1. Orusuvero rwa Mukuru ru ku ṱuna vi?

OMUAPOSTELE Johanes wa tja: ‘Ndjambi orusuvero.’ (1 Joh. 4:8) Eṱe matu tjiwa kutja Mukuru ongu ri Omburo yomuinyo. Posi yokutja omambo ngo ma ye tu zemburukisa kutja orusuvero ru za ku ye. Jehova we tu suvera. Nu orusuvero rwe ru tjita kutja tu kare mondjeverero, tu kare nondjoroka nu wina tu kowe mu imbi mbi tu navyo.

2. (a) Omatwako yeṋe yevari omananḓengu nge ri mu Mateus 22:37-40? (b) Ongwaye tji mape ya a rire ouzeu okuṱakamisa etwako indi oritjavari?

² Ovakriste mave sokuraisasana orusuvero, mena rokutja etwako ndi ve sokukongorera. (Lesa Mateus 22:37-40.) Indu tji matu tjiwa Jehova nawa, irira oupupu kweṱe okuṱakamisa etwako indi etenga. Iho omena rokutja Jehova ohomonena nu u rikendera kweṱe nokutuṱira otjari. Posi yokutja, mape ya ai rire ouzeu okuṱakamisa etwako indi oritjavari. Omena raye? Mena rokutja ovakambure ovakwetu, mbe ri ovandu wopopezu na eṱe tjinene kavandu ohomonena. Kunao, owo povikando mape ya ave hungire oviṋa poo ave tjiti oviṋa mbi hi nokuraisa orusuvero kweṱe. Jehova aa tjiwa kutja ma rire ouzeu kweṱe okuṱakamisa etwako ndo. Kunao, eye wa ungurisa ovakarere ve tjiva okutjanga omambo wOmbeibela ngu maye tu hongo kutja ongwaye tji matu sokuraisasana orusuvero nomuano mu matu yenene okutjita nao. Omutjange umwe womambo ngo wa ri Johanes.—1 Joh. 3:11, 12.

3. Johanes wa tja vi ohunga norusuvero?

³ Momambo Johanes nga tjanga, eye aa yarukire po kutja Ovakriste mave sokuraisa orusuvero. Johanes tja tjanga ohunga  nekuruhungi ra Jesus, eye wa ungurisa embo ndi ‘orusuvero’ na indi ‘okusuvera’ povikando ovingi tjinene okukapita ovatjange wOmaevangeli inga owarwe yetatu. Johanes wa ri nozombura ape esere indu tja tjanga embo ra Johanes notutuu tutatu twa Johanes. Omambo wOmbeibela ngo ye tu honga kutja oviṋa avihe mbi matu tjiti mavi sokuhingwa i yorusuvero. (1 Joh. 4:10, 11) Posi yokutja, kwa kambura oruveze ku Johanes okurihonga epu ndo.

4. Hapo Johanes aruhe aa raisa orusuvero ku varwe?

⁴ Indu Johanes tja ri omurumendu omutanda, eye kaa raisa orusuvero aruhe. Otjotjihorera, otjikando tjimwe Jesus novahongewa ve aave pitire moSamaria okuyenda koJerusalem. Ovandu mokarongo kemwe okaṱiṱi moSamaria kaave vanga okuvesekirisa. Hapo Johanes wa tjita vi? Eye nerumbi re Jakobus va ningira Jesus kutja owo ve raukise omuriro okuza keyuru kutja u ningiririse ovandu mbo. (Luk. 9:52-56) Nu otjikando tjarwe, Johanes ka raisire orusuvero kovaapostele ovakwao. Eye nerumbi re Jakobus va raera ina okuningira Jesus kutja me ve pe otuveze otunanḓengu mOuhona we. Indu ovaapostele varwe tji va zuva otjiṋa ho, owo va pindikire tjinene. (Mat. 20:20, 21, 24) Posi yokutja, Jesus wa suverere Johanes nandarire kutja wa tjita ozondataiziro ozengi nḓo.—Joh. 21:7.

5. Morupa ndwi matu ka konḓonona ye?

⁵ Morupa ndwi, matu katara kotjihorera tja Johanes noviṋa tjiva mbya tjanga ohunga norusuvero. Okutjita nao maku tu vatere okutjiwa omuano mu matu yenene okuraisa orusuvero kovakambure ovakwetu. Nu wina matu ke rihonga ohunga nomuano omunanḓengu otjiuru tjeṱunḓu mu matji yenene okuraisa orusuvero keṱunḓu.

