1. ¿Ngöböta ni tarere yebätä ja ruin ño mäi?

“NGÖBÖ abokän ja tare” tikabare Juankwe, kukwe ye nuäre akwa tä kukwe ütiäte krubäte mike gare (1 Juan 4:8, TNM). Erametre, Ngöbö köböire ja nire tä nikwe aune ja tare kite niarakri arato. Jehová tä ni tarere aune ni tareta kwe yebätä ja ruin kwin nie, kätä juto nibätä aune ja ruin nuäre nie.

2. a) Mateo 22:37-40 tä niere erere, ¿kukwe meden ketebu ütiäte biani nuaindre nie? b) ¿Ñobätä ñaka raba nemen nuäre ni kräke kukwe ketebukäre biani nuaindre nie ye mikakäre täte?

² Nikwe ja tare bämikadre o ño ye ni kristiano ñaka rabadre ngwentari jai ñobätä ñan aune ye tä nuaindre nie (ñäkädre Mateo 22:37-40 yebätä). Nita Jehová mike gare bäri jai ngwane, tä nemen bäri nuäre ni kräke kukwe kena biani nuaindre kwe nie ye mikakäre täte ñobätä ñan aune Jehová ye töi metre, tä käre ni tarere aune töita nibätä bämikata kwe nie yebätä. Akwa kukwe ketebukäre biani nuaindre kwe nie ye ñaka raba nemen nuäre ni kräke mikakäre täte. ¿Ñobätä? Ñobätä ñan aune ja mräkätre ye töi ngite, yebätä raba kukwe ruäre nuainne o niere ye ñaka raba nemen kwin ni kräke o raba mate tare nibätä. Meden aisete, ja tare ye bämikadre ño jai kwärikwäri aune ñobätä nuaindre yebätä Jehovakwe nitre ruäre töi mikani kukwe tike Bibliabätä. Iti ye abokän Juan (1 Juan 3:11, 12).

3. ¿Kukwe meden mikani gare metre Juankwe?

³ Ni kristiano rabadre ja tarere ye mikani gare metre Juankwe, tärä tikani kwe yebätä. Evangelio tikani kwe yete blitata bäri ja tare yebätä Evangelio mada mada ye kräke. Evangelio  kwe aune tärä mada ketamä tikani kwe üai deme köböire ye ngwane kä namanina 100 biti. Ja tare ye raba ni kristiano töi mike jondron jökrä nuainne ye mikani gare metre kwe tärä tikani kwe yebätä (1 Juan 4:10, 11, TNM). Kukwe ye ñaka namani gare ben gwairebe ie, ñakare aune kä nikani ta ngwane batibe namani gare ie.

4. ¿Kukwe meden känti Juankwe ñaka ja tare bämikani?

⁴ Juan ñaka ja tare bämikani käre nämäne bati ye ngwane. Ñodre, bati Jesús aune nitre ja tötikaka kwe nikani Samaria ta rikakäre Jerusalén kokwäre ngwane, nitre nünanka kä keteiti Samaria yete käkwe ñan kani ngäbiti kwin. ¿Ye ngwane Juankwe ja töi mikani ño? Ñukwä kä kwinbiti jatadre käkwe nitre jökrä ye gadrete ye kärämana kwe (Luc. 9:52-56). Köbö madabiti, ñaka ja töi mikani kwin kwe nitre apóstol mada ye kräke. Niara aune eteba kwe Santiago käkwe meye töi mikani blite Jesube ne kwe niaratre nibu ye mikadre ütiäte Gobran Ngöbökwe yete. Kukwe ye namani gare nitre apóstol mada ie ngwane, namani rubun (Mat. 20:20, 21, 24). Kukwe jökrä ne naninte Juan ie, akwa yebiti ta nämäne tare Jesukwe (Juan 21:7).

5. ¿Dre rabai gare nie kukwe ja tötikara nekänti?

⁵ Kukwe meden bämikani Juankwe aune kukwe meden tikani kwe ja tare yebätä ye nibike mike gare jai kukwe ja tötikara nekänti. Ni rabadre ja mräkätre tarere ño aune nitre ji ngwanka mräkätre käne rabadre kukwe meden ütiäte nuainne ja tare bämikakäre mräkätre ie ye rabai gare nie arato.

6. ¿Jehovata ni tarere ye bämikanina ño kwe nie?

