1. Ano ang mabatyagan mo bangod sang gugma sang Dios sa imo?

“ANG Dios gugma,” sulat ni apostol Juan. (1 Juan 4:8) Ginapahanumdom kita sini nga ang Dios nga ginhalinan sang kabuhi amo man ang ginhalinan sang gugma. Palangga kita ni Jehova! Bangod sang iya gugma, malipayon kita, naamligan, kag kontento.

2. Suno sa Mateo 22:37-40, ano ang duha ka pinakaimportante nga mga sugo, kag ngaa mahimo nga mabudlay tumanon kon kaisa ang ikaduha nga sugo?

² Bilang mga Cristiano, dapat gid kita magpakita sang gugma kay ginsugo ini sa aton. (Basaha ang Mateo 22:37-40.) Kon kilala naton sing maayo si Jehova, mahimo nga mahapos lang sa aton nga tumanon ang nahauna nga sugo. Ngaa? Bangod perpekto si Jehova, nagaulikid sia sa aton, kag ginapakitaan niya kita sang kaayo. Pero mahimo nga mabudlayan kita nga tumanon ang ikaduha nga sugo. Ngaa? Bangod indi perpekto ang aton mga kauturan, nga nalakip sa aton mga isigkatawo. Gani kon kaisa, makahambal sila kag makahimo sang makasakit sa aton balatyagon. Kabalo si Jehova nga posible mabudlayan kita nga tumanon ini nga sugo, gani gintuytuyan niya ang pila ka manunulat sang Biblia nga laygayan kita kon ngaa dapat kita maghigugmaanay kag kon paano naton ini himuon. Ang isa sa ila amo si Juan.—1 Juan 3:11, 12.

3. Ano ang pirme ginasiling ni Juan sa iya mga ginsulat?

³ Sa mga ginsulat ni Juan, pirme niya ginasiling nga dapat magpakita sang gugma ang mga Cristiano. Sa libro sa Biblia nga ginsulat ni Juan parte sa kabuhi ni Jesus, madamo sia sing ginsambit parte sa gugma. Mas madamo ini bisan pa tingbon ang mga ginsulat ni Mateo, ni Marcos, kag ni Lucas parte sa sini. Halos  isa ka gatos ka tuig na ang edad ni Juan sang ginsulat niya ang iya Ebanghelyo kag ang iya tatlo ka sulat. Ginatudluan kita sini nga mga libro sa Biblia nga dapat makita sa tanan naton nga ginahimo ang aton gugma. (1 Juan 4:10, 11) Pero nagligad pa ang malawig nga tion antes ini naaplikar ni Juan.

4. Napakita bala ni Juan ang gugma sa tanan nga tion?

⁴ Sang pamatan-on pa si Juan, may mga tion nga wala sia nakapakita sang gugma. Halimbawa, sang nagapakadto si Jesus kag ang iya mga disipulo sa Jerusalem, nag-agi sila sa Samaria. Pero wala sila ginbaton sang mga Samaritano sa isa ka baryo. Ano ang ginhimo ni Juan? Naglisensia sia kay Jesus nga mangabay sia nga magpaulan sang kalayo para laglagon ang mga nagaistar sa baryo. (Luc. 9:52-56) May isa pa ka bes nga wala nakapakita si Juan sang gugma sa iya pareho nga mga apostoles. Ginsilingan niya kag sang iya utod nga si Santiago ang ila iloy nga pangabayon si Jesus nga hatagan sila sang importante nga mga katungdanan sa Ginharian. Naakig ang iban nga mga apostoles sang nabal-an nila ang ginhimo ni Santiago kag ni Juan. (Mat. 20:20, 21, 24) Pero bisan pa sini tanan, ginhigugma ni Jesus si Juan.—Juan 21:7.

5. Ano ang binagbinagon naton sa sini nga artikulo?

⁵ Sa sini nga artikulo, binagbinagon naton ang halimbawa ni Juan kag ang pila sang mga ginsulat niya parte sa gugma. Paagi sa sini, matun-an naton kon paano ipakita ang gugma sa aton mga kauturan. Matun-an man naton kon paano ipakita sang ulo sang pamilya ang iya gugma sa iya pamilya.