6. Omomuano uṋe Jehova me tu raisira kutja we tu suvera?

⁶ Eṱe mape ya atu ripura kutja matu hepa okukara noumune ouwa ohunga novandu poo okuveraera oviṋa oviwa uriri, kutja tu ve raisire orusuvero. Posi yokutja, indu tji twa suvera ovandu tjiri eṱe matu sokuveraisira kutja twe ve suvera mokuvetjitira oviṋa oviwa. (Sasaneka Jakobus 2:17, 26.) Otjotjihorera, Jehova we tu suvera. (1 Joh. 4:19) Nu u tu raera kutja we tu suvera okupitira mOmbeibela. (Eps. 25:10; Rom. 8:38, 39) Posi yokutja, eṱe matu tjiwa kutja Mukuru we tu suvera mena roviṋa mbye tu tjitira nungwari kaviṋa mbye hungira uriri. Johanes wa tja: “Ndjambi wa raisa orusuvero rwe ku eṱe, indu tja hinda Omuna we erike porwe kouye, kokutja eṱe tu  mune omuinyo mu Ye.” (1 Joh. 4:9) Jehova wa yandjera Omuna we omusuverwa okutuṱira. (Joh. 3:16) Kunao tu nongamburiro kutja tjiri Jehova we tu suvera.

7. Jesus wa tjita ye okuturaisira orusuvero?

⁷ Jesus wa raera ovahongewa ve kutja we ve suvera. (Joh. 13:1; 15:15) Eye wa raisa kutja we ve suvera na eṱe wina, movitjitwa vye nungwari kamomambo uriri. Jesus wa tja: “Orusuvero orunenenene omundu ndwe na ro komapanga we eendu tji me ve yandjere omuinyo we.” (Joh. 15:13) Indu tji matu ripura ohunga na imbi Jehova na Jesus mbi ve tu tjitira, hapo iho tji tu hinga okutjita vi?

8. Otjikeṋa tji matu sokutjita otja 1 Johanes 3:18?

⁸ Eṱe tu raisa kutja twa suvera Jehova na Jesus indu tji matu kara nonḓuviro kuwo. (Joh. 14:15; 1 Joh. 5:3) Nu Jesus we tu rakiza kutja ngatu suverasane. (Joh. 13:34, 35) Eṱe katu sokuraera ovakambure ovakwetu kutja twe ve suvera uriri, nungwari wina tu sokuraisa movitjitwa. (Lesa 1 Johanes 3:18.) Ovikeṋa tjiva mbi matu yenene okutjita okuraisa kutja twe ve suvera?

9. Orusuvero rwa hinga Johanes okutjita ye?

⁹ Johanes a tja ungura puna ihe okutjita ovimariva ovingi mongetjefa yawo yomahundju. Posi yokutja, eye wa ungurisa oruveze rwe okuvatera varwe okurihonga ouatjiri ohunga na Jehova na Jesus. Ehupo Johanes nda toorora karari epupu. Eye aa tatumisiwa nu kuṱa komaandero weserewondo etenga indu tja kurupire, eye wa huurirwe. (Oviung. 3:1; 4:1-3; 5:18; Omavan. 1:9) Nandarire indu Johanes tja ri motjovakamburwa mena rokuzuvarisa ohunga na Jesus, eye wa raisa kutja wa suverere varwe. Otjotjihorera, ngunda e ri mokakoverwahi ka Patmos, eye wa tjanga embo rOmavandururiro nu a hindi kozombongo kokutja ze tjiwe “imbi mbi mavi sokutjitwa tjimanga.” (Omavan. 1:1) Indu Johanes tja za nokukuturwa motjovakamburwa moPatmos, eye wa tjanga Evangeli ohunga nehupo ra Jesus notjiungura tje tjokuzuvarisa. Eye wina wa tjanga otutuu tutatu kokutja ma yanḓiparise nokutunduuza ovakambure ovakwao. Hapo matu yenene vi okuhorera komuano Johanes ma ungurisa ehupo re okuvatera varwe?

10. Omomuano uṋe mu mo raisa kutja wa suvera ovandu?

¹⁰ Ove mo raisa kutja wa suvera ovandu mu imbi mbi mo toorora okutjita mehupo roye. Ouye wa Satan u vanga kutja tu ripurire kweṱe oveni mokuripahera ovimariva ovingi, poo okurira ovandu ovatjiukwa. Nungwari Ovakriste avehe mouye ve ungurisa oruveze rwawo okuzuvarisa ombuze ombwa nokuvatera varwe okutumbuka popezu na Jehova. Nu nandarire tjiva ve yenena okuzuvarisa oruveze aruhe.