⁶ Ni iti tä ni mada tarere ngwane ñaka bämikadre kwe ja kukweibiti aibe, ñakare aune rabadre bämike kukwe nuainta yebiti (Santiago 2:17, 26 mikadre ñärärä). Ñodre, Jehová tä ni tarere (1 Juan 4:19). Kukwe bä nuäre tä Bibliabätä yebiti Jehovakwe ni tare bämikata kwe nie (Sal. 25:10; Rom. 8:38, 39). Ye medenbätä, niarata ni tarere gare nie ñaka kukwe nieta kwe ye aibebiti, ñakare aune kukwe nuainta kwe yebiti arato. Juankwe tikabare: “Ni tare Ngöbökwe mikani gare ne kwrere kwe nie: Ngöbökwe monso itibe kwe juani kä nebätä ne kwe ja nire rabadre nikwe niara köböire” (1 Juan 4:9, TNM). Jehovakwe Monso tare kwe tuanimetre ja tare nike aune murie ketadre ni kräke (Juan 3:16, TNM). Aisete Jehovata ni tarere ye gare metre nie.

7. ¿Jesukwe ni tare ye bämikani ño kwe nie?

⁷ ¿Aune Jesuta ni tarere ye ñokänti gare nie? Niara nämäne nitre ja tötikaka kwe  tarere niebare kwe ietre (Juan 13:1; 15:15). Jesús nämäne nitre ja tötikaka kwe ye tarere krubäte aune tä ni tarere krubäte ye gare nie ñaka kukwe niebare kwe ye aibebiti, ñakare aune kukwe nuainbare kwe yebiti arato. Nireta ja ketamukotre kwe tarere krubäte ye tä ja nire kwe bien niaratre ütiäre niebare Jesukwe (Juan 15:13). Jehová aune Jesukwe dre nuainbare ni kräke yebätä töbikadre ngwane, ¿ni rabadre dre nuainne?

8. 1 Juan 3:18 tä niere erere, ¿ni rabadre dre nuainne?

⁸ Nita Jehová aune Jesús mike täte ngwane tare nikwe nita bämike (Juan 14:15; 1 Juan 5:3). Aune nikwe ja taredre kwärikwäri ye nuain mananbare Jesukwe nie (Juan 13:34, 35). Ja tare ye nikwe bämikadre ja mräkätre ie ñaka ja kukweibiti aibe, ñakare aune kukwe nuainta nikwe yebiti arato (ñäkädre 1 Juan 3:18 yebätä). Akwa, ¿kukwe meden metrere ni rabadre nuainne?

9. ¿Juan nämäne ni mada tarere yebätä dre nuainbare kwe?

⁹ Juan tö rabadre akräke ja mikadrete kwe rünbe aune ngwian ganaindre kwe gwa rürübäin nämäne kwetre yebätä. Akwa ye erere ñaka nuainbare kwe, ñakare aune ja nire kwe yebiti nitre mada dimikani kwe kukwe metre Jehovabätä aune Jesubätä ye mike gare jai. Kukwe diani nuaindre kwe jai ye ñaka namani nuäre kräke. Nänbare jiebiti aune namanina umbre ngwane, kitani ngite siklo kena jatanina krüte ye ngwane (Hech. 3:1; 4:1-3; 5:18; Apoc. 1:9). Nämäne kitani ngite kukwe driebätä Jesubätä, akwa töi nämäne nitre madabätä ye bämikani kwe arato. Ñodre, nämäne kä mutu mrente Patmos yekänti kukwe meden mikani gare ie ye tikani kwe juankäre konkrekasion mada madate ne kwe “kukwe mden mden rakadikä bä jötrö” mikakäre gare ietre (Apoc. 1:1). Aune tikaninte ye bitikäre, kukwe meden namani bare Jesubätä aune kukwe driebare ño Jesukwe ye tikani kwe. Tärä ketamä tikani kwe ja mräkätre ie dimikakäre aune mikakäre dite arato. ¿Juankwe ja di ngwani krubäte ye erere ni raba nuainne ño?

10. ¿Ni mada tare nikwe ye ni raba bämike ño?

¹⁰ Nita dre den nuaindre jai yebiti nita nitre mada tarere ye nikwe bämikai arato. Kä aune ja die nikwe yebiti nikwe ja di ngwandre krubäte rabakäre jondron bökäne o rabakäre gare nitre jökrä ie, ie Satana tö. Akwa, nitre kristiano kä jökräbiti tibien tä ja di ngwen krubäte kukwe kwin Gobran Ngöbökwe yebätä driekäre aune nitre mada dimikakäre nökrö Jehová ken. Ruäre raba nuainne köbö täte arato.

11. ¿Ja mräkätre kwati tä Jehová aune ja mräkätre tarere ye bämikata ño kwetre?