6. Paano ginpakita ni Jehova nga palangga niya kita?

⁶ Mahimo nga nagabatyag kita nga napakita na naton ang gugma sa iban kon may maayo kita nga ginsiling sa ila. Pero mapakita naton ang matuod nga gugma paagi sa aton mga ginahimo. (Ipaanggid ang Santiago 2:17, 26.) Halimbawa, palangga kita ni Jehova. (1 Juan 4:19) Kag mabasa naton sa Biblia nga nagsiling sia nga palangga niya kita. (Sal. 25:10; Roma 8:38, 39) Pero kabalo kita nga palangga kita sang Dios indi lang bangod sang iya ginasiling kundi bangod man sang iya ginahimo. Si Juan nagsulat: “Paagi sini ang gugma sang Dios ginpadayag sa aton kahimtangan, nga ginpadala niya ang iya bugtong nga Anak sa kalibutan agod maagom naton ang kabuhi paagi sa iya.” (1 Juan 4:9) Gintugutan ni Jehova nga mag-antos ang iya pinalangga nga Anak kag mapatay para sa aton. (Juan 3:16) Gani sigurado gid kita nga palangga kita ni Jehova.

7. Paano ginpamatud-an ni Jesus ang iya gugma sa aton?

⁷ Ginsilingan ni Jesus ang iya mga disipulo nga palangga niya sila. (Juan 13:1; 15:15)  Ginpamatud-an niya ang iya gugma sa ila pati na sa aton indi lang paagi sa iya ginsiling kundi paagi man sa iya ginhimo. Nagsiling si Jesus: “Wala sing makalabaw sa gugma sang isa nga naghatag sang iya kabuhi para sa iya mga abyan.” (Juan 15:13) Kon pamensaron naton ang ginhimo ni Jehova kag ni Jesus para sa aton, ano ang dapat naton himuon?

8. Suno sa 1 Juan 3:18, ano ang dapat naton himuon?

⁸ Mapakita naton ang aton gugma kay Jehova kag kay Jesus kon ginatuman naton sila. (Juan 14:15; 1 Juan 5:3) Kag ginsugo kita ni Jesus nga maghigugmaanay. (Juan 13:34, 35) Dapat naton ihambal sa aton mga kauturan nga palangga naton sila, pero dapat man naton ini ipakita sa aton mga ginahimo. (Basaha ang 1 Juan 3:18.) Ano ang mga puede naton himuon para mapakita naton ang aton gugma sa ila?

9. Ano ang ginhimo ni Juan bangod sang iya gugma?

⁹ Kaupod ni Juan ang iya amay sa pagpangisda, kag maayo ini nga negosyo sang ila pamilya. Pero imbes nga magtipon sang madamo nga kuarta, nagpokus sia sa pagbulig sa iban nga makatuon parte kay Jehova kag kay Jesus. Bangod sini, nakaeksperiensia si Juan sang mga kabudlayan, pareho sang paghingabot. Gintapok man sia sang tigulang na sia sang malapit na matapos ang unang siglo. (Binu. 3:1; 4:1-3; 5:18; Bug. 1:9) Bisan ara si Juan sa prisuhan bangod sang pagbantala niya parte kay Jesus, ginpakita niya nga ginapamensar niya gihapon ang kaayuhan sang iban. Halimbawa, sang ara sia sa isla sang Patmos, ginsulat niya ang libro sang Bugna kag ginpadala ini sa mga kongregasyon para mabal-an nila ang “pat-od nga mahanabo sa indi madugay.” (Bug. 1:1) Dayon, mahimo gid nga sang nahilway na si Juan kag wala na sia sa Patmos, ginsulat niya ang iya Ebanghelyo parte sa kabuhi kag ministeryo ni Jesus. Kag para pabakuron kag palig-unon ang iya mga kauturan, naghimo man sia sang tatlo ka sulat. Paano mo mailog ang ginhimo ni Juan nga pagsakripisyo?

10. Paano mo mapakita ang imo gugma sa mga tawo?

¹⁰ Mapakita mo ang imo gugma sa mga tawo paagi sa ginahimo mo nga mga desisyon. Mahimo ka impluwensiahan sang kalibutan ni Satanas nga magtinguha nga mangin manggaranon ukon bantog. Gusto niya nga gamiton mo ang tanan mo nga tion kag kusog para lang sa imo kaayuhan. Pero wala magpaimpluwensia sa sini ang mga manugbantala sang Ginharian sa bilog nga kalibutan. Handa sila magsakripisyo kag ginagamit nila ang ila tion para ibantala ang maayong balita kag buligan ang mga tawo nga mangin suod kay Jehova. Ang iban sa ila bug-os tion nga nagabantala kag nagatudlo sa mga tawo.

