1. Qhov uas Vajtswv hlub koj ua rau koj xav li cas xwb?

TUS TUBTXIB Yauhas sau tias “Vajtswv yog kev hlub.” (1 Yauhas 4:8, NWT ) Peb paub tias Yehauvas yog tus tsim peb thiab tus muab txojsia rau peb. Tiamsis Yauhas cov lus no qhia rau peb tias kev hlub los ntawm Yehauvas los. Yehauvas hlub peb heev nws xav kom peb muaj kev kaj siab, muaj kev zoo siab thiab tsis ntshaw dabtsi li.

2. (1) Raws li Mathais 22:37-40, ob nqi lus tseem ceeb uas Yexus sam hwm yog dabtsi? (2) Vim li cas thiaj tsis yoojyim rau peb hlub peb cov kwvtij zej zog?

² Yexus sam hwm rau cov Khixatia tias lawv yuav tsum hlub Vajtswv thiab hlub kwvtij zej zog. (Nyeem Mathais 22:37-40.) Thaum peb paub Yehauvas zoo lawm yuav yoojyim rau peb hlub nws. Rau qhov nws hlub peb thiab ua zoo rau peb thiab nws tsis muaj ib qho phem li. Tiamsis muaj tej thaum yuav tsis yooj yim rau peb hlub tej kwvtij zej zog lossis peb cov kwvtij nkauj muam hauv lub koom txoos. Rau qhov lawv yog neeg zoo tsis tiav ces muaj tej thaum lawv yuav ua tej yam uas peb xav tias lawv tsis hlub peb. Yehauvas paub tias yuav tsis yoojyim rau peb hlub lwm tus. Nws thiaj kom cov sau phau Vajlugkub qhia rau peb tias yog vim li cas peb yuav tsum sib hlub thiab peb ib leeg yuav hlub ib leeg li cas. Ib tug uas Yehauvas siv los sau cov lus qhuab qhia no yog tus tubtxib Yauhas.​—1 Yauhas 3:11, 12.

3. Yauhas hais li cas txog kev hlub?

 ³ Nyob rau hauv cov ntawv uas Yauhas sau nws hais tias cov Khixatia yuav tsum hlub lwm tus. Phau uas Yauhas sau txog Yexus lub neej, nws siv lo lus “hlub” ntau tshaj phau Mathais, Malakaus thiab Lukas ua ke tibsi. Thaum nws sau phau Yauhas thiab nws 3 tsab ntawv nws twb muaj li 100 xyoo lawm. Cov ntawv uas Yauhas sau no qhia tias txhua yam uas ib tug Khixatia ua yuav tsum qhia tias nws muaj kev hlub. (1 Yauhas 4:10, 11) Tiamsis yeej siv sijhawm ntev heev Yauhas mam paub hlub lwm tus li no.

4. Yauhas puas ib txwm txawj hlub lwm tus?

⁴ Thaum Yauhas tseem hluas muaj tej thaum nws kuj tsis paub hlub lwm tus thiab. Xws li thaum Yexus thiab nws cov thwjtim yuav mus rau nram Yeluxalees es lawv mus hla lub xeev Xamalis. Thaum lawv mus txog ntawm ib lub zos hauv Xamalis cov neeg nyob hauv tsis kam tos txais lawv. Yakaunpaus thiab Yauhas nkawd txawm nug Yexus seb Yexus puas kam nkawd hu hluav taws saum ntuj los hlawv cov neeg ntawd kom puam tsuaj tag! (Lukas 9:52-56) Hos muaj ib zaug, Yauhas thiab Yakaunpaus nkawd ob kwvtij hais kom nkawd niam thov Yexus cia nkawd ib leeg zaum ntawm Yexus ib sab thaum nws ua Vajntxwv kav. Qhov nkawd ua li no qhia tias nkawd tsuas xav txog nkawd tus kheej xwb nkawd tsis xav txog lwm tus. Thaum cov tubtxib hnov tias nkawd ua li no uas rau lawv chim siab kawg. (Mathais 20:20, 21, 24) Txawm Yauhas ua yuam kev ntau zaus los Yexus yeej tseem hlub nws.​—Yauhas 21:7.

5. Hauv zaj no peb yuav kawm txog dabtsi?

⁵ Hauv zaj no peb yuav kawm txog Yauhas tus qauv thiab tej uas nws sau txog kev hlub. Peb yuav kawm seb peb yuav hlub peb cov kwvtij nkauj muam li cas thiab peb yuav kawm seb tus txiv tsev yuav hlub nws tsev neeg li cas.