¹¹ Nitre kristiano kwati krubäte ja ngwanka metre tä sribire köbö täte ja ngübakäre aune mräkätre kwe ngübakäre. Akwa yebiti ta raba dre dre nuainne yebiti tä juta Ngöbökwe dimike. Ñodre, kukwe tare tä nakainkä ngwane, ruäre tä sribire nitre mada dimikakäre, mada tä sribire ju sribebätä aune ni jökrä raba ngwian bien ja töi jeñebiti. Yebiti Ngöbö tare kwe aune ni mada tare kwe bämikata kwetre. Ne madakäre, bämän kratire kratire ja mräkätre tare nikwe ye ni raba bämike, nita kwen gätäbätä nita dräre yebiti ta, nita nemen grükekä yebiti ta aune kukweta ni kisete yebiti ta ja di ngwanta nikwe nitre mada dimikakäre gätä känenkri o gätä ye bitikäre arato (Heb. 10:24, 25). Ja mräkätre tare nikwe tä ja di ngwen kukwe ne nuainkäre yebätä nita debe bien krubäte.

12. ¿Juan nämäne ja mräkätre tarere ye bämikani kwe kukwe medenbiti?

¹² Juan nämäne ja mräkätre tarere ye bämikani  kwe nämäne kukwe kwin niere ietre yebiti, akwa nämäne mäträrebätä yebiti arato bämikani kwe. Ñodre, kukwe tikani kwe yebiti ja mräkätre nämäne tödeke aune kukwe kwin nuainne yebätä kwin niebare kwe ietre, akwa mikani mokre kwe ja mika ngite yebätä arato (1 Juan 1:8-2:1, 13, 14). Ye erere arato, ja mräkätre tä kukwe kwin nuainne yebätä ni rabadre kwin niere ietre. Akwa ñaka jatadre töbike kwin o kukwe ñaka kwin nuainne ngwane, ni rabadre mäträrebätä töi kwinbiti yebiti nita tarere nikwe bämikai. Ja ngwandre dite ye nuainkäre, akwa ja ketamuko metre ye tä ja tutikete o ja töi ükete kwärikwäri nieta Proverbios 27:17 yekänti.

13. ¿Nikwe ñaka dre nuaindre?

¹³ Kukwe ruäre ñaka nuaindre nikwe yebiti ja mräkätre tare nikwe bämikadre arato. Ñodre, ja mräkätre kukwe ruäre niedre yebätä ni ñaka rabadre rubun jötrö ngwarbe. Jesús murie ketadre ye känenkri dre namani bare yebätä ani töbike. Nitre ja tötikaka kwe käkwe niara ngätä kwetadre aune därie kwe ye ñadre ne kwe ja nire käre rabadre kwetre niebare kwe ietre (Juan 6:53-57). Kwati nikaninkä yebätä kämikaninkä kwetrebätä. Akwa Juan aune ja ketamukotre mada ja ngwanka metre ie yekwe ñaka kämikaninkäbätä. Dre gärä nämäne kwe ye ñaka nükani gare ietre aune namani töbike krubäte kukwe yebätä raba ruin nie, akwa ñaka namani rubun jötrö kukwe yebätä aune kukwe naninte ie ye ñaka nütübare kwetre, ñakare aune tö ngwani kwetre Jesús ie ñobätä ñan aune käre nämäne kukwe metre niere ye nämäne gare ietre (Juan 6:60, 66-69). Ja mräkätre kukwe niedre yebätä ni ñaka rabadre rubun jötrö ngwarbe, ñakare aune nane kukwe ruäre tä kisete yebätä tä blite kore nikwe nütüdre ye ütiäte krubäte (Prov. 18:13; Ecl. 7:9).

14. ¿Ñobätä nikwe ñaka bätä ngwandre ja mräkätrebätä?

¹⁴ Nikwe ñaka bätä ngwandre ja mräkätrebätä yebätä Juankwe ni mikani mokre arato. Nikwe bätä ngwandre ja mräkätrebätä ngwane nikwe ja mikai Satana kisete (1 Juan 2:11; 3:15). Ye erere namani bare nitre kristiano ruärebätä siklo kena jatanina krüte ye ngwane. Satana nämäne ja di ngwen niaratre töi mikakäre bätä ngwen jabätä aune ja ñäkäbitikäre. Tärä tikani Juankwe ye ngwane, nitre ruäre töbike Satana erere nükanina konkrekasionte. Iti ye abokän Diótrefes, niara nämäne konkrekasion keteiti ye ñäkebiti  krubäte. Nitre juta Ngöbökwe jie ngwanka ye nämäne ni tuabitikä juen ye niara ñaka nämäne mike jire ütiäte jai. Nämäne bike kri, yebätä nire nire ñaka nämäne mate kwinbätä ye ja mräkätre meden tö nämäne kain ngäbiti kwin ye Diótrefes tö nämäne juaintari konkrekasionte (3 Juan 9, 10). Kä nengwane, Satana tä ja di ngwen krubäte juta Jehovakwe ye ñäkäbitikäre. Yebätä nikwe ñaka bätä ngwan ye tuanemetre ja ñäkebiti.