11. Paano ginapakita sang matutom nga mga manugbantala ang ila gugma kay Jehova kag sa ila mga kauturan?

¹¹ Madamo nga Cristiano ang may regular nga trabaho para suportahan ang ila kaugalingon kag ang ila pamilya. Pero ginasuportahan gid sining matutom nga mga manugbantala ang organisasyon sang Dios sa bug-os nila nga masarangan. Halimbawa, ang iban makabulig sa mga nahalitan sang kalamidad, ang iban makabulig sa konstruksion, kag ang tanan makaamot sang kuarta para sa bug-os kalibutan nga hilikuton. Ginahimo nila ini bangod sang ila gugma sa Dios kag sa ila isigkatawo. Kada semana, ginapakita naton ang aton gugma sa aton mga kauturan paagi sa pagtambong sa mga miting sang kongregasyon kag pagkomento. Nagatambong kita sa sini nga mga miting bisan pa mahimo nga kapoy kita. Nagakomento kita bisan pa mahimo nga nakulbaan kita. Kag ginapalig-on naton ang iban antes ukon pagkatapos sang miting bisan pa may  mga problema man kita. (Heb. 10:24, 25) Nagapasalamat gid kita sa ginahimo sang aton pinalangga nga mga kauturan.

12. Ano pa gid ang ginhimo ni Juan para ipakita ang iya gugma sa iya mga kauturan?

¹² Ginpakita ni Juan ang iya gugma sa iya mga kauturan indi lang paagi sa pagdayaw sa ila kundi paagi man sa paglaygay sa ila. Halimbawa, sa iya mga sulat, gindayaw ni Juan ang pagtuo kag maayo nga ginahimo sang iya mga kauturan, pero prangka man niya sila nga ginlaygayan parte sa pagpakasala. (1 Juan 1:8–2:1, 13, 14) Dapat man naton dayawon ang maayo nga mga ginahimo sang aton mga kauturan. Pero kon makita naton nga ang isa ka utod may indi maayo nga batasan ukon ginahimo, mapakita naton ang aton gugma sa iya kon mainayuhon naton sia nga laygayan parte sa sini. Kinahanglan naton sing kaisog para laygayan ang aton abyan, pero ang Biblia nagasiling nga dapat gid ini himuon sang matuod nga abyan.—Hulu. 27:17.

13. Ano ang indi naton dapat paghimuon?

¹³ Kon kaisa may mga indi kita dapat himuon para mapakita naton ang aton gugma sa aton mga kauturan. Halimbawa, indi kita dayon maakig sa ila kon may ginsiling sila nga mahimo nagpalain sang aton buot. Binagbinaga ang natabo sang ari si Jesus sa duta. Ginsilingan niya ang iya mga disipulo nga para matigayon nila ang kabuhi, dapat nila kaunon ang iya unod kag imnon ang iya dugo. (Juan 6:53-57) Indi gid mabaton sang madamo niya nga disipulo ang iya ginsiling, gani ginbiyaan nila sia. Pero wala sia ginbiyaan sang iya matuod nga mga abyan, pati na si Juan. Wala nila nahangpan ang ginsiling ni Jesus, kag mahimo nga nakibot man sila sa sini. Pero wala gid ginhunahuna sang matutom nga mga abyan ni Jesus nga sala ang iya ginsiling, kag wala man sila nasandad sa sini. Nagsalig sila sa iya kay kabalo sila nga matuod ang tanan niya nga ginahambal. (Juan 6:60, 66-69) Gani importante gid nga indi dayon maglain ang aton buot sa ginasiling sang aton mga abyan. Sa baylo, pamangkuton naton sila kon ano ang buot silingon sang ila ginsiling kag pamatian naton sila.—Hulu. 18:13; Man. 7:9.

14. Ngaa indi naton dapat pagdumtan ang aton mga kauturan?

¹⁴ Ginlaygayan man kita ni Juan nga indi magdumot sa aton mga kauturan. Kon indi naton pagsundon ini nga laygay, mahimo nga maimpluwensiahan kita ni Satanas. (1 Juan 2:11;  3:15) Natabo ini sa pila ka Cristiano sang malapit na lang matapos ang unang siglo. Gintinguhaan sadto ni Satanas nga impluwensiahan ang katawhan sang Dios nga magdumtanay para indi sila mahiusa. Sang ginhimo ni Juan ang iya mga sulat, may mga nakasulod sa kongregasyon nga naimpluwensiahan ni Satanas. Ang isa sa ila amo si Diotrefes. Bangod sang iya ginhimo, nadula ang paghiusa sang isa ka kongregasyon. (3 Juan 9, 10) Wala niya gintahod ang nagduaw nga mga gulang nga ginpadala sang nagadumala nga hubon. Gintinguhaan pa gani niya nga sikwayon ang mga gusto mag-abiabi sa nagduaw nga mga gulang. Kalain gid sang iya ginhimo! Subong, ginatinguhaan gihapon ni Satanas nga impluwensiahan ang katawhan sang Dios para indi sila mahiusa. Indi gid naton dapat pagdumtan ang aton mga kauturan kag dapat padayon kita nga magbuligay.

