1. ¿Mbaʼéichapa reñeñandu reikuaávo Jehová nderayhuha?

APÓSTOL Juan oskrivi vaʼekue: “Ñandejára ningo mborayhu” (1 Juan 4:8). Ñande jaikuaa Jehová ojapo hague entéro mbaʼe oikovéva, péro koʼã mbaʼe heʼi vaʼekue Juan ñanemomanduʼa pe mborayhu ouha avei Jehovágui. ¡Añetehápe ningo Jehová ñanderayhueterei voi! Ha haʼe ñanderayhu rupi ñande rekove isentído, ñañeñandu segúro ha javyʼa.

2. a) Heʼiháicha Mateo 22:37-40, ¿mbaʼépa hína umi mokõi mandamiénto iñimportantevéva? b) ¿Mbaʼérepa sapyʼánte ijetuʼu ñandéve ñakumpli hag̃ua pe segundo mandamiénto?

² Ñande kristianokuéra ningo ndaikatúi jaelehínte japorohayhútapa térãpa nahániri. Upéva ningo peteĩ mandamiénto (elee Mateo 22:37-40). Jaikuaa porãvévo Jehovápe ifásilma ñandéve ñakumpli hag̃ua pe primer mandamiénto. Upéva ningo upéicha, pórke Jehová perfékto, haʼe ojepyʼapy ñanderehe ha ivuéno ñanendive. Péro ikatu hína hasyve ñandéve ñakumpli hag̃ua pe segundo mandamiénto, pórke ñande rapichakuéra apytépe oĩ ñane ermáno ha ermanakuéra, ha haʼekuéra iñimperfékto avei. Upévare sapyʼánte ikatu heʼi térã ojapo umi mbaʼe nañandegustáiva, térã ñanemoñeñandu vaíva. Jehová oikuaa ikatuha ijetuʼu ñandéve ñakumpli hag̃ua upe mandamiénto. Upévare haʼe ojevale vaʼekue unos kuánto isiervokuérare oskrivi hag̃ua la Bíbliape mbaʼérepa jajoayhu vaʼerã, ha mbaʼéichapa ikatu jahechauka upéva. Peteĩva umi oskrivi vaʼekue koʼã mbaʼe haʼe vaʼekue apóstol Juan (1 Juan 3:11, 12).

3. ¿Mbaʼépa Juan heʼi jey jey vaʼekue kristianokuérape?

³ Umi lívro oskrivi vaʼekuépe, Juan heʼi jey jey vaʼekue kristianokuéra ohechauka vaʼerãha oporohayhuha. Juan oskrivírõ guare Jesús rekovekuére, oñeʼẽ pe mborayhúre hetaitereive vése Mateo, Marcos ha Lúcasgui. Juan ningo oreko vaʼekue haimete 100 áño oskrivírõ guare lívro de Juan ha umi mbohapy  ikárta. Koʼã lívro bíblico ñanemboʼe pe mborayhu ñanemomýi vaʼerãha jajapo hag̃ua opa mbaʼe (1 Juan 4:10, 11). Péro Juan noaprendéi vaʼekue upéva ensegidaiténte, síno heta tiémpo haguépe.

4. ¿Juan piko siémpre ohechauka vaʼekue oporohayhuha?

⁴ Juan imitãrõ guare, ndahaʼéi vaʼekue siémpre ohechaukáva oporohayhuha. Peteĩ jey Jesús ha idisipulokuéra oho hína kuri Jerusalénpe ha ohasa Samáriarupi. Péro umi hénte oikóva peteĩ puévlo oĩvape Samáriape ndorresiviséi chupekuéra. ¿Mbaʼépa ojapo upémarõ Juan? Haʼe ha iñermáno Santiago oporandu Jesúspe ikatúpa ojerure hoʼa hag̃ua tata yvágagui ohundipa hag̃ua umi hénte oikóvape pe puévlope (Luc. 9:52-56). Ótra vuéltape Juan ndohechaukái vaʼekue ohayhuha umi ótro apóstolpe. Amalisia haʼe ha iñermáno heʼi isýpe ojerure hag̃ua Jesúspe omeʼẽ hag̃ua chupekuéra peteĩ puésto iñimportánteva pe Rréinope. Umi ótro apóstol oikuaárõ guare Santiago ha Juan ojapo vaʼekue, orrenegaiterei hesekuéra (Mat. 20:20, 21, 24). Péro Juan ofalláramo jepe koʼã mbaʼépe, Jesús lomímonte ohayhu vaʼekue chupe (Juan 21:7).