11. Omomuano uṋe ovazuvarise ovengi ovaṱakame mu ve raisa kutja va suvera Jehova novakambure ovakwao?

¹¹ Ovakriste ovengi ve hepa okuungura oruveze aruhe, kokutja ve yenene okuritumba oveni nokutumba omaṱunḓu wawo. Nandarire nao, ovazuvarise mbo ve kondja pu mave yenene okuyandja oruvara kotjira tja Mukuru. Otjotjihorera, tjiva ve vatera indu tji kwa tjitwa oumba poo okuvatera nomatungiro wotuveze twomerikotameneno. Nu auhe wetu ma yenene okuyandja oviyandjewa vyouharupu koviungura vyouye auhe. Owo ve tjita oviṋa mbyo mena rokutja va suvera Mukuru na varwe. Otjivike atjihe tu raisa kutja twa suvera ovakambure ovakwetu mokuyenda kozombongarero zombongo nokukakara norupa. Nandarire kutja twaurwa tu  yenda kozombongarero nḓo. Nu kutja matu tira, eṱe tu zira. Tu yanḓiparisa varwe komurungu poo kombunda yombongarero, nandarire kutja tuna omauzeu wetu oveni. (Hebr. 10:24, 25) Tjiri tu nondangi koviungura ovakambure ovakwetu mbi ve ungura.

12. Omomuano uṋe warwe Johanes ma raisa kutja wa suvera ovakambure ovakwao?

¹² Johanes karaisire orusuvero kovakambure ovakwao mokuvetanga uriri, nungwari wina eeve rongo. Otjotjihorera, motutuu twe, Johanes wa tanga ovakambure ovakwao mena rongamburiro yawo noviungura vyawo oviwa. Posi yokutja, wina we ve ronga oukukutu ohunga nokutjita ouvi. (1 Joh. 1:8–2:1, 13, 14) Momuano otjingewo, eṱe wina matu hepa okutanga ovakambure ovakwetu koviungura oviwa mbi ve ungura. Posi yokutja, indu omundu tja utu okuraisa ongaro ombi poo okutjita oviṋa mbi mape ya avi teya oupanga we kuna Jehova, eṱe matu yenene okumuraisira orusuvero mokumuvyura momuano omuwa. Ku hepa ouvanḓe okuronga omundu, posi yokutja Ombeibela i tja omapanga yatjiri ye upikasana poo ye yandjasana ondunge.—Omiano 27:17.

13. Ovikwaye mbi tu ha sere okutjita?

¹³ Povikando tjiva tu raisa kutja twa suvera ovakambure ovakwetu mokuhina okupindika tjimanga mena roviṋa mbi va hungire. Tara ku imbi mbya tjitwa ku Jesus kuṱa komaandero wehupo re kombanda yehi. Eye wa raera ovahongewa ve kutja mave sokurya onyama ye nokunwa ombinḓu ye kutja ve kare nomuinyo. (Joh. 6:53-57) Omambo we ngo ya temisa ovahongewa va Jesus ovengi. Kunao tjiva va isa okumukongorera, posi yokutja omapanga we omaṱakame tjimuna Johanes va kara puna ye. Owo kaave tjiwa kutja Jesus aa hee tjike nu iho mape ya tje ve temisa wina. Posi yokutja, owo kaave munu kutja Jesus wa hungire oviṋa ovivi nokupindika. Nungwari owo va ri nongamburiro mu ye mena rokutja aave tjiwa kutja eye aa hungire ouatjiri. (Joh. 6:60, 66-69) Kunao, ounanḓengu kweṱe okuhina okupindika tjimanga mena roviṋa varwe mbi va hungire. Nungwari ngatu ve yandjere kutja ve kahurure imbi mbi va hungire.—Omiano 18:13; Omuzuv. 7:9.

14. Ongwaye tji tu ha sokutonda ovakambure ovakwetu?

¹⁴ Johanes wina we tu rakiza kutja atu ha tondo ovakambure ovakwetu. Indu tji tu ha ṱakamisire erakiza ndo ma rire oupupu  okupopwa i Satan. (1 Joh. 2:11; 3:15) Iho tja tjitwa ku tjiva komaandero weserewondo etenga O.Z. Oruveze ndwo Satan aa kondjo nomasa okutjita kutja ovakarere va Mukuru ve tondasane nu pekare ohaṋi mokati kawo. Oruveze ndwi Johanes tja tjanga otutuu twe, tjandje ovarumendu mbaave kondjo okutjita tjimuna Satan va rira orupa rwombongo. Otjotjihorera, Diotrefes aa kondjo okuyeta ohaṋi mombongo. (3 Joh. 9, 10) Eye kaa raisa ondengero kovatarere mbaave hindwa i yorutu orunane okukavarura ozombongo. Eye wina wa rora okuramba ovandu mombongo mbe sekirisa ovandu mbe ha vanga. Iho tja ri otjiṋa otjivi tjinene okutjita. Satan ngamba u kondja nomasa okuhaṋa ovakarere va Mukuru. Kunao atu roro okutonda ovakambure ovakwetu nokuisa okuvevatera.