15. Ano ang dapat dumdumon sang ulo sang pamilya?

¹⁵ Mapakita sang ulo sang pamilya nga palangga niya ang iya pamilya paagi sa paghatag sang ila materyal nga mga kinahanglanon. (1 Tim. 5:8) Pero dapat niya dumdumon nga may mas importante pa sa sini. Dapat niya buligan ang iya pamilya nga mangin suod kay Jehova. (Mat. 5:3) Binagbinaga ang ginpakita ni Jesus nga halimbawa para sa mga ulo sang pamilya. Mabasa naton sa Ebanghelyo ni Juan nga sang ginlansang si Jesus sa usok sang pag-antos, ginpamensar niya gihapon ang kaayuhan sang iya pamilya. Sa lugar diin ginlansang si Jesus, nagatindog didto si Juan upod sa iloy ni Jesus nga si Maria. Bisan pa grabe nga kasakit ang ginabatyag ni Jesus, ginpangabay niya si Juan nga atipanon si Maria. (Juan 19:26, 27) May mga utod si Jesus nga makahatag sang mga kinahanglanon ni Maria, pero mahimo nga indi pa sila mga disipulo ni Jesus. Gani ginsigurado ni Jesus nga may magaatipan kay Maria kag magapalig-on sa iya nga padayon nga mag-alagad kay Jehova.

16. Ano ang mga responsibilidad ni Juan?

¹⁶ May madamo nga responsibilidad si Juan. Isa sia sa mga apostoles, gani nagpanguna gid sia sa pagbantala. Mahimo nga may asawa man sia, gani dapat niya amanan ang iya pamilya kag buligan sila nga mangin suod sa Dios. (1 Cor. 9:5) Ano ang ginatudlo sini sa mga ulo sang pamilya subong?

17. Paano mapakita sang ulo sang pamilya nga palangga niya ang iya pamilya?

¹⁷ Ang isa ka ulo sang pamilya mahimo nga may madamo nga responsibilidad. Halimbawa,  dapat niya himuon sing maayo ang iya trabaho kay paagi sa sini madayaw si Jehova. (Efe. 6:5, 6; Tito 2:9, 10) Kag mahimo nga may mga responsibilidad sia sa kongregasyon, pareho sang pag-shepherding kag pagpanguna sa pagbantala. Dapat man niya tun-an sing regular ang Biblia upod sa iya asawa kag kabataan. Responsibilidad niya nga ihatag ang ila mga kinahanglanon, buligan sila nga mangin malipayon, kag buligan sila nga padayon nga mag-alagad kay Jehova. Kon himuon niya ini, pasalamatan gid sia sang iya pamilya.—Efe. 5:28, 29; 6:4.

18. Sa ano sigurado si Juan?

¹⁸ Malawig nga nagkabuhi si Juan, kag madamo sia sang makalilipay nga eksperiensia. Nakaeksperiensia man sia sang madamo nga kabudlayan nga puede magpaluya sang iya pagtuo. Pero ginhimo niya ang iya bug-os nga masarangan para tumanon ang mga sugo ni Jesus, pareho sang sugo nga higugmaon ang iya mga kauturan. Gani sigurado gid si Juan nga ginhigugma sia ni Jehova kag ni Jesus kag buligan nila sia nga mabatas ang mga kabudlayan. (Juan 14:15-17; 15:10; 1 Juan 4:16) Wala gid si Juan naimpluwensiahan ni Satanas ukon sang iya kalibutan. Ginhigugma gid ni Juan ang iya mga kauturan paagi sa iya ginsiling kag ginhimo.

19. Suno sa 1 Juan 4:7, ano ang dapat naton himuon, kag ngaa?

¹⁹ Pareho kay Juan, nagaistar man kita sa kalibutan nga ginagamhan ni Satanas, nga wala gid nagapakita sang gugma. (1 Juan 3:1, 10) Gusto ni Satanas nga indi na naton pagpalanggaon ang aton mga kauturan, pero indi ina matabo kon indi kita magpaimpluwensia sa iya. Dapat naton palanggaon ang aton mga kauturan, kag pamatud-an naton ini sa aton mga ginasiling kag mga ginahimo. Kon himuon naton ini, mangin malipayon gid kita kay bahin kita sang pamilya ni Jehova.—Basaha ang 1 Juan 4:7.