5. ¿Mbaʼépa jahecháta ko artíkulope?

⁵ Ko artíkulope jahecháta Juan ehémplo ha umi mbaʼe oskrivi vaʼekue pe mborayhúre. Ñaaprendéta mbaʼéichapa ikatu jahechauka jahayhuha ñane ermáno ha ermanakuérape. Avei ñaaprendéta peteĩ mbaʼe iñimportánteva ojapo vaʼerã umi omoakãva hogapy ohechauka hag̃ua ohayhuha ifamíliape.

6. ¿Mbaʼépa Jehová ojapo vaʼekue ohechauka hag̃ua ñanderayhuha?

⁶ Ñañeʼẽ jave pe mborayhúre ikatu ñapensa jahechaukaha upéva umi mbaʼe porã jaʼéva rupivénte. Péro ñande japorohayhu añetéramo jahechauka vaʼerã upéva umi mbaʼe porã jajapóva rupive (ekompara Santiago 2:17, 26 heʼívare). Por ehémplo, Jehová ñanderayhu (1 Juan 4:19). Ha haʼe heʼi ñandéve ñanderayhuha umi mbaʼe porãite oĩva rupive la Bíbliape (Sal. 25:10; Rom. 8:38, 39). Péro ñande ñaime segúro Jehová ñanderayhuha, ndahaʼéi umi mbaʼe heʼívarente, síno umi mbaʼe ojapóvare avei. Juan oskrivi vaʼekue: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩetépe ko múndope, ikatu hag̃uáicha haʼe rupive jahupyty pe jeikove” (1 Juan 4:9). Jehová opermiti vaʼekue Itaʼýra ohayhuetéva ohasa asy ha omano ñanderehehápe (Juan 3:16). Upévare ñaime segúro Jehová ñanderayhuha.

7. ¿Mbaʼépa Jesús ojapo vaʼekue ohechauka hag̃ua ñanderayhuha?

⁷ Jesús oasegura vaʼekue idisipulokuérape  ohayhuha chupekuéra (Juan 13:1; 15:15). Péro haʼe ohechauka vaʼekue mbaʼeichaitépa ohayhu chupekuéra ha ñandéve avei, ndahaʼéi umi mbaʼe heʼívarente, síno umi mbaʼe ojapóvare avei. Jesús heʼi vaʼekue voi: “Ndaipóri mborayhu tuichavéva kóvagui: ñantrega ñande rekove ñane amigokuéra rehehápe” (Juan 15:13). Ñapensávo Jehová ha Jesús ojapo vaʼekuére ñanderehehápe, ¿mbaʼépa upéva ñanemomýi vaʼerã jajapo hag̃ua?

8. ¿Mbaʼépa jajapo vaʼerã ohechaukaháicha 1 Juan 3:18?

⁸ Ñande jahechauka jahayhuha Jehová ha Jesúspe ñaneñeʼẽrendúvo chupekuéra (Juan 14:15; 1 Juan 5:3). Ha Jesús omanda vaʼekue ñandéve jajoayhu hag̃ua (Juan 13:34, 35). Jaʼe vaʼerã ñane ermanokuérape jahayhuha chupekuéra, péro jahechauka vaʼerã avei upéva umi mbaʼe jajapóva rupive (elee 1 Juan 3:18). ¿Mbaʼe mbaʼépa jajapo vaʼerã jahechauka hag̃ua jahayhuha ñane ermanokuérape?

9. ¿Mbaʼépa ojapo vaʼekue Juan oporohayhúgui?