15. Ovikeṋa otjiuru tjeṱunḓu mbi matji sokuzemburuka?

¹⁵ Omuano umwe omunanḓengu otjiuru tjeṱunḓu mu matji yenene okuraisa orusuvero omokutumba eṱunḓu. (1 Tim. 5:8) Posi yokutja, eye ma sokuzemburuka kutja ounanḓengu tjinene ku ye okuvatera eṱunḓu re kutja ri kare noupanga ouwa kuna Jehova. (Mat. 5:3) Ripura notjihorera Jesus tja raisira oviuru vyomaṱunḓu. Embo ra Johanes ri tu raera kutja, indu Jesus ngunda e hiya ṱa ee ripura ohunga neṱunḓu re. Johanes wa kuramene puna Maria ina ya Jesus, poruveze Jesus pa twirikirwe. Nandarire kutja Jesus wa ri momihihamo, eye wa ningira Johanes okutjevera ina. (Joh. 19:26, 27) Jesus wa ri novangu novaṱena mbu mave yenene okuvatera ina noviṋa mbi ma hepa. Posi yokutja, pe munika tjimuna oruveze ndwo tjandje ngunda owo kave ya rira ovahongewa va Jesus. Kunao Jesus aa vanga omundu ngu ma tjevere ina Maria nokumutunduuza kutja ma kayenda komurungu okukarera Jehova.

16. Hapo Johanes wa ri nomerizirira yeṋe?

¹⁶ Johanes wa ri nomerizirira omengi. Eye wa ri umwe wovaapostele, kunao aa hepa okuungura nomasa motjiungura tjokuzuvarisa. Eye wina mape ya wa kupire, kunao aa hepa okutumba eṱunḓu re nokuvevatera okukara noupanga ouwa kuna Mukuru. (1 Kor. 9:5) Hapo oviuru vyomaṱunḓu mavi rihongere ko tjike ndino?

17. Ongwaye tje ri ounanḓengu kotjiuru tjeṱunḓu okuvatera eṱunḓu okukara noupanga ouwa kuna Jehova?

¹⁷ Omurumendu omukambure ngu ri otjiuru tjeṱunḓu mape ya a kara nomerizirira warwe  omananḓengu. Otjotjihorera, eye ma sokuungura oukukutu poviungura vye kokutja ma yandje ondjozikiro ku Jehova. (Ef. 6:5, 6; Tit. 2:9, 10) Nu mape ya a kara nomerizirira mombongo tjimuna okutunduuza ovakambure, nokuhongorera po otjiungura tjokuzuvarisa. Wina ounanḓengu ku ye okukonḓonona aruhe Ombeibela pu nomukazendu we novanatje. Owo tjiri mave kara nondangi kozongondjero azehe nḓe tjita okuvevatera kutja ve kare ovaveruke, ve kare nondjoroka nokuvevatera kutja ve kayende komurungu okurikotamena ku Jehova.—Ef. 5:28, 29; 6:4.

18. Johanes wa ri nongamburiro muye?

¹⁸ Johanes wa hupa ozombura ozengi nu zondjoroka. Eye wina wa muna omauzeu omengi pekepeke nga tja ye ngundiparisa ongamburiro ye. Posi yokutja, aruhe aa kondjo pu ma yenene okuṱakamisa omatwako wa Jesus, tjimuna okusuvera ovakambure ovakwao. Nu mena ranao, Johanes wa ri nongamburiro kutja Jehova na Jesus ve mu suvera nu mave mu pe omasa okutuurunga omauzeu ngamwa aehe. (Joh. 14:15-17; 15:10; 1 Joh. 4:16) Satan nouye we mbwi kaa u yenene okutjaera Johanes okuraisa orusuvero kovakambure ovakwao, momambo novitjitwa vye.

19. 1 Johanes 4:7 ri tu tunduuza okutjita ye, nu omena raye?

¹⁹ Tjimuna Johanes, eṱe wina tu hupa mouye mbu honaparerwa po i Satan, ngu hi norusuvero kovandu. (1 Joh. 3:1, 10) Nandarire kutja u vanga kutja tu ise okusuvera ovakambure ovakwetu, eye kamaa yenene okutuṋiṋikiza okutjita nao. Eṱe ngatu kondje pu matu yenene okusuvera ovakambure ovakwetu, mokuveraisira kutja twe ve suvera moviṋa mbi matu hungire nokutjita. Indu tji twe ve raisire orusuvero ndwo eṱe matu kara nondjoroka okurira orupa rweṱunḓu ra Jehova nu matu kara nouṋingandu mehupo.—Lesa 1 Johanes 4:7.