tü kasa anakat natuma. Wachiaainjanapejeʼe naya naaʼinrüle wanee kasa akayaleʼereenaka naya nuulia Jeʼwaa, waaʼinrüinjatü tia sümaa kamaneein waya namüin. Waaʼinrüle tia, weeʼiyatüin tü naalinkat wapüla, eesüjaʼa choʼujaajeerüle yalayalain waaʼin süpüla waaʼinrüin tia. Süküjapejeʼe tü Wiwüliakat alin wapüla wanee wayuu wachiaale nia (Prov. 27:17).

13. ¿Kasa tü nnojoluinjatkat waaʼinrüin?

¹³ Weeʼiyatapejeʼe naalin na wawalayuukana wapüla nnojorüle waaʼinrüin waneirua kasa. Maʼaka saaʼin, nnojorüle waashichijaamaatüin sünainjee wanee kasa namaka. Jülüjataa waaʼin tü alatakat wanaa sümaa sülüʼülaain nükalia Jesuu süpüla outaa, nüküjain namüin na nikirajüinkana kateerüin noʼu müleka neküle jee nasüle nüsha (Juan 6:53-57). Wainma na nikirajüinkana Jesuu mojushiika amüin tia nümakat jee ooʼulaashii naya suulia nümawaa. Eepejeʼe na nnojoliikana ooʼulaain suulia nümawaa Jesuu maʼaka naaʼin Juan. Mayaainjeʼe nnojoluin nayaawatüin saaʼu tü nümakat Jesuu otta ponuin shia naaʼin, nnojotsü jülüjain naaʼin mojuin tü nümakat Jesuu otta nnojoishii naya aashichijaain sünainjee tia. Neʼitaain maʼin naaʼin nünain süka natüjaain saaʼu nüküjain waneepia tü shiimainkat (Juan 6:60, 66-69). Müsüjeseʼe nnojoluin anain  waashichijaamaatüle maalü sünainjee tü namakat wamüin na wawalayuukana, shia anaka aluʼu wooʼulaale naküjain wamüin jamüin naaʼinraka tia (Prov. 18:13; Ecl. 7:9).

14. ¿Jamüsü nnojoluinjatka üttüin waaʼin nanain na wawalayuukana?

¹⁴ Nüküjainya wamüin Juan nnojoluinjatüin üttüin waaʼin nanain na wawalayuukana. Nnojorüle kacheʼein waya sümüin tü nümakat, wanaaweerü waaʼin nümaa Satanaa (1 Juan 2:11; 3:15). Alatüsü tia namüin na anoujashii namaiwajanakana. Nüchajaain maʼin sukuwaʼipa Satanaa süpüla üttajiraainjatüin naaʼin na anoujashiikana otta süpüla nnojoliinjanain naya paaʼinwain. Wanaa sümaa nüshajüin Juan tü karaloʼuta nünülialuʼukat, eeshii waneinnua wayuu mojulaashii ekerotokana naʼakamüin na anoujashiikana maʼaka naaʼin Diótrefes. Jamüshijaʼa nia, wainma tü kasa naaʼinrakat süpüla nnojoliinjanain paaʼinwain na anoujashiikana. Mojutusalii nümüin na alapalaakana naaʼu otta nüjünajaain na kamaneekana namüin na wayuu nnojoliikana anain ashoʼu nümüin (3 Juan 9, 10). Nüchajaain maʼin sukuwaʼipa Satanaa süpüla üttajiraainjatüin naaʼin na anoujashiikana otta süpüla nnojoliinjanain paaʼinwain naya. Nnojo wakayalaain noulia na wawalayuukana sünainjee mojujiraain neʼe waya namaa.

15. ¿Kasa soteeka naaʼin wanee wayuu laülaakai saaʼu nüpüshi?

¹⁵ Wanee wayuu laülaakai saaʼu nüpüshi, niiʼiyatüin naalin nüpüla müleka naapüle tü kasa choʼujaakat namüin (1 Tim. 5:8). Soteepejeʼe naaʼin shiain alanaʼaleeinjatüin maʼin tü naaʼinrakat süpüla aleewainjanain na nüpüshikana nümaa Jeʼwaa (Mat. 5:3). Eesü süpüla nashatüin tü kasa anashaatasü naaʼinrakat Jesuu. Jamüsüjaʼa suluʼu tü karaloʼuta nüshajakat Juan, aküjünüsü yala wanaa sümaa sumotsojünüin naaʼin Jesuu, jülüjasü naaʼin jameerüin sukuwaʼipa tü niikat. Yalajachi Juan süʼütpaʼa María eejachire nükachennüin Jesuu. Mayaainjeʼe sumotsojünüin naaʼin Jesuu soʼu tia, nuchuntuin nümüin Juan naaʼinmajüinjatüin María, tü niikat Jesuu (Juan 19:26, 27). Eeshiʼiya waneinnua süchonnii María eeka süpüla aapüin sümüin tü choʼujaakat sümüin. Nnojoliipejeʼe naya anoujain nünain Jesuu wanaa sümaa tia. Nuchuntuinjeseʼe Jesuu nümüin Juan nükaalinjainjatüin María sümaa tü choʼujaakat sümüin otta süpüla ayatüin shiʼyataain nümüin Jeʼwaa.