⁹ Juan ningo ikatu vaʼekue opyta ombaʼapo itúandi péskape ha ogana pláta ombaʼapóvo ifamíliandi. Péro upéva rangue, Juan oipuru hekove pukukue oipytyvõ hag̃ua ótrope oikuaa hag̃ua Jehová ha Jesúspe. Juan rekove ningo ijetuʼu vaʼekue ha heta ojepersegi chupe. Opa potávo pe primer síglo ojegueraha chupe hetãgui opredika haguére, hiʼarive upérõ haʼe ijedáma vaʼekue (Hech. 3:1; 4:1-3; 5:18; Apoc. 1:9). Oĩramo jepe préso, Juan ohechauka vaʼekue ohayhuha hapichakuérape. Por ehémplo, oĩ aja pe ísla de Pátmospe haʼe oskrivi pe lívro de Apocalipsis, ha oguerahaka upéva umi kongregasionkuérape ikatu hag̃uáicha oikuaa hikuái “umi mbaʼe oikótava koʼẽrõite” (Apoc. 1:1). Ha upéi, oiméne ojepoi rire chugui ha osẽ rire ísla de Pátmosgui, Juan oskrivi pe lívro oñeʼẽ hag̃ua Jesús rekovekuére ha ipredikasiónre. Haʼe oskrivi vaʼekue avei mbohapy kárta omokyreʼỹ ha omombarete hag̃ua iñermáno ha iñermanakuérape. Jahechaháicha, Juan ojesakrifika vaʼekue ótro rehehápe. ¿Mbaʼéichapa ikatu jasegi iñehémplo?

10. ¿Mbaʼéichapa ikatu jahechauka jahayhuha ñande rapichakuérape?

¹⁰ Ñande ikatu jahechauka jahayhuha ñande rapichakuérape umi mbaʼe jadesidívare jajapo ñande rekovépe. Satanás múndo oipota ñapensa ñandejehénte ha jaipurupaite ñane tiémpo ha ñane mbaretekue ñagana hag̃ua pláta ha ñanefamóso hag̃ua. Péro ko múndo tuichakuére oĩ heta kristiáno isakrifikádova ha oñehaʼãva oipurupaite itiémpo opredika hag̃ua umi notísia porã, ha oipytyvõ umi héntepe oñemoag̃ui hag̃ua Jehováre. Oĩ voi ojapóva upéva de tiémpo kompléto.

11. ¿Mbaʼéichapa heta ermáno ohechauka ohayhuha Jehovápe ha iñermanokuérape?

¹¹ Heta ermáno ningo ombaʼapo vaʼerã un día pukukue ikatu hag̃uáicha oñemantene hikuái ha ifamiliakuérape. Upéicharõ jepe, koʼã ermáno ifiélva ojapo ikatúva entéro oapoja hag̃ua Ñandejára organisasión. Por ehémplo, oĩ umi ohóva oipytyvõ oiko jave sarambi, ótro ombaʼapo konstruksiónpe, ha enterovete ikatu ñameʼẽ ñane kontrivusión jaapoja hag̃ua pe traváho ojapóva Jehová organisasión ko múndo tuichakuére. Ñande jajapo koʼã mbaʼe jahayhu rupi Jehovápe ha ñande rapichakuérape. Avei jahechauka jahayhuha ñane ermanokuérape ñaimévo rreunionhápe káda semána ñanekaneʼõramo jepe, ha ñakomenta ñandeforsáramo jepe. Enterove ningo ñaneprovléma, péro lomímonte ñamokyreʼỹ ñane ermanokuérape oñepyrũ mboyve ha opa rire umi rreunión (Heb. 10:24, 25). ¡Ajépa jaagradesete opa mbaʼe ojapóva ñane ermáno ha ermanakuéra jahayhuetéva!

12. ¿Mbaʼéichapa Juan ohechauka vaʼekue avei ohayhuha iñermáno ha iñermanakuérape?

 ¹² Juan ningo ohechauka vaʼekue ohayhuha iñermanokuérape ofelisitávo chupekuéra, péro ohechauka vaʼekue avei upéva oakonsehávo chupekuéra. Por ehémplo, umi ikártape Juan oguerohory umi ermánope ojerovia ha ojapo haguére umi mbaʼe iporãva, péro avei omeʼẽ chupekuéra konsého imbaretéva oñeʼẽva pe pekádore (1 Juan 1:8–2:1, 13, 14). Péicha avei ñande jaguerohory vaʼerã ñane ermanokuérape umi mbaʼe porã ojapóvare. Péro oĩramo peteĩ ermáno oñepyrũva ohechauka ijaktitu vaiha, térã ojepokuaaha ojapo peteĩ mbaʼe ikatúva ombyai pe amista orekóva Jehovándi, ñande jahechaukáta jahayhuha pe ermánope jaʼéramo chupe upe tekotevẽva ohendu okambia hag̃ua. Ñande ningo ñandepyʼaguasu vaʼerã ñañanima hag̃ua ñameʼẽ peteĩ konsého ñane amígope, péro la Biblia heʼi umi oñoamígo teéva oñohaimbeʼe térã ojokorrehiha (Prov. 27:17).