15. ¿Nitre ji ngwanka mräkätre käne käkwe dre ngwandre törö jai?

¹⁵ Nitre ji ngwanka mräkätre käne kukwe keteiti ütiäte nuaindre ja tare bämikakäre mräkätre kwe ie, ye abokän ngübadre kwe dre dre ribeta jai kwetre yebätä (1 Tim. 5:8). Akwa ngübadre kwe kukwe ja üairebiti ye kukwe bäri ütiäte nuaindre kwe ye ñaka käi kwitadrekä kwe jabiti (Mat. 5:3, TNM). Jesukwe kukwe kwin bämikani ye ani mike gare jai. Evangelio Juankwe tä mike gare erere, Jesús nämäne metani kribätä, akwa nämäne töbike jankunu mräkätre kwe yebätä. Juan aune María, Jesús meye nämäne Jesús metani kribätä yekänti. Jesús nämäne ja tare nike krubäte, akwa yebiti ta María ngübadre Juankwe ye ribebare kwe ie (Juan 19:26, 27). María monsoitre mada nämäne ye raba ngübare, akwa kä ye ngwane jämi nemen ja tötikaka Jesukwe. Aisete meye kwe ngübadre kwin ja ngätärebiti aune ja üairebiti ye ükaninte metre kwe.

16. ¿Sribi meden nämäne Juan kötärä?

¹⁶ Sribi keta kabre nämäne Juan kötärä. Niara ye apóstol yebätä kukwe kwin bämikadre kwe kukwe driebätä. Ne madakäre, niara nämäne gure raba ruin nie. Ye erere akräke, rabadre mräkätre kwe ye ngübadre ja ngätärebiti aune ja üairebiti arato (1 Cor. 9:5). Nitre ji ngwanka mräkätre käne ie, ¿dre raba nemen gare Juanbätä?

17. Nitre ji ngwanka mräkätre käne käkwe mräkätre ngübadre kukwe ja üairebiti, ¿ye ñobätä ütiäte krubäte?

¹⁷ Nitre ji ngwanka mräkätre käne ye kötärä sribi ütiäte krubäte keta kabre tärä arato. Ñodre, rabadre sribire kwin ne kwe ja ngwanta ño kwetre yebiti blitadre kwin Jehovabätä (Efes. 6:5, 6; Tito 2:9, 10). Aune sribi tärä kötärä konkrekasionte raba ruin nie, ñodre, ja mräkätre ngübadrebiti aune kukwe kwin bämike kukwe driebätä. Rabadre käre ja tötike Bibliabätä muko kwe ben aune monsotre kwe  ben ye tä nuaindre ie arato. Dre dre nuaindi kwe mräkätre kwe ngübakäre ja ngätärebiti, ja ruin ño ietre yebätä aune ja üairebiti yebätä mräkätre kwe debe biain ja brukwä ngöibiti ie (Efes. 5:28, 29; 6:4).

18. ¿Dre nämäne gare metre Juan ie?

¹⁸ Juankwe nünanbare raire aune kukwe keta kabre namani bare okwäbiti. Kukwe keta kabre tare raba tödeka kwe ngwen di nekä yebe ja tuani kwe. Akwa käre ja di ngwani kwe kukwe nuain mananbare Jesukwe ye mikakäre täte, ye ngätäite ja mräkätre tarebare kwe. Ye medenbätä, Jehová aune Jesús nämäne niara tarere aune niaratre käkwe ja di biain ie ja tuakäre kukwe keta kabre taretare ben ye nämäne gare metre ie (Juan 14:15-17; 15:10, TNM; 1 Juan 4:16). Satana aune nitre gobrainta kwe ñaka Juan ketaninbätä jire ñobätä ñan aune ja kukweibiti aune kukwe nuainbare kwe yebiti ja tare bämikani kwe ja mräkätre ie.

19. ¿1 Juan 4:7 tä ni töi mike dre nuainne aune ñobätä?

¹⁹ Juan erere, nitre gobrainta Satanakwe mätä krubäte jabätä ye ngätäite nita nüne (1 Juan 3:1, 10). Nikwe ñaka ja mräkätre taredre ie Satana tö, akwa nikwe ñaka kä biain ie ngwane ye ñaka rabai bare ie. Ye medenbätä, nikwe ja töi mikadre kwatibe ja mräkätre tarekäre ja kukweibiti aune kukwe nuainta yebiti. Nikwe ye erere nuaindi ngwane, ni rabai Jehová mräkätre ye ngätäite ye käi rabai nuäre nibätä aune kä juto erametre rabai nikwe (ñäkädre 1 Juan 4:7 yebätä).