16. ¿Kasa niʼyataapuʼuka anain Juan?

¹⁶ Wainma tü kasa niʼyataapuʼukalü anain Juan. Süka niain napüshi na aluwataaushikana, niainjachijaʼaya oʼuniraka sukuwaʼipa tü aküjaakat  pütchi. Eeshijaʼa kaʼwayuusere nia, müsüjeseʼe naapüinjatüin tü kasa choʼujaakat sümüin nüpüshi jee nükaalinjainjanain naya süpüla aleewainjanain naya nümaa Jeʼwaa (1 Cor. 9:5). ¿Kasa natüjaka sünainjee nukuwaʼipa Juan na wayuu laülaakana saaʼu napüshi maaʼulu yaa?

17. ¿Jamüsü choʼujaaka nikirajaʼawalin wanee wayuu sünain tü Wiwüliakat sümaa nuʼwayuuse jee nüchonnii?

¹⁷ Wanee wawala eekai laülaain saaʼu nüpüshi, eesüjaʼa wainmale tü kasa niʼyataakalü anain. Jamüshijaʼa nia, aʼyataalinjachi maʼin nia süpüla anainjatüin pütchi nüchiki Jeʼwaa (Éf. 6:5, 6; Tito 2:9, 10). Eesüjaʼa saapünüle nümüin aʼyatawaa suluʼu tü outkajaaleekat maʼaka saaʼin nütütüleʼerajatüin naaʼin na wawalayuukana, naaʼinmajüinjanain naya jee nuʼunirüinjatüle sukuwaʼipa tü aküjaakat pütchi. Jee müsia, choʼujaasü nikirajaʼawalin sünain tü Wiwüliakat sümaa nuʼwayuuse jee nüchonnii. Naaʼinrüle tia, aneena naya, ayateena naya aʼyataain nümüin Jeʼwaa otta kojuteerü namüin tü naaʼinrakat napüleerua (Éf. 5:28-30; 6:4).

18. ¿Kasa niyaawataka aaʼu Juan?

¹⁸ Eʼrüshi miyoʼuwaa Juan otta watta saalii kasa anasü niʼrakat. Wainma tü kasa alatakat nümüin eeka süpüla amojujeʼerüin nunoula. Nüchajaapejeʼe maʼin sukuwaʼipa süpüla noonooinjachin sümaa tü nuluwataakalü anain Jesuu maʼaka saaʼin alinjanain nüpüla na nuwalayuukana. Suluʼujee tia, niyaawata aaʼu Juan alin nia nüpüla Jeʼwaa, Jesuu otta nakatchinreerüin naaʼin süpüla nülatajachin süchikumüin tü kasa mojusü alatakat nümüin (Juan 14:15-17; 15:10; 1 Juan 4:16). Nnojoishi kasakain Juan nutuma Satanaa jee natuma na nümaajanakana, ayatüshiʼiya alin nüpüla na nuwalayuukana. Naaʼinrüin tia sükajee tü nümakat namüin otta tü kasa naaʼinrakat napüleerua.

19. (1) ¿Kasa waaʼinrajatka saashin 1 Juan 4:7? (2) ¿Jamüsü waaʼinrajatka tia?

¹⁹ Nia Satanaa aluwataaka saaʼu tü mmakat otta maalinsat wayuu nüpüla maʼaka saaʼin nükalioʼu Juan (1 Juan 3:1, 10). Shia keeʼireeka naaʼin maaliinjanain wapüla na wawalayuukana, nnojotpejeʼe nuunteerüin tia nnojorüle wanaawain waaʼin nümaa. Müshiijeseʼe alinjanain wapüla na wawalayuukana otta weeʼiyatüinjatüin naalin wapüla sükajee tü wamakat namüin jee tü waaʼinrakat napüleerua. Waaʼinrüle tia, talateerü maʼin waaʼin süka suluʼuin waya nupueulose Jeʼwaa otta talateerü maʼin waaʼin süka kateerüin woʼu süpüla kaʼikat süpüshuaʼa (paashajeʼera 1 Juan 4:7).