13. ¿Mbaʼépa ndajajapói vaʼerã?

¹³ Sapyʼánte umi mbaʼe ndajajapóiva rupive jahechauka jahayhuha ñane ermáno ha ermanakuérape, por ehémplo, nañandepochyreíriramo umi mbaʼe heʼívare hikuái. Ñapensamína mbaʼépa oiko vaʼekue Jesús oĩrõ guare ko yvy ape ári. Haʼe heʼi vaʼekue idisipulokuérape hoʼu vaʼerãha hoʼo ha huguy ohupyty hag̃ua jeikove opaveʼỹva (Juan 6:53-57). Upe heʼíva ndogustaiete voi heta idisípulope, ha upévare oheja chupe hikuái, péro umi iñamígo tee ndojapói upéva, umíva apytépe Juan. Koʼã iñamígo ifiélva osegi hendive nontendéiramo jepe mbaʼépa heʼise vaʼekue Jesús, ha oiméne oñesorprende avei hikuái. Péro haʼekuéra ndaipochýi ni nopensái oĩ vai hague la Jesús heʼi vaʼekue. Upéva rangue, haʼekuéra ojerovia hese oikuaágui haʼe heʼiha pe añetegua (Juan 6:60, 66-69). ¡Ajépa iñimportantete nañandepochyreíri umi mbaʼe heʼívare ñane amigokuéra! Upéva rangue ñameʼẽ vaʼerã chupekuéra tiémpo oexplika hag̃ua mbaʼépa la heʼise vaʼekue (Prov. 18:13; Ecl. 7:9).

14. ¿Mbaʼérepa ndovaléi arakaʼeve jaju ndajachaʼéi ñane ermanokuérare?

¹⁴ Juan ñandeavisa vaʼekue avei ani hag̃ua jaju ndajachaʼéi ñane ermáno ha ermanakuérare. Nañapenáiramo upe konséhore, Satanás ikatu ojevale upévare ha ojapoka ñandéve álgo ivaíva (1 Juan 2:11; 3:15). Upéva oiko vaʼekue yma opa potaitévo pe síglo primero. Upérõ Satanás ojapo vaʼekue opa ikatúva Ñandejára siervokuéra ndochaʼéi hag̃ua ojuehe ha ojodividipa. Juan oskrivírõ guare umi ikartakuéra  oikéma vaʼekue kongregasiónpe umi kuimbaʼe ojoguáva Satanáspe, ha odividiséva umi ermanokuérape. Por ehémplo, Diótrefes káusare ojeiko vaipáma hína kuri peteĩ kongregasiónpe. Haʼe ndorrespetái umi ansiáno ovisitávape umi kongregasión ha omondo vaʼekue pe Kuérpo Governánte. Haʼe oñehaʼã voi omosẽ kongregasióngui umi ermáno orresivi porãvape umi haʼe ndochaʼéivare. ¡Ajépa ivaiete la ojapo vaʼekue! (3 Juan 9, 10). Satanás ningo koʼág̃a peve oñehaʼã ha itarovaite voi odividise Ñandejára puévlope. Animoʼãkena ni núnka jaju ndajachaʼéi ñane ermanokuérare ha upevakuére jaju jajodividipa.

15. ¿Mbaʼérepa imanduʼa vaʼerã umi omoakãva hogapy?

¹⁵ Umi omoakãva hogapy omantene vaʼerã ifamíliape, ha péicha ohechauka ohayhuha chupekuéra (1 Tim. 5:8). Péro haʼe imanduʼa vaʼerã iñimportanteveha oipytyvõ ifamíliape oreko hag̃ua peteĩ amista iporãva Jehovándi (Mat. 5:3). Jahechamína pe ehémplo porã oheja vaʼekue Jesús umi omoakãvape hogapy. Lívro de Juánpe oñemombeʼu Jesús omano mbotaitéma hague pe yvyráre, ha upe moméntope jepe haʼe osegi vaʼekue opensa ifamíliare. Juan oĩ hína kuri Jesús sy María ykére, pe lugár Jesús oñemosaingo haguépe yvyráre. Ohasa asyetereíramo jepe, Jesús ojerure Juánpe oñangarekomi hag̃ua Maríare (Juan 19:26, 27). Jesús ermáno ha ermanakuéra ikatu vaʼekue omeʼẽ Maríape umi mbaʼe oikotevẽva oñemantene hag̃ua, péro amalisia upérõ ni peteĩ ndahaʼéi gueteri idisípulo. Upévare haʼe ojasegurase oĩ hag̃ua peteĩ oñangareko vaʼerã Maríare ha omokyreʼỹtava chupe osegi hag̃ua oservi Jehovápe.