6. Ua cas peb thiaj paub hais tias Yehauvas hlub peb?

⁶ Tej zaum peb xav hais tias thaum peb nyiam ib tug neeg thiab hais lus zoo rau nws xwb ces yog peb hlub nws lawm. Tiamsis tej peb ua yuav tsum qhia tias peb hlub nws thiab. (Muab piv rau Yakaunpaus 2:17, 26.) Xws li Yehauvas qhia rau peb tias nws hlub peb hauv phau Vajlugkub. (1 Yauhas 4:19; Phau Ntawv Nkauj 25:10; Loos 8:38, 39) Tiamsis qhov uas peb paub hais tias nws hlub peb tiag tsis yog tej uas nws hais xwb tiamsis yog tej uas nws ua rau peb thiab. Yauhas sau hais tias: “Vajtswv txib nws tib leeg Tub los  rau hauv ntiajteb no kom peb cov uas ntseeg nws tus Tub tau txojsia tshiab. Vajtswv ua li ntawd twb yog Vajtswv qhia rau peb hais tias nws hlub peb.” (1 Yauhas 4:9) Yehauvas cia nws tib leeg Tub uas nws hlub heev los raug kev txom nyem thiab los tuag this peb. (Yauhas 3:16) Yog li ntawd peb thiaj paub hais tias Yehauvas hlub peb tiag.

7. Yexus ua li cas peb thiaj paub hais tias nws hlub peb?

⁷ Yexus hais rau nws cov thwjtim tias nws hlub lawv. (Yauhas 13:1; 15:15) Tej uas nws ua rau lawv qhia tias nws hlub lawv npaum li cas. Kuj qhia tias nws hlub peb npaum li cas thiab. Yexus hais tias: “Tus uas muaj kev hlub loj tshaj plaws yog tus uas zoo siab tuag theej nws cov phoojywg.” (Yauhas 15:13) Thaum peb xav txog tej uas Yehauvas thiab Yexus nkawd ua rau peb, peb yuav ua li cas?

8. Ib Yauhas 3:18 hais kom peb ua dabtsi?

⁸ Yog peb hlub Yehauvas thiab Yexus peb yuav tsum mloog nkawd lus. (Yauhas 14:15; 1 Yauhas 5:3) Yexus sam hwm kom peb ib leeg hlub ib leeg. (Yauhas 13:34, 35) Tsis yog peb hais rau peb cov kwvtij nkauj muam tias peb hlub lawv xwb tiamsis tej uas peb ua yuav tsum qhia tias peb hlub lawv tiag. (Nyeem 1 Yauhas 3:18.) Puas muaj tej yam peb ua tau los pab lawv kom lawv paub hais tias peb hlub lawv?

9. Yauhas ua li cas peb thiaj paub hais tias nws hlub lwm tus?

⁹ Yog Yauhas xav nrog nws txiv mus cuab ntse los muag xwb los yeej tau tiamsis nws tsis ua li ntawd. Nws siv nws lub neej mus pab lwm tus kom lawv los paub Yehauvas thiab Yexus. Lub neej no yeej tsis yoojyim rau Yauhas. Thaum nws mus tshaj tawm nws raug luag tsim txom thiab thaum nws twb laus laus lawm los nws tseem raug kaw thiab. (Tes Haujlwm 3:1; 4:1-3; 5:18; Tshwmsim 1:9) Thaum Yauhas raug kaw vim nws tshaj tawm txog Yexus los nws tseem xav txog lwm tus. Xws li thaum nws raug kaw hauv lub pov txwv Pamaus los nws tseem sau phau Tshwmsim thiab muab xa mus rau cov koom txoos kom lawv thiaj paub “tej uas tshuav tsis ntev tom ntej no yuav muaj tshwm los.” (Tshwmsim 1:1) Tej zaum twb yog tom qab lawv tso Yauhas tawm hauv lub pov txwv Pamaus nws mam li sau txog Yexus lub neej thiab tes haujlwm. Yauhas kuj sau 3 tsab ntawv mus txhawb nws cov kwvtij nkauj muam thiab. Koj kawm tau li cas los ntawm Yauhas lub neej?

10. Yog koj hlub tibneeg koj yuav ua dabtsi?

¹⁰ Koj los yeej siv tau koj lub neej mus pab lwm tus thiab qhia rau lawv tias koj hlub lawv. Xatas xav kom koj xav txog koj tus kheej xwb. Nws xav kom koj siv koj lub sijhawm mus khwv nyiaj khwv txiaj thiab kom koj muaj koob muaj npe. Tiamsis cov Khixatia thoob ntiajteb mus tshaj tawm ntau li ntau tau thiab pab tibneeg los paub Yehauvas. Muaj ib txhia siv tag nrho lawv lub neej mus tshaj tawm thiab qhia lwm tus.

11. Ua li cas peb thiaj paub tias peb cov kwvtij nkauj muam hlub Yehauvas thiab hlub lwm tus?

¹¹ Muaj ib co Khixatia yuav tsum mus ua haujlwm los yug lawv thiab lawv tsev neeg. Txawm li ntawd los lawv yeej txhawb tau Yehauvas lub koom haum li lawv ua tau. Xws li ib txhia mus pab peb cov kwvtij nkauj muam thaum muaj xwm txheej phem. Ib txhia pab ua vaj ua tsev. Tiamsis txhua tus tso tau nyiaj siab dawb mus pab tes haujlwm thoob qab ntuj. Lawv ua li no vim lawv hlub Yehauvas thiab hlub lwm tus. Yog hais tias peb hlub peb  cov kwvtij nkauj muam ces txawm hais tias peb sab heev los peb yuav mus koom tej kev sib txoos txhua lub lim tiam. Thiab txawm peb ntshai los peb tsa tes teb. Peb nyias yeej muaj nyias ib txojkev nyuaj siab tiamsis yog peb mus kev sib txoos kom ntxov thiab nyob kom lig ces peb ib leeg yuav txhawb tau ib leeg lub zog. (Henplais 10:24, 25) Peb zoo siab heev rau tej uas peb cov kwvtij nkauj muam ua.

12. Vim Yauhas hlub nws cov kwvtij nkauj muam nws ua li cas?

¹² Yauhas qhuas nws cov kwvtij nkauj muam thiab nws qhuab qhia lawv vim nws hlub lawv. Xws li hauv nws tsab ntawv nws qhuas lawv txog lawv txojkev ntseeg thiab lawv tes haujlwm. Tiamsis nws kuj qhuab ntuas lawv txog kev txhaum thiab. (1 Yauhas 1:8–2:1, 13, 14) Zoo ib yam li ntawd peb yuav tsum qhuas peb cov kwvtij nkauj muam thaum peb pom lawv ua ib yam zoo tiamsis yog peb ho pom ib tug muaj tus cwjpwm tsis zoo lossis ua ib yam uas yuav ua rau nws plam nws txojkev sib raug zoo nrog Yehauvas, peb yuav tsum ua tib zoo nrog nws tham thiab qhuab ntuas nws. Yeej tsis yoojyim rau peb ntuas peb tus phoojywg tiamsis phau Vajlugkub hais tias cov phoojywg zoo ib tug yuav tsum pab ib tug.​—Pajlug 27:17.

13 Yog peb hlub peb cov kwvtij nkauj muam ces peb yuav tsum tsis txhob ua dabtsi?

¹³ Muaj tej thaud yog peb hlub peb cov kwvtij nkauj muam ces peb yuav tsis lam tau lam chim rau tej uas lawv hais. Xws li muaj ib zaug Yexus hais rau nws cov thwjtim tias yog lawv tsis noj nws cov nqaij thiab tsis haus nws cov ntshav ces lawv yuav tsis tau txojsia. (Yauhas 6:53-57) Yexus cov thwjtim coob tus tsis nyiam cov lus Yexus hais no lawv thiaj tso tseg tsis raws nws qab lawm. Tiamsis Yexus cov phoojywg uas muaj siab npuab nws ib yam li Yauhas tsis tso Yexus tseg. Txawm lawv tsis to taub cov lus Yexus hais los lawv tsis chim tiamsis lawv ntseeg tias nws hais qhov tseeb xwb. (Yauhas 6:60, 66-69) Yog li ntawd tsis zoo rau peb lam tau lam chim rau tej uas peb cov phoojywg hais. Tiamsis peb yuav tsum ua tib zoo nug lawv thiab mloog seb lawv hais dabtsi tiag.​—Pajlug 18:13; Tej Lus Qhia 7:9.

14. Vim li cas peb thiaj yuav tsum tsis txhob ntxub peb cov kwvtij nkauj muam?

¹⁴ Yauhas hais kom peb tsis txhob ntxub peb cov kwvtij nkauj muam. Yog peb tsis  mloog nws hais ces Xatas yuav ntxias tau peb. (1 Yauhas 2:11; 3:15) Nyob rau Yauhas tiam Xatas sib zog ua kom Vajtswv cov neeg sib ntxub thiab tawg ua pab ua pawg. Lub sijhawm uas Yauhas sau nws cov ntawv twb muaj cov neeg uas ua li Xatas ua nyob hauv lub koom txoos Khixatia lawm. Xws li Di-autefes ua kom lub koom txoos tsis muaj kev sib haum xeeb. (3 Yauhas 9, 10) Nws saib tsis taus pab uas ntaus thawj. Yog leejtwg ua zoo rau ib tug uas nws tsis nyiam ces nws yeej ntiab tus neeg ntawd tawm hauv lub koom txoos. Tej uas nws ua no yeej phem kawg. Niaj hnub nimno los Xatas yeej tseem ua kom Vajtswv cov neeg tawg ua pab ua pawg thiab tsis sib haum xeeb. Peb tsis txhob cia Xatas ua li ntawd rau peb.