16. ¿Mbaʼe rresponsavilida tuichávapa oreko vaʼekue Juan?

¹⁶ Juan oreko vaʼekue heta rresponsavilida tuicháva. Haʼe ningo peteĩ apóstol vaʼekue, upévare opredika kyreʼỹ vaʼerã. Haʼe oiméne omenda rakaʼe avei, upévare omantene vaʼerã ifamíliape ha oipytyvõ vaʼerã chupekuéra oreko hag̃ua peteĩ amista iporãva Jehovándi (1 Cor. 9:5). ¿Mbaʼépa ikatu oaprende Juángui umi omoakãva hogapy?

17. ¿Mbaʼe rresponsavilida iñimportántevapa oreko peteĩ omoakãva hogapy?

¹⁷ Peteĩ ermáno omoakãva hogapy ningo oreko heta rresponsavilida iñimportánteva. Por ehémplo, ombaʼapo jejopy vaʼerã itravahohápe oñeñeʼẽ porã hag̃ua Jehováre (Efes. 6:5, 6; Tito 2:9, 10). Pe ermáno ikatu oime haʼe ansiáno térã siérvo ministeriál, upévare ojapo  vaʼerã pastoréo oñangareko hag̃ua ermanokuérare ha omoakã vaʼerã pe predikasión. Avei iñimportánte ostudia meme la Biblia hembireko ha ifamíliandi. Haʼe ningo oreko la rresponsavilida omantenévo ifamíliape, oipytyvõ chupekuéra oiko hag̃ua vyʼápe ha osegi hag̃ua oreko Jehovápe iñamígoramo. Ifamília katuete oagradesetereíta chupe opa mbaʼe ojapóvare (Efes. 5:28, 29; 6:4).

18. ¿Mbaʼépa Juan oikuaa porã vaʼekue?

¹⁸ Juan ningo oikove are vaʼekue ha ohasa heta mbaʼe ijojahaʼỹva. Ombohovái vaʼekue avei heta mbaʼe ijetuʼúva ikatúva omokangy ijerovia. Péro haʼe siémpre ojapo vaʼekue opa ikatúva okumpli hag̃ua Jesús mandamientokuéra, umíva apytépe ohayhu iñermáno ha iñermanakuérape. Upéicha rupi, Juan oikuaa porã vaʼekue ha oĩ segúro Jehová ha Jesús ohayhuha chupe, ha omombaretetaha chupe hikuái oaguanta hag̃ua oimehaichagua situasión ijetuʼúva (Juan 14:15-17; 15:9, 10; 1 Juan 4:16). Satanás ha imúndo ndaikatúi vaʼekue ojapo mbaʼeve anivéma hag̃ua Juan ohayhu iñermáno ha iñermanakuérape, ni ohechauka upéva umi mbaʼe heʼíva ha ojapóva rupive.

19. ¿Mbaʼépa ñanemokyreʼỹ jajapo hag̃ua 1 Juan 4:7, ha mbaʼérepa?

¹⁹ Oiko haguéicha Juánre, ñande jaiko avei peteĩ múndo oĩvape Satanás poguýpe, ha jaikuaaháicha haʼe ndohayhuiete voi avavépe (1 Juan 3:1, 10). Haʼe oñehaʼãmbaite hína ñandejoko anivéma hag̃ua jahayhu ñane ermáno ha ermanakuérape, péro haʼe ndaikatumoʼãi ojapo upéva ñande nañapermitíriramo chupe. Upévare, jajerresolvékena jahayhutaha ñane ermáno ha ermanakuérape, ha jahechaukataha upéva umi mbaʼe jaʼéva ha jajapóva rupive. Péicha igustoitereíta ñandéve ñaime Jehová famíliape ha añetehápe jaikóta vyʼápe (elee 1 Juan 4:7).