15. Tus txiv tsev yuav tsum nco ntsoov li cas?

¹⁵ Tus txiv tsev uas hlub nws tsev neeg yuav tsum mus khwv los yug nws tsev neeg thiab pab lawv. (1 Timautes 5:8) Tiamsis nws yuav tsum nco ntsoov tias qhov uas tseem ceeb tshaj yog pab kom nws tsev neeg muaj kev sib raug zoo nrog Yehauvas. (Mathais 5:3) Cia peb kawm seb Yexus ua li cas. Phau Yauhas hais tias ua ntej thaum Yexus tuag saum tus ntoo nws pom Yauhas sawv ntawm nws niam ib sab thiab thov kom Yauhas pab saib xyuas nws niam. (Yauhas 19:26, 27) Yexus yeej muaj cov kwv thiab cov muam uas saib xyuas tau nws niam tiamsis lawv tsis tau muaj ib tug los ua nws cov thwjtim li. Vim li ntawd nws thiaj xav kom muaj tus saib xyuas nws niam thiab txhawb nws niam txoj kev teev tiam Yehauvas.

16. Yauhas lub luag haujlwm yog dabtsi?

¹⁶ Yauhas muaj haujlwm ntau heev. Nws yog ib tug tubtxib thiab nws yuav tsum rau siab ntso mus tshaj tawm. Tej zaum nws kuj muaj pojniam thiab ces nws yuav tau mus khwv los yug nws tsev neeg thiab pab nws tsev neeg kom muaj kev sib raug zoo nrog Yehauvas. (1 Kauleethaus 9:5) Cov txiv tsev niaj hnub nimno kawm tau li cas ntawm Yauhas?

17. Vim li cas thiaj tseem ceeb rau tus txiv tsev pab nws tsevneeg kom muaj kev sib raug zoo nrog Yehauvas?

¹⁷ Ib tug kwvtij uas yog ib tug txiv tsev muaj haujlwm ntau heev ua. Xws li thaum nws mus ua haujlwm nws yuav tsum rau siab nws thiaj coj tau lub npe zoo los rau Yehauvas. (Efexus 6:5, 6; Titus 2:9, 10) Thiab tej zaum nws kuj muaj haujlwm ntau hauv lub koom txoos.  Xws li pab saib xyuas cov kwvtij nkauj muam thiab txhawb lawv zog thiab coj lawv mus tshaj tawm. Tsis tas li ntawd xwb nws tseem yuav tau kawm Vajlugkub nrog nws tus pojniam thiab nws cov menyuam. Nws tsev neeg yuav zoo siab heev uas nws saib xyuas lawv kom noj qab nyob zoo thiab teev tiam Yehauvas.​—Efexus 5:28, 29; 6:4.

18. Yauhas tso siab li cas?

¹⁸ Yauhas ua neej ntev heev nws ntsib thiab pom ntau yam. Muaj ntau yam ua rau nws qaug zog tiamsis nws yeej sib zog ua li Yexus sam hwm es hlub nws cov kwvtij nkauj muam. Twb yog vim li ntawd Yauhas thiaj tso siab tias Yehauvas thiab Yexus yeej hlub nws thiab nkawd yuav pab nws nyiaj taus nws tej kev nyuaj siab. (Yauhas 14:15-17; 15:10; 1 Yauhas 4:16) Tsis muaj ib yam dabtsi uas Xatas thiab lub qab ntuj no ua uas yuav cheem tau Yauhas kom nws tsis txhob hlub nws cov kwvtij nkauj muam.

19. Ib Yauhas 4:7 txhawb kom peb ua dabtsi thiab vim li cas?

¹⁹ Ib yam li Yauhas peb nyob hauv lub qab ntuj uas Xatas yog tus kav. Nws tsis hlub leejtwg li. (1 Yauhas 3:1, 10) Xatas xav kom peb tsis txhob hlub peb cov kwvtij nkauj muam. Tiamsis nws yeej yuam tsis tau peb yog peb tsis xav ua li nws hais. Peb cia li hlub peb cov kwvtij nkauj muam. Tej uas peb hais thiab tej uas peb ua yuav tsum qhia rau lawv tias peb hlub lawv tiag. Yog peb ua li no ces peb yuav zoo siab heev vim peb yog Yehauvas tsev neeg.​—Nyeem 1 Yauhas 4:7.